1, 2. ¿Tlen okajsikamatki se tlayekanki ijkuak okinekiaya kipaleuis se tokni?

 YIUEJKIKA ome tokniuan tlayekankej okitlajpalotoj se tokni tlen ayakmo omonechikouaya. Se tlayekanki okitlajtoltili seki textos kanin kijtoua moneki timonechikoskej. Ye omokuayejyeko tlen okilui okipaleui tokni pero ijkuak yiyaskiaj tokni okinmilui: “Namejuan amo nankimatij tlen nechpanotok”. Tokniuan okiluijkej tlen omonekiaya kichiuas non tokni pero amo okitlajtlanijkej ken okatka, ik non, okitak amo okipaleuijkej.

² Tokni okilnamik tlen opanok non tonal, ye okijto: “Onimokuayejyeko tokni amo otetlakaitaya. Satepan onikajsikamatki amo san omonekiaya niktlajtoltilis textos, achto omonekiaya niktlajtlanis ‘¿ken tika?’, ‘¿ken timomachilia?’ ‘¿ken uelis nimitspaleuis?’”. Tlen okipanok non tokni okipaleui uan axkan kinpaleuia tokniuan tlen inmiuan monechikoua uan kinmajsikamati.

3. Tla se tokni itlaj kichijtok, ¿akinmej noijki uelis kitlapouiskej?

 ³ Tokniuan tlayekankej moneki kiluiskej se tokni tla kitaj itlaj kichijtok pero amo san yejuan moneki ijkon kichiuaskej. Oksekimej tokniuan noijki uelis motlapouiskej  iuan. Noijki se tokni uelis kiluis se iyolikni ika Biblia tla itlaj kichijtok (Sal. 141:5; Prov. 25:12). Noijki xamo se tokni siuatl tlen yikipia miak xiuitl uelis kiluis se ichpochtli tlen kijtoua Tito 2:3-5. Uan tetajmej uelis kintlapouiskej uan kiyektlaliskej inkoneuan. Maski nin tlamachtil kintlapouia tlayekankej tinochtin techpaleuis ma tikmatikan ken uelis tiktlapouiskej ikaj uan ken tikyolchikauaskej (Prov. 27:9).

4. ¿Tlen tlajtlanilmej tikitaskej?

⁴ Itech nin tlamachtil tiknankiliskej naui tlajtlanilmej: ¿Tlen techyolinis ma tikintlapouikan tokniuan tla itlaj kichijtokej? ¿Melauak moneki ma tikintlapouikan? ¿Akinmej noijki moneki ma kintlapouikan tokniuan? ¿Ken tikinyolchikauaskej tokniuan ijkuak tikintlapouiskej?

5. ¿Tlen moneki kichiuaskej tlayekankej para se tokni ma kinkaki? (1 Corintios 13:4, 7).

⁵ Tlayekankej kintlasojtlaj tokniuan. Ik non, ijkuak ikaj kichijtok tlen amo kuali, kintlapouiaj (Gál. 6:1). Ijkuak se tlayekanki kitlapouis se tokni moneki mokuayejyekos tlen okijto apóstol Pablo: “Akin tetlasojtla, kimati texikoa; semi yolyámanki. [...] Nochi kijyowia, nochi kineltoka, kimati moyekchia iwa nochi kixikoa” (xiktlajtolti 1 Corintios 13:4, 7). Tla tlayekanki mokuayejyekoua tlen kijtouaj nonmej versículos, kitas tla melauak kitlasojtla tokni, ik non, kineki kitlapouis. Uan non tokni xamo okachi kinekis kikakis tla kita melauak kineki kipaleuis (Rom. 12:10).

6. ¿Apóstol Pablo ken okintlapoui tokniuan?

⁶ Tlayekankej uelis kitaskej tlen okichi apóstol Pablo. Ye okinmilui tokniuan tlen ochantiayaj Tesalónica tlen amo kuali okichijtokaj. Itech cartas tlen okintlajkuilili okinmilui nochipa okitekichiuilijtokaj toTajtsin Dios porque okitlasojtlayaj. Noijki okinmilui okimatiaya oksekimej okintlajyouiltiayaj (1 Tes. 1:3; 2 Tes. 1:4). Uan okinmilui tlen okichijtokaj kinpaleuiskia oksekimej tokniuan (1 Tes. 1:8, 9). Xamo sapanoua oyolpakej porque okinyolchika tlen okikakej. Noijki okimatiayaj Pablo sapanoua okintlasojtlaya, ik non, okichijkej tlen okintlajkuilili itech cartas (1 Tes. 4:1, 3-5, 11; 2 Tes. 3:11, 12).

7. ¿Tleka sekimej tokniuan amo kiseliaj tlen kinmiluiaj?

⁷ Tla amo tiktlapouiaj se tokni ken moneki, panos tlen okijto se tlayekanki: “Sekimej amo kiseliaj tlen kinmiluiaj porque amo kinmititiaj kintlasojtlaj”. Ken tikitaj okachi amo oui kiseliskej tlen kinmiluiaj tla kinmititiaj kintlasojtlaj.

8. ¿Tlen moneki motlajtlaniskej tlayekankej ijkuak kinekij motlapouiskej iuan se tokni?

⁸ Ijkuak tlayekankej kinekij motlapouiskej iuan se tokni, achto moneki motlajtlaniskej: “¿Melauak kichiua tlen amo kuali? ¿Amo kichijtok tlen kijtoua Biblia? ¿Noso kichijtok itlaj  tlen ne amo nikchiuaskia?”. Akinmej ixtlamatkej amo mokuayejyekouaj san niman kiluiskej itlaj se tokni (Prov. 29:20). Tla se tlayekanki amo kimati tlen kichiuas, ma motlapoui iuan okse tlayekanki para ijkon kitaskej kox melauak tlajtlakolchijtok se tokni uan moneki iuan motlapouiskej (2 Tim. 3:16, 17).

9. ¿Ken uelis kichiuaskej tlayekankej ijkon ken apóstol Pablo? (1 Timoteo 2:9, 10).

⁹ Ma tikijtokan se tlayekanki kineki motlapouis iuan tokni porque kita amo kuali motlakentia. Pero achto moneki motlajtlanis: “¿Motlakentia non tokni ken kijtoua Biblia amo moneki tikchiuaskej?”. Pero tokni amo kineki kichiuas tlen san ye mokuayejyekoua, ik non, iuan okse tlayekanki momachtiaj tlen okijto apóstol Pablo (xiktlajtolti 1 Timoteo 2:9, 10). Pablo amo okijto miak tlamantli ken moneki timotlakentiskej. Ye okijto principios bíblicos tlen techpaleuiaj ma tikitakan ken moneki timotlakentiskej. Ik non, tlayekankej noijki moneki kitaskej kox se tokni ijkuak motlakentia kiteititia moueyineki uan amo kuali kipia itlalnamikilis.

10. ¿Tlen moneki tikilnamikiskej ijkuak oksekimej kipejpenaj itlaj kipejpenaj kichiuaskej?

¹⁰ Ma tikilnamikikan ome tokniuan tlen kipiaj chikauak intlaneltokilis uelis tlatlamantli mokuayejyekoskej itlaj kichiuaskej. Non amo kijtosneki se kuali kipejpena uan okse amo. Ik non, amo ma tikinmiluikan tokniuan san tlen tejuan timokuayejyekouaj tla itlaj kuali noso amo (Rom. 14:10).

11, 12. Tla se tlayekanki kineki motlapouis iuan se tokni, ¿tlen moneki motlajtlanis uan tleka?

¹¹ ¿Akinmej noijki uelis motlapouiskej iuan tokniuan? Tla se tokni itlaj kichijtok, ¿akin moneki iuan motlapouis? Tla se tlayekanki kineki motlapouis iuan se tokni siuatl, achto moneki motlapouis iuan inamik, noijki tla kineki motlapouis iuan se chokotsin achto moneki motlapouis iuan itajtsin, xamo infamiliares tokniuan kinekiskej motlapouiskej inmiuan noso kinekiskej yetoskej ijkuak tlayekanki inmiuan motlapouis. * Noso tla moneki motlapouiskej iuan se ichpochtli, okachi kuali ma kiluikan se tokni siuatl tlen kipia chikauak itlaneltokilis iuan  ma motlapoui, ijkon ken yotikijtokej itech  párrafo eyi.

¹² Noijki tlayekankej ma motlajtlanikan: “¿Ne moneki nimotlapouis iuan tokni noso moneki okse tokni ijkon ma kichiua?”. Se tokni tlen moyolkokoua kinekis kikakis se tlayekanki porque xamo ye noijki ijkon yokipanok uan kajsikamati tleka ijkon momachilia. Nochtin tlayekankej moneki kinpaleuiskej tokniuan ma kichiuakan ken moneki uan ijkon ma kichiuakan tlen kijtoua Biblia. Tla se tokni moneki iuan ma motlapouikan, ma kinkaki.

13, 14. ¿Tleka tlayekankej moneki ma kinkakikan tokniuan?

¹³ Xikinkakikan ijkuak namechtlapouiaj. Ijkuak se tlayekanki kineki motlapouis iuan se tokni, achto ma motlajtlani: “¿Nikmati tlen kipanotok non tokni? ¿Tlajyouijtok uan ne amo nikmati? ¿Ken moneki okachi nikpaleuis tokni?”.

¹⁴ Santiago 1:19 kijtoua tlen uelis tikchiuaskej ijkuak tiktlapouiskej se tokni, ompa kijtoua: “Nonnochteh san xitlamatokah ijkuak nonkinkakiskeh oksikimeh, amo san nima xitlajtokah nion xikualanikah”. Ijkuak se tlayekanki kineki motlapouis iuan se tokni amo ma mokuayejyeko yikimati tlen kipanotok. Proverbios 18:13 kijtoua: “Ijkuak ikaj tlanankilia maski ayamo kikaki tlen opanok, kiteititia xoxo uan san mopinatia”. Ijkuak tiknekij timotlapouiskej iuan se tokni, achto moneki tikkakiskej tlen kipanoua. Ijkon okajsikamatki tokni tlen otikijtojkej itech párrafo se. Achto uelis tiktlajtlaniskej “¿ken tika?”, “¿ken timomachilia?”, “¿ken uelis nimitspaleuis?”. Tla tlayekankej kiteititiaj kintekipachoua tlen kinpanoua tokniuan, kinyolchikauaskej uan kinpaleuiskej.

15. ¿Ken uelis kichiuaskej tlayekankej tlen kijtoua Proverbios 27:23?

¹⁵ Xikinmixmatikan akinmej namouan monechikouaj. Ken yotimomachtijkej se tokni kikakis tlen kiluiskej tla kitlapouiaj ken moneki. Tlayekankej amo san moneki kintlajtoltiliskej textos uan kinmiluiskej tlen moneki kichiuaskej, moneki kinmititiskej kinmajsikamatij uan melauak kintekipachoua tlen kinpanoua (xiktlajtolti Proverbios 27:23). Tlayekankej noijki moneki mouikaskej iuan nochtin tokniuan.

16. ¿Tlen moneki kichiuaskej tlayekankej?

¹⁶ Tlayekankej amo moneki kintlapouiskej tokniuan san ijkuak kitaj motlapololtiaj. Nochipa moneki inmiuan  motlapouiskej. Ijkuak itlaj kinpanoua noso ijkuak tlajyouiaj uan moneki kinpaleuiskej. Se tlayekanki kijtoua tla ijkon kichiuaj tlayekankej kuali mouikaskej iuan tokniuan. Noijki okijto: “Ijkuak tikitaskej moneki timotlapouiskej iuan se tokni amo oui ijkon tikchiuaskej”. Noijki tokni akin kitlapouiskej kinkakis.

17. ¿Keman okachi moneki tlayekankej kinmititiskej kintlasojtlaj tokniuan uan kimatij mochiaskej?

¹⁷ Xitetlasojtlakan uan xikmatikan nanmochiaskej. Tlayekankej amo moneki kualaniskej ijkuak se tokni amo san niman kichiua tlen kiluiaj. Moneki kichiuaskej ken Jesús, Biblia kijtoua: “Nion se akatl non yoxámanki kipostekis, iwa n tláwili non san achitsi xotlatok” (Mat. 12:20). Ik non, tlayekankej moneki kitlatlaujtiskej Jehová ma kipaleui tokni tlen iuan motlapouiskej ma kinkaki uan ma kichiua tlen kiluiskej. Noijki xamo non tokni moneki mokuayejyekos tlen okiluijkej. Tla tokni tlayekanki tetlasojtla uan kimati mochias, akin kitlapouis mokuayejyekos tlen okilui uan amo ken okilui. Ijkuak tlayekankej kinekiskej itlaj kinmiluiskej tokniuan, moneki kinmititiskej tlen kijtoua iTlajtol toTajtsin Dios.

18. (1) ¿Tlen moneki tikilnamikiskej ijkuak tiktlapouiskej se tokni? (2) Ijkon ken mota itech foto uan itech recuadro, ¿tlen achto moneki kitaskej tetajmej para satepan motlapouiskej iuan inkone tla itlaj kichijtok?

¹⁸ Tla onankichijkej tlen amo omonekiaya, ximochijchikauakan para ayakmo ijkon nankichiuaskej. Tinochtin timotlapololtiaj, ik non, amo uelis tikchiuaskej nochi tlen nikan timomachtijtokej (Sant. 3:2). Tla tikintlasojtlaj tokniuan amo oui techtlapojpoluiskej tla itlaj otikchijkej noso otikijtojkej tlen okinyolkoko (xikita recuadro “ Tetajmej xikmatikan nin”).

19. ¿Ken uelis tikinyolchikauaskej tokniuan?

¹⁹ Ken yotimomachtijkej oui tiktlapouiskej se tokni. Porque tinochtin titlajtlakolejkej, ik non, ijkuak tiktlapouiskej se tokni ma tikilnamikikan principios tlen yotimomachtijkej uan ma tikititikan tiktlasojtlaj achto ma tikitakan kox melauak moneki ma tiktlapouikan uan kox tejuan moneki tiktlapouiskej. Ma tiktlajtlanikan ken momachilia uan kuali ma tikkakikan uan ijkon tikmatiskej tlen kipanoua. Ma tikintlasojtlakan tokniuan uan inmiuan ma timouikakan, ijkon amo oui tikinmiluiskej tlen kinpaleuis (Prov. 27:9).