1. Ita hetan konsellu iha dalan saida deʼit? Tanbasá ita hotu presiza ida-neʼe?

ITA hotu presiza konsellu. Dala ruma, ita rasik husu konsellu husi ema ruma neʼebé ita respeitu. Dala ruma, irmaun ka irmán neʼebé hanoin ita mak hakbesik ita no fó sai katak ita “laʼo sala dalan” ka halo desizaun neʼebé ikusmai ita sei arrepende. (Gal 6:1) Ka karik ita simu konsellu bainhira ema korrije ita tanba halo sala neʼebé sériu. Maibé buat neʼebé importante mak ita presiza rona ba konsellu sira. Neʼe lori diʼak ba ita no bele salva ita-nia moris.​—Prov 6:23.

2. Tuir Provérbios 12:15, tanbasá ita presiza rona ba konsellu?

² Eskritura tema ba lisaun neʼe anima ita atu “rona ba ema matenek nia liafuan”. (Prov 22:17) La iha ema ida mak hatene buat hotu. Sempre iha ema ida neʼebé iha koñesimentu ka esperiénsia liu fali ita. (Lee Provérbios 12:15.) Entaun rona ba konsellu hatudu katak ita haraik an. Neʼe hatudu katak ita rekoñese ita-nia limitasaun no rekoñese katak ita presiza hetan ajuda atu bele kumpre ita-nia planu. Maromak dirije Liurai Salomão neʼebé matenek atu hakerek: “Buat hotu sei laʼo ho diʼak kuandu ema barak fó konsellu.”​—Prov 15:22.

3. Karik ita simu konsellu iha dalan saida deʼit?

³ Ita simu konsellu iha dalan rua, primeiru husi buat neʼebé ita lee ka rona, no segundu husi ema neʼebé maduru. Kona-ba dalan primeiru, karik ita lee buat ruma iha Bíblia ka iha ita-nia publikasaun no neʼe book ita atu pauza no hanoin kona-ba ita-nia hahalok no tuirmai troka ita-nia hanoin no hahalok. (Ebr 4:12) Oinsá ho dalan segundu? Karik katuas ida ka irmaun-irmán ida neʼebé maduru fó konsellu kona-ba buat neʼebé ita presiza troka. Se ema ruma hatudu domin ba ita hodi fó konsellu bazeia ba Bíblia,  ita presiza hatudu katak ita hafolin ida-neʼe liuhusi rona ba ninia liafuan no koko atu aplika ida-neʼe.

4. Tuir Eclesiastes 7:9, ita labele halo saida bainhira simu konsellu?

⁴ Tuir loloos, dala ruma la fasil atu simu no aplika konsellu neʼebé ema fó ba ita. Karik neʼe halo ita laran-kanek. Tanbasá? Maski ita prontu atu rekoñese katak ita la perfeitu, maibé karik susar atu simu konsellu kona-ba ita-nia fraku ruma. (Lee Eclesiastes 7:9.) Karik ita koko atu defende an. Karik ita duvida ho ema neʼe nia motivu ka sente laran-kanek tanba dalan neʼebé nia fó konsellu. Karik ita mós buka ninia sala no hanoin: ‘Nia la iha direitu atu fó konsellu mai haʼu. Nia mós halo sala.’ No se ita la gosta konsellu neʼebé ita simu, karik ita lakohi rona ka ita husu fali konsellu husi ema neʼebé ita sente katak sei fó konsellu neʼebé ita gosta.

5. Iha lisaun neʼe, ita sei aprende saida?

⁵ Iha lisaun neʼe, ita sei aprende ezemplu husi Bíblia kona-ba ema sira neʼebé lakohi simu konsellu no ema sira neʼebé simu konsellu. Ita mós sei aprende kona-ba buat neʼebé sei ajuda ita atu simu konsellu no hetan benefísiu husi ida-neʼe.

6. Saida mak ita aprende husi Liurai Roboão nia hanoin kona-ba konsellu neʼebé nia simu?

⁶ Hanoin toʼok kona-ba Roboão. Bainhira nia sai liurai ba Izraél, ninia povu sira bá hasoru nia atu husu nia halo kmaan naha todan neʼebé ninia apá Salomão tau iha sira-nia leten. Roboão halo buat neʼebé matenek hodi husu konsellu husi katuas sira iha Izraél kona-ba oinsá atu hatán ba povu. Katuas sira fó konsellu katak se Roboão halo tuir povu nia hakarak, povu sei kontinua apoia nia. (1 Reis 12:3-7) Maibé Roboão la kontente ho konsellu neʼe, tan neʼe nia husu konsellu husi mane sira neʼebé boot hamutuk ho nia. Mane sira-neʼe karik idade maizumenus 40, no klaru katak sira iha ona esperiénsia balu iha sira-nia moris. (2 Krón 12:13) Maibé iha situasaun neʼe, sira fó konsellu neʼebé la diʼak ba Roboão. Sira fó konsellu ba nia atu aumenta povu nia susar. (1 Reis 12:8-11) Tanba iha ideia rua neʼebé la hanesan, diʼak atu Roboão halo orasaun no husu Jeová atu ajuda nia hatene konsellu ida-neʼebé mak nia presiza halo tuir. Maibé duké halo nuneʼe, nia deside atu simu konsellu neʼebé nia gosta no nia rona ba ninia belun. Neʼe lori konsekuénsia aat tebes ba Roboão no mós povu Izraél. Dala ruma ita mós simu konsellu neʼebé karik ita rasik la gosta. Maibé se neʼe bazeia ba Bíblia, ita tenke simu.

7. Liurai Uzias nia ezemplu hanorin saida mai ita?

⁷ Liurai Uzias lakohi simu konsellu. Nia tama área ida iha Jeová nia templu neʼebé amlulik deʼit mak bele tama no nia koko atu sunu insensu. Jeová nia amlulik sira hatete ba nia: “Uzias, Ita-Boot la iha direitu atu sunu insensu ba Jeová! Amlulik sira deʼit mak bele sunu insensu.” Saida mak Uzias halo? “Uzias . . . sai hirus tebes.” Tuir loloos, se nia simu konsellu neʼe ho haraik an no sai kedas husi templu, karik Jeová sei perdua nia. Entaun tanbasá nia lakohi simu konsellu? Karik nia sente katak nuʼudar liurai, nia iha direitu atu halo buat naran deʼit neʼebé nia hakarak. Maibé Jeová la hanoin hanesan neʼe. Tanba Uzias halo buat neʼebé nia la iha direitu atu halo, nia kona moras-lepra no kontinua “iha moras-lepra toʼo loron neʼebé nia mate”. (2 Krón 26:16-21) Uzias nia ezemplu hanorin ita  katak maski ita iha podér ruma, maibé se ita lakohi simu konsellu neʼebé bazeia ba Bíblia, Jeová sei la simu ita.

8. Saida mak Job halo bainhira nia simu konsellu?

⁸ La hanesan ho ezemplu sira neʼebé ita aprende ona, Bíblia mós konta kona-ba ema sira neʼebé hetan bensaun tanba simu konsellu. Hanoin toʼok kona-ba Job. Maski nia hamtaʼuk Maromak, maibé nia mak ema la perfeitu. Bainhira nia hasoru susar boot, nia fó sai ninia hanoin neʼebé sala. Rezultadu mak nia simu konsellu makaʼas husi Eliú no Jeová. Saida mak Job halo? Nia ho haraik an simu konsellu. Nia hatete: “Haʼu koʼalia, maibé haʼu la komprende . . . haʼu dada fali haʼu-nia liafuan, no haʼu arrepende an hodi tuur iha rai-rahun no ahi-kadesan laran.” Jeová haraik bensaun ba Job tanba nia hatudu haraik an.​—Job 42:3-6, 12-17.

9. Oinsá Moisés hatudu ezemplu diʼak mai ita kona-ba simu konsellu?

⁹ Moisés hatudu ezemplu kapás kona-ba simu konsellu depois halo tiha sala sériu. Loron ida, nia sai hirus no la fó glória ba Jeová. Tan neʼe, Moisés lakon priviléjiu atu tama ba rai neʼebé Maromak promete. (Núm 20:1-13) Bainhira Moisés husu Jeová atu hanoin fali kona-ba Jeová nia desizaun, Jeová hatete ba nia: “Keta koʼalia tan mai haʼu kona-ba ida-neʼe.” (Deut 3:23-27) Moisés la sai hirus. Nia simu Jeová nia desizaun no Jeová kontinua uza nia atu dirije ema Izraél. (Deut 4:1) Job no Moisés simu konsellu, no sira hatudu ezemplu diʼak mai ita atu banati-tuir. Job troka ninia hanoin. Nia la defende ninia an. Moisés hatudu katak nia simu Jeová nia konsellu liuhusi kontinua laran-metin maski nia lakon priviléjiu neʼebé nia hafolin tebes.

10. (a) Tuir Provérbios 4:10-13, benefísiu saida mak ita sei hetan bainhira simu konsellu? (b) Irmaun-irmán balu hatudu hahalok diʼak saida bainhira simu konsellu?

¹⁰ Ita sei hetan benefísiu bainhira ita banati-tuir Job no Moisés nia ezemplu. (Lee Provérbios 4:10-13.) Ita-nia irmaun-irmán barak halo ona ida-neʼe. Irmaun Emmanuel * iha rai-Kongu konta kona-ba konsellu neʼebé nia simu: “Irmaun sira neʼebé maduru iha kongregasaun nota katak haʼu laʼo daudaun iha dalan neʼebé sei estraga haʼu-nia relasaun diʼak ho Jeová no sira koko atu ajuda haʼu. Haʼu halo tuir sira-nia konsellu, no neʼe ajuda haʼu atu hasees an husi problema.” Irmán pioneiru ida naran Megan iha rai-Kanadá mós konta kona-ba konsellu neʼebé nia simu: “Dala ruma haʼu la gosta konsellu neʼebé haʼu simu, maibé tuir loloos haʼu presiza duni konsellu neʼe.” Irmaun Marko iha rai-Kroásia hatete: “Haʼu lakon haʼu-nia knaar, maibé bainhira haʼu hanoin kona-ba neʼe, haʼu rekoñese katak konsellu neʼebé haʼu simu ajuda haʼu atu hametin fali haʼu-nia relasaun diʼak ho Jeová.”

11. Irmaun Karl Klein hatete saida kona-ba simu konsellu?

¹¹ Ema ida tan neʼebé hetan benefísiu tanba simu konsellu mak irmaun Karl Klein neʼebé uluk serbí nuʼudar Grupu Administradór. Iha ninia esperiénsia, nia konta kona-ba tempu neʼebé nia simu konsellu makaʼas husi ninia belun Joseph Rutherford. Foufoun irmaun Karl sente laran-kanek tanba konsellu neʼebé nia simu. Nia konta: “Bainhira [irmaun  Joseph] hasoru haʼu, nia ho kontente hatete: ‘Bondia, Karl.’ Maibé tanba haʼu laran-kanek hela, haʼu hatán la ho laran. Nia hatete mai haʼu: ‘Karl, kuidadu. Diabu koko atu lasu ó.’ Tanba moe, haʼu hatán: ‘Haʼu la hirus irmaun Joseph.’ Maibé nia hatene katak haʼu hirus hela nia, tan neʼe nia fó avizu: ‘Haʼu komprende. Maibé kuidadu, tanba Diabu koko atu lasu ó.’ Nia koʼalia loos. Bainhira ita kontinua hirus irmaun ka irmán ida, liuliu tanba sira fó sai buat neʼebé sira iha direitu atu koʼalia . . . , fasil ba Diabu atu aproveita ida-neʼe hodi lasu ita.” * (Éf 4:25-27) Irmaun Karl simu irmaun Joseph nia konsellu, no sira kontinua sai belun diʼak.

12. Oinsá mak haraik an ajuda ita atu simu konsellu? (Salmo 141:5)

¹² Saida mak bele ajuda ita atu simu konsellu? Ita presiza hatudu haraik an no hanoin-hetan katak ita la perfeitu no dala ruma ita bele hatudu hahalok beik. Hanesan temi ona ohin, Job iha hanoin neʼebé la loos. Maibé ikusmai nia troka ninia hanoin, tan neʼe Jeová haraik bensaun ba nia. Tanbasá? Tanba Job haraik an. Nia hatudu haraik an hodi simu konsellu husi Eliú maski Eliú idade kiʼik liu. (Job 32:6, 7) Haraik an mós bele ajuda ita atu aplika konsellu neʼebé ita hetan maski karik ita sente katak ita la merese hetan konsellu neʼe ka maski ema neʼebé fó konsellu mak idade kiʼik liu fali ita. Katuas kongregasaun ida iha rai-Kanadá hatete: “Susar ba ita atu laʼo ba oin se ema ida la fó konsellu ba ita.” Ita hotu presiza haburas hahalok neʼebé mai husi espíritu santu no sai haklaken-naʼin no mestre neʼebé diʼak liu.​—Lee Salmo 141:5.

13. Ita presiza hanoin oinsá kona-ba konsellu neʼebé ita simu?

¹³ Haree konsellu nuʼudar dalan neʼebé Jeová hatudu domin ba ita. Jeová hakarak buat neʼebé diʼak liu ba ita. (Prov 4:20-22) Bainhira nia fó konsellu liuhusi Bíblia, publikasaun sira neʼebé bazeia ba Bíblia, ka maluk fiar-naʼin neʼebé maduru, nia hatudu sai ninia domin ba ita. Ebreu 12:9, 10 hatete: “Maromak fó dixiplina ba ita-nia diʼak.”

14. Ita presiza tau fokus ba saida bainhira simu konsellu?

¹⁴ Tau fokus ba konsellu, laʼós dalan neʼebé ema fó konsellu. Dala ruma, ita sente katak dalan neʼebé ema fó konsellu ba ita mak la diʼak. Klaru katak bainhira fó konsellu ba ema ruma, ita presiza hatoʼo neʼe iha dalan neʼebé fasil ba nia atu  simu. * (Gal 6:1) Maibé se ema fó konsellu mai ita, diʼak atu hakaʼas an tau fokus ba informasaun maski ita sente katak ninia dalan atu fó konsellu mak la diʼak. Karik ita bele husu ba ita-nia an: ‘Maski haʼu la gosta ninia dalan atu fó konsellu, maibé iha buat neʼebé haʼu bele aprende husi ida-neʼe ka lae? Duké tau fokus ba ninia fraku, haʼu bele aprende buat ruma husi ninia konsellu ka lae?’ Ita bele hatudu matenek liuhusi buka dalan atu aplika konsellu neʼebé ita simu.​—Prov 15:31.

15. Tanbasá ita presiza husu konsellu?

¹⁵ Bíblia anima ita atu husu konsellu. Provérbios 13:10 hatete: “Ema neʼebé buka konsellu mak iha matenek.” Liafuan sira-neʼe loos duni. Dala barak ema sira neʼebé husu konsellu no la hein deʼit ema seluk hakbesik sira hodi fó konsellu mak sai ema Kristaun neʼebé maduru liu fali sira neʼebé la buka konsellu. Tan neʼe, hakaʼas an atu buka konsellu.

16. Iha situasaun saida deʼit mak ita bele husu konsellu?

¹⁶ Bainhira mak ita bele husu konsellu husi maluk fiar-naʼin? Hanoin kona-ba situasaun balu tuirmai. (1) Irmán ida husu haklaken-naʼin neʼebé iha esperiénsia atu akompaña nia hodi halaʼo estuda no depois neʼe husu matadalan kona-ba oinsá atu sai mestra neʼebé diʼak liután. (2) Irmán klosan ida hakarak sosa roupa balu, tan neʼe nia husu irmán neʼebé maduru nia sujestaun kona-ba roupa neʼebé nia hili. (3) Irmaun ida simu knaar atu hatoʼo ninia diskursu públiku primeiru. Nia husu oradór neʼebé iha esperiénsia atu rona didiʼak ba ninia diskursu hodi bele fó matadalan diʼak ba nia kona-ba oinsá atu hatoʼo diskursu ho diʼak liután. Maski irmaun ida hatoʼo ona diskursu durante tinan barak, maibé diʼak ba nia atu husu oradór neʼebé iha esperiénsia atu fó sujestaun ruma no tuirmai aplika ida-neʼe.

17. Oinsá ita hetan benefísiu husi konsellu?

¹⁷ Ikusmai, ita hotu sei simu konsellu, karik husi ema ruma ka husi buat neʼebé ita lee ka rona husi Jeová nia organizasaun. Bainhira ita simu konsellu, hanoin-hetan pontu sira neʼebé ita aprende ona. Kontinua hatudu haraik an, tau fokus ba informasaun laʼós dalan neʼebé ema fó konsellu, no mós aplika konsellu neʼebé ita simu. Se ita halo nuneʼe, ita sei hetan matenek. Bíblia promete katak bainhira ita “rona ba konsellu no simu dixiplina”, ita sei “sai matenek”.​—Prov 19:20.