1-2. Nama utai ke dipelajar seiku tuai gempuru pasal meri jaku lalau?

 DUA iku tuai gempuru nemuai ngagai seiku menyadi indu ke udah lama nadai datai ngagai gempuru. Seiku ari tuai gempuru nya nunjukka beberapa iti ayat Bup Kudus ngagai menyadi indu nya bekaul enggau datai begempuru. Tuai gempuru nya ngumbai pengawa datai meransang nya udah mujur. Tang lebuh dua iku tuai gempuru nya deka mupuk, menyadi indu nya madah: “Seduai enda nemu utai ke ditapi aku.” Dua iku tuai gempuru tu meri jaku lalau, tang seduai iya enda nguji meretika penanggul ke ditapi menyadi indu nya. Ketegal nya, menyadi indu nya ngasaika jaku lalau seduai iya enda ulih nulung iya.

² Lebuh tuai gempuru ke ngayanka ayat Bup Kudus nya ngenang baru, iya madah: “Maya nya, aku ngumbai menyadi indu nya enda bebasaka kami. Tang lebuh aku berundingka nya baru, aku sedar, maya nya aku semina datai enggau ayat Bup Kudus. Tang kebendar iya aku patut nanya menyadi indu nya, ‘Nama utai ke benung nyadi ba pengidup nuan?’ ‘Baka ni kami ulih nulung nuan?’” Utai ke nyadi tu ngajar tuai gempuru nya pasal chara meri jaku lalau. Kemayaharitu, iya udah nyadi seiku tuai gempuru ke siru sereta sedia nulung bala menyadi.

3. Sapa ke ulih meri jaku lalau?

 ³ Tuai gempuru bisi tanggung pengawa meri jaku lalau ba maya ti patut. Tang bisi maya iya, orang bukai ba eklisia mega ulih meri jaku lalau. Ambika chunto, seiku menyadi Kristian  engka meri jaku lalau ari Bup Kudus ngagai kaban iya. (Mas. 141:5; J-lam. 25:12) Tauka seiku menyadi indu ke tuai agi engka ‘matih indu ke agi biak’ pasal pekara ti dipadah ba Titus 2:3-5. Lalu, bala apai indai patut ngajar sereta ngemetulka bala anak sida. Taja pan artikel tu dituju ngagai bala tuai gempuru, tang semua kitai tau bulih penguntung. Kitai deka beratika baru baka ni kitai ulih meri jaku lalau ti senang dititihka, meransang sereta ulih ‘ngasuh ati lantang agi.’—J-lam. 27:9.

4. Nama deka dikerandauka kitai ba artikel tu?

⁴ Ba artikel tu, kitai deka berandauka empat iti tanya bekaul enggau meri jaku lalau: (1) Nama tuju ti betul meri jaku lalau? (2) Patut jaku lalau nya diberi? (3) Sapa ke patut meri jaku lalau? (4) Baka ni nuan ulih meri jaku lalau ti amat ulih nulung orang?

5. Nama kebuah bala menyadi senang agi nerima jaku lalau ari tuai gempuru enti iya meri nya enggau pengerindu? (1 Korint 13:4, 7)

⁵ Bala tuai gempuru sayauka bala menyadi Kristian sida. Sida ngayanka penyayau nya lebuh sida meri jaku lalau ngagai menyadi ke nyauka ngereja penyalah. (Gal. 6:1) Tang sebedau berandau enggau orang nya, tuai gempuru patut berundingka sekeda utai ke dipadah Paul pasal pengerindu. Ku Paul: “Pengerindu nya liat ati, nelap, . . . Pengerindu natka semua utai, arapka semua utai, ngadang semua utai, tan dalam semua utai.” (Bacha 1 Korint 13:4, 7.) Lebuh tuai gempuru nya belematika pasal ayat Bup Kudus tu, iya ulih nentuka jaku lalau ke diberi iya datai ari pengerindu. Enti orang ke nerima jaku lalau nya ngasaika pengibuh tuai gempuru nya ngagai iya, tu ulih nulung iya senang agi nerima jaku lalau nya.—Rom. 12:10.

6. Baka ni rasul Paul meri jaku lalau, lalu nama kebuah iya teladan ti manah?

⁶ Rasul Paul netapka teladan ti manah ngagai bala tuai gempuru. Ambika chunto, Paul meri jaku lalau ngagai bala menyadi ba Tesalonika lebuh sida begunaka nya. Tang ba surat iya, terubah iya Paul muji sida. Iya nyebut pasal pengawa sida ke ngayanka pengarap sida, pengerindu sida sereta ati ti tan ke diayanka sida. Iya mega berundingka pasal pengidup sida. Iya madahka iya nemu pengidup sida enda senang, lalu sida mega benung natka kena perinsa. (1 Tes. 1:3; 2 Tes. 1:4) Iya mega madahka bala menyadi tu teladan ti manah ke menyadi Kristian ke bukai. (1 Tes. 1:8, 9) Naka meh pengaga ati sida lebuh sida nerima jaku puji ari Paul! Kitai nemu Paul tentu sayauka bala menyadi Kristian nya. Nya alai, iya ulih meri jaku lalau ke senang dititihka ba dua iti surat iya ngagai bala menyadi Kristian ba Tesalonika.—1 Tes. 4:1, 3-5, 11; 2 Tes. 3:11, 12.

7. Ni maya jaku lalau tusah deka diterima?

⁷ Nama ulih nyadi enti kitai enda meri jaku lalau enggau chara ti manah? Seiku tuai gempuru ke bepeneleba madahka, “Sekeda menyadi tusah deka nerima jaku lalau. Tu ukai ketegal jaku lalau nya enda manah, tang ketegal chara jaku lalau nya diberi enggau enda bepengerindu.” Nama ulih dipelajarka kitai ari tu? Jaku lalau senang agi diterima lebuh diberi enggau pengerindu.

8. Nama utai ke patut diperundingka tuai gempuru sebedau meri jaku lalau?

⁸ Tuai gempuru enda patut beguai-guai meri jaku lalau. Iya patut nanya diri empu dulu: ‘Kati aku patut meri jaku lalau? Kati orang nya amat ngereja penyalah? Kati iya amat ngelanggar ajar Bup Kudus, tauka iya  semina ngereja utai lain ari chara aku ngereja utai?’ Bala tuai gempuru nyeliahka ari “bejaku enggau enda berunding.” (J-lam. 29:20) Enti tuai gempuru nya kakang ati sekalika iya patut meri jaku lalau, iya ulih nanya runding seiku agi tuai gempuru. Seduai iya ulih berandau kena nentuka menyadi nya amat bisi ngereja penyalah, lalu patut diberi jaku lalau tauka enda.—2 Tim. 3:16, 17.

9. Nama utai ke ulih dipelajarka kitai ari chara Paul meri jaku lalau pasal begari sereta ngintu diri? (1 Timoti 2:9, 10)

⁹ Semaka jaku, bisi seiku tuai gempuru irau pasal chara seiku menyadi Kristian begari tauka ngintu diri. Tuai gempuru nya tau nanya diri empu, ‘Kati chara menyadi tu begari tauka ngintu diri ngelanggar prinsip Bup Kudus?’ Laban tuai gempuru nya enggai meri jaku lalau ari penemu diri empu, iya engka nanya runding tuai gempuru ke bukai tauka menyadi Kristian ke tegap ba pengarap pasal pekara tu. Sida ulih sama begulai berandauka jaku lalau Paul bekaul enggau chara begari sereta ngintu diri. (Bacha 1 Timoti 2:9, 10.) Paul bisi nyebut sekeda prinsip, lalu madahka orang Kristian patut begari enggau penumbas iya sereta menyana. Tang Paul nadai ngaga atur pasal utai ke ulih tauka enda ulih dikena orang Kristian. Iya nemu bala menyadi Kristian ulih ngena gari ke dipilih sida seagi-agi nya enda ngelanggar utai ke dipadah Bup Kudus. Nya alai, kena nentuka enti iya patut meri jaku lalau, tuai gempuru nya patut berundingka sekalika menyadi nya ngena gari ti penumbas iya sereta menyana.

10. Nama patut dikingatka kitai bekaul enggau pemutus ke digaga menyadi Kristian ke bukai?

¹⁰ Dua iku menyadi Kristian ke tegap ba pengarap engka ngaga pemutus ti enda sama. Tang utai ke dipilih seduai iya sama enda salah. Nya alai, kitai enda patut mejal bala menyadi Kristian nitihka standard kitai bekaul enggau utai ti betul enggau salah.—Rom. 14:10.

11-12. Enti tuai gempuru patut meri jaku lalau, nama tanya ke tau diperundingka iya, lalu nama kebuah?

¹¹ Pengudah nentuka jaku lalau nya patut diberi, tuai gempuru ulih berundingka tanya tu, ‘Sapa ke patut meri jaku lalau nya?’ Sebedau meri jaku lalau ngagai menyadi indu ke udah kawin tauka ngagai seiku nembiak, tuai gempuru tau berandau enggau tuai bilik sida dulu. Tuai bilik nya engka deka meri jaku lalau nya kediri empu. * Tauka iya ulih minta ngambika sama enggau lebuh tuai gempuru meri jaku lalau. Lalu baka ke disebut ba  genteran 3, kekadang manah agi enti menyadi Kristian indu ke tuai agi meri jaku lalau ngagai menyadi indu ke biak.

 ¹² Nama utai bukai ke ulih diperundingka tuai gempuru? Iya tau nanya diri empu, ‘Kati aku orang ke chun meri jaku lalau tu, tauka jaku lalau tu senang agi diterima enti diberi menyadi bukai?’ Ambika chunto, seiku menyadi Kristian engka ngasaika amat tusah deka andalka diri empu. Iya engka senang agi nerima jaku lalau ari tuai gempuru ke kala ngasaika utai ti sama. Tuai gempuru ke kala napi nya engka senang agi meretika asai ati menyadi nya. Lalu iya nemu chara ti ngena ngambika ulih meransang menyadi nya. Taja pia, semua tuai gempuru bisi tanggung pengawa meransang bala menyadi Kristian ngaga ubah nitihka prinsip Bup Kudus. Nya alai iya ke pemadu penting, jaku lalau enda tau enda diberi, enda ngira tuai gempuru nya kala napi utai ti sama enggau menyadi nya tauka enda.

13-14. Nama kebuah tuai gempuru patut mending enggau manah?

¹³ Sedia deka mending. Lebuh seiku tuai gempuru deka meri jaku lalau, iya patut nanya diri empu: ‘Nama utai ke ditemu aku pasal situasi menyadi nya? Nama utai ke benung nyadi ba pengidup iya? Kati iya benung napi penanggul ke enda ditemu aku? Nama utai ke amat diguna iya diatu?’

¹⁴ Prinsip ba James 1:19 tau dititihka sida ke deka meri jaku lalau. James nulis: “Genap iku orang enda tau enda jampat mending, lubah mansutka jaku, lubah ringat.” Seiku tuai gempuru engka ngumbai diri udah bisi semua fakta, tang kati nya amat? Jaku Dalam 18:13 ngingatka kitai: “Enti nuan enda mending dulu, nuan beli sereta enda nemu bebasaka orang.” Nya alai, manah agi enti tuai gempuru nanya dulu menyadi nya pasal situasi ke benung ditapi iya. Tuai gempuru enda tau enda mending dulu sebedau iya mansutka jaku. Kingatka meh utai ke dipelajar seiku tuai gempuru ke dipadah ba pun artikel tu. Iya sedar, ari ke berengkah berandau ngena penerang ke udah disediaka iya, iya patut nanya menyadi indu nya dulu: “Nama utai ke benung nyadi ba pengidup nuan?” “Baka ni kami ulih nulung nuan?” Enti bala tuai gempuru ngena awak kena nemu situasi menyadi nya, sida senang agi deka meri bantu sereta meransang bala menyadi Kristian sida.

15. Baka ni bala tuai gempuru ulih nitihka prinsip ba Jaku Dalam 27:23?

¹⁵ Kelala meh raban bedus. Baka ke dipadah ba pun tadi, semina macha sekeda ayat Bup Kudus tauka madahka utai ke patut digaga enda chukup. Bala menyadi Kristian patut ngasaika pengibuh kitai. Sida patut nemu kitai meretika sida lalu deka nulung sida. (Bacha Jaku Dalam 27:23.) Bala tuai gempuru patut enggau naka ulih ngemansangka kaul ti rapat enggau bala menyadi Kristian.

16. Nama ulih nulung bala tuai gempuru meri jaku lalau ti manah?

¹⁶ Bala tuai gempuru tentu enggai ngasuh  bala menyadi ngumbai sida semina deka berandau lebuh deka meri jaku lalau. Tang, sida suah agi meri awak berandau enggau bala menyadi Kristian lalu nunjukka pengibuh lebuh bala menyadi napi penanggul. Seiku tuai gempuru ke bepeneleba madahka, “Enti nuan ngereja nya, nuan bisi kaul ti manah enggau sida. Lalu lebuh nuan patut meri jaku lalau, nuan deka senang agi ngereja nya.” Pia mega, orang ke dilalau nya deka senang agi nerima jaku lalau.

17. Ni maya seiku tuai gempuru patut lebih agi sabar sereta siru?

¹⁷ Sabar sereta siru. Tuai gempuru patut sabar sereta siru kelebih agi lebuh seseiku orang terubah iya nulak jaku lalau. Seiku tuai gempuru enda patut ringat enti menyadi Kristian enggai nerima tauka enggai nitihka jaku lalau tekala nya. Bekaul enggau utai tu, Bup Kudus madah pasal Jesus: “Iya enggai matahka buluh ti pechah, tauka madamka kelita ti kelap-kelap.” (Mat. 12:20) Nya alai lebuh besampi kediri, tuai gempuru nya ulih minta Jehovah nulung menyadi ke begunaka jaku lalau nya, ngambika iya ulih meretika kebuah jaku lalau nya diberi sereta kebuah iya patut nitihka lalau nya. Menyadi ke nerima jaku lalau engka begunaka awak kena berundingka utai ke disebut tuai gempuru. Enti tuai gempuru meri jaku lalau enggau sabar sereta siru, menyadi ke dilalau nya senang agi deka nerima jaku lalau. Tang kingatka meh, jaku lalau ke diberi patut seruran bepelasarka Bup Kudus.

18. (a) Nama utai ke patut dikingatka kitai lebuh meri jaku lalau? (b) Nitihka gambar ba atas enggau penerang ba kutak, nama utai ti dikerandauka apai indai nya?

¹⁸ Belajar meh ari penyalah nuan. Seagi-agi kitai enda sempurna, kitai tentu enda ulih nitihka semua utai ke dipadah ba artikel tu enggau sempurna. (Jas. 3:2) Semua kitai enda ulih rari ari ngereja penyalah. Tang, lebuh nya nyadi, kitai enggau naka ulih belajar ari penyalah ke digaga kitai. Enti bala menyadi ulih ngasaika kitai sayauka sida, sida tentu deka senang agi ngampunka kitai enti jaku tauka ulah kitai bisi ngemediska ati sida.—Peda mega kutak “ Pesan ngagai Apai Indai.”

19. Baka ni kitai ulih ngasuh ati bala menyadi Kristian lantang?

¹⁹ Baka ke udah dipelajarka kitai, kitai enda senang deka meri jaku lalau ti manah. Kitai enda sempurna. Pia mega, orang ke nerima jaku lalau nya enda sempurna. Kingatka meh utai ke udah dipelajarka kitai ari artikel tu. Tentuka nuan bisi tuju ti betul lebuh meri jaku lalau. Tentuka mega enti jaku lalau nya patut diberi tauka enda. Lalu enti jaku lalau nya patut diberi, perundingka sapa ke patut meri jaku lalau. Sebedau meri jaku lalau, tanya meh dulu situasi iya lalu mendingka enggau manah. Uji meretika runding iya. Nuan enda tau enda mentas lalu ngemansangka kaul ti rapat enggau bala menyadi Kristian. Kingatka, juluk ati kitai ukai semina deka meri jaku lalau ti manah aja, tang mega deka ngasuh ati bala menyadi Kristian lantang agi.—J-lam. 27:9.