1-2. Met emén Chón Kraist mwán a káé ren ifa usun an epwe fénéú ekkewe ekkóch?

 FITU ier a ló, rúúemén Chón Kraist mwán mi ásimaw ra ló chuuri emén Chón Kraist fefin ese chúen fiffiti mwich ren ekkóch fansoun. Emén me lein ekkena mwán mi ásimaw a áiti ngeni ena fefin fitu wokisin usun lamoten ach fiti mwich. Tittipan pwe a sópwéch an apéchékkúla ena Chón Kraist fefin, nge atun repwele ló seni, a ereniir: “Ámi ouse weweiti met ei ngang mi nóm lón.” Ekkena mwán mi ásimaw ra fen fénéú, nge rese akkomw weweiti nónnómun. Ina popun, ena Chón Kraist fefin a meefi pwe ese álilliséch ar kapasen fén.

² Iei alon ewe mwán mi ásimaw mi álleani ngeni ewe fefin Chón Kraist ekkewe wokisin: “Tittipei pwe lón ena atun, ena fefin ese chék aúcheani ai kapasen fén. Nge mwirin, ua mirititi pwe ua fen ekieki akkomw menni ekkewe wokisin upwe néúnéú ngeni, nge use fen akkomw ekieki nónnómun fefinei na. Itá úrúrún upwe fen akkomw eisini met pwóróusan, me met ua tongeni féri pwe upwe álisi.” Ena mwán mi ásimaw a káé seni minne a fis. Nge iei, a emén mwán mi ásimaw mi chúngú meefien aramas me álilliséch.

3. Ié kewe lón ewe mwichefel eli ra tongeni awora kapasen fén?

 ³ Pokiten ekkewe mwán mi ásimaw iir chón mas, iwe wiser ar repwe awora kapasen fén atun mi lamot. Iwe nge, eli a wor ekkóch atun a lamot án chón ewe mwichefel repwe pwal fénéú ekkewe ekkóch. Áwewe chék, eli emén Chón Kraist mwán  are fefin epwe fénéú emén chienan seni ewe Paipel. (Kölf. 141:5; SalF. 25:12) Are eli emén Chón Kraist fefin mi mwukóló epwe fénéú are “aiti ngeni ekewe föpwül” ekkeei mettóch mi mak lón Titus 2:3-5. Me fán chómmóng a lamot án ekkewe sam me in repwe fénéú me áwena néúr kewe. Inaamwo ika ei lesen a ákkáeúin weneiti ekkewe mwán mi ásimaw, nge kich meinisin sia tongeni kúna álillisin ach káé ifa usun sipwe tongeni eáni ewe sókkun fén epwe álilliséch me “apwaapwai letip.”​—SalF. 27:9, PA.

4. Met sipwe pwóróus wóón lón ei lesen?

⁴ Lón ei lesen, sipwe pwóróusfengen wóón ekkeei rúáánú kapas eis usun ach eáni kapasen fén: (1) Ifa ewe popun mi pwúng ach sipwe fénéú emén? (2) Mi wesewesen lamot ach sipwe fénéú emén? (3) Itá ié epwe wisen fénéú ekkewe ekkóch? (4) Ifa usun ka tongeni eáni ewe sókkun kapasen fén mi álilliséch?

5. Pwata epwe mecheres án chón ewe mwichefel etiwa án emén mwán mi ásimaw kapasen fén ika a eáni fán tong? (1 Korint 13:4, 7)

⁵ Ekkewe mwán mi ásimaw ra tongei chón ewe mwichefel. Fán ekkóch, ra pwári ena tong ren ar fénéú emén epwele ttur lón tipis. (Kal. 6:1) Nge eli me mwen án emén mwán mi ásimaw epwe fós ngeni ena emén, a éch an epwe ekieki ekkóch ekkeei mettóch usun tong aposel Paulus a fós usur. “Chen a mosonotam o kirikiröch. . . . A engila fän mettoch meinisin, a lükü meinisin, a apilüküni meinisin, a tipeppos fän mettoch meinisin.” (Álleani 1 Korint 13:4, 7.) Án ewe mwán mi ásimaw ekiekifichi ekkena wokisin, epwe álisi le awora fén fán tong. Ika ewe emén a fénéú a meefi án ewe mwán mi ásimaw chúngú, iwe epwe mecheres an epwe etiwa an kapasen fén.​—Rom 12:10.

6. Ifa ewe leenien áppirú mi múrinné Paulus a isetiw?

⁶ Ewe aposel Paulus a isetiw leenien áppirú mi múrinné lón wisan emén mwán mi ásimaw. Áwewe chék, atun a lamot ngeni chienan kewe Chón Kraist lón Tesalonika kapasen fén, ese pireir le fénér. Iwe nge lón néún kewe taropwe ngeniir a akkomw apúnger ren ar féfférún tuppwél, angang weires fán tong, me ar likiitú. A pwal ekieki nónnómur me a ereniir pwe a silei pwe ese mecheres manawer, me ra likiitú fán riáfféúmwáál. (1 Tes. 1:3; 2 Tes. 1:4) A pwal mwo nge ereni chienan kana Chón Kraist pwe ra isetiw leenien áppirú ngeni pwal ekkewe ekkóch Chón Kraist. (1 Tes. 1:8, 9) A ifa me pwapwaar atun ra rong án Paulus apúnger fán tong! Ese wor tipemwaramwar pwe Paulus a fókkun tongei chienan kana Chón Kraist. Ina popun a tongeni awora fén mi álilliséch lón iir me ruu makkeian kewe taropwe ngeni ekkewe chón Tesalonika.​—1 Tes. 4:1, 3-5, 11; 2 Tes. 3:11, 12.

7. Eli pwata emén esap mochen etiwa kapasen fén?

⁷ Met a tongeni fis ika sise fénéú emén lón ewe napanap mi pwúng? Iei alon emén mwán mi ásimaw mi fen wiseni ena wis ren fite ier: “Ekkóch rese mochen etiwa kapasen fén pokiten ewe mi fénér ese fénér fán tong, nge esap pokiten ese pwúng ewe kapasen fén.” Met sia káé seni ena? Epwe mecheres án ewe sia fénéú etiwa ach fénéú ika sia féri fán tong nge esap fán song.

8. Met a lamot án emén mwán mi ásimaw epwe eisini pwisin i ika epwe fénéú emén are esap fénéú?

⁸ Mi lamot án ekkewe mwán mi ásimaw resap atapwalapwal le awora kapasen fén. Me mwen án emén mwán mi ásimaw epwe fénéú emén, a lamot an epwe pwisin eisini: ‘A wesewesen lamot ai upwe fénéú? Ua lúkú pwe a  féri minne mi mwáál? A fen atai án Paipel allúk, are a chék sókkóló an ekiek seni ai?’ Ekkewe mwán mi ásimaw repwe mirit ren ar resap “müttir le fos.” (SalF. 29:20) Ika ewe mwán mi ásimaw a tipemwaramwar ika a lamot an epwe fénéú emén, iwe a tongeni eisini emén mwán mi ásimaw ika a pwal meefi pwe ewe emén a atai án Paipel kapasen fén me a lamot ngeni kapasen fén.​—2 Tim. 3:16, 17.

9. Met sia káé seni Paulus ren ifa usun sipwe fénéú emén usun úfan me foutan? (1 Timoty 2:9, 10)

⁹ Áwewe chék iei eú pwóróus. Emén mwán mi ásimaw a lólilen ren án emén chienan kefil wóón úfan are foutan. Ena mwán mi ásimaw a tongeni eisini pwisin i, ‘A wor eú popun me ren Paipel ai upwe fós ngeni?’ Pokiten ewe mwán mi ásimaw ese mochen ereni pwisin meefian, eli epwe angei meefien pwal emén mwán mi ásimaw, are emén chón afalafal mi ásimaw. Ra tongeni pwóróusfengen wóón án Paulus ei kapasen fén usun úfach me foutach. (Álleani 1 Timoty 2:9, 10.) Paulus a fós usun ekkóch kapasen emmwen ese kon tichik usun úfen Chón Kraist, itá epwe úkúkéch, fich, me esap eitengawa Jiowa. Nge Paulus ese tichikietiw met emén epwe úféúf are esap úféúf. A silei pwe a wor án ekkewe Chón Kraist pwúúng le pwisin fili met repwe úféúf, nge esap chék ú ngeni án Paipel emmwen. Ina popun, atun ekkewe mwán mi ásimaw ra ekieki ika repwe fénéú emén, a lamot repwe ppii ika án emén kefil wóón úfan are foutan a pwári mirit are a elingaaló Jiowa.

10. Met sipwe chechchemeni atun ekkewe ekkóch ra filatá met repwe féri?

¹⁰ A lamot ach sipwe chechchemeni pwe a tongeni sókkofesen án rúúemén Chón Kraist mi ásimaw kefil, nge esap weween pwe emén a pwúng nge emén a mwáál. Sisap sótun oumwesi pwiich kewe ar repwe féri met sia ekieki pwe a pwúng.​—Rom 14:10.

11-12. Ikkefa ekkewe kapas eis emén mwán mi ásimaw epwe eisini pwisin i atun a lamot an epwe awora kapasen fén, me pwata?

¹¹ Ika a ffat pwe a lamot án emén mwán mi ásimaw epwe fénéú emén, iwe epwe eisini pwisin i: “Itá ié epwe wisen fénéú ewe emén?” Me mwen án emén mwán mi ásimaw epwe fénéú emén fefin Chón Kraist mi pwúpwúlú, are emén semirit, a lamot an epwe lóóm pwóróus ngeni ewe mékúren famili, pwe eli epwe mochen pwisin ataweei ewe osukosuk. * Are eli ewe mékúren famili epwe tingorei ena mwán mi ásimaw an epwe fiti atun a fénér. Are, eli epwe wor atun epwe fen éch án emén Chón Kraist fefin mi mwukóló epwe fénéú emén Chón Kraist fépwúl, usun met  parakraf 3 a áiti ngenikich.

¹² A pwal wor eú mettóch mi lamot án emén mwán mi ásimaw epwe ekieki. Eli epwe eisini  pwisin i: ‘Mi éch ai upwe wisen fénéú, ika epwe fen éch án emén epwe wisen fénéú?’ Áwewe chék, eli epwe mecheres ngeni emén mi fiu ngeni an meefi aúcheangawan an epwe etiwa kapasen fén seni emén mwán mi ásimaw mi pwal eáni ena esin memmeef. Eli ena mwán mi ásimaw epwe weweiti meefien ena emén, iwe epwe tipemecheres le etiwa minne epwe apasa. Iwe nge, wisen meinisin ekkewe mwán mi ásimaw ar repwe apéchékkúla me pesei pwiir kewe Chón Kraist le féri ekkewe siwil epwe tipeeú ngeni áitien Paipel. Ina popun, án ekkewe mwán mi ásimaw awora kapasen fén, ina met a kon aúchea ese lifilifil ika ié leir a awora ewe kapasen fén.

13-14. Pwata a lamot án emén mwán mi ásimaw epwe akkomw aúseling?

¹³ Mmólnetá le aúseling. Atun emén mwán mi ásimaw a ammólnatá le fénéú emén, a lamot an epwe pwisin eisini: ‘Met ua silei usun nónnómun chienei ei Chón Kraist? Met a fiffis lón manawan? Mi wor an osukosuk use silei usun? Met a kon lamot ngeni iei?’

¹⁴ Ewe kapasen emmwen mi mak lón James 1:19 a weneiti chókkewe repwe wisen fénéú emén. Iei makkeien James: “Aramas meinisin repwe müttir ngeni rong, mang ngeni kapas pwal mang ngeni song.” Eli emén mwán mi ásimaw a tongeni ekieki pwe a silei unusen pwóróusen emén, nge itá a wesewesen silei? Iei met Än Salomon Fos 18:13 a áchema ngenikich: “Are eman aramas a pälüeni mwen esamwo rongorong, ina an tiparoch epwe pwal säw.” A éch ika emén mwán mi ásimaw epwe ereni ewe emén an epwe apwóróusa pwisin nónnómun. Ina popun, a lamot an epwe aúseling me mwen an epwe kapas. Ka chemeni ewe lesen emén mwán mi ásimaw a káé lón alon we lepoputáán ei lesen? A mirititi pwe itá esap akkomw fós ngeni ewe fefin Chón Kraist wóón ekkewe pwóróus a fen ammólnatá, nge itá epwe fen akkomw eisini ekkeei kapas eis, áwewe chék ren: “Met pwóróusom?” “Met ka mochen upwe féri pwe upwe tongeni álisuk?” Ika ekkewe mwán mi ásimaw ra awora fansoun le silei nónnómun chiener kewe Chón Kraist, iwe ra tongeni álisiir me apéchékkúler.

15. Ifa usun ekkewe mwán mi ásimaw ra tongeni apwénúetá ei kapasen emmwen lón Än Salomon Fos 27:23?

¹⁵ Sissilei ewe pwiin siip. Usun met a fen mak lepoputáán ei lesen pwe ese chék naf án emén álleani fitu wokisin are eáni eú are ruu pesepes ren an epwe awora kapasen fén mi álilliséch. A lamot án chienach kewe Chón Kraist repwe meefi pwe sia chúngúúr, weweitiir, me mochen álisiir. (Álleani Än Salomon Fos 27:23.) A lamot án ekkewe mwán mi ásimaw repwe achocho le alapaaló ar chiechiéch ngeni chiener kewe Chón Kraist.

16. Met epwe álisi ekkewe mwán mi ásimaw le awora kapasen fén mi álilliséch?

¹⁶ Ekkewe mwán mi ásimaw rese mochen ámmeef ngeni chiener kewe Chón Kraist pwe  atun chék repwe fénér, ina chék atun repwe fós ngeniir. Nge repwe fen fóffós ngeniir iteitan, me pwári pwe ra chúngúúr atun ra nóm lón weires. Iei alon emén mwán mi ásimaw mi fen wiseni ena wis ren fite ier: “Ika ka féri ena, kopwe chiechiéch ngeniir. Mwirin, atun a lamot óm kopwe awora kapasen fén, epwe mecheres óm kopwe féri ena.” Iwe epwe mecheres ngeni ewe emén ka fénéú an epwe etiwa óm kapasen fén.

17. Ineet a ákkáeúin lamot án emén mwán mi ásimaw epwe mosonottam me kirekiréch?

¹⁷ Kopwe mosonottam me kirekiréch. Mosonottam me kirekiréch a ákkáeúin lamot atun ekkewe mwán mi ásimaw ra fénéú emén, nge ese mochen apwénúetá alon Paipel me mwan. A lamot án emén mwán mi ásimaw epwe túmúnú pwe esap mwittir song ika ewe emén a fénéú ese mwittir etiwa are apwénúetá ewe kapasen fén. Iei met ewe Paipel a apasa usun Jesus: “Esap kupiela efoch äsät mi puopu, esap pwal kunuela efoch wiik mi kümochoch.” (Mat. 12:20) Ina popun, emén mwán mi ásimaw a tongeni tingorei Jiowa lón an iótek an epwe álisi ewe emén mi lamot ngeni kapasen fén, me álisi le weweiti popun an fénéú, me apwénúetá ena fén. Eli a lamot ngeni ewe Chón Kraist mi angei kapasen fén, an epwe awora fansoun le ekieki usun ewe kapasen fén. Ika ewe mwán mi ásimaw a mosonottam me kirekiréch, iwe epwe mecheres ngeni ewe emén a fénéú an epwe aúseling an kapasen fén. Ewer mi pwúng, pwe ach kapasen fén epwe lóngólóng wóón án Kot we Kapas iteitan.

18. (a) Met a lamot sipwe chemeni atun sia fénéú emén? (b) Met ekkewe sam me in ra pwóróusfengen wóón, usun met a pwá lón ewe sasing mi fiti ewe pwóór?

¹⁸ Káé seni met ekkewe ka mwáálliló wóór. Pokiten sise unuséch, iwe sise tongeni unusen apwénúetá ekkeei kapasen pesepes lón ei lesen. (Jas. 3:2) Sipwe kan mwámmwáálliló, nge atun a fis ena, a lamot ach sipwe káé seni met ekkewe sia mwáálliló wóór. Ika chienach kewe Chón Kraist ra meefi pwe sia tongeer, epwe mecheres ngeniir ar repwe omusaaló tipisich atun sia asongeer  ren met sia apasa are féri.​—Pwal ppii ewe pwóór, “ Kapasen Áchechchem mi Álilliséch Ngeni Sam me In.”

19. Ifa usun sia tongeni apwapwaai letipen pwiich kewe?

¹⁹ Usun met sia fen kúna pwe ese mecheres ach sipwe eáni fén mi álilliséch. Sise unuséch, me chókkewe sia fénér rese pwal unuséch. Sipwe chechchemeni ekkewe kapasen emmwen sia fen pwóróus wóór lón ei lesen. Sipwe túmúnú pwe ach fénéú emén epwe lóngólóng wóón eú popun mi pwúng. Pwal och, kopwe túmúnú pwe ewe kapasen fén ina met a wesewesen lamot ngeni, me en ewe mi fich óm kopwe fénéú. Me mwen óm kopwe fénéú emén, kopwe kapas eis ngeni me aúselingéch ngeni pwe kopwe tongeni weweiti an osukosuk. Achocho le weweiti meefian. Kopwe kapas pwetete me chiechiéch ngeni chienom kewe Chón Kraist. Chemeni pwe iei met sia mochen achocho ngeni: Sia pwal mochen pwe ach kapasen fén epwe “apwaapwai letip,” nge esap chék álilliséch.​—SalF. 27:9, PA.