1-2. Anni i nagigiammu na brother meyannung ta panabarang?

ARU dagun ngana i nappasa, binisita na dua nga elder i tadday nga sister nga namippiga ngana nga ari nakistudy. Nangibibbig i elder nga nangirollu tatun nga pash-shepherding tu teksto ira meyannung ta importansia na pakistudy. Abbo na nga napagaram i sister tatun. Ngem turi ta manaw ngana ira, kinagi na sister, “Ari nu ammu nu anni i pappasa-pasakku.” Nanabarang i brother ira ngem ariadda niyavu nu kumusta yayya onu nu anni i problema na. Megafu tatun, ari nga natageno na sister nga nakoffun nisa i tabarang da.

² Kinagi na elder nga nangirollu tatun nga pabbisita: “Nu manono ku uli i nesimmu, abbo ku nga awan tu pangappresia na sister. Ngem turi ta pinannonopakku yatun, na-realize ku nga nibibbig ku i mepangngo ira nga teksto ngem ariakku niyavu i mepangngo ira nga pakkiavu, kagitta na ‘Kumusta ka ngana?’ ‘Anni i meyuffukku?’” Nakagigiammu i elder tatun nga nesimmu. Sangawe, mas minangnguffun ngana yayya anna mas ammu na ngana i makipattageno.

3. Sinni ira i awayya na nga manabarang ta unag na kongregasion?

 ³ Bilang pastor, responsibilidad na elder ira i manabarang nu kawagan. Ngem egga gapa ira i situasion nga awayya na tanakuan nga wawwaragi i manabarang. Angngarigan na, awayya nga usan na tadday nga brother onu sister i Biblia tapenu tabarangngan i kofun na. (Sal. 141:5; Prov. 25:12) Awayya  gapa nga ‘tudduan’ onu tabarangngan na mas manakam nga sister i mas abbing nga babbay meyannung ta gannug ira nga nakagi ta Tito 2:3-5. Siempre, mawag gapa nga tabarangngan anna itunung na magana ira i ána da. Maski gafu nu nakafokus yaw nga artikulo ta elder ira ta kongregasion, mabenefisiowan ittam ngamin ta paggigiammu nu kunnasi ittam makeyawa tu praktikal anna makapagaram nga tabarang nga “mamagayayya ta futu.”​—Prov. 27:9.

4. Anni i magigiammu tam taw nga artikulo?

⁴ Magigiammu tam taw nga artikulo i appa nga pakkiavu nga ikonsidera tam nige tam nga manabarang: (1) Anni i fustu nga motibo ta panabarang? (2) Talaga kari nga kawagan i tabarang? (3) Sinni i mepangngo nga manabarang? (4) Kunnasi tam makeyawa tu makoffun nga tabarang?

5. Anni i resulta na nu fustu i motibo anna meddu i panabarang na elder? (1 Corinto 13:4, 7)

⁵ Iddeddukan na elder ira i wawwaragi. Nu karuan, ipasingadda i aya da gukaban na panabarang ta tadday nige na paga nga makaliwa. (Gal. 6:1) Ngem nige nga manabarang i elder, makasta nu ikonsidera na i kinagi ira ni apostol Pablo meyannung ta aya. “I aya ay pappasensia anna pagallo. . . . I aya ay pagattam ta anni laman; yaya i pammakatalo, pagiddanama, anna pappasensia nga awan tu panuppalan na.” (Bibbigan i 1 Corinto 13:4, 7.) Makoffun ta elder i monag nga pannono tatun nga teksto tapenu fustu i motibo na anna meddu i panabarang na. Nu matageno na tadday nga ikavurungan yayya na elder, siguradu nga alawatan na i tabarang.​—Roma 12:10.

6. Ngatta makasta nga ammarigan si apostol Pablo?

⁶ Makasta nga ammarigan nga elder si apostol Pablo. Angngarigan na, turi ta kawagan na wawwaragi ta Tesalonica i tabarang, ari yayya nabbabang nga nanabarang. Ngem ta tura na ira ta nira, inappresia na labbi i kinamatalo, lallappo, anna pagattattam da. Ninono na gapa i situasiodda. Ammu na nga mariga i paddia-paddiadda anna matalo lagapa ira maski nu mapeppersigi. (1 Tes. 1:3; 2 Tes. 1:4) Kinagi na paga lagu nga makasta ira nga ehemplo ta tanakuan nga Cristiano. (1 Tes. 1:8, 9) Siguradu nga nagayayya ira tatun nga makapagaram nga komendasion ni Pablo! Talaga iddeddukan ni Pablo i wawwaragi yatutta nakeyawa yayya tu makoffun nga tabarang ta tura na ira ta taga-Tesalonica.​—1 Tes. 4:1, 3-5, 11; 2 Tes. 3:11, 12.

7. Anni i posible nga rason nu ngatta ari nga ginnan na tadday i tabarang?

⁷ Anni i posible nga mesimmu nu ari tu meddu i panabarang tam? Kinagi na tadday nga ekspiriensadu nga elder, “Ari nga magginna i karuan ta tabarang megafu ta ari nga meddu i nikatabarang da, ari nga megafu ta mali i tabarang.” Anni i magigiammu tam tatun? Mas mabi nga alawatan i tabarang nu aya i motibo ta panabarang, ari tu gafu ta lussaw.

8. Anni nakuan i iyavu na elder ta baggi na nige na nga manabarang?

⁸ Ari nakuan nga gaggavva nga manabarang i elder ira. Nige da manabarang, mawag nga iyavu da: ‘Mawag kari talaga nga manabarang ngà? Siguradu ngà kari nga mali i kukukuan na wagi? Egga kari i arian na natuttul nga prinsipio na Biblia? Onu baka tanakuan laman i kukukuan na ta kayà ku nga mesimmu?’ Magimmugug nakuan i elder  ira ta panabaradda. Ari nakuan ira nga “gavva-gavva ta paguvovug” da. (Prov. 29:20) Nu ari nga siguradu i elder nu kawagan na nga tabarangngan i tadday, makasta nu paguvovugadda na tanakuan nga elder nu egga i ari natuttul nga prinsipio na Biblia.​—2 Tim. 3:16, 17.

9. Anni i magigiammu tam kani Pablo ta panabarang meyannung ta assissinnun anna itchura? (1 Timoteo 2:9, 10)

⁹ Ikonsidera yaw nga angngarigan. Mavurung i tadday nga elder ta assissinnun onu itchura na tadday nga wagi. Awayya nga iyavu na elder ta baggi na, ‘Base ta prinsipio na Biblia, mawag na kari i matabarangngan?’ Tapenu ari maddesision i elder base ta opinion na lagapa, makasta nu makkiavu yayya ta tanakuan nga elder onu ta manakam nga wagi tapus awayya da ikonsidera i tabarang ni Pablo meyannung ta assissinnun anna itchura. (Bibbigan i 1 Timoteo 2:9, 10.) Kinagi ni Pablo i makoffun nga prinsipio nga mawag tu mepangngo i assissinnun na Cristiano anna ari nakuan mepasiranan si Jehova. Ngem ari nga espesipiko nga nilista ni Pablo nu anni ira i puede onu ari puede nga passinnun na Cristiano. Ammu na nga egga lagapa i kepangngattan na kada Cristiano nga mappili tu kayà na nga sinnun basta matuttul na lagapa i prinsipio na Biblia. Tapenu madesision gafu na elder ira nu kawagan i tabarang, makasta nu ikonsidera da nu mepangngo anna makedayaw kani Jehova i assissinnun na tadday.

10. Anni nakuan i daddammattam meyannung ta personal nga pappili?

¹⁰ Daddammattam nga maski nu parefu nga manakam ta espiritual i dua nga Cristiano, awayya na nga makkaduma i piliadda. Ngem arian na kayà kagian nga fustu i tadday anna mali i tadday nira. Ari tam nakuan ipilit ta kapangngurug tam i personal nga opinion tam nu anni i fustu anna nu anni i mali.​—Roma 14:10.

11-12. Nu kawagan i tabarang, anni ira i mawag nga iyavu na elder ta baggi na, anna ngatta?

¹¹ Nu manawag nga talaga kawagan i tabarang, sinni gafu i mepangngo nga manabarang? Nige nga manabarang i tadday nga elder tu natawan nga sister onu menor-de-edad, mawag nga makkonsulta labbi yayya ta ulu na familia. Posible gare nga mas kayà na ulu na familia nga yayya ngana laman i manabarang. * Onu baka kayà na nga presente yayya nu manabarang i elder. Gitta na nakagi ta  parapo 3, egga gapa ira i situasion nga mas mepangngo nu manakam nga sister i manabarang ta mas abbing nga sister.

¹² Egga paga i mawag nga ikonsidera na elder  nu manabarang yayya. Awayya na nga iyavu, ‘Sakan kari i mepangngo nga manabarang onu baka mas makasta nga tanakuan?’ Angngarigan na, i tadday nga wagi nga alalinno i paningan na ta baggi na ay baka mas magginna ta tabarang na elder nga kunnatun gapa i nappasan na. Mas nga mantindian gare na elder nga nakaekspiriensa tu kunnatun i panageno na wagi anna posible nga alistu laman nga alawatan na wagi i tabarang na. Ngem siempre, responsibilidad na ngamin nga elder nga pagaramman i wawwaragi nga kuan i kawagan ira nga panguli tapenu matuttul da i prinsipio na Biblia. Maski gafu nu ari nga naekspiriensa na elder i naekspiriensa na wagi, importante lagapa nga matabarangngan i wagi.

13-14. Ngatta importante nga magginna i tadday nga elder?

¹³Sigga-paran nga magginna. Ta papprepara na elder nga manabarang, makasta nu iyavu na: ‘Anni i ammù ta situasion na wagi? Anni i mesissimmu ta pattolena? Egga kari i problema na nga ariakku ammu? Anni i pinakakawagan na nga uffun sangawe?’

¹⁴ Makoffun ta manabarang ira i prinsipio ta Santiago 1:19. Kinagi ni Santiago: “Mawag tu sigga-parak-kamu nga magginna, memmugug ta paguvovug, anna ari insigida nga mallussaw.” Baka abbo na elder nga ammu na ngana i ngamin nga detalye, ngem talaga kari nga kunnatun? Kagian na Proverbio 18:13: “Nu insigida nga tubbag i tadday nige na maginna i detalye ira, kolapa anna kappasirang yatun.” Mas makasta nga ammuan na i detalye ira ta tolay mismu. Makua na yatun nu magginna labbi yayya nige na nga mabbida. Daddammattam i nagigiammu na elder ta nappollu ira nga parapo taw nga artikulo. Nagigiammu na nga imbes tu igafu na i pabbisita ta pangikagi ta niprepara na ira nga teksto, makasta nu niyavu na nakuan labbi ta sister: “Kumusta ka ngana?” “Anni i meyuffukku?” Nu mappursigi i elder ira nga ammuan i situasion na wawwaragi, mas nga moffunan anna mapagaram da ira.

15. Kunnasi nga meyaplika na elder ira i prinsipio ta Proverbio 27:23?

¹⁵Ammuan i wawwaragi. Kagitta na nakagi ta gafu, makeyawa ittam tu makoffun nga tabarang nu ari tam laman nga basta mangibibbig tu teksto onu makkagi tu suhestion. Mawag nga matageno na wawwaragi tam nga ikavurungattam ira, mantindiattam ira, anna kayà tam ira nga uffunan. (Bibbigan i Proverbio 27:23.) Mawag nga kuan na elder ira i ngamin nga mawayya da tapenu mabbalin tu madukko nga kofudda i wawwaragi.

16. Kunnasi nga makeyawa i elder ira tu makoffun nga tabarang?

¹⁶ Manaki na elder ira nga nonopan na wawwaragi nga kibbidadda laman ira nu manabarang ira. Yari tu kanayun nakuan nga  makistoria i elder ira ta wawwaragi anna ipasingadda nga ikavurungadda ira nu egga ira i problema da. “Nu kuammu yatun,” kunna tadday nga ekspiriensadu nga elder, “mabbalikka tu kofudda. Tapus sonu mawag nga tabarangngammu ira, mabi ngana laman nga kuan yatun.” Mas mabi da gapa nga alawatan i tabarang.

17. Ta anni nga situasion nga mawag nga mapasensia anna masippo i tadday nga elder?

¹⁷Mabbalin tu mapasensia anna masippo. Makoffun i pappasensia anna kinasippo mas ngana nu ta gafu ay pinammanakitan na tadday i nebase-Biblia nga tabarang. Ari nakuan mofu i pasensia na tadday nga elder nu ari insigida nga gininna onu inalawa na wagi i tabarang na. Kinagi na Biblia meyannung kani Jesus: “Danuri i makafi nga kunna sikal nga napedda, tuange turi ta awan tu iddanama nga kunna makuro nga lampara, ay arian na noka ira nga mas parigatan.” (Mat. 12:20) Ta personal gafu nga pakimallo na elder, awayya na nga ikiddaw nga uffunan nakuan ni Jehova i wagi tapenu mantindian na i rason nu ngatta natabarangngan yayya anna tapenu iyaplika na yatun. Baka kawagan na wagi i tiempo tapenu mapannonopan na i tabarang. Nu mapasensia anna masippo i elder, mas mabi para ta wagi nga ginnan i tabarang anna ari yayya nga maffokus ta nikatabarang na. Siempre, mawag nga kanayun nga nebase ta Uvovug na Dios i tabarang.

18. (a) Anni i mawag nga daddammattam nu manabarang ittam? (b) Anni i pabbidan na magana ta letratu ta kahon?

¹⁸Makagigiammu ta nakkamaliammu. Megafu ta imperfekto ittam, ariattam perfekto nga meyaplika i ngamin nga suhestion taw nga artikulo. (Sant. 3:2) Yari tu nu makkamali ittam, makagigiammu ittam nakuan tatun. Nu matageno na wawwaragi nga iddeddukattam ira, mas mabi para nira nga pakoman ittam nu natakitan ira ta kinagi onu kingngua tam.​—Innan gapa i kahon nga “ Para ta Mappagana.”

19. Kunnasi tam nga mapagayayya i futu na wawwaragi?

¹⁹ Nammuattam nga mariga i mangiyawa tu makoffun nga tabarang. Imperfekto gare ittam anna i wawwaragi nga tabarangngattam. Daddamman i prinsipio ira nga nagigiammu tam taw nga artikulo. Siguraduammu nga fustu i motibom nga manabarang. Ammuammu labbi gapa nu talaga kawagan i tabarang anna nu sikaw i mepangngo nga manabarang. Nige mu manabarang, makkiavu anna magginna ka tu mapia tapenu mantindiammu i situasion na wagi. Alippawatammu i mataga-tageno na. Masippo ka nakuan anna makikkofukka ta wawwaragi. Daddammattam yaw: Kayà tam nga ari laman nga makoffun i tabarang, nu ari, ‘mamagayayya gapa ta futu.’—Prov. 27:9.