مطالعے دا مضمون نمبر 7
سیانیاں دِیاں گلاں سنو
سیانیاں دِیاں گلاں نُوں کن لا کے سُن تاکہ توں میری تلیم تے دل لاویں۔—امثال 22:17۔
گیت نمبر 35: ضروری گلاں تے دھیان دَوو
مضمون تے اِک نظر *
1. (الف) ساڈے ساریاں دی اِصلاح کیس طرحاں ہوندی اے؟ (ب) اِصلاح نُوں قبول کرن نال سانوں کیہہ فائدہ ہوئے گا؟
سانوں ساریاں نُوں کدی نہ کدی اِصلاح دی لوڑ پیندی اے۔ کدی کدار شاید اَسی آپ کسے کولوں کوئی مشورہ منگنے آں۔ یاں کدی کدار شاید کوئی بھین بھرا سانوں خبردار کردا اے کہ اَسی کوئی غلط قدم چکن والے آں جدی وجہ توں سانوں بعد چ پچھتانا پووے گا۔ (گلتیوں 6:1) یاں فیر ہو سکدا اے کہ ساڈے کولوں بوہت وڈی غلطی ہو جائے تے کوئی سانوں سمجھائے کہ سانوں اپنی درستی کرنی چاہی دی اے۔ بھانویں ساڈی اِصلاح کسے وی وجہ توں کیتی جائے، سانوں اوہنوں قبول کرنا چاہی دا اے۔ ایہدے چ ساڈا ای بھلا اے تے اِنج ساڈی زندگی بچ سکدی اے۔—عبرانیوں 12:11۔
2. امثال 12:15 دے مطابق سانوں اِصلاح نُوں کیوں قبول کرنا چاہی دا اے؟
2 ایس مضمون دی مرکزی ایت چ سانوں کہیا گیا اے کہ اَسی سیانیاں دِیاں گلاں نُوں سنیے۔ (امثال 22:17) ایہو جیہا کوئی وی انسان نئیں جیہڑا سب کجھ جان دا ہووے۔ سانوں زندگی چ ایہو جہے لوک ضرور مِلن گے جنہاں کول ساڈے توں زیادہ علم تے تجربہ اے۔ (امثال 12:15 نُوں پڑھو۔) جے اَسی اِصلاح نُوں قبول کرنے آں تے ایہدے توں ثابت ہوندا اے کہ اَسی خاکسار آں۔ ایہدے توں ایہہ وی ظاہر ہوندا اے کہ اَسی ایہہ جاننے آں کہ کیہڑا کم ساڈے وَس چ ہے وے تے کیہڑا نئیں تے سانوں اپنے منصوبیاں نُوں پورا کرن لئی دُوجیاں دی مدد دی لوڑ اے۔ بادشاہ سلیمان نے خدا دے الہام نال ایہہ گل لکھی: جے صلاح نہ ملے تے منصوبے پورے نئیں ہوندے پر جے صلاح دین والے بوہت ہون تے کامیابی مِلدی اے۔—امثال 15:22۔
توانوں ایہناں وچوں کیہڑے طریقے توں اِصلاح نُوں قبول کرنا مشکل لگدا اے؟ (پیراگراف نمبر 3، 4 نُوں ویکھو۔)
3. ساڈی اِصلاح کیہڑے دو طریقیاں نال ہو سکدی اے؟
3 ساڈی اِصلاح فرق فرق طریقیاں نال ہو سکدی اے۔ ہو سکدا اے کہ اَسی بائبل چوں کوئی گل پڑھئے یاں فیر ساڈیاں کتاباں، ویڈیوز یاں عبادتاں چ کوئی ایہو جہی گل دَسی جائے جدے توں پتہ چلے کہ فلاں معاملے بارے سانوں اپنے اندر بہتری لیان دی لوڑ اے۔ (عبرانیوں 4:12) اِک ہور طریقے نال وی ساڈی اِصلاح ہو سکدی اے۔ ہو سکدا اے کوئی بندہ ساڈی اِصلاح کرے۔ مثال لئی، شاید کلیسیا دا کوئی بزرگ یاں کوئی پُختہ مسیحی سانوں دَسے کہ سانوں کتھے بہتری لیان دی لوڑ اے۔ جے کوئی بندہ ساڈے نال پیار کردا تے بائبل دے ذریعے ساڈی اِصلاح کردا اے تے سانوں اوہدی گل سننی چاہی دی اے تے اوہدے تے عمل کر نا چاہی دا اے۔
4. جدوں ساڈی اِصلاح کیتی جاندی اے تے واعظ 7:9 دے مطابق سانوں کیہہ نئیں کرنا چاہی دا؟
4 کدی کدار جدوں کوئی ساڈی اِصلاح کردا اے تے شاید سانوں اوہدی گل سننا تے اوہدے تے عمل کرنا مشکل لگے۔ یاں فیر شاید سانوں بُرا لگے۔ کیوں؟ اَسی ایہہ گل تے مننے آں کہ اَسی عیبدار آں تے ساڈے کولوں غلطیاں ہوندیاں نیں۔ پر جے کوئی ہور آ کے سانوں دَسے کہ ساڈے کولوں کیہڑی غلطی ہوئی اے تے سانوں اپنے اندر بہتری لیان دی لوڑ اے تے شاید سانوں چنگا نہ لگے۔ (واعظ 7:9 نُوں پڑھو۔) شاید اَسی اوہنوں صفائیاں دینا شروع کر دَئیے۔ یاں شاید سانوں لگے کہ اوہنے ساڈی اِصلاح صحی نیت نال نئیں کیتی۔ یاں فیر جیس طریقے نال اوہنے ساڈی اِصلاح کیتی اے، اوہ سانوں بُرا لگے۔ یاں فیر شاید اَسی اِصلاح کرن والے بندے چ غلطیاں کڈھن لگ پیئے تے ایہہ سوچئے: ”اوہنوں ساڈی اِصلاح کرن دا حق کنہے دِتا اے؟ اوہدے چ تے آپ اینیاں خامیاں نیں۔“ ایس طرحاں اَسی اوس بندے دی گل سُن کے اپنے اندر بہتری نئیں لیاواں گے۔ ایہدی بجائے اَسی کسے ایہو جہے بندے کولوں مشورہ لواں گے جدے بارے سانوں لگدا اے کہ اوہ سانوں اوہی گل کہوے گا جیہڑی ساڈی مرضی مطابق ہووے گی۔
5. ایس مضمون چ اَسی کیہڑیاں گلاں تے غور کراں گے؟
5 ایس مضمون چ اَسی بائبل چوں کجھ ایہو جہے لوکاں دِیاں مثالاں تے غور کراں گے جنہاں نے اِصلاح نُوں قبول نئیں کیتا سی۔ اَسی کجھ ایہو جہے لوکاں دِیاں مثالاں تے وی غور کراں گے جنہاں نے اِصلاح نُوں قبول کیتا۔ اَسی ایہہ وی ویکھاں گے کہ کیہڑی چیز ساڈی مدد کر سکدی اے تاکہ اَسی اِصلاح نُوں قبول کرئیے تے اوہدے توں فائدہ حاصل کرئیے۔
اِصلاح نُوں قبول نہ کرن والے لوک
6. رحبُعام نے مشورہ مِلن دے بعد جو کجھ کیتا، اوس توں اَسی کیہہ سکھنے آں؟
6 ذرا رحبُعام دی مثال تے غور کرو۔ جدوں اوہ اِسرائیل دا بادشاہ بنیا تے لوک اوہدے کول اِک درخاست لے کے آئے۔ اوہناں نے رحبُعام نُوں کہیا کہ اوہ اوس بوجھ نُوں گھٹ کر دَوے جیہڑا اوہدے پیو سلیمان نے اوہناں تے پایا سی۔ رحبُعام نے بنیاِسرائیل دے کجھ وڈیرے بندیاں نال مشورہ کیتا کہ اوہنوں ایہناں لوکاں دی درخاست دا کیہہ جواب دینا چاہی دا اے۔ ایہہ بوہت چنگی گل سی۔ ایہناں وڈیرے لوکاں نے اوہنوں مشورہ دِتا کہ جے اوہ لوکاں دی گل من لے گا تے لوک ہمیشاں اوہدا ساتھ دین گے۔ (1-سلاطین 12:3-7) پر رحبُعام نُوں اوہناں وڈیرے بندیاں دا مشورہ پسند نئیں آیا۔ ایس لئی اوہنے ایہو جہے بندیاں نال مشورہ کیتا جیہڑے اوہدی عمر دے سن۔ اوہناں دی عمر شاید 40 سال ہووے جدا مطلب اے کہ اوہناں کول زندگی دا کجھ نہ کجھ تجربہ ضرور ہے سی۔ (2-تواریخ 12:13) پر ایس موقعے تے اوہناں نے رحبُعام نُوں بوہت ای بھیڑا مشورہ دِتا۔ اوہناں نے رحبُعام نُوں کہیا کہ اوہ لوکاں دا بوجھ ہور ودھا دَوے۔ (1-سلاطین 12:8-11) رحبُعام نُوں دو فرق فرق مشورے دِتے گئے سن۔ اوہ یہوواہ کولوں دُعا کر سکدا سی تے پچھ سکدا سی کہ اوہنوں کدے مشورے تے عمل کرنا چاہی دا اے۔ پر اوہنے اوہ مشورہ قبول کیتا جیہڑا اوہنوں چنگا لگیا یعنی اوہنے اپنے ہم عمراں دی گل سنی۔ ایس وجہ توں رحبُعام تے ملک اِسرائیل دے لوکاں نُوں بڑیاں مشکلاں دا سامنا کرنا پیا۔ ہو سکدا اے کہ سانوں ہمیشاں ایہو جہے مشورے نہ مِلن جیہڑے سانوں پسند آن۔ پر جے اوہ مشورے بائبل دے مطابق نیں تے سانوں اوہناں نُوں قبول کرنا چاہی دا اے۔
7. اَسی بادشاہ عُزیاہ دی مثال توں کیہہ سکھنے آں؟
7 ہُن ذرا بادشاہ عُزیاہ دی مثال تے غور کرو۔ اوہنے وی اِصلاح نُوں قبول نئیں کیتا سی۔ اوہ یہوواہ دی ہیکل دے اوس حصے چ داخل ہو گیا جِتھے صرف کاہناں نُوں جان دی اجازت سی تے اوتھے اوہنے بخور بالن دی کوشش کیتی۔ کاہناں نے اوہنوں کہیا: اَے عُزیاہ [یہوواہ] لئی بخور بالنا تیرا کم نئیں اے سگوں کاہناں دا کم اے۔ ایہہ سُن کے عُزیاہ نے کیہہ کیتا؟ جے اوہ خاکساری نال کاہناں دی اِصلاح نُوں قبول کرکے فوراً ہیکل چوں نکل جاندا تے شاید یہوواہ اوہنوں معاف کر دیندا۔ پر ایہدی بجائے اوہ غصے چ آ گیا۔
اِصلاح نُوں قبول کرن والے لوک
8. جدوں ایوب دی اِصلاح کیتی گئی تے اوہنے کیہہ کیتا؟
8 بائبل چ ایہو جہے لوکاں دِیاں وی مثالاں دِتیاں گئیاں نیں جنہاں نے اِصلاح نُوں قبول کیتا تے ایہدی وجہ توں یہوواہ نے اوہناں نُوں برکتاں دِتیاں۔ایہناں چوں اِک ایوب اے۔ ایوب یہوواہ نال بوہت پیار کردا سی تے اوہنوں خوش کرنا چاہندا سی پر اوہدے کولوں وی غلطیاں ہوئیاں۔ جدوں اوہ بوہت پریشان سی تے اوہنے کجھ ایہو جہیاں گلاں کہیاں جیہڑیاں کہ غلط سن۔ایس لئی یہوواہ تے اِلیہو نے اوہدی اِصلاح کیتی۔ ایہدے تے ایوب نے کیہو جیہا ردِعمل وکھایا؟ اوہ خاکسار سی ایس لئی اوہنے اِصلاح نُوں قبول کیتا۔ اوہنے کہیا: میں سوچے سمجھے بغیر بولیا، میں دلوں توبہ کرنا واں۔ ایوب دی خاکساری دی وجہ توں یہوواہ نے اوہنوں بڑیاں برکتاں دِتیاں۔—ایوب 42:3-6، 12-17۔
9. موسیٰ نبی نے اِصلاح نُوں قبول کرن بارے ساڈے لئی چنگی مثال کیویں قائم کیتی؟
9 موسیٰ نبی نے وی اوس ویلے اِصلاح نُوں قبول کیتا جدوں اوہدے کولوں اِک بوہت وڈی غلطی ہو گئی سی۔ اِک موقعے تے اوہنوں ایناں غصہ آ گیا کہ اوہ یہوواہ دی وڈیائی کرنا ای بُھل گیا۔ ایس وجہ توں موسیٰ اوس ملک چ جان دا موقع گنوا بیٹھا جنہوں دین دا وعدہ یہوواہ نے اپنے بندیاں نال کیتا سی۔ (گنتی 20:1-13) جدوں موسیٰ نے یہوواہ کولوں درخاست کیتی کہ اوہ اپنا فیصلہ بدل لوے تے یہوواہ نے کہیا: بس کر، ایس بارے فیر میرے نال کدی گل نہ کرِیں۔ (اِستثنا 3:23-27) ایہہ گل سُن کے موسیٰ غصے چ نئیں آیا سگوں اوہنے یہوواہ دے فیصلے نُوں قبول کیتا تے یہوواہ اوہدے ذریعے بنی اِسرائیل دی رہنمائی کردا رہیا۔ (اِستثنا 4:1)ایوب تے موسیٰ دونواں نے اِصلاح نُوں قبول کیتا تے سانوں وی اوہناں وانگوں بننا چاہی دا اے۔ایوب نے اپنی سوچ نُوں درست کیتا تے صفائیاں پیش نئیں کیتیاں۔ موسیٰ اوس ویلے وی یہوواہ دا وفادار رہیا جدوں یہوواہ نے اوہنوں اوہ موقع نئیں دِتا جدا اوہ بےصبری نال اِنتظار کر رہیا سی۔ ایس طرحاں اوہناں دونواں نے ثابت کیتا کہ اوہناں نے یہوواہ وَلّوں مِلن والی اِصلاح نُوں قبول کیتا اے۔
10. (الف) امثال 4:10-13 دے مطابق اِصلاح نُوں قبول کرن دے کیہڑے فائدے ہوندے نیں؟ (ب) جدوں کجھ بھین بھراواں دی اِصلاح کیتی گئی تے اوہناں نے کیہہ کیتا؟
10 جدوں اَسی ایوب تے موسیٰ دی مثال تے عمل کراں گے تے سانوں فائدہ ہوئے گا۔ (امثال 4:10-13 نُوں پڑھو۔) ساڈے بوہت سارے بھین بھراواں نے خدا دے ایہناں بندیاں وانگوں اِصلاح نُوں قبول کیتا اے جیویں کہ بھرا عمانوائیل۔ اوہ ملک کانگو چ رہندا اے۔ اِک وار کلیسیا دے پُختہ بھراواں نے اوہنوں اِک گل توں خبردار کیتا۔ اوہ کہندا اے: ”جدوں میری کلیسیا دے بھراواں نے ویکھیا کہ کسے وجہ توں یہوواہ نال میرا رشتہ ٹُٹ سکدا اے تے اوہناں نے فوراً میری مدد کیتی۔ میں اوہناں دی اِصلاح نُوں قبول کیتا تے اِنج میں اِک بوہت وڈی مشکل چ پین توں بچ گیا۔“ * ذرا غور کرو کہ بھین میگن نے اِصلاح قبول کرن بارے کیہہ کہیا۔اوہ کینیڈا چ رہندی اے تے اِک پہلکار دے طور تے خدمت کر دی اے۔ اوہ کہندی اے: ”جدوں میری اِصلاح کیتی گئی تے مینوں چنگا تے نئیں لگیا پر مینوں پتہ سی کہ اوہ میرے بھلے لئی اے۔“ ملک کروشیا چ رہن والا بھرا مارکو کہندا اے: ”جدوں مینوں کلیسیا چوں میری ذمےداری توں ہٹا دِتا گیا تے مینوں بوہت دُکھ ہویا۔ پر ہُن جدوں میں اوس وقت بارے سوچنا واں تے مینوں احساس ہوندا اے کہ اِصلاح نُوں قبول کرن دی وجہ توں ای میں یہوواہ نال اپنی دوستی نُوں فیر توں مضبوط کر سکیا واں۔“
11. بھرا کارل کلائن نے اِصلاح نُوں قبول کرن بارے کیہہ کہیا؟
11 بھرا کارل کلائن گورننگ باڈی دا اِک ممبر سی، تے اوہنوں وی اِصلاح نُوں قبول کرن نال بوہت فائدہ ہویا سی۔ اپنی آپ بیتی چ بھرا کارل نے دَسیا کہ اوہ تے بھرا جوزف رتھر فرڈ بڑے چنگے دوست سن۔ پر اِک وار رتھر فرڈ نے اوہدی بڑی سختی نال اِصلاح کیتی۔ بھرا کارل نے دَسیا کہ جدوں اوہدی اِصلاح کیتی گئی تے اوہنوں شروع چ بالکل چنگا نئیں لگیا۔اوہ کہندا اے: ”اگلی وار جدوں بھرا رتھر فرڈ مینوں ملیا تے اوہنے بڑے پیار نال مینوں کہیا: ”کیہہ حال اے کارل؟“ میں اوس گل دی وجہ توں غصے چ ساں ایس لئی میں بس ہولی جہی آواز چ اوہنوں سلام کہیا۔ بھرا نے فوراً مینوں کہیا: ”دھیان رکھ کارل، شیطان تینوں پھسان دی کوشش کر رہیا اے۔“ میں تھوڑا شرمندہ ہویا تے کہیا: ”سب ٹھیک اے بھرا رتھر فرڈ۔“ پر اوہنوں پتہ سی کہ میں اوہدے نال ناراض آں۔ ایس لئی اوہنے فیر توں مینوں خبردار کیتا تے کہیا: ”چل ٹھیک اے، پر دھیان رکھیں شیطان تینوں پھسان دی کوشش چ اے۔“ اوہ بالکل صحی کہہ رہیا سی۔ جدوں اَسی اپنے کسے بھرا لئی دل چ غصہ رکھنے آں، خاص طور تے اوہدوں جدوں اوہنے صحی گل کیتی ہوئے تے اَسی شیطان نُوں موقع دے رہے ہنے آں کہ اوہ سانوں اپنے پھندے چ پھسا لوے۔“ (اِفسیوں 4:25-27) بھرا کارل نے بھرا رتھر فرڈ دی اِصلاح نُوں قبول کیتا تے اوہناں دونواں دی دوستی وی قائم رہی۔
کیہڑی چیز اِصلاح نُوں قبول کرن چ ساڈی مدد کر سکدی اے؟
12. اِصلاح نُوں قبول کرن چ خاکساری ساڈی مدد کیویں کر سکدی اے؟ (زبور 141:5)
12 کیہڑی چیز اِصلاح نُوں قبول کرن چ ساڈی مدد کر سکدی اے؟ ایہدے لئی خاکسار ہونا ضروری اے۔ سانوں ایہہ گل یاد رکھنی چاہی دی اے کہ اَسی سارے عیبدار آں تے کدی کدار پٹھے سدھے کم کر دینے آں۔ اَسی ویکھیا سی کہ ایوب نُوں اپنی سوچ بدلن دی لوڑ سی تے جدوں اوہنے اِنج کیتا تے یہوواہ نے اوہنوں برکتاں دِتیاں۔ ایہدی کیہہ وجہ سی؟ ایوب خاکسار سی۔ ایسے لئی اوہنے اِلیہو وَلّوں مِلن والی اِصلاح نُوں قبول کیتا بھانویں کہ اِلیہو عمر چ اوہدے توں بوہت چھوٹا سی۔ (ایوب 32:6، 7) خاکسار ہون دی وجہ توں اَسی وی اوس ویلے اِصلاح نُوں قبول کراں گے جدوں سانوں لگے گا کہ سانوں ایہدی لوڑ نئیں اے یاں جدوں کوئی ایہو جیہا بندہ ساڈی اِصلاح کرے جیہڑا عمر چ ساڈے توں چھوٹا اے۔ کینیڈا دی کلیسیا دا اِک بزرگ کہندا اے: ”جیہڑیاں خامیاں دُوجے ساڈے چ ویکھدے نیں اوہ شاید سانوں نظر نہ آن۔ پر جے اَسی اِصلاح نُوں قبول نئیں کراں گے تے اَسی اپنے اندر بہتری کیویں لیاواں گے؟ سانوں ساریاں نُوں اپنے اندر روح دے پھل دِیاں خوبیاں نُوں نکھارن تے اِک بہتر مسیحی بنن دی لوڑ ہوندی اے۔“—زبور 141:5 نُوں پڑھو۔
13. جدوں ساڈی اِصلاح کیتی جاندی اے تے سانوں کیہو جیہا محسوس کرنا چاہی دا اے؟
13 اِصلاح نُوں محبت دا ثبوت سمجھو۔ یہوواہ ساڈی بھلائی چاہندا اے۔ (امثال 4:20-22) ایس لئی جدوں اوہ اپنے کلام، اپنی تنظیم دِیاں ویڈیوز تے کتاباں دے ذریعے یاں کسے پُختہ مسیحی دے ذریعے ساڈی اِصلاح کر دا اے تے اوہ اصل چ ساڈے لئی محبت ظاہر کر رہیا ہوندا اے۔ عبرانیوں 12:9، 10 دے مطابق اوہ ساڈے فائدے لئی اِنج کر دا اے۔
14. جدوں کوئی ساڈی اِصلاح کر دا اے تے سانوں کیس گل تے دھیان دیندا چاہی دا اے؟
14 اِصلاح وَل دھیان دَوو نہ کہ اِصلاح دین دے طریقے وَل۔ کدی کدار شاید سانوں لگے کہ جیس طریقے نال ساڈی اِصلاح کیتی گئی اے، اوہ طریقہ صحی نئیں سی۔ بےشک اِک بندے نُوں دُوجیاں دی اِصلاح ایس طرحاں کرنی چاہی دی اے کہ اوہ اوہنوں اسانی نال قبول کر سکن۔ * (گلتیوں 6:1) جے ساڈی اِصلاح کیتی جا رہی اے تے سانوں ایس گل تے دھیان دینا چاہی دا اے کہ سانوں کیہہ سمجھایا جا رہیا اے۔ فیر بھانویں سانوں اِصلاح کرن والے بندے دا طریقہ غلط ای کیوں نہ لگے۔ سانوں اپنے آپ کولوں ایہہ سوال پچھنے چاہی دے نیں: ”بھانویں کہ مینوں اوس بندے دا اِصلاح کرن دا طریقہ چنگا نئیں لگیا پر کیہہ اوہدی گل کسے حد تک ٹھیک اے؟ کیہہ میں اوہدیاں خامیاں تے دھیان دین دی بجائے اوس گل تے عمل کر سکنا واں جیہڑی اوہنے مینوں سمجھائی اے؟“ بھانویں ساڈی اِصلاح کیویں وی کیتی جائے سانوں ایس گل تے دھیان دینا چاہی دا اے کہ اَسی اوہدے ذریعے اپنے اندر بہتری کیویں لیا سکنے آں۔—امثال 15:31۔
مشورہ منگو تے فائدہ حاصل کرو
15. سانوں دُوجیاں کولوں کیوں پچھنا چاہی دا اے کہ سانوں اپنے اندر کیہڑی بہتری لیانی چاہی دی اے؟
15 بائبل سانوں ہلاشیری دیندی اے کہ اَسی اپنے اندر بہتری لیان لئی دُوجیاں کولوں مشورہ منگئے۔ امثال 13:10 چ لکھیا اے کہ مغروراں چ ہمیشاں جھگڑا ہوندا اے جد کہ سمجھدار صلاح مشورے دے مطابق ای چل دے نیں۔ ایہہ گل واقعی صحی اے۔ جیہڑے لوک ایس گل دا اِنتظار کرن دی بجائے کہ کوئی آ کے اوہناں نُوں مشورہ دَوے، آپ دُوجیاں کول جا کے مشورہ لیندے نیں تے اوہ چنگے فیصلے کر دے نیں۔ ایس لئی آپ جا کے دُوجیاں کولوں پچھو کہ مینوں اپنے اندر کیہڑی بہتری لیانی چاہی دی اے۔
اِک جوان بھین اِک پُختہ مسیحی بھین کولوں مشورہ کیوں لے رہی اے؟ (پیراگراف نمبر 16 نُوں ویکھو۔)
16. اَسی کیہڑیاں صورتال چ اپنے اندر بہتری لیان لئی دُوجیاں کولوں مشورہ منگ سکنے آں؟
16 اَسی اپنے ہمایماناں کولوں کدوں مشورہ لے سکنے آں؟ ایہناں وچوں کجھ صورتاں ایہہ ہو سکدیاں نیں: (1) اِک بھین اِک تجربہکار مبشر نُوں کہندی اے کہ اوہ اوہدے نال بائبل کورس کران لئی جائے۔ بعد چ اوہ اوہنوں پچھدی اے کہ اوہ اپنے تلیم دین دے طریقے چ ہور بہتری کیویں لیا سکدی اے۔ (2) اِک غیرشادیشُدہ بھین اپنے لئی کجھ کپڑے خریدنا چاہندی اے۔ ایہدے لئی اوہ اِک پُختہ مسیحی بھین کولوں مشورہ لیندی اے۔ (3) اِک بھرا پہلی واری عوامی تقریر دین والا اے۔ایس لئی اوہ اِک تجربہکار بھرا نُوں کہندا اے کہ اوہ اوہدی تقریر سنے تے فیر اوہنوں دَسے کہ اوہ کتھے بہتری لیا سکدا اے۔ جیہڑے بھرا کئی سالاں توں تقریراں دے رہے نیں اوہ وی تجربہکار بھراواں کولوں مشورے لے سکدے نیں تے اوہناں تے عمل کر سکدے نیں۔
17. اَسی اوہناں مشوریاں توں فائدہ کیویں حاصل کر سکنے آں جیہڑے سانوں اپنے اندر بہتری لیان لئی دِتے جاندے نیں؟
17 اَگے چل کے سانوں ساریاں نُوں اپنے اندر بہتری لیان لئی ہور وی مشورے مِلدے رہن گے۔ ایہہ مشورے سانوں کلیسیا دے کسے بزرگ یاں کسے پُختہ مسیحی وَلّوں مل سکدے نیں یاں فیر بائبل پڑھن یاں تنظیم دِیاں کتاباں، ویڈیوز یاں عبادتاں دے ذریعے مل سکدے نیں۔ جدوں اِنج ہوندا اے تے اوہناں گلاں نُوں یاد رکھو جیہڑیاں اَسی ایس مضمون چ سکھیاں نیں۔ خاکسار رہوو۔ ایس گل تے دھیان دَوو کہ توانوں کیہہ سمجھایا جا رہیا اے نہ کہ کیہڑے طریقے نال سمجھایا جا رہیا اے۔ اوہناں مشوریاں تے عمل کرو جیہڑے توانوں اپنے اندر بہتری لیان لئی دِتے جاندے نیں۔ کوئی وی انسان پیدائشی طور تے سمجھدار نئیں ہوندا۔ جے اَسی چنگے مشورے تے عمل کراں گے تے تربیت نُوں قبول کراں گے تے خدا دے وعدہ مطابق اَسی دانشمند بن جاواں گے۔—امثال 19:20۔
گیت نمبر 124: وفادار رہوو
^ یہوواہ دے بندے جان دے نیں کہ ایہہ بوہت ضروری اے کہ جدوں اوہناں نُوں اپنے اندر بہتری لیان لئی بائبل چوں کوئی مشورہ دِتا جاندا اے تے اوہ اوہنوں قبول کرن تے اوہدے مطابق عمل کرن۔ پر ایہہ ہمیشاں اسان نئیں ہوندا۔ ایہدی کیہہ وجہ اے؟ تے اَسی کیہہ کر سکنے آں تاکہ اَسی اوہناں مشوریاں توں فائدہ حاصل کرئیے جیہڑے سانوں اپنے اندر بہتری لیان لئی دِتے جاندے نیں۔
^ ایس مضمون چ کجھ فرضی ناں استمال کیتے گئے نیں۔
^ اگلے مضمون چ اَسی ویکھاں گے کہ سمجھداری نال دُوجیاں دی اِصلاح کیویں کیتی جا سکدی اے۔
