1-2. Ngera ngsilubii a odam el kirel a dosmechokl er a rechad?

 NGBETOK el rak er uchei e a reteru el mechuodel a mlo odngelii a ta el odos el ngii a meketeketa el diak el be er a miting. Ngike el odam el milengedecheduch a chiluiu a bades el mesaod a uchul me ngdiak el kired el mengoit a miting. Ngika ulemdasu el kmo tia el odngelir a kmal mle ungil engdi sera lorael ngii me ngike el ta er a odam e a odos a dilu el kmo, “Kemiu a kmal diak modengelii a kchelebangel er ngii.” Tirka el odam a milsmechokl er ngii e dimlak a ta el loker el kirel a mondai el lechebangel. Sei a uchul me ngika el odos a dimlak lomdasu el kmo a omesmechokl er tir a ngilsuir.

² Ngika el odam el milengedecheduch a melatk el kirel tia el tekoi e kmo: “Seikid el taem a kulemdasu el kmo ngika el odos a kmal diak lolecholt a omengull. Engdi sera bo kulatk er ngii e ak mlo mtebengii el kmo ak mlong lolab a ungil bades engdi dimlak kulab a ungil ker el ua, ‘Ngngar ngii a tekoi el omchelebangel?’ ‘Ngngera sebechek el rullii el ngosukau?’” Ngika el mechuodel a silubii a kmal klou a ultutelel tekoi er tia el experience. Chelecha el taem e ngta er a kmal chubechub el mechuodel el kmal ungil olengeseu er a rechad.

3. Ngtecha er a ongdibel a sebechel mesmechokl er a chad?

 ³ A remechuodel a mengkerengel a sib el ngerechelir el mesmechokl er a rechad sel lousbech omesmechokl. Me nguaisei engdi a lebebil e a rechedal a ongdibel a mo kirir el mesmechokl er a rechad. El ua tiang, a odam me a lechub e ngodos a omsa sechelil a ulekrael er a Biblia. (Psa. 141:5; Osi. 25:12) A klou el odos a locha mo “olisechakl er a re mekekerei el redil” aike el tekoi el debetik er a Titus 2:3-5. Me a ruungalek a blechoel mellach e mesmechokl er a rengelekir. Me nguaisei  alta tia el suobel a mora remechuodel engdi kede rokui el ngmai a klungioled er ngii sel dolatk er a rolel e ngsebeched el mesmechokl er a chad el ngosuir e dirrek el ‘rullii el mo dmeu a rengul.’​—Osi. 27:9, NW.

4. Ngera kede mo mesaod er tia el suobel?

⁴ Ngar tia el suobel e kede mo mesaod a eua el ker: (1) Ngera melemalt luchul me kede mesmechokl er a chad? (2) Ngkmal kirel mesmechokl? (3) Ngtecha ungil losmechokl er a chad? (4) Ngmekera sebeched el remuul a omesmechokl er kid el mo ungil?

5. Ngera uchul me a rechad a beot er tir a kongei er a omesmechokl er a mechuodel a lsekum e ngmeruul er ngii loeak a bltikerreng? (1 Korinth 13:4, 7)

⁵ A remechuodel a betik a rengrir er a rudam me a rudos er tir. A lebebil e te olecholt er tia el bltikerreng loeak sel losmechokl er a chad el ngii a toucheklang er a diak el melemalt el rael. (Gal. 6:1, BT) Engdi uchei er a longedecheduch er a chad a mechuodel, e ngungil lolatk a tekingel a apostol Paulus el kirel a bltikerreng. “A bltikerreng a klou a rengul e bekokuii. . . . Ng outekangel el diak le toched er a rokui el tekoi, e oumera rokui el tekoi, e melatk e mengiil el diak louedikel a rengul, e klou a rengul el diak le mesim er a rokui el tekoi.” (Monguiu er a 1 Korinth 13:4, 7.) Sel lolebedebek aika el bades e ngngosuir el mo melatk er a uchul e ngmesmechokl er a odam er ngii e mo mengedecheduch er ngii loba bltikerreng. A lsekum ngika el melai er a omesmechokl a melechesuar a ulekerreuil a mechuodel e ngmo beot er ngii a kongei er a omesmechokl.​—Rom 12:10.

6. Ngera el ungil kerebai a lekiltmeklii a Paulus?

⁶ A apostol Paulus a kiltmeklii a ungil kerebai el ta er a remechuodel. El uai tiang, a rudam er a Thesalonika er a bo lousbech a omesmechokl e ngmilsmechokl er tir. Engdi ngngar er a babilengel el mo er tir e a kot e ngchilat er tir er a blakerreng er tir me a meringel el urerir. Ngdirrek el millatk a blekeradel el lechilebangel e dilu er tir el kmo ngmle medengei el kmo ngdiak lebeot a klengar er tir me tir a chilebangel a odechelakl. (1 Th. 1:3; 2 Th. 1:4) E dilu er tir el kmo te kerebai el kirir a Rekristiano. (1 Th. 1:8, 9) Nglocha kmal mle dmeu a rengrir el remenges aika el tekingel a Paulus! Ngbleketakl el kmo a Paulus a kmal mle betik a rengul er tir. Sei a uchul e ngmle sebechel mesterir a ungil omesmechokl el ngar aike el teblo el babilengel el mora rechad er a Thesalonika.​—1 Th. 4:1, 3-5, 11; 2 Th. 3:11, 12.

7. Ngera uchul me a chad a locha mo diak lekengei er a omesmechokl?

⁷ Ngera sebechel duubech a lsekum e ngdiak dosmechokl el ngar er a ungil rolel? A meketeketa el mechuodel a kmo, “A rebebil a diak lomtok omesmechokl engdi te mo diak lekengei loltaut e le ngdimlak lemeruul el ngar er a rolel a bltikerreng.” Ngera kede suubii er tiang? A omesmechokl a beot el mengai a lsekum e ngmeruul el ngar er a rolel a bltikerreng el diak el seselkreng.

8. Ngera ungil ker el mechuodel a kirel di ngii loker er a uchei er a lolatk el mo mesmechokl er a chad?

⁸ A remechuodel a diak el kirir el di mereched el mo mesmechokl. Uchei er a lolatk el mo mesmechokl e ngkirel di ngii loker el kmo: ‘Ngmera el kirek el melekoi er ngii? Ngmera el ulterekokl a renguk el kmo a loruul er ngii a mekngit? Ngmla tomellii a llach er a Biblia? Me a lechub e ngkuk di klekakerous er a uldasu?’ A remechuodel a kmal kirir el “lomdasu a lolekoi.” (Osi. 29:20) A lsekum a mechuodel a diak el lulterekokl a rengul el kirel el mo mesmechokl er a chad me a lechub e ngdiak, e ngsebechel mengedecheduch er a kuk ta er a remechuodel el kmo, a loruul er  ngii a chad ngomtok er a Biblia me ngousbech a omesmechokl me a lechub e ngdiak.​—2 Ti. 3:16, 17.

9. Ngera kede suubii er a Paulus el kirel a dosmechokl er a chad el kirel a bilel me a rolel a longetmokl er ngii? (1 Timothy 2:9, 10)

⁹ Molatk er tiang. Omko a mechuodel a bekikl el kirel a bilel me a lechub a rolel a longetmokl er ngii a ta er a kldemel er a klemerang. Ngika el mechuodel a sebechel di ngii loker el kmo, ‘Ngomtok a bades a rolel a loubail e longetmokl er ngii me ngkmal kirek el mengedecheduch er ngii?’ A mechuodel a diak el soal loltirakl er a di uldesuel a uchul e nglocha mo olengit er a ta er a mechuodel me a lechub e ngta er a chedal ongdibel el mesisiich er a klemerang el kirel a uldesuel er tiang. Te locha mo dmak el omes er a omellach er a Paulus el kirel a rolel a doubail e domesiich er kid. (Monguiu er a 1 Timothy 2:9, 10.) A omellach el Paulus a meskid a kmo ngkirel tabesul a doubail e dongetmokl er kid e diak bo luchul a otuub el mora Jehovah. A Paulus a dimlak lomasech aike el kired me a diak el kired el meruul. Ngmedengei el kmo a Kristiano a ngar ngii a llemeltel el melilt a soal loubail el diak lomtok aike el lolekoi a Biblia. Me a remechuodel sel lolatk er a mo mesmechokl er a chad el kirel a rolel a loubail e ngkirir el mesa el kmo ngoba tabesul uldasu e diak luchul otuub el mora Jehovah.

10. Ngera diak el kired lobes er ngii el kirel a omelilt er a rederta el chad?

¹⁰ Ngkmal klou a ultutelel a bo dodengei el kmo a reteru el Kristiano a locha mo ngodech a omelilt er tir engdi ngdi diul diak el mekngit. Me ngdiak el kired el melisiich er a uldesued el kirel a kmo ngngera ungil me a mekngit.​—Rom 14:10.

11-12. A lsekum e ngusbechall a omesmechokl, e ngera el ker a kirel a mechuodel el di ngii loker, e ngera uchul?

¹¹ A lsekum e ngbleketakl el kmo a chad a ousbech a omesmechokl e a kuk ta er a ker el duubech a kmo, Ngtecha ungil losmechokl er ngii? A uchei er a mechuodel a losmechokl er a bechiil el odos me a lechub e ngngalek, e ngkirel mengedecheduch er a bdelul a telungalek el ngii a locha soal di ngii el mo mesmechokl er tia el tekoi. * Me a lechub e ngika el bdelul a telungalek a soal a lengar sei er sel taem el lomesmechokl. E ua losaod a  3 el parakurab, ngngar ngii aike el taem el locha bai lungil a leklou el odos a losmechokl er a kekerei el odos.

¹² Ngar ngii a dirrek el ta er a tekoi el kirir el melatk er ngii. A mechuodel di le ngii loker, ‘Ngak, ngungil kusmechokl er ngii me a lechub a le ta er a chad a losmechokl er ngii e ngmo beot er ngii el kongei er a omesmechokl?’ El ua tiang, a chad el blechoel el mo omdasu el kmo ngdiak a belkul a locha mo kongei er a omesmechokl er a mechuodel el mla chobengelii  tiang er a bai mechuodel el dirkak. Ngike el mechuodel el mla ta el bo lomdasu el uaisei a moba lmuut el klou el klechubechub el bedul ngii e sebechel mengedecheduch el ngar er a rolel e ngbeot er ngii a kongei er a omesmechokl. Me nguaisei engdi ngngerechelir a rokui el mechuodel el melisiich e omeksemeriar a rengrir a rudam me a rudos el mo meruul omelodech el Biblia melekoi el kmo ngkired el meruul. Me a lsekum a omesmechokl a usbechall e sel kot el klou a ultutelel a mo mesmechokl er a chad.

13-14. Ngera uchul me ngklou a ultutelel el kirel a mechuodel el orrenges?

¹³ Mkltmokl el orrenges. A mechuodel sel longetmokl er ngii el mo mesmechokl er a chad e ngungil di le ngii loker el kmo: ‘Ngera kmedengei el kirel a blekerdelel a klengar er a odam er ngak? Ngera ngar ngii er a klengar er ngii? Ngika nglocha chelebangel a tekoi el diak kudengei? Ngngera sel kot lousbech er ngii er chelechang?’

¹⁴ A omellach el ngar er a Jakobus 1:19 a melutk el kirir tirke el omesterir a rechad omesmechokl. A Jakobus a milluches el kmo: “A re bek el chad bo le mereched el orrenges, e le meoud el mengedecheduch, e le meoud el ngmasech a rengrir.” A mechuodel a locha omdasu el kmo ngmedengei a rokui el tekoi, engdi ngmera el uaisei? A Osisechakl 18:13 a omeklatk er kid el kmo: “A lsekum a chad a onger a ker er uchei er a lorrenges, e ng klebelung e otuball.” Ngkmal ungil a di lebleketakl loker er a chad el kirel. Tia belkul a kmo ngkirel lorrenges er a uchei er a longedecheduch. Molatk er a tekoi el desuubii er a tekingel ngike el odam el dulsaod er ngii er a uchelel a suobel. Ngika el odam a mlo mtebengii el kmo ngbai dimlak el kirel lomuchel er a odngelel el melekoi a tekoi el lekiltmokl el mo melekoi e ngbai mle kirel loker er a odos a ker el ua: “Ngngar ngii a tekoi el omchelebangel?” “Ngngera sebechek el rullii el ngosukau?” A remechuodel sel longoit a taem el mo medengei a rokui el tekoi e ngmo sebechir el ngosuterir e melisiich er a rudam me a rudos er tir.

15. Te mekera remechuodel e sebechir el oltaut er a omellach el ngar er a Osisechakl 27:23?

¹⁵ Bo mungil medengelterir a sib. Ngua dulsaod er ngii er a uchelel, a omesmechokl a diak di lomenguiu el bades me a lechub e dosaod aike el sebechir el meruul. A rudam me a rudos er kid a kirir melechesuar el kmo kede omekerreu er tir, e medengei a chelebengelir, e soad el olengeseu er tir. (Monguiu er a Osisechakl 27:23.) A remechuodel a kirir el mora tkurrebab el sebechir el mekeroul a kmes el deleuill er tir me a rudam me a rudos.

16. Ngera mo ngosuterir a remechuodel el remuul a omesmechokl er tir el mo ungil?

¹⁶ A remechuodel a diak el kirir el rulleterir a sib el mo omdasu el kmo te di mengedecheduch er tir sel kirir el mesmechokl er tir. E te bai blechoel el mengedecheduch er a rudam me a rudos er tir, e olecholt el kmo te kerekikl  el omekerreu er tir sel lechebangel a omelsemai. A ta el meketeketang el mechuodel a kmo, “Sel moruul el uaisei e ke mekurulii a ungil deleuill el obengterir. Me sel bo lekirem el mesmechokl, e ngbeot er kau a meruul er ngii.” E ngike el nguu a omesmechokl a mo beot er ngii a kongei er ngii.

17. Oingerang e a mechuodel a kirel el kmal mo oba kllourreng me a ungilreng?

¹⁷ Moba kllourreng me a ungilreng. Ngkmal usbechall a kllourreng me a ungilreng sel lsekum a chad a diak el kengei er a omesmechokl er a uchelel. A mechuodel a kirel kerekikl el diak bo leseselk a rengul a lsekum e ngdiak el mereched a chad el kongei me a lechub e ngoltaut er a omesmechokl. A Biblia melekoi el kirel a Jesus el kmo: “Ng diak bo longam er a blouch el lild, ma ka bo lomekoad er a olbidel el olengebeet er a kerdel.” (Mt. 12:20) Me a mechuodel a sebechel di ngii el meluluuch el mora Jehovah el kmo lomekngeltengat er ngike el chad el lousbech omesmechokl e lengesuir el mo mtebengii a uchul me ngkirel mesmechokl e bo loltaut er ngii. A odam el ngiluu a omesmechokl a locha ousbech er a taem el mo melatk a tekoi el mildung er ngii. A lsekum a mechuodel a oba kllourreng me a ungilreng e ngike el chad el lolengeseu er ngii a diak bo lemechesang el melatk er a rolel a omesmechokl e ngbai mo melatk a belkul a tekingel. E uaisei el kirel a omesmechokl el mengai a uchetemel er a Tekingel a Dios.

18. (a) Sel dosmechokl er a chad e ngngera kired el blechoel el melatk? (b) E ua desa er a siasing lobengkel a baks, ngngera te mesaod ngika el chedam me a chedil?

¹⁸ Mngai a klubelem er a cheleuid el mriruul. Kid el diak demecherrungel a uchul me ngdiak el sebeched el cherrungel lotirakl a ulekrael el ngar tia el suobel. (Jak. 3:2) Kede mo remuul a cheleuid engdi sel deruul, e dolasem el ngmai a klubeled er ngii. A lsekum a rudam me a rudos er kid a mtebengii el kmo ngbetik a rengud er tir e ngmo beot er tir a ousubes er kid sel deruul me a lechub e kede dmu tekoi el tomall a rengrir.​—Dirrek el momes er a baks el “ Uleklatk el Mora Ruungalek.”

19. Ngmekera deruul a rengrir a rudam me a rudos er kid el mo ungil?

¹⁹ Ngua bla dosaod, ngmeringel a dosiik er a ungil el rolel e kede mesmechokl er a chad. Kid a diak demecherrungel me tirke el dosmechokl er tir me te diak el mecherrungel. Lak mobes aike el omellach el dulsaod er tia el suobel. Moterekeklii el kmo a omesmechokl a medung el melemalt a moktek er ngii. E moterekeklii el kmo ngmera el kirel mesmechokl a chad me kau a melemalt el chad el mo mesmechokl er ngii. E a uchei er a omesmechokl e moker a ker e bo mungil lorrenges me bo modengei a mondai el lechelebangel. Molasem el moba osengel er a tekoi. Bo medemedemek e momekeroul er a kmes el deleuill er kau me a rudam me a rudos er kau. Molatk er a kirel turrekong er kid: Ngdiak el soad el di remuul a omesmechokl er kid el mo ungil ngdirrek el soad el ‘rullii el mo dmeu a rengul.’​—Osi. 27:9, NW.