1-2. Sisiba henia karana dekenai tadikaka ese dahaka mai anina bada gauna ta ia dibaia?

 LAGANI momo gunanai, elda rua ese hebou ia reaia momo taihu ta idia vadivadi henia. Elda ta ese hebou lao karana ena siri haida ia duahia. Ia laloa unai vadivadi karana ese taihu ia hagoadaia, to ia bona ena turana idia ura lao neganai, taihu ia gwau, “Umui be egu hekwakwanai umui lalopararalaia lasi.” Unai tadikaka rua be taihu dekenai edia sisiba hereva idia gwauraia, to ia idia nanadaia lasi dahaka hekwakwanai ia davaria noho. Unai dainai, idia henia sisiba ese taihu ia durua lasi.

² Unai taihu dekenai siri haida ia duahia elda ia gwau: “Unai negai, lau laloa taihu be ai ia matauraia lasi. To lau laloa lou neganai, lau laloparara lau be siri maorodia lau gaukaralaia to henanadai maorodia lau henia lasi, hegeregere, ‘Emu mauri ai dahaka ia vara noho?’ ‘Edena dala ai oi lau durua diba?’” Unai elda be ia vara gauna amo mai anina bada gauna ta ia dibaia. Hari, ia be mamoe naria tauna namona, bona ma haida edia hemami ia laloa bada.

3. Kongrigeisen lalonai daika ese sisiba ia henia diba?

 ³ Elda be mamoe naria taudia dainai, idia be mai edia maoro sisiba idia henia totona. To, nega haida kongrigeisen dekenai ma haida be sisiba idia henia diba. Hegeregere, tadikaka ta eiava taihu ta be Baibel ena hakaua herevadia amo ena turana ia sisiba henia diba. (Sal. 141:5; Aon. 25:12) Eiava Tito 2:3-5 ena hereva hegeregerena, mauri lagani bada taihu ese “hahine matamatadia do idia sisiba henia.” Bona nega momo tama sina ese edia natudia idia sisiba henia  bona hamaoromaoroa be namo. Ena be inai atikol be elda taudia totona, to ita ibounai ia durua danu, unai amo sisiba ita henia neganai ta ita hagoadaia bona ena ‘kudouna ita hamoalea’ diba.​—Aon. 27:9.

4. Inai atikol ai dahaka do ita herevalaia?

⁴ Inai atikol ai, sisiba ita henia totona henanadai 4 do ita herevalaia: (1) Dahaka badina maorona dekenai sisiba oi henia? (2) Sisiba oi henia be namo, a? (3) Daika ese sisiba ia henia be namo? (4) Edena dala ai sisiba namona oi henia diba?

5. Bema elda taudia be lalokau dalanai sisiba idia henia, dahaka do ia vara? (1 Korinto 13:4, 7)

⁵ Elda taudia be edia tadikaka bona taihu idia lalokau henia. Nega haida, sisiba idia henia bema idia itaia ta be dala kererena ia badinaia noho. (Gal. 6:1) To elda ese unai tauna ia do hereva henia lasi neganai, aposetolo Paulo ese ia herevalaia lalokau amo idia vara karadia haida ia laloa be namo. Ia gwau: “Lalokau be ia haheauka bona ia hebogahisi. . . . Lalokau be gau ibounai dekenai ia gini goada, gau ibounai ia abidadama henia, gau ibounai lalonai ia be mai ena helaro, bona gau ibounai ia haheaukalaia.” (1 Korinto 13:4, 7 duahia.) Elda taudia be unai Baibel siri idia laloa dobu neganai, unai ese idia ia durua lalokau dalanai sisiba idia henia totona. Bema sisiba ia abia tauna ia mamia elda taudia be ia idia laloa bada, sisiba do ia abia dae.​—Roma 12:10.

6. Aposetolo Paulo be dahaka haheitalai namona ia hahedinaraia?

⁶ Aposetolo Paulo be elda taudia dekenai haheitalai namona ia hahedinaraia. Hegeregere, ia itaia Tesalonika tadikaka ese sisiba idia abia be namo, unai dainai idia ia sisiba henia. Bona ena revareva lalonai, idia ia hanamoa badina mai abidadama ida gaukara idia karaia bona idia haheauka. Danu edia noho dalana ia laloa, bona idia ia hamaoroa edia mauri be auka bona hekwakwanai badadia idia haheaukalaia noho. (1 Tes. 1:3; 2 Tes. 1:4) Idia ia hamaoroa Keristani taudia ma haida dekenai idia be haheitalai namona. (1 Tes. 1:8, 9) Paulo ena hanamoa herevadia idia kamonai neganai idia moale bada! Unai ese ia hamomokania Paulo be ena tadikaka ia lalokau henia bada. Unai dainai ena revareva rua amo Tesalonika taudia ia hagoadaia bada.​—1 Tes. 4:1, 3-5, 11; 2 Tes. 3:11, 12.

7. Dahaka dainai haida be sisiba idia abia dae lasi?

⁷ Bema dala maorona ai sisiba ita henia lasi dahaka do ia vara? Lagani momo elda gaukara ia karaia tadikaka ta ia gwau, “Ena be sisiba hereva maorodia ita henia, to bema lalokau dalanai ita henia lasi, unai sisiba do idia abia dae lasi.” Unai amo dahaka ita dibaia? Bema lalokau dalanai ta ita sisiba henia, do ia auka lasi sisiba ia abia dae totona.

8. Elda ia ura ta ia sisiba henia neganai, edena henanadai ia laloa be namo?

⁸ Elda taudia ese sisiba idia henia haraga lasi be namo. Elda ta be sisiba ia do henia lasi neganai, sibona ia nanadaia: ‘Ia lau hereva henia be namo, a? Lau diba momokani ia karaia noho karana be kerere, a? Baibel ena taravatu ia utua, a? Eiava egu lalohadai be iena amo ia idau, a?’ Elda taudia idia “hereva haraga” lasi be aonega karana. (Aon. 29:20) Bema elda ta ia ura tadikaka o taihu ta ia sisiba henia, namona be elda ma ta ia nanadaia bema ia  laloa unai tadikaka o taihu be Baibel ena taravatu ia utua noho bona sisiba ia abia be namo.​—2 Tim. 3:16, 17.

9. Dabua bona huina sitaelo dekenai ta ita sisiba henia totona, Paulo amo dahaka ita dibaia? (1 Timoteo 2:9, 10)

⁹ Haheitalai ta ita laloa. Reana elda ta be tadikaka o taihu ena dabua hahedokilaia dalana eiava huina ena sitaelo dekenai ia laloa momo. Namona be elda be sibona ia nanadaia, ‘Ia lau durua totona edena Baibel siri maorona do lau gaukaralaia?’ Unai elda ia ura lasi ia sibona ena lalohadai ia gwauraia dainai, ia be elda ma ta o lo Keristani tauna ta ena lalohadai ia abia. Idia ruaosi be Paulo ena sisiba dabua bona huina sitaelo dekenai idia herevalaia. (1 Timoteo 2:9, 10 duahia.) Paulo ese Baibel ena hakaua herevadia ia gwauraia, unai amo ia hahedinaraia Keristani tauna ese hemataurai dalanai ena dabua ia hahedokilaia bona Iehova ena ladana ia hadikaia lasi be namo. To Paulo be taravatu ia atoa lasi ta ese edena bamona dabua ia hahedokilaia totona. Ia laloparara Keristani taudia be mai edia maoro dahaka dabua idia karaia totona, to gau badana be Baibel ena hereva idia badinaia. Unai dainai elda taudia ese ta be sisiba do ia abia eiava lasi idia lalohadailaia neganai, namona be idia itaia bema ia abia hidi gaudia amo hemataurai bona laloa maoromaoro karana ia hahedinaraia.

10. Ma haida edia abia hidi dekenai dahaka ita laloatao be namo?

¹⁰ Namona be ita laloparara Keristani tauna ese ia karaia abia hidi be ma ta amo ia idau, to unai ese ia hahedinaraia lasi ta be maoro bona ma ta be kerere. Namo lasi idia ita doria iseda lalohadai maoro bona kerere dekenai idia badinaia totona.​—Roma 14:10.

11-12. Bema elda ta be badina maorona dainai ta do ia sisiba henia, dahaka henanadai ia laloa, bona dahaka dainai?

¹¹ Bema badina maorona dainai oi ura ta oi sisiba henia, henanadai ma ta be inai, Daika ese sisiba ia henia be namo? Elda tauna be headava taihu o natuna ia do sisiba henia lasi neganai, ruma bese kwarana ia hereva henia, unai amo do ia diba bema ruma bese kwarana ia ura sibona ese unai hekwakwanai ia hamaoromaoroa. * Eiava elda ese sisiba ia henia neganai, ruma bese kwarana do ia helai danu. Bona  paragraf 3 ese ia herevalaia bamona, reana nega haida lo taihu ese matamata taihu ia sisiba henia be namo.

¹² Elda ese gau ma ta ia laloa danu be namo. Ia sibona ia nanadaia diba, ‘Lau be mai egu maoro ia lau sisiba henia, eiava ma  ta ese do ia sisiba henia, a? Hegeregere, bema ta ia laloa ia be anina lasi, reana guna unai bamona hemami ia abia elda ta ese ia sisiba henia be namo, unai amo do ia auka lasi elda ena heduru ia abia dae totona. Reana elda be unai tauna ena hemami do ia lalopararalaia bona ia herevalaia gaudia ese ia do ia durua. To elda taudia ibounai edia maduna be, edia tadikaka bona taihu idia hagoadaia Baibel ena hakaua herevadia idia badinaia totona. Oibe, ta be heduru ia ura neganai, mai anina bada gauna be elda taudia ese sisiba idia henia.

13-14. Dahaka dainai elda ia kamonai namonamo be mai anina bada?

¹³ Oi kamonai namonamo. Bema elda be ta sisiba henia totona ia hegaegae neganai, namona be sibona ia nanadaia: ‘Egu tadikaka ena noho dalana lau diba namonamo, a? Ena mauri lalonai dahaka ia vara noho? Ia be hekwakwanai ia davaria noho bona unai lau diba lasi, a? Dahaka heduru ia abia be namo?’

¹⁴ Iamesi 1:19 ena hakaua herevana be sisiba idia henia taudia totona. Iamesi ia gwau: “Taunimanima ibounai be do idia kamonai haraga, to do idia hereva haraga lasi, bona do idia badu haraga lasi.” Reana elda tauna do ia laloa ta dekenai idia vara gaudia ibounai ia diba, to unai be momokani, a? Aonega Herevadia 18:13 ese ita ia hadibaia: “Bema tau ta be sivarai ia kamonai lasi, to ia haere haraga, ia be kavakava bona do ia hemarai.” Namona be elda ese unai tauna ia nanadaia sivarai ibounai ia gwauraia totona. Bona elda ia kamonai namonamo be namo. Paragraf 1 bona 2 ai elda ta be ia dibaia gauna ia herevalaia karana ita laloatao be namo. Ia laloparara ia hegaegaelaia herevadia ia do gwauraia lasi neganai, taihu dekenai henanadai haida ia henia guna be namo, hegeregere: “Emu mauri be edena bamona?” “Edena dala ai oi lau durua diba?” Bema elda taudia be nega idia atoa ta dekenai idia vara gaudia ibounai idia diba namonamo, idia ese edia tadikaka bona taihu do idia durua bona hagoadaia.

15. Edena dala ai elda taudia ese Aonega Herevadia 27:23 ena hakaua herevana idia badinaia diba?

¹⁵ Mamoe oreana oi diba namonamo. Matamanai ita herevalaia bamona, sisiba namona ita henia totona siri haida ita duahia eiava heduru herevadia ita gwauraia sibona be hegeregere lasi. Namona be iseda tadikaka bona taihu idia mamia idia ita laloa bada, edia hemami ita lalopararalaia, bona mai ura ida idia ita durua. (Aonega Herevadia 27:23 duahia.) Namona be elda taudia idia hekwarahi edia hetura karana tadikaka taihu ida idia hagoadaia totona.

16. Dahaka ese elda taudia do ia durua sisiba namona idia henia totona?

¹⁶ Elda tauna ia ura lasi ena tadikaka  bona taihu do idia laloa, ia be sisiba ia henia negana sibona ai idia ia hereva henia. To, hanaihanai ena tadikaka taihu ida ia herevahereva bona hekwakwanai negadia ai ia hahedinaraia idia ia laloa bada. Elda ta ia gwau: “Bema unai bamona oi karaia, idia ida emu hetura karana oi hagoadaia diba. Unai amo do ia auka lasi idia oi sisiba henia totona.” Bona sisiba ia abia tauna ese unai do ia abia dae haraga.

17. Edena negai elda tauna be haheauka bona hebogahisi karana ia hahedinaraia be namo?

¹⁷ Oi haheauka bona hebogahisi. Ta be Baibel ena sisiba herevana ia abia dae lasi neganai, haheauka bona hebogahisi karana be mai anina bada. Bema ta ese elda ena sisiba ia abia dae o badinaia haraga lasi, elda tauna ia haheauka be namo. Baibel ese Iesu be inai bamona ia gwauraia: “Ia ese siriho manokana do ia makohia lasi bona lamepa ena wiki mai ena kwalahu do ia habodoa lasi.” (Mat. 12:20) Elda tauna be sibona ia guriguri neganai, Iehova ia noia sisiba ia abia tauna ia durua unai amo sisiba ena badina ia lalopararalaia bona ia badinaia. Reana sisiba ia abia tadikaka be ia kamonai herevadia do ia lalohadailaia guna. Bema elda be haheauka bona hebogahisi karana ia hahedinaraia, do ia auka lasi tadikaka ese sisiba herevadia ia kamonai totona. Oibe, nega ibounai sisiba idia henia neganai, Dirava ena Hereva idia gaukaralaia be namo.

18. (a) Sisiba ita henia neganai, dahaka ita laloatao be namo? (b) Lau bona maua ese ia hahedinaraia bamona, tama sina be dahaka idia herevalaia?

¹⁸ Oi karaia kerere amo diba abia. Ita be goevadae lasi taudia dainai, inai atikol ena hakaua herevadia ibounai ita badinaia namonamo diba lasi. (Iam. 3:2) Ita kerere diba, to unai amo diba ita abia be namo. Bema tadikaka taihu idia mamia idia ita lalokau henia, iseda hereva bona kara amo idia ita hahisia neganai, do ia auka lasi iseda dika idia gwauatao totona.​—Maua itaia danu: “ Hereva ta Tama Sina Totona.”

19. Edena dala ai iseda tadikaka taihu ita hamoalea diba?

¹⁹ Ita herevalaia bamona, nega haida ia auka sisiba namona ita henia totona. Ita ibounai be goevadae lasi, bona ita sisiba henia taudia danu. Inai atikol ai ita herevalaia hakaua herevadia ita laloatao. Namona be badina maorona dainai sisiba ita henia. Danu, ita itaia namonamo bema ta ese sisiba ia abia be namo, bona ita be mai eda maoro sisiba do ita henia eiava. Sisiba ita do henia lasi neganai henanadai ita gaukaralaia bona ita kamonai namonamo, unai amo ta ena hekwakwanai ita lalopararalaia diba. Iena lalohadai ita diba be namo. Tadikaka taihu ita kara namo henia bona idia ida iseda hetura karana ita hagoadaia. Inai tahua gauna ita laloatao: Ita ura iseda sisiba herevadia be ta ia durua sibona lasi to ena “kudouna ia hamoalea” danu.​—Aon. 27:9.