1, 2. ¿Chuqui tsiʼ cʌñʌ juntiquil anciano cheʼ bʌ tsiʼ tiqʼui juntiquil hermana?

AÑIX cabʌl jab, chaʼtiquil anciano tsiʼ julaʼtayob juntiquil hermana come añix ora maʼañic miʼ yajñel ti tempa bʌ. Juntiquil tsiʼ wen pejcʌbe texto tac muʼ bʌ i pʌs chucoch ñuc i cʼʌjñibal jiñi tempa bʌ. Jiñi hermano tsiʼ ñaʼta chaʼan tsaʼʌch i colta jiñi hermana, pero cheʼ bʌ sujtelix mucʼob, jiñi hermana tsiʼ yʌlʌ: «Mach wis laʼ wujilic chuqui woli (choncol) c ñusan». Jiñi hermanojob tsiʼ yʌqʼueyob ticʼojel pero maʼañic tsiʼ cʼajtibeyob chuqui ti wocol tac an i chaʼan. Jin chaʼan, jiñi hermana maʼañic tsaʼ coltʌnti tsiʼ yubi.

² Jiñi anciano tsaʼ bʌ i pejcʌbe jiñi texto tac miʼ yʌl chuqui tsaʼ ujti: «Ti jiñi bʌ ora, tsaʼ c ñaʼta chaʼan mach weñic woli (yʌquel) bʌ i yʌl. Pero cheʼ bʌ tsaʼ c chaʼ wen ñaʼta, tsaʼ j qʼuele chaʼan ñumen wen cheʼ tsaʼic c melbe cʼajtiya tac bajcheʼ ‹¿Bajcheʼ yilal añet?›, ‹¿bajcheʼ yubil maʼ wubin?›, ‹¿bajcheʼ miʼ mejlel j coltañet?›», i mach jin jach mic waʼ pejcʌben jiñi texto tac. Ili anciano tsiʼ cʌñʌ junchajp wen ñuc bʌ i cʼʌjñibal, i wʌle wen yujilix bajcheʼ miʼ coltan yambʌlob.

3. ¿Majqui miʼ mejlel i yʌcʼob ticʼojel tac ti congregación?

 ³ Jiñi ancianojob añob tiʼ wenta miʼ yʌqʼueñob ticʼojel tac jiñi i cʼʌjñibal bʌ i chaʼañob. Pero an i tajol an yambʌ hermanojob yom bʌ miʼ yʌcʼob ticʼojel jaʼel. Jumpʼejl ejemplo, tajol juntiquil  yom miʼ yʌqʼuen ticʼojel loqʼuem bʌ ti Biblia juntiquil i yamigo (Sal. 141:5; Pr. 25:12). O juntiquil hermana ñumen añix bʌ i jabilel miʼ yʌqʼuen ticʼojel juntiquil xchʼocto bʌ chaʼan jiñi muʼ bʌ i yʌjlel ti Tito 2:3-5. Cheʼ jaʼel, jiñi tatʌlob yom miʼ ticʼob yicʼot miʼ tojʼesañob i yalobilob. Jin chaʼan, anquese ili estudio tsaʼ chajpʌnti chaʼan jiñi ancianojob, miʼ coltañonla ti lac pejtelel cheʼ mi laj qʼuel bajcheʼ miʼ mejlel la cʌcʼ wem bʌ ticʼojel muʼ bʌ i «ñuqʼuesʌbeñonla lac pusicʼal» (Pr. 27:9).

4. ¿Chuqui ti cʼajtiya tac mi caj lac jacʼ ti ili estudio?

⁴ Ti ili estudio mi caj lac jacʼ chʌmpʼejl cʼajtiya yom bʌ mi lac chʼʌm ti ñuc cheʼ bʌ mi la cʌcʼ ticʼojel: ¿Chuqui jiñi yom bʌ miʼ ñijcañonla?, ¿i cʼʌjñibalʌch ba?, ¿majqui yom miʼ yʌcʼ? I ¿bajcheʼ miʼ mejlel la cʌcʼ ticʼojel tac muʼ bʌ i coltan yambʌlob?

5. ¿Chucoch miʼ mejlel la cʌl chaʼan tajol mucʼʌch caj i jajqʼuel jiñi ticʼojel mi yicʼotʌch cʼuxbiya miʼ yʌjqʼuel? (1 Corintios 13:4, 7).

⁵ Jiñi ancianojob miʼ cʼuxbiñob i yermañujob. I an i tajol miʼ pʌsob ili cʼuxbiya cheʼ bʌ miʼ ticʼob juntiquil woli bʌ i majlel ti mach bʌ weñic bij (Gál. 6:1). Pero cheʼ bʌ juntiquil anciano mi caj i yʌcʼ ticʼojel, yom miʼ ñaʼtan bajcheʼ tac miʼ mejlel i pʌs cʼuxbiya cheʼ bajcheʼ tsiʼ yʌlʌ jiñi apóstol Pablo: «Jiñi am bʌ i cʼuxbiya yujil pijt yicʼot an i yutslel. […] Mach yʌlʌyic chuqui miʼ yujtel maʼañic miʼ lujbʼan, miʼ laj ñop, miʼ laj pijtan, miʼ laj cuch» (pejcan 1 Corintios 13:4, 7). Cheʼ bʌ jiñi anciano miʼ wen ñaʼtan ili versículo tac mi caj i coltan i qʼuel mi jiñi woli bʌ i ñijcan jiñʌch jiñi cʼuxbiya yicʼot chaʼan wen jach bajcheʼ miʼ yʌcʼ jiñi ticʼojel. Tajol juntiquil lac piʼʌl mucʼʌch caj i jacʼ jiñi ticʼojel mi tsiʼ qʼuele chaʼan woliʼ yʌqʼuentel come mucʼʌch i cʼuxbintel (Rom. 12:10).

6. ¿Chuqui ti wem bʌ ejemplo tsiʼ pʌsʌ Pablo cheʼ bʌ tsiʼ yʌcʼʌ ticʼojel tac?

⁶ Jiñi apóstol Pablo juntiquilʌch wem bʌ ejemplo chaʼan jiñi ancianojob. Jumpʼejl ejemplo, tsaʼʌch i tiqʼui jiñi hermanojob ti Tesalónica cheʼ bʌ i cʼʌjñibalʌch tsiʼ qʼuele. Pero ti jiñi i carta tac tsiʼ ñaxan subeyob chaʼan weñʌch bajcheʼ woliʼ pʌsob i xucʼtʌlel, bajcheʼ woliʼ melob (chaʼleñob) i yeʼtel (troñel) yicʼotob i cʼuxbiya yicʼot bajcheʼ woliʼ cuchob wocol. Cheʼ jaʼel, tsiʼ ñaʼta chuqui tac woliʼ ñusañob, i tiʼ subeyob chaʼan woliʼ cuchob wocol yicʼot ticʼlʌntel (1 Tes. 1:3; 2 Tes. 1:4). I tsaʼto i subeyob chaʼan woliʼ yʌcʼob wem bʌ ejemplo tiʼ tojlel yambʌ xñoptʼañob (1 Tes. 1:8, 9). ¡Wen tijicña tsiʼ yubiyob chaʼan jiñi tsaʼ bʌ subentiyob! Yujilob chaʼan Pablo miʼ wen cʼuxbiñob. Jin chaʼan, jiñi ticʼojel tac tsaʼ bʌ i yʌqʼueyob ti jiñi chaʼpʼejl carta tsaʼʌch i coltayob (1 Tes. 4:1, 3-5, 11; 2 Tes. 3:11, 12).

7. ¿Chucoch an i tajol an maʼañic bʌ miʼ mulañob jumpʼejl ticʼojel?

⁷ Mi mach weñic bajcheʼ mi la cʌcʼ ticʼojel, tajol miʼ mejlel ti ujtel tsaʼ bʌ i yʌlʌ juntiquil anciano: «An maʼañic bʌ miʼ mulañob jiñi ticʼojel, pero mach tiʼ cajic mach weñic, tiʼ caj mach yicʼotic cʼuxbiya miʼ yʌjqʼuel». ¿Chuqui mi laj cʌn? Chaʼan mach wen wocolic ti jajqʼuel jumpʼejl ticʼojel cheʼ mi la cʌcʼ tiʼ caj an laj cʼuxbiya, mach tiʼ cajic michʼonla.

8. ¿Chuqui yom miʼ cʼajtiben i bʌ juntiquil anciano cheʼ bʌ muʼto caj i yʌcʼ ticʼojel?

⁸ Jiñi ancianojob mach ti orajic yom miʼ waʼ acʼob ticʼojel. Juntiquil anciano yom miʼ ñaxan cʼajtiben i bʌ: «¿Cʼʌñʌlʌch ba an chuqui yom mic suben? ¿Cujil ba chaʼan woliʼ mel mach bʌ weñic? ¿Woli ba i ñusan ti pʼis muʼ bʌ i yʌl jiñi Biblia, o woli jach i mel junchajp mach bʌ c meleyic joñon?». Juntiquil anciano  am bʌ i ñaʼtʌbal maʼañic miʼ «bʌcʼ jʌmtech i tʼan» (Pr. 29:20). Mi maxto yujilic chuqui yom miʼ mel, miʼ mejlel ti tʼan yicʼot yambʌ anciano chaʼan miʼ qʼuel mi jiñi hermano woliʼ ñusan ti pʼis muʼ bʌ i yʌl jiñi Biblia i mi yom miʼ yʌqʼuentel ticʼojel (2 Tim. 3:16, 17).

9. ¿Bajcheʼ miʼ mejlel i lajiñob Pablo jiñi ancianojob cheʼ bʌ miʼ yʌcʼob ticʼojel tac chaʼan jiñi lac pislel yicʼot bajcheʼ mi lac chʼʌl lac bʌ? (1 Timoteo 2:9, 10).

⁹ Laʼ laj qʼuel jumpʼejl ejemplo. Laʼ cu lac ñaʼtan chaʼan juntiquil anciano maʼañic miʼ ñoj mulan bajcheʼ miʼ lʌp i pislel o bajcheʼ miʼ chʼʌl i bʌ juntiquil hermano. Miʼ mejlel i cʼajtiben i bʌ: «¿Woli ba i ñusan ti pʼis jumpʼejl principio am bʌ ti Biblia?». Miʼ mejlel i cʼajtiben yambʌ anciano o yambʌ hermano añix bʌ i ñaʼtʌbal bajcheʼ yilal miʼ qʼuel chaʼan mach jin jach miʼ mel chuqui miʼ bajñel ñaʼtan. Miʼ mejlel i comol qʼuelob tsaʼ bʌ i yʌlʌ Pablo chaʼan bajcheʼ yilal yom mi lac lʌp lac pislel yicʼot mi lac chʼʌl lac bʌ (pejcan 1 Timoteo 2:9, 10). Pablo maʼañic tsiʼ yʌcʼʌ jumpʼejl lista chaʼan chuqui tac miʼ mejlel lac mel yicʼot maʼañic bʌ. Tsiʼ yʌcʼʌ principio tac muʼ bʌ i mejlel i coltañonla chaʼan wen jach bajcheʼ mi lac lʌp lac pislel, mach ñumeñic ti pʼis yicʼot mi lac pʌs lac ñaʼtʌbal. Yujil chaʼan jujuntiquil mi caj i ñaʼtan bajcheʼ yilal mi caj i lʌp i pislel yicʼot mi caj i chʼʌl i bʌ, jin jach ñopo maʼañic miʼ ñusan ti pʼis am bʌ ti Biblia. Cheʼ bʌ jiñi ancianojob mi caj i yʌqʼueñob ticʼojel juntiquil hermano, yom miʼ wen qʼuelob mi weñʌch miʼ mel i bʌ yicʼot mi mucʼʌch i pʌs i ñaʼtʌbal.

10. ¿Chuqui mi caj i coltañonla chaʼan mi laj qʼuel ti ñuc muʼ bʌ i ñaʼtan yambʌlob?

¹⁰ Laʼ laj cʼajtesan chaʼan an i tajol mach lajalic chuqui mi caj i melob chaʼtiquil hermanojob añobix bʌ i ñaʼtʌbal. Pero jiñi mach yomic i yʌl chaʼan wen muʼ bʌ i yʌl juntiquil i chaʼan mach weñic jiñi yambʌ. Jin chaʼan mach lac wersa xicʼ jiñi la quermañujob chaʼan miʼ melob chuqui wem bʌ mi laj qʼuel joñonla (Rom. 14:10).

11, 12. ¿Chuqui yom miʼ cʼajtiben i bʌ juntiquil anciano mi yom miʼ yʌjqʼuel ticʼojel, i chucoch?

¹¹ Mi tsiquil chaʼan an majqui yom miʼ yʌqʼuentel ticʼojel, yom miʼ wen qʼuejlel majqui mi caj i yʌcʼ. Jumpʼejl ejemplo, cheʼ bʌ mi caj i yʌqʼuentel ticʼojel juntiquil pecʼto bʌ i jabilel o juntiquil hermana ñujpuñem bʌ, juntiquil anciano yom miʼ ñaxan chaʼlen tʼan yicʼot i jol jiñi familia. Tajol jiñi i jol familia jin yom miʼ yʌcʼ jiñi ticʼojel o yom chaʼan yaʼan cheʼ bʌ jiñi anciano miʼ yʌcʼ jiñi ticʼojel. * O mi juntiquil hermana xchʼocto bʌ, tajol ñumen wen cheʼ juntiquil hermana ñumen añix bʌ i jabilel miʼ yʌcʼ jiñi ticʼojel, cheʼ bajcheʼ tsaʼ ajli ti  párrafo 3.

¹² Yambʌ yom bʌ miʼ cʼajtiben i bʌ jiñi anciano  jiñʌch: «¿Joñon ba yom mi cʼʌc jiñi ticʼojel, o ñumen wen cheʼ yambʌ miʼ yʌcʼ?». Jumpʼejl ejemplo, tajol juntiquil mach bʌ wen añic i cʼʌjñibal miʼ yubin i bʌ ñumen wen miʼ jacʼben i ticʼojel juntiquil anciano añix bʌ ba i yubi i bʌ bajcheʼ jiñi come mi caj i ñumen chʼʌmben i sujm. Pero tiʼ pejtelelobʌch jiñi ancianojob añob tiʼ wenta chaʼan miʼ coltañob jiñi hermanojob chaʼan miʼ melob muʼ bʌ i yʌl jiñi Biblia. Mi an majqui yom miʼ yʌqʼuentel ticʼojel, ñucʌch i cʼʌjñibal miʼ yʌqʼuentel.

13, 14. ¿Chucoch ñuc i cʼʌjñibal cheʼ jiñi ancianojob miʼ ñʌchʼtañob jiñi hermanojob?

¹³Ñʌchʼtan ti wen. Cheʼ bʌ juntiquil anciano woliʼ chajpan i bʌ chaʼan miʼ yʌcʼ ticʼojel, yom miʼ cʼajtiben i bʌ: «¿Cujilʌch ba bajcheʼ yilal an jiñi hermano? ¿Cujil ba chuqui woliʼ ñusan? ¿Woli ba i ñusan wocol tac mach bʌ j cʌñʌyic? ¿Chuqui jiñi ñumen i cʼʌjñibal bʌ i chaʼan ili ora?».

¹⁴ Jiñi principio am bʌ ti Santiago 1:19 miʼ coltan pejtelel muʼ bʌ i yʌcʼob ticʼojel. Santiago tiʼ tsʼijbu: «Yom chajpʌbiletla chaʼan mi laʼ ñʌchʼtan tʼan, pero mach ti orajic yom mi laʼ jacʼ yicʼot mach ti orajic yom mi laʼ michʼan». Juntiquil anciano mach yomic miʼ ñaʼtan chaʼan luʼ yujilix chuqui woliʼ ñusan jiñi muʼ bʌ caj i yʌqʼuen ticʼojel. Proverbios 18:13 miʼ subeñonla: «Jini muʼ bʌ i jacʼ tʼan cheʼ maxto ubibilic i chaʼan miʼ caj ti quisin chaʼan i tontojlel». Ñumen wen cheʼ mi laj cʼajtiben bajcheʼ yilal an yicʼot mi lac ñʌchʼtan. Jiñʌch tsaʼ bʌ i cʌñʌ jiñi anciano tsaʼ bʌ lac taja ti tʼan tiʼ tejchibal ili estudio. Tsiʼ qʼuele chaʼan i wentʌlel tsiʼ mele cʼajtiya tac bajcheʼ «¿Bajcheʼ yilal añet?», «¿bajcheʼ yubil maʼ wubin?», «¿bajcheʼ miʼ mejlel j coltañet?», i mach jiñic jach miʼ waʼ suben jiñi chajpʌbil bʌ i chaʼan. Mi jiñi ancianojob mucʼʌch i ñaʼtañob chuqui woliʼ ñusan jiñi hermanojob, mucʼʌch caj i mejlel i coltañob yicʼot i ñuqʼuesʌbeñob i pusicʼal.

15. ¿Bajcheʼ miʼ mejlel i jacʼob Proverbios 27:23 jiñi ancianojob?

¹⁵Wen cʌñʌ a tʌñʌmeʼ tac. Cheʼ bajcheʼ tsaʼ laj qʼuele tiʼ tejchibal, mi la com chaʼan miʼ taj i wenlel jiñi woli bʌ la cʌqʼuen ticʼojel, mach jasʌlic jach mi lac pejcʌben chaʼpʼej uxpʼejl texto yicʼot mi lac suben chuqui tac yom miʼ mel. Jiñi hermanojob yom miʼ yubiñob chaʼan mucʼʌch lac ñaʼtañob, mucʼʌch lac chʼʌmbeñob i sujm yicʼot chaʼan la comʌch laj coltañob (pejcan Proverbios 27:23). Jiñi ancianojob yom miʼ chaʼleñob wersa chaʼan miʼ sujtelob ti wem bʌ i yamigojob jiñi hermanojob.

16. ¿Chuqui yom miʼ melob jiñi ancianojob chaʼan mucʼʌch i coltan yambʌlob jiñi i ticʼojel?

¹⁶ Jiñi ancianojob mach yomic miʼ yʌcʼob ti ñaʼtʌntel chaʼan jin jach miʼ pejcañob jiñi hermanojob cheʼ bʌ mi caj i yʌqʼueñob ticʼojel tac. Yom miʼ chaʼleñob wersa chaʼan miʼ pejcañob ti bele ora yicʼot miʼ coltañob cheʼ bʌ miʼ ñusañob wocol. Juntiquil anciano miʼ yʌl chaʼan mi mucʼʌch i mejlel iliyi, mi caj i sujtelob ti wem bʌ i yamigojob jiñi hermanojob.  I miʼ bej al: «Cheʼ bajcheʼ jiñi, cheʼ bʌ yom miʼ yʌjqʼuel ticʼojel mach wen wocolic mi caj i yubiñob chaʼan miʼ yʌcʼob». I jiñi muʼ bʌ i tijqʼuel mach wen wocolic mi caj i yubin chaʼan miʼ jacʼ.

17. ¿Baqui ora yom miʼ ñumen pʌsob i pijt yicʼot i cʼuxbiya jiñi ancianojob?

¹⁷Pʌsʌ a pijt yicʼot a cʼuxbiya. Ñumen ñuc i cʼʌjñibal iliyi cheʼ bʌ an majqui mach ti orajic miʼ jacʼ jiñi ticʼojel am bʌ ti Biblia o maʼañic miʼ mulan ti ñaxan. Jiñi ancianojob mach yomic miʼ michʼañob mi tsaʼ ujti iliyi. Yom miʼ lajiñob Jesús, ti jumpʼejl profecía tsaʼ ajli tiʼ tojlel: «Maʼañic mi caj i tʼuchtan jiñi xujlemtiquix bʌ jam yicʼot maʼañic mi caj i yʌp jiñi ñichim tsʼitaʼ jax bʌ i cʼʌcʼal» (Mat. 12:20). Jin chaʼan, jiñi anciano miʼ mejlel i suben Jehová tiʼ yoración chaʼan miʼ coltan i qʼuel jiñi hermano chucoch ñuc i cʼʌjñibal i chaʼan jiñi ticʼojel yicʼot chaʼan miʼ jacʼ. Tajol yomto i yorajlel chaʼan miʼ ñumen ñaʼtan tsaʼ bʌ subenti. Mi jiñi anciano mucʼʌch i pʌs i yutslel yicʼot i cʼuxbiya, jiñi tsaʼ bʌ tijqʼui jin mi caj i chʼʌm ti ñuc jiñi ticʼojel i mach jiñic bajcheʼ tsaʼ aqʼuenti. Pero jiñi ticʼojel yomʌch chucul tiʼ Tʼan Dios tiʼ pejtelel ora.

18. a) ¿Chuqui yom mi laj cʼajtesan cheʼ bʌ mi la cʌcʼ ticʼojel? b) Cheʼ bajcheʼ mi laj qʼuel yaʼ ti foto yicʼot yaʼ ti recuadro, ¿chuqui yom miʼ ñaʼtañob jiñi tatʌlob cheʼ bʌ mi caj i ticʼob i yalobil?

¹⁸Cʌñʌ ti jiñi a sajtemal. Ti lac pejtelel mi lac ñajʌyel, jin chaʼan maʼañic mi caj i mejlel lac luʼ jacʼ tsaʼ bʌ laj cʌñʌ ti ili estudio (Sant. 3:2). Mi caj lac taj lac sajtemal, pero yom mi lac chaʼlen wersa chaʼan mi laj cʌn ti jiñi lac sajtemal tac. Mi jiñi hermanojob miʼ qʼuelob chaʼan mucʼʌch laj cʼuxbiñob, mach wocolic mi caj i yubiñob chaʼan miʼ ñusʌbeñonla cheʼ bʌ mi lac lowob ti lac tʼan o ti lac melbal (chaʼlibal) (Qʼuele jaʼel jiñi recuadro « Junchajp muʼ bʌ i subentelob jiñi tatʌlob»).

19. ¿Bajcheʼ miʼ mejlel lac tijicñesʌben i pusicʼal la quermañujob?

¹⁹ Cheʼ bajcheʼ tsaʼix laj qʼuele, wocolʌch chaʼan mi la cʌcʼ wem bʌ ticʼojel. Luʼ xmulilonla,  jiñi muʼ bʌ i yʌcʼob ticʼojel yicʼot jiñi muʼ bʌ i tijqʼuelob. Jin chaʼan, laʼ laj cʼajtesan jiñi principio tac tsaʼ bʌ laj cʌñʌ ti ili estudio. Jiñi cʼuxbiya jiñʌch yom bʌ miʼ ñijcañonla chaʼan mi la cʌcʼ ticʼojel. Cheʼ jaʼel, laʼ laj qʼuel miʼ cʼʌjñibalʌch jiñi ticʼojel yicʼot majqui yom miʼ yʌcʼ. Laʼ lac mel cʼajtiya tac i laʼ lac wen ñʌchʼtan chaʼan mi lac ñaʼtan bajcheʼ yilal an jiñi yambʌ. Laʼ lac chaʼlen wersa chaʼan mi lac chʼʌmben i sujm bajcheʼ yilal añob. Laʼ lac pʌsben laj cʼuxbiya jiñi hermanojob i laʼ sujticonla ti wem bʌ i yamigojob. La com bʌ jiñʌch: Mi la cʌcʼ ticʼojel tac muʼ bʌ i coltañob yicʼot muʼ bʌ i tijicñesʌbeñob i pusicʼal (Pr. 27:9).