1, 2. Kʼaru kixtzol jun li cheekel winq naq kixkʼe xnaʼlebʼ jun li hermaan ixq?

 AK XNUMEʼK naabʼal chihabʼ naq wiibʼ li cheekel winq keʼrulaʼani jun li hermaan ixq li ak najter chik inkʼaʼ nawulak saʼebʼ li chʼutam. Jun rehebʼ aʼin kixyaabʼasi re naabʼal li xraqal li Santil Hu li naʼaatinak chirixebʼ li chʼutam. Li cheekel winq kixkʼoxla naq kixwaklesi xchʼool li hermaan, abʼan naq ak yookebʼ chi xik, aʼan kixye rehebʼ: «Inkʼaʼ nekeenaw bʼayaq li yookin xnumsinkil». Xeʼxkʼe xnaʼlebʼ abʼan moko xeʼxpatzʼ ta re kʼaru li chʼaʼajkilal yook xnumsinkil. Joʼkan naq kirekʼa naq moko keʼxtenqʼa ta.

² Li cheekel winq li kixyaabʼasi ebʼ li xraqal li Santil Hu re, naxjultika li kikʼulmank: «Saʼ li hoonal aʼan, xinkʼoxla naq moko naxbʼanyoxi ta li naʼlebʼ li xqakʼe re. Abʼan naq xinnaʼlebʼak chirix aʼin xinkʼe reetal naq inkʼaʼ peʼ raj xinkʼut chixjunil li xraqal li Santil Hu chiru, xinbʼaanu raj li patzʼom joʼ aʼin, “ma sa laachʼool?”, “chanru wankat?”, “chanru tatintenqʼa?”». Li cheekel winq aʼin kixtzol jun li chaabʼil naʼlebʼ, ut anaqwan aʼan jun li cheekel winq li naxtenqʼahebʼ li junchʼol ut naxtawebʼ ru.

3. Anihebʼ naru teʼkʼehoq naʼlebʼ saʼ li chʼuut?

  ³ Ebʼ li cheekel winq li nekeʼilok re li chʼuut tenebʼanbʼil saʼ xbʼeenebʼ xkʼebʼal xnaʼlebʼ li naʼajmank chiruhebʼ. Abʼan wank sut ebʼ li junchʼol chik li hermaan saʼ li chʼuut naru ajwiʼ teʼkʼehoq naʼlebʼ. Jun eetalil, maare junaq li hermaan tento tixkʼe xnaʼlebʼ junaq li ramiiw rikʼin li Santil Hu (Sal. 141:5; Prov. 25:12). Malaj junaq li hermaan ixq li ak wank xchihabʼ tixkʼe xnaʼlebʼ junaq li hermaan ixq li toj saaj chirix li naʼlebʼ li natawmank saʼ Tito 2:3-5. Joʼkan ajwiʼ, ebʼ li naʼbʼej yuwaʼbʼej rajlal teʼxkʼe xnaʼlebʼ ut teʼxqʼus ebʼ li ralal xkʼajol. Joʼkan bʼiʼ, usta li tzolom aʼin kʼubʼanbʼil choʼq rehebʼ li cheekel winq, us naq chiqajunilo tqatzol xkʼebʼal li naʼlebʼ li nakʼanjelak ut natenqʼank, aʼ li «nakʼehok sahil chʼoolej» (Prov. 27:9).

4. Kʼaru ebʼ li patzʼom tqasume saʼ li tzolom aʼin?

⁴ Saʼ li tzolom aʼin tqasume kaahibʼ li patzʼom chirix li kʼehok naʼlebʼ: kʼaru t-ekʼasinq qe?, ma aajel ru xkʼebʼal?, ani raj tkʼehoq re? ut, chanru tooruuq xkʼebʼal li naʼlebʼ li tkʼanjelaq chiʼus?

5. Kʼaʼut naq maare teʼxkʼulubʼa li naʼlebʼ li naxkʼe li cheekel winq wi naxbʼaanu rikʼin rahok? (1 Corintios 13:4, 7).

⁵ Ebʼ li cheekel winq nekeʼxra ebʼ li hermaan. Ut wank sut nekeʼxkʼutbʼesi li rahok aʼin naq nekeʼxkʼe xnaʼlebʼ li ani ok re chi tʼaneʼk saʼ li maak (Gál. 6:1). Abʼanan, naq junaq li cheekel winq tkʼehoq naʼlebʼ, tento raj tixkʼoxla wiibʼ oxibʼ li naʼlebʼ li kixye li apóstol Pablo: «Li rahok wank xkuyum saʼ chixjunil; aʼan chaabʼil. […] Li rahok chixjunil nariiqani, chixjunil naxpaabʼ, chixjunil naroybʼeni, chixjunil naxkuy» (taayaabʼasi 1 Corintios 13:4, 7). Wi li cheekel winq nanaʼlebʼak chirix ebʼ li raqal aʼin truuq rilbʼal ma li rahok naʼekʼasink re chi kʼehok naʼlebʼ ut tixbʼaanu joʼ naʼajmank. Maare junaq li kristiʼaan tixkʼulubʼa li naʼlebʼ wi tril naq li nakʼehok re naxkʼe xchʼool chirix (Rom. 12:10).

6. Kʼaru chaabʼil eetalil kixkanabʼ laj Pablo naq kikʼehok naʼlebʼ?

⁶ Li apóstol Pablo kixkanabʼ jun chaabʼil eetalil choʼq rehebʼ li cheekel winq. Jun eetalil, aʼan moko kikʼoxlak ta chi xkʼebʼal xnaʼlebʼebʼ laj paabʼanel re Tesalónica naq kiʼajmank chiruhebʼ. Abʼan saʼebʼ li esilhu li kixtzʼiibʼa, xbʼeenwa kixkʼe xsahilebʼ xchʼool xbʼaan naq inkʼaʼ nekeʼxkanabʼ kʼanjelak chiru li Yos, nekeʼrahok ut wankebʼ xkuyum. Kixkʼoxla ajwiʼ rix li xwanjikebʼ ut kixye rehebʼ naq naxnaw naq yookebʼ xkʼulbʼal li chʼaʼajkilal ut li rahobʼtesiik (1 Tes. 1:3; 2 Tes. 1:4). Ut kixye ajwiʼ rehebʼ naq aʼanebʼ jun chaabʼil eetalil choʼq rehebʼ li junchʼol chik aj paabʼanel (1 Tes. 1:8, 9). Kʼajoʼ tana xsahil keʼrekʼa naq keʼwaklesiik xchʼool! Chʼolchʼo chiruhebʼ naq laj Pablo kʼajoʼ naq naxrahebʼ chaq. Joʼkan naq, li naʼlebʼ li kixkʼe rehebʼ saʼ li wiibʼ chi esilhu kʼajoʼ naq kixtenqʼahebʼ (1 Tes. 4:1, 3-5, 11; 2 Tes. 3:11, 12).

7. Kʼaʼut naq junaq li poyanam inkʼaʼ tixkʼulubʼa junaq li naʼlebʼ?

⁷ Wi maawaʼ li rahok naʼekʼasink qe chi kʼehok naʼlebʼ, maare tkʼulmanq li kixye jun li cheekel winq li wank xnaʼlebʼ: «Wankebʼ inkʼaʼ nekeʼxkʼulubʼa li naʼlebʼ xbʼaan naq inkʼaʼ kibʼaanumank rikʼin rahok usta chaabʼil». Kʼaru naqatzol? Moko chʼaʼaj ta xkʼulubʼankil li naʼlebʼ naq nabʼaanumank rikʼin rahok ut maawaʼ saʼ josqʼil.

8. Kʼaru raj tixkʼoxla junaq li cheekel winq naq toj maajiʼ nakʼehok naʼlebʼ?

⁸ Ebʼ li cheekel winq toj teʼxkʼoxla rix naq  tkʼehoq naʼlebʼ. Naq toj maajiʼ naxkʼe li naʼlebʼ junaq li cheekel winq, tento raj tixkʼoxla aʼin: «Ma aajel ru naq tinkʼe xnaʼlebʼ? Ma chʼolchʼo chiwu naq yook xbʼaanunkil junaq li naʼlebʼ li inkʼaʼ us? Ma yook xqʼetbʼal li xchaqʼrabʼ li Yos malaj kaʼajwiʼ yook xbʼaanunkil li inkʼaʼ raj tinbʼaanu laaʼin?». Jun li cheekel winq li wank chiʼus xnaʼlebʼ toj tixkʼoxla li kʼaru tixye (Prov. 29:20). Wi inkʼaʼ chʼolchʼo chiru, naru t-aatinaq rikʼin junaq chik cheekel winq re rilbʼal ma yook xqʼetbʼal li naxye li Santil Hu ut ma aajel ru naq tixkʼe xnaʼlebʼ (2 Tim. 3:16, 17).

9. Chanru teʼxkʼam re ebʼ li cheekel winq rikʼin laj Pablo naq teʼkʼehoq naʼlebʼ chirix chanru teʼxyiibʼ ut teʼxtiqibʼ ribʼebʼ? (1 Timoteo 2:9, 10).

⁹ Qilaq jun eetalil. Qakʼoxlaq naq junaq li cheekel winq naʼok xkʼaʼuxl chirix chanru naxtiqibʼ ribʼ junaq li hermaan. Tento raj tixkʼoxla: «Ma yook xqʼetbʼal li naxye li Santil Hu re naq tinkʼe xnaʼlebʼ?». Xbʼaan naq inkʼaʼ naraj xbʼaanunkil joʼ naxkʼoxla aʼan, naru naxpatzʼ re junaq chik li cheekel winq malaj junaq li hermaan li kaw xpaabʼal kʼaru naxkʼoxla chirix aʼin. Naru teʼxtzʼil rix li kixye laj Pablo chirix li xtiqibʼankil malaj li xyiibʼankil ribʼebʼ (taayaabʼasi 1 Timoteo 2:9, 10). Laj Pablo moko kixkanabʼ ta chi tustu li naʼlebʼ chirix li teʼruuq ut li inkʼaʼ teʼruuq xbʼaanunkil. Kixkʼe bʼan li naʼlebʼ li tooxtenqʼa re naq tqakʼoxla chiʼus chanru tqatiqibʼ qibʼ ut re naq inkʼaʼ teʼaatinaq chirix li Yos. Aʼan naxnaw naq ebʼ laj paabʼanel naru teʼxsikʼ chanru teʼxtiqibʼ ut teʼxyiibʼ ribʼ, abʼan inkʼaʼ teʼxqʼet li naxye li Santil Hu. Re naq ebʼ li cheekel winq teʼxnaw ma teʼxkʼe xnaʼlebʼ junaq li hermaan, tento teʼxtzʼil rix ma naxkʼutbʼesi naq naxkʼoxla chiʼus chanru naxtiqibʼ ribʼ.

10. Kʼaru tento tqajultika chirix li naxbʼaanu li junjunq?

¹⁰ Qajultikaq naq wiibʼ li hermaan moko juntaqʼeet ta li naʼlebʼ li nekeʼxbʼaanu usta kawebʼ xpaabʼal. Abʼan aʼin moko naraj ta xyeebʼal naq jun us nanaʼlebʼak ut li jun inkʼaʼ. Abʼan miqamin ruhebʼ li qahermaan chi xbʼaanunkil li naqakʼoxla naq us ut inkʼaʼ us (Rom. 14:10).

11, 12. Wi aajel ru naq junaq li cheekel winq tkʼehoq naʼlebʼ, kʼaru raj tixkʼoxla ut, kʼaʼut?

¹¹ Wi ak chʼolchʼo naq tento xkʼebʼal junaq li naʼlebʼ, tento xkʼoxlankil ani raj tkʼehoq re. Naq junaq li cheekel winq naraj xkʼebʼal xnaʼlebʼ junaq li hermaan ixq li ak sumsu malaj li toj maajiʼ tzʼaqlojenaq xchihabʼ, tento naq t-aatinaq xbʼeenwa rikʼin li najolomink re li junkabʼal. Maare aʼan traj xbʼaanunkil malaj traj wank naq li cheekel winq tixbʼaanu. * Ut, wi li tkʼemanq xnaʼlebʼ aʼan jun li saaj ixq, maare jun li hermaan ixq li ak  wank xchihabʼ tixbʼaanu, joʼ xyemank saʼ li  raqal 3.

¹² Wank jun chik li patzʼom li tento raj tixbʼaanu li cheekel winq: «Ma inkʼulubʼ xkʼebʼal li naʼlebʼ malaj us naq tixbʼaanu junaq chik?». Jun eetalil, maare junaq li kristiʼaan li narekʼa naq maakʼaʼ naʼok wiʼ tixkʼulubʼa li naʼlebʼ wi li cheekel winq li tkʼehoq re ak kixkʼul aʼin, xbʼaan naq tixtaw ru li narekʼa. Abʼan, chixjunilebʼ li cheekel winq tenebʼanbʼil saʼ xbʼeen xtenqʼankilebʼ li hermaan chi xjalbʼal junaq li naʼlebʼ joʼ naxye li Santil Hu. Wi aajel ru naq tkʼeheʼq xnaʼlebʼ junaq li hermaan, qʼaxal us naq tixkʼul.

13, 14. Kʼaʼut aajel ru naq ebʼ li cheekel winq teʼxkʼe xchʼool chi abʼink?

¹³ Kʼe aachʼool chi abʼink. Naq junaq li cheekel winq yook xkawresinkil ribʼ re xkʼebʼal li naʼlebʼ, tento raj tixkʼoxla: «Ma ninnaw chiʼus li xwanjik li hermaan? Ma ninnaw li yook xkʼulbʼal? Ma yook xkʼulbʼal junaq li chʼaʼajkilal li inkʼaʼ ninnaw? Kʼaru li qʼaxal aajel chiru anaqwan?».

¹⁴ Li natawmank saʼ Santiago 1:19 nakʼanjelak choʼq rehebʼ li nekeʼkʼehok naʼlebʼ. Laj Santiago kixtzʼiibʼa: «Li junjunq seebʼaq xchʼool chi abʼink, chixkuyaq ribʼ chi aatinak ut chixkuyaq ribʼ chi josqʼoʼk». Jun li cheekel winq moko tixye ta raj naq naxnaw chixjunil li yook xkʼulbʼal li hermaan li tixkʼe xnaʼlebʼ. Proverbios 18:13 naxjultika: «Xutaanal ut xmajelal naʼlebʼ choʼq re li nachaqʼok chi toj majiʼ naraqeʼk li aatinak». Jwal us naq tixpatzʼ re li yook xkʼulbʼal li hermaan aʼin ut tento naq xbʼeenwa tixkʼe xchʼool chi rabʼinkil. Aʼin li kixtzol li cheekel winq li xooʼaatinak wiʼ saʼ xtiklajik li tzolom aʼin. Kixkʼe reetal naq inkʼaʼ raj kiroksi li naʼlebʼ li kixkʼubʼ xbʼeenwa, kixbʼaanu raj bʼan li patzʼom joʼ aʼin, «ma sa laachʼool?», «chanru wankat?», «chanru tatintenqʼa?». Wi ebʼ li cheekel winq nekeʼxkʼe xchʼool chi xnawbʼal ru li xwanjikebʼ li hermaan, maare teʼxtenqʼa ut teʼxwaklesi xchʼoolebʼ.

15. Chanru teʼxyuʼami ebʼ li cheekel winq li natawmank saʼ Proverbios 27:23?

¹⁵ Nawebʼ ru chiʼus. Joʼ ak xqil saʼ xtiklajik, re naq junaq li hermaan tixkʼulubʼa li naʼlebʼ li tqakʼe re, moko kaʼaj tawiʼ tqayaabʼasi wiibʼ oxibʼ xraqal li Santil Hu ut tqakʼe xnaʼlebʼ. Ebʼ li hermaan nekeʼraj naq tqakʼe qachʼool chirixebʼ, tqatawebʼ ru ut tqatenqʼahebʼ (taayaabʼasi Proverbios 27:23). Ebʼ li cheekel winq tento raj teʼxkʼe xqʼe chi wank choʼq ramiiwebʼ chixjunil li hermaan.

16. Kʼaru ttenqʼanq rehebʼ li cheekel winq re naq li naʼlebʼ li teʼxkʼe tkʼanjelaq chiʼus?

¹⁶ Ebʼ li cheekel winq inkʼaʼ raj teʼxbʼaanu naq ebʼ li hermaan teʼxkʼoxla naq kaʼajwiʼ nekeʼaatinak rikʼin re xkʼebʼalebʼ xnaʼlebʼ. Rajlal bʼan teʼaatinaq rikʼinebʼ ut teʼxkʼe xchʼool  chirixebʼ naq nekeʼxkʼul junaq li rahilal. Jun li cheekel winq li wank xnaʼlebʼ naxye naq teʼwanq saʼ amiiwil rikʼinebʼ li hermaan wi teʼxbʼaanu aʼin. Ut naxye ajwiʼ: «Wi aajel ru xkʼebʼal junaq li naʼlebʼ, moko tchʼaʼajkoʼq ta chiru xbʼaanunkil». Ut, li tkʼeheʼq xnaʼlebʼ moko tchʼaʼajkoʼq ta chiru xkʼulubʼankil.

17. Joqʼe qʼaxal us naq ebʼ li cheekel winq wanqebʼ xkuyum ut teʼrahoq?

¹⁷ Wanq aakuyum ut tatrahoq. Qʼaxal us naq wanq aakuyum ut tatrahoq naq junaq li hermaan inkʼaʼ naxkʼulubʼa saʼ xtiklajik li naʼlebʼ li isinbʼil saʼ li Santil Hu malaj nabʼayk chi xyuʼaminkil. Ebʼ li cheekel winq inkʼaʼ raj teʼpoʼq wi nakʼulmank aʼin. Tento naq teʼxkʼam re rikʼin li Jesús, li kixye li propesiiy chirix: «Inkʼaʼ tixtoq li kaxlanʼaj ak jorol, chi moko tixchup xsaqenkil li noqʼ toj nabʼutzʼutzʼnak» (Mat. 12:20). Joʼkan bʼiʼ, naq li cheekel winq ttijoq xjunes naru tixtzʼaama re li Jehobʼa naq chixtenqʼaq li hermaan aʼin chi rilbʼal kʼaʼut naʼajmank chiru li naʼlebʼ ut chixyuʼamiq. Maare naʼajmank li hoonal chiru re naq tixkʼoxla rix li kiyeemank re. Wi li cheekel winq wank xkuyum ut narahok, li hermaan tixkʼe xchʼool chirix li naʼlebʼ ut inkʼaʼ chanru kiyeheʼk re. Abʼan, li naʼlebʼ junelik isinbʼilaq saʼ li Raatin li Yos.

18. a) Kʼaru tento tqajultika naq tookʼehoq naʼlebʼ? b) Joʼ naxkʼut li jalam u ut li kaaxukuut, kʼaru tento teʼxtzʼil rix li naʼbʼej yuwaʼbʼej naq toj maajiʼ nekeʼkʼehok naʼlebʼ?

¹⁸ Tzol aanaʼlebʼ chirix laapaltil. Saʼ xkʼabʼaʼ naq chiqajunilo nokoopaltoʼk, moko tooruuq ta xyuʼaminkil chi tzʼaqal re ru li naʼlebʼ li naʼaatinak wiʼ li tzolom aʼin (Sant. 3:2). Chiqajunilo toopaltoʼq, abʼan tento tqayal qaqʼe chi xtawbʼal qanaʼlebʼ chirix aʼin. Wi ebʼ li hermaan nekeʼxkʼe reetal naq naqarahebʼ, inkʼaʼ tchʼaʼajkoʼq chiruhebʼ xkuybʼal qamaak wi naqabʼaanu malaj naqaye junaq li naʼlebʼ li tixrahobʼtesi xchʼoolebʼ. (Chaawil ajwiʼ li kaaxukuut « Choʼq rehebʼ li naʼbʼej yuwaʼbʼej»).

19. Chanru tooruuq xsahobʼresinkil xchʼool ebʼ li qahermaan?

¹⁹ Joʼ xqil, chʼaʼaj xkʼebʼal li naʼlebʼ li qʼaxal nakʼanjelak. Li nekeʼkʼehok naʼlebʼ joʼ ajwiʼ li nekeʼkʼuluk re aj maakebʼ. Joʼkan bʼiʼ, qajultikaq li naʼlebʼ li xqatzʼil rix saʼ li tzolom aʼin. Naq tqakʼe xnaʼlebʼ junaq li hermaan, qabʼaanuhaq rikʼin rahok. Joʼkan ajwiʼ, qilaq ma aajel ru xkʼebʼal li naʼlebʼ ut ani tkʼehoq re. Choopatzʼoq ut qakʼehaq qachʼool chi rabʼinkil re xnawbʼal kʼaru yook xkʼulbʼal. Qayalaq qaqʼe chi xtawbʼal ru. Qarahaqebʼ li hermaan ut wanqo choʼq ramiiwebʼ. Misach saʼ qachʼool naq naqaj naq li naʼlebʼ li tqakʼe tkʼanjelaq chiruhebʼ ut tixsahobʼresi xchʼoolebʼ (Prov. 27:9).