1. Mwomwo ika tuvosena vatela kutuhuhumwina, nakwitavila vyuma navatuhuhumuna?

 TUVOSENA twasakiwa kutuhuhumuna kuswa kumwe. Shimbu jimwe tunahase kulweza mutu uze twavumbika chikuma mangana atwolole. Kaha lwola lweka nawa, ndumbwetu umwe nahase kwiza nakutulweza ngwenyi, tunaputuka kuya “mujila yakuhenga,” kulumbununa kulinga vyuma vize natukaliveya. (Ngale. 6:1) Shimbu jimwe nawa vanahase kutuhuhumuna kachi nge tunalingi vyuma vimwe vyavipi. Shikaho twatela kwitavilanga vyuma navatuhuhumuna chamokomoko najila navatuhuhumwinamo. Kulinga ngocho nachitunganyalisa nakukatuyovola.—Vishi. 6:23.

2. Kweseka namazu ahali Vishimo 12:15, mwomwo ika twatela kwitavila kutuhuhumuna nakukavangiza vyuma navatulweza kulinga?

² Chisoneka chamutwe wachihande chatukolezeza ‘tutengelekenga matwitwi etu kumazu amuka-mangana.’ (Vishi. 22:17) Kakweshi mutu atachikiza vyuma vyosenako, oloze kwatwama mutu umwe uze atwama nachinyingi nauhashi chikuma kuhambakana yetu. (Tangenu Vishimo 12:15.) Shikaho kwitavila vyuma navatuhuhumuna nachisolola nge twapwa vakulinyisa. Cheji kusololanga nawa nge twatachikiza hakumina ngolo jetu, kaha nawa twasakiwa kutukafwa mangana tutesemo vyuma natusakula kulinga. Yehova ahwiminyinyine Mwangana wamangana Solomone asoneke ngwenyi: “Vyuma vyeji kutesangamo nge vaka-kulweza mangana vanavulu.”—Vishi. 15:22.

3. Mujijila muka jivali vanahase kutuhuhumwinamo?

³ Shimbu jimwe vanahase kutuhuhumuna kuli ndumbwetu. Chakutalilaho, mukulwane muchikungulwilo chipwe ndumbwetu weka wakuhya kushipilitu nahase kutulweza vyuma vimwe vize twatela kuzachilaho. Kachi nge ndumbwetu mwatuhuhumuna kuzachisa jindongi jamuMbimbiliya, kaha twatela kwitavila vyuma mwatuhuhumuna nakuvikavangiza. Oloze kunahase kupwa jila yikwavo yakutuhuhumwinamo. Jila muka vene oyo? Chakutalilaho, tunahase kutanga mujimbu umwe muMbimbiliya chipwe mumikanda  yetu, uze unahase kutulingisa tushinganyeke havyuma tunasakula kulinga nakwalumunako vyuma vimwe.—Hepe. 4:12.

4. Kweseka namazu ahali Muka-kwambulula 7:9, chuma muka chize katwatela kulingako nge vanatuhuhumuna?

⁴ Chapwa chachikalu kwitavila nakukavangiza vyuma mwatuhuhumuna ndumbwetu. Shimbu jimwe tunahase nakupihilila, mwomwo ika? Numba tuhu twatachikiza ngwetu katwakupukako, oloze chinahase kutukaluhwila kwitavila nge ndumbwetu mwatulweza vyuma tunalimbenje. (Tangenu Muka-kwambulula 7:9.) Tunahase kulihakwila etu vavene. Tunahase kuhuhwasana uze mwatuhuhumuna chipwe kumuhana mulonga hajila natuhuhumwinamo. Tunahase kumuwanyina katenga nakuhanjika ngwetu: ‘Katelanga kunguhuhumuna mujila kanako mwomwo naikiye eji kulimbenjanga.’ Kuhona kuzanga jila navatuhuhumwinamo, chinahase kutulingisa tuliule vyuma navatuhuhumuna chipwe kuya kuli mutu weka atukafwe.

5. Vyuma muka natushimutwila muchihande chino?

⁵ Muchihande chino natushimutwila havyakutalilaho vyamuMbimbiliya vyavatu vaze vetavilile kuvahuhumuna navaze vakanyine. Natushimutwila nawa havyuma navitukafwa twitavile kutuhuhumuna nanganyo nayifumamo.

6. Vyuma muka natulinangula kuli Mwangana Lehovowame hajila akwilililemo kukuhuhumuna?

⁶ Tutalenu hachakutalilaho chaLehovowame. Omu Lehovowame apwile mwangana wavaIsalele, vatu jenyi vejile kuli ikiye nakumulomba mangana ahone kuvayanjisa ngana muze alingile ise Solomone. Lehovowame alingile kanawa hakuhulisa malunga vavakulwane vavaIsalele, vamulweze omwo atela kukumbulula vatu jenyi. Vaze malunga vavakulwane valwezele ou mwangana ngwavo, kachi nge mwalinga vyuma vize vamulombele vatu jenyi, kaha navamukundwizanga lika. (Vamya. 1, 12:3-7) Chipwe ngocho, Lehovowame kasuulukile navyuma vamulwezeleko, ngocho ayile nakwihula vakwavo vakweze muvakolelelenga. Ava malunga vavakweze vapwile pamo vamumyaka yamuji 40. Shikaho pamo vapwileko nachinyingi chimwe. (Miji. 2, 12:13) Oloze halwola kana valwezele ou mwangana vyuma vyakuhenga. Vamulwezele ngwavo avamwenese makava. (Vamya. 1, 12:8-11) Hakuwana nge Lehovowame vamukafwile mujijila jivali, ngocho atelelele kulomba kuli Yehova mangana amukafwe atachikize jila yakwoloka atela kukavangiza. Oloze chaluvinda, etavilile vyuma vize vyamwivwishile kuwaha vize vamulwezele vakwavo vakweze. Chuma asakwile kulinga chamunehelele ukalu nakunehela nawa ukalu vaIsalele. Chochimwe nayetu, shimbu jimwe jila navatuhuhumwinamo kayeshi kuhasa kutusuulwisako, oloze nge kuhuhumuna kana chinazame hamazu aKalunga, kaha twatela kuchitavila.

7. Uno chakutalilaho chaMwangana Ujiya chatunangula vyuma muka?

⁷ Mwangana Ujiya akanyine kumuhuhumuna. Ou mwangana engilile mukapete kamutembele yaYehova muze mwengililenga kaha vapilishitu. Engilile omu mukapete mangana alumbe vyuma vyalivumba lyamwaza. Vapilishitu jaYehova vamulwezele ngwavo: “Ove Ujiya, kachatelemo ove kulumbila Yehova vyuma vyalivumba lyamwazako! Vapilishitu vakiko kaha vatela kulumba vyuma vyalivumba lyamwaza.” Uno Ujiya alingile ngachilihi? Nge alinyishile nakwitavila vyuma vamuhuhumwine nakufuma mutembele hahaze vene, kachi Yehova amukonekelele. Oloze “Ujiya apihililile.” Mwomwo ika akanyinyine kumuhuhumuna? Ashinganyekele ngwenyi, hakupwa mwangana apwile nalisesa lyakulinga kala vyuma mwasaka. Oloze Yehova ketavilile vishinganyeka kanako. Mwomwo yakupwa nakazamuzamu, Ujiya vamuvetele namusongo wambumba, ngocho “apwile lika nambumba palanga nakulikumbi afwile.” (Miji. 2, 26:16-21) Chakutalilaho chaUjiya chatunangula nge, chamokomoko nachihela twatwama nacho muliuka lyaYehova, nge natukana kuhuhumuna chize chazama haMbimbiliya, kaha Yehova keshi kutwivwila uselewako.

8. Uno Yopa alingile ngachilihi omu vamuhuhumwine?

⁸ MuMbimbiliya mwatwama nawa vyakutalilaho vyamwaza vyavatu vaze vakiswile mwomwo yakwitavila kuvahuhumuna. Tutalenu chakutalilaho chaYopa. Numba tuhu evwilenga Kalunga woma oloze kapwile wakukupukako. Lwola lumwe omu apwile muukalu ahanjikile mazu akuhenga. Ngocho vamuhuhumwine kuli Elihu naYehova chakuzeneka kuhita mutenga. Uno Yopa alingile ngachilihi? Etavilile vyuma vamuhuhumwine, kaha ambile ngwenyi: “Ngwahanjikanga vyuma vize kangwanangakanangako . . . Ngunaliveye hamazu ngwahanjikanga, ngunapihilila nakulimbila mulukungu namuuto.” Shikaho, Yehova akiswile Yopa mwomwo alinyishile.—Yopa 42:3-6, 12-17.

9. Uno Mose alingile ngachilihi omu vamuhuhumwine, kaha atuhana chakutalilaho muka chamwaza?

⁹ Mose nawa himutu uze atuhana chakutalilaho chamwaza uze etavilile vyuma vamuhuhumwine omu alimbenjele chikuma. Lwola lumwe apihililile chikuma, ngocho alingile vyuma vize vyasolwele nge kavumbikile Yehovako. Mwomwo yachuma kanechi alingile, Mose kavamwitavishile kwingila muLifuchi lyaLushikoko. (Kula. 20:1-13) Omu Mose alembelelele Yehova alumune vishinganyeka vyenyi, Yehova amulwezele ngwenyi: “Kanda ukahanjika cheka nayami hachihande kanechiko.” (Lushi. 3:23-27) Chipwe ngocho, Mose kakwachile matotoko, oloze etavilile mazu amulwezele Yehova. Ngocho Yehova atwalileho lika kumuzachisa mangana atwaminyine vaIsalele. (Lushi. 4:1) Yopa naMose vetavilile omu vavahuhumwine, ngocho twatela kuvalondezeza. Yopa etavilile vyuma alimbenjele nakuhona kulihakwila. Mose asolwele ngwenyi etavilile vyuma amuhuhumwine Yehova hakutwalaho lika kupwa wakushishika numba tuhu kavamwitavishile kwingila muLifuchi lyaLushikoko.

10. (a) Kweseka naVishimo 4:10-13, kutokwa muka chatwama hakwitavila vyuma vize navatuhuhumuna? (b) Muchima muka wamwaza vanasololanga vandumbwetu vamwe omu vanavahuhumunanga?

¹⁰ Kachi nge natulondezeza chakutalilaho chamalunga vakushishika vakufwana nge Yopa naMose, kaha natunganyala chikuma. (Tangenu Vishimo 4:10-13.) Vandumbwetu vavavulu vanalondezezanga malunga vakushishika nakwitavila kuvahuhumuna. Ivwenu vyuma ahanjikile ndumbwetu Emmanuel wamuDemocratic Republic of Congo omu vamuhuhumwine. Ambile ngwenyi: “Omu vandumbwami muchikungulwilo vamwene ngwavo ngunaputuka kuzeya kushipilitu vangukafwile. Ngwevwililile vyuma vanguhuhumwine, kahechi changukafwile nguhone kwingila muukalu.” * Payiniya umwe wamuCananda walijina lyaMegan ahanjikile kutalisa kukuhuhumuna ngwenyi: “Shimbu jimwe kangwazangilenga jila vanguhuhumwinyinemoko, olozenyi chapwile chakutamo kunguhuhumuna.” Ndumbwetu Marko wamuCroatia ambile ngwenyi: “Vangutambwile milimo muchikungulwilo. Oloze nge nangushinganyeka havyuma vanguhuhumwine, ngweji kumonanga ngwami chapwile chakutamo mwomwo vyangukafwile nguzame kushipilitu.”

11. Vyuma muka ahanjikile ndumbu Karl Klein kutalisa kukwitavila vyuma navatuhuhumuna?

¹¹ Mutu mukwavo uze etavilile kumuhuhumuna shina Ndumbwetu Karl Klein uze apwile muLizavu lyaKutwaminyina. Ou Ndumbwetu Klein ahanjikile mumujimbu wakuyoya chenyi omu vamuhuhumwine kuli sepa lyenyi Joseph F. Rutherford. Ndumbu Klein ahanjikile ngwenyi, hakavanga kasuulukile najila vamuhuhumwinyinemoko. Ambile ngwenyi: “Likumbi lyakavangijileho, [Ndumbu Rutherford] angumenekele nachisambo ngwenyi, ‘Halo Karl!’ oloze ngwamukumbulwile nalizu lyamwishi. Ndumbu Rutherford angulwezele ngwenyi, ‘Karl zangama, Liyavolo ali nakusaka kukwoza.’ Ngwevwile sonyi,  ngocho ngwamukumbulwile ngwami, ‘kangwasulakanyineko Ndumbu Rutherford.’ Ndumbu Rutherford ejivile ngwenyi ngunapihilila, ngocho angulwezele cheka ngwenyi, ‘ukalu wauchi, oloze zangama, Liyavolo ali nakusaka kukwoza.’ Mazu ahanjikile amuchano, vandumbwetu vakwechi lisesa lyakutuhuhumuna, ngocho nge natuvajinda mwomwo yakutukafwa, kaha Liyavolo mwatufungulula.” * (Efwe. 4:25-27) Ndumbu Klein etavilile vyuma vamuhuhumwine kuli Ndumbu Rutherford, ngocho usepa wavo kawafwileko.

12. Uno kulinyisa nachitukafwa ngachilihi twitavile vyuma navatuhuhumuna? (Samu 141:5)

¹² Vyuma muka navitukafwa twitavile kutuhuhumuna? Twatela kupwanga vakulinyisa mwomwo twatachikiza ngwetu katwakupukako, kaha nawa shimbu jimwe tunahase kulinga vyuma vyakuhenga. Nganomu tunevu lyehi Yopa naikiye apwilenga navishinganyeka vyakuhenga. Oloze kutwala muze, alumwine vishinganyeka vyenyi, kaha Yehova amukiswile. Mwomwo ika? Mwomwo Yopa apwile wakulinyisa. Asolwele kupwa wakulinyisa hakwitavila vyuma vamuhuhumwine kuli Elihu numba tuhu Elihu apwile kanyike hali ikiye. (Yopa 32:6, 7) Kulinyisa chinahase kutukafwa twitavile vyuma navatuhuhumuna numba nge tunamono ngwetu kuhuhumuna kana kachatuteleleleko, chipwe nge mutu ali nakutuhuhumuna kanyike. Mukulwane umwe muchikungulwilo mulifuchi lyaCanada ambile ngwenyi: “Hakuwana nge katwalitachikiza nganomu vatutachikiza vakwetuko, ngocho chinahase kutukaluhwila kuzovoloka kachi nge kaveshi kutuhuhumunako.” Tuvosena twafwila kupwa namihako yashipilitu, nakufwila nawa kuzata mulimo wakwambulula nakunangula vatu.—Tangenu Samu 141:5.

13. Uno twatela kumona ngachilihi vyuma navatuhuhumuna?

¹³ Kutuhuhumuna chasolola nge Kalunga atuzanga. Yehova atachikiza vyuma vyamwaza vize twasaka. (Vishi. 4:20-22) Kalunga eji kusololanga ngwenyi atuzanga, kuhichila muMazu enyi, namumikanda yetu, chipwe muli ndumbwetu wakuhya kushipilitu. Kaha hali WavaHepeleu 12:9, 10 vasonekaho ngwavo: “Eji kulinganga ngocho mangana tunganyale.”

14. Twatela kushishika havyuma muka nge vanakutuhuhumuna?

¹⁴ Shinganyekenu havyuma navamihuhumuna keshi hajila navamihuhumwinamoko. Shimbu jimwe tunahase kushinganyeka ngwetu, jila vatuhuhumwinangamo yapwanga yakuhenga. Chipwe ngocho, mutu uze ali nakuhuhumuna mukwavo, atela kuhanjika mujila yize nayilingisa mutu uze vali nakuhuhumuna evwilile. * (Ngale. 6:1) Oloze kachi nge yetu vali nakuhuhumuna,  twatela kushishika kaha havyuma vanakutuhuhumuna keshi kushinganyeka ngwetu vanatuhuhumuna mujila yakuhengako. Tunahase kulihulisa ngwetu: ‘Numba tuhu kangwasuulukile najila vananguhuhumwinamoko, uno vyuma vananguhuhumuna navingukafwa tahi? Kutala ngwatela kuliula tutenga twamutu uze ali nakunguhuhumuna nakutala kaha havyuma ali nakunguhuhumuna tahi?’ Shikaho nachipwanga kaha chamwaza kutalanga hanganyo nayifuma havyuma navatuhuhumuna.—Vishi. 15:31.

15. Mwomwo ika twatela kulombanga vakwetu vatukafwe?

¹⁵ Mbimbiliya yatukolezeza tulombenga vakwetu vatukafwe. Hali Vishimo 13:10 vasonekaho ngwavo: “Vaze navehula vakwavo vavakafwe vakwechi mangana.” Mazu kana apwa amuchano. Vatu vaze veji kulwezanga vakwavo vavakafwe, veji kuzovolokanga chikuma kushipilitu kuhambakana vaze kavalweza vakwavo vavakafweko. Shikaho lombenunga vamikafwe.

16. Mujijila muka tunahase kulomba vakwetu vatukafwe?

¹⁶ Lwola muka twatela kulweza vandumbwetu vatukafwe? Tunahase kulinga ngocho, mujijila jitatu. (1) Ndumbwetu wapwevo nahase kulweza muka-kwambulula wakulindunuka ayenga nenyi kuchilongesa chenyi. Kaha kufumaho nahase kumuhulisa amulweze vyuma atela kulinga mangana ahotole uhashi wenyi wakunangula. (2) Nge ndumbwetu wapwevo ali nakusaka kulanda uvwalo umwe, nahase kuhulisako ndumbwetu weka wapwevo wakuhya kushipilitu mangana amulweze numba nge uvwalo anakusaka kulanda uli kanawa. (3) Kachi nge ndumbwetu walunga ali nakuhana chihande chenyi chatete chalikungumbuwa, nahase kulwezako ndumbwetu weka uze eji kuhanjikanga kanawa vihande evwilile kuchihande chenyi nakumulweza vyuma vize atela kuzachilaho. Navandumbwetu vaze vanahanjikanga vihande hamyaka yayivulu, vanahase kulweza vandumbwavo veka vavakafwe haze vatela kuzachila nakukavangiza vyuma navavalweza.

17. Natunganyala ngachilihi nge natwivwilila vyuma navatuhuhumuna?

¹⁷ Muvyalumingo chipwe mutukweji vanakwiza kulutwe, tuvosena vanahase kutuhuhumuna kuli vandumbwetu chipwe kuzachisa Mbimbiliya namikanda yetu. Shikaho nge chuma kanechi chinasoloka, kaha twatela kukanuka vishina tunashimutwila. Twatela kukapwa vakulinyisa nakukashishika havyuma navakatuhuhumuna keshi hajila navakatuhuhumwinamoko. Twatela nawa kuketavila nakukavangiza vyuma navakatuhuhumuna. Kakweshi mutu asemuka namanganako. Oloze Mazu aKalunga atufwelelesa ngwawo, kachi nge ‘natwivwilila kumazu akutuhuhumuna nakwitavila vatunangule, kaha natupwa tuvaka-mangana.’—Vishi. 19:20.