1, 2. ¿Tlenon ouel se tlayekanketl akin okinek kipaleuis se tokniuj?

IKIPIYA miyek xiuitl, omemej tokniuan tlayekankej okitlajpalotoj se tokniuj siuatl akin youejkaujka ika xok yaya tlanechikoltin. Se tlayekanketl okinpouili miyek textos kampa kijtoua ika melak noneki tiaskej tlanechikoltin. Yejua okinemili ika okiyolchikaujkej yejon tokniuj. San ika, ijkuak iyajtoyaj tokniuj okimijli: “Nemejuamej nion achijtsin xnenkimatij tlenon nikixnamiktika”. Tlayekankej xokitlajtoltijkej tokniuj tlenon kixnamiktoya, yejuamej san okijlikej tlenon nonekiya kichiuas. Kuakon tokniuj xokimachili tla okipaleuijkej.

² Tokniuj akin okintepouili textos ok kilnamiki tlenon opanok. Yejua kijtoua: “Ijkuakon oniknemili ika tokniuj xotechtlakaitak. San ika, sakin onikitak ika xsan nonekiya nikinpouilis miyek textos. Noijki nonekiya niktlajtoltis kenon nemi, kenon nomachilia noso kenon ueliskia nikpaleuis”. Yejuin tlayekanketl ouel itlaj tlen melak ueyi kijtosneki. Aman kuajli tlayekana niman kuajli teasikamati.

3. ¿Akinomej uelis kinpaleuiskej tokniuan makipatlakan itlaj tlen kichiuaj?

 ³ Pampa tlayekankej kitlajpiyaj tlanechikojli, yejuamej akin noneki kinmelajkatlaliskej tokniuan. San ika, kemantika oksekimej  tokniuan noijki uelis tepaleuiskej. Ken ijkuak yakaj nonekis kijlis iamigo itlaj tlen xkuajli kichiujtika (Sal. 141:5; Prov. 25:12). Noso kemantika se tokniuj siuatl akin iueyi kanaj nonekis kijlis se ichpochtli kenon uelis kuajli kichiuas tlen kijtoua Tito 2:3-5. Niman tajtin noijki noneki kinmelajkatlaliskej inkoneuan. Kuakon, maski yejuin tlamachtijli onochijchiuj para tlayekankej, tinochimej uelis techpaleuis tla tikitaj kenon tikpaleuiskej yakaj. Ijkon uelis tajsiskej ipan iyojlo akin tiknekij tikpaleuiskej (Prov. 27:9).

4. ¿Tlenon tiknankiliskej ipan yejuin tlamachtijli?

⁴ Ipan yejuin tlamachtijli tiknankiliskej yejuin: ¿tleka tiknekij tikijliskej yakaj ika noneki itlaj kipatlas?, ¿yemelak noneki matikijlikan?, ¿akinon noneki kijlis? niman ¿kenon uelis tajsiskej ipan iyojlo akin tiknekij tikmelajkatlaliskej?

5. ¿Tlenon noneki tikchiuaskej tla tiknekij ika akin tikmelajkatlaliaj makichiua tlen tikijliaj? (1 Corintios 13:4, 7).

⁵ Tlayekankej kintlasojtlaj nochimej tokniuan. Kemantika kimititiaj imikniuan ika kintlasojtlaj ijkuak kinmelajkatlaliaj (Gál. 6:1). Ijkuak se tlayekanketl kinekis kijlis se tokniuj tlenon noneki kipatlas, noneki kilnamikis tlen okijto apóstol Pablo: “On yejuan tetlajsojtla tlajtlamach kimijyouilia oksekimej niman yolyemanki [...], kixikoua nochi tlajtlamach tlen xkuajli, para kineltoka on tlen kuajli intech oksekimej, para kinnekilia nochi kuajli ma uajla impan oksekimej, niman para kimijyouiya oksekimej” (xpoua 1 Corintios 13:4, 7). Tla tokniuj tlayekanketl tlanemilia itech yejuin tlaxeloltin, kipaleuis makita tla yemelak kineki temelajkatlalis pampa tetlasojtla. Tokniuj akin kimelajkatlaliskej más kinekis kichiuas tlen kijliskej tla kita ika yemelak kinekij kipaleuiskej (Rom. 12:10).

6. ¿Kenon apóstol Pablo kuajli okinmelajkatlali sekimej tokniuan?

⁶ Melak kuajli tla tlayekankej kichiuaj ken apóstol Pablo. Ijkuak yejua okitak ika tokniuan de Tesalónica xkuajli tlen kichiujtoyaj, nimantsin okinmelajkatlali. Ijkuak okintlajkuilouilij, kachtopa okimijli ika melak kuajli tlen kichiujtoyaj pampa kiteititijtoyaj ika tetlasojtlayaj niman tlaxikojtoyaj. Noijki otlanemili itech tlen inpan nochiujtoya niman okimijli ika yejua kimatstoya tlenon kixnamiktoyaj niman kimatstoya ika kintlaueltokayaj (1 Tes. 1:3; 2 Tes. 1:4). Niman hasta okimijli ika tlen yejuamej kichiujtoyaj kinpaleuiaya oksekimej tokniuan (1 Tes. 1:8, 9). ¡Yejuin tokniuan melak oyolpakej pampa okinyolchikaujkej! Yejuamej kuajli kimatstoyaj ika Pablo melak kintlasojtlaya, ika yejon, melak okinpaleui on ome cartas tlen okintitlanili (1 Tes. 4:1, 3-5, 11; 2 Tes. 3:11, 12).

7. ¿Tleka kemantika yakaj kualani ijkuak kimelajkatlaliaj?

⁷ Tla ijkuak titemelajkatlaliaj xyemelak tiknekij titepaleuiskej, uelis panos ijkon ken okijto se tokniuj akin youejkauj tlapaleuiya ken tlayekanketl: “Ijkuak yakaj kijliaj ika noneki itlaj kipatlas, maski kuajli tlen kijliaj, kualani pampa xkititiaj ika kitlasojtlaj”. ¿Tlenon techmachtia yejuin? Tokniuj akin kimelajkatlaliaj, más kinekis kichiuas tlen kijliaj tla kita ika yemelak kinekij kipaleuiskej niman tla xkitlauelnotsaj.

8. ¿Tlenon noneki notlajtoltis se tlayekanketl achto kimelajkatlalis yakaj?

⁸ Tlayekankej xnoneki nimantsin temelajkatlaliskej, yejuamej kachtopa noneki notlajtoltiskej yejuin: “¿Yemelak noneki nikijlis ika xkuajli tlen kichiujtok? ¿Kuajli nikmatstok tla  kichiujtika itlaj tlen xkuajli? ¿Kichiujtika itlaj tlen Biblia kijtoua ika xkuajli, noso san kichiujtika itlaj tlen nejua xnikchiuaskia?”. Se tlayekanketl akin tlamachilise kachtopa kuajli kinemilia tlen kijtos (Prov. 29:20). Tla se tlayekanketl xkuajli kimati tla nonekis temelajkatlalis, uelis tlajtos iuan okse tlayekanketl niman ijkon kitas tla akin kimelajkatlalisneki yemelak kichiujtika itlaj tlen Biblia kijtoua ika xkuajli (2 Tim. 3:16, 17).

9. ¿Kenon tlayekankej uelis kichiuaskej ken Pablo ijkuak kipaleuiskej yakaj akin kitaj ika xkuajli ken notlakentia niman nokualnextia? (1 Timoteo 2:9, 10).

⁹ Matikonnemilikan ika se tlayekanketl kinemilia ika se tokniuj xmás kuajli notlakentia niman nokualnextia, ika yejon, kineki kipaleuis. Tokniuj tlayekanketl uelis notlajtoltis: “¿Yemelak kichiujtika itlaj tlen Biblia kijtoua ika xkuajli?”. Tla yejua xmás kimati tla nonekis kimelajkatlalis on tokniuj, uelis kitlajtlanilis makipaleui se tlayekanketl noso okse tokniuj akin chikaujtok itlaneltok. Yejuamej uelis san sekan nomachtiskej tlen Pablo okijto itech kenon totlakentiskej niman tokualnextiskej (xpoua 1 Timoteo 2:9, 10). Pablo xokiteneuj nochi tlen uelis tikchiuaskej niman tlen xuelis tikchiuaskej. Yejua san okinteneuj seki tlaxeloltin tlen techpaleuiyaj matikitakan kenon kuajli totlakentiskej, ijkon ken techtlajtlanilia toTajtsin. Pablo kimatstoya ika akin tiktekichiuiliaj toTajtsin uelis tiktlapejpeniskej kenon totlakentiskej niman tokualnextiskej. San ika, noneki tikchiuaskej ijkon ken kijtoua Biblia. Ijkuak tlayekankej kitaskej tla nonekis kimelajkatlaliskej yakaj, noneki kuajli kitaskej tla on tokniuj yemelak xnontlakentia nion xnokualnextia ken kijtoua Biblia.

10. ¿Tlenon noneki tikilnamikiskej ijkuak yakaj kitlapejpenis tlen kichiuas?

¹⁰ Matikilnamikikan ika omemej tokniuan akin chikauak itlaneltok, xsa noijki ken tlanemiliaj. San ika, yejon xkijtosneki ika tlen se kitlapejpenia kuajli niman tlen okse kitlapejpenia xkuajli. Kuakon, maka matikinchiualtikan oksekimej matlanemilikan ken tejuamej titlanemiliaj (Rom. 14:10, TNM).

11, 12. Tla se tlayekanketl noneki yakaj kimelajkatlalis, ¿tlenon noneki notlajtoltis, niman tleka?

¹¹ Tla tlayekankej yokitakej ika nonekis temelajkatlaliskej, aman noneki kitaskej akinon uelis temelajkatlalis. Tla se tlayekanketl kineki kimelajkatlalis se tokniuj siuatl akin yononamikti noso yakaj akin xiueyi, kachtopa noneki tlajtos iuan akin kiyekana yejon familia. Kanaj akin kiyekana yejon familia kinekis yejua temelajkatlalis noso kanaj kinekis ompa nemis ijkuak temelajkatlalis tokniuj tlayekanketl. * Noso tla nonekis kimelajkatlaliskej se  ichpochtli kanaj uelis kipaleuis se tokniuj siuatl akin más iueyi, ijkon ken otikteneujkej ipan  párrafo 3.

¹² Se tlayekanketl noijki noneki notlajtoltis: “¿Nonekis nejua nikmelajkatlalis noso uelis kichiuas okse tokniuj?”. Tla nonekis kimelajkatlaliskej se tokniuj akin nimantsin noyolkokoua, kanaj uelis kipaleuis se tlayekanketl akin noijki ijkon yonomachilijka pampa ijkon uelis más kuajli kasikamatis. San ika, nochimej tlayekankej noneki kilnamikiskej ika noneki kinyolchikauaskej tokniuan makichiuakan tlen kijtoua Biblia. Tla noneki makimelajkatlalikan se tokniuj, tlayekankej noneki kipaleuiskej.

13, 14. ¿Tleka melak noneki ika tlayekankej kuajli matekakikan?

¹³Kuajli xtekaki. Ijkuak se tlayekanketl kinekis temelajkatlalis, kachtopa noneki notlajtoltis: “¿Kuajli nikmati tlenon kixnamiktika yejuin tokniuj? ¿Nikmati kenon nomachilia? ¿Kixnamiktika itlaj tlen nejua xnikmati? ¿Tlenon más noneki ika makipaleuikan?”.

¹⁴ Nochimej akin temelajkatlaliaj noneki kilnamikiskej tlen kijtoua Santiago 1:19. Santiago okijkuilo: “Cada se de nemejuamej noneki nemis listo para nentlakakiskej. Pero no xmatikan ika xmechtocaroua nimantsin nentlajtoskej, noso nimantsin nenkualaniskej”. Se tlayekanketl xnoneki kinemilis ika kimatstika nochi tlen kixnamiktika tokniuj akin kimelajkatlalis. Proverbios 18:13 techilnamiktia: “Yejuan nimantsin tenankilia niman xachtoj kaki tlinon kijliaj, kichiua sen tontojyotl niman pinaualistli”. Melak kuajli tla tiktlajtoltiaj tokniuj tlenon kixnamiktika niman achto itlaj tikijliskej noneki kuajli tijkakiskej tlen techijlia. Yejon tlen okasikamat tlayekanketl akin otikteneujkej ijkuak otiuajpeujkej. Yejua okitak ika xsan nonekiya kintepouilis textos, noijki nonekiya kitlajtoltis tokniuj “¿kenon tinemi?, ¿kenon timomachilia?, ¿kenon uelis nimitspaleuis?”. Tlayekankej uelis más kipaleuiskej niman kiyolchikauaskej akin kinekij kimelajkatlaliskej tla kuajli kimatij tlenon kixnamiktika.

15. ¿Kenon tlayekankej uelis kichiuaskej ken kijtoua Proverbios 27:23?

¹⁵Kuajli xkimixmati nochimej tokniuan. Ken otikitakej ijkuak otiuajpeujkej, tla tiknekij tajsiskej ipan iyojlo akin tikmelajkatlaliaj, xsan noneki tikinpouiliskej seki textos niman tikijliskej tlenon noneki kichiuas. Tokniuan kinekij kimachiliskej ika tajmanaj inpampa, ika tikimasikamatij niman ika yemelak tiknekij tikinpaleuiskej (xpoua Proverbios 27:23). Tlayekankej noneki nokojtiliskej kuajli nouikaskej imiuan tokniuan tlakamej niman siuamej.

16. ¿Tlenon noneki kichiuaskej tlayekankej tla kinekij ajsiskej ipan inyojlo akin kinmelajkatlaliaj?

¹⁶ Tokniuan xnoneki kimachiliskej ika tlayekankej san kinnotsaj ijkuak kinekij kinmelajkatlaliskej. Ika yejon, tlayekankej noneki  nochipa tlajtlatoskej imiuan tokniuan niman kinpaleuiskej ijkuak kixnamikij itlaj tlen ouijtika. Se tokniuj akin youejkauj tlapaleuiya ken tlayekanketl, kijtoua ika tla ijkon kichiuaj kuajli nouikaskej imiuan tokniuan. Yejua noijki kijtoua: “Ijkon, xouijtika yes ijkuak kimelajkatlaliskej se tokniuj”. Niman akin kimelajkatlaliaj ika iyojlo kinekis kichiuas tlen kijliaj.

17. ¿Kemanon más noneki ika tlayekankej mateijyouikan niman matetlasojtlakan?

¹⁷Xteijyoui niman xtetlasojtla. Melak noneki tikteititiskej ika titeijyouiyaj niman titetlasojtlaj ijkuak akin tikmelajkatlaliaj xkineki kichiuas noso xnimantsin kichiua tlen kijtoua Biblia. Tlayekankej xnoneki kualaniskej tla ijkon panoua. Yejuamej noneki kichiuaskej ken Jesús, akin ipan Mateo 12:20 onoijto ika “yejua xkitlajkali on yejuan xkojtik, xijki ken sen tlakatl kitlajkali sen akatl yejuan xkuajli. Yejua xkiseuis itlauil [...] on mecha yejuan sa popokatikaj”. Ika yejon, tlayekanketl uelis kitlajtlanilis Jehová makipaleui tokniuj akin okimelajkatlali para makita ika melak noneki kichiuas tlen okijlikej. Kanaj tokniuj xnimantsin kichiua tlen okijlikej pampa ok kineki tlanemilis. Tla tlayekanketl teijyouiya niman tetlasojtla, akin kimelajkatlaliaj kinekis kichiuas tlen kijliaj niman xtlanemilis itech kenon okimelajkatlalijkej. Maka matikilkauakan ika noneki tiktekitiltiskej iTlajtol toTajtsin ijkuak titemelajkatlaliskej.

18. a) ¿Tlenon noneki tikilnamikiskej ijkuak titemelajkatlaliskej? b) Ijkon ken nesi ipan tlaixkopinajli niman recuadro, ¿tlenon noneki kichiuaskej tajtin achto kimelajkatlaliskej inkoneuj?

¹⁸Ijkuak timopopolos, maka oksejpa ijkon xchiua. Pampa tinochimej topopolouaj kanaj ouijtika tikchiuaskej nochi tlen yotikitakej ipan yejuin tlamachtijli (Sant. 3:2). Kema, topopoloskej, san ika, noneki tokojtiliskej xok ijkon tikchiuaskej. Tla tokniuan kitaj ika tikintlasojtlaj, xouijtika kitaskej techtlapopoluiskej tla tikchiuaj noso tikijtouaj itlaj tlen kinyolkokoua. (Noijki xkita recuadro “ Tlen tajtin noneki kimatiskej”).

19. ¿Kenon uelis tajsiskej ipan inyojlo tokniuan?

¹⁹ Ken yotikitakej, kemantika ouijtika tikijlis yakaj ika noneki itlaj kipatlas. Akin kimelajkatlaliaj niman akin temelajkatlaliaj, nochimej tlajtlakolejkej. Yejua ika, noneki matikilnamikikan tlen otikitakej ipan yejuin tlamachtijli. Ijkuak tikijliskej yakaj ika noneki itlaj kipatlas kuajli matikitakan tleka tiknekij tikmelajkatlaliskej. Noijki, kuajli matikitakan tla melak noneki tikmelajkatlaliskej niman tla tejuamej technamiki tikijliskej. Tla tiknekij tikmatiskej tlenon kixnamiktika, matiktlajtoltikan kenon nemi niman kuajli matijkakikan. Noijki, matokojtilikan tikasikamatiskej. Matikimititikan tokniuan ika tikintlasojtlaj niman imiuan matouikakan. Maka matikilkauakan ika, ijkuak yakaj tikmelajkatlaliaj, tiknekij tajsiskej ipan iyojlo (Prov. 27:9).