1-2. Ta eo juon jeid im jatid em̦m̦aan ear katak kõn lel̦o̦k naanin kakapilõklõk ak kauwe?

ELÕÑ iiõ ko remootl̦o̦k, ruo em̦m̦aan rej lale eklejia rar lol̦o̦k juon jeid im jatid kõrã me elõñ iien ko ear jako jãn iien kweilo̦k ko. Em̦m̦aan eo me ej tõl ilo aer kõnono ippãn doon ear kwal̦o̦k elõñ eoon ko me rej kwal̦o̦k kõn ad pãd ilo iien kweilo̦k ko. Ear l̦õmn̦ak bwe ekar em̦m̦an iien lol̦o̦k eo, bõtab ke erro em̦m̦aan eo juon jeid im jatid rar pojakin etal, kõrã eo jeid im jatid ear ba, “Elukkuun ejjel̦o̦k amiro mel̦el̦e ñan jidik kõn ta ko ij iiooni.” Em̦m̦aan rein rar lel̦o̦k naanin kakapilõklõk ak kauwe ijello̦kun aer kajjitõk ippãn kõrã eo jeid im jatid kõn apañ im wãween ko ej iiooni. Itok jãn men in, kõrã eo jeid im jatid ear jab l̦õmn̦ak bwe naanin kakapilõklõk ak kauwe ko aer ñane rar jipañe.

² Ilo an reilikl̦o̦k, em̦m̦aan eo ej lale eklejia me ear tõl er ilo iien eo ej ba: “Ilo kar iien eo, iar l̦õmn̦ak bwe kõrã eo jeid im jatid ejjel̦o̦k an kautiej. Ak ke iar lukkuun l̦õmn̦ak kake, iar tokãlik kile bwe iar jãdel̦o̦k in kwal̦o̦k aolep eoon ko rejejjet im rekkar ijello̦kun aõ jãdel̦o̦k im kwal̦o̦k kajjitõk ko rejejjet im rekkar ãinwõt, ‘Ejet jabdewõt, ta ko kwõj iiooni ilo mour eo am̦?’ ‘Ewi wãween imaroñ jipañ?’” Em̦m̦aan in jeid im jatid ear katak juon men elukkuun aorõk jãn kar iien in. Im rainin ej juon jabõt me el̦ap an tũriam̦okake im jipañ ro jet.

3. Wõn ro ilo eklejia eo remaroñ lel̦o̦k naanin kakapilõklõk ak kauwe?

 ³ Ãinwõt jabõt ro, ej an em̦m̦aan ro rej lale eklejia eddo ñan lel̦o̦k naanin kakapilõklõk ak kauwe ñe ej menin aikuj. Ijoke, ewõr iien ro jet ilo eklejia eo remaroñ aikuj lel̦o̦k naanin kakapilõklõk ak kauwe ko. Ñan waanjoñak, juon jeid im jatid em̦m̦aan ak kõrã emaroñ lel̦o̦k juon naanin kakapilõklõk me ej pedped ioon Baibõl̦ ñan juon m̦õttan. (Sam 141:5; JK. 25:12) Ak juon jeid im jatid kõrã me erũtto emaroñ “rõjañ jiroñ ro” ilo jet men ko ãinwõt men ko rej wal̦o̦k  ilo Taitõs 2:3-5. Bareinwõt, ejjel̦o̦k kajjitõk bwe ekkã an ro jemãn im jinen aikuj lel̦o̦k naanin kakapilõklõk im kajjim̦we ñan ajri ro nejier. Innem meñe aolepen katak in el̦aptata an kõnono ñan em̦m̦aan ro rej lale eklejia, ak kõj aolep jemaroñ bõk tokjãn jãn ad etale wãween ad maroñ lel̦o̦k naanin kakapilõklõk ak kauwe ko me renaaj jipañ, kõm̦m̦akũt, im “kam̦õn̦õn̦õik bõro.”​—JK. 27:9.

4. Ta ko jenaaj etali ilo katak in?

⁴ Ilo katak in, jenaaj etale kajjitõk kein emãn kõn lel̦o̦k naanin kakapilõklõk im kauwe: (1) Ta un eo ejim̦we ñan kakapilõklõk ak kauwe? (2) Lukkuun ke menin aikuj ñan lel̦o̦k kakapilõklõk ak kauwe? (3) Wõn eo ej aikuj in lel̦o̦k naanin kakapilõklõk ak kauwe? (4) Ewi wãween am̦ maroñ lel̦o̦k naanin kakapilõklõk ak kauwe ko rejipañ?

5. Ñe juon em̦m̦aan ej lale eklejia ej em̦m̦akũt ñan lel̦o̦k kakapilõklõk ak kauwe kõn un eo ejim̦we, ewi wãween an men in maroñ jipañe ñan lel̦o̦ke ilo juon wãween em̦m̦an? (1 Korint 13:4, 7)

⁵ Em̦m̦aan ro rej lale eklejia rej yokwe ro jeier im jatier ilo tõmak. Ewõr iien, rej kwal̦o̦k aer yokwe ilo aer lel̦o̦k naanin kakapilõklõk ak kauwe ñan juon eo me ej itõn bõk juon ial̦ ebõd. (Gal. 6:1) Bõtab m̦okta jãn aer kõnono ippãn armej eo, juon eo ej lale eklejia emaroñ aikuj m̦okta l̦õmn̦ak kõn jet iaan men ko rijjilõk Paul ear kwal̦o̦k kaki kõn yokwe. “Yokwe ej meanwõd im jouj. . . . Ejjab ebbweer ilo men otemjej, ej tõmak men otemjej, ej kõjatdikdik ilo men otemjej, im ej kijenmej ilo men otemjej.” (Riit 1 Korint 13:4, 7.) Ñe em̦m̦aan eo ej lale eklejia ej kõl̦mãnl̦o̦kjen̦ kõn eoon kein, men in enaaj jipañe ñan etale unin an lel̦o̦k kakapilõklõk ak kauwe im ñan kepaake eo jein ak jatin kõn l̦õmn̦ak ko rejim̦we im rekkar. Ñe eo me ej bõk kakapilõklõk ak kauwe ej kile bwe em̦m̦aan eo ej lale eklejia ej kea kõn e, emaroñ l̦apl̦o̦k an m̦õn̦õn̦õ in roñjake ak bõk kakapilõklõk ak kauwe eo.​—Rom 12:10.

6. Ta joñak eo em̦m̦an rijjilõk Paul ear likũti?

⁶ Rijjilõk Paul ear likũt juon joñak em̦m̦an ãinwõt juon eo ej lale eklejia. Ñan waanjoñak, ke rũttõmak ro ilo Tessalonika rar aikuj bõk kauwe, ear jab jenliktak jãn an lel̦o̦k kauwe. Bõtab, ilo lõta ko an ñan er, Paul ear m̦oktata kwal̦o̦k an kile jerbal ko aer retiljek, aer jerbal ilo yokwe, im aer kijenmej. Ear bareinwõt l̦õmn̦ak kõn wãween ko rej iiooni, im kwal̦o̦k an kile bwe ejjab pidodo wãween aer kar mour im bwe rar kijenmej wõt ium̦win menin kaeñtaan ko. (1 Tes. 1:3; 2 Tes. 1:4) Joñan ear jiroñl̦o̦k er bwe rar juon joñak em̦m̦an ñan Kũrjin ro jet. (1 Tes. 1:8, 9) Rein remaroñ kar lukkuun m̦õn̦õn̦õ ke rej lo naanin nõbar kein reokmããn̦ãn̦ jãn Paul. Ear ejjel̦o̦k pere bwe Paul ear lukkuun yokwe rũttõmak rein jein im jatin. Eñin unin ear maroñ lel̦o̦k naanin kakapilõklõk ak kauwe ko me rejipañ ilo aolep lõta ko ruo an ñan ro ilo Tessalonika.​—1 Tes. 4:1, 3-5, 11; 2 Tes. 3:11, 12.

7. Ta eo emaroñ kõm̦m̦an an juon jab m̦õn̦õn̦õ in roñjake ak bõk naanin kakapilõklõk ak kauwe ko?

⁷ Ta eo emaroñ wal̦o̦k el̦aññe jaar jab lel̦o̦k naanin kakapilõklõk ak kauwe kõn un ko rejim̦we? Juon em̦m̦aan ej lale eklejia me el̦ap imminene ko ippãn ej ba, “Jet rejjab m̦õn̦õn̦õ in roñjake ak bõk naanin kakapilõklõk ak kauwe ko, ejjab kõnke ewõr men en̦ ebõd lo naanin kakapilõklõk eo, ak kõnke kar jab kwal̦o̦ke ilo juon wãween ewõr yokwe ie.” Ta eo jemaroñ katak jãn men in? El̦apl̦o̦k an pidodo ñan roñjake ak bõk naanin kakapilõklõk ak kauwe el̦aññe rej kwal̦o̦ke ilo yokwe, im jab ilo matõrtõr.

8. Ta ko me juon em̦m̦aan ej lale eklejia emaroñ kajitũkin e make ñe ej lale el̦aññe ekkar ñan lel̦o̦k kakapilõklõk ak kauwe ñan bar juon?

⁸ Em̦m̦aan ro rej lale eklejia rejjab aikuj lel̦o̦k kakapilõklõk ak kauwe ñan juon. M̦okta jãn an juon eo ej lale eklejia kõm̦m̦ane men in, ej aikuj kajitũkini make: ‘Ej ke lukkuun juon menin aikuj  bwe in kõnnaan? Ilukkuun ke jel̦ã el̦aññe em̦ool bwe armej eo ej kõm̦m̦ane juon men me ebõd? Ear ke rupe juon iaan kakien ko ilo Baibõl̦? Ak ej ke baj juon men me eoktak l̦õmn̦ak ko ad jãn doon kake?’ Em̦m̦aan ro rej lale eklejia rej kõjparok ilo mãlõtlõt bwe ren jab jet ro me “em̦õkaj [aer] kõnnaan.” (JK. 29:20) Ñe juon eo ej lale eklejia ejjab lukkuun jel̦ã el̦aññe ekkar bwe en lel̦o̦k kakapilõklõk ak kauwe ñan juon, emaroñ kepaake bar juon iaan em̦m̦aan ro rej lale eklejia ñan aerro lale el̦aññe men eo armej eo ej kõm̦m̦ane ej n̦ae ta eo Baibõl̦ ej ba im bwe aikuj bõk kakapilõklõk ak kauwe.​—2 Tim. 3:16, 17.

9. Ta ko jej katak jãn Paul kõn wãween lel̦o̦k kakapilõklõk ak kauwe kõn wãween an juon tõrreejab? (1 Timote 2:9, 10)

⁹ L̦õmn̦ak kõn waanjoñak in. Jen ba bwe juon iaan em̦m̦aan ro rej lale eklejia ej l̦õmn̦ak ak inepata kõn jokãlõt ko an juon rũttõmak kõn wãween an tõrreejab. Em̦m̦aan eo ej lale eklejia emaroñ kajitũkini make men in, ‘Ewõr ke pedpedin aõ aikuj kõnnaan kõn men in me ej ekkejell̦o̦k ñan ta eo Baibõl̦ ej ba?’ Kõnke em̦m̦aan eo ej lale eklejia ejjab kõn̦aan kwal̦o̦k l̦õmn̦ak ko an make, emaroñ kajjitõk ippãn bar juon em̦m̦aan ej lale eklejia ak bar juon eo erũtto ilo tõmak ñan kwal̦o̦k l̦õmn̦ak eo an kõn men in. Remaroñ jim̦or bar etale im ãliji naanin kakapilõklõk ko Paul ear kwal̦o̦k kaki kõn wãween an juon tõrreejab. (Riit 1 Timote 2:9, 10.) Paul ear kwal̦o̦k jet naanin kakapilõklõk ko me edepakpak mel̦el̦eier, ilo an kile bwe wãween an juon Kũrjin nuknuk ej aikuj ekkar, kwal̦o̦k kautiej, im kõjerbal lol̦o̦kjen̦. Ijoke Paul ear jab kõllaajrak ak kõm̦m̦an kakien kõn ta ko juon en kõm̦m̦ani im ta ko en jab kõm̦m̦ani. Ear kwal̦o̦k an kile bwe ewõr an kajjojo Kũrjin jim̦we im maroñ ñan kõm̦m̦an jokãlõt kõn ta ko rem̦m̦an ippãn ijoke ren jab n̦ae Baibõl̦ eo. Kõn men in, ñe em̦m̦aan ro rej lale eklejia rej lale el̦aññe emenin aikuj ñan lel̦o̦k kakapilõklõk ak kauwe ñan juon, rej aikuj lale el̦aññe jokãlõt ko an armej eo rej kwal̦o̦k kautiej im lol̦o̦kjen̦.

10. Ta eo jej aikuj in keememej ñe ej itok ñan jokãlõt ko kajjojo armej rej kõm̦m̦ani?

¹⁰ Em̦m̦an ñan kile bwe ruo Kũrjin rerũtto ilo tõmak emaroñ oktak jokãlõt ko rej kõm̦m̦ani, ak jokãlõt kein jim̦or remaroñ aolep em̦m̦an. Jejjab aikuj iuuni rũttõmak ro jeid im jatid ñan bõk ejja l̦õmn̦ak ko ad wõt kõn ta ko rem̦m̦an im ta ko renana.​—Rom 14:10.

11-12. Ñe ej menin aikuj ñan lel̦o̦k naanin kakapilõklõk ak kauwe, ta ko juon em̦m̦aan ej lale eklejia ej aikuj in kajitũkin e make?

¹¹ Ñe alikkar bwe ej menin aikuj ñan lel̦o̦k jet naanin kakapilõklõk ak kauwe, kajjitõk eo in kiiõ, Wõn eo ej aikuj lel̦o̦ke? M̦okta jãn an juon em̦m̦aan me ej lale eklejia lel̦o̦k naanin kakapilõklõk ak kauwe ñan juon kõrã jeid im jatid rippãlele ak juon eo edik, em̦m̦aan eo enãj kepaake bõran baam̦le eo, eo me emaroñ kããlõt ñan make kõm̦adm̦õde wãween eo. * Ak bõran baam̦le eo emaroñ  kajjitõk bwe en pãd ilo iien eo em̦m̦aan eo ej lel̦o̦k naanin kakapilõklõk ak kauwe eo. Im ãinwõt kar kõnono kake ilo  pãrokõrããp 3, emaroñ wõr iien ñe em̦m̦anl̦o̦k ñan an juon jeid im jatid kõrã me erũttol̦o̦k lel̦o̦k naanin kakapilõklõk ak kauwe ñan juon jeid im jatid jiroñ ak kõrã me edikl̦o̦k.

¹² Ewõr bar juon men ñan l̦õmn̦ak kake. Juon em̦m̦aan ej lale eklejia emaroñ kajitũkin e make, ‘Ij ke armej eo em̦m̦an im ekkar ñan lel̦o̦k naanin kakapilõklõk ak kauwe eo, ak enãj ke kar em̦m̦anl̦o̦k an eo jeid im jatid roñjake ak bõke ñe bar juon ej lel̦o̦ke?’ Ñan waanjoñak, juon eo me ej bõk eñjake ko bwe ejjab l̦ap tokjãn emaroñ em̦m̦anl̦o̦k an roñjake kakapilõklõk ak kauwe jãn juon ej lale eklejia me ear bar bõk ejja eñjake rot in wõt ijello̦kun an roñjake jãn juon eo me ear jab iioon wãween in. Em̦m̦aan eo ej lale eklejia me ear bõk ejja eñjake kein an eo jeid im jatid emaroñ jel̦ãl̦o̦k kwal̦o̦k tũriam̦o, im emaroñ pidodol̦o̦k ñan an eo jeid im jatid roñjake ak eo̦roñ naanin jipañ ko an em̦m̦aan eo. Ijoke, aolep em̦m̦aan ro rej lale eklejia ewõr aer eddo ñan rõjañ im jipañ ro jeier im jatier ñan kõm̦m̦an jabdewõt oktak ko me Baibõl̦ eo ej ba bwe jen kõm̦m̦ani. Innem ñe ej menin aikuj ñan lel̦o̦k naanin kajjim̦we, men eo eaorõkl̦o̦k ej ñan lel̦o̦k naanin kakapilõklõk ak kauwe.

13-14. Etke eaorõk bwe juon em̦m̦aan ej lale eklejia en roñjake?

¹³Pojakin roñjake. Ñe juon em̦m̦aan ej lale eklejia ej pojakin lel̦o̦k kakapilõklõk ak kauwe, ej aikuj kajitũkin e make: ‘Ta ko ijel̦ã kõn wãween ko in jeiũ ak jatũ ej iiooni? Ta ko rej wal̦o̦k ilo mour eo an? Emaroñ ke iioon wãween ko reppen me ijjab jel̦ã kaki? Ta eo el̦aptata an aikuji ilo tõre in?’

¹⁴ Naanin kakapilõklõk eo kar je ilo Jemes 1:19 ej lukkuun jerbal ñan ro rej lel̦o̦k kakapilõklõk ak kauwe ñan ro jet. Jemes ear je im ba: “Aolep armej rej aikuj m̦õkaj aer roñjake, rum̦wij aer kõnono, im rum̦wij aer illu.” Juon em̦m̦aan ej lale eklejia emaroñ l̦õmn̦ak bwe ejel̦ã aolep mel̦el̦e ko rem̦ool kõn ta eo ear wal̦o̦k, ak m̦ool ke bwe ejel̦ã aolep men? Jabõn Kõnnaan 18:13 ej kakeememej kõj: “Eo ej uwaak m̦okta jãn an roñjake, eñin menin bwebwe im kajook ñane.” Wãween eo em̦m̦antata ej ñan kajju bõk mel̦el̦e ko rem̦ool jãn armej eo make. Men in ej kitibuj an juon roñjake m̦okta jãn an kõnono. Keememej men eo me em̦m̦aan eo ej lale eklejia me kar kwal̦o̦k kake ilo jinoin katak in ear katak. Ear kile bwe ijello̦kun an kar ijjino iien lol̦o̦k eo kõn mel̦el̦e ko ear kõpooji, en kar aikuj kajjitõk ippãn kõrã eo jeid im jatid kajjitõk ko ãinwõt kajjitõk kein: “Ejet jabdewõt, ta ko kwõj iiooni ilo mour eo am̦?” “Ewi wãween aõ maroñ jipañ?” Ñe em̦m̦aan ro rej lale eklejia rej bõk iien im pukot mel̦el̦e ko rem̦ool, enaaj l̦apl̦o̦k aer maroñ jipañ im kõkajoor rũttõmak ro jeier im jatier.

15. Ewi wãween an em̦m̦aan ro rej lale eklejia maroñ jerbale naanin kakapilõklõk eo ilo Jabõn Kõnnaan 27:23?

¹⁵Kajjioñ jel̦ã kajjien ro ilo bwij eo. Ãinwõt kar kwal̦o̦k kake ilo jinoin katak in, lel̦o̦k naanin kakapilõklõk ak kauwe ko me rejipañ ej kitibuj el̦apl̦o̦k jãn an baj juon riitil̦o̦k wõt jejjo eoon ak kwal̦o̦k juon ak ruo l̦õmn̦ak ñan jipañ. Rũttõmak ro jeid im jatid rej aikuj kile ak eñjake bwe jej kea kõn er, bwe jemel̦el̦e kõn er, im bwe jekõn̦aan jipañ er. (Riit Jabõn Kõnnaan 27:23.) Em̦m̦aan ro rej lale eklejia rej aikuj kate er joñan wõt aer  maroñ ñan kaddek juon aer jem̦jerã epaak ippãn rũttõmak ro jeier im jatier.

16. Ta eo enaaj jipañ juon em̦m̦aan ej lale eklejia bwe en maroñ lel̦o̦k kakapilõklõk ak kauwe ko me rejipañ?

¹⁶ Em̦m̦aan ro rej lale eklejia rej aikuj kate er kõjparok bwe ren jab kõm̦m̦an an ro jeier im jatier l̦õmn̦ak bwe iien ko wõt rej itõn kõnono ippãer ej ñe ewõr men eo, im ñe ewõr men en̦ rej aikuj kõm̦adm̦õde. Ijello̦kun aer ãindein, rej ekkeini aer kõnnaan ippãn ro jeier im jatier, im kwal̦o̦k aer l̦õmn̦ak im kea kõn er ilo aer jelm̦ae apañ ak wãween ko reppen. Juon em̦m̦aan ej lale eklejia me el̦ap imminene ko ippãn ej ba: “Ñe kwõnaaj kõm̦m̦ane wãween in, kwõnaaj kõm̦m̦an bwe en ejaak jem̦jerã ko rem̦m̦an. Innem ñe kwõnaaj aikuj lel̦o̦k kakapilõklõk ak kauwe, kwõnãj lo an pidodol̦o̦k ñan am̦ kõm̦m̦ane.” Innem eo me ej bõk kakapilõklõk ak kauwe, enaaj pidodol̦o̦k an m̦õn̦õn̦õ in roñjake ak jerbale kakapilõklõk ak kauwe eo.

17. Ñããt eo el̦aptata juon em̦m̦aan ej lale eklejia ej aikuj in kwal̦o̦k meanwõd im jouj?

¹⁷Kwal̦o̦k meanwõd im jouj. Meanwõd im jouj rej kadkad ko el̦aptata aer aikuj kwal̦o̦k ñe ilo jinoin juon ejjab kõn̦aan roñjake ak bõk naanin kakapilõklõk ak kauwe ko rej pedped ioon Baibõl̦. Juon em̦m̦aan ej lale eklejia ej aikuj kõjparok jãn an matõrtõr ak inepata ñe ejjab m̦õkaj an juon m̦õn̦õn̦õ in roñjake ak l̦oore kakapilõklõk ak kauwe eo ej lel̦o̦ke. Kar kanaan kõn men in kõn Jesus im ba: “Eban ko̦kkure jabdewõt menin eddek ko rokob, im eban kune jabdewõt l̦aam̦ me jidik wõt an urur.” (Matu 12:20) Innem ñe juon em̦m̦aan ej lale eklejia ej jar ippãn make, emaroñ kajjitõk bwe Jeova en kõjeraam̦m̦an eo me ej aikuj bõk kakapilõklõk ak kauwe im jipañ armej eo ñan mel̦el̦e kõn unin an bõk kakapilõklõk ak kauwe im jerbale. Rũttõmak eo jeid im jatid me ej bõk kakapilõklõk ak kauwe emaroñ aikuj iien ñan an l̦õmn̦ak kõn ta ko kar ba ñane. Ñe em̦m̦aan eo ej lale eklejia ej kwal̦o̦k meanwõd im jouj, eo me em̦m̦aan in ej kajjioñ in jipañe eban l̦ap an l̦õmn̦ak kõn wãween kar lel̦o̦k kakapilõklõk ak kauwe eo, ak enaaj maroñ l̦õmn̦ak wõt kõn ennaan eo kar kwal̦o̦ke. Im ilo m̦ool, naanin kakapilõklõk ak kauwe ko rej aikuj aolep iien pedped ioon Naanin Anij.

18. (1) Ñe ej itok ñan lel̦o̦k naanin kakapilõklõk ak kauwe, ta ko jej aikuj in keememej? (2) Ãinwõt an kwal̦o̦k ilo pija eo me ej m̦õttan bo̦o̦k eo, ta eo rũtto ro me ewõr nejier rej kõnono kake?

¹⁸Katak jãn bõd ko am̦. Toon wõt ad jab weeppãn,  eban weeppãn ak aolep iien jejjet wãween ad jerbali naanin rõjañ ak l̦õmn̦ak kein me katak in ej litoki. (Jem. 3:2) Jenaaj baj kõm̦m̦an wõt likjab, bõtab ñe enaaj wal̦o̦k men in, jej aikuj in kajjioñ katak jãni. El̦aññe ro jeid im jatid rej kile bwe jej yokwe er, emaroñ pidodol̦o̦k aer jol̦o̦k ad bõd ñe jekõm̦m̦an bõd n̦ae er ikijjeen men ko jej ba ak kõm̦m̦ani.​—Bar lale bo̦o̦k eo etan “ Juon Ennaan ñan Jemãn im Jinen.”

19. Ewi wãween ad maroñ kam̦õn̦õn̦õik bũruon ro jeid im jatid?

¹⁹ Ãinwõt ad kar etale, ejjab pidodo ñan lel̦o̦k naanin kakapilõklõk ak kauwe ko rejipañ. Jejjab weeppãn, im ro jej lel̦o̦k naanin kakapilõklõk ak kauwe ñan er rejjab bar weeppãn. Jen keememej naanin kakapilõklõk ko jaar etali ilo katak in. Jen lukkuun lale bwe ñe jej lel̦o̦k naanin kakapilõklõk ak kauwe, en kõn un ko rejim̦we. Bareinwõt, lukkuun lale bwe naanin kakapilõklõk ak kauwe eo ej lukkuun juon menin aikuj im bwe jej armej eo ejejjet im ekkar ñan lel̦o̦ke. M̦okta jãn ad lel̦o̦k naanin kakapilõklõk ak kauwe, kwal̦o̦k kajjitõk ko im lukkuun roñjake bwe jen maroñ mel̦el̦e kõn wãween ko armej eo ej iiooni. Kajjioñ mel̦el̦e kõn eñjake ko an. Kwal̦o̦k jouj ilo am̦ kajjioñ ejaak juon jem̦jerã eokmããn̦ãn̦ ippãn eo jeim̦ ak jatũm̦ ilo tõmak. Keememej mejãnkajjik in: Jekõn̦aan bwe naanin kakapilõklõk ak kauwe ko ad ren jab baj jipañ wõt ak bwe ren bareinwõt “kam̦õn̦õn̦õik bõro.”​—JK. 27:9.