1-2. Bõe la saam-biig a ye bãng saglsã kũun wɛɛngẽ?

 KÃSEM-DÃMB a yiib n da kẽng n na n tɩ kaag saam-bi-poak sẽn da kaoos bilf n pa le wat tigissã. Kãsem-soab ning sẽn lʋɩya taoor sõsgã sasa wã karma vɛrse-rãmb wʋsg sẽn gomd tigissã kẽnd yelle. A ra tẽedame tɩ saam-bi-poakã sũur yɩɩ noog ne b sẽn wa n kaag-a wã. La b sẽn wa n na n loogã, saam-bi-poakã yeel-b lame yaa: “Saam-biisi, yãmb pa mi mam sẽn maood ne zu-loees ninsã ye.” Saam-biisã sẽn wa n na n sagl saam-bi-poakã, b pa reng n bao n bãng yɛl nins a sẽn maood ne wã ye. Rẽ n so tɩ saam-bi-poakã pa ges tɩ b saglgã yaa bũmb sẽn tõe n naf-a ye.

² Kãsem-soab ning sẽn lʋɩ taoor sõsgã sasa wã wa n tẽega rẽ yelle, n yeel yaa: “Baraarã, m da yetame tɩ saam-bi-poakã pa waoog tõnd ye. La m sẽn tags rẽ yellã, m bãngame tɩ m wilg-a-la vɛrse-rãmb bala, la m pa bao n na n sok-a sogsg sẽn zemse, wala makre: ‘Zu-loe-bʋg la f maood ne?’ ‘Bõe la m tõe n maan n sõng-fo?’ ” Kãsem-soabã rɩka yam yellã pʋgẽ. Rũndã-rũndã, a yaa pe-kɩɩm sẽn kʋmd a tẽed-n-taasã la a sõngd-ba.

3. Tigingã pʋgẽ, ãnd dãmb n tõe n sagl b taabã?

 ³ Kãsem-dãmbã sẽn yaa pe-kɩɩmbã, b tʋʋmd me yaa b sagl b tẽed-n-taasã, sã n wa yaa tɩlɛ. La wakat ninga, tigingã neb a taabã me tõe n sagla b taabã. Wala makre, saam-biig bɩ saam-bi-poak tõe n tika Biiblã n sagl a zoa. (Yɩɩn. 141:5; Yel. 25:12) Pʋg-yãang me tõe n sagla pagb nins yʋʋm sẽn pa vẽsgã yɛl kẽer wɛɛngẽ, wala makre, yɛl nins b sẽn sõdg Tɩt 2:3-5 pʋgẽ wã. Yaa vẽeneg me tɩ  roagdbã segd n sagenda b kambã, la b kibind-ba. Baa ne sõs-kãngã sẽn gomd kãsem-dãmbã yell n tɩ yɩɩdã, tõe n sõnga tõnd ned kam fãa tɩ d sã n wa na n sagl neda, bɩ yɩ saglg sẽn zemse, la sẽn ‘kõt sũ-noogo.’—Yel. 27:9.

4. Bõe yell la d na n gom sõs-kãngã pʋgẽ?

⁴ Sõs-kãngã pʋgẽ, d na n leoka sogsg a naas saglsã kũun wɛɛngẽ: 1) Bõe yĩng tɩ d rat n sagl neda? 2) Saglgã yaa tɩlɛ sɩda? 3) Ãnd n segd n sagl a soabã? 4) Wãn to la d tõe n sagl ned tɩ naf-a?

5. Bõe yĩng tɩ yaa nana tɩ ned sak n deeg kãsem-soab saglga, a sã n wilg t’a nonga a soabã? (1 Korẽnt rãmb 13:4, 7)

⁵ Kãsem-dãmbã nonga b saam-biisã la b saam-bi-pogsã. Rẽ n so tɩ ned sã n wa rɩk so-wẽnga, b sagenda a soab n wilg tɩ b nong-a lame. (Gal. 6:1) Nand tɩ kãsem-soab sagl neda, a segd n tẽega bũmb ning tẽn-tʋmd a Poll sẽn yeel nonglmã wɛɛngẽ wã. A yeelame: “Nonglem maanda sũ-mare, la a maand neere. . . . A pa komsd raood n bas ye. A tẽeda bũmb fãa, a saagda manegr bũmb fãa pʋgẽ, a tõogda toog bũmb fãa pʋgẽ.” (Karm-y 1 Korẽnt rãmb 13:4, 7.) Vɛrse-kãensã tõe n sõnga kãsem-soabã, t’a tags bũmb ning sẽn kɩt t’a rat n sagl nedã, la a sɩd maan rẽ ne yam-sõngo. Ned ning kãsem-soabã sẽn dat n saglã sã n bãng t’a yell sɩd paka kãsem-soabã, na n yɩɩ nana t’a sak n deeg saglgã.—Rom. 12:10.

6. Mak-sõng-bʋg la tẽn-tʋmd a Poll kõ-yã?

⁶ Tẽn-tʋmd a Poll sẽn da yaa kãsem-soabã kõo mak-sõngo. Wala makre, a sagla Tesalonik kiris-nebã, sẽn wa n yaa tɩlɛ tɩ b sagl-bã. La lɛta nins a sẽn gʋls-bã pʋgẽ, a reng n pẽg-b-la b sẽn tʋmd ne b sũur fãa wã, b nonglmã, la b sẽn tõogd toogã yĩnga. A tagsa b yɛlã sẽn yaa to-to wã yelle, n wilg-b t’a miime tɩ vɩɩmã pa nana ne-ba, la tɩ b ket n tõogda toogo, baa ne b sẽn namsd-bã. (1 Tes. 1:3; 2 Tes. 1:4) A pʋd n togsa Tesalonik saam-biisã tɩ b yaa mak-sõng kiris-neb a taabã yĩnga. (1 Tes. 1:8, 9) B sũur segd n yɩɩ noogo, b sẽn paam t’a Poll pẽg-b woto wã. Sãmbg kae t’a Poll ra nonga a tẽed-n-taasã wʋsgo. Rẽ n so tɩ lɛta a yiibã a sẽn gʋls n tool Tesalonik kiris-nebã pʋgẽ, a tõog n sagl-b lame tɩ zemse.—1 Tes. 4:1, 3-5, 11; 2 Tes. 3:11, 12.

7. Bõe yĩng tɩ neb kẽer pa sakd n deeg saglga?

⁷ D sã n ka bãng n sagl ned tɩ zemse, tõe n baasa wãna? Ad kãsem-soab a ye sẽn tar minim sẽn yeele: “Neb kẽer sẽn mi n pa sak n deeg saglgã, pa saglgã n pa yɩ sõma ye. La yaa sagendã sẽn pa wilg t’a nong-b lame wã yĩnga.” Bõe la rẽ wilgd tõndo? D sã n sagl ned ne nonglem la pa ne sũ-yikri, yɩta nana t’a sak n deeg saglgã.

8. Kãsem-soab sã n wa rat n sagl neda, sogs-bʋs la a segd n deng n sok a menga?

⁸ Kãsem-dãmbã pa segd n yɩt yãg-yãg n sagend nebã ye. Nand tɩ kãsem-soab sagl neda, a segd n soka a meng yaa: ‘Saglgã yaa tɩlɛ bɩ? Mam kɩsa sɩd t’a sẽn maan bũmb ningã yaa wẽng bɩ? A sẽn maanã kɩɩsda Biiblã sẽn yet bũmb ningã bɩ, bɩ yaa d sẽn ne yɛlã to-to wã n pa yembre?’ Kãsem-dãmbã segd n gũusame, n da yɩt yãg-yãg ne goam ye. (Yel. 29:20) Kãsem-soab sã n sokd a meng n getẽ sã n yaa tɩlɛ t’a sagl neda,  a tõe n soka kãsem-soab a to, n bãng a soabã sẽn maanã sã n sɩd pa zems ne Biiblã noyã tɩ b segd n sagl-a.—2 Tɩm. 3:16, 17.

9. D sã n wa na n sagl ned fu-yerdɩ wã la mengã manegr wɛɛngẽ, wãn to la a Poll sẽn yeel bũmb ningã tõe n sõng-do? (1 Tɩmote 2:9, 10)

⁹ D rɩk makre. Kãsem-soab sũur tõeeme n pa noom ne a tẽed-n-taag sẽn manegd a meng to-to wã, la a sẽn yeelgd fut ninsã ye. Kãsem-soabã tõe n soka a meng yaa: ‘Bũmb n be Biiblã pʋgẽ n wilgd tɩ m segd n sagla a soabã bɩ?’ Sẽn mik tɩ kãsem-soabã pa rat n togs a meng tagsgã, a tõe n soka kãsem-soab a to wall koe-moond tẽeb sẽn bɩ, n bãng yẽ me tagsgo. B tõe n naaga taab n lebg n ges bũmb ning a Poll sẽn yeel fu-yerdɩ wã la mengã manegr wɛɛngẽ wã. (Karm-y 1 Tɩmote 2:9, 10.) A Poll wilgame tɩ kiris-ned fu-yerdɩ segd n zemsame, n pa hobragi, la pa kɩtd tɩ ned lak n lʋɩ ye. La a pa sõdg fut nins fãa d sẽn tõe n yeelg la d sẽn pa tõe n yeelg ye. A wilgame tɩ kiris-ned fãa tara sore, n na n yãk fut nins a sẽn dat n yeelge, sã n mikame tɩ pa kɩɩsd Biiblã noyã ye. Dẽnd kãsem-dãmbã sã n dat n bãng b sã n tog n sagla neda, b segd n bao n bãnga a soabã sẽn yãkd yam n maand bũmb ninsã sã n wilgdame t’a yaa sik-m-meng soaba, la ned sẽn tar yam-sõngo.

10. Bõe n tõe n sõng-d tɩ d da modg ned t’a sak tõnd sẽn datã?

¹⁰ D bãng tɩ kiris-neb a yiib tẽeb sẽn bɩ yam-yãkr tõe n yaa toor-toore, tɩ fãa yaool n yaa sõma. D pa segd n modg d saam-biisã, tɩ b maan bũmb nins tõnd sẽn tẽed tɩ yaa sõma wã ye.—Rom. 14:10.

11-12. Kãsem-soab sã n wa mik tɩ ned la a segd n sagle, bõe la a segd n sok a menga?

¹¹ Sã n wa mik tɩ yaa tɩlɛ tɩ b sagl neda, yaa ãnd n segd n sagl-a? Kãsem-soab sã n wa rat n sagl pag sẽn kẽ kãadem wall biiga, a segd n deng n goma ne zakã soaba. Bala tõe tɩ zakã soab na n dat n welga yellã a toore. * Wall a tõe n kosame n naag kãsem-soabã, a sã n wa sagend pagã wall biigã. La wa d sẽn yã  sull a 3 pʋgẽ wã, wakat ninga tõe tɩ na n yɩɩ sõma n yɩɩd tɩ saam-bi-poak yʋʋm sẽn vẽsg sagl bi-pugla.

¹² Bũmb a to me la kãsem-soab pa segd n yĩmi. A tõe n soka a meng yaa: ‘Maam n zems n tõe n sagl-a bɩ, bɩ ned a to sã n sagl-a la sõma n yɩɩda?’  Wala makre, ned sã n wa getẽ t’a ka võore, kãsem-soab sẽn zoe n mao ne yell a woto buud sã n sagl-a la sõma n yɩɩd kãsem-soab sẽn zɩ n mao ne yell a woto buudu. A sẽn zoe n mao ne yell a woto buudã, a tõe n kʋma a soabã n yɩɩda, la a tõe n bãng n gom tɩ kẽ-a sõma. La kãsem-dãmbã fãa tʋʋmd yaa b keng b tẽed-n-taasã raoodo, tɩ b sã n maanda bũmb sẽn kɩɩsd Biiblã sẽn yetã, bɩ b sõng-b tɩ b manege. Sẽn yaa a soab fãa, kãsem-dãmbã modgdame n sagend b tẽed-n-taasã, sã n wa mik tɩ yaa tɩlɛ.

13-14. Bõe yĩng tɩ kãsem-dãmbã segd n wɩngd ne kelgre?

¹³ Wɩng-y ne kelgre. Kãsem-soab sã n wa rat n sagl neda, a segd n soka a meng yaa: ‘Bõe la mam mi a soabã yɛlã wɛɛngẽ? Bõe n pa nana ne-a vɩɩmã pʋgẽ? A maooda ne zu-loees m sẽn pa mi bɩ? Bõe n tõe n sõng-a masã meng n tɩ yɩɩda?’

¹⁴ Sãmbg kae tɩ bũmb ning b sẽn yeel Zak 1:19 wã tõe n sõnga neda, a sã n wa rat n sagl a to. A Zak yeelame yaa: “Ned buud fãa segd n wɩnga ne kelgre, la a maag ne goama, la a maag ne sũ-yikri.” Kãsem-soab tõe n tagsame t’a mii yɛlã fãa vɩʋʋgo. La rẽ yĩnga, a sɩd miime bɩ? Yel-bũn 18:13 tẽegda tõnd tɩ “ned sã n ka kelg n tɩg n yaool n leoke, a wilgda a yalemdo, la a na n paama yãnde.” Sẽn yaa sõma n yɩɩda, yaa a soabã meng sẽn na n togs tõnd yellã sẽn yɩ to-to wã. Rẽ n so tɩ kãsem-soab segd n kelg neer n yaool n gome. Tẽeg-y saam-biig ning yell d sẽn gom sõsgã sɩngrẽ wã sẽn dɩk yam ningã. A bãngame t’a ra pa segd n ta bal n togs saam-bi-poakã bũmb nins a sẽn segl n na n wa togs-a wã ye. A ra segd n deng n sok-a-la sogsgo, wala makre: “Zu-loe-bʋg la f maood ne?” “Bõe la m tõe n maan n sõng-fo?” Kãsem-dãmbã sã n mi n maag b yĩng n bao n bãng yell fãa vɩʋʋgo, na n yɩɩ nana tɩ b tõog n sõng b tẽed-n-taasã la b keng b raoodo.

15. Wãn to la kãsem-dãmbã tõe n tũ saglg ning sẽn be Yel-bũn 27:23 wã?

¹⁵ Bao-y n bãng-y tigingã neb sõma. Wa d sẽn yã sɩngrẽ wã, sagl ned pa baood bal tɩ d karem vɛrse a wãn n wilg a soabã, wall d wilg-a bũmb kẽer a sẽn segd n maan bal ye. D tẽed-n-taasã segd n bãngame tɩ b yell pak-d lame, tɩ d wʋmda b yɛlã võore, la tɩ d rat n sõng-b lame. (Karm-y Yel-bũn 27:23.) Kãsem-dãmbã segd n maana b sẽn tõe fãa, n yõg zood ne b tẽed-n-taasã.

16. Bõe n tõe n sõng kãsem-soab t’a tõog n sagl ned tɩ naf-a?

¹⁶ Kãsem-dãmbã pa segd n kɩt tɩ b tẽed-n-taag tags tɩ b tʋʋmã yaa wʋsg tɩ b pa tar sẽka, la tɩ yaa a sã n wa maan  yell tɩ b segd n welg la b baood a zĩig ye. B segd n modgdame n sõsd ne b tẽed-n-taasã, la b wilgdẽ tɩ b yell pak-b lame b sã n wa maood ne zu-loeese. Kãsem-soab a ye sẽn tar minim yeelame: “F sã n maand woto, f paamd n yõga zood sõma ne f tẽed-n-taasã. Woto, f sã n wa rat n sagl neda, yaa nana.” Ned ning b sẽn sagendã me na n sak n deega saglgã nana-nana.

17. Wakat-bʋg la kãsem-soab segd n tall sũ-mar la bʋgsem n tɩ yɩɩda?

¹⁷ Tall-y sũ-mar la bʋgsem. Yɩta sõma tɩ d tall sũ-mar la bʋgsem, sẽn yɩɩd fãa, ned sã n wa pa rat n sak Biiblã saglse. Kãsem-soab sã n sagl ned t’a pa sak n deeg saglgã tao-tao, a segd n gũusame n da yik a sũur ye. Biiblã goma a Zeezi yell n yeel yaa: “A pa na n kaoog tãnwĩig sẽn zẽgemde, la a pa na n kiis fɩtl laong sẽn nusd” ye. (Mat. 12:20) Dẽnd kãsem-soab segd n pʋʋsa a Zeova, n kos-a t’a sõng ned ning a sẽn dat n saglã, la a sõng-a t’a bãng a sẽn sagend-a wã võore, n sak n tũ. Tõe t’a soabã na n datame tɩ b kõ-a weer t’a tags bũmb ning b sẽn yeel-a wã zugu. Kãsem-soab sã n tar sũ-mar la bʋgsem, ned ning a sẽn saglã na n tagsa saglgã zug n tɩ yɩɩda, la a pa na n get b sẽn sagl-a to-to wã ye. La yaa vẽeneg tɩ wakat fãa, saglgã segd n tika Biiblã zugu.

18. a) Y sã n wa na n sagl neda, bõe la y pa segd n yĩmi? b) Wa fotã ne zĩ-gũbrã sẽn wilgdã, bõe zug la roagdbã sẽn sõsdã?

¹⁸ Rɩk-y yam y kongrã pʋgẽ. D sẽn pa zems zãngã yĩnga, d pa tõe n tũ sagls nins sẽn be sõs-kãngã pʋgẽ wã kɛpɩ-kɛpɩ ye. (Zak 3:2) D na n mi n tudgame. La sã n wa yaa woto, bɩ d rɩk yam d kongrã pʋgẽ. Y tẽed-n-taasã sã n neẽ tɩ y nong-b lame, y sã n wa maan bũmb n sãam b sũuri, na n yɩɩ nana tɩ b kõ-y sugri.—Ges-y zĩ-gũbrã: “ Koɛɛga, roagdbã yĩnga.”

19. Bõe la d tõe n maan tɩ d saglsã noog d tẽed-n-taasã sũuri?

¹⁹ Wa d sẽn yã wã, yɩl n sagl ned tɩ yãk neng pa nana ye. D pa zems zãng ye. Neb nins d sẽn sagendã me pa zems zãng ye. Ra yĩm-y bũmb nins d sẽn bãng sõs-kãngã pʋgẽ wã ye. Y sã n na n sagl neda, bɩ y modg tɩ yɩ y sẽn nong a soabã yĩnga. Y sã n wa na n sagl neda, segdame tɩ yɩ vẽeneg t’a soabã sɩd segda ne saglga, la tɩ yãmb mengã sã n sagl-a la na n yɩ sõma n yɩɩda. Nand tɩ y sagl neda, y segd n sok-a-la sogsgo, la y maag y yĩng n kelg-a neere, n bãng a sẽn maood ne yɛl ninsã. Modg-y n ges-y yɛlã wa a soabã sẽn ne yɛlã to-to wã. Tall-y bʋgsem, la y bao n yõg zood sõma ne y tẽed-n-taasã. Tẽeg-y tɩ d sẽn datã pa d saglsã nafd nebã bal ye. D ratame me tɩ b sũy yɩ noogo.—Yel. 27:9.