1. Thurâwn kan dawn chhante chu eng nge ni thei a, engvângin nge thurâwn kan mamawh ṭheuh?

KAN za hian thurâwn mamawh châng kan nei ṭheuh va. Dinhmun ṭhenkhatah chuan, kan mi zah tak tu emaw hnênah thurâwnte kan dîl hmasa ṭhîn a. Dinhmun dangahte chuan, min ngaihtuahtu unaupa pakhatin min rawn panin, kan inchhîr lehna tûr “sual” tihna lam kan pan mêk tih min rawn hrilh mai thei. (Gal. 6:1) A tâwp berah chuan, thil sual lian tak kan tih hnuah, min siam ṭhatu thurâwn leh zilhna kan dawng pawh a ni thei. Thurâwn kan dawn chhan chu eng pawh ni se, kan pawm tûr a ni a. Chutianga pawm chu kan tân a ṭhain, kan nun a humhim thei a ni.—Thuf. 6:23.

2. Thufingte 12:15-na thu nêna inmilin, engvângin nge thurâwn kan pawm ang?

² Kan thuziak ṭanchhan Bible chângin “mi fing thu ngaithla” tûrin min fuih a. (Thuf. 22:17) Mihringte zîngah hian thil hre vek thei tu mah kan awm lo; keini aia hriatna leh thiltawn ngah zâwk tu emaw an awm ṭhîn. (Thufingte 12:15 chhiar rawh.) Chuvângin, thurâwn pawm hi inngaihtlâwmna lantîrna a ni. Chu chuan tih theih chin tâwk kan nei tih leh kan thiltumte hlen tûrin ṭanpuina kan mamawh tih kan hriatzia a târ lang a. Lal fing Solomon-a chuan thlarauva thâwk khumin: “Remhria [a nih loh leh, thurâwn petu] an tam chuan a hlawhtling ṭhîn,” tiin a ziak a ni.—Thuf. 15:22.

3. Eng kawngtein nge thurâwn kan dawn mai theih?

³ Thurâwn chu a pehhêl zâwngin emaw, tlang takin emaw kan dawng thei a. A pehhêl zâwnga pêk thurâwn kan tih hian eng kan tihna nge ni? Kan thiltih mêk min ngaihtuahtîrtu leh inthlâk danglam tûra min chêttîrtu thu eng emaw chu Bible-ah, a nih loh leh thu leh hla chhuahah kan chhiar thei a. (Heb. 4:12) Chu chu a pehhêl zâwnga pêk thurâwn kan ti thei ang. A nih  chuan, tlang taka pêk thurâwn kan tih hian eng kan tihna nge ni? Kohhran upa pakhat, a nih loh leh thlarau lama puitling unau pakhatin hma kan lâk a ngaihna lai min rawn hrilh pawh a ni thei a. Chu chu tlang taka pêk thurâwn tia sawi theih a ni. Tu emawin Bible ṭanchhan thurâwn min pe ngam khawpa min hmangaih a nih chuan, a thu min hrilh tûrte ngaithla a, nunpuina hmangin kan lâwmzia kan lantîr tûr a ni.

4. Thuhriltu 7:9-a sawi angin, thurâwn kan dawn hunah eng ang chhân lêt dân nge kan pumpelh ang?

⁴ Dik taka sawi chuan, tlang taka pêk thurâwn pawm chu harsa kan ti thei a. Kan lungni lo hial pawh a ni thei. Engvângin nge? Kan ṭha famkim lo tih chu pawm nghâl ṭhîn mah ila, tu emawin kan tlin lohna eng emaw bîk tak min rawn hrilh hunah, chu thurâwn chu pawm harsa kan ti thei a ni. (Thuhriltu 7:9 chhiar rawh.) Mahni insawi thiam kan tum thei a. Thurâwn min pêk chhan chu kan ringhlel emaw, min pêk dânah kan lungni lo emaw thei a ni. Chu bâkah, ‘Thurâwn min pe tûrin dikna eng nge a neih? Ani pawhin tlin lohnate chu a nei ve tho!’ tia ngaihtuahin, thurâwn min petu chu kan sawisêl duh hial thei a ni. A tâwpah, thurâwn kan dawn chu kan rîlrem zâwng a nih loh chuan, kan ngaihthah emaw, kan thu hriat duh zâwng min hrilhtu tûr min dang kan zawng emaw pawh a ni thei.

5. He thuziakah hian eng nge kan sawiho vang?

⁵ He thuziakah hian thurâwn hnâwltute leh pawmtute chungchâng Bible-a entîrnate kan sawiho vang a. Thurâwn pawm tûr leh hlâwkpui tûra min ṭanpui theitu pawh kan sawiho bawk ang.

6. Lal Rehoboama’n a thurâwn dawnte a chhân lêt dân aṭangin eng nge kan zir?

⁶Rehoboama entîrna hi han ngaihtuah teh. Israel lal a nih ṭan chuan, a mite’n thil pakhat an dîl a. A pa Solomona’n an chunga phurrit a siam chu tihzânsak tûrin an ngên a ni. Rehoboama’n a chhân lêt dân tûr hriat nâna Israel upate a râwn chu a fakawm hle. Upate chuan lalin mite thil dîl a tihsak chuan, ani chu an thlâwp reng dâwn tih an hrilh a ni. (1 Lal. 12:3-7) Upate thurâwn pêk a pawm loh avângin, a rualpui mipate chu a râwn a. Anni chu kum 40 chho bâwr vêl an nih a rinawm avângin, thiltawn eng emaw chen chu an nei ngei ang. (2 Chro. 12:13) Mahse, tûn ṭumah hi chuan, Rehoboama chu thurâwn ṭha lo tak an pe a. Mite phurrit chu tihzualsak tûrin an hrilh a ni. (1 Lal. 12:8-11) Thurâwn inang lo pahnih a dawn avângin, Rehoboama chuan a zawm zâwk tûr chungchângah ṭawngṭaiin Jehova a pan thei a. Mahse, chutianga ti lovin, ani chuan a duh zâwng thurâwn chu pawmin, kum naupang zâwkte thurâwn pêk ang chuan thil a ti ta a. Chu chuan amah leh a mi Israelte chungah sawhkhâwk ṭha lo tak a thlen a ni. Keini pawh, thurâwn kan dawnte chu kan thu hriat duh zâwng a ni reng lo thei a. Mahse, Pathian Thu ṭanchhana pêk a nih phawt chuan, kan pawm tûr a ni.

7. Lal Uzia entîrnain eng nge min zirtîr?

⁷Lal Uzia chuan thurâwn a hnâwl a. Jehova biak ina puithiamte chauh luh phalna hmunah lûtin, rimtui hâl a tum a. Puithiamte chuan: “Uzi, LALPA tâna rimtui hâl hi i tih tûr a ni lo va, rimtui hâl tûra tihhran . . . puithiamte tih tûr a ni zâwk e,” tiin an hrilh a ni. Engtin nge Uzia’n a chhân lêt? Thurâwn chu inngaitlâwm taka pawmin, biak in chu chhuahsan nghâl se chuan, Jehova’n a ngaidam pawh a ni thei. Mahse, “Uzia chu a thinur ta a.” Engvângin nge a thurâwn dawn chu a hnâwl? Lal a nih avângin a duh apiang ti thei tûrah a inngai a ni ngei ang. Mahse, Jehova chuan chutiangin a thlîr lo. Luhlul taka thil a tih avângin, phâr  hriin a man a, “a thih nî thlengin a lo phâr ta a.” (2 Chro. 26:16-21) Uzia entîrna chuan eng ang mi pawh ni mah ila, Bible ṭanchhana pêk thurâwn kan hnâwl chuan, Jehova duhsakna kan chân ang tih min zirtîr a ni.

8. Engtin nge Joba’n thurâwn a dawn chu a chhân lêt?

⁸ Kan sawiho tâk vaukhânna entîrnate nêna inang lo takin, Bible-ah hian thurâwn an pawm avânga malsâwmna dawngtu entawn tûr ṭhate an awm a ni. Joba hi han ngaihtuah teh. Ani chu Pathian ṭih mi mah ni se, ṭha famkim a ni bîk lo. Nêksâwrna nasa tak hnuaia a awm laiin, ngaih dân dik lo ṭhenkhat a sawi chhuak a. Chuvângin, Elihua leh Jehova hnên aṭangin thurâwn khauh tak a dawng a ni. Engtin nge Joba’n a chhân lêt? Thurâwn chu inngaitlâwm takin a pawm a. Ani chuan: “Ka hriat loh thilte ka sawi. . . . Ka inten a, vut leh vaivuta ṭhuin ka sim ta e,” tiin a sawi. Inngaitlâwm taka a chhân lêtna avângin Jehova’n mal a sâwm a ni.—Joba 42:3-6, 12-17.

9. Engtin nge Mosia’n thurâwn pawm chungchângah entawn tûr ṭha a siam?

⁹Mosia chu thil sual lian tak a tih hnua siam ṭhatna pawmtu entawn tûr ṭha tak a ni a. Ṭum khat chu, a thinrim a insûm zawh loh avângin Jehova a chawimawi lo va. Chu chuan Ram Tiama luh theihna chanvo hlu chu a chântîr a ni. (Num. 20:1-13) Mosia’n chu thu tlûkna avânga a lungnih loh thu a sawi chuan, Jehova’n: “He thu-ah hian mi be leh tawh suh,” tiin a hrilh a. (Deut. 3:23-27) Mosia chu thinrimin a awm lo. Chu aiin, Jehova thu tlûkna siam chu a pawm a, ani chuan Israel hruaitu atân a hmang zawm zêl a ni. (Deut. 4:1) Joba leh Mosia chu thurâwn pawm chungchângah kan tân entawn tûr ṭha an ni a. Joba chuan a thlîr dân chu a siamrem a; chhuanlam a siam lo. Mosia chuan a ngaihhlut tak Ram Tiama luh theihna chanvo hlu a chân hnuah pawh rinawm taka awm zawm zêlin Jehova thurâwn pêk a pawmzia a lantîr a ni.

10. (a) Thufingte 4:10-13-na chuan thurâwn kan hlâwkpui dân chungchângah eng nge a târ lan? (b) Unau ṭhenkhatin thurâwn an dawn chungchângah eng rilru put hmang ṭha nge an lantîr?

¹⁰ Joba leh Mosia te ang mi rinawmte entawn tûr siam zui chu kan hlâwkpui a. (Thufingte 4:10-13 chhiar rawh.) Kan unau tam takte chuan chutiang chiah chuan an ti a ni. Congo rama awm unau Emmanuel-a’n vaukhânna a dawn chungchânga a thusawi hi lo chhinchhiah teh: “Kan kohhrana unau puitling takte chuan ka thlarau lam lawngin kehchhiat lam a pan tih an hmuh chuan, min ṭanpui nghâl vat a. An thu min râwnte chu ka nunpui a, chu chuan buaina tam tak pumpelh tûrin min ṭanpui a ni,” * tiin a sawi. Canada rama awm pioneer Unaunu Megan-i chuan thurâwn chungchângah: “Thurâwn ka dawnte hi ka thu hriat duh zâwng a ni reng lo; mahse, ka hriat ngai thute a ni ṭhîn,” tiin a sawi. Croatia rama awm unau Marko-a pawhin: “Kohhranah chanvo hlu ka chân a; mahse, ka’n thlîr lêt leh hian, zilhna ka dawn chuan thlarau lama inbûk tâwk leh tûrin min ṭanpui tih ka hria,” tiin a sawi.

11. Unau Karl Klein-a’n thurâwn pawm chungchângah eng nge a sawi?

¹¹ Thurâwn hlâwkpuitu zînga entawn tûr ṭha dang leh chu Governing Body member nia rawngbâwl Unau Karl Klein-a hi a ni a. A nun kawng chanchinah, Unau Klein-a chuan a ṭhian hnai tak Unau Joseph F. Rutherford-a hnên aṭangin thurâwn khauh tak a dawn thu a sawi a. Unau Klein-a chuan a thurâwn dawn chu a tîrin a chhâng ṭha lo tih tlang takin a sawi. Ani chuan: “A hnua [Unau Rutherford-a’n] mi hmuh leh chuan, hawihhâwm takin, ‘Hello Karl,’ tiin mi bia a. Mahse, ka rilru  a la nat reng avângin, phun deuh sepin ka chibai lêt a. Ani chuan, ‘Karl, fîmkhur rawh! Diabola’n a châng reng che!’ tiin min hrilh a. Ka zah avângin, ‘Unau Rutherford, ka lungni lo hlei nêm,’ tiin ka chhâng a. Mahse, ka lungni lo tih a hriat avângin, ‘A ṭha a lâwm; mahse, fîmkhur rawh. Diabola’n a châng reng che,’ tiin min vaukhân nawn leh a ni. A va sawi dik tak êm! Unaupate chunga lungnih lohna kan pai reng hian, a bîk takin, . . . thurâwn min pe tûra dikna nei unaupate chunga lungnih lohna kan pai reng hian, Diabola thangah awlsam takin kan âwk thei a ni,” * tiin a sawi. (Eph. 4:25-27) Unau Klein-a chuan Unau Rutherford-a thurâwn pêk chu a pawm a, inlaichînna ṭha an nei zawm zêl a ni.

12. Engtin nge inngaihtlâwmnain thurâwn pawm tûra min ṭanpui theih? (Sâm 141:5)

¹² Engin nge thurâwn pawm tûra min ṭanpui thei? Ṭha famkim lo kan ni tih leh âtthlâk taka thil tih chângte kan nei tih hriain, inngaihtlâwmna kan nei tûr a ni. Kan sawi tawh angin, Joba chuan thlîr dân dik lo a nei a. Mahse, a hnua a siamrem leh avângin Jehova’n mal a sâwm a ni. Engvângin nge? Joba chu mi inngaitlâwm tak a nih vâng a ni a. Ani chuan amah aia kum tam taka naupang zâwk Elihua thurâwn chu pawmin a inngaihtlâwmzia a lantîr a ni. (Job. 32:6, 7) Chutiang bawkin, inngaihtlâwmna chuan thurâwn mamawh lo nia kan inhriat hunah emaw, kan aia kum naupang zâwkin thurâwn min pêk hunah emaw pawh ni se, nunpui tûrin min ṭanpui ang. Canada rama kohhran upa pakhat chuan, “Mi dangte’n min hmuh anga mahni kan inhmuh ṭhin loh avângin, thurâwn min petu an awm loh chuan, engtin nge hma kan sâwn theih ang?” tiin a sawi. Kan zîngah hian thlarau rah hmêlhmangte neih chhoh zêlnaah leh Kristian rawngbâwlnaah tu nge hmasâwnna mamawh lo awm?—Sâm 141:5 chhiar rawh.

13. Engtin nge thurâwn kan dawn chu kan thlîr ang?

¹³Thurâwn chu Pathian hmangaihna lantîrna angin thlîr rawh. Jehova chuan kan tâna ṭha ber tûr chu min duhsak a. (Thuf. 4:20-22) A Thu te, Bible ṭanchhan thu leh hla chhuah te, leh Kristian unau puitling takte hmanga thurâwn min pêk hian min hmangaihzia a lantîr a ni. Hebrai 12:9, 10-na chuan: “Kan ṭhatna tûrin min thunun zâwk a ni,” tiin a sawi.

14. Thurâwn kan dawn hunah eng nge kan ngaihven tlat ang?

¹⁴Thurâwn pêk dân ni lovin, a thu chu ngaihven zâwk rawh. A châng chuan, thurâwn kan dawnte chu min pêk dân a fuh chiah lo niin kan ngai thei a. Ni e, thurâwn petu chuan pawm awlsam tûr zâwngin pêk a tum hrâm hrâm tûr  chu a ni ngei mai. * (Gal. 6:1) Mahse, a dawngtu kan nih chuan, a pêk dân chu fuh tâwk lo anga kan ngai a nih pawhin, a thu chu kan ngaihven tlat tûr a ni. Heti hian kan inzâwt thei ang: ‘Thurâwn min pêk dânah ka lâwm lo a nih pawhin, a thu-ah hian thu dik a tel em? Thurâwn min petu ṭhat famkim lohnate chu en lovin, a thu min hrilh hi hlâwkpui ka tum thei ang em?’ tiin. Thurâwn kan dawn eng pawh hlâwkpui tum chu kan tân a finthlâk hle ang.—Thuf. 15:31.

15. Engvângin nge thurâwn kan dîl ang?

¹⁵ Bible chuan thurâwn dîl tûrin min fuih a. Thufingte 13:10 C. L. Re-edited chuan: “Mi râwn ṭhin hi a finthlâk,” tiin a sawi a ni. A va dik tak êm! Thurâwn dawn hun nghâktu aiin a dîltu chuan thlarau lamah hma a sâwn chak zâwk fo ṭhîn. Chuvângin, thurâwn i dawn hmain dîl hmasa zâwk ang che.

16. Eng dinhmunahte nge thurâwn kan dîl theih?

¹⁶ Eng hunah nge kan Kristian unaute hnênah thurâwn kan dîl ang? Dinhmun ṭhenkhat hi han ngaihtuah teh. (1) Unaunu pakhat chuan Bible a zirpuinaah thiltawn ngah thuchhuahtu chu tel ve tûrin a sâwm a, a hnuah a zirtîr dâna hmasâwn a ngaihna laite chungchângah thurâwn a dîl a ni. (2) Pasal nei lo unaunu chuan thawmhnaw ṭhenkhat lei a tum a, a thawmhnaw lei tûr chungchângah thlarau lama puitling zâwk unaunu chu a ngaih dânte a zâwt a ni. (3) Unaupa chuan a vawi khatna atân vântlâng thusawi chanvo a nei a. Ani chuan a thusawi ngun taka lo ngaithla tûr leh hma a sâwn theih nâna thurâwn ṭangkai takte pe tûrin thusawi lama thiltawn ngah tak unaupa hnênah ṭanpuina a dîl a ni. Kum tam tak chhûng thusawi chanvo lo nei tawh ṭhîn unaupa pawhin, thusawi lama thiltawn ngah tak unaupate hnênah thurâwnte dîlin, chûngte chu a nunpui thei a ni.

17. Engtin nge thurâwn kan hlâwkpui theih?

¹⁷ Kan za hian a pehhêl zâwngin emaw, tlang takin emaw thurâwnte chu kan la dawng zawm zêl ang. Chutianga i dawn hunah, kan sawiho tâk thute kha hre reng la. Inngaitlâwm takin awm reng ang che. Thurâwn pêk dân ni lovin, a thu chu ngaihven tlat zâwk la. Thurâwn i dawnte chu nunpui ang che. Fing saa piang tu mah kan awm lo. Mahse, Bible chuan thurâwn, a nih loh leh ‘zilhna kan pawm a, thununna kan pawisak chuan kan lo fing’ ang tih min tiam a ni.—Thuf. 19:20.