1-2. Ntshinyi tshivua muanetu wa balume mukuabu mulonge bua difila mibelu?

KUKADI bidimu bia bungi, bakulu babidi bavua baye kukumbula muanetu wa bakaji kampanda uvua katshiyi umueneka mu bisangilu. Mukulu uvua ulombola dikumbula adi wakabadila muanetu wa bakaji au imue mvese idi yakula bua dibuela mu bisangilu. Uvua wela meji ne: dikumbula adi divua dikankamije muanetu au, kadi pakavuabu baya muanetu wa bakaji au wakabambila ne: “Nuenu bana betu kanuena nansha bamanye ntatu indi nayi to.” Bana betu abu bavua bafile mibelu yabu ayi kabayi banji kuebeja muanetu wa bakaji au ntatu ivuaye nayi to. Nunku buende yeye mibelu yabu ayi kayivua ne dikuatshisha to.

² Mukulu uvua ulombola dikumbula udi uvuluka wamba ne: “Tshikondo atshi ngakela meji ne: muanetu wa bakaji au kavua ne kanemu to. Kadi pangakela kabidi meji a bualu abu ngakafika ku dimona ne: mvua mumubadile mvese ivua mikumbanyine pamutu pa kumuela nkonko ivua mikumbanyine bu mudi: ‘Ndutatu kayi luudi nalu?’ ‘Mmushindu kayi undi mua kukuambuluisha?’” Bualu abu buakambuluisha mukulu au bikole. Mpindieu ukadi mulami udi uditeka pa muaba wa bakuabu ubambuluisha bimpe.

3. Nnganyi udi mua kupeshangana mibelu mu tshisumbu?

 ³ Bakulu ke badi ne mudimu wa kufila mibelu padibi bikengela bualu mbalami. Kadi kudi misangu idi bana betu bakuabu ba mu tshisumbu mua kufila pabu mibelu. Tshilejilu, muena Kristo netu kampanda mulume anyi mukaji udi mua kupesha mulunda wende mibelu miangatshila mu Bible. (Mis. 141:5; Nsu. 25:12) Peshi muanetu wa bakaji mukulumpe udi mua ‘kubela bansongakaji’ bua malu a buena adibu baleje mu Tito 2:3-5.  Kabidi, baledi badi ne bua kuikala babela bana babu ne babalongesha. Tshiena-bualu etshi tshidi tshitangila nangananga bakulu. Nansha nanku, malu adimu adi kabidi mua kutuambuluisha petu tuetu bakonkonone mishindu mishilashilangane itudi mua kuikala tufila mibelu mimpe idi mua kukankamija bantu ne kubasaka ku diyitumikila, mibelu yikala mua ‘kusankisha muoyo.’​—Nsu. 27:9.

4. Nnkonko kayi ituandamuna mu tshiena-bualu etshi?

⁴ Mu tshiena-bualu etshi netuandamune nkonko inayi eyi bua difila mibelu: 1) Tshidi tshitusaka menemene bua kufila mibelu ntshinyi? 2) Bidi bikengela anu kufila mibelu anyi? 3) Nnganyi udi ne bua kufila mibelu? 4) Ntshinyi tshiudi mua kuenza bua kufila mibelu idi yambuluisha?

5. Mukulu yeye ne meji mimpe, mmushindu kayi udibi mua kumuambuluisha bua kufila mibelu mu mushindu muakanyine? (1 Kolinto 13:4, 7)

⁵ Bakulu batu banange bena Kristo nabu. Imue misangu batu baleja mudibu babanange padibu babela muntu udi wenda usesuka mu njila. (Gal. 6:1) Kadi kumpala kua mukulu kuakulaye ne muntu au mbimpe anji ele meji a amue malu avua mupostolo Paulo muleje bua dinanga. “Dinanga didi ne lutulu ne bulenga. . . . Didi dikolesha muoyo mu malu onso, ditabuja malu onso, ditekemena malu onso, dinanukila mu malu onso.” (Bala 1 Kolinto 13:4, 7.) Mukulu yeye muelangane meji a mvese eyi nebimuambuluishe bua atangilule tshitu tshimusaka bua kufila mibelu ne bua ayukile ne muena Kristo nende au mu mushindu muakanyine. Pamuapa muntu udibu bapesha mibelu au neayitabe bipepele yeye mumone ne: mukulu au udi umutabalela.​—Lomo 12:10.

6. Ntshilejilu tshimpe kayi tshivua Paulo mushiye?

⁶ Mupostolo Paulo mmukulu uvua mushiye tshilejilu tshimpe tshia kulonda. Pavua bena Kristo ba ku Tesalonike dijinga ne mibelu, Paulo kakelakana bua kubapeshayi to. Mu mikanda ivuaye mubafundile, uvua muanji muakule bua mudimu wabu wa ditabuja, bua mudimu wabu mukole muenza ne dinanga, ne bua dinanukila diabu. Uvua muele meji a nsombelu uvuabu nende, mubaleje muvuaye mumanye ne: bavua ne ntatu ne bavua bananukila mu dikenga. (1 Tes. 1:3; 2 Tes. 1:4) Uvua kabidi muambile bana betu abu ne: bavua tshilejilu tshimpe bua bena Kristo bakuabu. (1 Tes. 1:8, 9) Bakumvua disanka dia bungi bua muvua Paulo mubele kalumbandi ne muoyo mujima! Bivua bimueneke patoke ne: Paulo uvua munange bena Kristo nende bikole. Ke bualu kayi uvua mukumbane bua kupesha bena ku Tesalonike mibelu ivua miakanyine mu mikanda yonso ibidi ivuaye mubatumine.​—1 Tes. 4:1, 3-5, 11; 2 Tes. 3:11, 12.

7. Bua tshinyi muntu udi mua kubenga kuteleja mibelu?

⁷ Ntshinyi tshidi mua kuenzeka tuetu katuyi babele muntu mudibi bikengela? Mukulu kampanda mupiluke udi wamba ne: “Bamue bantu batu babenga kuitaba mibelu bualu mbabapeshayi mu mushindu mubi, kadi ki mbualu kudi bualu kampanda bubi mu mibelu ayi to.” Bidi bitulongesha tshinyi? Bitu bipepele bua muntu kuitaba mibelu padibu bamupeshayi ne dinanga, kadi ki mmu tshiji to.

8. Nnkonko kayi idi mukulu mua kudiela kumpala kua yeye kuangata dipangadika dia kubela muntu?

⁸ Ki mbimpe bakulu bikale anu bazuka bua kupeshangana mibelu lukasa lukasa to. Kumpala kua mukulu kubela muntu mbimpe adiebeje ne: ‘Bidi bikengela anu ngakula anyi? Ndiku mujadike ne: tshidiye wenza etshi ntshibi anyi? Mmushipe mukenji kampanda wa mu Bible anyi? Peshi mmuenenu wende wa malu mmushilangane ne wanyi?’ Bakulu batu  benza malu ne meji padibu babenga kuikala “ne lukasa ku dipatula dia mêyi [abu].” (Nsu. 29:20) Mukulu yeye kayi mutuishibue menemene ne: bidi bikengela kubela muntu kampanda, mbimpe ayukile ne mukulu mukuabu bua kumanya ni udi wela pende meji ne: muntu au mmuenze bualu budi kabuyi bupetangana ne mikenji ya mu Bible.​—2 Tim. 3:16, 17.

9. Tshilejilu tshia Paulo tshidi tshitulongesha tshinyi bua difila mibelu pa bidi bitangila mvuadilu ne didilengeja? (1 Timote 2:9, 10)

⁹ Tuangatabi tshilejilu. Fuanyikijabi ne: mukulu kampanda udi usamisha mutu bua mvuadilu ne ndengejilu wa muena Kristo nende. Mukulu au udi mua kudiebeja ne: ‘Kudiku mvese kampanda udi unganyishila bua kufila mubelu anyi?’ Bu mudiye kayi musue kuambila muntu au bidiye yeye wela meji, mbimpe ebeje mukulu mukuabu peshi muena Kristo mukuabu mushindame bua bualu abu. Nanku badi mua kukonkonona bonso pamue mibelu ivua Paulo mufile bua mvuadilu ne didilengeja. (Bala 1 Timote 2:9, 10.) Muaba eu Paulo mmuakule bua mêyi manene adi atangila bantu bonso, wamba mudibi biakanyine bua mvuadilu wa muena Kristo ikale mukumbane, wa bupuekele ne kayi upendesha Nzambi to. Kadi kavua muleje mulongolongo wa malu adi muntu mua kuenza ne adiye kayi mua kuenza to. Uvua mumanye ne: bena Kristo badi mua kusungula bua kuvuala ne kudilengeja mudibu basue kadi bashale balamate anu Mifundu. Nunku bua bakulu kujadikabu ni bidi bikengela bua kufila mibelu, mbimpe batangile bua kumanya bikala tshidi muntu musungule atshi tshidi tshileja bupuekele ne katshiena tshipendesha Nzambi to.

10. Ntshinyi tshitudi ne bua kuvuluka bua tshidi muntu mua kusungula bua kuenza?

¹⁰ Mbimpe tuikale bavuluke ne: bena Kristo babidi bashindame mu nyuma badi mua kusungula bua kuenza malu mu mishindu ibidi mishilangane idi kayiyi mibi to. Katuena ne bua kuenzeja bena Kristo netu bua balonde anu mutudi tuetu tumona malu to.​—Lomo 14:10.

11-12. Nnkonko kayi idi mukulu ne bua kudiela biobi bikengela kupesha muntu mibelu? Bua tshinyi?

¹¹ Biobi bikengela anu kupesha muntu mibelu, mbimpe kudiebeja ne: Nnganyi udi ne bua kumupeshayi? Kumpala kua mukulu kubelaye muanetu wa bakaji ukadi ku dibaka anyi utshidi muana, mbimpe anji kumonangana ne mfumu wa dîku; udi pamuapa mua kujinga bua kudiangatshila yeye nkayende bualu abu mu bianza. * Peshi mfumu wa dîku udi mua kulomba bua ikalaku padi mukulu au ufila mibelu. Misangu mikuabu bidi mua kuikala bimpe bua muanetu wa bakaji mukulumpe abele muanetu utshidi nsongakaji, anu mutudi bamone mu  tshikoso 3.

 ¹² Kudi kabidi bualu bukuabu bua kukonkonona. Mukulu udi mua kudiebeja ne: ‘Meme ke udi mukumbane menemene bua kubela muntu kampanda anyi, peshi bidi mua kuikala bimpe muntu mukuabu yeye mumubele?’ Tshilejilu, muntu udi ne lutatu lua dibenga kudiangata ne mushinga udi mua kuitaba bipepele mubelu udibu bamupesha kudi mukulu ukadi pende mutuilangane ne lutatu alu, bishilangane ne bobu bamupeshawu kudi mukulu mukuabu. Mukulu au mmufuane pamuapa kumvua mudi mukuende au umvua ne kumuambila malu adiye mua kuitaba bipepele. Nansha nanku, bakulu bonso badi ne dibanza dia kukankamija bena Kristo nabu ne kubasaka bua bakaje malu bilondeshile tshidi Mifundu yamba. Tshidi ne mushinga menemene nkupesha muntu mibelu idi ikengedibua nansha biobi bikale ne: udi uyifila au katu muanji kutuilangana ne nsombelu udi nende muntu to.

13-14. Bua tshinyi mbimpe mukulu ikala uteleja?

¹³Ikala mudiakaje bua kuteleja. Padi mukulu ujinga kubela muntu, mbimpe adiebeje ne: ‘Mmalu kayi andi mumanyaku bua muanetu eu? Mmalu kayi adiye mua kuikala nawu matuku aa? Udi mua kuikala utuilangana ne ntatu indi tshiyi mumanye anyi? Mpindieu eu ntshinyi tshidiye natshi dijinga menemene?’

¹⁴ Dîyi dinene didi mu Yakobo 1:19 didi ditangila badi bapeshangana mibelu. Yakobo wakafunda ne: “Muntu yonso udi ne bua kuikala ne lukasa ku diteleja, ne lujoko ku diakula, ne lujoko ku dikuata tshiji.” Mukulu udi mua kuela meji ne: mmumanye malu onso, kadi bidi nanku bushuwa anyi? Badi batuvuluija mu Nsumuinu 18:13 ne: “Padi muntu wandamuna bualu kumpala kua kumvua mudi malu, nditshimbakana ne dipuekeshibua dia milongo.” Mbimpe kudiumvuila malu mudiwu mukana mua muntu nkayende. Mmumue ne: kuanji kumuteleja kumpala kua kuakula. Vuluka tshivua mukulu udibu bakuile ku mbangilu kua tshiena-bualu etshi mulonge bua difila mibelu. Wakamona ne: pamutu pa kutuadija dikumbula ne malu avuaye mulongolole bua kuamba, bivua bimpe anji kuela muanetu wa bakaji au nkonko bu mudi eyi: “Mmalu kayi audi mua kuikala nawu matuku aa?” “Ndi mua kukuambuluisha mushindu kayi?” Bakulu bobu baditatshisha bua kumanya malu mudiwu, nebikale pamuapa bipepele bua bobu kuambuluisha bana babu ne kubakankamija.

15. Mmunyi mudi mukulu mua kutumikila dîyi dinene didi mu Nsumuinu 27:23?

¹⁵Ikala mumanye tshisumbu tshia mikoko. Anu mudibu baleje ku ntuadijilu, kufila mibelu mimpe kakuena kumvuija anu kubala imue mvese patupu peshi kupesha anu muntu lungenyi kampanda lumue anyi ibidi to. Bena Kristo netu mbasue kumona ne: tudi tubatabalela, tudi tubumvua ne tudi basue kubambuluisha. (Bala Nsumuinu 27:23.) Mbimpe bakulu benze muabu muonso bua kudia bulunda bukole ne bena Kristo nabu.

16. Ntshinyi tshidi mua kuambuluisha bakulu bua kufila mibelu miakanyine?

 ¹⁶ Mbimpe bua bakulu benze muabu muonso bua bena mu tshisumbu kabikadi bamona ne: batu bajinga kuyukila nabu anu dîba didibu benze bualu bubi kampanda to. Kadi bidi bikengela bikale bayukila ne bena Kristo nabu pa tshibidilu, ne baleja mudibu babatabalela padibu batuilangana ne ntatu. Mukulu kampanda mupiluke udi uleja ne: “Wewe wenza nanku nebienze bua nudie bulunda bukole. Dîba adi nebikale bipepele bua wewe kupesha muntu mibelu padibi bikengela.” Nunku muntu uudi ubela au neitabe pende mibelu bipepele.

17. Ndîba kayi menemene didibi mua kulomba mukulu bua kuikala ne lutulu ne muntu wa malu mimpe?

¹⁷Ikala ne lutulu ne muena malu mimpe. Padi muntu ubenga kuitaba mibelu ya mu Bible, mbimpe kuikala ne lutulu ne muena malu mimpe. Kabiena bikengela mukulu afiike tshiji bobu kabayi bitabe diakamue mibelu idiye ufila anyi bobu kabayi bayitumikile to. Bible ukavua muambe bua Yezu ne: “Kakuzaza dilenge didibu baboze, kakujima mukaba wa muendu udi ufuima.” (Mat. 12:20) Nanku padi mukulu usambila pa nkayende, mbimpe alombe Yehowa bua ambuluishe muntu udiye uya kupesha mibelu bua amanye bua tshinyi badi bamupesha mibelu ne ayitumikile. Mukulu yeye ne lutulu ne muikale muntu wa malu mimpe, muntu udiye wambuluisha ne mibelu au kakuimanyina anu pa mushindu udiye umubela to, kadi neimanyine nangananga pa bikalaye mua kuamba. Mu kuamba kuimpe, bidi bikengela kuangatshila mibelu yonso mu Dîyi dia Nzambi.

18. a) Ntshinyi tshitudi ne bua kuvuluka patudi tupeshangana mibelu? b) Anu mudibu baleje mu tshimfuanyi tshidi mu kazubu, mmalu kayi adi baledi aba bakuila?

¹⁸Vuluka bilema biukadi muenze bua kubienzuludi. Bu mutudi bapange bupuangane kabiakuikala anu bipepele bua kutumikila malu atudi balonge mu tshiena-bualu etshi ne mu katoba to. (Yak. 3:2) Nebitufikile anu bua kuenza bilema, kadi tuetu babienze mbimpe tudienzeje bua kubenga kubienzulula. Bena Kristo netu bobu bamona ne: tudi babanange, nebikale pamuapa bipepele bua kutufuilabu  luse tuetu bambe anyi benze bualu budi bubatapa ku muoyo.​—Tangila kabidi kazubu ka “ Dimanyisha kudi baledi.”

19. Ntshinyi tshitudi mua kuenza bua kusankisha mioyo ya bena Kristo netu?

¹⁹ Anu mutudi bafume ku dimona, ki mbipepele bua kufila mibelu miakanyine to. Tuetu ne bantu batudi tubela tudi bonso bapange bupuangane. Tuvulukayi mêyi manene atudi bakonkonone mu tshiena-bualu etshi. Tuikalayi bajadike tshidi tshitusaka menemene bua kupesha muntu mibelu. Mbimpe tuikale kabidi bajadike ni bidi mene bikengela kupesha muntu mibelu, kabidi ni wewe muine udi mukumbane bua kumupeshayi. Kumpala kua kubela muntu anji muela imue nkonko, umuteleje ne ntema bua umanye malu adiye utuilangana nawu. Dienzeja bua kumona malu mudiye yeye uamona. Ikala muntu wa malu mimpe, divuija mulunda munene wa bena Kristo nebe. Vuluka kipatshila katudi tupeshila muntu mibelu aka: Tudi basue bua mibelu itudi tufila ikale miakanyine ne ‘idi isankisha muoyo.’​—Nsu. 27:9.