1. Re ka fumana keletso maemong afe, hona ke hobaneng ha kaofela ha rona re lokela ho eletswa?

 KAOFELA ha rona re hloka ho eletswa. Ka dinako tse ding, re ka kopa motho e mong eo re mo tshepang hore a re fe keletso. Athe ka dinako tse ding, morabo rona ya tshwenyehileng ka rona a ka nna a re hlokomedisa haeba re le haufi le ho nka “mohato o fosahetseng” oo re ka ikwahlaelang wona. (Bagal. 6:1) Mohlomong motho e mong a ka re kgalemela ka mora hore re etse phoso e tebileng. Re lokela ho mamela ha re fuwa keletso ho sa tsotellehe lebaka leo re eletswang ka lona. Ho etsa jwalo ho tla re tswela molemo ebile ho ka re pholosa.​—Liprov. 6:23.

2. Ho ya ka Liproverbia 12:15 ke hobaneng ha re lokela ho mamela ha re eletswa?

² Lengolo la rona la sehlooho le re kgothalletsa hore re mamele “mantswe a ba bohlale.” (Liprov. 22:17) Ha ho na motho ya tsebang ntho e nngwe le e nngwe, ka hoo ho tla dula ho ena le motho ya tsebang ho re feta kapa ya nang le boiphihlelo bo fetang ba rona. (Bala Liproverbia 12:15.) Ka hoo, ha re mamela keletso re tla be re bontsha hore re ikokobeditse. Re tla be re bontsha hore re a hlokomela hore ho na le dintho tseo re sa kgoneng ho di etsa le hore re hloka thuso e le hore re finyelle dintho tse itseng. Jehova o ile a susumetsa Morena Solomone ya bohlale hore a re: “Ha baeletsi ba le bangata ho na le se finyellwang.”​—Liprov. 15:22.

3. Re ka fuwa keletso ka ditsela dife?

³ Re ka nna ra eletswa ka tsela e tobileng kapa e sa tobang. Keletso e sa tobang ke e jwang? Re ka nna ra bala ntho e itseng ka Bibeleng kapa dingolweng tsa rona, e tla etsa hore re nahane ka dintho tseo re di etsang mme e re susumetse ho fetola tsela eo re nahanang le ho etsa dintho ka yona. (Baheb. 4:12) Re ka re keletso eo ke e sa tobang. Keletso e tobileng yona ke e jwang?  Moholo kapa morabo rona ya nang le boiphihlelo a ka nna a re bontsha ntho eo re lokelang ho sebeletsa ho yona. Re ka re keletso eo ke e tobileng. Haeba motho ya re ratang a susumelletseha ho re fa keletso e tswang ka Bibeleng, re lokela ho bontsha hore re a e ananela ka ho e mamela le ho e sebedisa.

4. Ho ya ka Moeklesia 7:9 re lokela ho qoba ho etsang ha re fuwa keletso?

⁴ Ho ka nna ha eba thata hore re mamele keletso e tobileng le ho e sebedisa. Re ka ba ra utlwa bohloko ha re eletswa. Hobaneng? Le hoja ho le bonolo hore re dumele hore ha re a phethahala, ho ka nna ha eba thata hore re amohele keletso haeba motho e mong a re bontsha phoso e itseng eo re e entseng. (Bala Moeklesia 7:9.) Re ka nna ra batla ho ikemela kapa ra belaella mabaka ao motho a re eletsang ka ona. Hape re ka utlwiswa bohloko ke tsela eo a re eleditseng ka yona. Re ka ba ra tshwayatshwaya motho ya re eletsang diphoso mme ra re: ‘Ebe o nahana hore ke mang yena hore a ka nkeletsa? Le yena o ntse a etsa diphoso!’ Haeba re sa thabele keletso eo re e fuwang, re ka nna ra se e mamele kapa ra kopa motho e mong hore a re eletse hobane re ena le tshepo ya hore o tla re bolella ntho eo re batlang ho e utlwa.

5. Re tlo bua kang sehloohong see?

⁵ Sehloohong sena, re tlo bua ka mehlala ya batho ba hlahang ka Bibeleng ba sa kang ba mamela keletso le ba ileng ba e mamela. Re tla boela re bue ka hore na keng e ka re thusang ho mamela keletso e le hore e re tswele molemo.

6. Re ithutang tseleng eo Morena Roboame a ileng a itshwara ka yona ha a ne a fuwa keletso?

⁶ A re bueng ka mohlala wa Roboame. Ha e eba morena wa Iseraele, batho bao a ba busang ba ile ba kopa hore a ba bebofalletse mosebetsi o boima oo ntate wa hae Solomone a neng a ba file wona. Roboame o ile a etsa hantle ka hore a botse banna ba baholo ba Iseraele hore na o lokela ho araba batho bao jwang. Ba ile ba mo eletsa hore haeba a ne a ka dumela ntho eo batho bao ba e kopang ba ne ba tla dula ba mo sebeletsa. (1 Mar. 12:3-7) Ho bonahala Roboame a ne a sa thabela keletso eo a e fuweng, ka hoo o ile a kopa banna bao a hotseng le bona hore ba mo eletse. E ka nna yaba banna bao ba ne ba le dilemo tse ka bang 40, ka hoo e tlameha ebe ba ne ba ena le boiphihlelo bo itseng. (2 Likron. 12:13) Le ha ho le jwalo, banna bana ba ile ba fa Roboame keletso e fosahetseng. Ba ile ba mo eletsa hore a ba hatelle le ho feta. (1 Mar. 12:8-11) Ka ha Roboame o ne a fumane dikeletso tse pedi tse fapaneng, o ne a lokela ho kopa Jehova hore a mo thuse hore na a mamele keletso efe. Ho ena le hore a etse jwalo, o ile a kgetha ho mamela keletso eo a e ratang e leng ya banna bao a hotseng le bona. Seo se ile sa tlisetsa Roboame le setjhaba sa Iseraele ditlamorao tse bohloko. Le rona ha se ka mehla re ka fumanang keletso eo re e thabelang empa haeba e thehilwe Lentsweng la Modimo re lokela ho e mamela.

7. Mohlala wa Morena Uzia o re rutang?

⁷ Morena Uzia le yena o ile a hana ho mamela keletso. O ile a kena ka tempeleng ya Jehova, sebakeng seo ho neng ho dumelletswe baprista feela yaba o leka ho fana ka dibano. Baprista ba Jehova ba ile ba re ho yena: “Uzia, ha se mosebetsi wa hao ho tjhesetsa Jehova dibano, empa ke mosebetsi wa baprista.” Uzia o ile a itshwara jwang? Hoja o ile a ikokobetsa mme a mamela keletso eo a e fuweng yaba o tswa ka tempeleng hanghang, Jehova a ka be a ile a mo tshwarela. Empa Uzia ha a ka a etsa jwalo, ho ena le hoo o ile “a halefa.” Ke hobaneng ha a ile a hana ho mamela keletso? O ne a nahana hore ka ha ke morena, o ne a ka etsa  ntho e nngwe le e nngwe eo a e batlang empa Jehova o ne a sa dumellane le taba eo. Ka ha Uzia o ile a iketelletsa pele, o ile a otlwa ka lepera mme “a tswela pele e le molepera ho fihlela letsatsing la lefu la hae.” (2 Likron. 26:16-21) Mohlala wa Uzia o re ruta hore haeba re sa mamele keletso ya Bibele, re tla senya kamano ya rona le Jehova ho sa tsotellehe hore na re bomang.

8. Jobo o ile a itshwara jwang ha a ne a eletswa?

⁸ Ho fapana le mehlala e mebe eo re sa tswa bua ka yona, Bibele e boetse e bua ka mehlala e metle ya batho ba ileng ba hlohonolofatswa hobane ba ile ba mamela keletso. A re ke re bueng ka Jobo. O ne a etsa diphoso le hoja a ne a tshaba Modimo. Ha a ne a le tlasa kgatello e matla, o ile a bua dintho tse fosahetseng. Elihu le Jehova ba ile ba mo eletsa ka ho toba. Jobo o ile a itshwara jwang? O ile a ikokobetsa mme a amohela keletso. O ile a re: “Ke buile, empa ke ne ke sa utlwisise . . . ‘ke hula mantswe, ke baka ke le leroleng le moloreng.’ ” Jehova o ile a hlohonolofatsa Jobo hobane a ile a ikokobetsa.​—Jobo 42:3-6, 12-17.

9. Moshe o re behetse mohlala ofe o motle wa ho mamela keletso?

⁹ Moshe ke mohlala o motle wa motho ya ileng a mamela ha a ne a kgalemelwa ka mora hore a etse phoso e tebileng. Ho na le nako eo a ileng a halefa mme a hloleha ho tlotlisa Jehova. Seo se ile sa etsa hore a lahlehelwe ke monyetla wa ho kena Naheng e Tshepisitsweng. (Num. 20:1-13) Ha Moshe a bolella Jehova hore na o ikutlwa jwang ka qeto eo a e entseng, Jehova o ile a re ho yena: “O se ke wa hlola o bua le nna hape ka taba ena.” (Deut. 3:23-27) Moshe ha a ka a halefa, ho ena le hoo o ile a amohela qeto ya Jehova mme Jehova o ile a tswela pele a mo sebedisa hore a tataise Baiseraele. (Deut. 4:1) Jobo le Moshe ba ile ba mamela keletso mme ke mehlala e metle eo re ka e etsisang. Jobo ha a ka a ikemela, ho ena le hoo o ile a fetola tsela eo a neng a nahana ka yona. Moshe o ile a bontsha hore o mametse keletso ya Jehova ka hore a dule a tshepahala esita le ka mora hore a lahlehelwe ke monyetla oo a neng a ka o thabela.

10. (a) Liproverbia 4:10-13 e bontsha hore melemo ya ho mamela keletso ke efe? (b) Batho ba bang ba ile ba itshwara jwang ha ba fuwa keletso?

¹⁰ Ho etsisa mohlala wa banna ba tshepahalang e leng Jobo le Moshe ho ka re tswela molemo. (Bala Liproverbia 4:10-13.) Bara le baradibabo rona ba bangata ba etsisitse mehlala ya bona ya ho mamela keletso. Hlokomela hore na Morabo rona Emmanuel ya dulang Congo o reng ka keletso eo a ileng a e fuwa, o re: “Barababo rona ba nang le boiphihlelo ba phuthehong ya heso, ba ile ba hlokomela hore ke haufi le ho senya kamano ya ka le Jehova mme ba ile ba nthusa. Ke ile ka mamela keletso ya bona mme seo se ile sa nthusa hore ke qobe mathata a mangata.” * Moradiwabo rona Megan eo e leng pulamadiboho Canada ha a bua ka ho fuwa keletso o re: “Hangata ke ne ke fuwa keletso eo ke sa e batleng empa ke e hloka.” Morabo rona Marko wa Croatia yena o re: “Ke ile ka kopuwa hore ke kgaotse ho etsa mosebetsi o itseng ka phuthehong empa ha ke hetla morao ke a hlokomela hore keletso eo ke ileng ka e fuwa e ile ya nthusa hore ke matlafatse kamano ya ka le Jehova.”

11. Morabo rona Karl Klein o ile a reng ka ho mamela keletso?

¹¹ Mohlala o mong wa motho ya ileng a thuswa ke ho mamela keletso ke wa Morabo rona Karl Klein, eo e neng e le setho sa Sehlopha se Busang. Paleng ya hae ya bophelo, Morabo rona Klein o ile a bontsha hore ho na le  nako eo motswalle wa hae e leng Morabo rona Joseph F. Rutherford a ileng a mo fa keletso e matla. Morabo rona Klein o ile a dumela hore qalong ha a ka a itshwara hantle ha a ne a fuwa keletso. O ile a re: “Lekgetlo le latelang ha [Morabo rona Rutherford] a kopana le nna o ile a ntumedisa a thabile a re, ‘Dumela Karl!’ Empa ka ha ke ne ke ntse ke utlwile bohloko ke ile ka arabela ka marameng. Morabo rona Rutherford o ile a re, ‘Karl, o itlhokomele! Diabolose o o tjhehetse leraba.’ Ke ile ka swaba yaba ke re, ‘Tjhe Morabo rona Rutherford ha ke a o kwatela.’ Empa o ne a tseba hore ke ntse ke mo kwatetse ka hoo o ile a boela a re, ‘Ho lokile empa itlhokomele. Diabolose o o tjhehetse leraba.’ Morabo rona Rutherford o ne a nepile hakaakang! Haeba re kwatela morabo rona hobane a buile ntho eo a lokelang ho e bua, . . . re tla etsa hore ho be bonolo hore Diabolose a re tshwase.” * (Baef. 4:25-27) Morabo rona Klein o ile a mamela keletso ya Morabo rona Rutherford mme e ile ya dula e le metswalle ya hlooho ya kgomo.

12. Ho ikokobetsa ho ka re thusa jwang hore re mamele keletso? (Pesaleme ya 141:5)

¹² Keng e ka re thusang hore re mamele keletso? Re lokela ho ikokobetsa mme re hopole hore ha re a phethahala ebile ka dinako tse ding re na le ho etsa dintho tse bowatla. Jwalo ka ha re bone dirapeng tse fetileng, Jobo o ne a ena le maikutlo a fosahetseng empa o ile a a fetola mme Jehova o ile a mo hlohonolofatsa. Hobaneng? Lebaka ke hobane Jobo o ne a ikokobeditse. O ile a bontsha seo ka hore a mamele keletso ya Elihu le hoja Elihu a ne a le monyenyane ho yena. (Jobo 32:6, 7) Ho ikokobetsa ho tla re thusa hore le rona re sebedise keletso eo re e fuwang le haeba re nahana hore ha re e hloke kapa re e fuwa ke motho e monyenyane ho rona. Moholo e mong wa Canada o re: “Re ke ke ra kgona ho ntlafatsa haeba ho se na motho ya re eletsang hobane batho ba kgona ho bona dintho tseo re sa di boneng ho rona.” Kaofela ha rona re lokela ho sebetsa ka thata hore re be le ditholwana tsa moya le ho ntlafatsa mosebetsing wa boboledi.​—Bala Pesaleme ya 141:5.

13. Re lokela ho nka keletso jwang?

¹³ Nka keletso e le tsela eo Modimo a o bontshang hore o a o rata. Jehova o re batlela se molemo. (Liprov. 4:20-22) O bontsha hore o a re rata ka ho re fa keletso a sebedisa Lentswe la hae, dingolwa tse thehilweng Bibeleng kapa Bakreste ba nang le boiphihlelo. Baheberu 12:9, 10 e re: “O etsa jwalo molemong wa rona.”

14. Keng eo re lokelang ho nahana ka yona ha re eletswa?

¹⁴ Nahana ka keletso eseng tsela eo e fanweng  ka yona. Ka dinako tse ding, re ka nna ra nahana hore ha re a fuwa keletso ka tsela e nepahetseng. Ke nnete hore motho ya fanang ka keletso o lokela ho etsa hore ho be bonolo hore motho e mong a e amohele. * (Bagal. 6:1) Le ha ho le jwalo, haeba e le rona ba eletswang re lokela ho nahana ka keletso eo re e fuwang le hoja re ka nka hore re ka be re eleditswe ka tsela e fapaneng. Re ka nna ra ipotsa dipotso tsena: ‘Le hoja ke sa rata tsela eo keletso e fanweng ka yona, na ho na le ntho eo nka ithutang yona ho yona? Na nka iphapanyetsa diphoso tsa motho ya nkeletsang ebe ke ithuta ho hong ho keletso eo a mphang yona?’ E ka ba bohlale hore re fumane ntho eo re ka ithutang yona ho keletso le ha e le efe eo re e fumanang.​—Liprov. 15:31.

15. Ke hobaneng ha re lokela ho kopa keletso?

¹⁵ Bibele e re kgothalletsa hore re kope keletso. Liproverbia 13:10 e re: “Ho ba rerisanang ha mmoho ho na le bohlale.” Taba ena ke nnete hobane hangata batho ba kopang keletso mme ba sa emele ho eletswa, ba etsa diqeto tse bohlale ho feta batho ba sa e kopeng. Ka hoo, ikemisetse ho kopa keletso ho batho ba bang.

16. Re ka kopa keletso maemong afe?

¹⁶ Re ka kopa hore Bakrestemmoho ba re eletse maemong afe? A re bueng ka a mang a ona. (1) Moradiwabo rona o kopa mohweletsi ya atlehang tshimong hore a tsamaye le yena ha a ilo ithuta Bibele le motho. Ha morao o kopa hore a mo eletse hore na a ka ntlafatsa tsela eo a rutang ka yona jwang. (2) Moradiwabo rona wa lesoha o batla ho reka diaparo mme o kopa moradiwabo rona ya hodileng hore a mo thuse ho di kgetha. (3) Morabo rona o tlo fana ka puo ya hae ya pele ya phatlalatsa. O kopa morabo rona ya seng a ena le nako a fana ka dipuo hore a mamele puo ya hae mme a mo eletse hore na a ka ntlafatsa hokae. Morabo rona eo e seng e le nako a fana ka dipuo, le yena ka ho tshwanang o lokela ho kopa keletso ho barababo rona ba fanang ka dipuo tse atlehang mme a e sebedise.

17. Ho mamela keletso ho ka re thusa jwang?

¹⁷ Nakong e tlang, kaofela ha rona re tla fuwa keletso e tobileng kapa e sa tobang. Ha o eletswa hopola dintlha tseo re buileng ka tsona sehloohong sena. Dula o ikokobeditse. Nahana ka keletso eseng tsela eo e fanweng ka yona mme o e sebedise. Ha re a hlaha re le bohlale empa haeba re ‘mamela keletso mme re amohela tayo,’ Lentswe la Modimo le re tshepisa hore re tla “hlalefa.”​—Liprov. 19:20.