1-2. Tadikaka ta be sisiba ihenina karana ai dahaka e diba?

 LAḠANI momo gunadiai, elda rarua na taihu ta e vadivadi henia, ia na hebou momo e readiava. Edia herevahereva lalonai elda ta ese hebou baitala karana e herevalaia siridia e duahi henia. Tadikaka na e laloava edia vadivadi ese taihu na e hagoadaia, to idia raruosi ese taihu do asie rakatania neganai, taihu ese idia e vasi hamaorodia, “Umui tadikaka na so lalopararamu lau be dahaka hekwakwanai na davarimu.” Tadikaka ese una taihu na sisiba e henia to iena hekwakwanai na se henanadailaia. Una dainai, taihu na e mamia una sisiba ese ia na se durua.

² Unu Baibul siridia e herevalai elda na ini e gwau toma: “Una nega ai, na laloava una taihu ese ai na se matauraimai. To gabeai na laloparara, lau na baina ḡaukaralai siridia mo na lalo to taihu ese e davariva hekwakwanaidia be asina lalodia, lau be ini do nama henanadai toma, ‘Emu mauri ai be dahaka hekwakwanai haida o davarimu?’ ‘Edena dala ai baina durumu diba?’” Una elda na e vara ḡauna amo mai anina bada ḡauna e dibaia. Hari ia na mai hebogahisina ida ena tadikaka taihu e durudiamu.

3. Kongrigeisin ai daidia be sisiba bae heni diba?

 ³ Elda na mai edia maduna, nega maorodia ai sisiba bae heni. To, nega haida kongrigeisin ai ma haida ese sisiba bae heni diba. Heḡereḡere, tadikaka ta o taihu ta ese Baibul amo turana ta baine sisiba henia diba. (Sal. 141:5; Her. 25:12) Eiava taihu badana ta ese eregabe hahinena enai Tito 2:3-5 ena sisiba  baine heni diba. Bona nega momo, tama bona sina ese sisiba bona matahakani na natudia bae henidia diba. Una dainai ena be ina atikol na kongrigeisin elda taudia e herevalaidiamu, to sisiba baita heni dalana baita dibamu karana ese ita iboudai be durudamu sisiba namodia baita heni bona ‘ta lalona baita hamoalea.’​—Her. 27:9.

4. Ina atikol ai dahaka baita herevalaimu?

⁴ Ina atikol ai, henanadai foa baita haerelaimu: (1) Sisiba baita heni badina maorona be dahaka? (2) Ina sisiba baina heni, eiava? (3) Daika ese ina sisiba baine heni? (4) Sisiba maorona be ede ba heni toma?

5. Edena dala ai badi maorona ese elda ta baine durua diba sisiba maorona baine heni? (1 Korinto 13:4, 7)

⁵ Elda taudia ese tadikaka taihu na e lalokau henidiamu. Nega haida, una lalokau e hahedinaraiamu dalana na bema e itaiamu ta na dala kererena e badinaiamu neganai e sisiba heniamu. (Gal. 6:1) Elda ese una tadikaka o taihu do se hereva henia neganai, reana aposetolo Paulo ese lalokau e herevalaia dalana baine laloa guna. “Lalokau na e haheauka taritarimu; lalokau na mai ena heabi-dae . . . ḡaukara iboudiai e goadalaimu; ḡau iboudiai e abi daemu; iboudiai e laromu, dika iboudiai e haheauka henimu.” (1 Korinto 13:4, 7 ba duahi.) Elda tauna ese unu Baibul siridia be lalodia dobumu neganai, una ese be duruamu ena sisiba na mai lalokauna ida be henimu. Bema sisiba e abiamu tauna ese na be mamiamu elda tauna ese ia na e laloa badamu, ia ese una sisiba na be abia daemu.​—Roma 12:10.

6. Aposetolo Paulo be dahaka haheitalai namona e hahedinaraia?

⁶ Aposetolo Paulo na elda taudia ediai haheitalai namona e hahedinaraia. Heḡereḡere, Paulo na e itaia Tesalonika tadikaka taihu na sisiba bae abi neganai, e sisiba henidia. To, iena revareva ai, Paulo ese edia kamonai karadia, iura heni ḡaukaradia, bona haheauka karadia na e herevalai guna. Danu edia noho dalana na e laloa, bona e hanamodia badina e davariva hisihisi bona daḡedaḡe na e haheaukalaiva. (1 Tes. 1:3; 2 Tes. 1:4) Danu e hadibadia idia na haheitalai namona Kristen taudia ma haida ediai. (1 Tes. 1:8, 9) Paulo ena hahenamo herevadia ese idia na e hamoaledia! Asita daradaramu Paulo ese ena tadikaka taihu na e lalokau henidiava. Una dainai Tesalonika e tore henidia revareva ruaosi lalodiai sisiba maorodia e heni.​—1 Tes. 4:1, 3-5, 11; 2 Tes. 3:11, 12.

7. Dahaka dainai ta na basine uramu sisiba baine abi dae?

⁷ Dahaka be vara dibamu bema sisiba na dia dala maorona ai baita henimu? Elda ḡaukara e karaia daudau tadikaka ta na e gwa, “Haida na sisiba asie abi daemu, badina dia e heni herevana dainai, to lalokau dalana ai sisiba se heni dainai.” Ita be dahaka e hadibadamu? Namona na mai lalokauda ida ta baita sisiba henia, dia lalo-dika eiava badu ai, unu amo sisiba baine abi tauna na sisiba be abi dae haraḡamu.

8. Elda ta na sisiba do se heni neganai ededia henanadai baine lalo guna na namo?

⁸ Namona na elda taudia na basie haraḡaharaḡa sisiba bae heni totona. Elda ta na sisiba do se heni neganai, sibona do baine henanadai: ‘Hereva ta baina gwauraia be namo, eiava? Lau na na uramu baina sisiba henia tauna ese e karaiamu karana be kerere, a? Ia ese e karaia karana be Baibul ese e gwauraiamu kerere, a? Eiava ia e karaia karana ai emai lalohadai na i’idau?’ Aonega karana na elda  taudia na basie “hereva haraḡa.” (Her. 29:20, NWT) Bema elda ta na e daradaramu ta baine sisiba henia eiava lasi, namona na elda ma ta baine nanadaia bema ia danu e laloamu una tadikaka ese e karaiamu karana na Baibul ena hahekau herevana ta e utuamu.​—2 Tim. 3:16, 17.

9. Paulo ese dabua bona heḡoeva karana e sisibalaia dalana amo dahaka ta dibamu? (1 Timoteo 2:9, 10)

⁹ Haheitalai ta mani a laloa. Bema elda tauna ta na e laloamu tadikaka o taihu ta ena dabua bona heḡoeva dalana na dia maoro. Namona na sibona baine henanadai, ‘Ia be Baibul ena hereva ta e utuamu dainai baina sisiba henia, a?’ Una elda tauna na basine uramu sibona ena lalohadai baine gwaurai dainai, ia ese elda ma ta eiava lo tadikaka o taihu ta ena lalohadai baine abia guna. Bena idia raruosi ese Paulo ena sisiba dabua bona heḡoeva karana ai bae herevalaia hebou diba. (1 Timoteo 2:9, 10 ba duahi.) Paulo ese e heni hahekau herevadia amo, Kristen tauna na baine haeroa bema ia e karaiamu dabuana ese Iehova ladana be hadikaiamu eiava lasi. To Paulo na se gwa ededia dabua be ba hahedokilai bona ededia dabua be basio hahedokilai. Paulo na dibana tadikaka taihu na mai edia maoro sibodia edia dabua bae abi hidi, to namona na Baibul ena hahekau herevana heḡereḡerediai unu abi hidi bae kara. Una dainai bema elda tauna ta na e uramu sisiba baine heni, namona na baine haeroa bema una tadikaka o taihu be hemataurai dabuadia e abi hidimu eiava lasi.

10. Ma haida edia abi hidi be ede baita laloa toma?

¹⁰ Namona na baita laloatao ena be lo Kristen tadikaka rarua na abi hidi idaudia rua be karamu, to basita gwau dibamu ta na maoro a ta be kerere. Namona na eda tadikaka taihu na basita doridia ita siboda eda lalohadai maoro bona kerere ai bae badinaia.​—Roma 14:10.

11-12. Bema elda tauna ta na sisiba baine heni, ededia henanadai baine lalo, bona dahaka dainai?

¹¹ Bema ta sisiba baine abi na namo, namona na ina henanadai baita laloa, Daika ese ina sisiba baine heni? Elda tauna ta ese headava hahinena eiava maraḡina ta do se sisiba henia neganai, namona na ruma bese kwarana do baine hereva henia guna, badina reana sibona be uramu adavana eiava natuna baine hereva henia. * Eiava elda na sisiba be henimu neganai reana ruma bese kwarana na be uramu baine helai vareai. Bona  paragraf 3 ai tame herevalaia heḡereḡerena, reana nega haida lo taihuna ese eregabe taihuna baine sisiba henia na namo.

 ¹² Elda ese baine laloa ḡauna ma ta na ina. Reana sibona baine henanadai, ‘Ina sisiba be lau ese baina heni, eiava ma ta ese baine heni be namo?’ Heḡereḡere, bema ta na e mamiamu ia na asi anina, reana hekwakwanai unu bamona e hahanaia eldana ta ese ia be sisiba heniamu neganai, ena sisiba na be abia daemu. Reana una elda ese ia ena hemami be lalopararalaiamu, bona hahegoada herevadia be gwauraimu. To, elda taudia iboudiai na mai edia maduna tadikaka bona taihu bae hagoadadia bona bae durudia Baibul ena hahekau herevadia heḡereḡerenai sensi bae kara. Una dainai mai anina bada ḡauna na, elda ese sisiba na baine heni diba herevana guna una hekwakwanai e davaria eiava lasi.

13-14. Dahaka dainai elda tauna baine kamonai namonamo na mai anina bada?

¹³ Ba kamonai. Elda ta na sisiba baine heni totona e heḡaeḡaemu neganai, namona na sibona baine henanadai: ‘Lau mai dibagu tadikaka ena noho dalana, eiava? Ena mauri ai be dahaka e varamu? Ia be hekwakwanai haida e davarimu, eiava? Ia be dahaka heduru e uramu?’

¹⁴ Sisiba e henimu taudia ediai Iakobo 1:19 ena hahekau herevana na mai anina bada. Iakobo na e gwa: “A ta ta hereva ikamonaina ai baine haraḡa, hereva igwauraina ai baine halahe, badu ai danu baine halahe.” Reana elda ta na be laloamu ḡau iboudiai na mai dibana. To Hereva Lada-isidia 18:13 na e gwaumu: “Tau ta do se kamonai negana ai na e haeremu, una na ena kavakava bona ena hemarai.” Namona na sivarai ibounai na ba sisiba henia tauna ena amo ba dibaia. Una dainai elda ta na baine kamonai namonamo bena gabeai baine hereva. Ina atikol matamanai tame herevalaia elda ese e dibaia ḡauna ba laloatao. E laloparara e heḡaeḡaelai herevadia amo ena vadivadi do basinema hamatamaia, to reana taihu do bema nanadaia guna: “Emu mauri ai be dahaka hekwakwanai haida o davarimu?” “Edena dala ai baina durumu diba?” Elda taudia na nega be atomu unu ḡau be haero namonamomu neganai, idia ese tadikaka taihu na be durudia namonamomu bona be hagoadadiamu.

15. Elda taudia ese Hereva Lada-isidia 27:23 ena hahekau herevana be ede bae badinaia toma?

¹⁵ Tadikaka taihu na ba dibadia namonamo. Matamanai tame herevalaia heḡereḡerena, sisiba maorona baita heni karana na dia Baibul siri haida eiava heduru herevadia ta eiava rua mo baita heni. Lasi, to namona na tadikaka taihu na bae mamia ita ese idia na ta lalodia badamu, ta lalopararalaidiamu, bona ta uramu baita durudia. (Hereva Lada-isidia 27:23 ba duahia.) Elda taudia na bae ḡaukara goada tadikaka taihu turadia namodia ai baela totona.

16. Dahaka ese elda taudia baine durudia sisiba maorodia bae heni?

¹⁶ Asita uramu tadikaka taihu na bae laloa elda taudia na sisiba bae heni neganai,  eiava kerere ta bae hamaoromaoroa neganai mo, tadikaka taihu bae hereva henidia. To, namona na hanaihanai tadikaka taihu bae hereva henidia, bona hekwakwanai e davarimu negadia ai bae hahedinaraia idia na e lalodia badamu. Laḡani daudau elda ḡaukarana e karaia tadikakana ta na e gwa: “Unu bo kara tomamu neganai, oi na idia turadia namodia ai bo laomu. Bena sisiba bo henimu neganai, emu ai na basine aukamu unu ba kara toma.” Bona sisiba e abiamu tauna ese sisiba na be abia dae haraḡamu.

17. Edena nega ai elda tauna na baine haheauka bona hebogahisi baine hahedinaraia?

¹⁷ Ba haheauka bona ba hebogahisi. Bema ta na matamanai Baibul amo e abiamu sisibana na e dadaraiamu, haheauka bona hebogahisi karana na mai anina bada. Bema elda tauna ese e sisiba heniamu tauna na se uramu iena sisiba baine abia dae eiava baine badinaia, namona na elda tauna na basine badu haraḡa. Baibul ese Iesu na ini e perovetalaia toma: “Siriho pou basine hakwaidua, Gida basine habodoa.” (Mat. 12:20) Una dainai elda tauna na sibona e ḡuriḡurimu neganai, Iehova baine noia sisiba e abia tauna baine durua una sisiba badina baine lalopararalaia bona baine badinaia. E sisiba henia tauna na nega baine henia e gwaurai herevadia baine lalodia. Bema elda tauna na mai haheaukana bona hebogahisina ida be herevamu, tadikaka na be kamonaimu. To, namona na Dirava ena hereva heḡereḡerenai sisiba ba heni.

18. (a) Sisiba ta henimu neganai dahaka baita laloatao na namo? (b) Rau 18 ena laulau ginigunana bona maua ese e hahedinaraia heḡereḡerena, tama sina be dahaka e herevalaimu?

¹⁸ Emu kerere amo diba bavabi. Ita na dia ḡoevadae tauda dainai, ina atikol ese e herevalai ḡaudia iboudiai na basita badinadia ḡoevaḡoeva dibamu. (Iak. 3:2) Vaia kerere na baita karamu, to namona na unu amo diba baita abi. Bema eda tadikaka bona taihu na be mamiamu idia na ta lalokau henidiamu, ediai na basine aukamu eda dika bae gwautao bema eda hereva o kara ta amo idia ta hahisidia.​—Ina maua ba itaia “ Tama Sina E.”

19. Edena dala ai eda tadikaka bona taihu lalodia baita hamoalea?

¹⁹ Tame itaia heḡereḡerena, sisiba maorodia baita heni na mai hekwarahina. Ita bona ta sisiba henidiamu taudia na dia ḡoevadae tauda. Namona na ina atikol ai tame herevalai hahekau herevadia na baita lalodiatao. Badi maorona dainai sisiba ba heni. Danu, ba haeroa sisiba ba heni be namo eiava, bona daika ese una sisiba baine heni diba. Sisiba do so heni neganai, sibomu henanadai haida ba heni bona ba kamonai namonamo, unu amo una tadikaka eiava taihu ena hekwakwanai na bo lalopararalaia namonamomu. Ena lalohadai ba dibaia. Tadikaka taihu ba kara namo henidia bona turadia namodia ai baola. Baita laloatao ḡauna na ina: Namona na sisiba maorodia baita heni bona eda sisiba amo, ‘ta lalona baita hamoalea.’​—Her. 27:9.