1, 2. ¿Ndáaña sa̱kúaʼa iin ta̱ anciano ta̱ ta̱xi consejo ndaʼa̱ iin ñá hermana?

XA̱A̱ íyo ku̱a̱ʼání ku̱i̱ya̱, u̱vi̱ na̱ anciano ni̱xa̱ʼa̱nna xi̱tona iin ñá hermana ñá va̱ása xáʼa̱nka reunión. Iin ta̱yóʼo ka̱ʼvira ku̱a̱ʼání texto nu̱úñá ña̱ káʼa̱n xa̱ʼa̱ ña̱ ndáyáʼviní ku̱ʼu̱nñá reunión. Ta̱yóʼo nda̱kanixi̱níra ña̱ chi̱kaa̱vara ndee̱ xíʼin ñá hermana kán, soo tá xa̱a̱ nda̱kiʼinna ku̱a̱ʼa̱nna, ña̱yóʼo ni̱ka̱ʼa̱nñá xíʼinna: “Va̱ása xíni̱ví ndóʼó ndáaña ndóʼi̱”. Na̱ hermano kán ta̱xi kuitína consejo ndaʼa̱ñá, soo va̱ása nínda̱ka̱tu̱ʼunnañá ndáaña ndóʼoñá. Ña̱kán nda̱kanixi̱níñá ña̱ va̱ása níchindeétáʼanvína xíʼinñá.

² Ta̱ anciano ta̱ ka̱ʼvi texto yóʼo nu̱úñá, káchira: “Tá ni̱ka̱ʼa̱nñá ña̱kán xíʼinndi̱, nda̱kanixi̱níi̱ ña̱ va̱ása ní ixato̱ʼóñá ndi̱ʼi̱. Soo tá xa̱a̱ nda̱kani vií xi̱níi̱ xa̱ʼa̱ ña̱ ku̱u, saá ki̱ʼi̱n kuenta ña̱ va̱ása níxiniñúʼu kaʼvii̱ texto nu̱úñá, chi va̱ʼaka tá ña̱yóʼo nínda̱ka̱tu̱ʼíi̱nñá: ‘¿á íyo va̱ʼún?’, ‘¿á íyo iin ña̱ ndóʼún?’, ‘¿á íyo iin ña̱ kivi chindeétáʼi̱n xíʼún?’”. Ta̱ anciano kán sa̱kúaʼara iin ña̱ ndáyáʼviní xíʼin ña̱ ke̱ʼéra, ta vitin va̱ʼaní chíndeétáʼanra xíʼin na̱ hermano.

3. ¿Ndáana kivi taxi consejo ndaʼa̱ inkana?

 ³ Na̱ anciano kúú na̱ xíniñúʼu taxi consejo ndaʼa̱ na̱ hermano chi na̱yóʼo kúú na̱ níʼi yichi̱ nu̱úna. Soo sava yichi̱ nda̱a̱ na̱ hermano na̱ va̱ása kúú anciano kivi taxina consejo ndaʼa̱ inka na̱ hermano. Tá kúú, iin ta̱ hermano á iin ñá hermana kivi kuniñúʼuna tu̱ʼun Ndióxi̱ ña̱ va̱ʼa taxina consejo ndaʼa̱ iin na̱ migona (Sal. 141:5; Prov. 25:12). Á sanatu kivi taxi iin ñá hermana ñá xa̱a̱ chée consejo ndaʼa̱ iin ñá hermana ñá loʼoka, tá kúú táʼan consejo ña̱ va̱xi nu̱ú Tito 2:3-5. Saátu na̱ íyo se̱ʼe, kivi taxina consejo ndaʼa̱ na̱ va̱lí se̱ʼena. Ña̱kán, ni xa̱ʼa̱ na̱ anciano ka̱na artículo  yóʼo soo ndiʼivayó kivi chindeétáʼanña xíʼin, chi sandákaʼánña miíyó ndáa ki̱ʼva taxiyó consejo ndaʼa̱ inkana ña̱ va̱ʼa chika̱a̱ña ndee̱ xíʼinna ta sakúsi̱íña-inina (Prov. 27:9).

4. ¿Ndáa pregunta ndakuiinyó nu̱ú artículo yóʼo?

⁴ Nu̱ú artículo yóʼo ndakuiinyó ku̱mí pregunta ña̱ chindeétáʼan xíʼinyó tá táxiyó consejo: ¿nda̱chun xíniñúʼu taxiyó consejo?, ¿á ndixa xíniñúʼu ndakiʼinna consejo?, ¿ndáana xíniñúʼu taxi consejo? ta, ¿ndáa ki̱ʼva taxiyó consejo ña̱ ndixa chindeétáʼan xíʼin inkana?

5. ¿Nda̱chun va̱ása ixayo̱ʼvi̱ña xíʼin iin na̱ hermano kundiku̱nna consejo tá vií táxinaña ndaʼa̱na? (1 Corintios 13:4, 7).

⁵ Na̱ anciano kúʼvi̱ní-inina xínina na̱ hermano. Ta xa̱ʼa̱ ña̱yóʼo táxina consejo ndaʼa̱na tá xítona ña̱ ki̱xáʼana kéʼéna ña̱ va̱ása va̱ʼa (Gál. 6:1). Soo tá kúni̱ iin na̱ anciano taxina consejo ndaʼa̱ iin na̱ hermano, xíniñúʼu ndakanixi̱nína xa̱ʼa̱ ña̱ ni̱ka̱ʼa̱n ta̱ apóstol Pablo, tá ka̱chira: “Iin na̱ kúʼvi̱-ini xíni inkana va̱ása kamaní-inina ta va̱ʼaní-inina. […] Ndiʼiña kúndeé-inina xíʼin, ndiʼiña kándíxana, ndiʼiña ndátuna, ndiʼiña íxandakú-inina xíʼin” (kaʼvi 1 Corintios 13:4, 7). Tá ná ndakanixi̱ní na̱ anciano xa̱ʼa̱ versículo yóʼo, va̱ʼaní chindeétáʼanña xíʼinna ña̱ kunda̱a̱-inina á xa̱ʼa̱ ña̱ kúʼvi̱-inina xínina na̱ hermano kúú ña̱ táxina consejo ndaʼa̱na, tasaá viíní taxinaña ndaʼa̱na. Tá ná kiʼin na̱ hermano kuenta ña̱ ndíʼi̱-ini na̱ anciano xa̱ʼa̱na, sana va̱ása ixayo̱ʼvi̱víña xíʼinna kundiku̱nna consejo ña̱ táxina ndaʼa̱na (Rom. 12:10).

6. ¿Nda̱chun va̱ʼaní yichi̱ sa̱ndákoo ta̱ Pablo tá ta̱xira consejo?

⁶ Va̱ʼaní yichi̱ sa̱ndákoo ta̱ apóstol Pablo nu̱ú na̱ anciano. Saáchi ta̱yóʼo va̱ása níyi̱ʼvíra taxira consejo ndaʼa̱ na̱ hermano na̱ ñuu Tesalónica tá xi̱nira ña̱ xíniñúʼunaña. Soo nu̱ú carta ña̱ chi̱ndaʼára ndaʼa̱na siʼna ni̱ka̱ʼa̱nra tu̱ʼun va̱ʼa xíʼinna xa̱ʼa̱ ña̱ nda̱kúní-inina xíʼin Ndióxi̱, xa̱ʼa̱ ña̱ kúʼvi̱-inina xínina Ndióxi̱ xíʼin xa̱ʼa̱ ña̱ kúndeé-inina. Ta saátu nda̱kanixi̱níra xa̱ʼa̱ ña̱ xi̱ndoʼona, saáchi ni̱ka̱ʼa̱nra xíʼinna ña̱ xi̱kunda̱a̱va-inira ña̱ yáʼana nu̱ú ku̱a̱ʼání tu̱ndóʼo, ta xi̱ ixandi̱va̱ʼana xíʼinna (1 Tes. 1:3; 2 Tes. 1:4). Ta nda̱a̱ ni̱ka̱ʼa̱nra xíʼinna ña̱ va̱ʼaní yichi̱ chínúuna nu̱ú inka na̱ hermano (1 Tes. 1:8, 9). Ni̱kusi̱íníva-inina tá ni̱ka̱ʼa̱nra ña̱kán xíʼinna. Ta va̱ása níxi̱ka-inina ña̱ xi̱kuʼvi̱níva-inira xi̱xinirana. Ña̱kán, consejo ña̱ ta̱xira ndaʼa̱na nu̱ú u̱vi̱ saá carta ña̱ chi̱ndaʼára ndaʼa̱na, va̱ʼaní chi̱ndeétáʼanña xíʼinna (1 Tes. 4:1, 3-5, 11; 2 Tes. 3:11, 12).

7. ¿Nda̱chun sáa̱ savana tá ndákiʼinna consejo?

⁷ Tá su̱ví xa̱ʼa̱ ña̱ kúʼvi̱-iniyó xíniyó na̱ hermano kúú ña̱ táxiyó consejo ndaʼa̱na, kivi kundoʼoyó nda̱a̱ táki̱ʼva ni̱ka̱ʼa̱n iin ta̱ anciano: “Savana sáa̱na tá táxina iin consejo ndaʼa̱na, soo su̱ví xa̱ʼa̱ ña̱ va̱ása va̱ʼa íyo consejo yóʼo kúúña, chi xa̱ʼa̱ ki̱ʼva ña̱ táxinaña ndaʼa̱na kúúña”. ¿Ndáaña sákuaʼayó xíʼin ña̱yóʼo? Ña̱ va̱ása ixayo̱ʼvi̱ña xíʼin na̱ hermano kundiku̱nna iin consejo tá xa̱ʼa̱ ña̱ kúʼvi̱-iniyó xíniyóna kúú ña̱ táxiyóña ndaʼa̱na, ta su̱ví xa̱ʼa̱ ña̱ sáa̱yó kúúña.

8. ¿Ndáaña xíniñúʼu ndakanixi̱ní iin ta̱ anciano tá kúma̱ní taxira iin consejo?

⁸ Na̱ anciano va̱ása xíniñúʼu kamaní taxina consejo. Chi tá kúma̱ní taxina iin consejo ndaʼa̱ iin na̱ hermano siʼna xíniñúʼu ndakanixi̱nína xa̱ʼa̱ ña̱yóʼo: “¿Á ndixa xíniñúʼu ka̱ʼi̱n xíʼinna? ¿Á ndixa ña̱ va̱ása va̱ʼa kúú ña̱ kéʼéna? ¿Á tu̱ʼun Ndióxi̱ kúú ña̱ káʼa̱n ña̱ va̱ása va̱ʼa íyo ña̱ kéʼéna, á miívai̱ kúú ta̱ ndákanixi̱ní ña̱ va̱ása va̱ʼa íyo ña̱ kéʼéna?”. Iin ta̱ anciano ta̱ ndíchi ndákanixi̱ní va̱ása kamaní taxira consejo (Prov. 29:20). Soo tá xíka-inira kivi nda̱ka̱tu̱ʼunra inka ta̱ anciano, ta ta̱yóʼo kivi chindeétáʼanra xíʼinra ña̱ kotona  á ndixa yáʼandosó na̱ hermano kán ña̱ káʼa̱n tu̱ʼun Ndióxi̱ ña̱ va̱ʼa taxina consejo ndaʼa̱na (2 Tim. 3:16, 17).

9. ¿Ndáa ki̱ʼva kundiku̱n na̱ anciano yichi̱ ta̱ Pablo tá táxina consejo ndaʼa̱ inkana xa̱ʼa̱ ki̱ʼva ña̱ ndíxina? (1 Timoteo 2:9, 10).

⁹ Ná kachiyó ña̱ iin ta̱ anciano ki̱xáʼara ndíʼi̱ní-inira xa̱ʼa̱ ki̱ʼva ña̱ ndíxi iin ta̱ hermano á xa̱ʼa̱ ki̱ʼva ña̱ ndásaviíra miíra. Soo, siʼna ná ndakanixi̱níra xa̱ʼa̱ ña̱yóʼo: “¿Á yáʼandosó ta̱ hermano kán ña̱ va̱xi nu̱ú tu̱ʼun Ndióxi̱ xíʼin ña̱ kéʼéra?”. Xa̱ʼa̱ ña̱ va̱ása kúni̱ ta̱ anciano yóʼo kundiku̱nra ña̱ ndákanixi̱ní miíra, va̱ʼaka ndáka̱tu̱ʼunra inka ta̱ anciano á iin ta̱ hermano ta̱ xa̱a̱ xu̱xaini ña̱ va̱ʼa ka̱ʼa̱nra xíʼinra ndáaña ndákanixi̱níra. Tasaá inkáchi kotona ndáaña ni̱ka̱ʼa̱n ta̱ Pablo xa̱ʼa̱ ki̱ʼva ña̱ ndíxiyó xíʼin ki̱ʼva ña̱ ndásaviíyó miíyó (kaʼvi 1 Timoteo 2:9, 10). Va̱ása níka̱ʼa̱nví ta̱ Pablo xa̱ʼa̱ iin tá iin ña̱ xíniñúʼu keʼéyó xíʼin ña̱ va̱ása xíniñúʼu keʼéyó. Chi ña̱ ni̱ka̱ʼa̱nra xa̱ʼa̱ kúú tu̱ʼun ña̱ táxi yichi̱ nu̱úyó, ña̱ kivi chindeétáʼan xíʼinyó ña̱ kiʼinníyó kuenta xíʼin ki̱ʼva ña̱ ndásaviíyó miíyó ta viíní ndakanixi̱níyó xa̱ʼa̱ ña̱yóʼo ta keʼéyóña xíʼin ña̱ to̱ʼó. Ta̱yóʼo xi̱kunda̱a̱-inira ña̱ kiviva ndaka̱xinyó ndáa ki̱ʼva kundixiyó á ndáa ki̱ʼva ndasaviíyó miíyó, nani tá va̱ása yáʼandosóyó ña̱ káʼa̱n tu̱ʼun Ndióxi̱. Ña̱kán, tá kúni̱ na̱ anciano taxina consejo ndaʼa̱ iin na̱ hermano, siʼna xíniñúʼu kotona á kíʼin na̱ hermano yóʼo kuenta xíʼin ki̱ʼva ña̱ ndásaviína miína ta á vií ndákanixi̱nína xa̱ʼa̱ ña̱ ndáka̱xinna kundixina.

10. ¿Ndáaña xíniñúʼu ndakaʼányó xa̱ʼa̱ ña̱ ndáka̱xin inkana keʼéna?

¹⁰ Tá u̱vi̱ na̱ hermano ndáka̱xinna keʼéna xa̱a̱ síín síín ña̱ʼa, ná ndakaʼányó chi ña̱yóʼo va̱ása kúni̱ kachiña ña̱ iinna va̱ʼava kéʼéna ta inkana va̱ása va̱ʼa kéʼéna, chi ña̱ va̱ʼava kúú ña̱ kéʼé u̱vi̱ saána. Ña̱kán, ná va̱ása ixandúxayó xíʼin na̱ hermano ña̱ keʼéna ña̱ kútóo miíyó (Rom. 14:10).

11, 12. Tá xíto na̱ anciano ña̱ xíniñúʼu taxina iin consejo, ¿ndáaña xíniñúʼu ndakanixi̱nína xa̱ʼa̱, ta nda̱chun?

¹¹ Ña̱kán, tá xíniñúʼu ndakiʼin iin na̱ hermano consejo, ¿ndáana xíniñúʼu taxiña ndaʼa̱na? Tá kúú, tá kúma̱ní taxi iin ta̱ anciano consejo ndaʼa̱ iin ñá hermana ñá xa̱a̱ ti̱ndaʼa̱, siʼna xíniñúʼu natúʼunra xíʼin yiíñá. Á tá kúni̱ra taxira consejo ndaʼa̱ iin na̱ va̱lí, siʼna xíniñúʼu natúʼunra xíʼin yivána. Sana kuni̱ miíva na̱yóʼo taxina consejo ndaʼa̱ ñá síʼina á ndaʼa̱ se̱ʼena á sanatu kuni̱na koona xíʼinna tá ná taxi ta̱ anciano yóʼo consejo ndaʼa̱na. * Ta tá iin ñá hermana kúa̱an kúú ñá xíniñúʼu ndakiʼin consejo, sana va̱ʼaníka tá iin ñá hermana ñá xa̱a̱ chée ná taxi consejo ndaʼa̱ñá, nda̱a̱ táki̱ʼva sa̱kúaʼayó nu̱ú  párrafo 3.

¹² Ña̱yóʼo kúú inka ña̱ xíniñúʼu ndakanixi̱ní na̱ anciano xa̱ʼa̱: “¿Á yi̱ʼi̱ kúú ta̱ xíniñúʼu taxi  consejo ndaʼa̱na á va̱ʼaka tá inkavana ná taxiña ndaʼa̱na?”. Tá kúú, iin na̱ hermano na̱ ndákanixi̱ní ña̱ va̱ása ndáyáʼvina, sana va̱ʼaníka kundiku̱nna consejo ña̱ taxi iin ta̱ anciano ta̱ ndo̱ʼo táʼan ña̱ ndóʼona, chi ta̱yóʼo kúú ta̱ va̱ʼaní kunda̱a̱-ini xíʼin ña̱ ndóʼona ta va̱ʼaní chindeétáʼanra xíʼinna. Soo ni saá, ndiʼiva na̱ anciano xíniñúʼu chindeétáʼanna xíʼin na̱ hermano ña̱ nasamana ña̱ kéʼéna ta kixáʼana keʼéna ña̱ káʼa̱n tu̱ʼun Ndióxi̱. Ña̱kán tá xítona ña̱ xíniñúʼu taxina consejo ndaʼa̱ iin na̱ hermano, xíniñúʼu ka̱ʼa̱nvana xíʼinna.

13, 14. ¿Nda̱chun ndáyáʼviní sakúaʼa na̱ anciano kuniso̱ʼona?

¹³Viíní kuniso̱ʼún ña̱ káʼa̱nna. Tá kúma̱ní taxi iin ta̱ anciano iin consejo, xíniñúʼu ndakanixi̱níra xa̱ʼa̱ ña̱yóʼo: “¿Á ndixa kúnda̱a̱-inii̱ ndáaña yáʼa na̱ hermano kán nu̱ú á ndáaña ndóʼona? ¿Á yáʼana nu̱ú iin tu̱ndóʼo ña̱ va̱ása kúnda̱a̱-inii̱ xa̱ʼa̱? ¿Ndáaña kúú mií ña̱ xíniñúʼukana?”.

¹⁴ Na̱ táxi consejo xíniñúʼu kundiku̱nna ña̱ káʼa̱n Santiago 1:19, ña̱yóʼo káchiña: “Xíniñúʼu koo tu̱ʼvandó ña̱ kuniso̱ʼondó ña̱ káʼa̱n inkana, kúee koo inindó ka̱ʼa̱nndó ta va̱ása kamaní sa̱a̱ndó”. Iin ta̱ anciano va̱ása xíniñúʼu ndakanixi̱níra ña̱ xa̱a̱ xínira xa̱ʼa̱ ndiʼi ña̱ ndóʼo na̱ hermano na̱ taxira consejo ndaʼa̱. Chi Proverbios 18:13 káchiña: “Na̱ kúma̱níka kuniso̱ʼo ta ndi̱ku̱n ndákuiinna, na̱ kíʼvi kúúna ta sákukaʼanna nu̱ú miína”. Ña̱kán, va̱ʼaníka tá ná nda̱ka̱tu̱ʼunra na̱ hermano kán ndáaña ndóʼona, ta xíniñúʼu kuniso̱ʼora ña̱ ka̱ʼa̱nna tasaá ka̱ʼa̱nra xíʼinna. Ña̱yóʼo kúú ña̱ sa̱kúaʼa ta̱ anciano ta̱ ni̱ka̱ʼa̱nyó xa̱ʼa̱ nu̱ú kíxáʼa artículo yóʼo. Chi ki̱ʼinra kuenta ña̱ va̱ása níxiniñúʼu ndi̱ku̱n kama taxira consejo ndaʼa̱ ñá hermana kán, chi siʼna ña̱yóʼo xi̱niñúʼu nda̱ka̱tu̱ʼunrañá “¿á íyo va̱ʼún?”, “¿á íyo iin ña̱ ndóʼún?”, “¿á íyo iin ña̱ kivi chindeétáʼi̱n xíʼún?”. Tá ná chika̱a̱ na̱ anciano ndee̱ ña̱ kunda̱a̱-inina xa̱ʼa̱ ña̱ ndóʼo na̱ hermano, saá kúú ña̱ va̱ʼaníka chindeétáʼanna xíʼinna ta chika̱a̱na ndee̱ xíʼinna.

15. ¿Ndáa ki̱ʼva kundiku̱n na̱ anciano ña̱ káʼa̱n Proverbios 27:23?

¹⁵Kuxini̱ va̱ʼún na̱ hermano. Nda̱a̱ táki̱ʼva sa̱kúaʼayó chí xa̱ʼa̱, tá kúni̱yó chindeétáʼan consejoyó xíʼin na̱ hermano, va̱ása xíniñúʼu kaʼvi kuitíyó texto nu̱úna ta ka̱ʼa̱nyó xíʼinna ndáaña kivi keʼéna. Chi ña̱ xíniñúʼu keʼéyó kúú ña̱ na̱ʼa̱yó nu̱úna ña̱ ndíʼi̱-iniyó xa̱ʼa̱na, ña̱ kúnda̱a̱-iniyó xíʼin ña̱ ndóʼona ta kúni̱yó chindeétáʼanyó xíʼinna (kaʼvi Proverbios 27:23). * Ña̱kán, na̱ anciano xíniñúʼu chika̱a̱na ndee̱ ña̱ xa̱a̱na koona migo na̱ hermano xíʼin ná hermana.

16. ¿Ndáaña xíniñúʼu keʼé na̱ anciano ña̱ va̱ʼa chindeétáʼan consejo ña̱ táxina xíʼin inkana?

¹⁶ Su̱ví nina consejo xíniñúʼu taxi na̱ anciano ndaʼa̱ na̱ hermano, chi saátu xíniñúʼu kuumiína costumbre ña̱ natúʼunna xíʼinna xa̱ʼa̱ nda̱a̱ ndáaka ña̱ʼa, ta kundi̱ʼi̱-inina xa̱ʼa̱na tá yáʼana nu̱ú tu̱ndóʼo. Iin ta̱ hermano ta̱ xa̱a̱  ku̱a̱ʼání ku̱i̱ya̱ kúú anciano káʼa̱nra ña̱ tá ná keʼé na̱ anciano ña̱yóʼo saá kúú ña̱ va̱ʼaníka xa̱a̱na koona migo na̱ hermano. Ta káchikara: “Tá ná kixaa̱ ki̱vi̱ ña̱ taxina iin consejo ndaʼa̱ iin na̱ hermano, va̱ása ixayo̱ʼvi̱ña xíʼinna ña̱ taxinaña”. Ta na̱ ndakiʼin consejo yóʼo va̱ása ixayo̱ʼvi̱ña xíʼinna kundiku̱nnaña.

17. ¿Ama kúú ña̱ xíniñúʼu kúee koo ini na̱ anciano ta kuʼvi̱-inina kunina inkana?

¹⁷Kúee koo iniún ta kuʼvi̱-iniún kuniúnna. Ndáyáʼviní kúee koo iniyó xíʼin na̱ hermano ta kuʼvi̱-iniyó kuniyóna tá va̱ása xíínna kundiku̱nna consejo ña̱ táxiyó ndaʼa̱na á tá va̱ása kama ndíku̱nna consejo yóʼo. Ña̱kán va̱ása xíniñúʼu sa̱a̱ na̱ anciano tá kúu ña̱yóʼo. Va̱ʼaka ná kundiku̱nna yichi̱ ta̱ Jesús, chi ña̱yóʼo ni̱ka̱ʼa̱n iin profecía xa̱ʼa̱ra: “Va̱ása ka̱ʼnu̱kara ndo̱o̱ tú xa̱a̱ ni̱ta̱ʼnu̱ ta ni va̱ása ndaʼvara ñuʼu̱ ña̱ sa̱kán xíxi̱” (Mat. 12:20). Xa̱ʼa̱ ña̱kán, na̱ anciano xíniñúʼu ka̱ʼa̱nna xíʼin Jehová ña̱ ná chindeétáʼanra xíʼin na̱ táxina consejo ndaʼa̱ ña̱ kunda̱a̱-inina nda̱chun kúú ña̱ ndákiʼinna consejo yóʼo, ta chindeétáʼanra xíʼinna ña̱ kundiku̱nnaña. Sana kúeeva ndakanixi̱nína xa̱ʼa̱ consejo ña̱ ta̱xina ndaʼa̱na. Ña̱kán, tá kúee íyo ini na̱ anciano xíʼinna ta kúʼvi̱-inina xíninana, na̱ hermano yóʼo kundi̱ʼi̱ka-inina xa̱ʼa̱ consejo ña̱ ta̱xina ndaʼa̱na, ta su̱ví ndáa ki̱ʼva ta̱xinaña ndaʼa̱na. Ta saátu xíniñúʼu ndakaʼán na̱ anciano ña̱ nina nu̱ú tu̱ʼun Ndióxi̱ xíniñúʼu tavána consejo ña̱ táxina.

18. a) ¿Ndáaña xíniñúʼu ndakaʼányó tá táxiyó consejo? b) Nda̱a̱ táki̱ʼva xítoyó nu̱ú na̱ʼná ta saátu nu̱ú recuadro, ¿ndáaña xíniñúʼu ndakanixi̱ní na̱ íyo se̱ʼe tá kúma̱níka taxina consejo ndaʼa̱na?

¹⁸Ná va̱ása ndikóyó keʼéyó ña̱ va̱ása va̱ʼa kéʼéyó. Xa̱ʼa̱ ña̱ kúúyó na̱ yiví ku̱a̱chi va̱ása kuchiñuyó viíní keʼéyó ndiʼi ña̱ ni̱ka̱ʼa̱nyó xa̱ʼa̱ nu̱ú artículo yóʼo (Sant. 3:2). Sana ku̱a̱ʼáníva ña̱ va̱ása va̱ʼa xa̱a̱yó keʼéyó, soo ná chika̱a̱yó ndee̱ ña̱ va̱ása ndikóyó keʼéyóña. Ta tá ná kuni na̱ hermano ña̱ kúʼvi̱ní-iniyó xíniyóna, saá kúú ña̱ va̱ása ixayo̱ʼvi̱ña xíʼinna ixakáʼnu-inina xa̱ʼa̱yó tá kéʼéyó á tá káʼa̱nyó iin ña̱ va̱ása va̱ʼa xíʼinna (koto recuadro ña̱ naní “ Ña̱ xíniñúʼu keʼé na̱ íyo se̱ʼe”).

19. ¿Ndáa ki̱ʼva sakúsi̱íyó-ini na̱ hermanoyó?

¹⁹ Nda̱a̱ táki̱ʼva xa̱a̱ sa̱kúaʼayó, xa̱ʼa̱ ña̱ kúúyó na̱ yiví ku̱a̱chi íxayo̱ʼvi̱ña xíʼinyó vií taxiyó consejo ndaʼa̱ inkana. Ta saátu na̱ ndákiʼin consejo yóʼo íxayo̱ʼvi̱ña xíʼinna kundiku̱nnaña. Ña̱kán, ná ndakaʼányó xa̱ʼa̱ ña̱ sa̱kúaʼayó nu̱ú artículo yóʼo. Tá táxiyó consejo ndaʼa̱ inkana, ná keʼéyóña xa̱ʼa̱ ña̱ kúʼvi̱-iniyó xíniyóna. Ta saátu xíniñúʼu kotoyó á ndixa xíniñúʼu ndakiʼinna consejo. Ta ná ndakanixi̱níyó á miíyó xíniñúʼu taxi consejo ndaʼa̱na á inkavana. Ná nda̱ka̱tu̱ʼunyóna xa̱ʼa̱ ña̱ ndóʼona, ta viíní ná kuniso̱ʼoyó ña̱ ka̱ʼa̱nna ña̱ va̱ʼa kunda̱a̱-iniyó ndáaña ndóʼona. Ta saátu ná chika̱a̱yó ndee̱ ña̱ kunda̱a̱-iniyó xíʼin ña̱ ndóʼona, ná kuʼvi̱-iniyó kuniyóna, ta ná kooyó migona. Ta saátu ná ndakaʼányó xa̱ʼa̱ ña̱yóʼo: kúni̱yó taxiyó consejo ña̱ ndixa chindeétáʼan xíʼinna ta sakúsi̱íña-inina (Prov. 27:9).