1, 2. ¿Mbaʼépa oaprende vaʼekue peteĩ ansiáno?

 OJAPO unos kuánto áño mokõi ansiáno ovisita hague peteĩ ermánape, pórke haʼe ofalta mimi vaʼekue oikóvo rreunionhápe. Upe visítape peteĩva umi ansiáno olee chupe unos kuánto téxto ohechaukáva mbaʼérepa iñimportánte jaha rreunionhápe. Opa rire pe visíta pe ansiáno oimoʼã omokyreʼỹ hague pe ermánape. Péro umi ansiáno oho mboyvemi hógagui, pe ermána heʼi chupekuéra: “Peẽ ningo ermáno ndapeikuaaiete hína la che ahasáva”. Umi ansiáno ningo omeʼẽ kuri chupe konsého oporanduʼỹre chupe mbaʼéichapa haʼe oĩ ha mbaʼe mbaʼépa ohasa hína. Upéicha rupi pe ermána opensa ndaideprovechoiha umi konsého oñemeʼẽ vaʼekue chupe.

² Pe ansiáno olee vaʼekue pe ermánape umi téxto, upéi imanduʼa la oiko vaʼekuére ha heʼi: “Upe moméntope aimoʼã kuri pe ermána imalagradesidaha. Péro apensa porãvo la oiko vaʼekuére, ahechakuaa che aleéntema hague chupe umi téxto aporanduʼỹre chupe mbaʼéichapa haʼe oĩ ha mbaʼe mbaʼépa la ohasáva hína”. Upe ansiáno oaprende peteĩ mbaʼe iñimportantetereíva upe oiko vaʼekuégui. Upévare haʼe koʼág̃a imbaʼerechakuaaiterei ha oipytyvõ porãve umi ermánope.

3. ¿Mávapa ikatu omeʼẽ konsého umi ermanokuérape?

 ³ Umi ansiánope ningo prinsipálmente otoka hína omeʼẽ hag̃ua konsého umi ermanokuérape. Péro oimeraẽ oĩva kongregasiónpe ikatúnte avei sapyʼánte oñemoñeʼẽ umi ermáno térã ermanakuérape. Por ehémplo, peteĩ persóna ikatu oipuru la Biblia oñemoñeʼẽ hag̃ua iñamígope (Sal. 141:5; Prov. 25:12). O peteĩ ermána ijedáva ikatu “oakonseha umi kuña imitãvévape”  heʼiháicha Tito 2:3-5. Ha umi tuakuéra katuete avei oñemoñeʼẽ vaʼerã ifamiliakuérape ha okorrehi chupekuéra. Upévare ko artíkulo ojejapóramo jepe espesiálmente umi ansianokuérape g̃uarã, tuichaiterei ikatu ñanepytyvõ enterovépe. Upévare jahecháta mbaʼe mbaʼépa jareko vaʼerã enkuénta ñameʼẽta jave peteĩ konsého, ikatu hag̃uáicha ñaipytyvõ porã ha ñamokyreʼỹ pe persónape (Prov. 27:9).

4. ¿Mbaʼépa jahecháta ko artíkulope?

⁴ Ko artíkulope ñambohováita 4 porandu ñanepytyvõtava ñameʼẽse jave konsého: 1) ¿Mbaʼérepa ñameʼẽse hína upe konsého? 2) ¿Ifáltapa hína añete ñameʼẽ upe konsého? 3) ¿Mávapepa otoka omeʼẽ upe konsého? 4) ¿Mbaʼépa jajapo vaʼerã ikatu hag̃uáicha pe konsého ideprovécho pe persónape?

5. ¿Mbaʼéicha javépa ifasilvéta peteĩ persónape oasepta hag̃ua peteĩ konsého oñemeʼẽva chupe? (1 Corintios 13:4, 7).

⁵ Umi ansiáno ningo ohayhueterei umi ermáno ha ermanakuérape. Ha sapyʼánte ohechauka upéva oñemoñeʼẽ jave peteĩ ermánope oñepyrũva hína oho tape vaíre (Gál. 6:1). Péro oñeʼẽ mboyve upe ermáno térã ermánandi, pe ansiáno oreko vaʼerã enkuénta la heʼi vaʼekue apóstol Pablo: “Pe oporohayhúva ipasiénsia ha imbaʼeporã, [...] oaguanta entéro mbaʼe, osegi oguerovia entéro mbaʼe, siémpre oreko esperánsa ha ni mbaʼevéicharõ noñentregái” (elee 1 Corintios 13:4, 7). Pe ansiáno ojepyʼamongetáramo la heʼívare ko téxto, upéva oipytyvõta chupe oñemoñeʼẽ hag̃ua pe ermánope ohayhúgui chupe. Ha pe ermáno térã ermána oñandúramo pe ansiáno rreálmente ojepyʼapyha hese, ifasilvéta chupe oasepta hag̃ua pe konsého (Rom. 12:10).

6. ¿Mbaʼérepa ikatu jaʼe apóstol Pablo oheja hague peteĩ ehémplo iporãitereíva?

⁶ Apóstol Pablo ningo oheja vaʼekue peteĩ ehémplo iporãitereíva. Por ehémplo tekotevẽrõ guare oñemoñeʼẽ umi ermáno oĩvape kongregasión de Tesalónicape, haʼe ndodudái vaʼekue ojapo hag̃ua upéva. Péro upe mboyve haʼe oguerohory vaʼekue chupekuéra, pórke haʼekuéra iguapoiterei ha osegi vaʼekue oaguanta. Haʼe oreko avei enkuénta la isituasionkuéra, ha orrekonose ijetuʼu hague anga hendivekuéra oĩ rupi opersegíva chupekuéra (1 Tes. 1:3; 2 Tes. 1:4). Haʼe oguerohory voi umi ermánope ha heʼi chupekuéra omoĩha hína hikuái ehémplo enterove kristiánope g̃uarã (1 Tes. 1:8, 9). ¿Mbaʼéichapa oñeñandúne raʼe koʼã ermáno oleérõ guare umi mbaʼe heʼíva apóstol Pablo? ¡Katuete ningo ovyʼaitereíne raʼe hikuái! Umi ikárta rupive ningo apóstol Pablo ohechauka vaʼekue ohayhuetereiha chupekuéra. Upévare ifásil vaʼekue umi ermánope oasepta hag̃ua umi konsého apóstol Pablo omeʼẽ vaʼekue chupekuéra umi mokõi ikártape (1 Tes. 4:1, 3-5, 11; 2 Tes. 3:11, 12).

7. ¿Mbaʼérepa algúno ikatu ojagarra vai pe konsého ñameʼẽva chupe?

⁷ ¿Mbaʼépa ikatu oiko nañameʼẽporãiramo peteĩ konsého? Peteĩ ansiáno iñexperiénsiava heʼi: “Algúno ikatu ojagarra vai pe konsého ñameʼẽva chupe, ndahaʼéi oĩ vaígui pe konsého síno ndajajapói rupi upéva mborayhúpe”. ¿Mbaʼépa ñanemboʼe la heʼi vaʼekue ko ansiáno? Ñameʼẽ jave peteĩ konsého ndajaʼevaiguasúi vaʼerã, síno jajapo vaʼerã upéva mborayhúpe, upéicha ifasilvéta pe persónape oasepta hag̃ua upéva.

8. ¿Mbaʼe mbaʼépa ikatu oñeporandu peteĩ ansiáno oakonseha mboyve peteĩ ermánope?

⁸ Umi ansiáno ningo ndojapurái vaʼerã omeʼẽ hag̃ua peteĩ konsého. Ojapo mboyve upéva, iporãta ojepyʼamongetáramo koʼã mbaʼére: “¿Ifáltapa hína añete ameʼẽ ko konsého? ¿Aĩpa segúro pe persóna ojavy hague? ¿Ojapópa raʼe pe ermáno algúna kósa la Biblia heʼíva oĩ vaiha,  térãpa chénte apensa diferénte hína chugui?”. Umi ansiáno iñarandu rupi ndahaʼéi “opoi rei reínteva ijurúgui” (Prov. 29:20). Upéicharõ, ¿mbaʼépa ikatu ojapo peteĩ ansiáno ndoikuaaporãirõ tekotevẽpa oakonseha peteĩ ermáno térã ermánape? Ikatu oñemboja ótro ansiánore ha ohecha hikuái oñondive oimépa pe ermáno ojapo raʼe peteĩ mbaʼe oñemoĩva la Biblia heʼívare, ha oimépa oñeakonsehámante vaʼerã chupe (2 Tim. 3:16, 17).

9. Heʼi haguéicha apóstol Pablo, ¿mbaʼépa oreko vaʼerã enkuénta umi ansiáno tekotevẽramo oakonseha peteĩ ermánope oñemonde lájare? (1 Timoteo 2:9, 10).

⁹ Ñamoĩmína peteĩ ehémplo. Ñamoĩ chupe peteĩ ansiánope ndogustaiha mbaʼéichapa oñemonde peteĩ ermáno térã ermána, péicha jave pe ansiáno ikatu oñeporandu: “¿Mbaʼére che apensa oĩ vaiha la oñemonde lája ko ermáno térã ermána?”. Pe ansiáno ningo ndoovligaséi iñermánope opensa hag̃ua haʼéicha, upéicha rupi ikatu oporandu ótro ansiánope térã peteĩ ermáno iñexperiénsiavape mbaʼépa haʼe opensa. Péicha oñondive ikatúta oanalisa pe konsého apóstol Pablo omeʼẽ vaʼekue ko témare (elee 1 Timoteo 2:9, 10). Apóstol Pablo oakonsehárõ guare umi kristiánope mbaʼéichapa oñemonde vaʼerã, heʼínte vaʼekue chupekuéra oñemonde porã vaʼerãha, iñakãguapy vaʼerãha ha nomondéi vaʼerãha álgo omotĩtava Jehovápe. Péro ndeʼíri vaʼekue chupekuéra espesífikamente mbaʼépa omonde vaʼerã ha mbaʼépa nahániri. Haʼe oikuaa vaʼekue káda ermáno ha ermána igústo diferenteha ha ikatuha omonde omondeséva noñemoĩrima guive la Biblia heʼívare. Upévare oiméramo pe ermáno térã ermána oñemonde lája ndohói hína la Biblia heʼíva kóntrape, posívlemente natekotevẽmoʼãi umi ansiáno oñemoñeʼẽ chupe ko témare.

10. ¿Mbaʼépa ñanepytyvõta jarrespeta hag̃ua la odesidíva umi ótro?

¹⁰ Ñarrekonose vaʼerã káda kristiáno ikatuha oelehi diferénte mbaʼe ha lomímonte mokõivéva oĩ porãta. Ndovaléi ñande jaovliga ñane ermanokuérape opensa hag̃ua ñandéicha (Rom. 14:10).

11, 12. ¿Mbaʼe mbaʼépa oñeporandu vaʼerã peteĩ ansiáno omeʼẽta jave peteĩ konsého, ha mbaʼérepa?

¹¹ Ikatu hína peteĩ ansiáno ohechakuaa oñemeʼẽmante vaʼerãha peteĩ konsého, péro ¿mávapepa otoka upéva? Por ehémplo omeʼẽséramo konsého peteĩ menór de edápe, posívlemente iporãvéta oñeʼẽ raẽramo ituakuérandi. Térã omeʼẽséramo konsého peteĩ ermánape, okonvenivéta oñemongeta raẽramo iménandi. Péicha haʼekueraite voi ikatu hína oñenkarga upe témare, térã ojerure pe ansiánope oĩ hag̃ua pépe oñemeʼẽ jave pe konsého. * Ha jahecha haguéicha  párrafo 3-pe, sapyʼánte iporãvéta peteĩ ermána ijedávante oñemoñeʼẽramo peteĩ ermána imitãvape.

 ¹² Pe ansiáno oreko vaʼerã avei enkuénta ótra kósa, ha upearã ikatu oñeporandu: “¿Iporãvétapa ótronte omeʼẽramo upe konsého ikatu hag̃uáicha pe ermáno ojagarra porãve?”. Por ehémplo, peteĩ ermáno térã ermána oñedeprimíva ikatu hína ojagarra porãve upe konsého oñemoñeʼẽramo chupe peteĩ ansiáno ohasa vaʼekue avei la mísma kósa. Pe ansiáno ikatúta hína ontende porãve chupe ha heʼi umi mbaʼe og̃uahẽ hag̃uáicha ikorasõme. Péro amo ipahápe enterove ansiáno oreko hína la rresponsavilida oipytyvõvo umi ermanokuérape okambia hag̃ua pe tekotevẽhápe. Upévare ifálta jave oñemeʼẽ peteĩ konsého algún ermánope, iñimportanteterei hína ojejapo upéva pe ansiáno ndohasáiramo jepe la mísma kósa ohasáva pe ermáno.

13, 14. ¿Mbaʼérepa iñimportantete umi ansiáno ohendukuaa?

¹³ Pehendukuaákena. Peteĩ ansiáno omeʼẽta jave peteĩ konsého oñeporandu vaʼerã koʼã mbaʼe: “¿Mbaʼe mbaʼépa ohasa hína ko che ermáno? ¿Serápa ohasa hína algúna kósa che ndaikuaáiva? ¿Mbaʼépa ikatu ajapo hesehápe koʼag̃aite?”.

¹⁴ Umi omeʼẽtava peteĩ konsého oreko vaʼerã enkuénta la heʼíva Santiago 1:19. Upépe heʼi: “Enterovéva oĩ vaʼerã preparádo ohendu hag̃ua, péro ndojapurái vaʼerã oñeʼẽ ha ipochy hag̃ua”. Pe ansiáno ikatu hína oimoʼã oikuaa porãha pe ermáno situasión, ¿péro siértopa hína upéva? Proverbios 18:13 heʼi: “Peteĩ persóna orrespondérõ álgo ohendu porã mboyve la oikóva, ohechauka itavyha ha katuete oñemotĩta”. Upévare iporãvétante oporandúramo pe ermánope mbaʼetekópa oho hese. Ha upearã ohendúmante vaʼerã chupe. Ñanemanduʼamína la ohasa vaʼekue pe ansiáno ñañeʼẽ hague oñepyrũvo ko artíkulo. Haʼe ohechakuaa oleéntema rangue pe ermánape umi téxto bíblico oprepara vaʼekue, iporãvéta hague oporandúramo chupe: “¿Mbaʼe mbaʼépa rehasa hína che ermána? ¿Mbaʼéichapa ikatu roipytyvõmi?”. Umi ansiáno ojapóramo upéva ha oñemotiémporamo ohecha hag̃ua mbaʼe mbaʼépa ohasa hína umi ermáno, ikatúta omokyreʼỹ ha oipytyvõ porãve chupekuéra.

15. ¿Mbaʼéichapa umi ansiáno ikatu osegi pe konsého oĩva Proverbios 27:23-pe?

¹⁵ Peikuaa porãkena umi ermanokuérape. Jaʼéma haguéicha, ñameʼẽ peteĩ konsého ndeʼiséi jahatanteha jalee pe ermánope unos kuánto téxto térã ñameʼẽ chupe uno térã dos suherénsia. Umi ermáno ningo oñandu vaʼerã jajepyʼapyha hesekuéra, ñantendeha chupekuéra ha ñaipytyvõseha chupekuéra (elee Proverbios 27:23). Upéicha rupi umi ansiáno oñehaʼãmbaite vaʼerã oñamiga umi ermáno ha ermanakuérare.

16. ¿Mbaʼépa oipytyvõta umi ansiánope omeʼẽ hag̃ua umi konsého ideprovéchotava?

¹⁶ Umi ansiáno ningo ndoipotái umi ermanokuéra opensa haʼekuéra oñembojaha hendapekuéra oñemoñeʼẽ hag̃uánte chupekuéra. Upévare, umi ansiáno pyʼỹinte oñemongeta kyreʼỹ umi ermanokuérandi ha ohechauka  ojepyʼapyha hesekuéra iprovléma jave hikuái. Peteĩ ansiáno iñexperiénsiava heʼi: “Nde rejapóramo upéva, reñamigáta umi ermanokuérare ha upéi ifálta mbaʼéramo emeʼẽ chupekuéra algún konsého ifasilvétama ndéve ejapo hag̃ua upéva”. Ha avei umi ermánope ifasilvéta oasepta hag̃ua upe konsého.

17. ¿Mbaʼéicha javépa umi ansiáno koʼýte ipasiénsia ha imbaʼeporã vaʼerã?

¹⁷ Penepasiénsia ha penembaʼeporãkena. Umi ansiáno ningo koʼýte tekotevẽ ipasiénsia ha imbaʼeporã oiméramo peteĩ ermánope ijetuʼu oasepta hag̃ua peteĩ konsého oñemeʼẽ vaʼekue chupe. Haʼekuéra ndaipochýi vaʼerã ndojesegipyaʼéiramo la konsého haʼekuéra omeʼẽ vaʼekue. Péicha osegíta hína hikuái Jesús ehémplo, pórke la Biblia heʼi vaʼekue hese: “Haʼe nomopẽmoʼãi ni peteĩ takuarílla opẽ mbotáva ha nomboguemoʼãi ni peteĩ lámpara ogue potáva” (Mat. 12:20). Upévare pe ansiáno oñemboʼe jave haʼeñoháme, iporãta ojeruréramo Jehovápe oipytyvõmi hag̃ua pe ermánope osegi hag̃ua pe konsého. Ikatu oime pe ermáno oikotevẽnte hína tiémpo opensa porã hag̃ua pe konsého oñemeʼẽ vaʼekuére chupe. Ha oiméramo pe ansiáno ipasiénsia ha imbaʼeporã hendive, ifasilvéta chupe osegi hag̃ua pe konsého. Péro jaʼéma haguéicha umi konsého oñeguenohẽ vaʼerã Ñandejára Ñeʼẽgui.

18. a) ¿Mbaʼe rehepa ñanemanduʼa vaʼerã ñameʼẽta jave peteĩ konsého? b) Ohechaukaháicha pe fóto oĩva pe rrekuádrope g̃uarã, ¿mbaʼe rehepa oñeʼẽ hína umi tuakuéra?

¹⁸ Peaprende umi pende fallakuéragui. Ñaneimperfékto rupi, katuete ijetuʼútante voi ñandéve jasegi porãmbaite hag̃ua umi konsého oñemeʼẽva ñandéve ko artíkulope (Sant. 3:2). Katuete ningo jajavýtante voi, péro ñañehaʼã vaʼerã ñaaprende umi ñande fallakuéragui. Umi ñane ermáno ha ermanakuéra oñandúramo ñande jahayhuha chupekuéra, ifasilvéta ñaneperdona hag̃ua jajapo o jaʼe mbaʼéramo algúna kósa omoñeñandu vaíva chupekuéra (ehecha avei pe rrekuádro “ Peteĩ konsého tuakuérape g̃uarã”).

19. ¿Mbaʼe mbaʼépa jajapo vaʼerã ñamokyreʼỹ hag̃ua ñane ermanokuérape?

¹⁹ Jahecháma haguéicha, ijetuʼu ningo hína ñameʼẽ hag̃ua peteĩ konsého. ¿Mbaʼérepa? Pórke  ñande voi ñaneimperfékto ha upéichante avei pe persóna ñaakonsehátava. Upévare ñañemoñeʼẽta jave peteĩ ermánope, ñañehaʼãkena siémpre jareko enkuénta umi konsého jahecha vaʼekue ko artíkulope. Jajasegura vaʼerã ñameʼẽha pe konsého jahayhúgui pe ermánope. Jahecha vaʼerã avei tekotevẽpa añete hína ñameʼẽ upe konsého, ha jahecha ñandévepa otoka hína jajapo upéva. Ñameʼẽ mboyve peteĩ konsého, ñaporandu vaʼerã pe ermánope mbaʼe mbaʼépa ohasa hína, jajapysaka porã hese ha ñañehaʼã ñantende la ohasáva. Ha avei ñaneamávle vaʼerã ha ñañehaʼã ñañamiga ñane ermáno ha ermanakuérare. Ñanemanduʼa vaʼerã siémpre mbaʼépa la jahupytyséva: Ñande ningo jaipota pe konsého ideprovécho chupe, péro jaipota avei ojagarra porã upéva ha tomokyreʼỹ chupe (Prov. 27:9).