TÖHAKÖÖPÖ ĀTIKÖL 8
‘Ṙamölōn Hòng’ Yěm Halēnö?
“Tavī-i, tinhus inrē ṙamö ellōn tī, tikāchi pöri ngam ellōn tö kanihngen.”—INCH. 27:9.
TINKÖÖKÖ 102 “Hayööken Më Tötkalēḵ-en”
RAHËICHTAMAT *
1-2. Asūp haköp ngam minṙöinylen i alaha ngam inlēnö?
NËT TAK nak minṙöinylen chamuh in ök sister pò ò nö marò-angen nö öt yihtökūö nö el mīting. Ṙol nuk miröökö vahënyö ò nö mikahtö el nang ò pön hōten ò nö mīting. Löngö inlahen anga-aṅ tö lōn re nö halēn ngam sistör. Ik sā cha nö ṙāngen ngam sistör, ngaich ngö ṙô ngam sistör nö in cha, hö-ö nan akahakūö tö öp kanihngen chu. Ngaich minā prötör nö mikahtö elnang ò tö inlahen ò nö chuh el mīting, öt hatön ngam lainyngen ò pöri cha-a nö öt yihtökūö nö el mīting. Lökten ngam sistör nö öt ṙamlōn tö ngam inlēnö re.
2 Fēkö ngam inlahen re ngam minṙöinylen, ngölōn anga-aṅ kūö yòh öp uvöh sistör nö öt vayö ṙô. Fēkö ngam inlahen re pöri chū-u öich höng yaha ṙòkhata tö minë miröökö, öich höng öt hatön inlahen ngam sistör. Tö sā ngih, Sitih öp inlahen meh? Asūp öre tö mihôiṅ inlahen tī chu öich hayööken meh? Ngam haköplö ngam minṙöinylen nö in ngam inlahen re, söl ing töngamuh anga-aṅ nö köpölōn tö e. Yēḵ chu töngamuh öich vë-ekūö yip tahëng ngaich hòṅ urēh chū-ö mikahtökūö re tö nup kanihngen cha.
3. Achīö yip mihôiṅ kamëtö inlēnö el ngam māṅ?
3 Yōm sīṅp ngam Tēv yin më minṙöinylen. Lökten ngam la-en cha nö töt ṙanāngen nö halēn yip tahëng. Ngatī inrē yip tahëng el ngam māṅ nö mihôiṅ nö kētö inlēnö. Tö sā ngam prötör hēk sistör nö mihôiṅ nö kētö inlēnö öp hol re nö löknyö mat ngam Paipöl. (Sal. 141:5; Inch. 25:12) Hēk mihôiṅ ngam tö köönyö ṙēti sistör nö halēn ngam ṙālö sistör nö sā ṙô ngam Taitös 2:3-5. Ngatī inrē yip inyöngö nö halēn yip kūönre hēk haköpten cha inrē. Inlööten më minṙöinylen ön ngih ātiköl, ngaich ṙòkhöre pöri ayī-ö mihôiṅ öi haköplu öi in e. In ngih ātiköl in min haköplu öi sitih inlahen öi kētö inlēnö yip tahëng hòṅ cha nö yöölen, hēk ngönlöre ngaich ‘ṙamö elkuilōn tī.’—Inch. 27:9.
4. Asuh nup min intöönö tö kakka in ngih ātiköl?
4 Fën nup min intöönö kahakkö hī in ngih ātiköl: (1) Asūp tö löng inlahen hī kētö inlēnö? (2) Kūö yòh nö töt ṙanāngen ngam kinëtö inlēnö? (3) Achīöp mihôiṅ kamëtö inlēnö? (4) Yē hī hòṅ vayö inlahen tī öi kētö inlēnö ngaich hòṅ sitih inlahen ayī-ö?
ASŪP TÖ LÖNG INLAHEN HĪ KĒTÖ INLĒNÖ?
5. Asuh öp tö hòṅ inlahen ngam minṙöinylen yěn kētö inlēnö? (1 Kòrin 13:4, 7)
5 Hangenlōn yin më minṙöinylen tö më prötör sistör, lökten nö kētö inlēnö cha hòṅ cha nö öt kēken tö vaich. (Kal. 6:1) Urēhěkūö ngam minṙöinylen nö kētö inlēnö ngaich hòṅ sitih inlahen anga-aṅ? Hòṅ fēkö ngam hanangenlōn cha-a, ngam kahakka Pôl nö ngö ṙô: “Tömarô-òten manööyö an ngam hanangenlōn tö aheuk inrē. . . . Ṙap tökeuheūttöre öt ranöingulōn i tökeuheūttöre, meūkkö tökeuheūttöre, pītnyöre i tökeuheūttöre.” (Vë-evkūö 1 Kòrin 13:4, 7.) Yē ngòh minṙöinylen nö chumkūöṙen nö haköp minë miröökö, ngaich holtö hanangenlōn re min anga-aṅ nö halēn më prötör sistör. Ngaich yěn akahaiṙen më prötör sistör tö hanangenlōn ngam minṙöinylen, ngaich hang ngam inlēnöre min cha-a.—Rōm. 12:10.
6. Asūp haköplö më minṙöinylen nö in Pôl?
6 Haköplu yip minṙöinylen nö in Pôl nö i kinëtö minë inlēnö. Tö sā ngih inchōḵ elmat, ik sā Pôl nö meuk inlahen yik aṅ Tösalònikē nö hòṅ kētu inlēnö, ngaich löktö in minë chitri tī anga-aṅ nö kētö inlēnö cha. Urēhěkūö ò pöri nö kēten minë inlēnö, ngaich eu minë la-en cha anga-aṅ nö ngö ṙô, ngam vahīken yīö aṅ im mikah, holtö ngam hanangenlōn re öi la-evṙen im manööyö. Ngöṙô tī hēk Pôl nö kūich pön akahakūö tö kanihngen cha yěn hakihtuṙen. (1 Tös. 1:3; 2 Tös. 1:4) Ngö ṙô inrē anga-aṅ, tö cha nö tövai nö inchōḵ kūö yip tahëng prötör sistör. (1 Tös. 1:8, 9) Iṙôkö ṙanamölōn cha-a nö Vë-ekūö minë kahūich Pôl. Ṙatö-ellōnre cha-a tö ò nö hangenlōn tö cha. Lökten ik sā Pôl nö kētö inlēnö nö in minë tö nët chitri, ngaich kô-en cha-a nö hāngö u.—1 Tös. 4:1, 3-5, 11; 2 Tös. 3:11, 12.
7. Kūö yòh yip ihih nö haṙivlōn yěn kētu inlēnö?
7 Yěn öt holtö hanangenlōn ngam Inlēnö, ngaich mihôiṅ min angū-ö nö sitih inlahen? Hěng öp ihih ekspirīön ngam minṙöinylen nö ngö ṙô, “Ōt yip tarik tö haṙivlōn yěn kētu inlēnö. Rö-ö pöri nö kūö ngam inlēnö nö vaich, pön öt holtö hanangelōn ngam inlēnö nö kētu.” Asūp haköplö hī öi in e? Yē hī öi lōnu tö yip tahëng nö hang minë inlēnö, ngaich hòṅ holtö hanangenlōn re öi kētö inlēnö.
KŪÖ YÒH NÖ TÖT ṘANĀNGEN NGAM KINËTÖ INLĒNÖ?
8. Urēhěkūö ngam minṙöinylen nö kētö inlēnö hòṅ asuh nup hatöön ò nö in re?
8 Ngö kinūichngö ön nö i mat ngam Paipöl ‘ui kuraten in nup ṙô re.’ (Inch. 29:20) Hòṅ hang ngih lamakngörit minë chööngö yin më minṙöinylen. Ötkô cha-a nö veut alaha nö kētö inlēnö, pön hòṅ urěh cha-a nö hatöönö re, ‘hòṅ kētu inlēnö hòng ngam prötör hēk sistör? Kô-en hòng ngam inlahen ò nö vach? Filalngö chööngö ngam Paipöl hòng anga-aṅ hēk kēken nup la-en anga-aṅ nup tötkô nö kahëken ò?’ Yē ò öre nö öt fura mikahkūö tö inlahen re nö halēn ngam prötör sistör yěn hö-ö, ngaich hòṅ vë-ekūö yip tahëng minṙöinylen anga-aṅ tö inlahen ò. Ngaich hatöönö ngam prötör sistör yěn hō-en ngam vanāchöre.—2 Tim. 3:16, 17.
9. Asūp haköplö hī in Pôl i alaha ngam chinhenen tö minë innyöötöre inrē yěi hòṅ kētö inlēnö? (1 Timôtī 2:9, 10)
9 Töi mikahtö elmat re in ngih inchōḵ elmat. Yěn hěngtak öp minṙöinylen öre mahalēn öp prötör hēk sistör tö inlahen minë chinhenen hēk inyöötöre. Ngaich mihôiṅ anga-aṅ nö kahngen re nö hatöönö re, ‘Kô-en ang nö öt hang ngam inlēnö in ngam lökngörit ngam chööngö aṅ mat ngam Paipöl?’ Chumkūöṙen min anga-aṅ nö öt löknyö in re ṙô nö kētö inlēnö. Lökten anga-aṅ nö hatöön töre nö in öp tahëng minṙöinylen hēk in yip tö ekspirīönu prötör sistör inrē. Mihôiṅ inrē cha-a nö holṙô re nö kakkö minë inlēnö ṙô Pôl. (Vë-evkūö 1 Timôtī 2:9, 10.) Hö-ö ök Pôl nö vī chööngö yik Kristīön nö i inlahen minë chinhenen nö hòṅ sitih inlahen chinhenen cha-a. Pön akahakūö anga-aṅ tö më prötör sistör nö hang minë lökngörit chööngö aṅ mat ngam Paipöl tö cha nö mihôiṅ nö chumhentö minë lōnre chehen. Höng ngamuh ṙô ò nö vë-ekūö cha, tö cha nö chumkūöṙen nö katöllö minë chinhenen re, hēk chumkūöṙen inrē nö un mumṙē-iyö ngam minë-eny Yāvē. Angū-ö ngih chumkūöṙen më minṙöinylen yěn hòṅ kētö inlēnö hēk yěn hö-ö nö i alaha ngam chinhenen hēk in minë innyöötöre inrē.
10. Hòṅ asūp ihih ṙô kanöpölōn hī?
10 Hòṅ köpöölōn ayī-ö tö inlahen minā tö nët tak prötör nö köharīkngöre minë fësla cha, mihôiṅ pöri minë fësla cha nö löng. Lökten ayī-ö öi ötkô uyëken minë ṙô cha. Ötkô ayī-ö öi vënyö öp tö hòṅ inlahen ò hēk tö hö-ö.—Rōm. 14:10.
ACHĪÖP MIHÔIṄ KAMËTÖ INLĒNÖ?
11-12. Yěn töt ṙanāngen ngam inlēnö nö kētu, ngaich asūp mihôiṅ hatöön ngam tö hěngtak minṙöinylen nö in re hēk kūö yòh?
11 Yē hī ngaich akahakūö tö öp prötör hēk sistör nö hòṅ kētu inlēnö, ngaich söklöre pöri ngih intöönö nö achīö öp min kamëtö inlēnö. Yēḵ öp tö pīhövö sistör hēk öp nyīö tö hòṅ kētu inlēnö, ngaich hòṅ urěh ngam minṙöinylen nö vë-ekūö ngam kui ngam mikūönö. * Ngö ṙô pöri ngam kui ngam mikūönö chu-ö chin min hakòtôre vë-ekūö cha. Ngaich yěn hòṅ kētö inlēnö öp minṙöinylen ngaich hòṅ in ò öp kui ngam mikūönö. Yěn töt ṙanāngen ngam kinëtö inlēnö ngam ṙālö sistör, ngaich tövai öp tö köönyö ṙēti sistör nö vë-ekūö ò, sā ṙô e taheui nö in öp perekrāf 3 nö vënyu.
12 Urēhěkūö ngam minṙöinylen nö kētö inlēnö. Mihôiṅ anga-ṅ nö hatöönö re nö ngö ṙô, ‘Löng öng ngam inlahen chu yēḵ chu kētö inlēnö, hēk mihôiṅ ṙöng öp tahëng minṙöinylen nö kētö inlēnö ò? Tö sā ngih inchōḵ elmat, yēḵ öp prötör öre nö haṙivölōn hēk kunen elmat anga-aṅ töre. Ngaich tövai ngih inlahen öp tö hěngtak minṙöinylen nö halēnö ò, öp tö ngatī mufē sin nö la urěh. Pò-ò nö akahakūö töp kanihngen öp tarik öp miṙivlōn ò inrē, ngaich mihôiṅ min anga-aṅ nö vayö ṙô nö kētö inlēnö ò. Ngaich yēḵ öp minṙöinylen pöri nö öt sā kanihngen më prötör sistör ngaich hòṅ sitih inlahen anga-aṅ? Hòṅ köpöölōn anga-aṅ tö më prötör sistör nö hòṅ hareuskö alaha hòṅ kētu inlēnö inrē, anū-ö në la-en më minṙöinylen nö ṙòkhöre. Yěn lōnu yip prötör sistör tö inlēnö re ngaich hòṅ hīnöre më minṙöinylen nö kētö inlēnö cha.
YĒ HĪ HÒṄ VAYÖ INLAHEN TĪ ÖI KĒTÖ INLĒNÖ NGAICH HÒṄ SITIH INLAHEN AYĪ-Ö?
Kūö yòh yip minṙöinylen nö hòṅ “hangihtöre”? (Ngëichköm perekrāf 13-14)
13-14. Kūö yòh yip minṙöinylen nö hòṅ chumkūöṙen nö hangihtöṙô yip tahëng?
13 Hòṅ chumkūöṙen öi hangihtöre. Urēhěkūö kinëtö inlēnö, ngaich hòṅ hatöönö re ngam minṙöinylen, ‘Iṙòken mikahkūö öich tö kanihngen öp prötör? Asuh nup kanihngen ò in minë inlahen re? Asuh nup kanihngen la-al ò, öp töt mikahkūö chu? Asūp inlahen tī chu öich hayööken ò ing töngamuh?’
14 In ngam līpöre Yāköp 1:19 ngam lökngörit ngam chööngö nö hòṅ kēkö kaha e më kamëtö inlēnö. Ngatī Yāköp nö kūich: “Hökngen taṙòkhöre tarik nö ka-eūyö elnang, ṙēmö ṙô nö ṙô-òvö, ṙēmö lanīnö.” Pi-a ngam minṙöinylen nö ngölōn töre nö ṙòklöre mikahkūö tö më prötör sistör. Kô-en hòng angū-ö nö ngatī? Ngö kinūichngö öng nö in ngam Inchōḵ-oṙô 18:13: “Yēn hěng tak öp samap urēhěkūö ò nö hang, kumlō-ov ò an angū-ö sumrōngkūö inrē.” Yē hī öi hòṅ akahakūö tö inlahen öp holre, ngaich tövai ngam inlahen hī öi hatöön kūö ò. Lökten më minṙöinylen urēhěkūö re nö ṙô-òvö hòṅ chumkūöṙen cha-a nö hangihtöre. Köpöölōn tö ṙô öp minṙöinylen im ranehnyö ṙô ngih ātiköl taheui nö sitih ṙô. Fēlöre anga-aṅ töre nö hòṅ hatöön kūö ngam sistör öre nö ngö ṙô, “Sitih öp inlahen meh?” “Asūp öre tö mihôiṅ inlahen tī chu öich hayööken meh?” Hòṅ kēnyö ṙētakre ngam minṙöinylen nö mikahtökūö re tö më prötör sistör, ngaich mihôiṅ min cha-a nö heuveū-en nö hayööken cha hěnghöre hareuskö alaha cha inrē.
15. Sitih inlahen öich më minṙöinylen nö hang ngam lökngörit ngam chööngö im Inchōḵ-oṙô 27:23?
15 Hòṅ ṙūöhtö mikahkūö re in tö më prötör sistör. Sā ranehnyö ṙô ngih ātiköl taheui nö mikah tökūö hī, tö hī yěi hòṅ kētö tövai inlēnö, rö-ö öi höng vënyö nup miröökö öi kētö inlēnö, pön hòṅ akahaiṙen më prötör sistör tö inlahen hī öi chumkūöṙen tö cha, hēk akahakūö ayī-ö tö minë kanihngen cha, tö hī inrē hòṅ hayööken cha. (Vë-evkūö Inchōḵ-oṙô 27:23.) Lökten më minṙöinylen nö vī-i cha nö sā holre.
Ihē öp tö löng inlahen më minṙöinylen nö kētö minë inlēnö? (Ngëichköm perekrāf 16)
16. Hòṅ asuh öp inlahen më minṙöinylen yēn hòṅ kētö tövai inlēnö?
16 Hòṅ chumkūöṙen më minṙöinylen töre, nö un höng ip hē më prötör sistör nö vaichköreṙen ngaich möl nö vë-ekūö cha. Pön hòṅ kēnyö ṙētakre cha-a nö vë-ekūö më prötör sistör, mööhē hē el nup kanihngen cha. Hěng öp ihih ekspirīön öp minṙöinylen nö ngö ṙô: “Hē e min më-eṅ öm vī-i re öm tökô-en öm hol cha, ngaich lööṙen min më-eṅ öm kētö inlēnö hē öp lōn cha nö hòṅ halēnö.” Rö-ö nöng angū-ö pön lööṙen inrē min më prötör sistör nö hang minë inlēnö lamöktö in më minṙöinylen.
Yē më minṙöinylen nö hòṅ kētö inlēnö ngaich hòṅ kūö yòh cha nö hòṅ möi hēk hameuktö neūkölōn re inrē? (Ngëichköm perekrāf 17)
17. Ihē ang ngòh minṙöinylen nö hameuktö ngam manööyö re hēk ngam neūkölōn re inrē?
17 Hameuktö manööyö re hēk hameuktö miṙēlōn re. Hòṅ urööṙen angū-ö nö hameuktu yěn öt hō ngam tö halēnö tö minë inlēnö re. Yēn halēnö ngòh tarik ngaich öt ilööṙen anga-aṅ nö hangö e, ngaich hòṅ chumkūöṙen ngam minṙöinylen töre nö hòṅ īnu tö ngam manööyö. Hòṅ asīnken Yēsū anga-aṅ, ngam tö ngaich nö eunyu, “Öt ohngö tī Öp min tö tökaṙöp tafūyu, öt rēhěn nö nyangngö tī tö tötafūna lul tameūnyö.” (Mët. 12:20) Mihôiṅ anga-aṅ nö hěng ṙô nö vë-ekūötēv nö havëkö inyööken më prötör sistör nö in Yāvē, hòṅ cha nö akahakūö nö kūö yòh cha-a nö ngatī kinë-ekūö tö inlēnö ngaich kūö yòh cha-a nö hòṅ hangö e. Ōtre yip prötör sistör töt ilööṙen nö hang minë inlēnö. Lökten ngam minṙöinylen nö hòṅ aṅhavin tö ngam manööyö hēk hameuktö ngam neūkölōn re inrē nö vë-ekūö cha, ngaich min yip tahëng nö hang ngam inlēnö. Öt höng anū-u, pön hòṅ örheūheu më minṙöinylen nö löknyö Paipöl ṙô nö kētö inlēnö.
18. (a) Hòṅ asuh öp ihih kanöpölōn hī ṙô yěi hòṅ kētö inlēnö? (b) Asūp ṙô minā inyööngö nö vë-ekūö re, sā inmeuktö ngam pòks nö holtö ngam nyat?
18 Haköplu öi in minë vanāchöre. Ṙòkhöre in ayī-ö töt het, lökten ayī-ö mihôiṅ öt keuheūtlöre inlaha öi hang minë inlēnö in ngih ātiköl. (Yāk. 3:2) Tö vaichkareṙen in ayī-ö, lökten yip prötör sistör nö mihôiṅ nö haṙivlōn tö nup kahëken hī la-en hēk tö nup ṙô hī inrē. Hòṅ haköplu pöri ayī-ö in minë vanāchöre hēk hòṅ hangenlōn inrē tö më prötör sistör. Yēḵ cha min nö akahaiṙen tö ngam hanangelōn hī, ngaich aṙē-ěl minë fālen hī min cha-a.—Vë-ekūö ngam pòks “ Inlēnö Më Inyööngö.”
ASŪP HAKÖPLÖ HĪ?
19. Hòṅ asuh öp inlahen hī hòṅ më prötör sistör nö ṙamölōn nö in minë elkuilōn re?
19 Sā ngam haköp hī in ngih ātiköl, tö hī öt lööṙen öi hang minë inlēnö. Pò hī öi töthet ngatī inrē më prötör sistör hī nö töthet. Lökten ayī-ö öi hòṅ köplōn tö ṙô ngih ātiköl. Tö sā në, hòṅ löngö inlahen tī ayī-ö öi kētö inlēnö yip prötör sistör. Urēhěkūö hī kētö inlēnö hòṅ mikahtökūö re ayī-ö yěn tö hòṅ kētu inlēnö anga-aṅ hēk yěn hö-ö ngaich hòṅ achīöp tö kô nö kētö ngam inlēnö. Hòṅ mikahtökūö inrē ayī-ö tö minë tinrīken cha. Lökten ayī-ö öi hòṅ hatöönö nö cha ngaich hòṅ chumkūöṙen öi hangihtöṙô cha. Hòṅ vī-i re inrē ayī-ö öi hol më prötör sistör öi hameuktö hanangelōn re öi in cha. Köpölōn, lōnu in tö më prötör sistör nöng rö-ö nöng yöölen tö minë inlēnö re pön hòṅ ‘ṙamölōn inrē cha-a.’—Inch. 27:9.
TINKÖÖKÖ 103 Yōm Sīṅp—Inlōntö Tarik
^ Par. 5 Öt tölööṙen ön ngam inlahen hī öi kētö inlēnö. Yē hī pöri öi hòṅ halēn ngaich hòṅ sitih inlahen ayī-ö hòṅ yip tahëng nö yöölen hēk reuslöre alaha. Inyööken yip minṙöinylen ön ngih ātiköl, nö kētö inlēnö yip prötör sistör hòṅ cha nö hang hēk kēkö kaha u inrē.
^ Par. 11 Vë-ekūö ngam ātiköl in ngam Chūökamahati-(NC) 2021 förvörī ngam tö ngö kui, “Asuh Nup Kinë-ekūö Më Minröinylen El ngam Māṅ.”
