1, 2. ¿Kʼãrẽta kʼawuasi zõrãrã abaʉba ũrãgʼa diai ʉ̃rʉra?

 EWARI aba zõrãrã kongregasionebemaba akʉ jʉ̃ẽsida mebẽã dããrabata ãba yi jʉrebarieda wã ẽãbʉta. Mõbe zõrãrãbara ũdubisida Daizeze Bedʼeadeba kʼãrẽa wãibarata ãba yi jʉrebarimara. Ãyara krĩchapanasi ũrãgʼa bia diabʉdata, mamina ãyi wãi nãã mebẽãba jarasi: «Marabara kʼawua ẽ mʉ̃ kʼãrẽaba zʉbʉria berabarinʉmʉra». Zõrãrãbara ũrãgʼa diasida mebẽã kʼawua ẽã iyi kʼãrẽaba zʉbʉriabʉta, maʉ̃ kʼarea mebẽãbara sentibasi ãya ũrãgʼa diadabara kʼareba ẽ basita.

² Mebẽã nããra yi testo le jʉ̃drʉdaba jarabʉ: «Mʉ̃a krĩchabasi mebẽãbara wawia ũdubi ẽ basita mʉ̃a ũrãgʼa diada kʼarea, mamina mʉ̃a kʼawuasi tẽãne mʉ̃a testo bia zokʼasimina mʉ̃a iya bedʼea widita waebasita. Mʉ̃a widiseabasi iyaʼa, ¿kʼãrẽta sãwũã berabarinʉmʉta? ¿Mʉ̃a sãwũã kʼarebaseabʉta?». Zõrãrãbara naʉ̃neba kʼawuasida wuabemara ʉ̃rʉ krĩchaibarata adewara kʼarebaibarata.

3. ¿Kongregasionera kʼaiba ũrãgʼa diaseabʉ?

³ Zõrãrã kongregasionebemabara mebẽrãta akʉibara baera ũrãgʼa diadaibara. Mamina, edaʉde wuabema mebẽrã kongregasionebemabida ũrãgʼa diaseabʉ, bari jaraita, mebẽã abaʉba ũrãgʼa diaseabʉ iyi neũdukʼawuaʼa (Sal. 141:5; Prov. 25:12). Mebẽã wẽrã kĩrãdawarabʉbara ũrãgʼa diaseabʉ mebẽã wẽrãra warrara Tito 2:3-5 bayeda jarabʉ kĩrãkʼa, adewara yibarirabara badua ũrãgʼa diabʉ yi wũãwũãraʼa.  Naʉ̃ artikulora zõrãrãitamina kʼarebaseabʉ mebẽrã kongregasionebemarasida, sãwũã ũrãgʼa bia diaita akʉza wuabemara sobiabibʉ kʼawuaita (Prov. 27:9).

4. ¿Kʼãrẽ widita panʉnai naʉ̃ artikulodera?

⁴ Naʉ̃ artikulode kʼawuadayi widi kimarebʉ ʉ̃rʉ: 1) ¿Kʼãrẽa ũrãgʼa bia diaibara? 2) ¿Ũrãgʼa diaira nesidaka? 3) ¿Kʼaiba ũrãgʼa diaibara? 4) ¿Kʼãrẽta odaibara dayirãba ũrãgʼa bia diaita?

5. 1 Corintios 13:4, 7de jarabʉdera, ¿kʼãrẽba kʼarebai zõrãrãʼa ũrãgʼa ibiade jaradiaita?

⁵ Zõrãrãbara mebẽrã kongregasionebemata kãgabʉ baera, maʉ̃ba mebẽãba ewari aba aña obʉrʉdera ũrãgʼata diabʉ, mawũã kãgata ũdubipanʉ (Gál. 6:1). Mamina zõrãrãbara ũrãgʼa diai nãã akʉseabʉ kʼãrẽta jarasita Pabloba kãgai ʉ̃rʉ: «Kãgara zʉbʉriabʉ akʉza krĩchabʉ awuru bia oita, kãgabara jõma ĩjãbʉ, jõma jʉ̃ãbʉ, jõma awuantabʉ» (akʉra 1 Corintios 13:4, 7). Zõrãrã naʉ̃ ũrãgʼaba kʼarebayi wuabemara ibiade ũrãgʼa diaita. Mebẽã yi ũrãgʼa ũrĩbʉba ũdura iyi ʉ̃rʉ krĩchapanʉta, iyita zare ẽ bayi zõrãrãba ũrãgʼa diabʉ ũrĩta (Rom. 12:10).

6. ¿Kʼãrẽa Pablora yiza biabasi ũrãgʼa diai ʉ̃rʉ?

⁶ Apostol Pablora yiza biabasi zõrãrã kongregasionebemaita. Bari jaraita, iya ũrãgʼa diasi mebẽrã Tesalónicadebema ãya nesidabaside. Mamina ãyaʼa karta bʉ diabʉesidera jarasi ãya kãga ũdubibada ʉ̃rʉ, bedʼea pʉa awuantada ʉ̃rʉ akʉza zareapanana ʉ̃rʉ, adewara ãyi ʉ̃rʉ ibia bedʼeasi ãyi pẽwãpanasimina kʼẽrẽpabasi baera (1 Tes. 1:3; 2 Tes. 1:4). Akʉza jarasi ãyira yiza biata wuabema mebẽrãita (1 Tes. 1:8, 9). Mebẽrã Tesalónicadebemara mejãcha sobiabasi Pablota ãyi ʉ̃rʉ ibia bedʼeasi baera. Pablobara ãyira mejãcha kãgabasi, maʉ̃ kʼarea iya karta ũme bʉdadera ũrãgʼa biata diasi, maʉ̃ra ãyita yibia basi(1 Tes. 4:1, 3-5, 11; 2 Tes. 3:11, 12).

7. ¿Kʼãrẽa ʉ̃kʉrʉ ẽbẽrabara ũrãgʼara ũrĩkĩrã ẽ?

⁷ ¿Kʼãrẽta berabariseabʉ dayirãba ũrãgʼata ibiade jaradia ẽ bʉrʉ? Zõrãrã kongregasione kikibariba naʉ̃ta jarasi: «Ʉ̃kʉrʉbara ũrãgʼara ũrĩkĩrã ẽ, naʉ̃ba jarakĩrãkʉ ẽ ũrãgʼara yibia ẽ basita, awuarabʉrʉ iyaʼa ibiade jaradiada ẽ basi». ¿Kʼãrẽta jaradiabʉ naʉ̃ba? Kẽãkʉ kĩrãkʼa ũrãgʼa panʉnera zarebayi ũrĩta, mamina ibiade jaradiapanʉbʉrʉ ũrĩñi.

8. ¿Zõrãrã kongregasionebemabara ũrãgʼa diai nãã iyikʉza kʼãrẽta widibara?

⁸ Zõrãrãbara naʉ̃ ʉ̃rʉ krĩchaibara, ¿mʉ̃ara wãrĩnu ũrãgʼa diaibaraka?, ¿wãrĩnu naʉ̃ ẽbẽraba obʉra kayiruaka?, ¿wãrĩnu aña onʉmʉka Daizeze Bedʼeaba zokʼabʉdebara?, ¿wãrĩnu iyara kayirua onʉmʉka mawũã ẽ bʉrʉ mʉ̃abʉrʉ kãgabʉka iyira mʉ̃ kĩrãkʼa krĩchamarẽã? Zõrãrã buru biabara naʉ̃ ʉ̃rʉ bia krĩchabʉ iya ũrãgʼa diai naweda (Prov. 29:20). Zõrãrãba bia kʼawua ẽ bʉrʉ mebẽã abaʉba wãrĩnu iya ũrãgʼa diadamarẽã nesidabʉta, awuru zõrãrã kongregasionebemaʉ̃me bedʼeaseabʉ, naʉ̃ ẽbẽraba wãrĩnu ũrãgʼa diadamarẽã nesidabʉ kʼawuaita (2 Tim. 3:16, 17).

9. 1 Timoteo 2:9, 10de jarabʉdera, ¿aPabloba sãwũã wua jʉ̃i ũrãgʼadadebara, zõrãrãbara kʼãrẽta kʼawuapanʉ?

 ⁹ Krĩchara naʉ̃ta, mebẽã zõrãrã kongregasionebemaba biode krĩchabʉbʉrʉ mebẽã aba sãwũã wua jʉ̃bʉ ʉ̃rʉ iyikʉza naʉ̃ta widiseabʉ: ¿Wãrĩnu Daizeze Bedʼeaba jarabʉde aña onʉmʉka? Zõrãrãbara iya krĩchabʉta jarakĩrã e baera awuru zõrãrãʉ̃me bedʼeaseabʉ akʉza ãbaʉba akʉseabʉ Pabloba kʼãrẽ ũrãgʼata diasita sãwũã wua jʉ̃i ʉ̃rʉra (akʉra 1 Timoteo 2:9, 10). Pablo ũragʼabara jarakĩrãbasi ẽbẽrabara biʼia akʉibarabasita iyi sãwũã wua jʉ̃ira, adewara iyi wua jʉ̃bʉba Jeowa ʉ̃rʉ ibia bedʼeabibarabasi. Mamina Pablobara jara ẽ basi kʼãrẽ wuata jʉ̃seabʉta akʉza kʼãrẽ wuata jʉ̃be ẽãta. Iya kʼawuabasi ẽbẽra aba abakaʉba jidaibarabasita sãwũã wua jʉ̃ĩ ʉ̃rʉ akʉza yoi ʉ̃rʉ, mamina naʉ̃ra oibarabasi Jeowaba kãgabʉde. Mawũã zõrãrãbara kʼawuayi maʉ̃ ẽbẽraba Pabloba jarada kĩrãkʼa obʉ kʼawuaita.

10. ¿Kʼãrẽba kʼarebayi dayirãba wawia ũdubita wuabemaba krĩchabʉra?

¹⁰ Dayirãba wawia ũdubita wuabemaba krĩchabʉta, kĩrãbeibara mebẽã ũmenebemanera ãyiraira awuara krĩchapanʉ, mamina naʉ̃bara jarakĩrãkʉ ẽ abaʉba krĩchakʉta aripechuta akʉza ababemaneta añachuta, maʉ̃ kʼarea dayirãbara dayima biabʉta obi ẽ baibara mebẽrãra (Rom. 14:10).

11, 12. Ũrãgʼa biata diakĩrãbʉbʉrʉ, ¿zõrãrãbara ãyikʉza kʼãrẽta widibara?

¹¹ Wãrĩnu ũrãgʼa diadaita nesidabʉbʉrʉ, ¿kʼaiba ũrãgʼa diaibara? Zõrãrãba ũrãgʼa diaibʉrʉ mebẽã wẽrã kima barabʉta, nãã yi kimaʉ̃me bedʼeaibara, mawũã ẽ bʉrʉ wũãwũã zakeʼa ũrãgʼa diaibʉrʉ yi zezeʉ̃me, ãyira mebẽrã buru baera. Mebẽrã burubara jidaseabʉ iya ũrãgʼa diaita yi mebẽrãʼa mawũã ẽ bʉrʉ zõrãrãba ũrãgʼa diabʉeda iyisida mamachuaita *. Edaʉde yibia mebẽã wẽrã kĩrãdawarabʉba ũrãgʼa diaita mebẽa wẽrãra warrara.

¹² Adewara zõrãrãbara naʉ̃ ʉ̃rʉbida krĩchaibara, ¿yibia baika mʉ̃a ũrãgʼa diaira? Mawũã ẽ bʉrʉ, ¿awuru zõrãrãba ũrãgʼabʉta zare ẽ baika iya ũrĩta? Bari jaraita, mebẽã aba krĩchabʉbʉrʉ iyira zeri ẽãta, zõrãrã aba iyi kĩrãkʼa berabaridaba ũrãgʼa diabʉbʉrʉ naʉ̃ mebẽãitara zare ẽ bayi ũrĩta, naʉ̃ zõrãrãbara bia kʼawua baera mebẽã sãwũã  sentibʉra, maʉ̃ kʼarea iya mebẽãʼa ũrãgʼa diabʉrʉdera iyi soidu jʉ̃ẽñi. Zõrãrã kongregasionebema jõmaʉ̃ba mebẽrã ũrãgʼa diadaibara ãyi kʼarebadaita, maʉ̃ kʼarea mebẽã abaʉta ũrãgʼata nesidabʉbʉrʉ ũrãgʼa diaibara, kʼãrẽ ẽ zõrãrã ãyi kĩrãkʼa barabari ẽ basimina.

13, 14. ¿Kʼãrẽa yibia zõrãrã kongregasionebemaitara biʼia ũrĩta?

¹³ Biʼia ũrĩbara. Zõrãrãba ũrãgʼa diai nããweda naʉ̃ta krĩchaibara: ¿Mʉ̃a ũdukʼawuabʉka naʉ̃ mebẽã kʼãrẽta berabarinʉmʉra?, ¿iyira bedʼea zroma erbʉka mʉ̃a kʼawua ẽãta?, ¿iya atiara kʼãrẽta nesidabʉba?

¹⁴ Santiago 1:19ba kʼarebabʉ ẽbẽra yi ũragʼa diaira. Nama jarabʉ: «Ẽbẽrarã jõmaʉ̃ba kĩrãkita ũrĩbara, kʼawua ẽã bedʼeabe ẽ, mesera kĩrʉbe ẽ». Zõrãrã abaʉba krĩchabʉbʉrʉ jõma kʼawuabʉta kʼãrẽ berabarinʉmʉta, mamina ¿wãrĩnu jõma kʼawuabʉka kʼãrẽ berabarinʉmʉra? Proverbios 18:13ba dayirãʼa kĩrãbebibʉ: «Ʉ̃kʉrʉba bia ũrĩ ẽ nãã panʉdogobara, maʉ̃ra kʼawua ẽã bedʼeadogo akʉza perabibʉ». Maʉ̃ba audre yibiabayi yi ẽbẽra widita, ¿kʼãrẽta sãwũã berabarinʉmʉta? Mawũẽra zõrãrãbara biʼia ũrĩbara bedʼeai nããweda. Kĩrãbedadrʉ parrapo 1ne yiza jaradata, zõrãrãba nãã widisibʉrʉ mebẽã sãwũãbʉta akʉza biʼia ũrĩsibʉrʉ iya jarabʉta audre bia wãkasi. Zõrãrãba biʼia ũrĩpanʉbʉrʉ akʉza jõma bia kʼawuadara kʼãrẽta berabarinʉmʉta, biode kʼarebayi mebẽrãra.

15. ¿Zõrãrãbara sãwũã oseapanʉ Proverbios 27:23de jarabʉ kĩrãkʼa?

¹⁵ Obejarata biʼia ũdu kʼawuara. Ũrãgʼa bia diaira, mawũã bari Daizeze Bedʼeadebemata le ũrĩbi kʼãrãpe bari jara ẽ baibara kʼãrẽta oibarata. Mebẽrãbara nesidapanʉ dayirãba ũdubidamarẽã ãyi bedʼea ũrĩkĩrãpanʉta, ãyi krĩchapanʉta akʉza ãyi kʼarebakĩrãpanʉta (akʉra Proverbios 27:23). Mawũã opanʉbʉrʉ audre neũdukʼawuabayi mebẽrã kongregasionebemabawara.

16. ¿Kʼãrẽba kʼarebayi zõrãrãba ũrãgʼa bia diaira?

¹⁶ Zõrãrãbara krĩchadamarẽã kãgapanʉ ẽ ãyira ewari erpanʉta mebẽrã ũrãgʼa diai ewaridebʉrʉ mebẽrãbawara bedʼeaita, maʉ̃ kʼarea ãyira badua bedʼeaibara mebẽrã kongregasionebemabawara akʉza ũdubibara ãyi bedʼea zroma ʉ̃rʉ krĩchabʉta. «Bʉa maʉ̃ta mawũã obʉbʉrʉ, bʉa mebẽrãra audre ũdukʼawuayi. Maʉ̃ba bʉa ũrãgʼa diabʉrʉdera zare ẽ bayi ãyaʼa ũrãgʼa diaita akʉza ãyita zare ẽ bayi ũrãgʼa ũrĩta», mawũã jarasi zõrãrã abaʉba.

17. ¿Zõrãrãbara sõbede nesidapanʉ mesera kĩrʉ ẽ baita akʉza ibiade edaita?

 ¹⁷ Ibiade edara akʉza mesera kĩrʉrãra. Mebẽãba ũrĩkĩrã ẽ bʉrʉ ũrãgʼata, zõrãrãbara naʉ̃ nebiata nesidapanʉ. Zõrãrãra jʉra kʼawuabaibara mesera kĩrʉ ẽ baita mebẽã iya ũrãgʼa diakʉba ũrĩ ẽ bʉrʉ, kĩrãbedadrʉ kaseabʉta Daizeze Bedʼeaba Jesu ʉ̃rʉ: «Cha bʼʉadea bʼʉra bʼʉeta ẽã, ĩbĩrã kidrʉ bʼʉra kia ẽã» (Mat. 12:20). Maʉ̃ kʼarea zõrãrãra Jeowaʼa yiwidʼiseabʉ ẽbẽraba kʼawuamarẽã iya kʼãrẽa nesidata maʉ̃ ũrãgʼara akʉza widipanʉ kʼarebamarẽã maʉ̃ta omarẽã. Mebẽã yi ũrãgʼa diadapeadara edaʉde ewarita nesidabʉ krĩchaita iyaʼa jaradapeadata, maʉ̃ kʼarea zõrãrãta mesera kĩrʉ ẽ bʉrʉ akʉza bia edadara, mebẽãbara bia krĩchayi iya ũrãgʼa diadapeada ʉ̃rʉ, mawũã krĩcha ẽ bayi sãwũã jaradiada ʉ̃rʉ. Adewara kĩrãbedadrʉ jõma ũrãgʼa diabʉra Daizeze Bedʼeadeba diaibarata.

18. ¿Ũrãgʼa diabʉrʉdera kʼãrẽta kĩrãbedaibara?

¹⁸ Bʉa aña odadeba kʼawuara. Dayirã jõmaʉ̃ta nekayirua omia baera naʉ̃ artikulode eda jarabʉra jõma aripe obeda ẽ bayi (Sant. 3:2). Aña oseabʉ, mamina dayirãba aña obʉrʉdera kĩrãbeibara kʼãrẽne aña osita, mawũã maʉ̃neba kʼawuaita oẽ baita jẽda. Dayirãba mebẽrãta kĩrʉbidara daya jaradadeba mawũã ẽ bʉrʉ daya odadeba, ãyara maʉ̃ra kĩrãduayi dayirãba kãgata ũdubidara (akʉra rekuadrota « Bedʼea yibariraita»).

19. ¿Kʼãrẽta oibara dayi mebẽã so sobiabita?

¹⁹ Dayirãbara kʼawuasida, dayirã jõmaʉ̃ta nemitia omia baera zareabʉta ũrãgʼa diaita akʉza ũrãgʼa ũrĩta. Maʉ̃ kʼarea kĩrãbedadrʉ kʼãrẽta kʼawuasidata naʉ̃ artikulode, kʼawuasida ũrãgʼabʉrʉdera kãgade akʉza ibiade jaradiaibara.  Zõrãrãbara ũrãgʼa diai naweda nãã biʼia krĩchaibara wãrĩnu mebẽãba nesidabʉ kʼawuaita akʉza kʼaiba biga bʼaita maʉ̃ ũrãgʼa diaira. Adewara ũrãgʼa diai nããweda widida akʉza biʼia ũrĩda mebẽrã kʼãrẽ bedʼea zromane berabarinʉmʉta, mawũã ũdubiyi kãgata akʉza mebẽãita zare ẽ bayi ũrãgʼa ũrĩta. Adewara ẽbẽra obirãra bʉyimabʉ kĩrãkʼa awuarabʉrʉ ibiade edara akʉza mesera kĩrʉrãra, mawũã ora mebẽrã kongregasione panʉbawara neũdukʼawua biabayi. Kĩrãbedadrʉ dayirãbara mawũã bari ũrãgʼata diakĩrãpanʉ ẽãta, awuarabʉrʉ kãgapanʉ ẽbẽra so sobiabidaita (Prov. 27:9).