1-2. Со сиклило јекх пхрал башо адава сар те дел пе совет?

БУТ берша англедер, дуј старешине посетинѓе јекхе пхења која со несаво време на сине редовно ко состанокија. Јекх таро старешине читинѓа лаке некобор стихија башо адава кобор тано важно те овел присутно ко состанокија. Ов мислинѓа кај охрабринѓа е пхења, ама кеда уштиле те џан песке и пхен вакерѓа ленге: „Пхраљален, тумен ни хари на сиен свесна таро со накхава“. О пхраља денѓе ла совет бизо те пучен ла таро саве проблемија накхела. Адалеске и пхен на сине охрабрими таро ленгоро совет.

² Кеда сетинела пе, о старешина кова со читинѓа е пхењаке о библиска стихија вакерела: „Мислинава манге сине кај е пхења на сине ла нисаво поштовање. Ама кеда размислинѓум пошукар халиљум кај наместо те читинав е пхењаке бут стихија ка овел сине пошукар те пучав ла пучиба сар сој: ‘Сар накхеа? Сар шај те поможинав туке?’“ Акава старешина сиклило јекх бут важно бути тари адаја ситуација. Акана тано сочувствително пастири кова со мангела те поможинел.

3. Кој таро собрание шај те дел совет?

 ³ Сар пастирија, е старешинен иси лен одговорност те ден совет кеда ваљани. Ама, понекогаш јавера да таро собрание шај те ден совет. На пример, јекх пхрал или пхен шај те дел библиско совет јекхе амалеске (Пс. 141:5; Изр. 25:12). Или, јекх попхури пхен шај те советинел јекхе потерне пхења башо несаве буќа сар на пример, адала сој спомниме ко Тит 2:3-5. Хем џанѓола пе, о родителија бут  пути ваљани те советинен пумаре чхавен. Иако акаја статија најангле керела лафи е старешиненге, саринен амен шај те овел амен корист ако размислинаја ко саве начинија шај те да практично совет кова со о јавера шај локхе те прифатинен ле хем те применинен ле (Изр. 27:9).

4. Башо со ка кера лафи ки акаја статија?

⁴ Ки акаја статија ка дикха штар пучиба башо дејбе совет: 1) Која тани и исправно причина те дел пе совет? 2) Дали о совет тано чаче потребно? 3) Кој ваљани те дел о совет? 4) Сар шај те де корисно совет?

5. Со ка поможинел е старешиненге те ден совет таро мангипе? (1. Коринќаните 13:4, 7).

⁵ О старешине мангена е пхрален хем пхењен. Понекогаш адава мангипе сикавена ле аѓаар со дена некаске совет кова со џала ко погрешно друмо (Гал. 6:1). Ама англедер јекх старешина те керел лафи некасаја, шај те размислинел башо несаве буќа кола со о Павле спомнинѓа лен башо мангипе: „О мануш кова со иси ле мангипе тано стрпливо хем љубезно... Са учхарела, са верујнела, ко са надинела пе, са трпинела“. (Читин 1. Коринќаните 13:4, 7.) Адава со јекх старешина хор ка размислинел башо акала библиска стихија ка поможинел леске те дикхел таро кола причине дела совет хем те керел адава ко јекх љубезно начин. Ако окова со добинела о совет осетинела кај о старешина грижинела пе леске, ка овел поспремно те прифатинел о совет (Рим. 12:10).

6. Саво шукар пример денѓа о апостол Павле?

⁶ О апостол Павле денѓа шукар пример е старешиненге. На пример, ов денѓа совет е пхраленге таро Солун кеда ваљани сине. Сепак, ко писмо со пишинѓа ленге, о Павле прво пофалинѓа лен башо адава со керена поттикниме тари вера, башо ленгоро трудо поттикнимо таро мангипе хем баши ленгири истрајност. Ов исто аѓаар размислинѓа башо ленгере околностија аѓаар со вакерѓа ленге кај тано свесно кај ленгоро живото нане локхо хем кај ола верно истрајнена ко прогонствија (1. Сол. 1:3; 2. Сол. 1:4). Ов чак вакерѓа ленге кај тане пример е јавере христијаненге (1. Сол. 1:8, 9). Сигурно сине бут бахтале со добинѓе асавки пофалба таро Павле! Са акава сикавела кај о Павле бут мангела сине е пхрален. Адалеске ов шај сине ко солдуј писмија те дел корисно совет е пхраленге таро Солун (1. Сол. 4:1, 3-5, 11; 2. Сол. 3:11, 12).

7. Соске шај некој негативно те реагиринел ко совет?

⁷ Со шај те случинел пе ако на даја совет ко исправно начин? Јекх искусно старешина вакерела: „Несаве реагиринена негативно ко совет на адалеске со о совет тано погрешно, него адалеске со на сине дендо ко љубезно начин“. Со шај те сикљова таро акава? О совет полокхе прифатинела пе кеда тано дендо таро мангипе, а на тари холи.

8. Со ваљани те пучел пе јекх старешина англедер те одлучинел дали те дел совет?

⁸ О старешине на ваљани те сиѓарен те ден совет. Англедер те керел адава, јекх старешина ваљани те пучел пе: „Дали чаче ваљани те вакерав нешто? Дали сиум сигурно кај адава со керела тано погрешно? Дали пхагља несави библиско заповед? Или само постапинѓа поразлично таро адава сар ме би постапинава сине?“ О старешине избегинена сигате те реагиринен  бизо англедер те размислинен (Изр. 29:20). Ако јекх старешина нане сигурно дали ваљани те дел совет, тегани ов шај те пучел јавере старешина дали ов да мислинела кај о пхрал керела нешто со нане библиско хем кај ваљани леске совет (2. Тим. 3:16, 17).

9. Со сикљоваја таро Павле башо адава сар те да совет башо урајбе хем дотерибе? (1. Тимотеј 2:9, 10).

⁹ Размислин башо акава пример. Те претпоставина кај јекх старешина мислинела кај јекх објавители на уравела пе или на дотеринела пе баш примерно. О старешина шај те пучел пе: „Дали иси ман библиско причина те вакерав нешто?“ Адалеске сој тано свесно кај на ваљани те вакерел пло лично мислење, ов шај те пучел јавере старешина или несаве зрело објавителе башо адава. Ола шај заедно те размислинен башо е Павлескоро совет башо урајбе хем дотерибе. (Читин 1. Тимотеј 2:9, 10.) О Павле истакнинѓа некобор општа начелија башо адава кај јекх христијани ваљани те уравел пе пристојно хем скромно. Ама о Павле на денѓа списако таро адава со смејнела некој те уравел а со на. Ов џанља кај е христијанен иси лен право те уравен пе спрема пло лично вкус са џикоте адава тано ко склад е библиско начелонцар. Значи кеда јекх старешина одлучинела дали ваљани те дел пе совет, ов ваљани те размислинел башо адава дали о објавители тано скромно хем пристојно.

10. Со на ваљани те бистра кеда керела пе лафи башо лично избор?

¹⁰ Мудро тано те на бистра кај дуј христијања шај те анен различна одлуке хем о солдуј те овен исправна. На ваљани те убедина е јавере објавителен те прифатинен амаро мислење башо адава сој исправно а сој погрешно (Рим. 14:10).

11-12. Ако ваљани те дел пе совет, кола пучиба ваљани те пучел пе јекх старешина хем соске?

¹¹ Ако тано јасно кај ваљани те дел пе совет, тегани ваљани те пуча амен кој ваљани те керел адава? Англедер јекх старешина те дел совет јекхе пхењаке сој ко брако или несаве чхавеске, прво ваљани те керел лафи е поглавареа тари фамилија, соске ов шај ка мангел те дел о совет. * Или шај о поглавари ка мангел те овел присутно џикоте о старешина дела о совет. Хем, сар со спомнинѓем ко  3 пасус, понекогаш шај те овел пошукар јекх попхури пхен те дел совет јекхе потерне пхењаке.

¹² Иси панда несаве буќа башо со ваљани те размислинел пе. Јекх старешина шај те пучел пе: „Дали ка овел шукар ме те дав о совет, или пошукар тано некој јавер те керел  леа лафи?“ На пример, некаске кова со мислинела кај на врединела шај те овел полокхо те шунел совет таро несаво старешина кова со боринѓа пе иста чувствонцар. Адава старешина шај пошукар те хаљовел ле хем те вакерел леске буќа кола со поспремно ка прифатинел лен. Сепак, са о старешине тане одговорна те охрабринен хем те поттикнинен пумаре пхрален хем пхењен те керен о потребна промене хем те живинен спрема о библиска начелија. Значи, кеда ваљани те дел пе совет, најважно тано те керел пе адава, бизи разлика дали о старешина доживинѓа о иста буќа или на.

13-14. Соске тано важно о старешине шукар те шунен?

¹³Ов спремно те шуне. Кеда јекх старешина мангела те дел совет ваљани те пучел пе: „Со џанава башо мле пхралескере околностија? Таро со накхела? Дали иси ле проблемија башо кола со на сиум свесно? Со ваљани леске највише акана?“

¹⁴ О начело со аракхљола ко Јаков 1:19 посебно важинела околенге со дена совет. Ов пишинѓа: „Секова мануш ваљани те овел спремно те шунел, а похари те керел лафи, хем те на хољанел сигате“. Јекх старешина шај те мислинел песке кај џанела са со случинела пе. Ама дали тано адава аѓаар? Ко Изреки 18:13 пишинела: „Кој одговоринела англедер те шунел, адава тано леске глупост хем лаџ“. Ако мангаја те џана таро со накхела некој, најшукар тано лично те пуча ле. Адава значинела те шуна ле англедер те кера лафи. Сетин тут со сиклилем таро старешина кова со сине цитиримо ко почеток тари акаја статија. Ов халило кај наместо те вакерел лаке о информацие кола со англедер спреминѓа лен, ов ваљани сине те пучел е пхења пучиба сар сој: „Сар накхеа? Сар шај те поможинав туке?“ Ако о старешине одвојнена песке време те дознајнен со случинела пе е пхраленцар хем е пхењенцар, тегани ка шај пошукар те поможинен ленге хем те охрабринен лен.

15. Сар шај о старешине те применинен о начело со аракхљола ко Изреки 27:23?

¹⁵Запознајн пошукар е бакхрен. Сар сој спомнимо ко почеток, те де корисно совет на значинела само те читине некобор библиска стихија хем те вакере со ваљани те керел пе. Амаре пхраља хем пхења ваљани те осетинен кај грижинаја амен ленге, кај хаљоваја лен хем кај мангаја те поможина ленге. (Читин Изреки 27:23.) О старешине ваљани те трудинен пе те овен паше амала е пхраленцар хем е пхењенцар.

16. Со ка поможинел е старешиненге те ден корисно совет?

¹⁶ О старешине на мангена о пхраља хем о пхења те мислинен кај керена ленцар лафи само кеда ваљани те ден лен совет.  Наместо адава ола користинена секоја прилика те керен лафи пумаре пхраленцар хем пхењенцар хем сикавена кај грижинена пе ленге кеда иси лен проблемија. Јекх искусно старешина вакерела: „Ако кереа адава ка ове ленцар паше амал. Тегани кеда ка ваљани те де совет, ка овел туке полокхо те кере адава“. Хем околеске сој дендо о совет ка овел полокхо те прифатинел ле.

17. Кеда посебно ваљани јекх старешина те овел стрпливо хем љубезно?

¹⁷Ов стрпливо хем љубезно. Посебно ваљани те сикава стрпливост хем љубезност кеда некој ко почеток на мангела те прифатинел о библиско совет. Јекх старешина на ваљани сигате те нервиринел пе ако о пхрал или и пхен на прифатинела или на применинела одма о совет. Ки Библија башо Исус сине пророкујмо: „И газими трска нане те пхаѓел ла хем о фитили со иси ле бут хари јаг нане те ачхавел ле“ (Мат. 12:20). Адалеске, јекх старешина ко пле лична молитве шај те молинел е Јехова те поможинел е објавителеске те хаљовел соске леске дендо совет хем те применинел ле. Шај ка ваљани леске време те размислинел башо адава со сине леске вакердо. Ако о старешина тано стрпливо хем љубезно, е пхралеске ка овел полокхо те прифатинел о совет. Џанѓола пе, о совет секогаш ваљани те авел таро е Девлескоро Лафи.

18. а) Со на ваљани те бистра кеда даја совет? б) Башо со керена лафи о родителија тари слика која сој поврзими е рамкаја?

¹⁸Сикљов таро тле грешке. Адалеске со сием несовршена, нашти совршено те применина о предлогија тари акаја статија (Јак. 3:2). Ка кера грешке, ама кеда ка кера лен ваљани те трудина амен те сикљова лендар. Ако амаре пхраља хем пхења осетинена кај мангаја лен, тегани полокхо ка овел ленге те простинен аменге кеда ка повредина лен лафенцар или постапкенцар. (Дикх хем и рамка „ Корисна предлогија е родителенге“.)

19. Сар шај те кера амаре пхраленгере хем амаре пхењенгере виле те овен бахтале?

¹⁹ Сар со дикхлем нане секогаш локхо те дел пе корисно совет. Хем амен хем окола каске со даја совет сием несовршена. Ма бистре о начелија башо кола со керѓем лафи ки акаја статија. Трудин тут те де совет таро исправна причине. Исто аѓаар, уверин тут дали чаче ваљани те де совет хем дали ту сиан адава со ваљани те керел адава. Англедер те де некаске совет пуч ле нешто хем шун ле шукар те шај те хаљове таро со накхела. Трудин тут те дикхе ко буќа сар ов со дикхела лен. Ов љубезно хем ов паше амал е пхраленцар хем пхењенцар. Те на бистра која ваљани те овел амари цел: На мангаја амаро совет те овел само корисно, него исто аѓаар те керел амаре пхраленгоро „вило бахтало“ (Изр. 27:9).