1, 2. Еу ӕнсувӕрбӕл цӕхуӕн хабар ӕрцудӕй ӕма си цӕбӕл исахур ӕй?

 БЕРӔ ӕнзти размӕ дууӕ хестӕр нӕлгоймаги бабӕрӕг кодтонцӕ, ӕмбурдтӕмӕ ка нӕбал цудӕй, еу уӕхӕн хуӕри. Еци ӕнсувӕртӕй сӕ еу хуӕрӕн бакастӕй, ӕмбурдтӕмӕ цӕун куд ӕхсидзгӕ ’й, уой туххӕй цалдӕр стихи. Ӕхемӕ гӕсгӕ ин алцидӕр хуарз бантӕстӕй. Фал цӕугӕ ку кодтонцӕ, удта син хуӕрӕ загъта: «Ӕгириддӕр неци балӕдӕрдтайтӕ». Еци дууӕ хестӕр нӕлгоймаги хуӕри унаффити буни фӕккодтонцӕ, куд ӕй ӕма цӕбӕл тухсуй, уобӕл ба ’й фӕрсгӕ дӕр нӕ бакодтонцӕ. Ӕма уомӕ гӕсгӕ хуӕрӕн ци унаффитӕ равардтонцӕ, етӕ ӕ зӕрдӕмӕ нӕ багъардтонцӕ.

² Еци хестӕр нӕлгоймаг фӕстӕдӕр еци хабари туххӕй уотӕ загъта: «Уой фӕсте ракуддӕр дӕн: „Уӕд е ба куд загъд адтӕй?“ Фал ибӕл ку расагъӕс кодтон, удта ’й балӕдӕрдтӕн, гъӕугӕ стихтӕ кӕсун ин нӕ гъудӕй, фал гъудӕй гъӕугӕ фарстатӕ дӕттун. Зӕгъӕн: „Кудтитӕ дӕ? Естӕмӕй тухсис? Фӕккӕсун дӕмӕ нецӕмӕй гъӕуй?“ Еци хабар ӕхцӕуӕн бӕргӕ н’ адтӕй, фал си берӕ цӕбӕлдӕрти исахур дӕн». Гъема еци ӕнсувӕри абони зонунцӕ, иннети зин ка лӕдӕруй ӕма банхус кӕнунмӕ цӕттӕ ка фӕууй, уӕхӕн хестӕр нӕлгоймагӕй.

3. Унаффитӕ дӕттун ке бон ӕй?

 ³ Хестӕр нӕлгоймӕгтӕ ӕнцӕ ӕмбурди фиййӕуттӕ ӕма багъӕуаги унаффӕ раттун сӕ ихӕс ӕй. Фал иннӕ хуӕртӕ ӕма ӕнсувӕрти бон дӕр ӕй унаффитӕ дӕттун. Библий фӕрци ни алке бон дӕр ӕй е ’мбалӕн зӕгъун, раст кӕми нӕй, уой (Пс. 141:5; Ӕмб. 25:12). Зӕгъӕн, Титмӕ 2:3–5 финст ӕй, каргун хуӕртӕн цӕхуӕн гъуддӕгти фӕдбӕл сӕ бон ӕй ӕригондӕр хуӕртӕн  унаффитӕ дӕттун. Уомӕй уӕлдай ма ниййергутӕн дӕр фӕгъгъӕуй сӕ сувӕллӕнттӕн унаффӕ кӕнун, хатгай ба ма карзӕй бауайдзӕф кӕнун дӕр. Кӕд аци статья фиццагидӕр хестӕр нӕлгоймӕгтӕн финст ӕрцудӕй, уӕддӕр си ци унаффитӕ ес, етӕ ба ни алкӕмӕндӕр пайда уодзӕнцӕ. Мах ӕркӕсдзиан, ци ес бакӕнӕн, цӕмӕй нӕ унаффитӕ гъуддаги фӕдбӕл уонцӕ ӕма сӕмӕ игъосун дӕр ӕхцӕуӕн уа (Ӕмб. 27:9).

4. Аци статьяй цӕмӕ ӕркӕсдзиан?

⁴ Унаффӕ раттуни размӕ хуарз уайдӕ расагъӕс кӕнун цуппар фарстайебӕл: 1) Унаффӕ раттунмӕ дӕ ци гъӕуама разӕнгард кӕна? 2) Унаффӕ раттун ӕцӕгӕйдӕр гъӕуй? 3) Унаффӕ ка гъӕуама ратта? 4) Нӕ бон ку ӕй, пайда ка уа, уӕхӕн унаффӕ раттун? Гъӕйдӕ мадта аци фарстатӕмӕ ӕркӕсӕн.

5. Унаффӕ раттуни размӕ хестӕр нӕлгоймӕгтӕ ци гъӕуама бакӕнонцӕ ӕма цӕмӕн? (1 Коринфӕгтӕмӕ 13:4, 7).

⁵ Хестӕр нӕлгоймӕгтӕ хуӕртӕ ӕма ӕнсувӕрти берӕ уарзунцӕ. Уомӕ гӕсгӕ сӕ фӕффӕдзӕхсунцӕ, фӕррӕдуйунӕй син тӕссаг ку фӕууй, уӕд (Гал. 6:1). Фал ескӕмӕн унаффӕ раттуни размӕ бал хестӕр нӕлгоймӕгтӕ гъӕуама сӕ зӕрдӕбӕл ӕрлӕуун кӕнонцӕ, ӕцӕг уарзондзийнадӕ ци ӕй, уой. Апостол Павел финста: «Уарзондзийнадӕ берӕ фӕразуй ӕма ӕй хӕларзӕрдӕ. Уарзондзийнадӕ... алцӕмӕндӕр бухсуй, алцӕбӕлдӕр ӕууӕндуй, алцӕбӕлдӕр ӕ нифс даруй, алцӕмӕндӕр федар лӕууй». (Бакӕсӕ 1 Коринфӕгтӕмӕ 13:4, 7.) Аци стихти фӕрци ’й хестӕр нӕлгоймӕгтӕ гъӕуама исбӕрӕг кӕнонцӕ, унаффӕ раттунмӕ сӕ ӕцӕгӕйдӕр уарзондзийнадӕ разӕнгард кӕнуй ӕви нӕ. Удта хуӕртӕ ӕма ӕнсувӕртӕн унаффӕмӕ байгъосун ӕнцондӕр уодзӕй, ку ’й лӕдӕронцӕ, ке сӕ уарзунцӕ ӕма сӕбӕл ке тухсунцӕ, уой (Ром. 12:10).

6. Апостол Павел фӕнзуйнаг цӕмӕй ӕй?

⁶ Хестӕр нӕлгоймаг цӕхуӕн гъӕуама уа, уой апостол Павел хуарз бавдиста. Зӕгъӕн, Фессалоники киристӕнттӕн гъудӕй унаффӕ раттун, ӕма си Павел нӕ бафсӕрми кодта. Фал уӕддӕр ӕ финстӕгутӕ ба уайдзӕфтӕй нӕ райдаидӕ, фал бал сӕ ӕстаугӕ ракӕнидӕ. Фиццагидӕр бал сӕ растудта се ’ууӕндундзийнадӕ, сӕ уарзондзийнадӕ ӕма фӕлварӕнти куд федар ӕнцӕ, уой туххӕй. Ӕ финстӕгутӕй бӕрӕг ӕй, сӕ уавӕртӕ син хуарз ке зудта. Зудта ӕй, цӕхуӕн карз ӕфхуӕрд ӕййафунцӕ ӕма син хатгай куд зин фӕууидӕ, уой (1 Фес. 1:3; 2 Фес. 1:4). Фессалоники ци ӕнсувӕртӕ адтӕй, уонӕн ма уотӕ дӕр загъта, иннетӕн, дан, фӕнзуйнаг айтӕ (1 Фес. 1:8, 9). Уӕхӕн фӕлмӕн дзурдтӕ фегъосун син кунӕг ӕхцӕуӕн н’ адтӕй! Мадта сӕмӕ Павел ци дууӕ финстӕги ниффинста, уонӕй бӕрӕг ӕй, берӕ сӕ ке уарзта. Ӕма кӕд Павел еци ӕмбурдӕн карзӕй бауайдзӕф кодта, уӕддӕр имӕ хуӕртӕ ӕма ӕнсувӕртӕ нӕ ниффуд ӕнцӕ, фал ин ӕ унаффӕмӕ байгъустонцӕ (1 Фес. 4:1, 3–5, 11; 2 Фес. 3:11, 12).

7. Хатгай нӕ унаффӕмӕ байгъосун цӕмӕннӕ фӕффӕндуй?

⁷ Унаффӕ куд гъӕуама раттӕн, уобӕл ку нӕ расагъӕс кӕнӕн, уӕд хабар куд рауайдзӕй? Еу фӕлтӕрдгун хестӕр нӕлгоймаг загъта: «Хатгай адӕймаг унаффӕмӕ нӕ байгъосуй ке ’й нӕ гъӕуй, уой туххӕй нӕ, фал ӕй адӕймаг ке уарзуй, е ӕ дзурдтӕй бӕрӕг ке нӕ фӕууй, уой туххӕй». Мадта ци ес зӕгъӕн? Дӕхе бафӕрсӕ: «Унаффӕ раттун мӕ цӕмӕн фӕндуй? Адӕймагмӕ мӕстгун ке кӕнун, уой туххӕй ӕви ’й ке уарзун ӕма мӕ банхус кӕнун ке фӕндуй, уой туххӕй?» Унаффӕ дӕтгӕй адӕймаг ку нӕ лӕдӕра, уарзгӕ ’й ке кӕнис, уой, уӕд дӕ сугъзӕринттӕ донмӕ калис.

8. Унаффӕ раттуни размӕ хестӕр нӕлгоймӕгти цӕхуӕн фарстатӕбӕл гъӕуй расагъӕс кӕнун?

⁸ Хестӕр нӕлгоймӕгти унаффӕ дӕттунмӕ тагъд кӕнун нӕ гъӕуй. Фиццагидӕр бал хуарз уайдӕ расагъӕс кӕнун: «Адӕймагӕн унаффӕ раттун ӕнӕмӕнгӕй гъӕуй? Хабар ӕгӕр  нӕ ниддессаг кодтон? Ӕцӕгӕйдӕр адӕймаг Библийӕй цӕхуӕндӕр фӕдзӕхсти сӕрти рахизтӕй ӕви мӕнмӕ уотӕ кӕсуй, ӕма растдӕр ӕндӕрхузи адтайдӕ бакӕнун?» Хестӕр нӕлгоймӕгти нӕ фӕндуй, цӕмӕй сӕбӕл, «ӕ дзурдтӕбӕл ка нӕ расагъӕс кӕнуй, уӕхӕн адӕймаги» ном исбада (Ӕмб. 29:20). Адӕймаг цӕхуӕндӕр уагӕвӕрди сӕрти рахизтӕй ӕви нӕ, уобӕл хестӕр нӕлгоймаг ку дузӕрдуг кӕна, уӕд ӕ бон уодзӕй ӕндӕр хестӕр нӕлгоймаги хӕццӕ раунаффӕ кӕнун (2 Тим. 3:16, 17).

9. Апостол Павели дзурдтӕ нин куд банхус кӕндзӕнцӕ балӕдӕрун, адӕймагӕн е ’ндаг бакасти туххӕй унаффӕ раттун гъӕуй ӕви нӕ? (1 Тифомеймӕ 2:9, 10).

⁹ Дӕ цӕститӕбӕл рауайун кӕнӕ уӕхӕн хабар: хестӕр нӕлгоймаги зӕрдӕмӕ нӕ цӕуй ӕмбурдӕй кедӕр ӕндаг бакаст. Гъема сагъӕс кӕнуй: «Аци адӕймаг цума Библий уагӕвӕрдтӕй некӕци ихалуй?» Уӕхӕн фарстай фӕдбӕл айдагъ ӕхуӕдӕг ци гъуди кӕнуй, уобӕл зӕрдӕ дарӕн нӕййес. Гъема исфӕндӕ кодта раунаффӕ кӕнун ӕндӕр хестӕр нӕлгоймаги хӕццӕ кенӕ ба ӕндӕр фӕлтӕрдгун киристони хӕццӕ. Дууемӕй сӕ бон ӕй расагъӕс кӕнун 1 Тимофеймӕ 2:9, 10 финстӕги Павел ӕндаг бакасти туххӕй ци загъта, уобӕл. (Ба сӕ кӕсӕ.) Ами Павел комкоммӕ неци загъта, цӕхуӕн хъӕппӕлтӕ ӕнгъезуй дарун, цӕхуӕнттӕ ба – нӕ. Е ӕй лӕдӕрдтӕй, хуӕртӕ ӕма ӕнсувӕртӕ цӕхуӕн хъӕппӕлтӕ дардзӕнцӕ, е алкӕмӕндӕр ӕхе барӕ ке ӕй. Ӕрмӕстдӕр син загъта, сӕ бакаст киристон ӕгъдаумӕ гӕсгӕ ке гъӕуама уа. Мадта ’й хестӕр нӕлгоймаг, еске хӕццӕ раунаффӕ кӕнгӕй ку балӕдӕра, адӕймагӕн е ’ндаг бакаст уӕздан исхонӕн ке нӕййес ӕма уой туххӕй ӕмбурди ном ке ӕгадӕ кӕнуй, ӕрмӕстдӕр имӕ уӕд бацӕудзӕй ӕма ин унаффӕ ратдзӕй.

10. Ци нин банхус кӕндзӕй, цӕмӕй иннети унаффитӕ нимайӕн?

¹⁰ Гъӕуама нӕ гъудий дарӕн еу гъуддаг: гӕнӕн ес, ӕма еци еу уавӕри еу киристон еухузи унаффӕ рахӕсса, иннӕ ба – бустӕги ӕндӕрхузи, ӕма сӕ дууӕ дӕр раст уодзӕнцӕ. Мадта иннетӕй гъӕуама ма агорӕн, цӕмӕй етӕ дӕр мах хузӕн гъуди кӕнонцӕ (Ром. 14:10).

11, 12. Адӕймагӕн унаффӕ раттун ку гъӕуа, уӕд хестӕр нӕлгоймаг цӕбӕл гъӕуама расагъӕс кӕна ӕма цӕмӕн?

¹¹ Кӕд гъуддаг уомӕ ӕрцудӕй, ӕма унаффӕ раттун гъӕуй, уӕд хуарз уайдӕ расагъӕс кӕнун, ка ’й гъӕуама ратта, уобӕл. Зӕгъӕн, лӕгмӕцуд хуӕри хӕццӕ кенӕ сувӕллони хӕццӕ радзоруни агъоммӕ хестӕр нӕлгоймаг гъӕуама бийнонти хестӕри хӕццӕ раунаффӕ кӕна. Ка ’й зонуй, бийнонти хестӕри ӕхе бафӕндӕуа еци унаффӕ раттун. Кенӕ ба ’й бафӕнддзӕй, хестӕр нӕлгоймӕгтӕ унаффӕ ку дӕттонцӕ, уӕд цӕмӕй е дӕр сӕ хӕццӕ уа *. Уомӕй уӕлдай ма,  3 абзацци куд загъд адтӕй, уотемӕй еуӕй-еу уавӕрти хуӕздӕр уайдӕ, цӕмӕй ӕригон хуӕри хӕццӕ каргун хуӕрӕ радзубанди кӕна.

 ¹² Фал ма хестӕр нӕлгоймӕгти еу цӕбӕлдӕр гъӕуй расагъӕс кӕнун: «Хуӕздӕр куд уодзӕй, цӕмӕй унаффӕ мӕхуӕдӕг раттон, ӕви еци гъуддагӕн ӕндӕр еске исфедаудзӕй?» Зӕгъӕн, арӕх ӕхемӕ нецӕййаг ка фӕккӕсуй, уӕхӕн хуӕрӕ кенӕ ӕнсувӕрӕн унаффӕ раттун ку гъӕуа, уӕд хуӕздӕр уодзӕй, цӕмӕй унаффӕ ратта, уой хузӕн сагъӕстӕ кӕмӕ фӕууидӕ, уӕхӕн хестӕр нӕлгоймаг, уомӕн ӕма ’й е хуӕздӕр лӕдӕрдзӕй ӕма ӕ дзурдти дӕр фулдӕр уӕзӕ уодзӕй. Фал хуӕртӕ ӕма ӕнсувӕртӕн ӕнхус кӕнун ӕма сӕ раст надбӕл аразун Йеговӕ ӕгас хестӕр нӕлгоймӕгтӕн дӕр баихӕс кодта. Уомӕ гӕсгӕ унаффӕ раттун ку гъӕуа, уӕд хестӕр нӕлгоймаг уотӕ бакӕндзӕй – уӕлдай си нӕййес, адӕймаги уавӕри адтӕй ӕви нӕ.

13, 14. Унаффӕ раттуни размӕ хестӕр нӕлгоймагӕн адӕймагмӕ байгъосун ӕхсидзгӕ цӕмӕн ӕй?

¹³ Лӕмбунӕг игъосетӕ. Ӕмбурди ескӕмӕн унаффӕ раттуни размӕ бал хестӕр нӕлгоймаг гъӕуама ӕхе бафӕрса: «Аци адӕймаги туххӕй ци зонун? Ӕ царди цӕхуӕн хабӕрттӕ цӕунцӕ? Ӕз ке нӕ зонун, уӕхӕн ести зиндзийнӕдтӕбӕл ӕмбӕлуй? Нуртӕкки хъӕбӕрдӕр ци гъӕуагӕ ӕй?»

¹⁴ Унаффӕ раттун ке фӕндуй, уомӕн устур ӕнхус уодзӕнцӕ Иакови 1:19 финст дзурдтӕ: «Алли адӕймаг дӕр гъӕуама рӕвдзӕ уа байгъосунмӕ, дзорун ӕма мӕстгун кӕнунмӕ ба хӕлӕф ма кӕна». Ка ’й зонуй, хестӕр нӕлгоймагмӕ уотӕ кӕсдзӕй, цума гъуддагӕн ӕ алли фӕззелӕн дӕр зонуй. Фал цума е ӕцӕгӕйдӕр уотӕ ’й? Ӕмбесӕндти 18:13 финст ӕй: «Адӕймагмӕ ку нӕ байгъосай, уотемӕй дзуапп ку раттай, уӕд е ӕй ӕнӕзунд миуӕ ӕма ходуйнаг». Мадта хабӕрттӕ базонунбӕл ескети фӕрсун нӕ гъӕуй, фал адӕймагӕн ӕхе. Статьяй райдайӕни ци ӕнсувӕри кой кодтан, уой хабар ма еу хатт нӕ зӕрдӕбӕл ӕрлӕуун кӕнӕн. Еци ӕнсувӕр ’й балӕдӕрдтӕй, ци гъудитӕ ӕрцӕттӕ кодта, уони радзоруни размӕ бал хуӕздӕр ке адтайдӕ хуӕри бафӕрсун: «Кудтитӕ дӕ? Естӕмӕй тухсис? Фӕккӕсун дӕмӕ нецӕмӕй гъӕуй?» Мадта хестӕр нӕлгоймаг ку байархайа, цӕмӕй адӕймаги уавӕр дзӕбӕх балӕдӕра, уӕд адӕймаг ӕхемӕ дӕр нӕ нийгъосдзӕй ӕма ’й унаффӕмӕ гӕсгӕ архайун дӕр бафӕнддзӕй.

15. Хестӕр нӕлгоймӕгти бон куд ӕй Ӕмбесӕндти 27:23 финст уагӕвӕрдӕй пайда кӕнун?

¹⁵ Хуӕртӕ ӕма ӕнсувӕрти хӕццӕ ӕмбӕлттӕ уотӕ. Куд ӕй загътан, уотемӕй, цӕмӕй хуарз унаффӕ раттӕн, уой туххӕй еу кенӕ цалдӕр Библий стихи бакӕсун ӕма сӕ балӕдӕрун кӕнун фагӕ нӕ фӕууй. Дзӕвгарӕ ӕхсидзгӕдӕр ӕй, цӕмӕй ӕй хуӕртӕ ӕма ӕнсувӕртӕ лӕдӕронцӕ, ке сӕбӕл тухсӕн, сӕ зин син ке лӕдӕрӕн ӕма нӕ банхус кӕнун ке фӕндуй. (Бакӕсӕ Ӕмбесӕндтӕ 27:23.) Хестӕр нӕлгоймӕгтӕ гъӕуама архайонцӕ, цӕмӕй ӕмбурди хуӕртӕ ӕма ӕнсувӕрти хӕццӕ ӕмбӕлттӕ уонцӕ.

16. Хестӕр нӕлгоймӕгти бон куд ӕй, адӕймагӕн ӕцӕгӕйдӕр пайда ка фӕууа, уӕхӕн унаффӕ раттун?

¹⁶ Хестӕр нӕлгоймӕгтӕн ӕмбурди астӕу гъӕуама уӕхӕн ном ма уа, цума сӕ некӕд нецӕмӕ фӕййевдӕлуй. Хуӕртӕ ӕма ӕнсувӕртӕмӕ ба се ’ргом раздахунцӕ, ӕрмӕстдӕр  син карзӕй бауайдзӕф кӕнун ку фӕгъгъӕуй, уӕд кенӕ ба сӕ бараст кӕнун ку фӕгъгъӕуй. Хестӕр нӕлгоймӕгтӕ фӕййархайунцӕ, цӕмӕй сӕмӕ хуӕртӕ ӕма ӕнсувӕртӕн цийфӕнди гъуддаги фӕдбӕл дӕр ӕнцон уа бацӕун ӕма ӕнхус ракорун. Берӕ ӕнзти дӕргъи хестӕр нӕлгоймагӕй ка лӕггадӕ кӕнуй, еу уӕхӕн ӕнсувӕр загъта: «Хуарз ӕмбӕлттӕ гъе уотемӕй исунцӕ. Ӕмбалӕн ба унаффӕ раттун ӕнцондӕр фӕууй». Ӕма айдагъ унаффӕ раттун нӕ, фал ма ӕмбали унаффӕмӕ байгъосун дӕр дзӕвгарӕ ӕнцондӕр фӕууй.

17. Хестӕр нӕлгоймаги уӕлдай хъӕбӕрдӕр кӕд фӕгъгъӕуй фӕразон ӕма хӕларзӕрдӕ ун?

¹⁷ Фӕразон ӕма хӕларзӕрдӕ уотӕ. Е уӕлдай ӕхсидзгӕ фӕууй, адӕймаги Библий унаффӕмӕ гӕсгӕ архайун ку нӕ фӕффӕндуй, уӕд. Уӕхӕн уавӕри, гӕнӕн ес, унаффӕ ка дӕттуй, е мӕстӕй рафица, фал хестӕр нӕлгоймӕгтӕ гъӕуама сӕхебӕл хуӕцун зононцӕ. Гъӕуама сӕ зӕрдӕбӕл даронцӕ, Киристей туххӕй ци пахампарадӕ финст адтӕй, уой: «Ӕрдӕгсаст хъӕзӕ нӕ басӕтдзӕй, минкъий ма ка содзуй, уӕхӕн цирагъ нӕ ниххуссун кӕндзӕй» (Матф. 12:20). Мадта хестӕр нӕлгоймӕгти бон ӕй Йеговӕмӕ ковун, цӕмӕй ӕй адӕймаг балӕдӕра, унаффӕ ин цӕмӕн равардтонцӕ ӕма, еци унаффӕмӕ гӕсгӕ ӕ бон архайун куд ӕй, уой. Ка ’й зонуй, адӕймаги уобӕл расагъӕс кӕнунмӕ рӕстӕг гъӕудзӕй. Удта ма берӕ кӕнгӕ ’й, адӕймагӕн унаффӕ куд раттай, уомӕй дӕр. Мадта хестӕр нӕлгоймӕгтӕ фӕразон ӕма хӕларзӕрдӕ ку уонцӕ, уӕд сӕмӕ адӕймагӕн байгъосун дӕр ӕнцондӕр уодзӕй. Хестӕр нӕлгоймӕгтӕ гъӕуама сӕ гъудий даронцӕ: ци унаффитӕ фӕддӕттунцӕ, етӕ гъӕуама алкӕддӕр Библибӕл арӕзт уонцӕ.

18. а) Унаффӕ ка дӕттуй, е ӕ гъудий ци гъӕуама дара? б) Рамки ци хузӕ ес, уоми ниййергутӕ цӕбӕл дзорунцӕ?

¹⁸ Уӕ рӕдудтитӕй ахур кӕнтӕ. Цалинмӕ ма ӕнӕнхӕст ан, уӕдмӕти аци статьяй унаффитӕмӕ гӕсгӕ архайун ӕнхӕстӕй нӕ бон не ’суодзӕй (Иак. 3:2). Рӕстӕгӕй-рӕстӕгмӕ рӕдуйдзиан, фал нӕ фӕндуй нӕ рӕдудтитӕй ахур кӕнун. Гъигагӕн, не ’нӕргъуди дзурдтӕй кенӕ гъуддӕгтӕй хуӕртӕ ӕма ӕнсувӕрти еу ӕма дууӕ хатти нӕ фӕрресун кӕндзиан. Фал ӕй ку лӕдӕронцӕ, ке сӕ уарзӕн, уӕд нин ӕнцондӕртӕй ниххатир кӕндзӕнцӕ. (Кӕсӕ рамкӕ  «Ниййергутӕн».)

19. Нӕ бон ци ӕй кӕнун, цӕмӕй нӕ унаффитӕ хуӕртӕ ӕма ӕнсувӕртӕн ӕхцӕуӕн уонцӕ?

¹⁹ Куд ӕй фӕууидтан, уотемӕй, хуарз ӕма гъуддаги фӕдбӕл ка уа, уӕхӕн унаффӕ раттун алкӕд ӕнцон нӕ фӕууй. Еу ӕнӕнхӕст адӕймаги фӕгъгъӕуй иннӕ ӕнӕнхӕст адӕймагӕн ӕ рӕдудмӕ ниййамонун. Уомӕ гӕсгӕ аци статьяй ци унаффитӕмӕ ӕркастан, уони дӕ гъудий дарӕ. Унаффӕ дӕттунмӕ нӕ гъӕуама разӕнгард кӕна уарзондзийнадӕ, удта ма гъӕуй исбӕрӕг кӕнун, адӕймагӕн унаффӕ раттун ӕнӕмӕнгӕй ке гъӕуй ӕма ниллух кӕнун, ка ин ӕй ратдзӕй, уой дӕр. Уомӕй уӕлдай ма унаффӕ раттуни размӕ адӕймаги гъӕуй рафӕрститӕ кӕнун ӕма имӕ лӕмбунӕг игъосун, цӕмӕй ин ӕ уавӕр дзӕбӕх балӕдӕрӕн. Дӕхе ӕ бунати райвӕрӕ. Мах фӕндуй хуӕртӕ ӕма ӕнсувӕртӕн хӕларзӕрдӕ ӕма лӕдӕргӕ ӕмбӕлттӕ исун. Мадта нӕ гъудий дарӕн: нӕ нисан айдагъ е нӕй, цӕмӕй адӕймагӕн хуарз унаффӕ раттӕн, фал ма ин цӕмӕй нӕ унаффӕ ӕхцӕуӕн дӕр уа (Ӕмб. 27:9).