1-2. Awˬ viˉ awˬ nyi hawˉ hkʼaˆ teˇ gʼaˇ beˆ maˍ piˇ ve htaꞈ caˉ daꞈ ve yawˇ htaꞈ aˬ htoꞈ ma maˍ piˇ ve le?

 Peuˬ laˬ ve laiˉ hkʼawꞈ htaˇ nyi haꞈ shaˉ paˍ 2 gʼaˇ, awˬ viˉ awˬ nyi yaˇ miˇ teˇ gʼaˇ ve aˉ hkʼaw lo ca guiˇ˗e ve yoˬ. Yawˇ teˇ tcuhˉ teˇ yanˇ hpawnˬ daꞈ kuiˬ lo maˇ laˬ˗oˬ ve yoˬ. Awˬ viˉ awˬ nyi yaˇ miˇ oˇ ve geh yaw daꞈ htaˇ, nyi haꞈ shaˉ paˍ teˇ gʼaˇ Liꞈ hpu laiˉ tawn hpeuꞈ maˍ piˇ ve, leh hpawnˬ daꞈ ve awˬ lawn kaꞈ kʼoˆ maˍ piˇ ve yoˬ. Awˬ viˉ awˬ nyi yaˇ miˇ chi teˇ gʼaˇ awˬ gʼaˇ gʼa jaˇ tehꞈ nyi haꞈ shaˉ paˍ dawˇ ve yoˬ. Yaꞈ hkʼaˇ, yawˇ hui awˬ viˉ awˬ nyi yaˇ miˇ ve aˉ hkʼaw tawˆ la htaˇ, awˬ viˉ awˬ nyi yaˇ miˇ kaꞈ nyi haꞈ shaˉ paˍ oˇ ve 2 gʼaˇ htaꞈ kʼoˆ piˇ ve, “ngaˬ aˬ htoꞈ ma gʼa hpuˇ chehˇ ve nawˬ hui maˇ shiˍ.” Awˬ viˉ awˬ nyi yaˇ miˇ yawˇ aˬ htoꞈ ma gʼa hpuˇ ve, leh chi teˇ hkui yawˇ hkʼaˬ hkʼe hpehꞈ ve nyi haꞈ shaˉ paˍ chi 2 gʼaˇ beˆ maˍ piˇ htaˇ teꞈ chiˉ kaꞈ maˇ na nyi piˇ. Nyi haꞈ shaˉ paˍ beˆ maˍ piˇ ve chi awˬ viˉ awˬ nyi yaˇ miˇ awˬ bon maˇ cawˬ tehꞈ dawˇ ve yoˬ.

² Nyi haꞈ shaˉ paˍ teˇ gʼaˇ awˬ lawn oˇ teˇ pawˆ ve htaꞈ kʼoˆ ve, “tawˇ hkawˇ oˇ ve ngaˬ awˉ lawˉ gʼa kaˇ htaˇ awˬ viˉ awˬ nyi yaˇ miˇ chi ve ngaˬ htaꞈ maˇ yawˆ yan ve tehꞈ dawˇ ve yoˬ. Yaꞈ hkʼaˇ, ngaˬ tawnˇ gʼa ve ngaˬ Liꞈ hpu laiˉ tawn hpeuꞈ maˍ piˇ ve yoˬ. ‘Nawˬ hkʼaˬ hkʼe hpehꞈ ve le?’ ‘Ngaˬ nawˬ htaꞈ ga laˇ gʼa ve aˬ htoꞈ ma cawˬ ve le?’ Yawˇ htaꞈ maˇ gʼa na nyi piˇ.” Nyi haꞈ shaˉ paˍ oˇ ve teˇ gʼaˇ a yeˇ uiˍ ve awˬ lawn htaꞈ gʼa shiˍ ve yoˬ. Leh chi teˇ hkui yawˇ shu htaꞈ ha kʼaˉ puiˉ ve nyi haꞈ shaˉ paˍ hpehꞈ leh awˬ viˉ awˬ nyi htaꞈ ga piˇ gʼa jaˇ.

3. A shu beˆ maˍ piˇ gʼa ve le?

 ³ Hkriꞈ yaˇ awˬ moˍ hkʼaw awˬ viˉ awˬ nyi teˇ hpaˍ hpaˍ beˆ maˍ piˇ tuˬ loˍ ve kʼo, Gʼuiˬ sha yawˇ ve yawˬ awˬ moˍ htaꞈ nyi haꞈ shaˉ tuˬ yawˇ hui htaꞈ awˬ vuiˬ piˇ taˍ ve pa taw, beˆ maˍ piˇ ve chaw kaꞈ nyi haꞈ shaˉ paˍ gʼa hpehꞈ ve yoˬ. Yaꞈ hkʼaˇ, teˇ pawˆ pawˆ kʼo, awˬ viˉ awˬ nyi kaꞈ teˇ gʼaˇ leh teˇ gʼaˇ beˆ maˍ piˇ daꞈ gʼa ve yoˬ. Tawˇ pa haˉ te kʼo, awˬ chawˇ kaꞈ Liꞈ hpu hkʼaw ve beˆ maˍ laˇ hkawˇ, awˬ chawˇ htaꞈ beˆ maˍ piˇ gʼa ve yoˬ. (Chiˇ mvuh ve 141:5; Tawˇ naˉ ve 25:12) Tiˇtuˆ liꞈ 2:3-5 hkʼaw kʼoˆ  taˍ ve awˬ lawn teˇ hpaˍ awˬ viˉ awˬ nyi yaˇ miˇ a shaꞈ maˇ ve chaw ‘a shaꞈ i ve yaˇ miˇ teˇ hpaˍ htaꞈ maˍ piˇ gʼa ve yoˬ.’ Chi hkʼoˆ kaꞈ, awˬ pa awˬ e kaꞈ yaˇ htaꞈ teˇ hkui teˇ hkui gʼa maˍ piˇ ve yoˬ. Awˬ lawn chi ve hkʼaw nyi haꞈ shaˉ paˍ htaꞈ kʼoˆ ve htawˇ, ngaˬ hui teˇ gʼaˇ le le awˬ bon gʼa tuˬ yoˬ. Na ve chaw gʼaꞈ te gaˇ tuˬ leh awˬ tehˬ te gʼa tuˬ, ngaˬ hui hkʼaˬ hkʼe beˆ maˍ piˇ cawˇ ve awˬ lawn chi ve hkʼaw teˇ geh henˇ tuˬ yoˬ. Beˆ maˍ piˇ hkawˇ “nyi ma sha la piˇ” tuˬ hkʼaˬ hkʼe ve le?—Tawˇ naˉ ve 27:9.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Awˬ lawn chi ve hkʼaw na hkawˇ 4 maˬ htaꞈ teˇ geh henˇ tuˬ yoˬ. (1) Aˬ htoꞈ ma pa taw nawˬ beˆ maˍ piˇ ve le? (2) Awˬ tehˬ beˆ maˍ piˇ cawˇ ve laˇ? (3) A shu beˆ maˍ piˇ cawˇ ve le? (4) Hkʼa dehꞈ beˆ maˍ piˇ gʼa tuˬ ngaˬ hui htaꞈ aˬ htoꞈ ma ga laˇ gʼa ve le?

5. Nyi haꞈ shaˉ paˍ awˬ viˉ awˬ nyi htaꞈ haꞈ pehnˇ ve hkʼaw beˆ maˍ piˇ ve kʼo, aˬ htoꞈ ma awˬ bon gʼa ve le? (1 Kawˇrenˍhtuˆ 13:4, 7)

⁵ Nyi haꞈ shaˉ paˍ awˬ viˉ awˬ nyi htaꞈ haꞈ jaˇ. Teˇ pawˆ pawˆ kʼo, nyi haꞈ shaˉ paˍ kaꞈ awˬ viˉ awˬ nyi “venˇ baˆ teˇ ceuˬ ceuˬ te chehˇ ve htaꞈ” mawˬ leh beˆ maˍ piˇ ve kʼo, yawˇ htaꞈ haꞈ ve tehꞈ hpeuꞈ maw piˇ ve yoˬ. (Gaˍlaˍtiˆ 6:1) Nyi haꞈ shaˉ paˍ awˬ viˉ awˬ nyi oˇ ve teˇ gʼaˇ geh maˇ yaw daꞈ sheˍ htaˇ, Pawˇluꞈ haꞈ pehnˇ ve awˬ lawn kʼoˆ ve htaꞈ yawˇ nyi cawˇ ve yoˬ. Pawˇluꞈ kʼoˆ ve, ‘haꞈ pehnˇ ve lehˬ, dawˇ zuhˬ gaˇ zuhˬ leh ha kʼaˉ puiˉ ve yoˬ. Haꞈ pehnˇ ve lehˬ hkʼa peu˗eˬ htaꞈ hkanˍ puiˉ ve, hkʼa peu˗eˬ htaꞈ yonˍ puiˉ ve, hkʼa peu˗eˬ htaꞈ dawˇ law puiˉ ve leh, hkʼa peu˗eˬ htaꞈ yeunˇ hkanˍ puiˉ ve yoˬ.’ (1 Kawˇrenˍhtuˆ 13:4, 7 gʼaw sheˍ.) Liꞈ hpu awˬ tawn chi ve teˇ hpaˍ htaꞈ nyi haꞈ shaˉ paˍ hkʼa dehꞈ dawˇ nyi peuˬ hkʼawꞈ nawˉ, awˬ viˉ awˬ nyi htaꞈ aˬ htoꞈ ma te beˆ maˍ piˇ cawˇ ve le, a shu yawˇ awˬ to htaꞈ na nyi cawˇ ve yoˬ. Leh yawˇ awˬ viˉ awˬ nyi htaꞈ haꞈ pehnˇ ve hkʼaw beˆ maˍ piˇ gʼa tuˬ ga piˇ gʼa jaˇ. Leh awˬ viˉ awˬ nyi oˇ ve teˇ gʼaˇ nyi haꞈ shaˉ paˍ yawˇ htaꞈ haꞈ leh dawˇ haˍ ve tehꞈ shiˍ ve kʼo, yawˇ htaꞈ beˆ maˍ piˇ ve haꞈ yuˬ gʼa ve yoˬ.—Roˉmaꞈ 12:10.

6. Pawˇluꞈ lehˬ daꞈ ve henˇ yuˬ tuˬ hkʼaˬ hkʼe hpehꞈ ve le?

⁶ Tcuh yaˇ Pawˇluꞈ lehˬ nyi haꞈ shaˉ paˍ awˬ pon daꞈ ve henˇ yuˬ tuˬ hpehꞈ ve yoˬ. Tawˇ pa haˉ te kʼo, Hteˇsaˍlawˇniˆ venˇ hkʼaw ve awˬ viˉ awˬ nyi Pawˇluꞈ yawˇ hui htaꞈ beˆ maˍ piˇ tuˬ liꞈ bvuhꞈ piˇ ve, htawˇ dawˇ nawˬ dawˇ maˇ cawˬ. Yaꞈ hkʼaˇ, yawˇ hui Gʼuiˬ sha ve kanˉ ka tiꞈ yeˬ ve hkʼaw te ve, haꞈ pehnˇ ve, leh yeunˇ hkanˍ ve hkʼaw te ve yawˇ hui htaꞈ Pawˇluꞈ chiˇ mvuh piˇ ve yoˬ. Chi hkʼoˆ kaꞈ, Pawˇluꞈ kʼoˆ sheˍ ve, awˬ viˉ awˬ nyi gʼa hpuˇ ve awˬ ceuˬ leh yawˇ hui htaꞈ shu fawˉ mehˍ piˇ ve hkʼaˬ hkʼe taw gʼa hkanˍ jaˇ ve kaꞈ Pawˇluꞈ shiˍ ve yoˬ. (1 Hteˇsaˍlawˇniˆ 1:3; 2 Hteˇsaˍlawˇniˆ 1:4) Pawˇluꞈ kʼawꞈ kʼoˆ sheˍ ve, awˬ viˉ awˬ nyi chi teˇ hpaˍ awˬ nu ve chaw awˬ pon daꞈ ve henˇ yuˬ tuˬ kaꞈ hpehꞈ sheˍ ve yoˬ. (1 Hteˇsaˍlawˇniˆ 1:8, 9) Pawˇluꞈ yawˇ hui htaꞈ chiˇ mvuh piˇ ve lehˬ, awˬ gʼaˇ gʼa jaˇ tuˬ te piˇ leh Pawˇluꞈ yawˇ hui htaꞈ haꞈ jaˇ ve tehꞈ hpeuꞈ maw piˇ ve yoˬ. Hkʼe te leh, Hteˇsaˍlawˇniˆ venˇ hkʼaw ve awˬ viˉ awˬ nyi htaꞈ Pawˇluꞈ liꞈ nyiˇ kʼoˆ bvuhꞈ piˇ leh beˆ maˍ piˇ ve yawˇ hui awˬ pon awˬ bon gʼa jaˇ ve yoˬ.—1 Hteˇsaˍlawˇniˆ 4:1, 3-5, 11; 2 Hteˇsaˍlawˇniˆ 3:11, 12.

7. Aˬ htoꞈ ma te chaw teˇ hpaˍ hpaˍ beˆ maˍ piˇ ve htaꞈ maˇ na ve le?

⁷ Ngaˬ hui cawˇ ve hkʼaw maˇ beˆ maˍ piˇ ve kʼo, hkʼaˬ hkʼe hpehꞈ tuˬ le? Nyi haꞈ shaˉ paˍ hpehꞈ laˬ jaw ve teˇ gʼaˇ kʼoˆ ve, “awˬ viˉ awˬ nyi teˇ hpaˍ beˆ maˍ piˇ ve htaꞈ maˇ na ve yoˬ. Shoꞈ shaꞈ ve lehˬ beˆ maˍ piˇ ve htaꞈ cawˬ ve maˇ heˆ. Yaꞈ hkʼaˇ, beˆ maˍ piˇ ve chaw lehˬ haꞈ pehnˇ ve hkʼaw maˇ beˆ maˍ piˇ ve pa taw yoˬ.” Awˬ lawn chi ngaˬ hui htaꞈ aˬ htoꞈ ma maˍ laˇ ve le? Ngaˬ hui haꞈ pehnˇ ve hkʼaw beˆ maˍ piˇ ve kʼo, beˆ maˍ piˇ ve htaꞈ awˬ viˉ awˬ nyi na gaˇ tuˬ yoˬ.

8. Nyi haꞈ shaˉ paˍ awˬ viˉ awˬ nyi htaꞈ beˆ maˍ piˇ htaˇ, a shu yawˇ awˬ to htaꞈ hkʼaˬ hkʼe na nyi cawˇ ve le?

⁸ Nyi haꞈ shaˉ paˍ lehˬ awˬ viˉ awˬ nyi htaꞈ haˆ haˆ maˇ beˆ maˍ piˇ cawˇ. Yawˇ shu htaꞈ maˇ beˆ maˍ piˇ sheˍ htaˇ, a shu yawˇ awˬ to htaꞈ na nyi cawˇ ve, ‘ngaˬ yawˇ geh tawˇ yaw daꞈ cawˇ ve laˇ? Yawˇ te yaꞈ ve tehꞈ ngaˬ yonˍ gʼa˗aw laˇ? Yawˇ te ve awˬ ceuˬ Liꞈ hpu  hkʼaw ve awˬ liˇ awˬ hkʼaˇ htaꞈ yaꞈ˗aw laˇ? Maˇ heˆ leh, ngaˬ dawˇ ve hkʼe yawˇ maˇ dawˇ ve laˇ?’ Cuˇ yiˍ cawˬ ve nyi haꞈ shaˉ paˍ lehˬ “maˇ dawˇ nyi leh tawˇ yaw ve” maˇ heˆ. (Tawˇ naˉ ve 29:20) Nyi haꞈ shaˉ paˍ awˬ viˉ awˬ nyi htaꞈ beˆ maˍ piˇ cawˇ˗aw laˇ tehꞈ hkʼa dehꞈ maˇ yonˍ gʼa sheˍ ve kʼo, awˬ viˉ awˬ nyi oˇ ve teˇ gʼaˇ Liꞈ hpu hkʼaw ve awˬ liˇ awˬ hkʼaˇ htaꞈ te yaꞈ leh beˆ maˍ piˇ cawˇ ve laˇ tehꞈ, yawˇ awˬ nu ve nyi haꞈ shaˉ paˍ teˇ gʼaˇ htaꞈ yawˇ hkʼe leˇ dawˇ˗aw laˇ tehꞈ na nyi piˇ ve yoˬ.—2 Tiˆmoˉseˍ 3:16, 17.

9. Veuꞈ kʼaˇ veuꞈ ve htaꞈ caˉ daꞈ ve Pawˇluꞈ beˆ maˍ laˇ taˍ ve ngaˬ hui aˬ htoꞈ ma henˇ yuˬ gʼa ve le? (1 Tiˆmoˉseˍ 2:9, 10)

⁹ Awˬ lawn chi htaꞈ ngaˬ hui teˇ geh dawˇ nyi sheˍ. Awˬ viˉ awˬ nyi veuꞈ kʼaˇ veuꞈ ve htaꞈ caˉ daꞈ ve nyi haꞈ shaˉ paˍ beˆ maˍ piˇ tuˬ dawˇ ve kʼo, yawˇ awˬ to htaꞈ awˉ lawˉ na nyi cawˇ ve, ‘yawˇ htaꞈ beˆ maˍ piˇ tuˬ ngaˬ Liꞈ hpu hkʼaw ve awˬ liˇ awˬ hkʼaˇ htaꞈ yehˇ˗aw laˇ?’ Nyi haꞈ shaˉ paˍ yawˇ ve dawˇ hkʼaˇ htaꞈ yehˇ leh maˇ dawˇ cheˆ piˇ sheˍ htaˇ, yawˇ awˬ nu ve nyi haꞈ shaˉ paˍ htaꞈ na nyi cawˇ ve yoˬ. Leh awˬ viˉ awˬ nyi hawˉ hkʼaˆ maˇ heˆ leh awˬ viˉ awˬ nyi yaˇ miˇ co ha hpawˇ ve chaw mawˇ hpehꞈ ve htaꞈ na nyi cawˇ ve yoˬ. Leh veuꞈ kʼaˇ veuꞈ ve htaꞈ caˉ daꞈ ve Pawˇluꞈ beˆ maˍ laˇ taˍ ve htaꞈ yawˇ hui teˇ geh gʼaw nyi cawˇ ve yoˬ. (1 Tiˆmoˉseˍ 2:9, 10 gʼaw sheˍ.) Chi htaꞈ caˉ daꞈ ve Pawˇluꞈ kʼoˆ maˍ laˇ taˍ ve yoˬ. Hkriꞈ yaˇ lehˬ keunˍ daꞈ cawˇ daꞈ ve veuꞈ kʼaˇ teˇ hpaˍ htaꞈ gʼa veuꞈ leh Yaˬhoˉvaˬ ve awˬ meh luˬ tuˬ yawˇ hui maˇ gʼa te tehꞈ Pawˇluꞈ kʼoˆ piˇ ve yoˬ. Veuꞈ kʼaˇ aˬ htoꞈ ma veuꞈ cawˇ ve, maˇ veuꞈ cawˇ ve, Pawˇluꞈ yawˇ hui htaꞈ hkʼa tawˍ lehˆ maˇ gʼa kʼoˆ piˇ. Liꞈ hpu hkʼaw ve awˬ liˇ awˬ hkʼaˇ htaꞈ maˇ yaꞈ ve kʼo, awˬ viˉ awˬ nyi dawˇ cawˇ ve hkʼe leuˆ veuꞈ gʼa ve tehꞈ Pawˇluꞈ shiˍ ve yoˬ. Hkʼe te leh, nyi haꞈ shaˉ paˍ lehˬ awˬ viˉ awˬ nyi htaꞈ beˆ maˍ piˇ cawˇ˗aw laˇ tehꞈ dawˇ cheˆ htaˇ, oˇ ve teˇ gʼaˇ veuꞈ kʼaˇ veuꞈ ve Yaˬhoˉvaˬ htaꞈ yawˆ yan˗aw laˇ tehꞈ yawˇ nyi cawˇ ve yoˬ.

10. Shu dawˇ cheˆ ve awˬ lawn htaꞈ ngaˬ hui aˬ htoꞈ ma tawnˇ taˍ cawˇ ve le?

¹⁰ Awˬ viˉ awˬ nyi co ha hpawˇ ve chaw mawˇ 2 gʼaˇ dawˇ cheˆ ve maˇ shuˍ daꞈ ve tehꞈ ngaˬ hui tawnˇ taˍ cawˇ ve yoˬ. Leh chi teˇ gʼaˇ cawˇ ve, oˇ ve teˇ gʼaˇ maˇ cawˇ ve tehꞈ kʼoˆ gaˇ ve maˇ heˆ. Yawˇ hui 2 gʼaˇ gʼaˇ cawˇ ve yoˬ hehˉ. Chi htaꞈ pa taw, awˬ viˉ awˬ nyi ngaˬ hui hkʼa shuˍ dawˇ tuˬ maˇ nyiˉ piˇ cawˇ.—Roˉmaꞈ 14:10.

11-12. Beˆ maˍ piˇ cawˇ ve kʼo, nyi haꞈ shaˉ paˍ a shu yawˇ awˬ to htaꞈ hkʼaˬ hkʼe na nyi cawˇ ve le?

¹¹ Beˆ maˍ piˇ cawˇ ve tehꞈ shiˍ ve kʼo, a shu beˆ maˍ piˇ cawˇ ve le, nyi haꞈ shaˉ paˍ gʼa dawˇ nyi cawˇ ve yoˬ. Tawˇ pa haˉ te kʼo, nyi haꞈ shaˉ paˍ lehˬ awˬ viˉ awˬ nyi yaˇ miˇ awˬ hpawˇ cawˬ˗oˬ ve leh yaˇ nehˬ htaꞈ tawˇ maˇ yaw sheˍ htaˇ, yehˬ shehˍ hpaˇ htaꞈ awˉ lawˉ gʼa na nyi cawˇ ve yoˬ. Leh teˇ pawˆ pawˆ kʼo, yehˬ shehˍ hpaˇ awˬ lawn oˇ ve htaꞈ yawˇ hkʼaˇ yawˇ gu gaˇ ve yoˬ. * Nyi haꞈ shaˉ paˍ lehˬ yehˬ shehˍ hpaˇ ve yehˬ kʼa hkʼaw ve chaw htaꞈ beˆ maˍ piˇ htaˇ yawˇ chehˇ kaꞈ gʼa ve yoˬ. Chi hkʼoˆ kaꞈ,  awˬ tawn 3 hkʼaw henˇ peuˬ ve hkʼa shuˍ teˇ pawˆ pawˆ kʼo, nyi haꞈ shaˉ paˍ lehˬ awˬ viˉ awˬ nyi yaˇ miˇ a shaꞈ maˇ˗oˬ ve chaw, awˬ viˉ awˬ nyi yaˇ miˇ a shaꞈ i ve chaw htaꞈ beˆ maˍ piˇ tuˬ lawˬ piˇ ve yoˬ.

 ¹² Chi hkʼoˆ kaꞈ, awˬ nu ve teˇ ceuˬ htaꞈ dawˇ nyi cawˇ sheˍ ve lehˬ, ‘ngaˬ awˬ viˉ awˬ nyi htaꞈ beˆ maˍ piˇ cawˇ ve, maˇ heˆ leh awˬ nu ve teˇ gʼaˇ htaꞈ beˆ maˍ piˇ tcuh cawˇ˗aw laˇ?’ tehꞈ a shu yawˇ awˬ to htaꞈ na nyi cawˇ ve yoˬ. Tawˇ pa haˉ te kʼo, awˬ viˉ awˬ nyi a shu yawˇ awˬ to htaꞈ awˬ hpfuhˇ maˇ cawˬ ve tehꞈ dawˇ ve chaw geh tawˇ ca yaw daꞈ˗e htaˇ, nyi haꞈ shaˉ paˍ chi hkʼe hpehꞈ jaw ve yawˇ geh ca yaw daꞈ˗e tcuh ve kʼo, daꞈ ve yoˬ. Awˬ lawn kʼo, nyi haꞈ shaˉ paˍ lehˬ awˬ viˉ awˬ nyi oˇ ve teˇ gʼaˇ hkʼe hpehꞈ jaw ve pa taw, yawˇ beˆ maˍ piˇ htaˇ oˇ ve teˇ gʼaˇ kaꞈ hkʼa dehꞈ na gʼa leh haꞈ yuˬ sha ve yoˬ. Yaꞈ hkʼaˇ, nyi haꞈ shaˉ paˍ awˬ viˉ awˬ nyi htaꞈ awˬ gʼaˇ piˇ tuˬ awˬ vuiˬ cawˬ leh Liꞈ hpu hkʼaw beˆ maˍ laˇ ve awˬ ceuˬ htaꞈ awˬ viˉ awˬ nyi gʼaꞈ te tuˬ ga piˇ cawˇ ve yoˬ. Chi htaꞈ pa taw, nyi haꞈ shaˉ paˍ hkʼaˬ ve teˇ gʼaˇ kaꞈ awˬ viˉ awˬ nyi oˇ ve teˇ gʼaˇ hkʼe maˇ hpehꞈ jaw ve htawˇ awˬ viˉ awˬ nyi beˆ maˍ laˇ tuˬ loˍ ve htaꞈ mawˬ htaˇ a yeˇ uiˍ jaˇ ve lehˬ gʼa beˆ maˍ piˇ cawˇ ve yoˬ.

13-14. Aˬ htoꞈ ma pa taw nyi haꞈ shaˉ paˍ lehˬ awˬ viˉ awˬ nyi hkawˇ na tuˬ a yeˇ uiˍ ve le?

¹³ Awˬ viˉ awˬ nyi hkawˇ na ve. Nyi haꞈ shaˉ paˍ awˬ viˉ awˬ nyi htaꞈ beˆ maˍ piˇ tuˬ dawˇ nyi htaˇ, ‘awˬ viˉ awˬ nyi oˇ ve teˇ gʼaˇ yawˇ ve a shaꞈ teꞈ hkʼaˇ hkʼaˬ hkʼe hpehꞈ ve le? Yawˇ aˬ htoꞈ ma gʼa hpuˇ chehˇ ve le? Yawˇ shoꞈ shaꞈ ve gʼa hpuˇ chehˇ ve ngaˬ maˇ shiˍ ve cawˬ˗aw laˇ? Chi teˇ hkui yawˇ aˬ htoꞈ ma htaꞈ loˍ jaˇ ve le?’ Nyi haꞈ shaˉ paˍ a shu yawˇ awˬ to htaꞈ na nyi cawˇ ve yoˬ.

¹⁴ Shu htaꞈ beˆ maˍ piˇ tuˬ ve chaw lehˬ Yaˍkoˆ liꞈ 1:19 hkʼaw kʼoˆ taˍ ve htaꞈ gʼaꞈ te cawˇ ve yoˬ. Yaˍkoˆ liꞈ hkʼaw kʼoˆ ve, “shu tawˇ yaw ve htaꞈ hkʼa dehꞈ na sheˍ. Tawˇ haˆ haˆ taˇ yaw. Nyi ma haˆ haˆ taˇ zuhˆ.” Nyi haꞈ shaˉ paˍ teˇ ceuˬ le le htaꞈ shiˍ˗oˬ ve tehꞈ dawˇ ve htawˇ hkʼa peu˗eˬ htaꞈ shiˍ gʼa˗aw laˇ? Tawˇ naˉ ve liꞈ 18:13 hkʼaw shaˍ tiꞈ peꞈ laˇ ve “nawˬ maˇ yaw hkʼawꞈ piˇ sheˍ htaˇ hkʼa dehꞈ na sheˍ. Oˇ hkʼe maˇ te ve kʼo, nawˬ lehˬ chaw luˬ paˍ hpehꞈ ve yoˬ.” Chi htaꞈ pa taw, daꞈ jaˇ ve lehˬ nyi haꞈ shaˉ paˍ awˬ viˉ awˬ nyi oˇ ve teˇ gʼaˇ geh awˉ lawˉ yaw daꞈ ve, leh hkʼaˬ hkʼe hpehꞈ ve yawˇ htaꞈ kʼoˆ maˍ laˇ tcuh sheˍ. Nyi haꞈ shaˉ paˍ yawˇ tawˇ maˇ yaw sheˍ htaˇ hkʼa dehꞈ na taˍ cawˇ ve yoˬ. Awˬ lawn tanˬ htaˇ henˇ kʼai peuˬ ve hkʼe, nyi haꞈ shaˉ paˍ ve awˬ lawn htaꞈ dawˇ nyi sheˍ. Yawˇ a yeˇ uiˍ jaˇ ve awˬ lawn gʼa henˇ ve yoˬ. Yawˇ gu laˇ taˍ ve awˬ ceuˬ awˬ viˉ awˬ nyi yaˇ miˇ htaꞈ kʼoˆ maˍ piˇ ve aꞈ kehˉ, “nawˬ hkʼaˬ hkʼe kʼai le?” “Ngaˬ nawˬ htaꞈ ga laˇ gʼa tuˬ aˬ htoꞈ ma cawˬ ve le?” Yawˇ awˬ viˉ awˬ nyi yaˇ miˇ htaꞈ awˉ lawˉ na nyi cawˇ sheˍ ve yoˬ. Yawˇ awˬ viˉ awˬ nyi ve awˬ lawn chaˬ nyi tuˬ awˬ yanˇ yehˇ ve kʼo, yawˇ awˬ viˉ awˬ nyi htaꞈ awˬ gʼaˇ piˇ leh ga piˇ gʼa tuˬ yoˬ.

15. Tawˇ naˉ ve liꞈ 27:23 hkʼaw beˆ maˍ laˇ taˍ ve htaꞈ nyi haꞈ shaˉ paˍ hkʼaˬ hkʼe te yuˬ yehˇ gʼa tuˬ ve le?

¹⁵ Awˬ viˉ awˬ nyi htaꞈ hkʼa dehꞈ shiˍ daꞈ sheˍ. Henˇ laˬ peuˬ˗oˬ ve hkʼe, nyi haꞈ shaˉ paˍ lehˬ awˬ viˉ awˬ nyi htaꞈ beˆ maˍ piˇ ve awˬ bon hkʼa dehꞈ gʼa tcuh gaˇ ve kʼo, yawˇ Liꞈ hpu laiˉ tawn hpeuꞈ maˍ piˇ ve, maˇ heˆ leh a ciˉ ceh beˆ maˍ piˇ ve maˇ te cawˇ. Nyi haꞈ shaˉ paˍ lehˬ awˬ viˉ awˬ nyi htaꞈ haꞈ leh dawˇ haˍ ve, na gʼa ve, leh awˬ viˉ awˬ nyi htaꞈ ga piˇ gaˇ ve yoˬ. (Tawˇ naˉ ve 27:23 gʼaw sheˍ.) Hkʼe te leh, nyi haꞈ shaˉ paˍ awˬ viˉ awˬ nyi htaꞈ hkʼa dehꞈ gʼa meuˆ daꞈ cawˇ ve yoˬ.

16. Nyi haꞈ shaˉ paˍ beˆ maˍ piˇ ve htaꞈ awˬ bon gʼa tuˬ aˬ htoꞈ ma ga piˇ ve le?

¹⁶ Nyi haꞈ shaˉ paˍ lehˬ yawˇ awˬ viˉ awˬ nyi geh  kanˉ cawˬ htaˇ maˇ heˆ leh, beˆ maˍ piˇ htaˇ ceh tawˇ ca yaw la ve tehꞈ awˬ viˉ awˬ nyi htaꞈ maˇ dawˇ tcuh gaˇ. Yaꞈ hkʼaˇ, nyi haꞈ shaˉ paˍ lehˬ awˬ viˉ awˬ nyi tuꞈ htaˇ leh sha htaˇ kaꞈ tawˇ ca yaw daꞈ cawˇ ve yoˬ. Nyi haꞈ shaˉ paˍ te maw˗oˬ ve teˇ gʼaˇ kʼoˆ ve, “oˇ hkʼe te ve kʼo, awˬ viˉ awˬ nyi nawˬ htaꞈ meuˆ daꞈ ve, nawˬ aˬ htoꞈ ma beˆ maˍ piˇ ve htawˇ, yawˇ hui na yuˬ gaˇ tuˬ yoˬ.”

17. Nyi haꞈ shaˉ paˍ yeunˇ hkanˍ leh nyi ma nuˇ nehˬ ve cawˬ cawˇ ve hkʼaˬ hkʼe htaˇ le?

¹⁷ Yeunˇ hkanˍ leh nyi ma nuˇ nehˬ sheˍ. Awˉ lawˉ htaˇ awˬ viˉ awˬ nyi teˇ hpaˍ hpaˍ Liꞈ hpu hkʼaw beˆ maˍ laˇ ve htaꞈ maˇ gʼaꞈ te gaˇ ve yoˬ. Yaꞈ hkʼaˇ, nawˬ yeunˇ hkanˍ leh nyi ma nuˇ nehˬ ve htaꞈ yawˇ mawˬ ve kʼo, yawˇ kaꞈ nawˬ beˆ maˍ piˇ ve htaꞈ na gaˇ tuˬ yoˬ. Chi htaꞈ pa taw, awˬ viˉ awˬ nyi nawˬ beˆ maˍ piˇ ve htaꞈ maˇ haꞈ yuˬ leh laꞈ haˉ maˇ gʼaꞈ te ve kʼo, nyi ma haˆ haˆ taˇ zuhˆ. Liꞈ hpu hkʼaw Yeˍsuˆ htaꞈ caˉ daꞈ ve tcuh kaˍ paˍ ve tawˇ hkawˇ kʼoˆ taˍ ve, “hteh kʼaˉ taˍ ve lo cehˬ htaꞈ yawˇ maˇ te cheˆ. Kawˆ faiˇ awˬ caˆ mvuhˇ hkʼawˇ du du te toꞈ chehˇ ve htaꞈ yawˇ maˇ shiˉ.” (Maꞈhtehˍ 12:20) Chi htaꞈ pa taw, nawˬ beˆ maˍ piˇ ve awˬ viˉ awˬ nyi awˬ pon leh yawˇ aˬ htoꞈ ma te beˆ maˍ piˇ cawˇ ve htaꞈ na gʼa tuˬ awˬ pon bon lawˬ piˇ leh, chi ve teˇ gʼaˇ beˆ maˍ piˇ ve htaꞈ yuˬ yehˇ tuˬ Yaˬhoˉvaˬ ga piˇ tuˬ lawˬ sheˍ. Nawˬ beˆ maˍ piˇ ve awˬ viˉ awˬ nyi yawˇ hkʼa dehꞈ dawˇ nyi tuˬ awˬ yanˇ gʼa yehˇ ve yoˬ. Nyi haꞈ shaˉ paˍ yeunˇ hkanˍ leh nyi ma nuˇ nehˬ ve kʼo, yawˇ beˆ maˍ piˇ ve htaꞈ awˬ viˉ awˬ nyi a yeˇ yuˬ ve yoˬ. Beˆ maˍ piˇ ve awˬ hkʼaˇ htaꞈ maˇ heˆ. Leh yawˇ beˆ maˍ piˇ ve htaꞈ haꞈ yuˬ sha tuˬ te piˇ ve yoˬ. A yeˇ uiˍ jaˇ ve lehˬ nyi haꞈ shaˉ paˍ beˆ maˍ piˇ htaˇ Liꞈ hpu hkʼaw hkʼaˬ htaˆ kaꞈ gʼa yuˬ yehˇ cawˇ ve yoˬ.

18. (a) Beˆ maˍ piˇ ve awˬ lawn htaꞈ caˉ daꞈ ve ngaˬ hui aˬ htoꞈ ma htaꞈ tawnˇ taˍ cawˇ ve le? (b) Awˬ han hkʼaw mawˬ ve leh awˇ ceˍ awˇ fa hkʼaw kʼoˆ taˍ ve hkʼe, awˬ pa awˬ e aˬ htoꞈ ma te cawˇ ve le?

¹⁸ Te yaꞈ ve awˬ ceuˬ maˍ laˇ ve. Ngaˬ hui teˇ gʼaˇ le le maˇ biˇ ve pa taw awˬ lawn chi ve hkʼaw beˆ maˍ laˇ taˍ ve htaꞈ hkʼa dehꞈ gʼaꞈ te maˇ gʼa. (Yaˍkoˆ 3:2) Ngaˬ hui te yaꞈ htaˇ awˬ lawn chi ve ngaˬ hui htaꞈ maˍ laˇ ve yoˬ. Leh ngaˬ hui awˬ viˉ awˬ nyi htaꞈ haꞈ ve tehꞈ yawˇ shiˍ htaˇ ngaˬ hui kʼoˆ ve leh te ve awˬ ceuˬ yawˇ nyi ma maˇ sha tuˬ te piˇ ve kʼo, yawˇ haꞈ yuˬ gʼa leh ngaˬ hui htaꞈ venˇ baˆ hpehˇ laˇ sha ve yoˬ.—Awˇ ceˍ awˇ fa “ Awˬ pa awˬ e awˬ pon beˆ maˍ piˇ hkawˇ” hkʼaw nyi sheˍ.

19. Awˬ viˉ awˬ nyi htaꞈ nyi ma sha tuˬ ngaˬ hui hkʼaˬ hkʼe te piˇ gʼa tuˬ le?

¹⁹ Beˆ maˍ piˇ ve lehˬ sha ve maˇ heˆ tehꞈ ngaˬ hui gʼa henˇ˗oˬ ve yoˬ. Ngaˬ hui teˇ gʼaˇ le le maˇ biˇ ve chaw hpehꞈ leh beˆ maˍ laˇ ve chaw kaꞈ maˇ biˇ ve yoˬ. Awˬ lawn chi ve hkʼaw ve awˬ liˇ awˬ hkʼaˇ htaꞈ hkʼa dehꞈ tawnˇ taˍ sheˍ. Nawˬ awˬ viˉ awˬ nyi htaꞈ haꞈ ve pa taw, nawˬ gʼa beˆ maˍ piˇ cawˇ htaˇ, yawˇ htaꞈ beˆ maˍ piˇ tuˬ loˍ jaˇ htaˇ ceh beˆ maˍ piˇ sheˍ. A shu beˆ maˍ piˇ cawˇ ve htaꞈ hkʼa dehꞈ dawˇ nyi sheˍ. Nawˬ maˇ beˆ maˍ piˇ sheˍ htaˇ, yawˇ hkʼaˬ hkʼe hpehꞈ ve le tehꞈ awˉ lawˉ na nyi piˇ cawˇ ve yoˬ. Yawˇ shoꞈ shaꞈ ve aˬ htoꞈ ma cawˬ ve nawˬ na gʼa tuˬ hkʼa dehꞈ na taˍ piˇ sheˍ. Nawˬ awˬ lawn teˇ hpaˍ htaꞈ yawˇ dawˇ ve hkʼe dawˇ ve, nawˬ nyi ma nuˇ nehˬ ve tehꞈ hpeuꞈ maw piˇ leh awˬ viˉ awˬ nyi geh hkʼa dehꞈ meuˆ daꞈ sheˍ. Ngaˬ hui dawˇ teh taˍ ve a yeˇ uiˍ jaˇ ve lehˬ, ngaˬ hui beˆ maˍ piˇ ve htaꞈ awˬ bon gʼa tcuh gaˇ ve yoˬ. Chi hkʼe ceh tiˉ maˇ heˆ. “Nyi ma sha la tuˬ” ngaˬ hui te piˇ gaˇ ve yoˬ.—Tawˇ naˉ ve 27:9.