1. (a) Yumi inap kisim tok kaunsel long wanem wanem rot? (b) Wai na yumi olgeta i mas kisim tok kaunsel?

 YUMI olgeta i nid long kisim tok kaunsel long sampela taim. Sampela taim i gutpela yumi yet i askim wanpela yumi rispektim long givim sampela edvais long yumi. Long sampela narapela taim, wanpela brata husat i save tingim tru yumi inap luksave olsem yumi “mekim samting i no stret” na em i tokim yumi long dispela—samting we bihain yumi inap rigret long en. (Gal. 6:1) Sampela taim, yumi inap kisim tok kaunsel olsem tok bilong stretim yumi bihain long yumi mekim wanpela bikpela popaia. Maski yumi kisim tok kaunsel long wanem wanem rot, bikpela samting em yumi mas putim yau long tok kaunsel yumi kisim. Dispela i bilong helpim yumi na em inap seivim laip bilong yumi!​—Prov. 6:23.

2. Olsem Provep 12:15 i kamapim, wai na yumi mas putim yau long tok kaunsel?

² Tim skripsa bilong dispela stadi i kirapim yumi long “harim ol tok bilong man i gat savetingting.” (Prov. 22:17) I no gat wanpela man i save long olgeta samting, oltaim bai i gat wanpela husat i gat bikpela save moa o bikpela ekspiriens moa winim yumi. (Ritim Provep 12:15.) So taim yumi putim yau long tok kaunsel, dispela i soim olsem yumi gat pasin daun. Dispela i kamapim long ples klia olsem yumi no inap mekim olgeta samting na yumi nidim helpim long winim ol mak yumi putim. Saveman King Solomon i raitim dispela tok olsem: “Gutpela samting i kamap taim man i kisim tingting bilong planti edvaisa.”​—Prov. 15:22.

3. Wanem tupela rot yumi save kisim tok kaunsel?

³ Yumi inap kisim tok kaunsel long tupela kain rot. Wanpela em tok i kam long ol narapela rot. Yumi ritim sampela tok long Baibel o ol narapela pablikesen bilong yumi na dispela i kirapim yumi long tingim sampela pasin yumi save bihainim na nau ol dispela tok i kirapim yumi long mekim ol senis. (Hib. 4:12) Dispela em tok kaunsel yumi kisim long ol narapela rot. So wanem narapela rot bilong kisim tok kaunsel? Em taim wanpela elda o wanpela brata i strong  long bilip i helpim yumi long luksave long wanpela samting em yumi mas wok long stretim. Dispela rot em taim wanpela i givim stret tok kaunsel long yumi. Sapos wanpela brata o sista i laikim yumi tru na em i givim yumi sampela tok kaunsel em Baibel i as bilong en, orait yumi mas soim olsem yumi tingim tru tok em i mekim long rot bilong putim gut yau na bihainim tok yumi kisim.

4. Olsem Eklisiastis 7:9 i kamapim, yumi mas sakim wanem pasin taim yumi kisim tok kaunsel?

⁴ Planti taim, ating bai yumi pilim hatwok long kisim tok taim wanpela i givim stret tok kaunsel long yumi. Ating yumi inap bel hevi long dispela samting. Bilong wanem? Long wanem, maski yumi save olsem yumi no gutpela olgeta, yumi inap pilim hatwok long kisim tok kaunsel long wanpela brata taim em i tokaut stret long wanpela pasin bilong yumi we i no stret. (Ritim Eklisiastis 7:9.) Yumi inap strongim sait bilong yumi. Ating yumi inap holim tupela tingting long as na man i givim tok kaunsel o pasin em i bihainim bilong givim tok kaunsel. Ating yumi inap skelim ol popaia bilong em na ting olsem: ‘Em i gat wanem kain rait long givim tok kaunsel long mi? Em tu i gat ol pasin kranki bilong em!’ Na moa yet, sapos yumi no laikim dispela tok kaunsel yumi kisim, yumi inap sakim dispela tok kaunsel o traim long askim ol narapela long stretim yumi bikos yumi ting ol bai mekim ol tok yumi laik long harim.

5. Bai yumi stori long wanem samting long dispela atikol?

⁵ Long dispela atikol yumi bai stori long sampela eksampel long Baibel em ol i sakim tok kaunsel na sampela em ol i kisim na bihainim ol tok kaunsel. Yumi bai stori tu long wanem samting i ken helpim yumi long kisim ol tok kaunsel na kisim gutpela helpim long en.

6. Yumi inap kisim wanem skul long pasin em King Rehoboam i mekim long ol edvais em i kisim?

⁶ Skelim eksampel bilong Rehoboam. Taim em i kamap king bilong Israel, ol manmeri i kam long em na ol i gat wanpela askim. Ol i askim em long rausim sampela hevi em papa bilong em Solomon i bin putim long ol. Pastaim Rehoboam i bihainim gutpela tingting taim em i go toktok wantaim ol hetman bilong lain Israel long kisim save long hau em i ken bekim tok bilong ol manmeri. Ol hetman i tokim king olsem sapos em i mekim ol samting em ol manmeri i askim long en, orait oltaim ol dispela manmeri bai sapotim em. (1 Kin. 12:3-7) Tasol i klia tru olsem Rehoboam i no amamas long edvais ol i givim long em, so em i go kisim tingting bilong ol yangpela man em ol i gat wankain krismas olsem em. Ating ol dispela man i gat 40 krismas samting, so i luk olsem ol i gat sampela ekspiriens long laip. (2 Sto. 12:13) Tasol long dispela taim, ol i no givim gutpela edvais long Rehoboam. Ol i tokim em long putim sampela hevi moa antap long ol manmeri. (1 Kin. 12:8-11) Nau Rehoboam i gat tupela narapela narapela tingting i pait wantaim, so i gutpela Rehoboam i beten askim Jehova long helpim em long luksave long wanem edvais em i ken bihainim. Tasol em i no mekim olsem, em i redi long bihainim edvais we em yet i amamas long en—em edvais i kam long ol yangpela man. Bihain bikpela hevi tru i painim Rehoboam na ol manmeri bilong Israel. Long sait bilong yumi, ating sampela taim yumi inap kisim ol edvais em yumi yet i no gat laik long harim. Maski i olsem, sapos em tok i kam long Baibel, orait yumi mas kisim na bihainim.

7. Stori bilong King Usia i ken skulim yumi long wanem samting?

⁷ King Usia i bin sakim tok kaunsel. Em i go insait long wanpela hap long tempel bilong Jehova we ol pris tasol i gat rait long go long en na em i laik ofaim smok i gat gutpela smel. Ol pris bilong Jehova i tokim em: “Usia, i no stret long yu kukim paura bilong kamapim smok i gat gutpela smel long Jehova! Em wok bilong ol pris tasol long kukim paura bilong kamapim smok i gat gutpela smel.” Usia i mekim wanem? Sapos em i daunim em yet na kisim dispela tok kaunsel na lusim tempel wantu tasol, ating Jehova inap fogivim em. Tasol nogat, “Usia . . . i belhat nogut tru.” Wai na em  i sakim tok kaunsel? Usia i pilim olsem em i king na em i gat rait long mekim wanem samting em i laik mekim. Tasol Jehova i no gat dispela tingting. Usia i mekim pasin hambak, olsem na God i mekim sik lepra i kamap long Usia na “em i stap olsem i go inap long em i dai.” (2 Sto. 26:16-21) Dispela stori bilong Usia i skulim yumi olsem maski yumi husat, sapos yumi sakim ol tok kaunsel bilong Baibel, Jehova bai i no inap orait moa long yumi.

8. Jop i mekim wanem long ol tok kaunsel em i kisim?

⁸ Ol eksampel yumi skelim pinis em stori bilong ol man husat i no laik bihainim tok kaunsel. Tasol Baibel i stori tu long ol gutpela eksampel bilong ol man em ol i kisim na bihainim tok kaunsel na ol i kisim blesing. Tingim Jop. Maski em i man bilong aninit long God, em i no gutpela olgeta. Taim em i karim bikpela hevi tru long laip bilong em, em i mekim sampela tok we i no stret. Em as na em i kisim ol tok kaunsel bilong stretim em i kam long Elihu na i kam long Jehova. Jop i mekim wanem taim em i kisim ol dispela tok? Long pasin daun em i kisim na bihainim ol dispela tok. Em i tok: “Em tru mi toktok planti, tasol mi no kliagut long ol samting na mi toktok . . . ol tok mi mekim i no stret, na mi sindaun long das na sit bilong paia bilong soim olsem mi bel hevi long ol tok mi mekim.” Jehova i blesim Jop bikos long pasin daun bilong em.​—Jop 42:3-6, 12-17.

9. Olsem wanem Moses i stap olsem gutpela eksampel tru long pasin bilong kisim na bihainim tok kaunsel?

⁹ Moses i stap gutpela eksampel long pasin bilong kisim ol tok bilong stretim em bihain long em i mekim wanpela bikpela popaia. Wanpela taim em i belhat nogut tru na em i no onarim Jehova. Dispela i mekim na God i no orait long Moses i kisim gutpela blesing—em long go insait long Graun Bilong Promis. (Nam. 20:1-13) Taim Moses i kamapim bel hevi bilong em long dispela disisen Jehova i mekim, Jehova i tokim em: “No ken toktok gen long mi long dispela samting.” (Lo 3:23-27) Moses i no bel nogut long dispela disisen, nogat. Em i orait long disisen bilong Jehova na Jehova i wok yet long yusim em long lidim lain Israel. (Lo 4:1) Jop na Moses, tupela wantaim i stap olsem gutpela piksa long pasin bilong kisim ol tok kaunsel na bihainim. Jop i stretim tingting bilong em yet, em i no givim ol eskius. Moses i soim olsem em i orait long tok kaunsel Jehova i givim long em taim em i stap gut yet long Jehova, maski em i no inap kisim dispela gutpela blesing tru em i gat laik long en.

10. (a) Olsem Provep 4:10-13 i kamapim, yumi save kisim wanem gutpela helpim taim yumi bihainim tok kaunsel? (b) Sampela bratasista i holim wanem stretpela tingting taim ol i kisim tok kaunsel?

¹⁰ Yumi kisim gutpela helpim taim yumi bihainim eksampel bilong ol kain bilipman olsem Jop na Moses. (Ritim Provep 4:10-13.) Planti bratasista bilong yumi i bin mekim olsem. Tingim stori bilong wanpela brata nem bilong em Emmanuel, em i save stap long Kongo, em i stori long tok lukaut em i kisim na em i tok: “Ol brata i gat strongpela bilip long kongrigesen bilong mi i luksave olsem bilip bilong mi i laik bagarap, olsem na ol i givim ol tok bilong stretim mi. Mi bihainim tok kaunsel bilong ol na dispela i helpim mi long abrusim planti hevi.” * Wanpela painia sista long Kanada nem bilong em Megan, em i tok long ol kaunsel em i kisim olsem: “Em i no ol tok mi gat laik long harim, tasol em ol tok mi nid long harim.” Na narapela brata long Kroesia, nem bilong em Marko, em i tok: “Mi lusim gutpela wok mi holim, tasol taim mi tingim bek, mi luksave olsem tok kaunsel mi kisim i helpim mi long pas gut gen wantaim God.”

11. Brata Karl Klein i gat wanem tingting long pasin bilong kisim tok kaunsel?

¹¹ Narapela eksampel bilong wanpela husat i bin kisim gutpela helpim taim em i kisim tok kaunsel na bihainim em Brata Karl Klein, em i bin stap wanpela memba bilong Gavening Bodi. Long laip stori bilong em, em i stori long wanpela taim  gutpela pren bilong em, Brata Joseph F. Rutherford i bin givim tok bilong stretim em. Brata Klein i tokaut olsem pastaim em i no amamas long kisim tok kaunsel. Em i tok: “Bihain em i lukim mi na em i amamas na em i tok: ‘Helo, Karl!’ Tasol mi no bekim gut tok long em, long wanem, mi bel nogut yet. Olsem na em i tok: ‘Karl lukaut! Satan i laik pundaunim yu!’ Mi sem na mi tok: ‘Nogat samting, Brata Rutherford.’ Tasol em i save mi bel nogut long em na em i tok gen: ‘Em i orait, tasol yu mas lukaut. Satan i laik pundaunim yu.’ Na em i tok stret! Sapos yumi bel nogut long brata, olsem . . . em i givim sampela tok long yumi, orait yumi opim dua long Satan.” * (Efe. 4:25-27) Brata Klein i kisim na bihainim tok kaunsel i kam long Brata Rutherford, na tupela i bin stap gutpela pren inap longpela taim.

12. Olsem wanem pasin daun inap helpim yumi long kisim tok kaunsel? (Buk Song 141:5)

¹² Wanem samting inap helpim yumi long kisim tok kaunsel? Yumi mas daunim yumi yet na tingim olsem yumi no gutpela olgeta, na sampela taim yumi save mekim longlong pasin. Olsem yumi stori pinis, Jop i bin gat tingting kranki. Tasol bihain em i senisim tingting bilong em na Jehova i blesim em long em i mekim olsem. Wai? Bikos Jop i gat pasin daun. Em i soim olsem em i gat pasin daun taim em i kisim tok kaunsel i kam long Elihu, maski Elihu em i yangpela moa long em. (Jop 32:6, 7) Olsem tasol, pasin daun bai helpim yumi long kisim na bihainim ol tok kaunsel, maski yumi pilim olsem yumi no nid long kisim tok kaunsel o man o meri husat i givim yumi tok kaunsel em i yangpela moa long yumi. Wanpela elda long Kanada i tok: “Yumi no inap lukim yumi yet olsem hau ol narapela i save lukim yumi, olsem na hau bai yumi kamap strong long bilip sapos i no gat man i givim tok kaunsel long yumi?” Yumi olgeta i gat wok yet long kisim ol pasin bilong holi spirit, na mekim gut moa wok Kristen bilong yumi long autim tok na skulim ol man.​—Ritim Buk Song 141:5.

13. Yumi mas i gat wanem tingting long ol tok kaunsel yumi kisim?

¹³ Tingim tok kaunsel olsem rot bilong God long soim olsem em i laikim yu. Jehova i laik bai gutpela samting tasol i painim yumi olgeta. (Prov. 4:20-22) Taim em i givim tok kaunsel long yumi long rot bilong Baibel, ol buk na nius bilong Baibel, na long rot bilong wanpela wanbilip, em i soim yumi olsem em i laikim yumi. Hibru 12:9, 10 i tok: “God i save stretim yumi bilong helpim yumi.”

14. Yumi mas putim tingting olgeta long wanem samting taim yumi kisim tok kaunsel?

¹⁴ Tingim ol tok kaunsel yu kisim, na i no hau man i givim tok. Sampela taim yumi inap pilim olsem man i no givim ol tok kaunsel long gutpela pasin. Em tru olsem man i givim ol tok kaunsel, em i mas givim long rot we em i isi long yumi kisim. *  (Gal. 6:1) Tasol sapos yumi kisim tok kaunsel, orait yumi mas putim tingting olgeta long ol tok yumi kisim, maski yumi no amamas long hau man i givim tok kaunsel long yumi. I gutpela yumi askim yumi yet olsem: ‘Maski mi no amamas long hau man i givim tok kaunsel long mi, i gat sampela samting long dispela tok em i tru long mi? Mi ken lusim tingting long ol pasin kranki bilong man i givim tok bambai mi ken kisim helpim long ol tok em i mekim long mi?’ Em i savetingting long bihainim ol tok yumi kisim bambai dispela i ken helpim yumi.​—Prov. 15:31.

15. Wai na i gutpela long yumi askim long kisim tok kaunsel?

¹⁵ Baibel i kirapim yumi long askim long kisim tok kaunsel. Provep 13:10 i tok: “Savetingting i bilong ol man i save askim long kisim edvais.” Dispela tok em i tru! Ol manmeri husat i save askim long kisim tok kaunsel na ol i no wetim ol narapela i kam lukim ol na givim tok kaunsel long ol, planti taim ol bai kamap strong moa long bilip winim ol manmeri husat i no save askim long kisim tok kaunsel. So i gutpela yu yet i askim long kisim tok kaunsel.

16. Long wanem ol taim yumi ken askim long kisim tok kaunsel?

¹⁶ Long wanem ol taim yumi ken askim ol wanbilip long givim sampela tok kaunsel long yumi? Skelim sampela taim we yumi ken mekim olsem. (1) Wanpela sista i askim wanpela pablisa i gat bikpela ekspiriens long joinim em long Baibel stadi na bihain em i askim sista long edvais bilong em long hau em i ken mekim gut moa wok tisa bilong em. (2) Wanpela singel sista i laik baim wanpela trausis, so em i askim wanpela sista i gat bikpela krismas long tingting bilong em long dispela trausis em i makim pinis. (3) Wanpela brata i kisim asainmen bilong mekim fes pablik tok bilong em. Em i askim wanpela brata i gat bikpela ekspiriens long harim tok bilong em na givim sampela tok kaunsel bilong helpim em long mekim gut tok. Brata husat i save givim tok inap planti yia, i gutpela em tu i askim wanpela brata i gat bikpela ekspiriens long givim tok kaunsel long em na em i ken kisim na bihainim ol dispela tok kaunsel.

17. Olsem wanem yumi ken kisim gutpela helpim long tok kaunsel?

¹⁷ Insait long ol wik na mun i kam, yumi olgeta inap kisim tok kaunsel we wanpela i givim stret tok kaunsel long yumi o yumi kisim long ol narapela rot. Taim yumi kisim tok kaunsel, tingim ol poin em yumi stori long en long dispela atikol. Daunim yumi yet. Putim tingting olgeta long ol tok yumi kisim, na i no hau ol i givim ol tok long yumi. Na bihainim tok kaunsel yumi kisim. Yumi olgeta i no bin bon wantaim savetingting. Tasol taim yumi “putim yau long gutpela tok kaunsel na kisim tok bilong skulim [yumi],” Baibel i tok promis long yumi olsem yumi “bai kamap man i gat savetingting.”​—Prov. 19:20.