1-2. Unsay nakat-onan sa usa ka brader bahin sa paghatag ug tambag?

 DAGHANG tuig na ang milabay, naay duha ka ansiyano nga mibisita sa sister nga taudtaod nang wala makatambong ug tigom. Ang usa sa mga ansiyano mibasag pila ka teksto bahin sa pagtambong ug tigom. Abi niyag nadasig ang sister, pero dihang molakaway na sila, ang sister miingon, “Wa gyod ninyo masabti ang akong situwasyon.” Mideretso rag tambag ang mga brader nga wala mangutana sa sister kon unsay iyang problema ug kahimtang. Busa mibati ang sister nga wala makatabang niya ang ilang tambag.

² Ang maong ansiyano miingon: “Adtong panahona, naghunahuna ko nga ang sister way tahod namo. Pero nakaamgo ko nga mas naghunahuna diay ko sa mga teksto nga akong basahon imbes sa kahimtang sa sister. Mas maayo unta to kon akong gisusi kon unsay iyang kahimtang ug kon unsay akong ikatabang niya.” Tungod sa nahitabo, ang ansiyano nakakat-on ug importanteng leksiyon. Karon, mas mahunahunaon ug mas matinabangon na siya nga ansiyano.

3. Kinsa diha sa kongregasyon ang puwedeng motambag?

 ³ Ingong mga magbalantay, ang mga ansiyano naay responsibilidad nga motambag kon gikinahanglan. Pero ang mga igsoon sa kongregasyon puwede pong mohatag ug tambag. Pananglitan, tambagan tingali sa usa ka brader o sister ang iyang higala base sa Bibliya. (Sal. 141:5; Prov. 25:12) O kaha ang hamtong nga sister tingali ‘makatambag sa batan-ong  mga babaye’ bahin nianang gihisgotan sa Tito 2:3-5. Ug siyempre, kinahanglan nga kanunayng tambagan ug tul-iron sa mga ginikanan ang ilang mga anak. Busa, bisag kining artikuloha giandam ilabina para sa mga ansiyano, kitang tanan makabenepisyo pinaagi sa paghisgot sa mga paagi nga makahatag ta ug tambag nga praktikal, makapadasig, ug “makapalipay sa kasingkasing.”—Prov. 27:9.

4. Unsay atong hisgotan niining artikuloha?

⁴ Niining artikuloha, atong hisgotan ang upat ka pangutana bahin sa paghatag ug tambag: (1) Unsa ang hustong motibo? (2) Gikinahanglan ba gyod ang tambag? (3) Kinsay angayng mohatag sa tambag? (4) Sa unsang paagi makahatag kag epektibong tambag?

5. Sa unsang paagi ang hustong motibo makatabang sa ansiyano sa paghatag ug tambag nga sayon dawaton? (1 Corinto 13:4, 7)

⁵ Gihigugma sa mga ansiyano ang mga igsoon. Usahay, ipakita nila ang ilang gugma pinaagi sa pagtambag niadtong nameligro ang espirituwalidad. (Gal. 6:1) Pero sa dili pa motambag ang ansiyano, iyang pamalandongon ang pipila ka butang nga gihisgotan ni apostol Pablo bahin sa gugma. “Ang gugma taas ug pailob ug maayo. . . . Kini moantos sa tanang butang, motuo sa tanang butang, molaom sa tanang butang, molahutay sa tanang butang.” (Basaha ang 1 Corinto 13:4, 7.) Pinaagi sa pagpamalandong niini nga mga teksto, maseguro sa ansiyano nga husto ang iyang motibo ug ang iyang paagi sa pagtambag. Kon ang gitambagan mobati nga gihigugma siya sa ansiyano, mas dakog posibilidad nga iyang dawaton ang tambag.—Roma 12:10.

6. Unsang maayong panig-ingnan ang gihatag ni apostol Pablo?

⁶ Si apostol Pablo maayong panig-ingnan ingong ansiyano. Pananglitan, dihang ang mga igsoon sa Tesalonica kinahanglang tambagan, si Pablo wala magduhaduha sa pagtambag nila. Pero sa iyang mga sulat, iya unang gidayeg ang ilang mga buhat sa pagtuo, paghago tungod sa gugma, ug paglahutay. Iya pong gikonsiderar ang ilang kahimtang. Giingnan niya sila nga nahibalo siya nga dili sayon ang ilang kinabuhi ug matinumanon nilang gilahutay ang paglutos. (1 Tes. 1:3; 2 Tes. 1:4) Giingnan pa gani niya sila nga maayo silang panig-ingnan sa ubang Kristohanon. (1 Tes. 1:8, 9) Segurado nga nalipay gyod sila sa komendasyon ni Pablo! Walay duhaduha nga gimahal pag-ayo ni Pablo ang mga igsoon. Kanay rason nga epektibo ang iyang tambag sa iyang duha ka sulat sa mga taga-Tesalonica.—1 Tes. 4:1, 3-5, 11; 2 Tes. 3:11, 12.

7. Ngano kahang ang uban dili maminaw ug tambag?

⁷ Unsa tingali ang resulta kon dili maayo ang paagi sa pagtambag? Ang usa ka eksperyensiyadong ansiyano miingon, “Ang uban dili maminaw ug tambag, dili tungod kay sayop ang tambag, kondili dili maayo ang paagi sa pagtambag.” Unsay atong makat-onan niini? Ang tambag mas sayon dawaton kon ato ning ihatag tungod kay gihigugma nato ang usa ka tawo, dili tungod kay naglagot ta niya.

8. Unsay angayng ipangutana sa ansiyano sa iyang kaugalingon dihang maghunahuna kon motambag ba siya o dili?

⁸ Ang mga ansiyano dili angayng magdalidali sa paghatag ug tambag. Una motambag, ang ansiyano angayng mangutana sa kaugalingon: ‘Kinahanglan ba gyod nako siyang  tambagan? Segurado ba ko nga sayop ang iyang ginahimo? Naa ba siyay nasupak nga sugo sa Bibliya? O magkalahi ra gyod mig opinyon?’ Ang mga ansiyano maalamon kon likayan nila nga “mosulti dayon nga dili maghunahuna.” (Prov. 29:20) Kon ang ansiyano dili segurado kon kinahanglan ba gyod siyang motambag, puwede niyang duolon ang laing ansiyano aron hisgotan kon naa bay nalapas nga sugo sa Bibliya.—2 Tim. 3:16, 17.

9. Unsay atong makat-onan kang Pablo dihang motambag bahin sa sininaan ug pamostura? (1 Timoteo 2:9, 10)

⁹ Konsideraha ni nga pananglitan. Ang usa ka ansiyano naghunahuna bahin sa sininaan o pamostura sa usa ka igsoon. Puwede niyang pangutan-on ang kaugalingon, ‘Naa ba siyay nasupak nga prinsipyo sa Bibliya?’ Kay gusto niyang maseguro nga wala siya magbase sa kaugalingon niyang opinyon, mangonsulta tingali siya sa laing ansiyano o sa hamtong nga igsoon. Ila tingaling hisgotan ang tambag ni Pablo bahin sa sininaan ug pamostura. (Basaha ang 1 Timoteo 2:9, 10.) Si Pablo naghisgot ug mga prinsipyo nga ang sininaan sa usa ka Kristohanon angayng desente, nagpakitag pagtahod sa kaugalingon ug sa uban, ug nagpakitag maayong panghunahuna. Pero wala siya maghimog balaod kon unsay puwede o dili puwedeng isul-ob. Nahibalo siya nga ang mga Kristohanon naay katungod nga mosul-ob sa ilang gusto basta walay malapas nga prinsipyo. Busa dihang magdesisyon kon gikinahanglan ba ang tambag, konsiderahon sa mga ansiyano kon ang sininaan o pamostura sa igsoon nagpakita bag pagtahod sa kaugalingon ug sa uban ug nagpakitag maayong panghunahuna.

10. Unsay angay natong hinumdoman kon bahin sa personal nga mga desisyon?

¹⁰ Angay natong masabtan nga ang duha ka hamtong nga Kristohanon lainlain tingalig desisyon, pero parehas silang husto. Dili nato angayng ipamugos ang atong gihunahuna nga husto ug sayop.—Roma 14:10.

11-12. Kon gikinahanglan ang tambag, unsay ipangutana sa ansiyano sa iyang kaugalingon, ug ngano?

¹¹ Kon gikinahanglan gyod ang tambag, ang pangutana, Kinsay motambag? Sa dili pa motambag sa minyo nga sister o menor de edad, ang ansiyano makig-estorya sa ulo sa pamilya kay basig gusto niya nga siya na lay motambag. * O ang ulo sa pamilya mohangyo tingali nga naa siya dihang motambag ang ansiyano. Ug sama sa gihisgotan sa  parapo 3, usahay mas maayo nga hamtong nga sister ang motambag sa batabata nga sister.

 ¹² Naa pay laing butang nga angayng konsiderahon. Puwedeng pangutan-on sa ansiyano ang iyang kaugalingon, ‘Maayo ba nga ako ang motambag, o mas maayo nga lahi ang motambag?’ Pananglitan, ang usa nga ubos ug pagtan-aw sa kaugalingon mas modawat tingali sa tambag kon gikan ni sa ansiyano nga nakaagi pod ani nga pagbati. Ang ansiyano nga nakaagi ani nga pagbati mas makasabot sa maong igsoon ug ang iyang tambag mas daling dawaton. Pero responsibilidad sa tanang ansiyano nga dasigon ang mga igsoon sa paghimog mga kausaban base sa Bibliya. Busa kon kinahanglan gyong tambagan ang igsoon, ang pinakaimportante mao nga mahatag ang tambag.

13-14. Nganong importante nga maminaw ang ansiyano?

¹³ Importante ang pagpaminaw. Dihang ang ansiyano mag-andam sa iyang tambag, angay niyang pangutan-on ang iyang kaugalingon: ‘Unsay akong nahibaloan bahin sa igsoon? Unsay iyang kahimtang karon? Naa ba siyay mga problema nga wala nako mahibaloi? Unsa gyoy iyang gikinahanglan karon?’

¹⁴ Ang prinsipyo sa Santiago 1:19 mapadapat gyod sa tanang motambag. Si Santiago misulat: “Ang matag usa kinahanglang abtik sa pagpaminaw, hinay sa pagsulti, dili daling masuko.” Ang ansiyano maghunahuna tingali nga nahibalo siya sa tanang impormasyon, pero tinuod kaha? Ang Proverbio 18:13 nagpahinumdom nato: “Kon ang usa motubag dayon nga dili una maminaw, kabuangan kana ug makauulaw.” Mas maayo nga ang ansiyano mangutana sa igsoon mismo. Angay siyang maminaw sa dili pa motambag. Hinumdomi ang leksiyon nga nakat-onan sa ansiyano nga gihisgotan sa sinugdanan niining artikuloha. Naamgohan niya nga imbes isulti dayon ang mga teksto nga iyang giandam, unta iya unang gipangutana ang sister, sama sa: “Komosta man ka?” “Naa ba koy ikatabang nimo?” Kon susihon una sa mga ansiyano ang kahimtang, mas matabangan ug madasig nila ang mga igsoon.

15. Unsaon pagpadapat sa mga ansiyano ang prinsipyo sa Proverbio 27:23?

¹⁵ Ilha pag-ayo ang mga igsoon. Sa nahisgotan na sa sinugdanan, aron mahimong epektibo ang tambag, dili igo ang pagbasa lag mga teksto o paghatag ug mga sugyot. Kinahanglang bation sa mga igsoon nga gimahal nato sila, nakasabot ta nila, ug gusto nato silang tabangan. (Basaha ang Proverbio 27:23.) Ang mga ansiyano angayng maningkamot nga masuod sa mga igsoon.

16. Unsay makatabang sa mga ansiyano aron mahimong epektibo ang ilang tambag?

¹⁶ Likayan gyod sa mga ansiyano nga maghunahuna ang mga igsoon nga makig-estorya  lang sila kon naay sayop ang igsoon. Hinuon, regular silang makig-estorya sa mga igsoon ug ipabati nila nga gusto silang motabang dihang naay mga kalisdanan. Ang usa ka eksperyensiyadong ansiyano miingon, “Kon imo nang himoon, masuod ka nila. Mas sayon pod nga motambag kon gikinahanglan.” Ug mas dali pod para sa gitambagan nga modawat sa tambag.

17. Kanus-a ilabinang importante nga ang ansiyano mapailobon ug buotan?

¹⁷ Importante nga mapailobon ug buotan ka. Importante ni ilabina kon ang gitambagan dili dayon magpadapat sa giingon sa Bibliya. Ang ansiyano angayng magbantay nga dili siya maglagot kon ang iyang tambag dili dayon dawaton o ipadapat. Ang Bibliya nag-ingon bahin kang Jesus: “Dili niya balion ang nabawog nga tangbo, ug dili niya palongon ang nagkaawop nga pabilo.” (Mat. 12:20) Busa sa iyang kaugalingong mga pag-ampo, ang ansiyano makahangyo kang Jehova nga tabangan ang igsoon nga makasabot kon nganong gitambagan siya ug tabangan pod nga ipadapat kini. Ang igsoon nagkinahanglan tingalig panahon sa pagpamalandong sa tambag nga iyang nadawat. Kon ang ansiyano mapailobon ug buotan, mas sayon para sa igsoon nga maminaw sa iyang tambag. Siyempre, ang tambag angayng ibase kanunay sa Pulong sa Diyos.

18. (a) Unsay angay natong hinumdoman bahin sa paghatag ug tambag? (b) Sumala sa gipakita sa hulagway nga konektado sa kahon, unsay giestoryahan sa ginikanan?

¹⁸ Pagkat-on gikan sa imong mga sayop. Kay di ta perpekto, dili gyod nato kanunayng mapadapat ang mga sugyot niining artikuloha. (Sant. 3:2) Masayop gyod ta, pero angay tang maningkamot nga mokat-on gikan sa atong mga sayop. Kon ang mga igsoon mobati nga gihigugma nato sila, tingali mas sayon para nila nga pasayloon ta dihang naa tay masulti o mahimo nga makapasakit nila.—Tan-awa pod ang kahong “ Para sa mga Ginikanan.”

19. Unsay atong himoon aron mapalipay nato ang kasingkasing sa mga igsoon?

¹⁹ Atong nakat-onan nga dili sayon ang paghatag ug epektibong tambag. Dili ta perpekto, ug kadtong atong tambagan dili pod perpekto. Hinumdomi ang mga prinsipyo nga gihisgotan niining artikuloha. Kon motambag ka, paneguroa nga husto ang imong motibo. Paneguroa pod nga gikinahanglan gyod ang tambag ug nga ikaw ang angayng mohatag sa tambag. Sa dili pa motambag, pangutana ug paminaw pag-ayo aron masabtan nimo kon unsay problema sa igsoon. Paningkamoti nga masabtan ang iyang panghunahuna. Tratara ang mga igsoon sa buotan nga paagi ug pakigsuod nila. Hinumdomi ni: Gusto nato nga ang atong tambag dili lang basta epektibo kondili “makapalipay [pod] sa kasingkasing.”—Prov. 27:9.