مطالعے دا مضمون نمبر 8
کیہہ تُسی ایہو جہی اِصلاح کردے او جدے توں دُوجیاں دا دل خوش ہووے؟
جیویں تیل تے بخور نال دل نُوں خوشی مِلدی اے، اوسے طرحاں دوست دے چنگے مشورے دل نُوں خوش کردے نیں۔—امثال 27:9۔
گیت نمبر 102: کمزوراں دی مدد کرو
مضمون تے اِک نظر *
1، 2. اِک بھرا نے دُوجیاں دی اِصلاح کرن بارے کیہڑی گل سکھی؟
کئی سال پہلاں دو بزرگ اِک بھین نُوں مِلن گئے جیہڑی کجھ عرصے توں عبادتاں تے نئیں آ رہی سی۔ اوہناں وچوں اِک بزرگ نے اوس بھین نُوں عبادتاں تے آن بارے کئی ساریاں ایتاں وکھائیاں۔اوہنوں لگیا کہ اوہنے بھین دا بوہت حوصلہ ودھایا اے۔ پر جدوں اوہ دونویں بزرگ اوتھوں جان لگے تے بھین نے اوہناں نُوں کہیا: ”بھراوو، توانوں ذرا وی اندازہ نئیں اے کہ میں کیہڑیاں مشکلاں چوں لنگھ رہی آں۔“ بھراواں نے ایہہ جانن دی کوشش ای نئیں کیتی سی کہ اوس بھین نُوں کیہڑے مسئلیاں دا سامنا ہو رہیا اے۔ ایس لئی اوہناں دی گل بات توں اوس بھین نُوں کوئی فائدہ نئیں ہویا۔
2 جیہڑے بزرگ نے اوس بھین نُوں بوہت ساریاں ایتاں وکھائیاں سن، اوہ ایس واقعے نُوں یاد کردے ہوئیاں کہندا اے: ”اوس ویلے مینوں لگیا کہ اوس بھین نے ساڈی گل بات دی بےقدری کیتی اے۔ پر فیر مینوں احساس ہویا کہ میں اپنی بھین بارے سوچن دی بجائے بس اوہناں ایتاں بارے سوچیا جیہڑیاں میں اوہنوں وکھانا چاہنا ساں۔ مینوں اوہدے کولوں پچھنا چاہی دا سی کہ اوہ کیہڑے حالاتاں چوں لنگھ رہی اے تے میں اوہدی مدد کیویں کر سکنا واں۔“ ایس واقعے توں اوس بزرگ نے بڑا خاص سبق سکھیا۔ ہُن اوہ دُوجیاں نال ہمدردی نال پیش آندا اے تے اوہناں دا حوصلہ ودھاندا اے۔
3. کلیسیا چ کون دُوجیاں دی اِصلاح کر سکدا اے؟
3 بزرگ کلیسیا چ چرواہیاں دے طور تے کم کردے نیں تے اوہناں دی ذمےداری اے کہ اوہ ضرورت پین تے دُوجیاں دی اِصلاح کرن۔پر کدی کدار کلیسیا چ دُوجے بھین بھراواں نُوں وی کسے دی اِصلاح کرنی پے سکدی اے۔ مثال لئی، ہو سکدا اے کہ کسے بھین یاں بھرا نُوں اپنے کسے دوست نُوں بائبل چوں کوئی مشورہ دینا پووے۔ (زبور 141:5؛ امثال 25:12) یاں فیر شاید کسے وڈیری بھین نُوں جوان بھیناں نُوں ایہو جہیاں گلاں سکھانیاں پین جنہاں دا ذکر طِطُس 2:3-5 چ ہویا اے۔ ایہدے علاوہ ماں پیو نُوں وی اپنے بچیاں نُوں کجھ گلاں سمجھانیاں پیندیاں نیں تے اوہناں دی اِصلاح کرنی پیندی اے۔بھانویں کہ ایہہ مضمون بزرگاں لئی اے پر ایہدے چ دِتے گئے مشوریاں توں اَسی سارے ایہہ سکھ سکنے آں کہ اَسی دُوجیاں دی اِصلاح کیویں کر سکنے آں جدے تے اوہ نہ صرف عمل کر سکن سگوں اوہناں دا دل وی خوش ہووے۔—امثال 27:9۔
4. ایس مضمون چ اَسی کیہڑے چار سوالاں تے غور کراں گے؟
4 ایس مضمون چ اَسی دُوجیاں دی اِصلاح کرن بارے چار سوالاں تے غور کراں گے: (1) اِصلاح کرن دی وجہ کیہہ ہونی چاہی دی اے؟ (2) کیہہ اِصلاح کرنا واقعی ضروری اے؟ (3) اِصلاح کرن دی ذمےداری کدی اے؟ (4) تُسی ایہو جہی اِصلاح کیویں کر سکدے او جدے توں دُوجیاں نُوں فائدہ ہووے؟
اِصلاح کرن دی وجہ کیہہ ہونی چاہی دی اے؟
5. اِصلاح کرن دی وجہ نُوں ذہن چ رکھن نال اِک بزرگ فائدہمند اِصلاح کیویں کر سکے گا؟ (1-کُرنتھیوں 13:4، 7)
5 کلیسیا دے بزرگ اپنے بھین بھراواں نال بوہت پیار کردے نیں۔ ایسے پیار دی وجہ توں کدی کدار اوہ کسے ایہو جہے بھین بھرا دی اِصلاح کردے نیں جیہڑا غلط کم کرن دے خطرے چ ہوندا اے۔ (گلتیوں 6:1) پر اوس بھین یاں بھرا نال گل کرن توں پہلاں اِک بزرگ محبت بارے اوہناں گلاں تے غور کر سکدا اے جنہاں دا ذکر پولُس رسول نے کیتا۔ اوہنے کہیا: محبت صبر کردی اے تے مہربان اے۔ محبت سب کجھ برداشت کردی اے، ساریاں گلاں تے یقین کردی اے، ساریاں شیواں دی امید رکھدی اے تے ہر حال چ ثابتقدم رہندی اے۔ (1-کُرنتھیوں 13:4، 7 نُوں پڑھو۔) جدوں اِک بزرگ ایہناں ایتاں چ لکھیاں گلاں تے چنگی طرحاں سوچوچار کرے گا تے اوہ ایس گل دا خیال رکھ سکے گا کہ اوہ کسے بھین یاں بھرا دی اِصلاح پیار نال کرے۔ جدوں اوہ بھین یاں بھرا ویکھے گا کہ اوس بزرگ نُوں اوہدی کِنّی فکر اے تے اوہدے لئی اوس بزرگ دی گل مننا اسان ہوئے گا۔—رومیوں 12:10۔
6. پولُس رسول نے کیہڑی چنگی مثال قائم کیتی؟
6 پولُس رسول نے اِک بزرگ دے طور تے بڑی چنگی مثال قائم کیتی۔ مثال لئی، جدوں تھسلُنیکے دی کلیسیا نُوں اِصلاح دی ضرورت سی تے پولُس نے اوہناں دی اِصلاح کیتی۔ پر پولُس نے اوہناں نُوں جیہڑے خط لکھے اوہناں چ سب توں پہلاں اوہنے اوہناں دے چنگے کماں، سخت محنت تے ثابتقدمی لئی اوہناں دی تعریف کیتی۔ پولُس نے اوہناں دے حالاتاں نُوں وی ذہن چ رکھیا تے ایس گل لئی اوہناں دی تعریف وی کیتی کہ اوہ اینیاں اَذیتاں تے مصیبتاں دے باوجود ہمت وکھا رہے نیں۔ (1-تھسلُنیکیوں 1:3؛ 2-تھسلُنیکیوں 1:4) اوہنے تھسلُنیکے دے مسیحیاں نُوں ایہہ وی کہیا کہ اوہ دُوجے مسیحیاں لئی بڑی ودھیا مثال نیں۔ (1-تھسلُنیکیوں 1:8، 9) ذرا سوچو کہ ایہہ گلاں سن کے تھسلُنیکے دے مسیحی کِنّے خوش ہوئے ہون گے۔ پولُس واقعی اپنے اوہناں بھین بھراواں نال بڑی محبت کر دا سی۔ ایسے لئی اپنے دونواں خطاں چ اوہنے اوہناں مسیحیاں دی ایہو جہی اِصلاح کیتی جدا اوہناں دے دل تے گُوڑھا اثر ہویا۔—1-تھسلُنیکیوں 4:1، 3-5، 11؛ 2-تھسلُنیکیوں 3:11، 12۔
7. کجھ بھین بھرا کیس وجہ توں اِصلاح نُوں قبول نئیں کردے؟
7 جدوں دُوجیاں دی اِصلاح کردے ویلے ساڈا طریقہ صحی نئیں ہوندا تے ایہدا کیہہ نتیجہ نکل سکدا اے؟ ایس بارے اِک تجربہکار بزرگ نے کہیا:”کجھ بھین بھرا اِصلاح نُوں قبول نئیں کردے۔ ایہدی وجہ ایہہ نئیں ہوندی کہ اوہناں نال کوئی غلط گل کیتی جاندی اے سگوں ایہدی وجہ ایہہ ہوندی اے کہ اوہناں نُوں پیار نال نئیں سمجھایا جاندا۔“ ایہدے توں اَسی کیہہ سکھنے آں؟ ایہہ کہ جے اَسی غصے دی بجائے پیار نال دُوجیاں دی اِصلاح کراں گے تے اوہناں لئی ایہنوں قبول کرنا زیادہ اسان ہوئے گا۔
کیہہ اِصلاح کرنا واقعی ضروری اے؟
8. اِک بزرگ نُوں کسے دی اِصلاح کرن توں پہلاں اپنے آپ کولوں کیہڑے سوال پچھنے چاہی دے نیں؟
8 بزرگاں نُوں اِصلاح کرن چ جلدبازی نئیں کرنی چاہی دی۔ کسے دی اِصلاح کرن توں پہلاں اِک بزرگ نُوں اپنے آپ کولوں ایہہ سوال پچھنے چاہی دے نیں: ”کیہہ مینوں واقعی ایس معاملے چ بولن دی ضرورت اے؟ کیہہ مینوں پورا یقین اے کہ اوہ بھین یاں بھرا کوئی غلط کم کر رہیا اے؟ کیہہ اوہنے بائبل دا کوئی حکم توڑیا اے؟ یاں فیر بس اوہدی رائے میرے توں فرق اے؟“ جدوں اِک بزرگ گل بات کرن چ جلدبازی نئیں کردا تے اوہ ثابت کردا اے کہ اوہ سمجھدار اے۔ (امثال 29:20) جے اِک بزرگ نُوں سمجھ نئیں آندی کہ اوہنوں کسے بھین یاں بھرا دی اِصلاح کرنی چاہی دی اے یاں نئیں تے اوہ کیہہ کر سکدا اے؟ اوہ کسے ہور بزرگ نال گل کر سکدا اے تے اوہدے نال مل کے ایس گل تے غور کر سکدا اے کہ کیہہ اوس بھین یاں بھرا نے واقعی کوئی ایہو جیہا کم کیتا اے جیہڑا بائبل دے خلاف اے تے جدی وجہ توں اوہدی اِصلاح کیتی جانی چاہی دی اے۔—2-تیمُتھیُس 3:16، 17۔
9. پولُس نے کپڑے لتے تے بنن سنورن بارے جیہڑی ہدیت دِتی اوہدے توں اَسی کیہہ سکھ سکنے آں؟ (1-تیمُتھیُس 2:9، 10)
9 ذرا اِک مثال تے غور کرو۔ فرض کرو کہ اِک بزرگ نُوں لگدا اے کہ اوہدے کسے ہمایمان دے کپڑیاں تے والاں دا سٹائل ٹھیک نئیں اے۔ اوہنوں اپنے آپ کولوں پچھنا چاہی دا اے: ”کیہہ اوہ بھین یاں بھرا واقعی بائبل دا کوئی اصول توڑ رہیا اے؟“ اوہ بزرگ اپنی سوچ دے مطابق کجھ کہن دی بجائے کسے ہور بزرگ یاں کسے پُختہ بھرا یاں بھین نال مشورہ کر سکدا اے۔ فیر اوہ مل کے اوس ہدیت تے غور کر سکدے نیں جیہڑی پولُس نے کپڑے لتے تے بنن سنورن بارے دِتی سی۔ (1-تیمُتھیُس 2:9، 10 نُوں پڑھو۔) پولُس نے کجھ ایہو جہے اصول دَسے سن جنہاں نُوں ذہن چ رکھ کے اِک مسیحی اپنا جائزہ لے سکدا اے کہ اوہ جیہو جہے کپڑے پا رہیا اے اوہناں توں یہوواہ دی بدنامی تے نئیں ہو رہی۔ پولُس رسول نے کوئی لمی چوڑی لسٹ نئیں بنائی کہ مسیحیاں نُوں ایہو جہے کپڑے پانے چاہی دے نیں تے ایہو جہے نئیں پانے چاہی دے۔ اوہ جان دا سی کہ بھین بھراواں نُوں اپنی پسند دے کپڑے پان دا حق اے۔ بس اوہناں نُوں ایس گل دا دھیان رکھنا چاہی دا اے کہ اوہ کوئی ایہو جہے کپڑے نہ پان جنہاں توں بائبل دا کوئی اصول ٹُٹے۔ جدوں بزرگ کسے بھین یاں بھرا دے کپڑیاں دی وجہ توں اوہدی اِصلاح کرن بارے سوچدے نیں تے اوہناں نُوں وی ایہی گل یاد رکھنی چاہی دی اے۔
10. کیہڑی چیز ساڈی مدد کرے گی کہ اَسی دُوجیاں دے فیصلیاں دا احترام کرئیے؟
10 ایہہ گل یاد رکھنا بوہت ضروری اے کہ کسے معاملے بارے دو پُختہ مسیحیاں دی سوچ اِک دُوجے توں فرق ہو سکدی اے۔ پر ایہدا مطلب ایہہ نئیں اے کہ اوہناں وچوں اِک صحی اے تے اِک غلط اے۔ سانوں صحی غلط بارے اپنی سوچ دُوجیاں تے نئیں تھوپنی چاہی دی۔—رومیوں 14:10۔
اِصلاح کرن دی ذمےداری کدی اے؟
11، 12. جے کسے بھین یاں بھرا نُوں اِصلاح دی ضرورت اے تے اِک بزرگ نُوں اپنے آپ کولوں کیہڑے سوال پچھنے چاہی دے نیں تے کیوں؟
11 جدوں ایہہ گل واضح ہو جاندی اے کہ کسے بھین یاں بھرا نُوں اِصلاح دی ضرورت اے تے اگلا سوال ایہہ پیدا ہوندا اے کہ اوہدی اِصلاح کنہوں کرنی چاہی دی اے؟ کسے شادیشُدہ بھین یاں کسے بچے دی اِصلاح کرن توں پہلاں اِک بزرگ نُوں اوہدے گھر دے سربراہ نال گل کرنی چاہی دی اے۔ ہو سکدا اے کہ گھر دا سربراہ اوس معاملے نُوں آپ حل کرنا چاہوے۔ * یاں فیر ہو سکدا اے کہ اوہ چاہوے کہ جدوں بزرگ اوہدے گھر دے کسے جی دی اِصلاح کرن تے اوہ وی اوتھے موجود ہووے۔ نالے جیویں کہ پیراگراف نمبر 3 چ دَسیا گیا سی، کدی کدار ایہہ بہتر ہوندا اے کہ اِک وڈیری بھین کسے جوان بھین دی اِصلاح کرے۔
12 کسے دی اِصلاح کرن توں پہلاں اِک ہور گل نُوں وی دھیان چ رکھنا ضروری اے۔ اِک بزرگ نُوں اپنے آپ کولوں پچھنا چاہی دا اے: ”کیہہ مینوں اوس بھین یاں بھرا دی اِصلاح کرنی چاہی دی اے؟ یاں بہتر ایہہ ہوئے گا کہ کوئی ہور اوہدی اِصلاح کرے؟“ مثال لئی، جے کسے ایہو جہے بھرا نُوں مشورہ دی ضرورت اے جیہڑا احساسکمتری دا شکار رہندا اے تے بہتر ہوئے گا کہ کوئی ایہو جیہا بزرگ اوہدے نال گل کرے جیہڑا آپ وی ایس مسئلے چوں لنگھیا اے۔ اوہ بزرگ اوس بھرا نال زیادہ ہمدردی نال گل کر سکے گا تے اوہنوں ایہو جہیاں گلاں دَس سکے گا جنہاں نُوں قبول کرنا اوہدے لئی اسان ہوئے گا۔ پر ہر بزرگ دی ذمےداری اے کہ اوہ بھین بھراواں نُوں دَسے کہ اوہ بائبل دے اصولاں تے چلن لئی اپنے اندر کیہڑیاں تبدیلیاں لیا سکدے نیں۔ پر اِنج کرن لئی ہر وار ایہہ لازمی نئیں ہوندا کہ بزرگ آپ وی اوہناں حالاتاں چوں لنگھیا ہووے جنہاں چوں اوہ بھین یاں بھرا لنگھ رہے نیں۔
تُسی ایہو جہی اِصلاح کیویں کر سکدے او جدے توں دُوجیاں نُوں فائدہ ہووے؟
کلیسیا دے بزرگاں نُوں گل سنن لئی تیار رہنا چاہی دا اے۔ (پیراگراف نمبر 13، 14 نُوں ویکھو۔)
13، 14. ایہہ کیوں ضروری اے کہ بزرگ کسے دی اِصلاح کرن توں پہلاں اوہدی گل سنن؟
13 پہلاں گل سنو۔ جدوں اِک بزرگ کسے دی اِصلاح کرن لئی تیاری کردا اے تے اوہنوں اپنے آپ کولوں ایہہ سوال پچھنے چاہی دے نیں: ”مینوں اوس بھرا دے حالات بارے کیہہ کجھ پتہ اے؟ اوہدی زندگی چ کیہہ چل رہیا اے؟ کیہہ اوہ کسے ایہو جہی مشکل چوں لنگھ رہیا اے جدے بارے مینوں نئیں پتہ؟ اوہنوں ایس ویلے سب توں زیادہ کیس چیز دی ضرورت اے؟“
14 اِصلاح کرن والیاں نُوں یعقوب 1:19 چ لکھے اصول تے ضرور عمل کرنا چاہی دا اے۔ ایس ایت چ لکھیا اے: ہر اِک سنن چ جلدی کرے پر بولن چ جلدی نہ کرے تے غصہ کرن چ جلدبازی نہ کرے۔ شاید اِک بزرگ نُوں لگے کہ اوہنوں پوری گل دا پتہ اے پر اکثر اِنج نئیں ہوندا۔ امثال 18:13 چ دَسیا گیا اے: گل سنن توں پہلاں ای اوہدا جواب دینا بےوقوفی اے۔ اِنج کرن والے دی بےعزتی ہوئے گی۔ ایس لئی بہتر اے کہ اَسی جیس بندے دی اِصلاح کر رہے آں، اوہدے کولوں ساری گل پچھئے۔ اِک بزرگ نُوں کجھ وی کہن توں پہلاں اوس بندے دی گل سننی چاہی دی اے۔ کیہہ توانوں اوہ سبق یاد اے جیہڑا اوس بزرگ نے سکھیا سی جدا ایس مضمون دے شروع چ ذکر ہویا سی؟ اوہ سمجھ گیا سی کہ اوہ جیہڑیاں گلاں دی تیاری کر کے گیا سی اوہ گلاں دَسن توں پہلاں اوہنوں بھین کولوں کجھ ایہو جہے سوال پچھنے چاہی دے سن:”کیہہ سب کجھ ٹھیک چل رہیا اے؟ میں تواڈی مدد کیویں کر سکنا واں؟“ جدوں بزرگ کسے بھین یاں بھرا دی اِصلاح کرن توں پہلاں اوہدے حالاتاں نُوں جانن دی کوشش کرن گے تے اوہ چنگی طرحاں اوہدی مدد کر سکن گے تے اوہدا حوصلہ ودھا سکن گے۔
15. بزرگ امثال 27:23 چ لکھے اصول تے کیویں عمل کر سکدے نیں؟
15 اپنے گلّے نُوں چنگی طرحاں جانو۔ جیویں کہ اَسی ایس مضمون دے شروع چ ویکھیا سی جے اَسی چاہنے آں کہ دُوجیاں نُوں اِصلاح توں فائدہ ہوئے تے صرف ایہہ کافی نئیں اے کہ اَسی اوہناں نُوں بائبل چوں اِک دو ایتاں پڑھ کے سنا دَئیے یاں اوہناں نُوں کوئی مشورہ دے دَئیے سگوں ساڈیاں گلاں توں بھین بھراواں نُوں ایہہ محسوس ہونا چاہی دا اے کہ سانوں اوہناں دی فکر اے۔ اَسی اوہناں دے حالات سمجھنے آں تے اوہناں دی مدد کرنا چاہنے آں۔ (امثال 27:23 نُوں پڑھو۔) بزرگاں نُوں بھین بھراواں نال گُوڑھی دوستی کرن دی پوری کوشش کرنی چاہی دی اے۔
کیہڑی چیز بزرگاں دی مدد کرے گی تاکہ اوہ اسانی نال دُوجیاں دی اِصلاح کر سکن؟ (پیراگراف نمبر 16 نُوں ویکھو۔)
16. کیہڑی چیز بزرگاں دی مدد کرے گی تاکہ اوہ کسے بھین یاں بھرا دی ایہو جہی اِصلاح کرن جدے توں اوہنوں فائدہ ہووے؟
16 بزرگاں نُوں کدی وی کسے بھین یاں بھرا نُوں ایہہ محسوس نئیں کرانا چاہی دا کہ اوہ اوہدے نال صرف اوہدوں گل کرن گے جدوں اوہدے کولوں کوئی غلطی ہوئے گی۔ سگوں بزرگاں نُوں بھین بھراواں نال باقاعدگی نال گل بات کرنی چاہی دی اے۔ جدوں اوہناں نُوں کسے مشکل دا سامنا کرنا پیندا اے تے بزرگاں نُوں ثابت کرنا چاہی دا اے کہ اوہ اوہناں دی فکر کردے نیں۔ اِک تجربہکار بزرگ نے ایس بارے کہیا: ”اِنج کرن نال بھین بھراواں نال تواڈی دوستی ہو جائے گی تے فیر جدوں توانوں کسے بھین یاں بھرا دی اِصلاح کرنی پووے گی تے تواڈے لئی اِنج کرنا اسان ہوئے گا۔“ ایہدے علاوہ اوس بھین یاں بھرا لئی وی اِصلاح نُوں قبول کرنا اسان ہوئے گا۔
جدوں اِک بزرگ کسے دی اِصلاح کردا اے تے اوہنوں اوہدے نال پیار تے صبر نال کیوں پیش آنا چاہی دا اے؟ (پیراگراف نمبر 17 نُوں ویکھو۔)
17. اِک بزرگ نُوں خاص طور تے کدوں کسے بھین یاں بھرا نال پیار تے صبر نال پیش آنا چاہی دا اے؟
17 پیار تے صبر نال پیش آؤ۔ اِنج کرنا خاص طور تے اوہدوں ضروری ہوندا اے جدوں بائبل چوں کسے دی اِصلاح کیتی جائے پر شروع شروع اوہ اوہنوں نہ منے۔ اِک بزرگ نُوں اوس ویلے غصے چ نئیں آنا چاہی دا جدوں کوئی بھین یاں بھرا اوہدی گل نُوں فوراً نئیں من دا۔ یسوع مسیح بارے ایہہ پیشینگوئی کیتی گئی سی: اوہ ٹُٹے ہوئے کانے نُوں نئیں مِدے گا تے دیوے دی بلدَی بتی نُوں نئیں بجھائے گا۔ (متی 12:20) ایس لئی بزرگ نُوں اپنی ذاتی دُعا چ اوس بھین یاں بھرا لئی یہوواہ کولوں مدد منگنی چاہی دی اے جدی اِصلاح کیتی گئی اے تاکہ اوہ سمجھ سکے کہ اوہدی اِصلاح کیوں کیتی گئی اے تے اوہ اوہنوں قبول کر کے اپنے اندر بہتری لیائے۔ ہو سکدا اے کہ اِصلاح نُوں قبول کرن چ اوہنوں تھوڑا وقت لگے۔ پر جدوں اِک بزرگ پیار نال اِصلاح کرے گا تے صبر نال پیش آئے گا تے اوس بھین یاں بھرا دا دھیان اوہناں گلاں تے رہوے گا جیہڑیاں بزرگ نے اوہنوں دَسیاں نیں۔ اِنج اوہدے لئی اِصلاح نُوں قبول کرنا اسان ہوئے گا۔ بزرگاں نُوں ایہہ گل ہمیشاں یاد رکھنی چاہی دی اے کہ اوہ دُوجیاں دی اِصلاح خدا دے کلام چوں کرن۔
18. (الف) کسے دی اِصلاح کردے ویلے سانوں کیہڑی گل یاد رکھی چاہی دی اے؟ (ب) بکس نال دِتی گئی تصویر چ ماں پیو آپس چ کیہہ گل بات کر رہے نیں؟
18 اپنیاں غلطیاں توں سکھو۔ اَسی عیبدار آں ایس لئی ساڈے لئی ایس مضمون چ دِتے گئے مشوریاں تے پوری طرحاں عمل کرنا مشکل ہو سکدا اے۔ (یعقوب 3:2) دُوجیاں دی اِصلاح کردے ویلے ساڈے کولوں غلطیاں ہون گیاں۔ پر سانوں اپنیاں غلطیاں توں سکھنا چاہی دا اے۔ جدوں بھین بھرا ایہہ ویکھن گے کہ اَسی اوہناں نال پیار کرنے آں تے فیر اوہناں لئی سانوں اوس ویلے معاف کرنا اسان ہو جائے گا جدوں ساڈی کسے گل یاں کم توں اوہناں دا دل دُکھے گا۔—بکس ” ماں پیو لئی ہدیت“ نُوں وی ویکھو۔
اَسی کیہہ سکھیا اے؟
19. اَسی اپنے بھین بھراواں دے دل نُوں خوش کیویں کر سکنے آں؟
19 اَسی ویکھیا اے کہ کسے دی ایہو جہی اِصلاح کرنا اسان نئیں ہوندا جدے توں اوہنوں فائدہ ہوئے۔ اَسی وی عیبدار آں تے اوہ وی عیبدار نیں جنہاں دی اَسی اِصلاح کرنے آں۔ ایس مضمون چ دِتے گئے اصولاں نُوں یاد رکھو۔ ایس گل نُوں یاد رکھو کہ توانوں کسے دی اِصلاح محبت دی وجہ توں کرنی چاہی دی اے۔ ایہدے علاوہ ایس گل تے وی غور کرو کہ کیہہ اِصلاح کرن دی واقعی ضرورت ہے وے تے کیہہ توانوں ای اِصلاح کرنی چاہی دی اے۔ کسے دی اِصلاح کرن توں پہلاں اوہدے کولوں سوال پچھو تے فیر دھیان نال اوہدی گل سنو تاکہ تُسی جان سکو کہ اوہ کیہڑے حالاتاں چوں لنگھ رہیا اے۔ معاملے نُوں اوہدی نظر نال ویکھن دی کوشش کرو۔ بھین بھراواں نال صبر تے پیار نال پیش آؤ تے اوہناں نال گُوڑھی دوستی کرو۔ یاد رکھو کہ سانوں دُوجیاں دی ایہو جہی اِصلاح کرنی چاہی دی اے جدے توں نہ صرف اوہناں نُوں فائدہ ہوئے سگوں اوہناں دا دل وی خوش ہوئے۔—امثال 27:9۔
گیت نمبر 49: یہوواہ دا جی خوش کرو
^ دُوجیاں دی اِصلاح کرنا ہمیشاں اسان نئیں ہوندا۔ پر جدوں سانوں اِنج کرنا پیندا اے تے اَسی کیہہ کر سکنے آں تاکہ ساڈیاں گلاں توں دُوجیاں نُوں فائدہ ہووے تے اوہ تازہدم ہو جان؟ ایہہ مضمون خاص طور تے بزرگاں دی مدد کرے گا تاکہ اوہ ایس طریقے نال دُوجیاں دی اِصلاح کرن کہ دُوجیاں دے دل تے اوہدا اثر ہووے تے اوہ اوہدے تے عمل وی کر سکن۔
^ اُردو زبان چ مینارِنگہبانی فروری 2021 چ مضمون”کلیسیا میں سربراہی کا بندوبست“ نُوں ویکھو۔