1-2. Dahme elder men sukuhlki duwen en kihda kaweid?

 SOUNPAR tohto samwalahro, elder riemen mwemweitla rehn emen sister me wereila sohte iang mihting. Emen elder ko kasalehiong sistero ekei iren Paipel duwen iang towehda mihting kan. E medewe me ara mwemweitlao uhdahn kangoange sistero, ahpw ni ih oh ienge eldero ara pahn kohkohla, sistero nda, “Kumwa uhdahn sohte wehwehki duwen ei kahpwal kan.” Elder ko kihda ara kaweid ko ahpw sohte song en esehda duwen kahpwal kan me sistero ahneki. Pwehki met, sistero sohte medewe me ara kaweido sewese ih.

² Elder me kasalehiong sistero iren Paipel kan koasoia: “Ni ahnsowo, I medewe me sistero sohte waunekin kiht. Ahpw mwuhr I esehda me I sohte medewe mahs duwen sistero, ahpw I medemedewehte iren Paipel kan me I pahn doadoahngki. I anahne song wehwehkihla duwen eh irairo oh kilang ia duwen ei kak sewese ih.” Eldero sukuhlki mehn kasukuhl kesempwal ehu sang dahme wiawio. Rahnwet, e wia sounsilepen sihpw mwahu men me kin wehwehki irair en meteikan oh sewese irail.

3. Ihs nan mwomwohdiso me kak kihda kaweid?

 ³ Nin duwen sounsilepen sihpw kei, elder kan kin pwukoahki kihda kaweid ni ahnsou me anahn. Ahpw mie ekei ahnsou me meteikan nan mwomwohdiso anahne kihda kaweid. Karasepe, riatail Kristian men kak kihda kaweid sang nan Paipel  ong kompoakepah men. (Mel. 141:5; Lep. Pad. 25:12) De sister mah men kak “kaweidki peinakapw kan” duwen soahng kan me duwehte dahme Taitus 2:3-5 kasalehda. Pahpa nohno kan pil kin anahne kalapw kaweid neirail seri kan. Eri mendahki iren onop wet dokedoke mehlel irail elder kan, kitail koaros kak paiekihda sang atail pahn koasoiapene ia duwen atail kak kihda kaweid mwahu oh kangoang kan me pahn “kaperenda mohngiong.”​—Lep. Pad. 27:9, NW.

4. Dahme kitail pahn koasoiapene nan iren onop wet?

⁴ Nan iren onop wet, kitail pahn koasoiapene peidek pahieu duwen kihda kaweid: (1) Ia kahrepe mwahu me kitail en kihda kaweid? (2) Kaweido uhdahn anahn? (3) Ihs me pahn kihda kaweid? (4) Ia duwen omw kak kihda kaweid me pahn sawas?

5. Dahme kahrehda e pahn mengei en ale kaweid sang elder men ma e wia met ni elen limpoak? (1 Korint 13:4, 7)

⁵ Elder kan kin poakohng riarail Kristian kan. Ekei pak irail kin kasalehda limpoak wet sang ni arail kin kaweid emen me milahr nan keper en wiahda sapwung laud. (Kal. 6:1) Ahpw mwohn arail pahn koasoiong aramaso, elder men kak medewe duwen dahme wahnpoaron Pohl koasoiahki duwen limpoak. “Limpoak kin kanengamah oh kadek. . . . E kin wa katoutou koaros, kamehlele soahng koaros, koapworopworki soahng koaros, oh dadaur ni soahng koaros.” (Wadek 1 Korint 13:4, 7.) Ni elder men eh doudouloale iretikitik pwukat, met pahn sewese ih en tehk mwahu me e kin kaweid ni elen limpoak. Ma me ale kaweido kak pehm me eldero kin nsenohki ih, e pahn kakete pwungki ale kaweido.​—Rom 12:10.

6. Mehn kahlemeng mwahu dah me wahnpoaron Pohl wiahda?

⁶ Wahnpoaron Pohl wia mehn kahlemeng mwahu nin duwen elder men. Karasepe, Pohl kihda kaweid ong Kristian kan nan Deselonika ni ahnsou me re anahne. Ahpw nan nah kisinlikou ko ong irail, Pohl tepte kapingahkin irail arail doadoahk pwehki arail pwoson, limpoak, oh dadaurete. E pil medewe duwen arail mour oh ndaiong irail me e ese me arail mour sohte mengei ahpw re kin dadaurete ni lelepek pahn kalokolok kan. (1 Des. 1:3; 2 Des. 1:4) E pil ndaiong irail me irail wia mehn kahlemeng mwahu ong Kristian teikan. (1 Des. 1:8, 9) Ia uwen arail perenkihda Pohl eh kapinga irail! Pohl kin uhdahn poakohng rie Kristian kan. Ihme kahrehda e kak kihda kaweid mwahu nan nah kisinlikou riau ko ong irail.​—1 Des. 4:1, 3-5, 11; 2 Des. 3:11, 12.

7. Dahme kahrehda emen kakete sohte pwungki ale kaweid?

⁷ Dahme kakete wiawi ma kitail sohte kihda kaweid ni ahl me pwung? Emen elder koahiek koasoia, “Ekei kin sapwungki ale kaweid, kaidehn pwehki kaweido sapwung, ahpw pwehki kaweido sohte wiawi ni elen limpoak.” Dahme kitail kak sukuhlkihsang met? Kitail sukuhlki me e mengei en ale kaweid ni eh kin wiawi ni elen limpoak, a kaidehn ni elen lemei.

8. Dahme elder men en pein idek reh ni eh medemedewe ma e pahn kaweid emen?

⁸ Elder kan en dehr karuwaru en kihda kaweid. Mwohn elder men eh pahn kihda kaweid, e anahne pein idek reh: ‘I uhdahn anahne nda mehkot? I uhdahn kamehlele me dahme aramaso wiewia sapwung? Ia duwe, Paipel mahsanih me dahme aramaso  wia sapwung? De mwein dahme e wiao weksang dahme I pahn wia?’ Ni loalokong, elder kan en dehr ‘kin koasoi ni sohte ar lamalam.’ (Lep. Pad. 29:20) Ma elder men peikasalki en kihda kaweid ong emen, e kak idek rehn emen elder tohrohr ma e pil medewe me aramaso wiewia mehkot me uhwong dahme Paipel mahsanih oh anahne kaweid.​—2 Tim. 3:16, 17.

9. Dahme kitail sukuhlkihsang Pohl duwen en kihda kaweid ong likou oh kapwat? (1 Timoty 2:9, 10)

⁹ Medewehla karasaras wet. Emen elder pwunodki mwomwen emen ienge Kristian eh kin likou oh kapwat. Eldero kak pein idek reh, ‘Mie kahrepe ehu sang nan Paipel me I anahne nda mehkot?’ Pwehki eldero sohte men kihda kaweid sang pein eh madamadau, e kak idek rehn emen elder de emen sounkalohk koahiek ia eh madamadau ong irairo. Ira kak koasoiapene ahn Pohl kaweido duwen likou oh kapwat. (Wadek 1 Timoty 2:9, 10.) Pohl kihda kaweid oh koasoia me Kristian men anahne medewe kanahieng dahme en likawih oh tehk mwahu me dahme e likawih sohte kin kahdsuwedihala Siohwa. Pohl sohte wiahda kosonned kan duwen dahme emen kak likawih de sohte kak likawih. E ese me rie Kristian kan kak likawih dahme re pilada en likawih ma arail pilipilo sohte uhwong dahme Paipel mahsanih. Eri pwehn ese ma re anahne kihda kaweid, elder kan anahne medewe ma dahme aramaso pilada en likawih wia pilipil mwahu ehu oh kin kasalehda wahu.

10. Dahme pahn sewese kitail en wauneki ahn meteikan pilipil?

¹⁰ E kesempwal en tamataman me pilipil kan me Kristian koahiek riemen wiahda kin wekpeseng, ahpw met sohte wehwehki me ahn emen me pwung a ahn meteio sapwung. Kitail en dehr song en idingkihong riatail Kristian men en wia dahme kitail medewe me pwung.​—Rom 14:10.

11-12. Ma mie anahnepen kihda kaweid, peidek dah kan me elder men anahne pein idek reh, oh dahme kahrehda?

¹¹ Ma e sansal me mie anahnepen kihda kaweid, ele kitail pahn idek, ‘Ihs me pahn kihda kaweid?’ Mwohn elder men pahn kaweid lih pwopwoud Kristian men de seri men, e pahn anahne tuhkihong tapwin peneineio, me mwein kakete men pein kaweid eh peneineio. * De mwein tapwin peneineio men mi wasao ni ahnsou me eldero kihda kaweid. Oh nin duwen me  parakrap 3 kasalehda, mie ahnsou kan me e pahn mwahu ma sister mah men me pahn kaweid sister pwulopwul men.

¹² Pil mie mehkot me elder kan anahne medemedewe. Elder men ele kak pein idek reh,  ‘E pahn mwahu ma ngehi me kihda kaweido, de e pahn mwahu ma emen tohrohr pahn wia met?’ Karasepe, emen me kin ahneki pepehm me sohte katepe ele pahn rong kaweid en emen elder me ele pil kin ahneki soangen pepehmo. Mwein soangen eldero pahn wehwehki mwahu aramaso oh kak nda soahng kan me pahn kangoange ih. Ahpw elder koaros kin pwukoahki kangoange oh kamwakid riarail Kristian kan en wiahda wekidekla kan me Paipel padahngki. Eri dahme kesempwal iei me kaweido anahne wiawi, mehnda ma elder me kihda kaweido sohte lelohng soangen irairo.

13-14. Dahme kahrehda e kesempwal elder men en kin rong mwahu?

¹³ Ken kin rong mwahu. Ni elder men eh pahn kihda kaweid, e anahne pein idek reh: ‘Dahme I ese duwen ahn brothero eh irairo? Dahme wiewiawi nan eh mour? Mie soangen kahpwal kan me e ahneki me I sehse? Dahme e keieu anahne met?’

¹⁴ Kaweid me mi nan Seims 1:19 uhdahn mwahu ong irail kan me kin kihda kaweid. Seims ntingihedi: “Aramas koaros anahne mwadang rong, pwand en lokaia, oh pwand en lingeringer.” Elder men kakete medewe me e eseier duwen irair ko koaros, ahpw ia duwe, met mehlel? Lepin Padahk 18:13 katamankihong kitail: “Rong mwohn omw pahn sapeng. Pwe ma soh, kowe aramas pweipwei oh kanamenek.” E pahn keieu mwahu en peki rehn aramaso en kawehwehda duwen irairo. Eri elder men anahne rong mwahu mwohn eh koasoi. Tamanda dahme eldero me kitail koasoiapene nan tepin iren onop wet sukuhlki. E esehda me e sohte anahne tepte koasoia ire kan me e kaunopada, ahpw e anahne idek mahs rehn sistero soangen peidek kan me duwehte: “Dahme kin wiewiawi nan omw mour?” “Ia duwen ei kak sawas?” Ma elder kan kin wiahda ahnsou pwehn alehdi ire mehlel kan koaros, ele irail pahn kak kihda sawas oh kangoang laud ong riarail Kristian kan.

15. Ia duwen elder kan ar kak kapwaiada kaweid en Lepin Padahk 27:23?

¹⁵ Esehla mwahu pelin sihpwo. Nin duwen me kitail koasoia mwoweo, en kihda sawas sohte kin pidadahte en wadek ekei iren Paipel de kihda kaweid ehu de riau. Riatail Kristian kan anahne kehn me kitail kin nsenohkin irail, wehwehkin irail, oh men sewese irail. (Wadek Lepin Padahk 27:23, NW.) * Elder kan anahne wia uwen arail kak en kakairada nanpwungmwahu keren rehn riarail Kristian kan.

16. Dahme pahn sewese elder kan en kihda kaweid mwahu?

¹⁶ Elder kan sohte men riarail Kristian kan en medewe me ihte ahnsou en koasoiong  irail iei ni ahnsou en kihda kaweid. Ahpw irail en kin kalapw koasoakoasoiong irail oh kasalehda me re kin nsenohkin irail ni arail lelohng kahpwal kan. Emen elder koahiek koasoia, “Ma ke wia met, ke pahn wiahla kompoakparail. Eri ni ahnsou me ke pahn kihda kaweid, e sohte pahn apwal.” Oh e pahn mengei ong me pahn ale kaweido en pwungki.

17. Iahd me elder men en keieu anahne kasalehda kanengamah oh kadek?

¹⁷ Ken kanengamah oh kadek. Kanengamah oh kadek kin keieu anahn ni ahnsou me emen sohte men kapwaiada nin tapio dahme Paipel mahsanih. Elder men en dehr lingeringerda pahn rie Kristian men me alehdi kaweid ahpw sohte pwungki de kapwaiada kaweido. Paipel mahsanihki Sises: “Sohte ahlek pu pwoat e pahn kauwehla, oh e sohte pahn kakunla wihk ehu me pahn kereniong kunla.” (Mad. 12:20) Eri ni eldero eh wia pein eh kapakap, ele e kak peki rehn Siohwa en ketin kapaiahda brothero me anahne ale kaweid oh sewese en wehwehki kahrepen kaweido oh en kapwaiada. Me alehdi kaweido ele anahne ahnsou pwehn medemedewe dahme eldero nda. Ma eldero kin koasoi ni kanengamah oh kadek, e pahn mengei ong brothero en rong kaweido. Kaweido anahne ahnsou koaros poahsoanda sang Mahsen en Koht.

18. (a) Ni ahnsou me kitail kin kihda kaweid, dahme kitail anahne tamataman? (b) Nin duwen me kilelo iangahki koakono kasalehda, dahme pahpa oh nohnou koasoakoasoia?

¹⁸ Sukuhl sang omw sapwung kan. Pwehki kitail sohte unsek, kitail sohte pahn kak kapwaiada ni unsek kaweid kan nan iren onop wet. (Seims 3:2) Kitail pahn kin wiahda sapwung kan, ahpw ni atail wia met, kitail anahne sukuhl sang sapwung ko. Ma riatail Kristian kan kak kehn me kitail poakohng irail, e pahn mengei ong irail en mahkohng kitail ma kitail kansensuwedihkinirailla atail lokaia de wiewia.​—Menlau kilang koakono “ Mehn Kataman Ehu ong Pahpa Nohno kan.”

19. Ia duwen atail kak kaperenda mohngiong en riatail Kristian kan?

¹⁹ Nin duwen me kitail koasoiapenehr, e sohte mengei en kihda kaweid mwahu. Kitail oh pil irail kan me kitail kaweid sohte unsek. Tamataman kaweid kan me kitail koasoiapenehr nan iren onop wet. Tehk mwahu me mie kahrepe mwahu me kitail en kihda kaweid. Pil tehk mwahu ma kaweido uhdahn anahne wiawi oh ma e pahn keieu mwahu ma kowe me pahn kihda kaweido. Mwohn omw pahn kihda kaweid, idek peidek kan oh rong kanahieng pwe ken kak wehwehki duwen kahpwal kan me aramaso ahneki. Song en wehwehki eh madamadau. Ken kin kadek oh kakairada nanpwungmwahu keren rehn riomw Kristian kan. Tamataman mehn akadeio: Kitail men atail kaweido en kin kadoadoahk mwahu oh pil “kin kaperenda mohngiong.”​—Lep. Pad. 27:9, NW.