1. Nan̈ino ma atsika mahazo torohevitry, avio nan̈ino raha zen̈y ten̈a ilaintsika?

MILA torohevitry aby atsika jiaby ndraikindraiky. Misy fotoan̈a, mety atsika foeky hangataka torohevitry aminolo hajaintsika. Fa saoko, mety hisy rahalahy araiky be fitiavan̈a han̈aton̈o anao, avio hivolan̈a fa amy lalan̈a tsy tokony himboan̈a anao, ke mety han̈ano raha hanin̈enan̈a. (Gal. 6:1) Mety hanarin̈y koa atsika izikoa nan̈ano fahotan̈a maventy. Na karakory na karakory fomba han̈amezan̈a torohevitry atsika, tokony ho vôn̈ono fo atsika hitandren̈y. Mahatsara atsika raha zen̈y sady mety han̈avotro ain̈intsika.​—Ohab. 6:23.

2. Nan̈ino atsika tokony hitandren̈y torohevitry? (Ohabolana 12:15)

² Andininteny ioren̈any fianaran̈antsika ty mampirisiky atsika ‘hitandren̈y volan̈anolo misy jery.’ (Ohab. 22:17) Tsisy olo mahay raha jiaby, ke tsy maintsy misy olo fo mahay raha mandilatra anten̈a. (Vakia Ohabolana 12:15.) Manetry ten̈a atsika izikoa mitandren̈y torohevitry. Ikentsika baka fa, misy limitiny raha haintsika, ke mila fan̈ampian̈a atsika baka hahavita hanakatra tanjon̈ontsika. Zen̈y nahavy Jehovah nan̈iraka Solomona panjaka hendry nanoratra fa ‘ho vita raha tian̈a hatao izikoa maro pan̈amia hevitry.’​—Ohab. 15:22.

3. Akory aby fomba mety azahoantsika torohevitry?

³ Mety hahazo torohevitry tsy mivantan̈a na mivantan̈a atsika. Lera karakory ma atsika mety hahazo torohevitry fa tsy mivantan̈a? Mety lera atsika mamaky Baiboly na mamaky lahatsoratra amy boky ndreky gazety, atsika mahita fa misy toetsain̈y na raha fataontsika mila amboarin̈y. (Heb. 4:12) Karaha zen̈y torohevitry tsy mivantan̈a zen̈y. Fa karakory fo torohevitry mivantan̈a? Mivantan̈a torohevitry azontsika izikoa, ohatra, misy antipan̈ahy na rahalahy matotro hafa mivolan̈a amintsika fa misy raha mila ankatsaraintsika. Ke izikoa misy olo masaky  man̈amia anao torohevitry baka amy Baiboly, tokony hankasitraka izy anao, fotony tiany marin̈y anao matoa izy man̈ano zen̈y. Tandrin̈esa tsara izy, avio areha raha nivolan̈iny.

4. Ino raha tsy tokony hataontsika atsika koa fa amezanolo torohevitry? (Mpitoriteny 7:9)

⁴ Mety tsy ho mora amintsika han̈eky ndreky han̈araka torohevitry amezanolo, ary mety hampameloko atsika foeky. Mora amintsika man̈eky fa atsika tsy lavorary. Kanefa, mety ho sarotro amintsika ndraiky han̈eky torohevitry izikoa fa misy olo man̈itsy atsika aminy hadisovan̈antsika. (Vakia Mpitoriteny 7:9.) Mety han̈amarinten̈a aby atsika. Mety hivolan̈a atsika fa tsy tianolo io atsika, na koa tsy mety fomba nan̈amezany torohevitry. Mety han̈amia tsin̈y izy lastio atsika, ke hivolan̈a: ‘Tsy hainao raha hivolan̈any olo! Izy amy zen̈y karaha olo tsy mahay diso!’ Mety tsy ahoantsika foeky torohevitry nazontsika izikoa izio tsy tiantsika, na mety hangataka hevitry aminolo hafa iritriretintsika hivolan̈a raha tiantsika ho ren̈y atsika.

5. Ino aby raha hidinihintsika ato?

⁵ Baiboly mikoran̈a tantaranolo tsy nitandren̈y anatra ndreky olo nan̈eky torohevitry. Handiniky sasany amy zen̈y atsika ato. Hidinihintsika koa raha han̈ampy atsika han̈eky torohevitry, ndreky hatsaran̈a ho azontsika baka amy zen̈y.

6. a) Akory nataony Panjaka Rehoboama koa fa nahazo torohevitry? b) Ino raha ianarantsika baka amy zen̈y?

⁶ Miniminia hely baka Rehoboama. Izy koa fa nanjary panjakany Israely, nisy raha nangatahany vahoaka taminany. Nafy tamindro baka raha sasany nampan̈anôviny Solomona, babany Rehoboama. Ke iro niangavy Rehoboama hampahivankivan̈a asandro. Ino raha nataony Rehoboama? Izy nangataka torohevitry taminolo efa nahazoazo taon̈o, misy ahaizany raha handeha hivolan̈iny amy vahoaka. Nivolan̈a iro matoelahy aby io fa tokony hikeny Rehoboama raha nangatahandro vahoaka aby io, amy zen̈y iro tsy hiala izy. (1 Mpanj. 12:3-7) Kanefa tsy nahafapô Rehoboama torohevitry nazony zen̈y, ke lôso izy nan̈ontany olo nitovitovy taon̈o taminany, kadiriny 40 taon̈o tiô. (2 Tan. 12:13) Kanefa tsy pare aby torohevitry namezandro i Rehoboama. Nirahindro nampitombosiny asany vahoaka, kanefa iro vahoaka aby io efa sahiran̈a mare. (1 Mpanj. 12:8-11) Samby isany torohevitry nazony Rehoboama. Ino raha tokony nataony? Tokony nivavaka tamy Jehovah izy, baka ho hainy aia amindro torohevitry aby io tokony harehany. Kanefa tsy zen̈y raha nataony, fa direkty narehany torohevitrindro lelahy nitovitovy taon̈o taminany aby io fotony zen̈y tiatiany. Nisy vokany ratsy taminany ndreky tamy vahoaka raha nataony. Mety tsy ho tiantsika koa torohevitry azontsika. Kanefa, tokony ho vôn̈ono fo atsika han̈eky torohevitry, izikoa izio baka amy Volan̈a Zan̈ahary.

7. Ino raha ianarantsika baka amy Panjaka Ozia?

⁷ Tsy nan̈eky torohevitry koa Panjaka Ozia. Niditry taminy efitry masin̈y tamy tempoly izy, nitondra emboko man̈itry. Kanefa, tsisy olo nahazo nandeha tao izikoa tsy pisoron̈o fo. Ho iro pisoron̈ony Jehovah aby io taminany: ‘Tsy anjaranao, Ozia, man̈ôro emboko man̈itry hamian̈a Jehovah, fa anjarany pisoron̈o.’ Nan̈ano akory fihetsikiny Ozia? Izikoa izy nanetry ten̈a ke nan̈eky torohevitry, izy tokony direkty niala tamy tempoly tao. Mety nambelany Jehovah hadisovan̈anany izikoa izy nan̈ano zen̈y. Kanefa, tsy zen̈y raha nataony Ozia fa ‘neloko’ ndraiky izy. Nan̈ino ma izy tsy nan̈eky torohevitry? Mety nieritreritry donko izy fa izy panjaka, ke zay raha tiany hatao mety aby. Kanefa, raha zen̈y mifanohitry amy fomba fihevitriny Jehovah. Nan̈ano raha tsy nazahoany lalan̈a i Ozia, ke nanjary ‘boka izy firaka izy naty.’  (2 Tan. 26:16-21) Mampianatra atsika ino raha nataony Ozia io? Tsy hahazo fankasitrahany Jehovah lan̈iany olo tsy man̈eky torohevitry baka amy Baiboly, na azovy izy na azovy.

8. Karakory nataony Joba, izy koa fa nahazo torohevitry?

⁸ Tsy olo tsy nan̈eky torohevitry fo koran̈iny Baiboly. Ao koa misy tantaranolo nahazo hatsaran̈a fotony nan̈eky torohevitry. Ke ten̈a ohatra tsara iro. Araiky amy zen̈y Joba. Izy tia Jehovah sady tihan̈ano raha mamparavoravo Izy. Fa ndray zen̈y, Joba tsy lavorary. Ke diso hevitry izy taminizy nandalo fitsapan̈a mare. Nan̈anatra izy Eliho ndreky Jehovah, ary mahitsy volan̈andro tamy Joba. Akory nataony Joba? Nanetry ten̈a izy ke nan̈eky torohevitry. Ho izy: ‘Nivolan̈a zaho, kanefa raha tsy takatrany jeriko aby nivolan̈iko in̈y. An̈ampody volan̈a zaho, ke amy jomòka ndreky jôfo eto zaho mibebaka aminao.’ Namezany Jehovah hatsaran̈a i Joba fotony nanetry ten̈a.​—Joba 42:3-6, 12-17.

9. Akory nataony Mosesy, izy koa fa nahazo torohevitry?

⁹ Ohatra tsara koa Mosesy. Nan̈ano hadisovan̈a maventy izy ke nahazo fan̈itsian̈a. Nikeny fan̈itsian̈a nazony. Nisy fotoan̈a baka izy neloko loatra ke efa tsy nan̈amia voninahitry Jehovah eky. Zen̈y nahavy izy tsy nahazo niditry tamy Tany Nampan̈antinain̈y. (Nom. 20:1-13) Niangavy Jehovah izy baka Jehovah hiova hevitry, fa ho Jehovah taminany: ‘Aza mikoran̈a zen̈y aminaka eky!’ (Deot. 3:23-27) Ndray zen̈y, tsy neloko i Mosesy. Nikeny fanapahankevitriny Jehovah, ke mbala izy fo nampiasainy Jehovah nitariky Israely. (Deot. 4:1) Ten̈a ohatra tsara i Joba ndreky Mosesy, fotony iro samby nan̈eky torohevitry, ke tsara alaintsika tahaka. Tsy nitady fialantsin̈y i Joba, fa direkty nahitsiny toetsain̈inany. Nikeny Mosesy tsarabe torohevitry namezany Jehovah, ke tsy nivadiky foeky izy ndray tsy nahazo niditry tamy Tany Nampan̈antinain̈y.

10. a) Izikoa zahan̈a Ohabolana 4:10-13, nan̈ino mahatsara atsika mahazo torohevitry? b) Nan̈ano akory fihetsikinolo sasany, izikoa fa nisy olo nan̈itsy iro?

¹⁰ Atsika fo mahazo hatsaran̈a izikoa man̈araka modely tsara nambelany Joba ndreky Mosesy. (Vakia Ohabolana 4:10-13.) Maro piaramanompo amintsika nan̈ano zen̈y. An̈isanizen̈y i Emmanuel, rahalahy araiky a Congo an̈y. Karaha ty ho izy: “Maro rahalahy matotro fiangonan̈a araiky taminaka nahazo onon̈o fa, efa nanomboko tsy nihavan̈a tsara tamy Jehovah zaho, ke iro nitady fomba nan̈ampian̈a zaho. Narehako torohevitry namezandro, ke zen̈y nan̈ampy zaho hiary problemo maro.” * Nahazo torohevitry koa pisava lalan̈a araiky a Kanada. Megan an̈arany. Karaha ty ho izy: “Ndraikindraiky tsy raha tiako ho ren̈y aby raha ren̈iko, kanefa ten̈a nilaiko iro torohevitry aby io.” Karaha ty koa ho Marko, rahalahy araiky mipetraka a Krôasỳ: “Nadoso taminaka andraikitrinaka tan̈ivony fiangonan̈a. Fa zaho koa fa mandiniky zen̈y, hitako fa ten̈a nan̈ampy zaho hankafatatra fihavan̈ako amy Jehovah fan̈itsian̈a nazoko tamy zen̈y.”

11. Ino raha nivolan̈iny Rahalahy Karl Klein momba fan̈arehan̈a torohevitry?

¹¹ An̈isany olo nahita hatsaran̈a baka tamy fan̈arehan̈a torohevitry koa i Rahalahy Karl Klein. An̈isany Filankevipitantan̈ana izy taloha. Tandraraiky, nan̈anatra izy mare Rahalahy Joseph Rutherford. Iro io kamarady mare. Ary nikoran̈iny Klein amy tantarampiain̈ananany torohevitry nazony zen̈y. Tamy voanalohany, tsy nora tamy Rahalahy Klein nan̈eky torohevitry namezany Rutherford izy io. Ke ho izy: “Amarainizin̈y, zahay koa fa fanôjy, ho Rahalahy Rutherford taminaka: ‘Mbalatsara Karl!’ Fa zaho taminio mbala neloko fo, ke maikimaiky fo  zaho namaly mbalatsaranany. Nitodiky izy sady nivolan̈a karaha ty: ‘Mitandrema anao Karl, fa efa tihamandriky anao Devoly!’ Nen̈atra zaho, sady nivolan̈a: ‘Zaho fa tsy meloko aminao, Rahalahy Rutherford.’ Kanefa hainy tsarabe fa zaho mbala neloko taminany, ke nampodiny ndraiky: ‘Pare zen̈y. Fa mitandrema fo, fa efa tihamandriky anao Devoly.’ Marin̈y ankitin̈y raha nivolan̈iny zen̈y! Atsika koa mitana heloko amy rahalahintsika, intsaka eky izikoa izy manan̈a zò hivolan̈a amintsika raha nivolan̈iny io ... , ho moramora amy Devoly hamandriky atsika.” * (Efes. 4:25-27) Narehany Rahalahy Klein torohevitry namezany Rahalahy Rutherford izy, ke mbala kamarady fo iro tafaranizen̈y.

12. Ino raha han̈ampy atsika han̈eky torohevitry? Nan̈ino? (Salamo 141:5)

¹² Ino raha han̈ampy atsika han̈eky torohevitry? Fanetrenten̈a. Izikoa atsika manetry ten̈a, ho azontsika onon̈o fo fa atsika io tsy lavorary, ke mety han̈ano raha tsy avoadiniky. Atsika tiô nianatra fa nisy fotoan̈a Joba diso hevitry. Kanefa, niova izy tafara tatỳ, ke namezany Jehovah hatsaran̈a izy. Akory nahitan̈a fa nanetry ten̈a i Joba? Izy nan̈eky nahitsiny Eliho, ndray Eliho mbala zandry lavitry. (Joba 32:6, 7) Mbala fanetrenten̈a fo koa han̈ampy atsika han̈eky torohevitry ndray karaha tsy fandanja atsika torohevitry nazontsika io, na koa mbala zandrizandrintsika olo man̈amia torohevitry io. Karaha ty ho antipan̈ahy araiky a Kanada an̈y: “Tsy miran̈a fahitantsika ain̈intsika ndreky fahitanolo atsika. Ke ho sarotro amintsika handroso arapan̈ahy izikoa tsisy olo man̈amia torohevitry atsika.” Atsika jiaby io samby mbala mila miezaka hanan̈a vokatrany fan̈ahy bebe, avio atsika mila mankatsara fahaizantsika mitory ndreky mampianatra.​—Vakia Salamo 141:5.

13. Akory tokony fiheveranao torohevitry amezan̈a anao?

¹³Aza adin̈a fa matoa anao mahazo torohevitry, dikanizen̈y anao tiany Jehovah. Raha mahatsara atsika fo tadiaviny Jehovah. (Ohab. 4:20-22) Tiany Jehovah atsika ke amezany torohevitry baka amy Volan̈anany, baka amy boky ndreky gazety aboakany fandaminan̈a, na baka amy piaramanompo matotro. Man̈itsy atsika izy fotony zen̈y hitany fa ‘mahatsara atsika.’​—Heb. 12:9, 10.

14. Ino raha tokony hifantohantsika lera atsika mahazo torohevitry?

¹⁴Mifantoha amy torohevitry, fa tsy amy fomba an̈amezan̈a izio. Ndraikindraiky, mety hitantsika karaha tsy pare loatra fomba nan̈amezanolo torohevitry atsika. Marin̈y ndraiky fa atsika koa fa han̈amia torohevitry, tokony hitandrin̈y atsika baka ho mora aminolo han̈eky torohevitry  amezantsika izy. * (Gal. 6:1) Fa izikoa atsika ny amezan̈a torohevitry, tsara atsika mifantoko amy torohevitry namezan̈a atsika fa tsy amy fomba nivolan̈ana izio tamintsika. Tokony han̈ontany ten̈a karaha ty atsika: ‘Tsy tiako ndraiky fomba nan̈amezany torohevitry io fa, tsao mba misy mahamarin̈y izy fo izio ay? Asa zaho mba mifantoko amy raha tsara ho azoko baka amy torohevitry io, fa tsy aminy hadisovan̈anolo nan̈amia izio?’ Misy jery atsika izikoa man̈araka torohevitry azontsika.​—Ohab. 15:31.

15. Nan̈ino atsika tokony hangataka torohevitry?

¹⁵ Baiboly mampirisiky atsika hangataka torohevitry. Ohabolana 15:31 mivolan̈a: ‘Misy jery lan̈iany olo mangataka torohevitry.’ Marin̈y loatra eky zen̈y! Olo mazoto mangataka torohevitry ny ten̈a handroso arapan̈ahy, mandilatra olo miambin̈y amian̈a torohevitry ndreky olo tsy mila torohevitry. Ke aza misalasala foeky mangataka torohevitry.

16. Ombian̈a aby atsika mety hangataka torohevitry?

¹⁶ Lera karakory aby atsika mety mangataka torohevitry amy piaramanompo? Ty raha mety ho hisy: 1) Ranabavy araiky mitaon̈o pitory efa zadraharaha hiaraka hampianatra aminany, baka io izy mangataka sosokevitry mety hankatsarany fahaizany mampianatra. 2) Ranabavy tanora araiky mila hivanga lamba, ke mangataka torohevitry amy ranabavy matotro izy baka izy hahay hifidy tsarabe. 3) Rahalahy araiky sambany han̈ano kabaro. Miangavy pan̈ano kabaro efa zadraharaha izy hitandren̈y tsara kabaronany ndreky han̈ambara raha mety hankatsarainy. Ndray efa tan̈atiny taon̈o maro rahalahy araiky nan̈ano kabaro, tsara fo izy mba mangataka sosokevitry amy rahalahy hafa mahay man̈ano kabaro.

17. Ino raha mila ataontsika beky atsika hahazo hatsaran̈a baka amy torohevitry?

¹⁷ Tsy niany tsy amaray, atsika jiaby io samby mbala mety hahazo torohevitry aby, na torohevitry mivantan̈a eky zen̈y na torohevitry tsy mivantan̈a. Izikoa avy fotoan̈a zen̈y, tsaraova raha nianarantsika tato. Mifen̈a hanetry ten̈a. Mifantoha amy torohevitry namian̈a anao, fa tsy amy fomba nan̈amezan̈a izio anao. Areha torohevitry azonao. Tsisy olo efa misy jery baka ankibondreniny. Fa izikoa atsika ‘mitandren̈y torohevitry, baka io man̈eky anarin̈y’, mampan̈anten̈a Volan̈a Zan̈ahary fa “ho hisy jery” atsika.​—Ohab. 19:20.