1-2. San wan baala leli fu a poti di ai poti taawan a pasi?

 WANTU yali pasa, tu owluman be go luku wan sisa di á be e kon a komakandaa ala yuu. A owluman di be e teke fesi na a takimakandaa leisi wantu tekisi gi a sisa di e soi saide wi á mu e misi komakandaa. A baala ya be si en enke den sani di a taki be gi a sisa taanga-sikin. Ma di den e gwe, a sisa taigi den taki: ‘Wi á sabi seefi san e miti mi.’ Den baala ya go taki anga a sisa sondee fu akisi en san a den booko-ede fi en. Na a sani ya meke den sani di den taki á gi a sisa taanga-sikin.

² A baala di be teke fesi na a takimakandaa taki: ‘Na a ten de, mi be e si enke a sisa á be teke en fu bigi taki u go taki anga en. Ma te mi pakisei a toli baka, da mi e si taki den tekisi di mi be leisi be bun so na tuu, ma mi á be akisi a sisa fa ai go anga en efuso anga san mi be sa yeepi en.’ A omen sani a baala ya leli fu a sani ya. Nownow a baala ya e holi den fii fu taawan a pakisei te ai poti den a pasi.

3. Sama sa poti taawan a pasi aini a kemeente?

 ³ A den owluman abi a faantiwowtu fu poti taawan a pasi te a de fanowdu. Ma son yuu taa sama aini a kemeente sa du a sani ya tu. Wan baala efuso wan sisa sa poti en mati a pasi te a de fanowdu (Ps. 141:5;  Odo 25:12). Wan gaandi sisa sa gi den yonkuu sisa taanga-sikin, enke fa Titesi 2:3-5 e taki. Boiti dati, mma anga dda mu e poti den pikin fu den a pasi tu. A artikel ya o soi owluman fa den sa poti taawan a pasi te a de fanowdu. Ma a sa yeepi taa sama aini a kemeente tu fu ‘meke taawan piisii’ te den e poti den a pasi.​—Odo 27:9.

4. San wi o luku aini a artikel ya?

⁴ Wi o luku fo akisi aini a artikel ya: (1) Saide u mu e poti taawan a pasi? (2) A de fanowdu fu poti a sama a pasi? (3) Sama mu poti a sama a pasi? (4) San i sa du fu meke a makiliki gi taawan fu aliki i?

5. On ten a o moo makiliki gi wan sama fu aliki te wan owluman e poti en a pasi? (1 Korentesama 13:4, 7)

⁵ Den owluman lobi den baala anga sisa fu den. Wan fasi fa den sa soi taki den lobi den, a te den e poti den a pasi te den si taki den o du wan sani di Yehofa á lobi (Gal. 6:1). Ma fosi wan owluman poti wan sama a pasi, a mu pakisei a sani di Pawlesi be taki. A be taki: ‘Lobi abi pasensi anga bun manii. A abi boo anga ala sani. Ai biibi ala sani, ai howpu ala sani, ai holidoo winsi san e pasa.’ (Leisi 1 Korentesama 13:4, 7.) Efu wan owluman teke ten pakisei a sani ya, a o yeepi en fu poti taawan a pasi a wan fasi di e soi taki a lobi den. Efu a sama di a owluman e poti a pasi e si taki a owluman lobi en, a o moo makiliki gi en fu wooko anga san a owluman taigi en.​—Rom. 12:10.

6. Saide owluman sa waka a Pawlesi baka?

⁶ Owluman aini a ten ya sa waka na apostel Pawlesi baka. Di Pawlesi be mu poti den Kelesten fu Tesalonika a pasi, a á be daaidaai fu du a sani ya. Ma fosi a soi den san den be mu kengi, a gafa den fu a fasi fa den be e wooko taanga, anga a holi di den be e holidoo. A be soi den tu taki a be e fusutan taki a libi be e taanga gi den (1 Tes. 1:3; 2 Tes. 1:4). A taigi den tu taki den taa Kelesten be sa waka a den baka (1 Tes. 1:8, 9). Den be musu piisii di Pawlesi gafa den na a fasi ya. Den be sabi taki Pawlesi be lobi den anga en hii ati. Neen meke a á be taanga gi den fu aliki en di a be poti den a pasi.​—1 Tes. 4:1, 3-5, 11; 2 Tes. 3:11, 12.

7. San sa meke a taanga gi wan sama fu aliki te taawan e poti en a pasi?

⁷ San sa pasa efu u nai luku bun san wi e taki te wi e poti taawan a pasi? Wan owluman di abi ondoofeni taki: ‘Son leisi a ná a sani di i taigi a sama á bun, ma na a fasi fa i taki anga en meke a ná o wani aliki i.’ San a sani ya e leli u? Ai leli u taki te a sama di yu e poti a pasi e si taki i lobi en, a o moo makiliki gi en fu teke a taki fi i. A á mu e fii enke yu ati e weli neen.

8. San wan owluman mu akisi enseefi fosi a poti wan sama a pasi?

⁸ Owluman á mu gaw tumisi fu poti taawan a pasi. Fosi wan owluman poti wan sama a pasi, a mu akisi enseefi taki: ‘A de fanowdu fu mi taki wan sani? Beibel e kuutu a sani di a sama e du tuutuu? Efuso a mi e si en taa fasi?’ Owluman ‘á mu gaw tumisi fu taki san den e denki’ (Odo 29:20). Efu wan owluman á sabi efu a de fanowdu tuutuu fu poti  wan sama a pasi, a sa taki anga wan taa owluman fu luku efu a sama e du wan sani di Beibel e kuutu.​—2 Tim. 3:16, 17.

9. San wi e leli fu Pawlesi te u wani taki anga wan sama fu a fasi fa ai wei koosi? (1 Timotiyesi 2:9, 10)

⁹ Kande wan owluman wani go taki anga wan peleikiman fu a fasi fa ai wei koosi. Fosi a du a sani ya, a mu akisi enseefi taki: ‘Mi o man soi a sama aini Beibel saide a fasi fa ai wei koosi á bun?’ Efu a owluman wani sabi efu a de fanowdu fu go taki anga a sama, a sa akisi wan taa owluman, efuso wan taa peleikiman di abi ondoofeni fa den e si a toli. Baka dati, den sa luku san Pawlesi be taki fu a fasi fa u mu wei koosi. (Leisi 1 Timotiyesi 2:9, 10.) Pawlesi be taki wan Kelesten mu ‘wei koosi a wan lesipeki fasi anga wan fasi di e soi taki a de anga kiinkiin fusutan’. Den koosi di a o wei á mu gi Yehofa polinen. Ma Pawlesi á be taki san u mu wei anga san wi á mu wei, bika a be sabi taki wan Kelesten sa wei san a wani, solanga a nai pasa den weiti fu Beibel. Te wan owluman o luku efu a mu taki anga wan sama fu a toli ya, a mu holi den sani ya a pakisei.

10. San u mu holi a pakisei?

¹⁰ U mu holi a pakisei taki ala sama e du sani taa fasi. Ma a sani ya á wani taki den sani di den e du fowtu. Neen meke a á be o bun fu poti weiti gi den baala anga sisa fu u fu di u wani den du sani enke fa u wani namonamo.​—Rom. 14:10.

11-12. San wan owluman mu akisi enseefi efu a si taki a de fanowdu fu poti wan sama a pasi? Saide a mu akisi enseefi a sani ya?

¹¹ Efi i si enke a de fanowdu fu poti wan sama a pasi, i mu akisi iseefi taki: ‘Sama na a moo bun sama fu taki anga en?’ Efu wan owluman si wan sani a wan sisa di toow efuso wan yonkuuwan, a mu taki anga a osufamii edeman fosi. Kande a osufamii edeman seefi o wani taki anga a sama fi en. * Efuso kande a o wani de na a takimakandaa te a owluman e taki anga a uman efuso a pikin fi en. Enke fa u be luku aini  paragraaf 3, da son yuu a moo bun fu akisi wan sisa di abi ondoofeni fu taki anga wan yonkuu sisa.

¹² Owluman mu holi ete wan sani a pakisei. Efu wan owluman si taki a de fanowdu fu poti wan sama a pasi, a mu akisi enseefi taki: ‘A mi na a moo bun sama fu taki anga a sama? Efuso a be o moo bun fu wan taa sama taki anga en?’  Meke u taki wan peleikiman e fii enke a á bun sai. A o moo makiliki gi en fu aliki te wan owluman di be abi aseefi polobelema go taki anga en. A owluman ya o fusutan a sama moo bun. A o poi taki sani di o gi a sama taanga-sikin. Ma na ala owluman abi a faantiwowtu fu gi sama taanga-sikin, anga fu poti den a pasi te den si taki den e du wan sani di Yehofa á lobi. Neen meke efu den si taki a de fanowdu fu poti wan sama a pasi, den mu meke moiti fu yeepi en.

13-14. Saide owluman mu e aliki bun te den go gi wan baala efuso sisa taanga-sikin?

¹³ I mu de kabakaba fu aliki. Fosi wan owluman poti wan sama a pasi, a mu akisi enseefi taki: ‘San mi sabi fu a baala efuso sisa ya? San a den sani di e miti en? San a abi taanga fanowdu nownow?’

¹⁴ I mu holi a sani di sikiifi a Yakowbesi 1:19 a pakisei te yu e poti sama a pasi. Ai taki: ‘I mu gaw fu aliki, ma yu á mu gaw fu taki. Yu ati á mu e boon gaw tu.’ Kande wan owluman e si enke a sabi ala den sani di e miti a sama, ma a so a de tuutuu? Odo 18:13 e taki: ‘Te wan sama e piki aini wan toli sondee a sabi a fini fi en, a wan don sani ai du. Sen o kisi en.’ Neen meke a be o moo bun fu akisi a sama seefi san a den sani di e miti. Ma te a sama e taki, i mu aliki en bun. Pakisei a owluman di u be taki fi en na a bigin fu a artikel ya. A baala ya be kon fusutan taki a be mu meke moiti fu sabi san e miti a sisa fosi a leisi tekisi gi en. A be sa akisi a sisa taki: ‘Fa ai go anga i?’ ‘Anga san mi be sa yeepi i?’ Te owluman e meke moiti fu sabi san e miti den baala anga sisa, a sani ya o yeepi den fu sabi fa den mu gi den taanga-sikin.

15. Fa owluman sa wooko anga a sani di sikiifi a Odo 27:23?

¹⁵ Meke moiti fu sabi den baala anga sisa bun. Enke fa u be luku na a bigin, da a ná te wan sama e leisi Beibeltekisi gi wan taawan, efuso e taigi en san a mu du, da ai poti en a pasi a wan bun fasi. Ma den baala anga sisa mu man fii taki u lobi den, taki wi e fusutan den, taki u wani yeepi den. (Leisi Odo 27:23.) Neen meke owluman mu meke moiti fu den anga den baala anga sisa toon bun mati.

16. San sa meke a moo makiliki gi owluman fu poti taawan a pasi?

¹⁶ Owluman mu meke moiti fu e taki anga den baala anga sisa ala yuu, a ná te den mu poti den a pasi wawan. Den mu puubei fu sabi san e miti den tu. Wan owluman di abi ondoofeni taki: ‘Te yu e du a sani ya, yu anga den baala anga sisa o toon mati.’ A sani ya o meke a moo makiliki gi i fu poti den a pasi. A o moo  makiliki gi a sama di yu e poti a pasi fu teke a taki fi i tu.

17. Saide owluman mu soi switifasi anga pasensi te den e poti sama a pasi?

¹⁷ Pasensi anga a sama. I mu e taki switi anga en tu. Son sama nai wani aliki te taawan e poti den a pasi. Ma te yu e pasensi anga den, efuso e taki switi anga den, a sani ya sa yeepi den fu kengi. Wan owluman ati á mu e weli te a si taki a sama di ai poti a pasi nai teke a taki fi en. A mu holi a sani di Beibel be taki fu Yesesi a pakisei. A taki: ‘A ná o masi wan kamaluwa di booko. A ná o kii wan faya di e dede’ (Mat. 12:20). Neen meke te wan owluman e begi, a sa akisi Yehofa fu yeepi a sama di den e poti pasi fu fusutan saide a de fanowdu fu wooko anga a sani di den e taigi en. Kande a sama di den e poti a pasi abi ten fanowdu fu pakisei den sani di den taigi en. Te den owluman e soi taki den abi pasensi anga te den e taki switi anga taawan, a sani ya sa yeepi a sama fu teke a taki fu den. Boiti dati, den mu e wooko anga den leli fu Beibel te den e poti den baala anga sisa fu den a pasi.

18. (a) San u mu holi a pakisei te wi e poti taawan a pasi? (b) Te i luku a fowtow di de na a faki, da san a mma anga dda ya e du?

¹⁸ Leli wan sani fu den fowtu di i meke. Wi a sondu sama, neen meke a ná o makiliki fu wooko anga den sani di de aini a artikel ya (Yak. 3:2). Wi o go e meke fowtu, ma te a sani ya pasa u mu puubei fu leli wan sani fu den fowtu di u meke. Efu den baala anga sisa e fii taki u lobi den, a o moo makiliki gi den fu gi u paadon te u taki efuso du wan sani di hati den.​—Luku a faki di den e kai ‘ Sani di mma anga dda mu holi a pakisei’.

19. Fa u sa meke u baala anga sisa piisii te wi e poti den a pasi?

¹⁹ Enke fa u luku, da a á makiliki fu  poti sama a pasi, bika ala wi abi sondu. Efu a de fanowdu fu poti wan sama a pasi, pakisei den sani di u leli aini a artikel ya. I mu poti sama a pasi fu di i lobi den. Luku efu a de fanowdu fu poti a sama a pasi tuutuu. Te i si taki a de fanowdu, i mu luku sama na a moo bun sama fu taki anga en. I mu akisi a sama di yu e poti a pasi san a den sani di e miti en. I mu aliki en te ai taki. Meke moiti fu fusutan fa a sama e denki. Boiti dati, i mu meke moiti fi yu anga en toon mati. Holi a pakisei taki u wani den sama di wi e poti a pasi wooko anga den sani di wi e taigi den, ma u wani den ‘piisii’ tu.​—Odo 27:9.