1. Уынаффӕхъуаг кӕд вӕййӕм ӕмӕ-иу уынаффӕмӕ цӕмӕн хъуамӕ байхъусӕм?

 ИУ АДӔЙМАГӔЙ дӕр нӕй зӕгъӕн, ӕмӕ уынаффӕхъуаг никуы вӕййы. Иуӕй-иу хатт нӕхӕдӕг ракурӕм уынаффӕ, кӕй ныхасӕн аргъ кӕнӕм, уыцы адӕймагӕй. Йе та нын нӕ чырыстон хотӕй ӕмӕ ’фсымӕртӕй исчи, гӕнӕн ис, йӕхӕдӕг ратта уынаффӕ, цӕмӕй нӕ рӕдыд къахдзӕфӕй бахиза ӕмӕ фӕсмойнаг ма фӕуӕм (Гал. 6:1). Вӕййы ма афтӕ дӕр, ӕмӕ стыр рӕдыд сарӕзтам, ӕмӕ нын уый фӕстӕ чидӕр нӕ рӕдыдмӕ бацамыдта. Уынаффӕтӕ алыхуызон вӕййынц. Ӕмӕ-иу сӕм куы байхъусӕм, уӕд уый нӕхи пайдайӕн уыдзӕн. Уый фӕрцы, чи зоны, нӕ цард дӕр бахъахъхъӕнӕм (Ӕмб. 6:23).

2. Ӕмбисӕндтӕ 12:15 стихмӕ гӕсгӕ, уынаффӕмӕ хъусын цӕмӕн хъӕуы?

² Статьяйы сӕйраг стихы фыст ис, «зондджынты ныхӕстӕм... байхъус», зӕгъгӕ (Ӕмб. 22:17). Алцы чи зоны, ахӕм адӕймаг нӕй. Махӕй фылдӕр чи зоны ӕмӕ махӕй фылдӕр чи федта, ахӕмтӕ-иу алкӕддӕр разындзӕн. (Бакӕс Ӕмбисӕндтӕ 12:15.) Ӕмӕ, уынаффӕмӕ кӕй байхъусӕм, уымӕй равдисӕм сӕрныллӕгдзинад. Уымӕй бӕрӕг вӕййы, кӕй ӕмбарӕм, нӕхӕдӕг алцы кӕй нӕ зонӕм ӕмӕ нӕ иннӕты ӕххуыс кӕй хъӕуы, цӕмӕй нӕ нысӕнттӕ нӕ къухы бафтой. Зондджын паддзах Соломон ныффыста: «Бирӕ уынаффӕгӕнджытӕ кӕм уа, уым... алцыдӕр рауайдзӕн» (Ӕмб. 15:22).

3. Уынаффӕтӕ цавӕр вӕййынц?

³ Арӕх уынаффӕтӕ ссарӕм Библийы кӕнӕ нӕ публикациты. Цы кӕсӕм, уый нӕ, гӕнӕн ис, хъуыдытыл бафтауа ӕмӕ бамбарӕм, цыдӕр нӕ фӕивын кӕй хъӕуы (Дзут. 4:12). Хатт та нын уынаффӕ исчи ратты. Зӕгъӕм, хистӕр нӕлгоймаг кӕнӕ нын ӕндӕр фӕлтӕрдджын ӕфсымӕр, гӕнӕн ис, бацамона, фӕивын нӕ цы хъӕуы, уымӕ. Исчи нын Библимӕ гӕсгӕ уынаффӕ  куы ратта, уӕд уый ууыл дзурӕг у, ӕмӕ нӕ уарзгӕ кӕны. Ӕмӕ уынаффӕ нӕ зӕрдӕмӕ куы айсӕм, уӕд равдисдзыстӕм, бузныг дзы кӕй стӕм.

4. Уынаффӕ нын куы раттой, уӕд, Екклесиаст 7:9 стихмӕ гӕсгӕ, нӕхи цӕмӕй хъуамӕ хизӕм?

⁴ Ӕргом куы зӕгъӕм, уӕд уынаффӕмӕ байхъусын зындӕр вӕййы, исчи нын ӕй куы ратты, уӕд. Суанг ма йӕм, гӕнӕн ис, фӕхӕрам уӕм. Мах ӕмбарӕм, ӕнӕххӕст кӕй стӕм. Фӕлӕ нын уӕддӕр хъыг вӕййы, исчи нын нӕ рӕдыдмӕ куы бацамоны, уӕд. (Бакӕс Екклесиаст 7:9.) Гӕнӕн ис, нӕхи рӕстытӕ кӕнӕм кӕнӕ хъуыды кӕнӕм, ай та ӕдзух мӕн баййары, зӕгъгӕ. Иуӕй-иу хатт нӕ зӕрдӕмӕ нӕ фӕцӕуы, уынаффӕ нын куыд раттынц, уый. Чи зоны, хъуыды кӕнӕм: «Цы йӕ хъуыддаг ис? Йӕхицӕн куы зонид!» Афтӕтӕ куы хъуыды кӕнӕм, уӕд уынаффӕ ницӕмӕ ӕрдардзыстӕм. Йе та иннӕты рафӕрс-бафӕрс кӕндзыстӕм, цалынмӕ, нӕ зӕрдӕмӕ чи фӕцӕудзӕн, ахӕм уынаффӕ нӕ фехъусӕм, уӕдмӕ.

5. Ацы статьяйы цӕмӕ ӕркӕсдзыстӕм?

⁵ Ацы статьяйы ӕркӕсдзыстӕм, Библийы кӕй кой ис, уыцы адӕмӕй кӕйдӕрты цӕвиттонтӕм. Иутӕ сӕ уынаффӕ ницӕмӕ ӕрдардтой, иннӕтӕ та уынаффӕмӕ байхъуыстой. Аныхас ма кӕндзыстӕм, цы нын баххуыс кӕндзӕн, цӕмӕй-иу уынаффӕмӕ байхъусӕм, ӕмӕ-иу нын пайда ӕрхӕсса.

6. Паддзах Ровоам уынаффӕмӕ цы цӕстӕй ракаст, уымӕй цӕуыл ахуыр кӕнӕм?

⁶ Ӕркӕсӕм Ровоамы хабармӕ. Израилы паддзах куы сси, уӕд ӕм адӕм ӕрбацыдысты ӕмӕ йын загътой, цӕмӕй сын сӕ уаргъ фӕрогдӕр кодтаид. Йӕ фыд Соломон сыл уӕззау уаргъ сӕвӕрдта. Уӕд Ровоам бауынаффӕ кодта Израилы хистӕр лӕгтимӕ. Ӕмӕ раст бакодта. Уыдон ын загътой, адӕмы курдиат куы сӕххӕст кӕна, уӕд ын цӕрӕнбонты кӕй лӕггад кӕндзысты (1 Пад. 12:3–7). Фӕлӕ, ӕвӕццӕгӕн, сӕ уынаффӕ йӕ зӕрдӕмӕ нӕ фӕцыд. Ӕмӕ, кӕимӕ схъомыл, уыцы нӕлгоймӕгтимӕ уынаффӕ кӕнын райдыдта. Цыдаид сыл иу-цыппоргай азтӕ, ӕмӕ уыдон дӕр царды цыдӕртӕ федтаиккой (2 Аз. 12:13). Фӕлӕ ацы хатт Ровоамӕн радтой ӕвзӕр уынаффӕ. Загътой йын, цӕмӕй адӕмӕн сӕ уаргъ фӕуӕззаудӕр кӕна (1 Пад. 12:8–11). Ровоамӕн йӕ бон уыд Йегъовӕмӕ скувын ӕмӕ йӕ бафӕрсын, кӕй уынаффӕмӕ байхъуса, уымӕй. Фӕлӕ афтӕ нӕ бакодта. Йӕ зӕрдӕмӕ фӕцыд йе ’мгӕртты уынаффӕ, ӕмӕ, уыдон куыд загътой, афтӕ бакодта. Уый тыххӕй йӕхи дӕр ӕмӕ ӕнӕхъӕн адӕмы дӕр фыдбылызы баппӕрста. Ацы хабар нын цӕуыл дзурӕг у? Гӕнӕн ис, исчи нын ратта, нӕ зӕрдӕмӕ чи нӕ фӕцӕудзӕн, ахӕм уынаффӕ. Фӕлӕ нын кӕд уынаффӕ Библимӕ гӕсгӕ дӕтты, уӕд ӕм хъуамӕ байхъусӕм.

7. Паддзах Озийы хабар нын цӕуыл дзурӕг у?

⁷ Паддзах Ози дӕр уынаффӕ ницӕмӕ ӕрдардта. Иухатт бацыд Йегъовӕйы кувӕндонмӕ, будсудзӕн нывондхӕссӕн кӕм лӕууыд, уырдӕм, цӕмӕй дзы буд ссыгътаид. Уырдӕм бацӕуыны бар та ӕрмӕстдӕр сауджынтӕн уыд. Сауджынтӕ йын загътой: «Йегъовӕйӕн буд судзын дӕ хӕс нӕу, Ози. Буд судзын сауджынты... хӕс у». Фӕлӕ «Ози мӕстӕй рафыхт». Гъеныр сӕрныллӕгдзинад куы равдыстаид, сауджынтӕм куы байхъуыстаид ӕмӕ кувӕндонӕй уайтагъд куы рацыдаид, уӕд ын, чи зоны, Йегъовӕ ныххатыр кодтаид. Цымӕ Ози уынаффӕмӕ цӕуылнӕ байхъуыста? Чи зоны, хъуыды кодта, зӕгъгӕ, ӕз паддзах дӕн, ӕмӕ мӕ бон у, цы мӕ фӕнды, уый аразын. Фӕлӕ Йегъовӕ афтӕ нӕ хъуыды кодта. Ози йӕхиуыл кӕй фервӕссыд ӕмӕ йын бар кӕмӕн нӕ уыд, ахӕм хъуыддаг кӕй сарӕзта, уый тыххӕй йыл Йегъовӕ хъотыр бафтыдта, ӕмӕ «йӕ мӕлӕты онг уыди хъотырджын» (2 Аз. 26:16–21). Озийы хабар нын  цӕуыл дзурӕг у? Чифӕнды ма уӕм, цавӕрфӕнды кадджын хӕстӕ ныл ма уа,– исчи нын Библимӕ гӕсгӕ уынаффӕ куы ратта ӕмӕ йӕ куы ницӕмӕ ӕрдарӕм, уӕд Йегъовӕйы хорзӕхӕй ӕнӕхай фӕуыдзыстӕм.

8. Иов уынаффӕмӕ цы цӕстӕй ракаст?

⁸ Библийы ма ис, уынаффӕмӕ чи байхъуыста ӕмӕ уый тыххӕй арфӕгонд чи ’рцыд, ахӕм адӕймӕгты цӕвиттонтӕ дӕр. Сӕ иу уыд Иов. Кӕд Иов Хуыцауы уарзта ӕмӕ йӕ алкӕддӕр фӕндыд йӕ зӕрдӕ рухс кӕнын, уӕддӕр ӕнӕрӕдигӕ нӕ уыд. Иухатт зын уавӕры куы уыд, уӕд ӕм рӕдыд хъуыдытӕ фӕзынд, ӕмӕ йӕ дзыхӕй цыдӕртӕ схауд. Уӕд ын Елиуй ӕмӕ Йегъовӕ уынаффӕ радтой. Иов сын сӕ уынаффӕтӕ йӕ зӕрдӕмӕ айста. Уый загъта: «Ӕз дзырдтон, фӕлӕ не ’мбӕрстон. [...] Ӕмӕ мӕ ныхӕстӕ фӕстӕмӕ исын, фӕсмон кӕнын, рыг ӕмӕ фӕнычы бадын». Ӕмӕ йын Йегъовӕ йӕ сӕрныллӕгдзинады тыххӕй раарфӕ кодта (Иов 42:3–6, 12–17).

9. Моисей нын фӕзминаг цӕмӕй у?

⁹ Ныр та аныхас кӕнӕм Моисейыл. Иухатт стыр рӕдыд ӕруагъта. Адӕммӕ мӕстӕй рафыхт ӕмӕ Йегъовӕйы не скадджын кодта. Уӕд ын Йегъовӕ загъта, уый тыххӕй Зӕрдӕвӕрд зӕхмӕ кӕй нӕ бацӕудзӕн (Ным. 20:1–13). Моисей Йегъовӕйӕн ныллӕгъстӕ кодта, цӕмӕй йӕ уырдӕм бацӕуын бауагътаид. Фӕлӕ йын Йегъовӕ загъта: «Уый кой мын макуыуал скӕн» (Дык. з. 3:23–27). Моисей не смӕсты ӕмӕ Йегъовӕйы ныхасыл дыууӕ нал загъта. Ӕмӕ йын Йегъовӕ бар радта, цӕмӕй дарддӕр дӕр израилӕгтӕн разамынд лӕвӕрдтаид (Дык. з. 4:1). Иов дӕр ӕмӕ нын Моисей дӕр сты фӕзминаг. Иов йӕхи нӕ рӕстытӕ кодта ӕмӕ йӕ зондахаст аивта. Моисей та дарддӕр дӕр Йегъовӕйӕн иузӕрдионӕй лӕггад кодта, кӕд, цӕмӕ бӕллыд, уымӕй ӕнӕхай фӕци, уӕддӕр.

10. а) Ӕмбисӕндтӕ 4:10–13 стихтӕм гӕсгӕ, хорз цӕмӕн у уынаффӕмӕ хъусын? б) Иуӕй-иутӕ цы зӕгъынц, уынаффӕмӕ кӕй байхъуыстой, уый тыххӕй?

¹⁰ Иов ӕмӕ Моисейы хуызӕн иузӕрдион лӕггадгӕнджыты куы фӕзмӕм, уӕд нын уый стыр пайда фӕуыдзӕн. (Бакӕс Ӕмбисӕндтӕ 4:10–13.) Нӕ хотӕ ӕмӕ не ’фсымӕртӕй бирӕтӕ байхъусынц уынаффӕмӕ. Ӕфсымӕр Эммануэль цӕры Конгойы. Уый радзырдта: «Ӕмбырды фӕлтӕрдджын ӕфсымӕртӕ уыдтой, мӕ хабар хорз кӕй нӕу, гыццыл ма бахъӕуа, ӕмӕ Йегъовӕйӕ адард уыдзынӕн. Ӕмӕ мын баххуыс кодтой. Уынаффӕ дӕр мын радтой. Кӕй сӕм байхъуыстон, уый фӕрцы бирӕ фыдбылызтӕй аирвӕзтӕн» *. Хо Меган у пионер, цӕры Канадӕйы. Уый загъта: «Уынаффӕ-иу мын куы радтой, уӕд-иу мын уый алы хатт ӕхсызгон нӕ уыд. Фӕлӕ-иу мын цы загътой, уый-иу раст уыд». Ӕфсымӕр Марко та цӕры Хорватийы. Ӕмӕ уый та афтӕ загъта: «Ӕмбырды мыл цы кадджын хӕстӕ уыд, уыдонӕй ӕнӕхай фӕдӕн. Фӕлӕ йӕ ныр ӕмбарын: ӕфсымӕртӕ мын мӕ рӕдыдмӕ кӕй бацамыдтой ӕмӕ мын уынаффӕ кӕй радтой, уый фӕрцы та Йегъовӕмӕ баввахс дӕн».

11. Ӕфсымӕр Клейн уынаффӕмӕ хъусыны тыххӕй цы загъта?

¹¹ Уынаффӕмӕ хъусын хорз кӕй у, уый ма бӕрӕг у ӕфсымӕр Карл Клейны цӕвиттонӕй дӕр. Уый лӕггад кодта Разамонӕг советы. Йӕ биографийы радзырдта, иухатт ыл цы хабар ӕрцыд, уый тыххӕй. Йе ’мбал Джозеф Рутерфорд ын цӕйдӕр тыххӕй бауайдзӕф кодта. Клейнмӕ уый хъыг фӕкаст. Уый радзырдта: «Уый фӕстӕ мыл ӕфсымӕр Рутерфорд амбӕлд ӕмӕ мын хъӕлдзӕгӕй загъта: „Салам, Карл!“ Мӕнӕн мӕ маст нӕма ссыди, ӕмӕ йын ӕнӕбары салам радтон. Уӕд мын уый загъта: „Карл, къӕрцхъус у. Хӕйрӕг дӕ фӕдыл зилы!“ Ӕз куыддӕр фефсӕрмы дӕн, ӕмӕ  йын афтӕ бакодтон: „Нӕ, ӕфсымӕр Рутерфорд, алцыдӕр хорз у“. Фӕлӕ уый ӕмбӕрста, цы кӕнын, уый. Ӕмӕ та мын загъта: „Омӕ хорз. Фӕлӕ къӕрцхъус у. Хӕйрӕг дӕ фӕдыл зилы!“ Ӕмӕ мӕнгӕй ницы загъта. Ӕфсымӕр нын уынаффӕ куы ратта, уӕлдайдӕр ын уый бар куы уа, уӕд, ӕмӕ йӕм мах та нӕ зӕрдӕйы маст куы хӕссӕм... уӕд нӕхи Хӕйрӕджы къӕппӕджы ӕппарӕм» (Еф. 4:25–27) *. Клейн Рутерфорды уынаффӕмӕ байхъуыста. Ӕмӕ дарддӕр дӕр хӕларӕй цардысты.

12. Сӕрныллӕгдзинад нын куыд баххуыс кӕндзӕн уынаффӕмӕ байхъусынӕн? (Псалом 141:5).

¹² Цы нын баххуыс кӕндзӕн, цӕмӕй-иу уынаффӕмӕ байхъусӕм? Хъӕуы нӕ сӕрныллӕгдзинад. Хъуамӕ нӕ зӕрдыл дарӕм, ӕнӕххӕст кӕй стӕм ӕмӕ нӕ иуӕй-иу хатт ӕнӕзонд ныхӕстӕ кӕй схауы, стӕй ӕнӕзонд митӕ кӕй акӕнӕм. Гыццыл раздӕр куыд загътам, афтӕмӕй иуафон Иов уыд рӕдыд зондыл хӕст. Фӕлӕ уый фӕстӕ йӕ зондахаст аивта, ӕмӕ йын Йегъовӕ уый тыххӕй раарфӕ кодта. Иов равдыста сӕрныллӕгдзинад. Уый байхъуыста Елиуйы уынаффӕмӕ, кӕд дзы Елиуй бирӕ кӕстӕр уыд, уӕддӕр (Иов 32:6, 7). Мах дӕр сӕрныллӕг куы уӕм, уӕд-иу уынаффӕмӕ байхъусдзыстӕм, нӕхицӕй кӕстӕр чи у, уый нын ӕй куы дӕтта кӕнӕ нӕм афтӕ куы кӕса, ӕмӕ ницӕмӕй рӕдийӕм, уӕддӕр. Канадӕйӕ иу хистӕр нӕлгоймаг загъта: «Нӕ бон нӕу нӕхи фӕрсырдыгӕй уынын. Ӕмӕ-иу нын уынаффӕ куы ничи ратта, уӕд куыд ивдзыстӕм?» Ӕмӕ ӕцӕгдӕр, кӕй бон у афтӕ зӕгъын, ӕмӕ, сыгъдӕг тыхы дыргъмӕ цы миниуджытӕ хауы, уыдоныл кусын ӕй нал хъӕуы ӕмӕ йӕ йӕ лӕггады дӕр фӕхуыздӕр кӕнын ницыуал хъӕуы? (Бакӕс Псалом 141:5.)

13. Уынаффӕ нын куы раттынц, уӕд уый цӕуыл дзурӕг вӕййы?

¹³ Уынаффӕ дын куы раттынц, уӕд уый вӕййы Йегъовӕйы уарзондзинадыл дзурӕг. Уый фӕнды, цӕмӕй амондджын уӕм (Ӕмб. 4:20–22). Ӕмӕ нын йӕ Ныхасы уылты, Библи ӕмбарынгӕнӕн публикацийы уылты кӕнӕ фӕлтӕрдджын чырыстоны уылты уынаффӕ куы ратты, уӕд афтӕмӕй равдисы, бирӕ нӕ кӕй уарзы. Библийы фыст ис: «Уый... нын зонд амоны нӕхи пайдайӕн» (Дзут. 12:9, 10).

14. Уынаффӕ нын куы раттой, уӕд-иу цӕуыл хъуамӕ ахъуыды кӕнӕм?

¹⁴ Ахъуыды кӕн, цавӕр уынаффӕ дын радтой, ууыл, куыд дын ӕй радтой, ууыл нӕ, фӕлӕ. Хатт нӕм афтӕ фӕкӕсы, ӕмӕ нын уынаффӕ нӕ ныхыл нытътъӕпп ластой. Кӕй зӕгъын ӕй хъӕуы, уынаффӕ чи дӕтты, уый хъуамӕ бацархайа, цӕмӕй немӕ фӕлмӕнӕй аныхас кӕна, ӕмӕ нын ӕнцондӕр уа уынаффӕмӕ байхъусын (Гал. 6:1) *. Фӕлӕ, немӕ куыд ныхас кодта, уый нӕ зӕрдӕмӕ куы нӕ  фӕцӕуа, уӕддӕр хъӕуы, цы нын загъта, ууыл ахъуыды кӕнын. Ис ахӕм фарстатыл ахъуыды кӕнӕн: «Уынаффӕ мын куыд радта, уый мӕ зӕрдӕмӕ нӕ фӕцыд. Фӕлӕ мын цымӕ ӕцӕгдӕр раст нӕ загъта? Хуыздӕр нӕ уаид, йӕ хъӕндзинӕдтӕм ын куы нӕ ныккомкоммӕ уаин, фӕлӕ мын цы загъта, уый мын куыд баххуыс кӕндзӕн, ууыл куы ахъуыды кӕнин?» Уынаффӕ-иу нӕ зӕрдӕмӕ куы айсӕм, уӕд уый уыдзӕн зондыл дзурӕг (Ӕмб. 15:31).

15. Иннӕтимӕ цӕмӕн хъуамӕ уынаффӕ кӕнӕм?

¹⁵ Ӕмбисӕндты 13:10 стихы фыст ис: «Уынаффӕ чи кӕны, уыдонмӕ... ис зонд». Уый ӕцӕгдӕр афтӕ у. Иннӕтимӕ чи уынаффӕ кӕны, уый фӕлтӕрдджын чырыстон тагъддӕр суыдзӕн. Уӕдӕ-иу ма ӕнхъӕлмӕ кӕсӕм, исчи нын уынаффӕ кӕд ратдзӕн, уымӕ, фӕлӕ-иу нӕхӕдӕг искӕмӕй уынаффӕ ракурӕм.

16. Цавӕр уавӕрты ис иннӕтӕй уынаффӕ ракурӕн?

¹⁶ Иннӕ чырыстӕттӕй уынаффӕ ракурӕн кӕд вӕййы? Ӕркӕсӕм цалдӕр цӕвиттонмӕ. 1) Хо Библийы ахуырмӕ фӕхуыдта фӕлтӕрдджын хъусынгӕнӕджы. Ӕмӕ йӕ уый фӕстӕ афарста, йӕ бон куыд уаид Библийы ахуыр хуыздӕр уадзын. 2) Моймӕдзыд чи нӕу, ахӕм хойы фӕнды хӕлаф балхӕнын. Ӕмӕ фӕлтӕрдджын хойы йӕ хъуыдыйӕ фӕрсы. 3) Ӕфсымӕрӕн фыццаг хатт бахӕс кодтой ӕмбырды ӕргом раныхас радзурын. Ӕмӕ фӕлтӕрдджын ӕфсымӕрӕн загъта, цӕмӕй-иу ын йӕ раныхасмӕ лӕмбынӕг байхъуса ӕмӕ йын уый фӕстӕ зӕгъа, фӕхуыздӕр кӕнын ӕй цы хъӕуы, уый. Раныхӕстӕ бирӕ азты дӕргъы чи дзуры, ахӕм ӕфсымӕрӕн дӕр йӕ бон у иннӕ фӕлтӕрдджын ӕфсымӕрты бафӕрсын, фӕхуыздӕр кӕнын ӕй цы хъӕуы, уымӕй.

17. Цы хъӕуы, цӕмӕй нын уынаффӕ пайда ӕрхӕсса?

¹⁷ Райсом, иннӕбон, иннӕ къуыри кӕнӕ иннӕ мӕй цавӕрдӕр уынаффӕ ӕнӕмӕнг фехъусдзыстӕм. Ӕмӕ нын уӕд, ацы статьяйы цы хъуыдытӕ ис, уыдон баххуыс кӕндзысты. Хъуамӕ уӕм сӕрныллӕг. Хъуамӕ-иу, уынаффӕ нын куыд радтой, ууыл ма хъуыды кӕнӕм, фӕлӕ нын цы загътой, ууыл, ӕмӕ-иу уынаффӕмӕ байхъусӕм. Зондджынӕй ничи райгуыры. Фӕлӕ нын Хуыцауы Ныхас дзуры, уынаффӕмӕ куы хъусӕм ӕмӕ зондамынд нӕ зӕрдӕмӕ куы исӕм, уӕд нӕ зондджын адӕймӕгтӕ кӕй рауайдзӕн (Ӕмб. 19:20).