1-2. Kiko un ansiano a siña tokante dunamentu di konseho?

ALGUN aña pasá, dos ansiano a bai bishitá un ruman muhé ku tabatin un tempu sin bai reunion. Un di e ansianonan a kuminsá lesa algun teksto tokante baimentu di reunion. E ansiano a pensa ku e bishita a bai masha bon mes. Pero, nèt ora nan tabata bai, e ruman muhé a bisa: “Boso no tin niun idea kiko mi ta pasando aden.” E ansianonan a sali duna e ruman muhé akí konseho sin purba di komprondé kiko e tabata pasando aden. Debí na esei, e ruman muhé a sinti ku nan konseho no a yud’é ku nèt-nèt nada.

² Pensando bèk riba loke a pasa, e ansiano ku a lesa e tekstonan a bisa: “Na e momento ei mi a pensa ku e ruman tabatin masha mal manera. Pero, mas mi pensa riba loke a pasa, mi ta realisá ku na lugá di a lesa yen di bon teksto, mihó m’a puntr’é kon ta bayendo kuné i kiko mi por a hasi pa yud’é.” E ansiano a siña un bon lès for di e eksperensia ei. Awe e ansiano ei ta mas komprensivo i mas kariñoso.

3. Ken den e kongregashon por duna konseho?

 ³ Komo wardadó, e ansianonan ta responsabel pa duna konseho ora esei ta nesesario. Pero, nan no ta e únikonan den kongregashon ku por duna konseho. Por ehèmpel, un ruman por duna su amigu konseho basá riba Beibel. (Sal. 141:5; Pro. 25:12) Òf, un ruman muhé di mas edat por konsehá òf siña esnan “mas yòn” tokante e kosnan ku Tito 2:3-5 ta papia di dje. Anto di mes, mayornan ta duna nan yunan konseho i korekshon. Aunke ku e artíkulo akí ta foral pa ansianonan, nos tur por benefisiá for di dje. E sugerensianan  den e artíkulo akí lo yuda kada un di nos duna konseho mas práktiko i animante, i ku “ta hasi kurason kontentu.”—Pro. 27:9.

4. Ki pregunta nos lo kontestá den e artíkulo akí?

⁴ Den e artíkulo akí nos ta bai kontestá kuater pregunta tokante dunamentu di konseho: (1) Mi motivashon ta korekto? (2) E konseho ta ègt nesesario? (3) Ken tin ku duna e konseho? (4) Kon mi por duna konseho ku ta útil?

5. Kon e motivashon korekto por yuda un ansiano duna konseho ku ta fásil pa aseptá? (1 Korintionan 13:4, 7)

⁵ Ansianonan ta stima tur nan rumannan. Tin biaha un ruman ta a punto di dal un paso robes, i e ansianonan tin ku dun’é konseho. Esei ta un muestra di amor pa e ruman. (Gal. 6:1) Pero promé ku un ansiano papia ku e ruman, lo ta bon pa e pensa riba e kosnan ku Pablo a bisa tokante amor. El a bisa: “Amor tin pasenshi i ta bondadoso . . . E ta wanta tur kos, kere tur kos, spera tur kos [i] soportá tur kos.” (Lesa 1 Korintionan 13:4, 7.) Ora e ansiano meditá riba e versíkulonan ei, esei lo yud’é mira si su motivashon ta basá riba amor. Esei lo pone ku ora e bai papia ku e ruman, e ta hasié ku e aktitut korekto. Anto si e ruman sinti ku e ansiano ta ègt interesá den dje, lo bira hopi mas fásil pa e aseptá e konseho.—Rom. 12:10.

6. Ki bon ehèmpel Pablo a laga pa e ansianonan?

⁶ Pablo a pone un bon ehèmpel pa e ansianonan ora di duna konseho. Por ehèmpel, ora ku e rumannan na Tesalónika tabatin mester di konseho, e no a keda sin duna nan esei. Pero, e promé kos ku Pablo a skirbi den su kartanan pa nan tabata tokante nan obranan fiel, nan esfuersonan motivá pa amor i nan perseveransia. Tambe el a pensa riba nan sirkunstansianan, el a rekonosé ku nan bida no tabata fásil i ku nan tabata soportá persekushon. (1 Tes. 1:3; 2 Tes. 1:4) El a asta bisa nan ku nan tabata bon ehèmpel pa e otro kristiannan. (1 Tes. 1:8, 9) Bo por imaginá bo kon kontentu nan tabata pa e elogio ku Pablo a duna nan? No tabatin niun duda ku Pablo tabata stima su rumannan masha hopi mes. P’esei, den e dos kartanan ku el a skirbi nan, e por a duna nan konseho ku sigur a logra nan meta.—1 Tes. 4:1, 3-5, 11; 2 Tes. 3:11, 12.

7. Dikon tin biaha konseho no ta kai den bon tera serka un ruman?

⁷ Kiko por pasa si nos no duna konseho na e manera korekto? Wèl, un ansiano ku eksperensia a bisa: “Tin biaha e konseho no ta kai den bon tera. No pasó e konseho ku nos a duna e ruman tabata robes, mas bien e manera ku a duna e konseho tabata sin amor.” Si un ruman sinti ku bo ta stim’é i no ta fadá kuné, chèns ta hopi grandi ku lo e aseptá e konseho.

8. Kiko un ansiano tin ku puntra su mes promé ku e bai duna konseho?

⁸ Ansianonan no mester ta purá pa duna konseho. Promé ku un ansiano duna konseho, e tin ku puntra su mes: ‘Mi ègt tin ku bisa algu? Mi tin sigur ku loke e persona ta hasiendo ta robes? El a kibra un prinsipio di Beibel? Òf, loke e ta hasi ta algu ku ami lo no hasi?’ Lo ta sabí pa ansianonan evitá di ta “muchu lihé ku [nan] palabranan.” (Pro. 29:20) Pero, kiko si e ansiano ainda ta duda? Kisas e por aserká un otro ansiano pa nan wak si  a kibra un prinsipio di Beibel i si konseho ta nesesario.—2 Tim. 3:16, 17.

9. Kiko nos ta siña for di Pablo si nos tin ku duna konseho tokante bistimentu i kuido di aparensia? (1 Timoteo 2:9, 10)

⁹ Ban bisa ku un ansiano ta tur preokupá pa e manera ku un ruman ta bisti òf ta kuida su aparensia. E ansiano por puntra su mes: ‘Ki motibu bíbliko mi tin pa bisa algu?’ Komo ku lo e no ke duna su mes opinion tokante e asuntu, lo e bai papia ku un otro ansiano òf un otro ruman madurá. Huntu, nan por pasa den e konseho ku Pablo a duna tokante bistimentu i kuido di aparensia. (Lesa 1 Timoteo 2:9, 10.) Pablo su konseho no tabata un lista di regla di kiko sí tin mag i kiko nò. Mas bien, el a duna algun prinsipio ku lo yuda un kristian bisti na un manera ku ta apropiá i modesto. E tabata sa ku un ruman tin mag di bisti loke e ke, tanten ku esei no ta bai kontra e prinsipionan ei. Pues, ora ansianonan ke determiná si konseho ta ègt nesesario, nan tin ku puntra nan mes: ‘E ruman su bistimentu òf kuido di aparensia ta modesto i ta mustra ku el a tene kuenta ku tur prinsipio?’

10. Kiko nos tin ku tene kuenta kuné tokante desishon personal?

¹⁰ Ta hopi importante pa nos tene kuenta ku dos ruman por tuma desishonnan ku ta kompletamente diferente for di otro. Pero esei no nesesariamente ke men ku un desishon ta bon i ku e otro ta malu. Nunka nos lo ke imponé nos gustu personal riba nos rumannan.—Rom. 14:10.

11-12. Unabes ku mira ku konseho ta nesesario, kiko un ansiano tin ku puntra su mes, i dikon?

¹¹ Unabes ku determiná ku mester duna un persona konseho, awor e siguiente pregunta ta: Ken tin ku dun’é? Por ehèmpel, promé ku un ansiano bai duna un ruman muhé kasá òf un mucha menor di edat konseho, kisas lo ta mihó e papia ku e kabes di famia promé. Kisas e kabes di famia lo preferá pa e mes atendé e asuntu. * Òf, e por pidi pa ta presente ora e ansiano bai duna konseho. Anto, mané nos a mira na  paragraf 3, tin biaha ta mihó pa laga un ruman muhé di mas edat konsehá un otro ruman muhé mas yòn.

¹² Pero tin otro kos mas ku lo ta bon pa un ansiano tene kuenta kuné. E por puntra su mes: ‘Ta ami ta e mihó persona pa duna e konseho òf lo ta mas mihó pa un otro hende dun’é?’ Ban bisa un ruman mester di konseho tokante algu. Pero e ruman ei ta lucha ku sintimentu di no ta bal nada. Den un kaso asina, kisas  ta mihó pa laga un ansiano ku tambe a yega di sintié asina dun’é konseho. Dikon? Pasó e ansiano ei ta komprondé e ruman su sintimentunan i lo mustr’é mas kompashon. Esei lo hasi ku lo ta mas fásil pa e ruman aseptá e konseho. Sinembargo, tur ansiano tin e responsabilidat di animá nan rumannan i di yuda nan biba segun loke Beibel ta bisa. Pero, loke ta mas importante ainda ta pa e ruman haña e konseho ku e tin mester, asta si e ansiano ku ta duna e konseho no a pasa den e mesun kos.

13-14. Dikon un ansiano mester ta un bon skuchadó?

¹³Sea kla pa skucha. Ora un ansiano ta preparando pa duna un konseho, e tin ku puntra su mes: ‘Ki mi sa di e ruman su situashon? Ki ta pasando den su bida? E por ta pasando den algu ku mi no sa di dje? Kiko ta e kos ku mas e mester di dje aworakí?’

¹⁴ Promé ku duna konseho, lo ta bon pa tene kuenta ku e prinsipio ku tin na Santiago 1:19 ku ta bisa: “Tur hende mester ta kla pa skucha, slo pa papia, slo pa rabia.” Por pasa ku un ansiano por pensa ku e ta na haltura di tur kos ku e ruman ta pasando aden. Pero esei realmente ta e kaso? Proverbionan 18:13 ta kòrda nos ku “esun ku respondé promé ku e skucha, esei ta bobedat i bèrgwensa p’e.” E mihó kos ku e ansiano por hasi, ta di bai serka e ruman mes i pidié splika loke e ta pasando aden. Esei ta nifiká ku e ansiano tin ku skucha promé ku e papia. Bo ta kòrda e ansiano ku nos a menshoná na inisio di e artíkulo akí? El a siña ku en bes di a lesa tur e tekstonan ku el a prepará, lo tabata mihó si el a kuminsá na puntra e ruman: “Konta mi, kon kos ta bayendo?” “Kon mi por yuda bo?” Si ansianonan tuma tempu pa purba di komprondé loke un ruman ta pasando aden, chèns ta mas grandi ku nan lo por yud’é i anim’é.

15. Kon ansianonan por apliká e prinsipio ku tin na Proverbionan 27:23?

¹⁵Konosé bo rumannan bon. Manera nos a menshoná na kuminsamentu, duna bon konseho ta mas ku djis lesa un par di teksto i duna sugerensia. Nos rumannan tin ku sinti ku nos ta ègt stima nan, ku nos ta interesá den nan, ku nos ta komprondé loke nan ta pasando aden i ku nos ke yuda nan. (Lesa Proverbionan 27:23.) Ansianonan, hasi esfuerso pa sera ku boso rumannan.

16. Kiko por yuda ansianonan duna bon konseho?

¹⁶ Ansianonan lo no ke duna e impreshon ku e úniko biaha ku nan ta papia ku e rumannan ta pa duna konseho. Na lugá di esei, ansianonan mester tin e kustumber di kòmbersá regularmente  ku nan, mustrando nan ku di bèrdat nan ta interesá den loke ta pasando den nan bida. Un ruman ku ta ansiano pa hopi tempu a bisa: “Si bo tin kustumber di kòmbersá regularmente ku bo rumannan, lo bo bira bon amigu ku nan. Anto ora yega momento ku bo tin ku duna nan konseho, lo ta hopi mas fásil pa hasi esei.” Tambe, lo ta hopi mas fásil pa e ruman aseptá e konseho.

17. Na ki momento foral un ansiano mester sigui demostrá pasenshi i kariño?

¹⁷Tene pasenshi i keda mustra kariño. Un ansiano mester sigui demostrá pasenshi i kariño foral ora e persona ku e ke yuda na promé instante no ke apliká loke Beibel ta bisa. Den un kaso asina, e ansiano mester tene kuidou pa e no bira iritá ni fadá. Mas bien, lo ta bon pa e imitá loke Beibel a bisa tokante Hesus: “Lo e no trapa riba ningun kaña kibrá, i lo e no paga ningun mecha ku ta huma.” (Mat. 12:20) Pues, den e ansiano su orashonnan privá lo e pidi Yehova bendishoná e ruman i pa yuda e ruman komprondé pakiko a dun’é e konseho ei i pa yud’é aplik’é. Kisas e ruman mester di poko tempu pa e por pensa riba e konseho ku el a haña. Si e ansiano sigui mustra pasenshi i kariño, lo ta hopi mas fásil pa e ruman aseptá e konseho. Pero un kos ta sigur, konseho semper mester ta basá riba Beibel.

18. (a) Ora di duna konseho, kiko nos tin ku kòrda? (b) Tokante kiko bo ta kere e mayornan den e plachi di e kuadro ta papiando?

¹⁸Siña for di bo foutnan. Tanten ku nos ta imperfekto, nos lo no por sigui tur e sugerensianan den e artíkulo akí perfektamente. (Sant. 3:2) Nos ta bai hasi fout. Pero, ora esei pasa nos tin ku purba di siña for di nan. Ademas, si nos rumannan sa ku nos ta ègt stima nan, probablemente lo ta mas fásil pa nan pordoná nos si nos bisa òf hasi algu ku a ofendé nan.—Wak tambe e kuadro “ Algu Ku Mayornan Tin ku Tene Kuenta Kuné.”

19. Kon nos por hasi kurason di nos rumannan kontentu?

¹⁹ Manera nos a mira, no ta fásil pa duna bon konseho. Tantu nos komo esun ku nos tin ku konsehá ta imperfekto. P’esei, no lubidá e kosnan ku nos a trata den e artíkulo akí. Hasi sigur ku ora bo duna konseho, bo hasié ku e motivashon korekto. Tambe, hasi sigur ku e konseho ta ègt nesesario i si abo ta e mihó persona pa dun’é. Hasi pregunta i skucha bon ya asina bo por komprondé kiko e persona ta pasando aden. Purba di hinka bo mes den su sapatu. Keda mustra kariño i purba di sera un bon amistat ku bo rumannan. Kòrda ku e meta di duna konseho no ta pa djis haña bon resultado, sino tambe pa “hasi kurason kontentu.”—Pro. 27:9.