ALATIKE AKO 7
‘Fakalogo Ki Te ʼu Palalau ʼa Te Kau Poto’
“Tokaga ʼo fakalogo ki te ʼu palalau ʼa te kau poto.”—TAʼAG. 22:17.
KATIKO 123 Tou Agatonu Ki Te ʼu Tuʼutuʼuni Fakaʼatua
TE ʼU MANATU FAKANOUNOU *
1. Kotea he ʼu aluʼaga ʼe feala ai ke tokoniʼi tatou? Pea he koʼe ʼe ʼaoga ke fai mai kia tatou fuli he ʼu tokoni?
KO TATOU fuli ʼe ʼaoga ke tokoniʼi ʼi ʼihi temi. ʼE ʼi ai ʼihi aluʼaga, ʼe tou kole tokoni ki he tahi ʼe tou falala ki ai. ʼE ʼi ai ʼihi aluʼaga, ʼe ko he tehina ʼe haʼu ʼo fakatokaga mai he ʼe feala ke tou “faihala,” ʼo tou fai he meʼa ʼe feala ke tou fakahemala ki ʼamuli. (Kal. 6:1) Pea kapau leva neʼe tou fai he agahala mamafa, ʼe feala ke tokoniʼi tatou ʼo fakatonutonuʼi ai tatou. Pe kotea pe te aluʼaga ʼe tou tau mo ia, kae ʼe maʼuhiga ke tou tali ia te ʼu tokoni, he ʼe feala ke fua lelei kia tatou pea mo haofaki ʼotatou maʼuli.—Taʼag. 6:23.
2. Ka tou lau ia Taʼaga Lea 12:15, he koʼe ʼe lelei ke tou fakalogo ki te ʼu tokoni?
2 ʼE fakalotomalohiʼi tatou ʼaki te vaega tafito ʼo te alatike, ke tou ‘fakalogo ki te ʼu palalau ʼa te kau poto.’ (Taʼag. 22:17) ʼE mole he tahi ʼe ina iloʼi ia meʼa fuli, ʼe maʼua pe ke ʼi ai he tahi ʼe ʼatamai age peʼe poto age ia tatou. (Lau ia Taʼaga Lea 12:15.) Koia kapau ʼe tou agavaivai ʼe tou fia fakalogo anai ki te ʼu tokoni. ʼE tou fakaha ai ʼe tou iloʼi pe ʼotatou tuʼakoi, pea mo mahino kapau ʼe tou fia fakahoko ʼatatou fakatuʼutuʼu, ʼe ʼaoga mai he tokoni. Neʼe takitaki e te ʼAtua ia te Hau ko Salomone ke ina tohi fenei: “ ʼE hoko ia moka ʼe lahi te kau faitokoni.”—Taʼag. 15:22.
3. Kotea te faʼahiga tokoni ʼe feala ke fai mai?
3 Ko faʼahiga faitokoni ʼe lua ʼe feala ke fai mai. ʼUluaki, ʼe ko he faitokoni ʼe mole faifakahagatonu mai e he tahi. Ohage la, ka tou lau ia he manatu ʼi te Tohi-Tapu peʼe ko ʼatatou tohi, ʼe tou fakakaukauʼi pea mo fai ni fetogi ʼi tatatou aga. (Hep. 4:12) Ko te lua faʼahiga faitokoni, ʼe ko he tagata ʼafeā peʼe ko he tahi kua fakapotopoto ʼe ina fakatokagaʼi mai he koga ʼe tonu ke tou fakatonutonuʼi. ʼE ko he tokoni ʼe faifakahagatonu mai. Ka tokoniʼi tatou e he tahi, ko tana fakaha ʼaia ʼe ʼofa ia tatou. Koia ʼe tonu ke tou lotofakafetaʼi ʼo tou tali lelei te tokoni pea mo fakaʼaogaʼi.
4. Ka tou lau ia Ekelesiasi 7:9, kotea ʼae ʼe mole tonu ke tou fai moka tokoniʼi tatou?
4 ʼE mole faigafua te tali ʼo he tokoni ʼe faifakahagatonu mai e he tahi. ʼE feala pe ke tou iita. He kotea tona tupuʼaga? He ʼe logo la ʼe tou iloʼi pe totatou ʼuhiga ʼagahala, kae ʼe faigataʼa tatatou tali ke fakatonutonuʼi tatou ʼo ʼuhiga mo hotatou vaivaiʼaga. (Lau ia Ekelesiasi 7:9.) ʼE feala pe ke tou kumi takuʼaki, peʼe ke tou manatu, ko ia ʼae ʼe ina tokoniʼi tatou ʼe mole ʼofa ia tatou. Peʼe mole tou leleiʼia tana faʼahiga tokoniʼi tatou. Peʼe feala pe ke tou valokiʼi ia te tehina ʼo tou ui: ‘Ko ai ia ia ke ina fakatonutonuʼi au feia? Mo ia foki la ʼe ʼi ai ʼona vaivaiʼaga?’ Ka mole tou tali lelei te tokoni ʼe feala pe ke tou fakafisi ki ai pea mo kole tokoni ki he tahi age ʼe ina fai mai anai he ʼu palalau ʼe tou fia logo ki ai.
5. Kotea ʼae ka tou vakaʼi anai ʼi te alatike ʼaeni?
5 ʼE tou vakaʼi anai ʼi te alatike ʼaeni, ni tagata ʼi te Tohi-Tapu neʼe natou fakafisi ke tokoni pea mo ʼihi neʼe natou tali lelei. ʼE tou fakakaukauʼi anai pe koʼe ʼe lelei ke tou tali te ʼu tokoni pea ke fua lelei kia tatou.
NEʼE NATOU FAKAFISI KI TE TOKONI
6. Kotea te ako ʼe tou maʼu mai ia Lopoamo?
6 Tou palalau muʼa kia Lopoamo. Hili tona fakanofo hau, neʼe ʼomai te hahaʼi ʼo kolekole age ki ai ke ina fakamaʼamaʼa te ʼu gaue ʼae neʼe fakamaʼua age e tana tamai ko Salomone kia natou. Neʼe mole tali vave age ia Lopoamo, kae neʼe ina fakafehuʼi muʼa ia te kau matuʼa ʼo Iselaele, pea neʼe ko he tonu ʼe fakapotopoto. Pea neʼe natou ui age, kapau ʼe ina tali te kole ʼae neʼe fai age e te hahaʼi, ʼe natou agatonu anai ki te hau. (1 Hau 12:3-7) Kae neʼe mole leleiʼia e Lopoamo tanatou manatu. Koia neʼe alu leva ʼo fakafehuʼi te ʼu tagata neʼe natou lahilahi ake fakatahi. Neʼe kua natou taʼu 40 tupu koia ʼe feala pe ke tou ui kua ʼi ai pe ʼihi aluʼaga ʼo te maʼuli kua natou mahino ki ai. (2 Klk. 12:13) Kae ʼi te aluʼaga leva ʼaeni neʼe mole natou tuku age he tokoni fakapotopoto. Neʼe natou ui age ki te hau ke ina fakamamafa age te ʼu gaue ʼa te hahaʼi. (1 Hau 12:8-11) Ko faʼahiga tokoni ʼe lua neʼe fai age kia Lopoamo. Neʼe tonu ke faikole kia Sehova ke ina takitaki ia ia ke ina filifili ia te tonu ʼae ʼe lelei. Kae neʼe ina filifili ia te manatu ʼae neʼe ina leleiʼia, ia te tokoni ʼa te kau tupulaga. Neʼe ʼi ai leva te nunuʼa kovi kia Lopoamo pea mo te kau Iselaele. ʼE toe feia pe mo tatou, ʼi ʼihi temi ʼe mole tou leleiʼia moka tokoniʼi tatou. Kae kapau ʼe fakatafito te tokoni ki te Tohi-Tapu, ʼe tonu ke tou tali.
7. Kotea ʼe tou ako mai ia te Hau ko Osiasi?
7 Neʼe fakafisi ia te Hau ko Osiasi ki te tokoni neʼe fai age. Neʼe ulu ki te faʼahi ʼo te fale lotu ʼo Sehova, neʼe gafua pe ki te kau pelepitelo ke natou ulu ki ai. Neʼe fia alu ki ai ʼo tutu te iseso. Pea neʼe ui fenei age e te kau pelepitelo: ‘ ʼE mole gafua kia koe, Osiasi, ke ke momoli ni kaloni kia Sehova! ʼE fakalogo te tuʼulaga ʼaena ki te kau tagata faisakilifisio!’ Kotea ʼae neʼe fai e Osiasi? Kapau la neʼe agavaivai mo fakalogo ki te kau pelepitelo pea mo mavae atu aipe mai te fale lotu, neʼe feala pe ke fakamolemole e Sehova tana aga. Kae neʼe ‘ita ia Osiasi.’ He koʼe neʼe fakafisi ia Osiasi ki te tokoni ʼae neʼe fai age? Neʼe manatu ia ʼe gafua ke ina fai te meʼa ʼae ʼe loto ki ai he ko ia ko te hau. Kae neʼe mole manatu feia ia Sehova. Neʼe lotolahi, koia neʼe ‘kilia leva ia Osiasi ʼo kaku ki tona mate.’ (2 Klk. 26:16-21) Ko te ako ʼe tou maʼu mai ia Osiasi, kapau ʼe tou fakafisi he tokoni ʼe fakatafito ki te Tohi-Tapu, ʼe mole kei ʼofa Sehova ia tatou.
NEʼE NATOU TALI IA TE ʼU TOKONI
8. Neʼe tali feafeaʼi e Sopo ia te ʼu tokoni?
8 ʼE fakamatala ʼi te Tohi-Tapu ia te ʼu hahaʼi neʼe tapuakiʼi natou ʼuhi ko tanatou tali ia te ʼu tokoni. Ohage la ko Sopo, logo la neʼe ʼofa ʼi te ʼAtua pea mo fia fakalogo ki ai, kae neʼe mole ko he tagata neʼe haohaoa. Neʼe tau mo te ʼu malaʼia fakamataku, pea neʼe mole kei ina maʼu he manatu ʼe lelei. Koia neʼe tokoniʼi fakahagatonu ai ia ia e Eliu pea mo Sehova. Neʼe ina tali koa ia te tokoni? ʼEi, neʼe ina tali ʼaki he agavaivai. Neʼe ina ui fenei: “Nee au palalau, kae nee mole au mahino . . . Koia kua au iloi ai taku hala, pea kua au fakahemala ai, o nofo ki te efu mo te lefulefu.” Neʼe tapuakiʼi ia ia e Sehova ʼuhi ko tana agavaivai.—Sopo 42:3-6, 12-17.
9. Kotea te ako ʼe tou maʼu mai ia Moisese?
9 Neʼe tuku mai e Moisese ia he faʼifaʼitakiʼaga lelei. Neʼe ina fai he agahala mamafa pea neʼe ina tali ke fakatonutonuʼi ia ia. ʼI te tahi ʼaho, neʼe ita ki te hahaʼi pea neʼe mole ina fakakololiaʼi ia Sehova. Koia neʼe fakatotonu ai Sehova ʼe mole ulu anai ki te Kele ʼo Te Fakapapau. (Num. 20:1-13) Pea neʼe meo ia Moisese kia Sehova kae neʼe tali fenei age Sehova: “ ʼAua naʼa ke toe palalau mai ʼi he temi ki te faʼahi ʼaia.” (Tet. 3:23-27) Neʼe mole ita ia Moisese, neʼe ina tali te tonu ʼa Sehova pea neʼe toe fakaʼaogaʼi pe ia ia e Sehova ke ina takitaki tana hahaʼi. (Tet. 4:1) Ko Sopo mo Moisese ʼe ko he ʼu faʼifaʼitakiʼaga lelei ʼaia. Neʼe mole kumi takuʼaki ia Sopo, kae neʼe ina fetogi atu aipe tana faʼahiga manatu. Kae kia Moisese, logo la neʼe ina iloʼi ʼe mole ulu anai ki te kele ʼo te fakapapau, kae neʼe nofo agatonu pe kia Sehova, ʼo ha mai ai neʼe ina tali leleiʼi te ʼu tokoni ʼa Sehova.
10. (1) Ka tou lau ia Taʼaga Lea 4:10-13, kotea te ʼu lelei ʼe tou maʼu mo kapau ʼe tou tali te ʼu tokoni? (2) Neʼe tali feafeaʼi ʼihi ia te ʼu tokoni?
10 Ka tou faʼifaʼitakiʼi ia te aga ʼa Sopo pea mo Moisese, ʼe fua lelei kia tatou. (Lau ia Taʼaga Lea 4:10-13.) Tokolahi te ʼu tehina mo tuagaʼane ʼe feala ke natou fakamoʼoni ki ai. Ohage la neʼe ui fenei e te tehina mai Congo ʼe higoa ko Emmanuel: “Neʼe au vaivai ʼi te faʼahi fakalaumale, pea neʼe ʼomai te ʼu tehina kua fotufotuʼa ʼo tokoni mai. Neʼe au fakalogo ki ʼanatou tokoni, koia neʼe au hao ai mai ni fihifihia.” * Neʼe ui fenei e te tuagaʼane pionie ʼi Kanata, ʼe higoa ko Megan: “Neʼe mole au fia logo ki te ʼu tokoni ʼae neʼe fai mai, kae neʼe ko te ʼu tokoni neʼe ʼaoga ʼosi kia au.” Neʼe ui fenei e te tehina ʼi Croatie, ʼe higoa ko Marko: “Neʼe toʼo toku pilivilesio ʼi taku kokelekasio. Neʼe au fakakaukau pea mo mahino ai neʼe ʼaoga ʼosi ia te ʼu tokoni ʼae neʼe fai mai ke au toe liliu ʼo malohi ʼi te faʼahi fakalaumalie.”
11. Kotea ʼae neʼe ui e te tehina ko Karl Klein?
11 Neʼe toe ʼaoga ke tokoniʼi mo te tehina ko Karl Klein, ʼae neʼe kau ʼi te Kolesi Pule. ʼI te tahi ʼaho neʼe tokoniʼi fakahagatonu ia ia e tona kaumeʼa ko Joseph F. Rutherford. ʼI te kamata, neʼe mole ina tali leleiʼi te tokoni. Neʼe ina fakamatala fenei: “Hili te aluʼaga ʼaia, ʼi taku toe fetaulaki leva mo [te tehina ko Rutherford] neʼe ina ui fenei mai: ‘Malo Karl siʼou maʼuli!’ Neʼe kei au ita ʼi tana fakatonutonuʼi au, koia neʼe au muhumuhu ai. Pea neʼe ina ui mai: ‘Tokaga kia koe Karl! Koʼena te Tevolo ʼe ina tuli koe!’ Neʼe au ufiufi pea neʼe au tali fenei age: ‘Mole meʼa ia tehina Rutherford.’ Kae neʼe ina iloʼi pe neʼe au ita, koia neʼe ina toe fakatokaga mai fenei: ‘Io. Kae tokaga pe, he ʼe faiga te Tevolo ke ina maʼu koe.’ Neʼe moʼoni pe te tehina. Ka tou taupau he ita ki ʼotatou tehina, tafito la moka natou fai mai he tokoni ʼe tuha mo tatou, ʼe hage pe ʼe tou tuku kia Satana he faigamalie ke ina maʼu tatou.” * (Efe. 4:25-27) Neʼe tali e te tehina ko Klein ia te tokoni ʼae neʼe fai age e te tehina ko Rutherford, pea neʼe hoko atu pe tanā kaumeʼa lelei.
KOTEA ʼAE ʼE TOKONI MAI KE TOU TALI IA HE TOKONI?
12. Ka tou lau ia Pesalemo 141:5, he koʼe ʼe tonu ke tou agavaivai moka tokoniʼi tatou?
12 Kotea ʼae ʼe feala ke tokoni mai ke tou tali ia he tokoni? ʼE tonu ke tou agavaivai. Tou manatuʼi ʼe tou agahala fuli pea ʼi ʼihi temi ʼe mole tou fakapotopoto. Ohage pe ko Sopo, ʼi ʼihi temi neʼe faihala. Kae neʼe ina fakatonutonuʼi tana faʼahiga manatu pea neʼe tapuakiʼi ia ia e Sehova. Kae he koʼe neʼe ina fakatonutonuʼi tana faʼahiga manatu? He neʼe agavaivai. Neʼe ina tali fakavaivai ia te tokoni ʼa Eliu, logo la ʼe veliveli age ia ia. (Sopo 32:6, 7) ʼE toe feia pe mo tatou, kapau ʼe tou agavaivai ʼe tou tali anai te tokoni, tatau aipe pe ʼe tou manatu ʼe mole hona ʼaoga peʼe ko he tahi ʼe kei tupulaga ʼae ʼe ina tokoniʼi tatou. ʼE ui fenei e te tehina tagata ʼafeā mai Kanata: “ʼE feala pe ke tokagaʼi e he tahi ia hatatou aga ʼe tonu ke tou fakatonutonuʼi, kae neʼe mole tou tokagaʼi tatou. ʼE ko he meʼa lelei foki tana tokoniʼi tatou ke tou fetogi tatatou aga ke lelei.” ʼE ʼaoga kia tatou fuli ke tou maʼu ia te ʼu kalitate ʼo te laumalie maʼoniʼoni pea mo hikihiki tatatou faʼahiga faifakamafola mo faiakonaki ke lelei age.—Lau ia Pesalemo 141:5.
13. He koʼe ʼe tokoniʼi tatou?
13 ʼE tokoni’i tatou he ’e ’ofa ia Sehova ia tatou. ʼE loto e Sehova ke tou maʼuli fiafia. (Taʼag. 4:20-22) Ka tokoniʼi tatou e Sehova ʼaki tana Folafola te Tohi-Tapu, peʼe ko he tohi Fakatohi-tapu, peʼe ko he tehina kua fotufotuʼa, ko tana faʼahiga fakaha mai ʼaia ʼo tona ʼofa. ʼE ui ia Hepeleo 12:9, 10: “ ʼE ina akonakiʼi tuʼumaʼu tatou ke fua lelei kia tatou.”
14. Kotea ʼe tonu ke tou fai moka tokoniʼi tatou?
14 ’E tonu ke tou tokaga’i te tokoni kae mole ko tona fa’ahiga tuku mai. ʼI ʼihi temi ʼe feala pe ke tou manatu neʼe lelei te faʼahiga tuku mai ʼo he tokoni. Ko ia ʼae ʼe faitokoni ʼe tonu ke ina faigaʼi ke tali leleiʼi tana tokoni. * (Kal. 6:1) Kae kapau ʼe tokoniʼi tatou, ʼe tonu ke tou tokagaʼi tafito ia te tokoni, tatau aipe pe neʼe mole lelei tona faʼahiga tuku mai. Tou feʼekeʼaki: ‘Tatau aipe pe ʼe mole au leleiʼia tana faʼahiga tokoniʼi au, kae ʼe mole moʼoni koa la tana palalau? ʼE mole tonu koa la ke au tali pe te tokoni kae ke mole au tokagaʼi te ʼu totō ʼo ia ʼae ʼe ina tokoniʼi au?’ Tou tali lelei te ʼu tokoni fuli ʼe fai mai, he ʼe ko he aga fakapotopoto ʼaia.—Taʼag. 15:31.
TOU KOLE TOKONI
15. He koʼe ʼe lelei ke tou kumi tokoni?
15 ʼE fakalotomalohi tatou ʼi te Tohi-Tapu ke tou kole tokoni. ʼE ui fenei ia Taʼaga Lea 13:10: “ ʼE maʼu te poto e natou ʼae ʼe kole tokoni.” ʼE moʼoni pe te manatu ʼaeni. Ko natou ʼae ʼe kole tokoni ʼe natou tuputupu vave age anai ʼi te faʼahi fakalaumalie ia natou ʼae ʼe mole kumi tokoni. Koia ʼe lelei ai ke tou kumi tokoni.
16. Kotea te ʼu aluʼaga ʼe feala ke tou kole tokoni?
16 Kotea la ʼihi aluʼaga ʼe feala ai ke tou kole tokoni ki he tahi? Koʼeni ʼihi aluʼaga: (1) ʼE tou fakaafe he tahi ʼe faiva ʼi te faifakamafola ke tou kaugā olo mo ia ʼo fai he ako. ʼE feala ke tou kole tokoni ki ai ke ina akoako tatou ki te faʼahiga faiako. (2) ʼE fia toʼo e he kiʼi tuagaʼane ʼe kei selipatea hona vavaʼe loloa. ʼE ina kole age ki he tuagaʼane kua fakapotopoto ke ina ui age tana manatu. (3) ʼI muʼa ʼo tana kamata tana akonaki, ʼe kole e he tehina ki he tahi ʼe faiva ʼi te faiakonaki ke ina fakalogo lelei ki tana akonaki pea ke ina ui age pe kotea ʼae ʼe tonu ke ina fai ke hikihiki ai te lelei ʼo tana faiakonaki. Maʼia pe la mo te tehina ʼae kua fualoa tana faiakonaki, ʼe lelei ke ina kumi he ʼu tokoni pea mo fakaʼaogaʼi.
17. Kotea ʼe tonu ke tou fai ke fua lelei te ʼu tokoni kia tatou?
17 ʼE feala pe ke tokoniʼi tatou ʼi te ʼu vahaʼa peʼe ko te ʼu mahina ʼaeni ka hoko mai. Ko he ʼu tokoni ʼe fai mai fakahagatonu e he tahi peʼe mai ʼatatou tohi Fakatohi-tapu. Tou manatuʼi te ʼu manatu ʼaeni neʼe tou palalau ki ai. Tou agavaivai. Tou tokagaʼi tafito te tokoni, kae mole ko ia ʼae neʼe ina fai mai te tokoni. Tou fakaʼaogaʼi te tokoni. ʼE mole he tahi neʼe tupu ake kua fakapotopoto. Kae kapau ʼe tou tali te ʼu tokoni pea mo tokagaʼi te fakatonutonu mai ia Sehova, ʼe ui ʼi te Tohi-Tapu ʼe tou liliu anai ʼo “poto.”—Taʼag. 19:20.
KATIKO 124 Agatonu Tuʼumaʼu
^ ʼE mahino ia te kau Fakamoʼoni ʼa Sehova ki te maʼuhiga ʼo te fakalogo pea mo te maʼuliʼi te ʼu tokoni Fakatohi-tapu. Kae mole faigafua te tali ʼo he tokoni. He kotea tona tupuʼaga? Kotea ʼe feala ke tou fai ke tou maʼu te ʼu fua lelei ʼo te ʼu tokoni ʼae ʼe fai mai?
^ Ko ʼihi higoa neʼe fetogi.
^ Vakaʼi Te Tule Leʼo (Fakafalani) ʼo te ʼaho 1 ʼo Maio 1985, p. 20-27
^ ʼE tou talanoa anai ʼi te alatike ʼae ka hoa mai kia natou ʼae ʼe faitokoni, pe ʼe feafeaʼi hanatou faitokoni ʼaki he aga fakaʼeteʼete.