1-2. Pakayni mihadak to sapalimoˈot, o cecay faˈinayan salikaka mananamay ko maanan?

 ˈAYAW no pina miheca, tatosaay malohemay malitengay milisoˈay to cecay marariday milawa to saˈopo a fafahiyan salikaka. O cecay malohemay malitengay panengnengay to pina sinael to fafahiyan salikaka, pakalalok cingranan micerid mirienang to saˈopo. Harateng nonini malohemay malitengay, madeng mapakalalokay konini fafahiyan salikaka saan miharateng. ˈArawhan miliyas cangra i, sanay koya fafahiyan salikaka: “Cowa ka fanaˈ kamo to pasangaray ko pakayraan no mako!” Cowa ka isalakat ko malohemay malitengay cipinang to pasangaray pakayraan no fafahiyan salikaka, telocto o sapalimoˈot no malohemay malitengay awaay ko kapo saan ko harateng no fafahiyan salikaka.

² Mitikol miharateng koniya malohemay malitengay toya pilisoˈ itiya sanay: “Salakat cowa ka pikangodo tamiyanan koniya fafahiyan salikaka saan ko harateng no mako, kawra songilaˈen miharateng ikor, soˈlin o ngaˈayay a sinael mihadakanto maemin, kawra o lalicayen a salicay cowa ka licayen. Tinakoen o halalicayaen ako: ‘Ngaˈayay ko kaˈorip iso han?’ ‘Ngaˈay kako padama tisowanan to maanan hani?’” Oniya malohemay malitengay mananamay ko kalimlaan a sapasifanaˈ. Anini o tada siniˈadaay a pakaenay cingra, adihayay ko sapadama i salikaka.

3. Itini kasakopang, o cima ko papalimoˈot to tamdaw hani?

 ³ O malohemay malitengay o pakaenay no kasakopang, itini pisaali no salikaka iraay ko ˈinorong mihadak to sapalimoˈot. Kawra, o roma tamdaw no kasakopang o papafeli to sapaini to tao alatek. Tinakoen, wa misalalangi kita to Fangcalay Cudad mihadak to sapalimoˈot i widang. (ˈOlic 141:5; Taneng 25:12) O matenesay a fafahiyan salikaka papalimoˈot to kaemangay a  fafahiyan salikaka alatek, patalipaˈelal cangranan misinanot to misowalan no Titus 2:3-5 a demak. Roma i, o wama wina mamicerid pasifanaˈ ato mirikec to wawa. Mihaenay, soˈlin onini a lalakaw misowalan i, o sapaini to malohemay malitengay, kawra kita o kahacecay tamdaw ngangaˈay mikitini a minanam, sasamaan mihadak to sapalimoˈot padama to tao, ngaˈayho ‘palipahak to falocoˈ’ nangra.—Taneng 27:9.

4. Onini a lalakaw mamilengo to maanan?

⁴ Pakayni mihadak to sapalimoˈot, onini a lalakaw mamilengo to sepat salicay: (1) O maanan ko araaw hani? (2) Soˈlinay o kalimlaan mihadak to sapalimoˈot han? (3) O cima ko mihadak to sapalimoˈot o sangaˈayay hani? (4) Sasamaan mihadak to sapalimoˈot ngaˈ ira ko epoc no tao hani?

5. Ano mikitini ciolahay a falocoˈ mihadak ko malohemay malitengay to sapalimoˈot, hano mamadoloto micada ko tao hani? (1 Korinto 13:4, 7)

⁵ Tada maolahay ko malohemay malitengay to salikaka, mansa ano maˈaraw ko tamdaw mamararaw ko mirakatan a lalan, o mamihadak to sapalimoˈot. (Kalatiya 6:1) Kawra, ˈayaw no palimoˈot to tamdaw ko malohemay malitengay, isalakatho misimsim to sowal ni Pawlo, miharateng to ano iraay ko olah no cecay tamdaw mamisamaan ko demak. Sowal ni Pawlo: ‘O olah, mihadidiay, sidaˈitay. . . .O olah, padadotoc a masasodod, padadotoc a pakasoˈlin, padadotoc a mitokel, padadotoc a mihadidi.’ (ˈOsien ko 1 Korinto 13:4, 7.) Midotim ko malohemay malitengay toniya sinael i, ngaˈay miharateng o maanan ko araaw no niyah mihadak to sapalimoˈot. Mihaen, o ngangaˈayto cingra mikitini ciolahay a falocoˈ palimoˈot to tao. Ano matinako no salikaka ko kaciharateng no malohemay malitengay, o mamadoloto a micada to sapalimoˈot.—Loma 12:10.

6. Patirengay ci Pawlo to maanan ngaˈayay a taˈarawan?

⁶ O tarokos ci Pawlo patirengay to ngaˈayay a taˈarawan no malohemay malitengay. Tiya misaali to sapatalipaˈelal ko Tisalonika a salikaka i, pafeliay ci Pawlo to ngaˈayay a sapalimoˈot i cangranan. Kawra itini i lalomaˈ no mitilidan a tikami i, salakatay pakahemek ci Pawlo cangranan to mikitiniay i pakasoˈlin no falocoˈ a waywayan, mikitiniay olah a roray, ato paihkalan nangra a mihadidiay. Roma i, pasowalayho cingra to salikaka, tada cipinangay cingra to pakayraan nangra, mafanaˈay to pasangaray ko kaˈorip nangra, tahalifaay to sapalak. (1 Tisalonika 1:3; 2 Tisalonika 1:4) Pasowalayho ci Pawlo o ngaˈayay a taˈarawan no romaroma a Krisciyang cangra. (1 Tisalonika 1:8, 9) Matengil ko mikifalocoˈay a sapakahemek ni Pawlo, madeng tada mahemekay ko salikaka. Awaay ko hasasa, tada maolahay ci Pawlo to salikaka, mansa o sapafeli to Tisalonika a kasakopang a sapalimoˈot tangongolay ko pitemer to falocoˈ nangra.—1 Tisalonika 4:1, 3-5, 11; 2 Tisalonika 3:11, 12.

7. O roma tamdaw hano cowa ka makahi micada to sapalimoˈot hani?

⁷ Ano mararaway ko pakayraan mihadak to sapalimoˈot, alatek sasamaanto ko teloc? O cecay kadofahay ko nalifetan a malohemay malitengay sanay: “O roma tamdaw cowa ka olah mitengil, cowa ko mararaway ko sapalimoˈot, ao pakayraan a somowal ko kapiliˈan nangra.” Ngaˈay mananam ita ko maanan? Ano mihadak kita to sapalimoˈot o mikitiniay i olah cowa ko pakayniay i kaketer, mamadoloto ko tao a micada.

8. ˈAyaw no misaˈosi ko malohemay malitengay to mamihadak to sapalimoˈot i, aisalakatho miharateng to maanan a salicay?

⁸ O malohemay malitengay cowa kangaˈay macaloh mihadak to sapalimoˈot i tamdaw, ao  aisalakatho miharateng: “Soˈlinay o kalimlaan ko hasowal ako han? Soˈlinay mafanaˈ kako to mararaway cingra han? Misafelitay cingra to maanan a limoˈot no Fangcalay Cudad han? Anca pakayniay aca i caka lecad ko harateng ningra takowanan hokira?” Isalakat ko malohemay malitengay miharateng tonini a salicay o citanengay, mihaen o mamaliyasto ko ‘macalohay a somowal.’ (Taneng 29:20) O cecay malohemay malitengay ano cowa ka cipinang to mamihadak to sapalimoˈot i cecay tamdaw hokira, ngaˈayay masasowal cingra to roma malohemay malitengay, mihapinang to soˈlinay misafelit to safalod no Fangcalay Cudad konini a tamdaw hokira.—2 Timoti 3:16, 17.

9. Itini i caˈedong a pakayraan ano mihadak kita to sapalimoˈot i tamdaw i, ngangaˈay samaan minanam ci Pawloan? (1 Timoti 2:9, 10)

⁹ Tinakoen, ano miharateng ko cecay malohemay malitengay o caˈedong no cecay Krisciyang cowa kangaˈay, ngaˈay cingra isalakat milicay to niyah: “Soˈlinay ira ko lalangian no Fangcalay Cudad a mihadak kako to sapalimoˈot han?” Sakacipinangaw tonini, ngaˈayay licayen ningra ko sapaini no roma malohemay malitengay anca matenesay a Krisciyang, malacafay miharateng to mihadakan ni Pawlo pakayni caˈedong a sapalimoˈot. (ˈOsien ko 1 Timoti 2:9, 10.) Cowa pihadak ci Pawlo to adihayay a saˈosi, ao mitadtaday to pina taˈangayay a safalod, tinakoen o caˈedong no Krisciyang ‘kasanengseng ko nika cirikoˈ, paihkal to matatodongay a harateng,’ cipinangay cingra ano cowa pisafelit to safalod no Fangcalay Cudad, o ngangaˈay ko Krisciyang mitoor to kaolahan no niyah a mipiliˈ. Ano misaˈosi ko malohemay malitengay to mamihadak to sapalimoˈot i, papahecaden ko pinengneng.

10. Pakayni no tekedan a mipiliˈan, haharatengen ita ko maanan?

¹⁰ Haharatengen, soˈlin o matenesay a Krisciyang tatosa, o mipiliˈan nangra cowa ka lecad alatek, kawra sakoniya sowal o matatodongay ko cecay, o mararaway ko cecay cowa ka saan. Cowa ka ngaˈay kita pacieci to tao micada to patirengan no niyah a palinian.—Loma 14:10.

11-12. Ano o kalimlaan mihadak to sapalimoˈot i, o malohemay malitengay mamiharateng to maanan a salicay hani? Misamanay?

¹¹ Ano maharek misaˈosi to misaaliay to papalimoˈoten i, dotoc o mamiharateng o cima ko mihadak to sapalimoˈot o sangaˈayay. Tinakoen, o malohemay malitengay papasayra i cecay wawa anca ciramodayto a fafahiyan salikaka mihadak to sapalimoˈot, sasalakatho masasowal to tawki no lomaˈ. * O niyah saan ko misaysay saan cingra alatek, anca ano palimoˈot ko malohemay malitengay makalimay cingra itira.  Tinakoen masowalay itini  saka tolo fatac, itini roma pakayraan, o matoˈasay a fafahiyan salikaka ko patalipaˈelal to kaemangay a fafahiyan salikaka wa ikaka ko kangaˈay.

¹² Roma i, ngaˈayay miharateng ko malohemay malitengay: “Onini a limoˈot kako ko pasowal o sangaˈayay han? Anca o tao ko pasowal ikaka ko kangaˈay han?” O misaaliay to papalimoˈoten ano o cangoˈotay ko pakasoˈlin to niyah a salikaka, o iraay ko malecaday ko nalifetan a malohemay malitengay ko pasowal wa ikaka ko kangaˈay. Samanen oniya malohemay malitengay cipinangay to nafalocoˈan nora tamdaw alatek, o mihadakan ningra a sapalimoˈot mamadolo ko tao micada alatek. Kawra, soˈlin awaay ko mahaenay a nalifetan no malohemay malitengay, ano o kalimlaan i, o mamihadak to sapalimoˈot i salikaka, samanen polong a malohemay malitengay iraay ko ˈinorong pakalalok to salikaka, padama cangranan midoedo to Fangcalay Cudad a misalof.

13-14. Isalakatho misongilaˈ mitengil ko malohemay malitengay hano masaka limlaan hani?

¹³ Ka makahi a mitengil. Ano papalimoˈot ko malohemay malitengay to tao i, mamiharateng: “Cipinangay kako to pakayraan ningra han? Tahalifaay cingra to maanan a demak nohatini han? Misiˈayaway cingra nohatini to cowa ko kafanaˈan ako a pasangaray han? Sakakaay a saali ningra nohatini o maanan hani?”

¹⁴ O haharatengen ko safalod no Yakop 1:19: ‘Ka makahi a mitengil, aka macaloh a pasowal, aka macaloh a maketer.’ O cecay malohemay malitengay tada cipinangay ko niyah to pakayraan saan miharateng alatek, kawra soˈlinay a mahaen han? Sowal no Taneng 18:13: ‘Caho ka harek a mitengil pacaˈof to, o apa ningra ato sakangodo ningra konini.’ Sakafanaˈaw to soˈlinay a pakayraan no tao, sangaˈayay i papipasowalen ko tao. O lalahcienho ita mitengil, ikorto ngaˈ pasowal. Maharatengayho o satapangan no lalakaw misowalan a malohemay malitengay han? Ikorto mahapinangay ningra, milisoˈ cingra toya fafahiyan salikaka i, cowa ka ngaˈay satapang aca mihadakto to misadayan a lalakaw, ao isalakatho milicay cingranan: “Ngaˈayay ko kaˈorip iso han? Ngaˈay kako padama tisowanan to maanan hani?” Ano mipalak ko malohemay malitengay to toki cipinang to pakayraan no salikaka, o ngangaˈay ko pipadama ato pakalalok cangranan.

15. O malohemay malitengay sasamaan a misaka dademak to safalod no Taneng 27:23?

¹⁵ Ihkal ko kafanaˈ to pakayraan no masafelaway a siri. Malecad o milengoan i satapang no lalakaw, ano makalimay kita ciepoc ko sapaini no niyah to tao, o piˈosi aca to pina a sinael anca mihadak to tosa sapaini cangoˈotayho. Misaaliay ko salikaka mitinako to kaciharateng ita cangranan, cipinang cangranan, makalim padama cangranan. (ˈOsien ko Taneng 27:23.) Mihaenay o mamisarocod ko malohemay malitengay malo ngaˈayay a widang no salikaka.

16. Sasamaan ko demak no malohemay malitengay, ngaˈ ciepoc ko sapalimoˈot no niyah to tao?

 ¹⁶ O malohemay malitengay aka pairaen ko harateng no salikaka to pisaysay aca nangra to pasangaray ko kaciharatengan, edeng itini kararawan no salikaka a tatokian ngaˈ ira a masadak. Masafelitay, o hamamicerid cangra masasowal to salikaka, mangalef ano tahalifa ko salikaka to pasangaray i mikifalocoˈ a ciharateng cangranan. Cecay kadofahay ko nalifetan a malohemay malitengay sanay: “Ano mihaen ko demak iso, o mamalo widangto no salikaka, mihaen ano ira ko saali i, wa madoloto mihadak to sapalimoˈot, hanaca wa madolo ko tao a micada.”

17. Ihacowa a tatokian mikiriwiˈay misaali ko malohemay malitengay to mihadidiay, pairaenho ko sidaˈitay hani?

¹⁷ Pairaen ko mihadidiay, pairaenho ko sidaˈitay. Maharek ko malohemay malitengay mihadak to sapalimoˈot i, ano eca ka tangsol micada anca mitoor a midemak ko tao, mikiriwiˈay misaali ko malohemay malitengay to mihadidiay, iraho ko sidaˈitay. Mamiˈimer cingra to harateng no niyah, aka maketer. Tonini a pakayraan, o ngaˈayay a taˈarawan ita ci Yis, sanay ko sowal no Fangcalay Cudad: ‘O mapaekelay a ˈaredo, caka piteken ningra, o mamalanto a keliw, caka padengen ningra.’ (Matay 12:20) Roma i, o malohemay malitengay mitolon ko niyah i, ngaˈayay micangacang ci Yihofaan padama to tao cipinang, hano mamitengil to sapalimoˈot a midemak. Misaaliay ko salikaka to toki ngaˈ cipinangay to lalakaw no sapalimoˈot. O waywayan no malohemay malitengay ano damsayay iraay ko mihadidiay, o maharatengay no tao cowato ko kapiliˈan ningra a pakayraan no malohemay malitengay a somowal, ao mamisinanot to lalakaw no sapalimoˈot. Manaokaniw, o mihadakan no malohemay malitengay a sapalimoˈot o mamikitini i Fangcalay Cudad.

18. Pakayni pihadak to sapalimoˈot, haharatengen ita ko maanan hani?

¹⁸ Mikitini i kararawan a minanam. Sahtoay o cowa ka lefot kita, soˈlin misarocoday mitoor to sapaini nonini lalakaw a midemak, cowa ko mamalefot ko midemakan. (Yakop 3:2) Awaawa sa iraayho ko cowa ka ngaˈay a demak no mita, kawra o kalimlaan i mikitiniay kita  i kararawan a minanam. Ano matinakoay no salikaka ko olah ita, soˈlin mararaw ko sowal anca midemakan no mita, pakararaw cangranan, o mamakahiho cangra misodod kitaanan.—Nengnengen ko sapatongal lalakaw “ O Sapatalipaˈelal to Wama ato Wina.”

19. Sasamaan ko demak ita, ‘pakalipahak to falocoˈ’ no salikaka?

¹⁹ Masowalay i fafekang, mihadak to sapalimoˈot i tamdaw cowa ko madoloay. Sahtoay cowa ka lefot kita, o micadaay to sapalimoˈot a tamdaw cowa ka lefot. Mihaenay, haharatengen ita ko mananamay a kalimlaan mikitini tonini a lalakaw. Pairaen ko matatodongay a araaw, miharatengho soˈlinay kalimlaan ko sapihadakaw to sapalimoˈot hokira, ato ao cima ko mihadak to sapalimoˈot o sangaˈayay. ˈAyaw no papaini to tao i, salakatenho a milicay ko tao, misongilaˈ a mitengil, cipinang to misiˈayaway ko tao to maanan a pasangaray. Mikitini i pinengneng no tao a minengneng to demak, mitafo to damsayay, malo ngaˈayayho a widang no salikaka. Haharatengen, o patosokan ita cowa ko sakaciepoc aca no tao ko sapalimoˈot no niyah, o ngangaˈayho ‘palipahak to falocoˈ’ no tao.—Taneng 27:9.