1-2. Apre ki li ti donn enn konsey, ki leson enn frer inn aprann?

ENN fwa, de ansien ti al vizit enn ser ki pa ti pe vinn renion depi inpe letan. Enn parmi sa de ansien-la ti montre ser-la sertin verse Labib lor linportans pou asiste bann renion. Li ti panse ki zot ti reisi ankouraz ser-la. Me avan ki zot ale, ser-la ti dir zot: “Zot pa konn nanye lor mo sitiasion.” Sa bann frer-la ti donn bann konsey san ki zot esey konpran ser-la so sitiasion. Alafin, ser-la pa ti santi li ankouraze ditou!

² Azordi, sa frer ki ti montre bann verse la, dir: “Sa lepok-la, mo ti panse ki ser-la pa ti ena okenn rekonesans pou bann konsey ki li ti gagne. Me avek letan, mo’nn konpran ki mo ti plis gagn traka bann verse Labib ki mo ti pou servi, ki gagn traka sa ser-la. Mo ti bizin esey konn sitiasion sa ser-la. Lerla, mo ti pou kone kouma mo kapav ed li.” Sa ansien-la inn aprann enn leson bien inportan. Azordi, li enn berze ki konpran lezot ek ki bien ankourazan.

3. Kisannla dan lasanble kapav donn bann konsey?

 ³ Antan ki bann berze, bann ansien ena responsabilite pou donn bann konsey kan bizin. Me parfwa, bann lezot frer ek ser osi pou bizin donn bann konsey. Par exanp, enn frer ouswa enn ser kitfwa pou bizin donn enn kamarad bann konsey Biblik. (Ps. 141:5; Prov. 25:12) Ouswa, kitfwa bann ser ki ena lexperyans pou bizin konsey “bann zenn fam” dan bann domenn ki mansione dan Tit 2:3-5. Ek biensir, bann paran bizin konsey zot bann zanfan. Alor, mem si sa lartik-la konsern plis bann ansien, nou tou nou pou gagn bann bienfe kan nou pou gete kouma  nou kapav donn bann konsey ki ankourazan ek ki “fer leker kontan.”​—Prov. 27:9.

4. Ki nou pou examine dan sa lartik-la?

⁴ Dan sa lartik-la, nou pou reponn sa kat kestion-la: (1) Ki kitsoz bizin motiv mwa pou donn enn konsey? (2) Eski li vremem neseser ki mo donn sa konsey-la? (3) Kisannla bizin donn sa konsey-la? (4) Kouma mo kapav donn enn konsey ki efikas?

5. Kifer enn Kretien pou aksepte konsey enn ansien pli fasilman, si ansien-la donn li sa konsey-la avek amour? (1 Korintien 13:4, 7)

⁵ Bann ansien kontan zot bann frer ek ser. Ek parfwa, zot montre sa lamour-la kan zot konsey enn kikenn ki pe al fer enn move kitsoz. (Gal. 6:1) Me avan ki enn ansien al koz avek enn dimounn, li bon ki li reflesi lor seki lapot Pol ti dir lor lamour. “Lamour bien pasian, lamour li bon. . . . Lamour toultan pe proteze, toultan pe fer konfians, toultan ena lesperans, toultan persevere.” (Lir 1 Korintien 13:4, 7.) Kan enn ansien medit lor sa bann verse-la, sa pou ed li pou fer sir ki se lamour ki pe motiv li pou donn enn konsey. Enn kikenn pou aksepte konsey enn ansien pli fasilman, si li santi ki ansien-la ena lamour pou li.​—Rom. 12:10.

6. Ki bon lexanp lapot Pol inn done?

⁶ Lapot Pol enn bon lexanp pou bann ansien. Par exanp, kan bann frer dan Tesalonik ti bizin bann konsey, Pol pa ti ezite pou donn zot. Me avan, Pol ti felisit zot pou zot fidelite, zot lamour, zot travay, ek zot landirans. Li ti osi reflesi lor zot sitiasion, ek li ti dir zot ki li ti kone ki zot lavi pa ti fasil, ek ki zot ti pe andir bann persekision avek fidelite. (1 Tes. 1:3; 2 Tes. 1:4) Li ti mem dir zot ki zot ti enn bon lexanp pou bann lezot Kretien. (1 Tes. 1:8, 9) Sirman sa bann frer ek ser-la ti bien kontan kan Pol ti felisit zot! Li kler ki Pol ti bien kontan so bann frer ek ser. Se pou sa rezon-la ki, dan toulede let ki li ti ekrir zot, li ti reisi donn zot bann konsey ki efikas.​—1 Tes. 4:1, 3-5, 11; 2 Tes. 3:11, 12.

7. Kifer enn kikenn kapav mal reazir kan li gagn enn konsey?

⁷ Ki kapav arive kan nou donn enn konsey dan enn move fason? Enn ansien ki ena lexperyans, dir: “Sertin frer ek ser mal reazir kan zot gagn enn konsey, pa parski konsey-la pa bon, me parski finn donn zot sa konsey-la dan enn move fason.” Ki leson nou aprann? Enn kikenn pou aksepte enn konsey pli fasilman si li’nn gagn sa konsey-la avek amour, pa avek koler.

8. Ki kestion enn ansien bizin poz limem avan ki li desid pou konsey enn kikenn?

⁸ Fode pa ki bann ansien prese pou konsey enn kikenn. Avan ki li konsey enn kikenn, enn ansien pou demann limem: ‘Eski li vremem neseser ki mo dir kitsoz? Eski mo sir ki sa dimounn-la pe fer enn move kitsoz? Eski li pe fer enn kitsoz ki Labib kondane, ouswa se zis mwa ki pans koumsa?’ Bann ansien ki ena sazes, zot reflesi bien avan zot koze. (Prov. 29:20) Si ansien-la pa sir si sa dimounn-la bizin enn konsey, li kapav al get enn lot ansien. Lerla, toulede ansien pou gete  si sa dimounn-la inn fer bann kitsoz ki kont bann prinsip Labib ek si li bizin enn konsey.​—2 Tim. 3:16, 17.

9. Kan nou bizin donn enn konsey lor labiyman ek kwafir, ki nou kapav aprann ar lapot Pol? (1 Timote 2:9, 10)

⁹ Anou pran enn lexanp. Fer koumadir, enn ansien trakase akoz labiyman ek kwafir enn konpagnon Kretien. Ansien-la kapav demann limem, ‘Eski mo ena enn rezon Biblik pou koz avek li?’ Ansien-la pa pou anvi donn so prop lopinion. Alor, kitfwa li kapav al get enn lot ansien ki ena matirite, pou kone ki li panse lor la. Kitfwa, zot kapav get ansam bann konsey ki lapot Pol ti done lor labiyman ek kwafir. (Lir 1 Timote 2:9, 10.) Lapot Pol ti donn sertin prinsip lor labiyman. Par exanp, li ti dir ki enn Kretien bizin abiy avek respe ek sinplisite. Parkont, Pol pa ti donn enn lalis bann linz ki kapav ouswa pa kapav mete. Li ti kone ki so bann frer ek ser ti kapav met seki zot anvi, tanki sa pa kont bann prinsip Labib. Alor, avan ki bann ansien desid pou donn enn konsey lor labiyman, zot bizin gete si sa dimounn-la abiy avek respe ek sinplisite.

10. Ki kitsoz pou ed nou pou respekte bann swa ki lezot fer?

¹⁰ Fode pa nou bliye ki de Kretien, ki ena matirite, kapav fer de diferan swa, me ki toulede swa kapav bon. Fode pa nou obliz lezot pou pans parey kouma nou.​—Rom. 14:10.

11-12. Kan bizin donn enn kikenn enn konsey, ki kestion enn ansien bizin poz limem, ek kifer?

¹¹ Kan bizin donn enn kikenn enn konsey, prosin kestion ki enn ansien bizin poz limem se, ‘Kisannla bizin donn sa konsey-la?’ Avan ki li konsey enn ser marye ouswa enn zanfan ki miner, enn ansien pou koz ar sef fami-la, parski kitfwa sef fami-la pou anvi okip sa sitiasion-la limem. * Ouswa, sef fami-la kitfwa pou anvi ansam avek ansien-la, kan ansien-la pou konsey so madam ouswa so zanfan. Ek parey kouma nou’nn trouve dan  paragraf 3, dan sertin sitiasion, kitfwa li pou pli bon ki enn ser pli aze konsey enn ser ki pli zenn.

¹² Ena enn lot kitsoz osi lor ki bann ansien bizin reflesi avan ki zot donn enn konsey. Enn ansien kapav demann limem, ‘Eski momem meyer dimounn pou donn sa konsey-la, ouswa eski li ti pou pli bon ki enn lot dimounn donn sa konsey-la?’ Par exanp, si enn kikenn ena santiman ki li pa vo nanye, li pou pli fasil pou  li aksepte konsey enn ansien ki finn ena mem santiman ki li. Kifer? Parski sa ansien-la kitfwa pou konpran santiman sa dimounn-la pli bien. Ek sa dimounn-la kitfwa pou aksepte so konsey pli fasilman. Selman, tou bann ansien ena responsabilite pou ankouraz zot bann frer ek ser ek pou ed zot met an pratik bann prinsip Labib. Alor, kan bizin donn enn kikenn enn konsey, seki pli inportan se pa lexperyans ki enn ansien ena, me se ki sa dimounn-la gagn konsey ki li bizin.

13-14. Kifer li inportan ki bann ansien ekout lezot?

¹³To bizin dispoze pou ekoute. Avan ki enn ansien donn enn konsey, li bizin demann limem: ‘Ki mo kone lor sa dimounn-la? Par ki sitiasion li pe pase? Eski li pe pas par bann difikilte ki mo pa kone? Ki kitsoz li plis bizin asterla?’

¹⁴ Avan ki enn kikenn donn enn konsey, li bizin reflesi lor prinsip ki ena dan Zak 1:19. Sa verse-la dir: “Sakenn bizin rapid pou ekoute, me pa prese pou koze, pa ankoler vit.” Enn ansien kapav panse ki li konn sitiasion enn kikenn, me eski li vremem konn so sitiasion? Proverb 18:13 dir: “Kan enn dimounn reponn avan mem ki li tann tou bann linformasion, sa li bien bet ek se enn laont pou li.” Alor, avan ki enn ansien konsey enn kikenn, li pou pli bon si li demann dimounn-la pou explik li so sitiasion. Ansien-la bizin ekout dimounn-la avan ki li koze. Pa bliye leson ki sa ansien ki nou’nn mansione dan koumansman sa lartik-la, ti aprann. Li ti konpran ki, olie ki li koumans so vizit par bann verse ki li ti prepare, li ti bizin poz ser-la bann kestion kouma: “Eski to bien?” “Eski ena kitsoz ki pe fatig twa?” “Kouma mo kapav ed twa?” Si bann ansien pran letan pou konn sitiasion zot bann frer ek ser, zot pou plis kapav ed zot ek ankouraz zot.

15. Kouma bann ansien kapav swiv prinsip ki ena dan Proverb 27:23?

¹⁵Konn bien to bann mouton. Kouma nou finn trouve dan koumansman sa lartik-la, pou ki nou konsey li efikas, fode pa nou zis lir de-trwa verse ouswa zis donn de-trwa sigzesion. Nou bann frer ek ser bizin santi ki nou gagn zot traka, ki nou konpran zot, ek ki nou anvi ed zot. (Lir Proverb 27:23. *) Bann ansien bizin fer zot best pou vinn kamarad avek zot bann frer ek ser.

16. Ki kitsoz kapav ed bann ansien pou donn bann konsey ki efikas?

¹⁶ Bann ansien pa anvi ki bann frer ek ser panse ki, sel moman ki bann ansien koz avek enn kikenn, se kan li’nn fer enn move kitsoz. Okontrer, zot koz  regilierman avek zot bann frer ek ser, ek zot montre ki zot gagn traka zot bann frer ek ser, sirtou kan bann-la gagn bann difikilte. Enn ansien ki ena lexperyans dir: “Si to fer sa, to pou vinn kamarad avek to bann frer ek ser. Lerla, kan to pou bizin donn zot enn konsey, li pou pli fasil pou to fer sa.” Anplis, sa dimounn ki pe gagn konsey-la, pou aksepte li pli fasilman.

17. Dan ki sitiasion enn ansien bizin ena plis pasians ek bonte?

¹⁷Ena pasians ek bonte. Bann ansien bizin ena plis pasians ek bonte kan enn kikenn o-koumansman pa’le aksepte konsey Biblik ki li’nn gagne. Enn ansien bizin pa ankoler kan enn frer ouswa enn ser pa’le aksepte enn konsey deswit. Kifer? Parski Zezi ti dir: “Li pa pou kas okenn baton rozo ki ti finn deza pliye, li pa pou soufle lor enn lames ki deza pe al tegn.” (Mat. 12:20) Alor, dan so lapriyer personel, sa ansien-la kapav demann Zeova pou beni sa dimounn ki pe bizin konsey la, ek pou ed li konpran kifer li bizin konsey ek kifer li bizin met konsey-la an pratik. Sa frer ki’nn gagn konsey la kitfwa pou bizin letan pou reflesi lor seki ansien-la inn dir li. Si ansien-la ena pasians ek ki li koz avek bonte, frer-la pou aksepte konsey-la pli fasilman. Biensir, enn konsey bizin touletan sorti dan Labib.

18. (a) Kan nou bizin donn enn konsey, ki kitsoz nou bizin rapel? (b) Dapre zimaz ki ena ar lankadre-la, lor ki kitsoz sa bann paran-la pe koze?

¹⁸Aprann ar to bann erer. Tanki nou inparfe, nou pa pou kapav aplik bann sigzesion ki ena dan sa lartik-la dan enn fason parfe. (Zak 3:2) Nou pou fer bann erer, me kan sa arive, nou bizin esey aprann ar nou bann erer. Si nou bann frer ek ser santi ki nou kontan zot, li pou pli fasil pou zot pardonn nou si nou’nn ofans zot par enn kitsoz ki nou’nn dir ouswa fer.​—Get lankadre “ Enn Mesaz pou Bann Paran.”

19. Kouma nou kapav fer leker nou bann frer ek ser kontan?

¹⁹ Kouma nou’nn trouve dan sa lartik-la, li pa fasil pou donn enn konsey ki efikas. Nou inparfe ek bann dimounn ki nou donn konsey, zot osi zot inparfe. Alor, pa bliye bann prinsip ki nou finn aprann dan sa lartik-la. Kan to donn enn konsey, fer sir ki se lamour ki pe motiv twa pou donn sa konsey-la. Demann tomem si sa konsey-la vremem neseser ek si se tomem ki bizin donn sa. Avan ki to konsey enn kikenn, poz li bann kestion ek ekout li bien, pou ki to konpran so sitiasion. Esey met twa dan so plas. Vinn kamarad avek to bann frer ek ser, ek montre twa bon anver zot. Pa bliye ki to lobzektif se pa zis pou donn enn konsey ki efikas, me se osi pou fer leker to bann frer ek ser kontan.​—Prov. 27:9.