1-2. Cosa ya aprende el un hermano acerca na dalida consejo?

MANADA año ya el ya pasa, dos anciano el ya visita con el un hermana quien nuay mas atende na maga miting por cuanto tiempo. El uno del maga anciano ya dale con el hermana cuanto maga texto acerca na atendida na maga miting. Pensaba le ya puede le anima con el hermana pero mientras pasalida ya le y el de suyu uban, el hermana ya habla, “No sabe ustedes si cosa yo ta enfrenta.” Ya dale consejo el maga hermano maskin nuay sila pregunta si cosa el maga problema y circumstancia del hermana. Como resulta, nuay le sinti que ya puede ayuda con ele el diila consejo.

² El hermano quien ya dale mira maga texto ya habla: “Na aquel tiempo, ya pensa yo que nuay respeto aquel hermana. Pero mientras ta pensa yo acerca con aquel, ya puede yo mira que ya dale yo con ele el todo maga justo texto pero gendeh el maga justo pregunta, igual ‘Cosa tu ta enfrenta ahora?’ ‘Paquemodo yo puede ayuda?’” Ya aprende el anciano un importante leccion na aquel experiencia. Ahora, un buen anciano ya le y tiene empatia.

3. Quien na congregacion el puede dale consejo?

 ³ Como maga pastor, tiene responsibilidad el maga anciano para dale consejo si necesita. Pero tiene vez, posible tambien el otro na congregacion dale consejo. Por ejemplo, el un hermano o hermana posible dale consejo estaba na Biblia con el un amigo. (Sal. 141:5; Prov. 25:12) O el un hermana que mas mayor posible dale consejo con el maga joven hermana  na maga situacion igual ya menciona na Tito 2:3-5. Y siempre, necesita dale consejo y coreccion el maga mayores na diila maga anak. Poreso maskin pa este articulo ya hace especialmente para na maga anciano, todo kita puede beneficia si considera kita con el maga manera que puede kita dale consejo que practical, ta motiva y “ta hace alegre con el corazon.”—Prov. 27:9.

4. Cosa kita hay discuti na este articulo?

⁴ Na este articulo, hay discuti kita cuatro pregunta acerca na dalida consejo: (1) Cosa el justo motivo si ta dale consejo? (2) Necesita ba gayot dale consejo? (3) Quien debe dale consejo? (4) Paquemodo tu puede dale efectivo consejo?

5. Paquemodo puede ayuda el justo motivo con el un anciano para dale el de suyu consejo na amable manera? (1 Corinto 13:4, 7)

⁵ Ta ama el maga anciano con el diila maga hermano y hermana. Tiene vez, ta dale sila mira ese amor por medio de dale consejo con el un persona quien cerca ya disvia na justo camino. (Gal. 6:1) Pero antes converza con el persona, el un anciano posible pensa acerca con el maga cuanto cosas que ya habla si apostol Pablo acerca na amor. “El amor paciencioso. El amor lastimoso . . . , ta perdona todo, ta cree todo, ta espera todo y ta aguanta todo.” (Le con el 1 Corinto 13:4, 7.) Si medita el anciano con ese maga versiculo na Biblia, puede se ayuda para examina con el de suyu motivo si porque le dale consejo y para atraca con el hermano na amable manera. Si puede sinti el persona que interesao con ele el anciano, mas grande el posibilidad que hay acepta le con el consejo.—Roma 12:10.

6. Cosa buen ejemplo el ya dale si apostol Pablo?

⁶ Buen ejemplo si apostol Pablo como un anciano. Por ejemplo, cuando necesita consejo el maga hermano na Tesalonica, nuay man alang-alang si Pablo que dale con ese. Pero na de suyu maga carta para kanila, ya comenda una si Pablo con el diila fiel trabajo, amable esfuerzo y cay ya continua sila aguanta. Ya considera tambien le con el diila circumstancia, ta entende que gendeh facil el diila vida y ya habla que ta continua sila aguanta maskin pa na persecucion. (1 Tes. 1:3; 2 Tes. 1:4) Gane, ya habla le que maga buen ejemplo sila para na otro maga Cristiano. (1 Tes. 1:8, 9) Asigurao, bien alegre sila ricibi con el amable comendacion de Pablo! Claro puede mira que ta ama gayot si Pablo con el de suyu maga hermano. Ese el razon si porque ya puede le dale efectivo consejo na de suyu dos carta para na maga de Tesalonica.—1 Tes. 4:1, 3-5, 11; 2 Tes. 3:11, 12.

7. Porque posible negativo el reaccion del cuanto na consejo?

⁷ Cosa posible sucede si dale kita consejo na gendeh justo manera? El un experienciao anciano ya observa, “Negativo el reaccion del cuanto, gendeh cay tiene mali na consejo sino cay nuay con ese dale na amable manera.” Cosa kita puede aprende con este? Mas facil acepta con el consejo si ya dale este por causa na amor y gendeh por causa na consumicion.

8. Cosa debe pregunta el un anciano na de suyu mismo cuerpo si ta decidi si debe ba conseja con el un persona?

⁸ Gendeh debe apura el maga anciano si ta dale consejo. Antes dale con este, el un anciano debe pregunta na de suyu mismo cuerpo: ‘Necesita ba gayot yo tiene cosa habla? Asigurao ba yo que tiene cosa gendeh justo ta hace el persona? Ya viola ba con el un mandamiento na Biblia? O baka diferente lang el diamon  opinion?’ El maga sabio anciano ta evita que “dayun-dayun ta converza.” (Prov. 29:20) Si gendeh asigurao el un anciano si necesita ba le dale consejo, puede le atraca na otro anciano para discuti si tiene ba cosa ya hace el un hermano que contra na Biblia y necesita consejo.—2 Tim. 3:16, 17.

9. Cosa kita puede aprende con Pablo acerca si paquemodo dale consejo acerca na camisa y mudada? (1 Timoteo 2:9, 10)

⁹ Considera un ejemplo. Pone kita que malingasa el un anciano acerca na mudada del un hermano o hermana. El anciano puede pregunta na de suyu mismo cuerpo, ‘Tiene ba razon base na Biblia para converza con ele?’ Cay no quierre el anciano que dale el de suyu mismo opinion, puede le pregunta na otro anciano o un mature publisher si cosa le ta pensa acerca con ese. Posible, puede sila discuti junto con el consejo de Pablo acerca na camisa y mudada. (Le con el 1 Timoteo 2:9, 10.) Ya menciona si Pablo maga principio que ta habla que el maga Cristiano debe muda na justo y modesto manera. Pero, nuay lista si Pablo si cosa puede y gendeh puede visti. Sabe le que tiene derecho el maga Cristiano para visti si cosa sila quierre basta gendeh este contra na cosa ta habla el Biblia. Poreso si ta determina si debe ba dale consejo, el maga anciano debe considera si el mudada ba del un persona ta dale mira pagka-modesto y buen pensamiento.

10. Cosa kita debe acorda acerca na maga decision que ta hace el otro?

¹⁰ Debe kita realiza que puede hace diferente decision el dos mature Cristiano pero todo este aceptable. Gendeh kita debe hace diaton mismo principio acerca si cosa el bueno y malo para na diaton maga hermano y hermana.—Roma 14:10.

11-12. Si necesita dale consejo, cosa debe pregunta el un anciano na de suyu mismo cuerpo y porque?

¹¹ Si ya puede ya kita determina que necesita dale consejo, el sunod pregunta amo, Quien debe dale con ese? Antes conseja con el un casao hermana o un bata, el un anciano puede consulta con el cabeza del familia, quien posible habla que ele ya lang el cuidao con ese. * O puede pidi con el cabeza del familia que queda presente si dale el anciano con el consejo. Y como cosa ya menciona na  parapo 3, posible tiene maga tiempo que mas bueno que el un de edad hermana el quien conseja con el un mas joven hermana.

¹² Tiene pa otro cosa que necesita considera. El un anciano puede pregunta na de suyu mismo cuerpo, ‘Iyo ba el de con todo justo persona para dale ese consejo o mas bueno si  otro se el quien hay dale?’ Por ejemplo, el un persona quien ta sinti nuay valor posible oi con el consejo del un anciano quien ya sinti tambien igual ansina compara con aquellos quien nuay. El anciano quien ya experiencia igual ansina posible tene mas grande empatia y el cosa le habla posible mas facil acepta. Pero, el todo maga anciano tiene el responsibilidad para anima y motiva con el diila maga hermano y hermana que hace maga cambio uyun na Biblia. Poreso si necesita dale consejo, el de con todo importante amo que puede dale con ese.

13-14. Porque importante para con el maga anciano que oi?

¹³Queda preparao oi. Si ta prepara el un anciano con el de suyu consejo, debe le pregunta na de suyu mismo cuerpo: ‘Cosa ba yo sabe acerca na circumstancia del de mio hermano? Cosa ta pasa na de suyu vida? Posible ba que ta enfrenta le maga dificultad que no sabe yo? Cosa le mas necesita ahora?’

¹⁴ El principio na Santiago 1:19 puede gayot aplica con aquellos quien ta dale consejo. Si Santiago ya escribi: “Man alisto ustedes para oi, pero no conversa dayun, no rabia dayun.” El un anciano posible pensa que sabe ya le el todo detalle pero sabe ba gayot le? El Proverbio 18:13 ta hace acorda kanaton: “Si el uno ta contesta dayun na un cosa antes de oi el verdad, de locuras se y maka-huya para con ele.” Mas bueno si saca kita informacion directa mismo con el persona. Poreso, el un anciano debe oi antes man cuento. Acorda si cosa ya aprende el un anciano que ya menciona na principio de este articulo. Ya realiza le que en vez de principia na cosa le ya prepara, debe era le pregunta con el hermana igual: “Cosa tu ta enfrenta ahora?” “Paquemodo yo puede ayuda?” Si dale tiempo el maga anciano para sabe acerca el situacion, posible mas puede sila ayuda y anima con el diila maga hermano y hermana.

15. Paquemodo puede aplica el maga anciano con el principio na Proverbio 27:23?

¹⁵Conoce con el maga hermano y hermana. Como ya menciona del primero, el efectivo consejo gendeh lang basta puede kita le cuanto texto o dale uno o dos sugestion. Necesita sinti el diaton maga hermano y hermana que ta ama kita kanila, ta entende kita kanila y quierre kita ayuda kanila. (Le con el Proverbio 27:23.) Debe hace esfuerzo el maga anciano para tene buen amistad na diila maga hermano y hermana.

16. Cosa puede ayuda con el maga anciano para dale efectivo consejo?

¹⁶ Asigurao, no quierre el maga anciano que pensa el diila maga hermano y hermana que el solamente tiempo que ta converza sila kanila amo si necesita sila dale consejo. Sino, regular sila tan cuento na diila maga  hermano y hermana y ta dale mira personal interes si ta enfrenta sila maga dificultad. “Si hace tu se,” ya observa el un experienciao anciano, “hay tene tu buen relacion kanila. Si necesita tu dale consejo, mas facil ya lang para contigo que hace se.” Y el persona quien ricibi ese consejo mas facil acepta con ese.

17. Cuando mas necesita dale mira paciencia y pagka-bueno el un anciano?

¹⁷Queda bueno y paciencioso. Mas necesita con el paciencia y pagka-bueno especialmente si gendeh dayun ta aplica el persona con el consejo estaba na Biblia. El un anciano debe con cuidao que gendeh le consumi si nuay dayun acepta o aplica con el de suyu consejo. Acerca con Jesus, el profecia ya habla: “El caña machacao gendeh Le ay hace quebra, y el lampara amamalung gendeh Le ay hace apaga.” (Mat. 12:20) Poreso na de suyu privado rezo, puede pidi el anciano con Jehova que bendici con el persona quien necesita consejo y ayuda con ele entende el razon si porque con ele ya conseja y aplica con ese. Posible, necesita tiempo el hermano con quien ya conseja para pensa con el cosa ya habla con ele. Si bueno y paciencioso el anciano, el persona con quien le quierre ayuda gendeh man focus si paquemodo ya dale con el consejo sino con el mensaje. Siempre, el consejo debe pirmi base na Palabra del Dios.

18. (a) Si ta dale consejo, cosa kita debe acorda? (b) Como cosa ta dale mira na letrato y na cajon, cosa ta discuti el maga mayores?

¹⁸Aprende na de tuyu maga kamali. Cay imperfecto kita, gendeh kita puede aplica con el todo sugestion na este articulo na perfecto manera. (Sant. 3:2) Hay puede kita hace maga kamali pero si sucede se, debe kita aprende con ese. Si puede sinti el diaton maga hermano y hermana que ta ama kita kanila, posible mas facil para kanila que perdona kanaton si ya puede kita hace sinti duele kanila por medio na cosa kita ya habla o ya hace.—Mira tambien con el cajon “ Para na Maga Mayores.”

19. Paquemodo kita puede hace alegre con el corazon del diaton maga hermano y hermana?

¹⁹ Ya puede kita mira que gendeh pirmi facil para dale efectivo consejo. Gendeh kita perfecto y ansina tambien aquellos con quien kita ta conseja. Acorda pirmi con el maga principio que ya considera kita na este articulo. Asigura que justo el diaton motivo si ta dale consejo. Omento pa, asigura si necesita ba gayot dale consejo y si etu ba el justo persona para dale con ese. Antes dale consejo, pregunta con el persona y oi enbuenamente para puede tu entende con el cosa le ta enfrenta. Pricura mira con el maga cosas base na de suyu mirada. Queda amable y tene buen amistad na de tuyu maga hermano y hermana. Acorda este: Quierre kita que gendeh lang efectivo el diaton consejo sino “ta hace [tambien] alegre con el corazon.”—Prov. 27:9.