1-2. On frè aprann kijan pou ba on moun on konsèy, ka ki édé-y fè sa ?

NI KÈLKÈ lanné dè sa, 2 ansyen ay vwè on sè pas i pa té ka vin réinyon dépi déotwa tan. Ansyen-la ki té ka menné ti kozé-la li plizyè vèwsé a Labib ba-y pou montré-y jan sa enpòwtan dè vin réinyon. I té ka pansé kè ti vizit-lasa té ankourajé sè-la. Men lèwgadé, lèwvwè li é lòt ansyen-la té k’ay pati, sè-la di-yo konsa : « Zò pa sav sa an ka viv, zò pa konprann ayen. » Sé frè-la té ba-y plizyè konsèy men avan yo té fè sa, yo pa pozé-y pon kèsyon asi sa i té ka viv. Kifè, pou sè-la, konsèy a yo pa té ka sèvi ayen.

² Lè frè-la ki té ka menné ti kozé-la ka sonjé sa ki rivé jou-lasa, mi sa i ka di : « Odépa, an di-mwen kè sè-la pa ni pon rèkonésans pou sé konsèy-la nou ba-y la. Men aprésa, lè an réfléchi, an rann-mwen kont kè an enn tonbé asi sè-la èvè onpakèt vèwsé. Sé vré an té pran tan chwazi sé vèwsé-lasa, men sa té’é myé si an té chwazi dé bon ti kèsyon kon : “Kijan sa k’ay sé jou-lasa ? Ès nou pé fè on biten pou édé-w ?” » Sa ki rivé frè-lasa aprann-li on biten ki enpòwtan toubònman. Jòdijou, frè-lasa sé on bèwjé ki ka éséyé konprann sa lézòt ka viv é i toujou la pou yo.

3. Adan lasanblé-la, kimoun ki pé ba lézòt konsèy ?

 ³ Antankè bèwjé, fò sé ansyen-la ba frè é sè a yo konsèy lèwvwè sa nésésè. Sé Jéova ki ba-yo rèsponsabilité-lasa. Sé frè é sè la ké ni a ba frè é sè a yo déotwa ti konsèy osi. Pa ègzanp, on frè oben on sè pé sèvi èvè Labib pou ba on zanmi a-y on konsèy (Sòm 141:5 ; Pwov. 25:12). Menmjan-la osi, on sè ki ja ni on ti laj pé ba on sè ki pli jenn ki-y on ti konsèy adan dé domenn kon séla nou ka touvé adan Tit 2:3-5. É nou ka tou konprann, kè fò sé paran-la ba timoun a yo konsèy toutlè é fò-yo korijé-yo pou yo pé sa ni on bon konpòwtasyon. Alò menmsi yo fè awtik-lasa èspésyalman pou sé  ansyen-la, sa ké fè noutout dibyen dè wouvwè kijan nou pé ba lézòt konsèy ki ké itil pou yo é kijan nou pé ba-yo gou suiv sé konsèy-la nou ké ba-yo la. Konsa, ‘tchè a yo ké kontan’ (Pwov. 27:9).

4. Ka nou ké vwè adan awtik-lasa ?

⁴ Adan awtik-lasa, nou ké vwè 4 kèsyon fò-nou pozé-nou lèwvwè nou bizwen ba on moun on konsèy : 1) Ka ki dwètèt pousé-mwen a ba on moun on konsèy ? 2) Ès sa vréman nésésè kè an ba moun-lasa konsèy-lasa ? 3) Kimoun ki pibyen plasé pou bay konsèy-lasa ? 4) Ka an pé fè pou konsèy-lasa pé sa itil pou moun-lasa ?

5. Lè on ansyen ka ba on moun on konsèy, ka i pé fè pou moun-la aksèpté konsèy-la pi fasilman ? (1 Korentyen 13:4, 7).

⁵ On ansyen enmé frè é sè a-y é délè i ka montré lanmou-lasa lèwvwè i ka ba on moun ki ka koumansé pran on mové chimen on konsèy (Gal. 6:1). Men avan ansyen-la ay palé pou moun-lasa, sa té’é byen kè i pran tan réfléchi asi sèwten biten Pòl di anrapò èvè lanmou. « Lanmou ni pasyans é i ni bonté. […] I ka sipòté tout biten, i ka kwè tout biten, i ka èspéré tout biten, i ka andiré tout biten » (li 1 Korentyen 13:4, 7). Lè ansyen-la ké pran tan réfléchi asi sé vèwsé-lasa, sa ké édé-y analizé-y pou vwè ka ki ka pousé-y ba frè a-y oben sè a-y on konsèy. Sa ké édé-y osi palé ba moun-la i bizwen konséyé la èvè onlo lanmou. Si moun-la ka santi kè ansyen-la enmé-y, pétèt i ké aksèpté konsèy-la pi fasilman (Wom. 12:10).

6. Ki bèl ègzanp lapòt Pòl ban-nou ?

⁶ Lapòt Pòl lésé on bèl ègzanp pou sé ansyen-la toubònman. Lè sé frè Tésalonik la té bizwen konsèy, i pa ézité ba-yo konsèy. Men adan sé lèt-la i maké ba yo la, i koumansé pa félisité-yo. I di-yo kè i té ka aprésyé tout travay-la yo té ka fè la grasa fwa a yo é tout sé gwo éfò-la lanmou té ka pousé-yo fè la. I di-yo osi kè i té ka aprésyé andirans a yo. Lapòt Pòl té ka sonjé sitiyasyon a yo, kifè, i rèkonnèt kè sa yo té ka viv pa té fasil é kè yo té ka andiré sé pèwsékisyon-la yo té ka jwenn la èvè onlo kouraj (1 Tés. 1:3 ; 2 Tés. 1:4). I jous di-yo kè yo té on bèl ègzanp pou sélézòt krétyen-la (1 Tés. 1:8, 9). Sèten lèwvwè sé frè Tésalonik la vwè jan Pòl félisité-yo sa dwèt touché tchè a yo ! Pòl té enmé frè a-y toubònman, nou pa ni pon dout asi sa. Sé pousa, adan sé 2 lèt-la i maké ba sé Tésalonisyen-la, i rivé ba-yo konsèy ki té itil pou yo, é sèten sa édé-yo toubònman (1 Tés. 4:1, 3-5, 11 ; 2 Tés. 3:11, 12).

7. Poukwa on moun pé ni dimal a aksèpté on konsèy ?

⁷ Si nou ka ba on moun on konsèy é kè nou pa’a fè sa byen konm i fo, ka ki pé rivé ? Mi sa on frè ki ansyen dépi plizyè lanné ka di : « Dépawfwa, lèwvwè on moun pa ka aksèpté on konsèy sa vé pa di kè konsèy-la pa té bon, men sé paskè moun-la ki bay konsèy-la pa fè sa èvè lanmou. » Ka sa ka aprann-nou ? Lèwvwè yo ka ba on moun on konsèy é kè yo ka fè sa èvè lanmou, moun-la pi fasil a aksèpté konsèy-lasa ki lèwvwè yo ka fè sa tou kòlè.

8. Avan on ansyen gadé pou vwè si fò i ba on moun on konsèy, ki kèsyon pou i pozé-y ?

⁸ Fò pa on ansyen two présé pou ba on moun on konsèy. Avan i fè sa, mi sa pou i mandé-y : « Ès sa vréman nésésè kè an di moun-lasa on biten ? Ès an sèten kè moun-lasa ka fè on biten ki pa bon ? Èskè Labib ka di kè sa i ka fè la pa bon ? Oben èskè sé mwen ki pa ni labitid aji konsa alòskè pa ni  ayen dè mal adan sa ? » On ansyen ki ni sajès ké atann avan i palé (Pwov. 29:20). Si ansyen-la ni on dout, i pé ay vwè ondòt ansyen pou mandé-y si i ka pansé kè sa moun-la ka fè la pa annakò èvè prensip a Labib é si i mérité yo ba-y on konsèy (2 Tim. 3:16, 17).

9. Ka lapòt Pòl ka aprann-nou asi mannyè pou ba on moun on konsèy anrapò èvè istil a-y é jan i ka abiyé ? (1 Timoté 2:9, 10).

⁹ Imajiné kè on ansyen ka pozé-y kèsyon asi mannyè on moun adan lasanblé-la ka abiyé-y. Ka pou i fè ? Mi sa pou i mandé-y : « Ès ni on prensip adan Labib ki ka ankourajé-mwen di moun-lasa on biten ?» On ansyen pé mandé ondòt ansyen oben on pwoklamatè ki byen doubout adan lavérité ka i ka pansé adan on sitiyasyon konsa, olyé i bazé-y asi sa limenm a-y ka pansé. Yo ké pé gadé ansanm déotwa konsèy lapòt Pòl ka bay anrapò èvè mannyè pou nou abiyé-nou é anrapò èvè istil an nou (li 1 Timoté 2:9, 10). Pòl ka bay sé prensip-la men i pa’a bay détay. I ka di kè fò on krétyen abiyé-y byen konm i fo, èvè modèsti é bon jijman. Men i pa’a di ki lenj pou nou mèt asi nou é ki lenj pou nou pa mèt asi nou. I ka rèkonnèt kè chakmoun ni dwa chwazi sa i préféré, dépi sa annakò èvè sa Labib ka di. Kifè, pou sé ansyen-la sav si fò-yo ba on moun on konsèy, fò-yo mandé-yo si sa on moun chwazi mèt asi-y ka montré kè i ni modèsti é bon jijman.

10. Ka pou nou mèt byen fon an tèt an nou lè frè é sè an nou ka pran on désizyon ?

¹⁰ Dépawfwa 2 moun ki byen doubout adan lavérité pé touvé-yo adan menm sitiyasyon-la. Yonn pé pran on désizyon é lòt-la pa oblijé pran menm désizyon-la. Men fò-nou mèt fon an tèt an nou kè sa pa vé di kè yonn ni rézon é kè lòt-la ni tò. Alò, fò pa nou oblijé frè é sè an nou fè, sa nou nou ka pansé ki byen (Wom. 14:10).

11-12. Lèwvwè fò on ansyen ba on moun on konsèy, ka pou i mandé-y é poukwa ?

¹¹ Si nou ka konstaté kè fò-nou ba on moun on konsèy, fò-nou pozé-nou ondòt kèsyon : « Kimoun ki pou ba moun-lasa konsèy-lasa ?» Si konsèy-la sé pou on sè ki mayé oben pou on timoun, préféré ansyen-la palé dè sa èvè chèf a fanmi-la. Konsa si chèf a fanmi-la vé palé dè sa èvè fanmi a-y, i ké pé fè-y limenm a-y *. Pétèt kè chèf a fanmi-la osi ké dakò pou ansyen-la ba madanm a-y oben timoun a-y on konsèy, men i pé mandé ansyen-la pou i la jou-la ansyen-la ka fè sa la. É délè, sa té’é myé si sé on sè ki byen doubout adan lavérité ki ba on jenn sè on konsèy kon nou vwè adan  paragraf 3 la.

¹² Fò on ansyen mandé-y osi : « Ès sé mwen ki pibyen plasé pou ba moun-lasa  konsèy-lasa, oben èskè sa té’é myé si sé té ondòt moun ki té ka ba-y li ? » Pa ègzanp, si on frè ni lenprésyon kè i pa ni onlo valè, pétèt kè sa té’é myé si sé on ansyen ki ja pasé pa la ki k’ay vwè-y pou ba-y on konsèy. Men on biten pou nou pa jen oubliyé, sé kè Jéova ka mandé tout sé ansyen-la ankourajé frè é sè a yo, é i ka mandé-yo ba-yo déotwa ti konsèy lèwvwè sa yo ka fè pa annakò èvè Lézékriti. Sé on rèsponsabilité Jéova ba-yo. Sé pousa, siwvwè on moun mérité on konsèy, sa ki pi enpòwtan a pa moun-la ki ka bay konsèy-la, men sé kè yo ba-y konsèy-lasa.

13-14. Poukwa sa enpòwtan kè on ansyen pran tan kouté frè é sè a-y ?

¹³Fò ou paré pou kouté. Lè on ansyen k’ay ba on moun on konsèy, mi sa pou i mandé-y : « Adan ki sitiyasyon frè an mwen ka touvé-y ? Ka frè-lasa ka viv ? Ès i ka jwenn difikilté é an pa okouran a sa ? Ka i bizwen vréman ? On konsèy oben ondòt biten ? »

¹⁴ Si on moun bizwen ba ondòt moun on konsèy, fò i tchenn kont dè prensip-la nou ka touvé an Jak 1:19. Mi sa i ka di : « Chakmoun dwèt toujou paré pou kouté, dwèt pran tan a-y avan i palé é pa dwèt présé pou fè kòlè. » Pétèt kè on ansyen ka pansé kè i konnèt tout sé enfòwmasyon-la. Men ès sé sa menm ? Mi sa Pwovèb 18:13 ka di : « Lè on moun présé réponn asi on pwoblèm avan i tann sa ki fèt, sa sòt é sé on honté pou-y. » Sé pousa, sa té’é myé si i té k’ay dirèktèman owa moun-lasa pou i pé sa ni tout sé enfòwmasyon-lasa. Sa vé di osi kè fò i pran tan kouté moun-la byen avan i palé. An-nou sonjé frè-la nou palé la an koumansman a awtik-la. Olyé i té tonbé asi sè-la èvè onpakèt vèwsé, pisimé i té mandé sè-la : « Kijan sa k’ay sé jou-lasa ? Ès nou pé fè on biten pou édé-w ? » Si on ansyen ka fè sa ki fo pou ni tout sé enfòwmasyon-la, i ké rivé édé é ankourajé frè é sè a-y pi fasilman.

15. Kijan on ansyen pé suiv prensip-la nou ka touvé an Pwovèb 27:23 ?

¹⁵Fò ou konnèt troupo-la byen. Kon nou vwè an koumansman a awtik-la, pou nou pé sa ba on frè oben on sè on bon ti konsèy, a pa enki li pou nou li déotwa vèwsé ba-y, oben di-y déotwa biten pou i fè. Men fò i santi kè nou enmé-y, kè nou ka konprann sitiyasyon a-y, é kè nou vé édé-y (li Pwovèb 27:23). Fò on ansyen fè tousa i pé pou i bon bon zanmi èvè frè é sè a-y.

16. Pou on moun aksèpté on konsèy pi fasilman, ka pou on ansyen fè ?

¹⁶ On ansyen pa té’é vé kè frè é sè a-y di konsa : « Chakfwa misyé ka vin owa an mwen sé pou ban-mwen on konsèy ! » Alò pou sa pa rivé, fò i pran labitid palé èvè frè é sè a-y, é lè yo ka jwenn difikilté, fò i la pou soutyenn-yo. Mi sa on ansyen ki ni onlo èkspéryans ka di : « Lè ou ka fè sa konsa, ou ka vin pibon zanmi èvè sé frè é sè la, é  jou-la ou ni on konsèy a ba-yo, ou ka fè sa pi fasilman. » É moun-la ou ka bay konsèy-la ké aksèpté-y pi fasilman osi.

17. A ki moman pou on ansyen pran pasyans èvè on moun, é montré-y janti èvè-y ?

¹⁷Fò ou ni pasyans é fò ou janti. Lè on moun ni dimal a aksèpté on konsèy nou ka ba-y, oben kè i ni dimal a mété-y an pratik, sé a moman-lasa pou nou pran pasyans èvè-y é pou nou janti èvè-y osi. On ansyen ki ka touvé-y adan sitiyasyon-lasa ké fè tousa i pé pou i pa fè kòlè. Mi sa Labib té anonsé anrapò èvè Jézi : « I pé’é krazé rozo-la ki ja tou anchèpi la é i pé ké étenn mèch a lanp-la ki toupré étenn » (Mat. 12:20). Kifè, lèwvwè ansyen-la ké priyé Jéova tousèl a-y, i ké pé mandé-y béni moun-la i ba-y konsèy-la é édé-y vwè poukwa i ba-y konsèy-lasa é kijan i pé mété-y an pratik adan vi a-y. Pétèt kè moun-lasa bizwen tibwen tan pou i pé sa réfléchi asi sa ansyen-la di-y la. Si ansyen-la ka pran pasyans èvè-y é si i janti èvè-y, moun-la pé’é gadé jan-la ansyen-la palé ba-y la, men i ké chèché a vwè kijan konsèy-lasa pé itil ba-y. Nou ka tou konprann, kè fò on konsèy toujou bazé asi Pawòl a Bondyé.

18. a) Ki dòt biten pou nou mèt fon an tèt an nou ? b) Asi imaj-la ki k’ay èvè ti karé-la, nou ka vwè on fanmi ki ka fè on ti kozé. Dè kibiten yo ka palé ?

¹⁸Fò sé érè-la ou fè la sèvi-w lèson. Konm nou enpawfè nou pé’é rivé suiv sé konsèy-la nou vwè la adan awtik-lasa on mannyè ki pawfè (Jak 3:2). Noutout ké fè érè, men fò sé érè-lasa sèvi-nou lèson. Anplisdisa, si frè é sè an nou sèten kè nou enmé-yo, pétèt kè yo ké rivé padonné-nou pi fasilman siwvwè nou di on biten oben nou fè on biten ki fè-yo mal. (Gadé ti karé-la «  On ti mo pou sé paran-la ».)

19. Ka nou pé fè pou frè é sè an nou ni tchè-kontan ?

¹⁹ Kon nou vwè-y adan awtik-lasa, pou nou pé sa ba on moun on konsèy ki  ké itil pou-y, a pa on biten ki fasil piskè noumenm an nou enpawfè é moun-la nou ka bay konsèy-la enpawfè osi. Alò, mèt fon an tèt a-w sa nou vwè adan awtik-lasa. Lè ou bizwen ba on moun on konsèy fò ou gadé ka ki ka pousé-w fè sa. Fò ou mandé-w si sa vréman nésésè kè ou ba moun-la konsèy-lasa, é ès sé vou ki pibyen plasé pou palé ba-y. Avan ou ba on moun on konsèy, pozé-y dé ti kèsyon é pran tan kouté-y byen, konsa ou ké konprann pibyen sa i ka viv. Éséyé mété-w anplas a-y pou konprann-li pibyen. Aji èvè dousè é fè ansòt pou vin bon zanmi èvè frè é sè a-w. On biten pou ou pa jen oubliyé, sé kè lè ou ka ba on moun on konsèy, fò sa itil ba-y men fò konsèy-la ou ka ba-y la ‘fè tchè a-y kontan’ osi (Pwov. 27:9).