1, 2. Σαρ σικλιλό εκ πφραλ τι ντελ λατσσέ συμβουλές;

 ΜΠΟΥΤ μπρεσά ανγκλέ, ντούι πρεσβύτεροι γκιλέ τι ντικχέν εκχέ πφενιά σο χασαρέλας συναθροίσεις. Ο εκ τανό λένταρ διαβαντάς ι πφενιάκε χάνικ εδάφια σο σικαβένα καζόμ σημαντικός ισί τι τζας κο συναθροίσεις. Αμντίνελας ότι ντινάας ζορ ι πφενιά, αλλά οτθέ σο τζάνας τι νασέν ι γιαβερέ πφραλέσαρ, η πφεν βακερντάς: «Πφραλάλεν, ναστί νακχέλα τουμαρέ γκοντιάταρ σο νακχάβα». Ο πφραλά ντινέας πουμαρί συμβουλή χωρίς τι πουτσέν πρώτα ι πφενιά σο νακχέλας. Οτθάρ κι πφενιάκε γιακχά, οντουλά λάφια να κερντέ λάκε λατσσιπέ.

² Καζόμ ανέλα πι γκοντιάτε οντουβά σο αβιλό-πες, οντουβά πρεσβύτερος βακερέλα: «Αζομάν, πακιάβας ότι η πφεν να σικαντάς σεβασμός. Αλλά καζόμ σκεφτίναβας-λες, αγαντόμ ότι διαβαντόμ λάκε λατσσέ εδάφια αντίς τι κεράβ λάκε λατσσέ ερωτήσεις, σαρ ακαλά: “Σο νακχέσα ακανά τι ζωγιάτε; Σαρ μπορίναβα τι βοηθίναβ;”» Ο πρεσβύτερος λιντάς εκ σημαντικός σικλιαριπέ ανταλέσταρ. Αντιβές, ισί εκ λατσσό τσομπάνης αντρέ κι κχανγκιρί σο τζιτζίνελα ι γιαβερένγκε.

3. Κον μπορίνελα τι ντελ συμβουλές αντρέ κι κχανγκιρί;

 ³ Σαρ τσομπάνια, ο πρεσβύτεροι τθερένα ι ευθύνη τι ντεν συμβουλές κάνα χρειαζίντιβελα. Αλλά μπάζιμα γιαβερά-ντα τζενέ κι κχανγκιρί μπέκιμ τι χρειαζίντιβελα τι ντεν συμβουλή. Για παράδειγμας, εκ πφραλ ή εκ πφεν μπέκιμ τι ντελ εκ συμβουλή αντράλ κατά Γραφή εκχέ αμαλέστε ή εκχέ αμαλινάτε. (Ψαλμ. 141:5· Παρ. 25:​12) Ή εκ πο μπαρί πφεν μπέκιμ τι “ντελ συμβουλές ι πο τερνέ τζουβλίν” πραγματένγκε σαρ ανταλά σο βακέρντιβενα κο εδάφια Τίτο 2:​3-5. Ντα σίγουρα ο νταντά ντα ο νταγιά χρειαζίντιβελα μπουτ φαρ τι ντεν συμβουλές πουμαρέ  τσσαβέντε ντα τι διορθώνεν-λεν. Οτθάρ, παρόλο σο ανταβά μάθημας βακερέλα πο μπουτ ι πρεσβυτερόνγκε, σαρέ κα ντικχάς λατσσιπέ καζόμ κα σικλιάς σαρ τι ντας συμβουλές σο βοηθίνενα, ντένα ζορ ντα «ανένα χαρά κο γκι».​—Παρ. 27:9.

4. Σο κα ντικχάς ανταλέ μαθημάστε;

⁴ Ανταλέ μαθημάστε, κα ντικχάς σταρ ερωτήσεις σο κα βοηθίνεν-αμέν τι ντας λατσσέ συμβουλές: (1) Σο πρέπει τι τσσίντελ-αμέν τι ντας συμβουλή; (2) Χρειαζίντιβελα μπαγιά τι ντιντιόλ η συμβουλή; (3) Κον πρέπει τι ντελ ι συμβουλή; (4) Σαρ κα ντας λατσσέ συμβουλές;

5. Σόσκε κα ασουνέν ο τζενέ πο εύκολα εκχέ πρεσβυτερόσκι συμβουλή σο ντιντιόλα μανγκιμάσαρ; (1 Κορινθίους 13:4, 7)

⁵ Ο πρεσβύτεροι μανγκένα ι πφραλέν ντα ι πφενίν. Ισί φαρ σο σικαβένα ανταβά μανγκιπέ κάνα ντένα συμβουλές εκχέ τζενέστε σο λιντάς λάθος ντρομ. (Γαλ. 6:1) Όμως, πριν τι κερέλ λάφι ανταλέ τζενέστε, εκ πρεσβύτερος ισί λατσσό τι σκεφτίνελ χάνικ κατά πράγματα σο βακερντάς ο Παύλος ότι κερέλα ο μανγκιπέ. «Ο μανγκιπέ κερέλα υπομονή ντα σικαβέλα λατσσιπέ. . . . Αντιχίνελα-λεν σαρέ, πακιάλα-λεν σαρέ, τθερέλα ελπίδα σαρέ ι πραγματένγκε, νταϊντίνελα-λεν σαρέ». (Διαβάνεν 1 Κορινθίους 13:4, 7) Ο πρεσβύτερος σο σκεφτίνελα λατσσές ανταλά εδάφια κα αγαβέλ σο τσσίντελα-λες τι ντελ συμβουλή ντα κα κερέλ-λες ανταβά μανγκιμάσαρ. Άμα οντουβά σο ντιντιόλα-λες συμβουλή νιωθίνελα ότι ο πρεσβύτερος πφαμπόλα λέσκε, κα ασουνέλ πο εύκολα ι συμβουλή.​—Ρωμ. 12:10.

6. Σαρ μουκχλάς λατσσό παράδειγμας ο απόστολος Παύλος;

⁶ Ο απόστολος Παύλος μουκχλάς λατσσό παράδειγμας σαρ πρεσβύτερος. Για παράδειγμας, κάνα χρειαζίντιβελας τι ντιντιόλ συμβουλή κο πφραλά κι Θεσσαλονίκη, ο Παύλος να σακιντισάλο τι ντελ-λα. Όμως, κο επιστολές σο μπουτσσαντάς λένγκε, ο Παύλος πρώτα βακερντάς ότι να μπιστρέλας ο έργος σο κερένας με πίστη, ο μπαρέ προσπάθειες σο κερένας μανγκιμάσαρ ντα ι υπομονή σο σικαβένας. Μπεσλό ντα αντάς πι γκοντιάτε σο νακχένας πουμαρέ ζωγιάτε. Οτθάρ, τζανέλας ότι λένγκι ζωή να ισινέ εύκολη ντα ότι νταϊντίνενας ι κόντρα σο τζάνας λέντζαρ. (1 Θεσ. 1:3· 2 Θεσ. 1:4) Ατζέ-ντα βακερντάς οντουλέ πφραλένγκε ότι ντινέ λατσσό παράδειγμας ι γιαβερέ Χριστιανόνγκε. (1 Θεσ. 1:8, 9) Καζόμ πρέπει τι χαιρισάλε κάνα ισαρντάς-λεν ο Παύλος! Αγαντίντιβελας μπουτ λατσσές ότι ο Παύλος μανγκέλας μπουτ ι πφραλέν. Άκ’ σόσκε μπορίνελας τι ντελ λατσσέ συμβουλές ι ντουέ-ντα επιστολέντζαρ σο μπουτσσαντάς κο Θεσσαλονικείς.​—1 Θεσ. 4:1, 3-5, 11· 2 Θεσ. 3:​11, 12.

7. Σόσκε μπέκιμ μα τι ασουνέλ εκ τζενό συμβουλή;

⁷ Σο μπέκιμ τι αβέλ-πες άμα να κα ντας συμβουλή σωστέ τροπόσαρ; Εκ πφραλ, σο ισί μπρεσά πρεσβύτερος, βακερέλα: «Μερικοί να ασουνένα ι συμβουλή, όχι επειδή νανέ σωστή, αλλά επειδή να ντιντιλί μανγκιμάσαρ». Σο σικλιάσα ανταλέσταρ; Ο γιαβερά ασουνένα πο εύκολα ι συμβουλή σο ντιντιόλα μανγκιμάσαρ, όχι χολιάσαρ.

8. Σο πρέπει τι πουτσέλ-πες εκ πρεσβύτερος για τι ντικχέλ άμα κα ντελ συμβουλή;

⁸ Ο πρεσβύτεροι δεν πρέπει τι σιγκιαρέν τι ντεν συμβουλή. Πριν τι ντελ συμβουλή εκ πρεσβύτερος, πρέπει τι πουτσέλ-πες: “Χρειαζίντιβελα μπαγιά τι κεράβ λάφι; Ισινόμ σίγουρος ότι οντουβά σο κερέλα ο γιαβέρ τζενό ισί λάθος; Βακερέλα η Γραφή ότι ισί λάθος; Ή ισί σάντε διαφορετικός οντουλέσταρ σο κα κεράβας με;” Ο γκοντιαβέρ πρεσβύτεροι  να “σιγκιαρένα τι κερέν λάφι”. (Παρ. 29:​20) Άμα ο πρεσβύτερος νανέ σίγουρος ότι χρειαζίντιβελα τι ντελ εκ συμβουλή, κα μπορίνελας τι πουτσέλ εκχέ γιαβερέ πρεσβυτερός για τι ντικχέν γιεκ άμα ο τζενό γκιλό κόντρα κο λάφια κι Γραφιάκε ντα χρειαζίντιβελα συμβουλή.​—2 Τιμ. 3:​16, 17.

9. Σαρ σικλιάσα κατά Παύλος τι ντας συμβουλή ι ιριαϊμάσκε ντα ι λατσσαριμάσκε; (1 Τιμόθεο 2:9, 10)

⁹ Ντικχέν εκ παράδειγμας. Βακερέν χάι ότι εκχέ πρεσβυτερόσκε να ντικχίντιβελα λέσκε μπουτ σωστός ο ιριαϊπέ ή ο λατσσαριπέ εκχέ πφραλέσκο ή εκχέ πφενιάκο. Ο πρεσβύτερος κα μπορίνελας τι πουτσέλ-πες: “Βακερέλα η Γραφή ότι ανταβά νανέ λατσσό;” Ντα επειδή να μανγκέλα τι βακερέλ οντουβά σο πακιάλα βοβ, κα μπορίνελας τι πουτσέλ εκχέ γιαβερέ πρεσβυτερός ή εκχέ γιαβερέ γκοντιαβέρ πφραλές ή πφενιά. Κα μπορίνενας τι ντικχέν γιεκ ι συμβουλή ι Παυλόσκι ι ιριαϊμάσκε ντα ι λατσσαριμάσκε. (Διαβάνεν 1 Τιμόθεο 2:9, 10) Ο Παύλος βακερντάς ότι ο ιριαϊπέ εκχέ Χριστιανόσκο πρέπει τι αβέλ λατσσό ντα μα τι ανέλ λατζ καεκχέστε. Αλλά ο Παύλος να βακερντάς σαρέ οντουλά σο «πρέπει» ντα «δεν πρέπει» τι ιριάς. Αγαβέλας ότι ο Χριστιανοί μπορίνενα τι τραμπίνεν τι ιρίν σο μανγκένα άμα να τζάλα κόντρα κι Γραφή. Οτθάρ, για τι ντικχέν ο πρεσβύτεροι άμα χρειαζίντιβελα τι ντιντιόλ συμβουλή, πρέπει τι σκεφτίνεν άμα οντουλά σο τραμπίνελα ο τζενό σικαβένα ότι να ανέλα λατζ καεκχέστε ντα ότι ισί γκοντιαβέρ.

10. Σαρ πρέπει τι ντικχάς οντουλά σο τραμπίνενα ο γιαβερά;

¹⁰ Ισί σημαντικός τι ντας-αμέν γκοντί ότι ντούι γκοντιαβέρ Χριστιανοί μπέκιμ τι τραμπίνεν διαφορετικά πράγματα σο ισί ο ντούι-ντα σωστά. Δεν πρέπει τι ζορισκιαράς ι πφραλέν τι τραμπίνεν οντουβά σο πακιάσα αμέν ότι ισί σωστός.​—Ρωμ. 14:10.

11, 12. Άμα χρειαζίντιβελα τι ντιντιόλ συμβουλή, σο πρέπει τι πουτσέλ-πες εκ πρεσβύτερος, ντα σόσκε;

¹¹ Άμα αγαντέν ότι χρειαζίντιβελα τι ντιντιόλ συμβουλή, πρέπει τι πουτσέν-τουμέν ακαβά-ντα: Κον πρέπει τι ντελ-λα; Πριν τι ντελ συμβουλή εκ πρεσβύτερος εκχέ παντριμέ πφενιάτε ή εκχέ χουρντέστε, πρέπει τι κερέλ λάφι ι σορέσαρ κι φαμιλί, σο μπέκιμ τι τραμπίνελ τι κερέλ βοβ λάφι πι ρομνιάκε ή πι χουρντέσκε. * Ή μπέκιμ ο σορό ι φαμιλιάκο τι μανγκέλ τι αβέλ βοβ-ντα οτθέ κάνα ο πρεσβύτερος κα ντελ ι συμβουλή. Ντα σαρ ντικχλάμ κι  παράγραφος 3, μπέκιμ τι ισί πο λατσσό εκ πο μπαρί πφεν τι ντελ συμβουλή εκχέ πο τερνέ πφενιάτε.

¹² Ισί κάτι ατζέ σο πρέπει τι τθερέλ πι γκοντιάτε εκ πρεσβύτερος. Κα μπορίνελας τι πουτσέλ-πες: “Ισινόμ με ο σωστός τζενό για τι νταβ ι συμβουλή ή κα αβέλ πο λατσσές άμα εκ γιαβέρ κα κερέλ λάφι ι τζενέσαρ;” Για παράδειγμας,  εκ τζενό σο πακιάλα ότι νανέ σημαντικός μπέκιμ τι ασουνέλ πο εύκολα άμα κα ντελ-λες συμβουλή εκ πρεσβύτερος σο πακιάλας-λες βοβ-ντα ανταβά πι νεαυτόσκε. Ο πρεσβύτερος σο νιωσάλο σαρ ανταβά τζενό μπέκιμ τι πφαμπόλ λέσκε πο μπουτ, ντα οντουλά σο κα βακερέλ μπέκιμ τι ερεσέν πο εύκολα λέσκε γκίστε. Όμως, σαρέ ο πρεσβύτεροι τθερένα ι ευθύνη τι βακερέν ι πφραλένγκε ντα ι πφενίνγκε τι κερέν ο αλλαγές σο βακερέλα η Γραφή. Οτθάρ, ο πο σημαντικός ισί τι ντιντιόλ η συμβουλή, ατζέ-ντα άμα ο πρεσβύτερος σο ντέλα-λα να νακχλάς οντουβά σο νακχέλα ο τζενό.

13, 14. Σόσκε ισί σημαντικός τι ασουνέλ εκ πρεσβύτερος;

¹³ Αβέν έτοιμοι τι ασουνέν. Κάνα εκ πρεσβύτερος μανγκέλα τι ντελ συμβουλή, ισί λατσσό τι πουτσέλ-πες: “Σο τζανάβα οντουλένγκε σο νακχέλα μο πφραλ; Σο αβέλα-πες λέσκε ζωγιάτε; Μήπως τθερέλα προβλήματα σο να τζανάβα; Σο τθερέλα πο μπουτ ανάγκη ακανά;”

¹⁴ Η αρχή σο ισί γραμμέ κο εδάφιος Ιακώβου 1:​19 σίγουρα ισί οντουλένγκε-ντα σο ντένα συμβουλή. Ο Ιάκωβος βακερντάς: «Κάθε τζενό πρέπει τι ασουνέλ με προσοχή, μα τι σιγκιαρέλ τι κερέλ λάφι, μα τι σιγκιαρέλ τι χολιάνελ». Εκ πρεσβύτερος μπέκιμ τι πακιάλα ότι τζανέλα σο-ντα νακχέλα ο γιαβέρ τζενό, αλλά ισί μπαγιά ανταβά; Ο εδάφιος Παροιμίες 18:​13 ανέλα αμαρέ γκοντιάτε ακαβά: «Κάνα εκ τζενό κερέλα λάφι εκχέ πραγμάσκε προτού τι ασουνέλ σαρ ισί μπαγιά ο πράγματα, σικαβέλα ότι να τθερέλα γκοντί ντα ταπεινώντιβελα». Ισί πο λατσσό τι μανγκέν κατά τζενό τι βακερέλ τουμένγκε σαρ ισί ο πράγματα. Ανταβά μανγκέλα τι βακερέλ ότι πρέπει τι ασουνέν πριν τι κερέν λάφι. Ντεν-τουμέν γκοντί ο σικλιαριπέ σο λιντάς ο πρεσβύτερος σο κερντάμ λέσκε λάφι πο οπρέ. Αγαντάς ότι, αντίς τι βακερέλ πρώτα οντουλά σο τθερέλας πι γκοντιάτε, έπρεπε τι κερέλας κι πφεν ερωτήσεις σαρ ακαλά: «Σο νακχέσα ακανά τι ζωγιάτε;» «Σαρ μπορίναβα τι βοηθίναβ;» Άμα ο πρεσβύτεροι κα ντεν πουμαρέ σαατίσταρ για τι σικλιόν σαρ ισί μπαγιά ο πράγματα, κα αβέλ πο σίγουρος ότι κα βοηθίνεν ντα κα ντεν ζορ ι πφραλέν ντα ι πφενίν.

15. Σαρ μπορίνενα ο πρεσβύτεροι τι κερέν οντουβά σο βακερέλα ο εδάφιος Παροιμίες 27:23;

¹⁵ Σικλιόν λατσσές ι Ντεβλέσκε μπρακέν. Σαρ βακέρντιλο κι αρχή, για τι ντας λατσσέ συμβουλές να ερεσέλα σάντε τι διαβάνας χάνικ εδάφια ή τι βακεράς ι τζενέσκε σο τι κερέλ. Μανγκάσα τι σικαβάς κο πφραλά ντα κο πφενιά ότι πφαμπάσα λένγκε, ότι αγαβάσα-λεν ντα ότι μανγκάσα τι βοηθίνας-λεν. (Διαβάνεν Παροιμίες 27:​23) Ο πρεσβύτεροι πρέπει τι κερέν ο πο λατσσό για τι αβέν λατσσέ αμαλά ι πφραλέντζαρ ντα ι πφενίντζαρ.

16. Σο κα βοηθίνελ ι πρεσβυτερόν τι ντεν λατσσέ συμβουλές;

¹⁶ Εκ πρεσβύτερος να μανγκέλα τι κερέλ ι πφραλέν τι αμντίνεν ότι τζάλα τι κερέλ λέντζαρ λάφι σάντε κάνα ισί τι ντελ-λεν συμβουλή. Οκιά μπάνταρ, κερέλα λάφι καζόμ πο  μπουτ αβέλα-πες ι πφραλέντζαρ ντα ι πφενίντζαρ ντα σικαβέλα ότι ισί πασέ λέντε κάνα τθερένα προβλήματα. Εκ πφραλ σο ισί μπρεσά πρεσβύτερος βακερέλα: «Άμα κερντέν-λες ανταβά, κα αβέν λατσσέ αμαλά λέντζαρ. Ντα κα αβέλ μπουτ πο εύκολος τι ντεν συμβουλή κάνα κα χρειαζίντιβελ». Αντικάς, κα αβέλ μπουτ πο εύκολος ι γιαβερέ τζενέσκε-ντα τι ασουνέλ-λα.

17. Κάνα χρειαζίντιβελα πο μπουτ εκ πρεσβύτερος τι κερέλ υπομονή ντα τι σικαβέλ λατσσιπέ;

¹⁷ Κερέν υπομονή ντα σικαβέν λατσσιπέ. Ισί πο μπαρί ανάγκη τι κεράς υπομονή ντα τι σικαβάς λατσσιπέ κάνα εκ τζενό κι αρχή να μανγκέλα τι κερέλ ι συμβουλή σο ισί κατά Γραφή. Εκ πρεσβύτερος δεν πρέπει τι χολιάνελ άμα εκ τζενό να μανγκέλα τι ασουνέλ ή τι κερέλ λέσκι συμβουλή. Η Γραφή βακερντάς ότι ο Ιησούς “να κα πφανγκέλας ο καλάμι σο μπανγκιλό ντα να κα μουνταρέλας ο φιτίλι σο πφαμπόλα μπουτ χάνικ”. (Ματθ. 12:​20) Οτθάρ, κο προσευχές σο κερέλα, ο πρεσβύτερος κα μπορίνελας τι μανγκέλ κατά Ιεχωβά τι ευλογίνελ ι τζενές σο χρειαζίντιβελα συμβουλή ντα τι βοηθίνελ-λες τι αγαβέλ σόσκε ντιντιόλα-λες η συμβουλή ντα τι κερέλ-λα. Ο πφραλ σο λέλα συμβουλή μπέκιμ τι χρειαζίντιβελα σαάτι για τι σκεφτίνελ οντουλά σο βακέρντιλε λέσκε. Άμα ο πρεσβύτερος κα κερέλ υπομονή ντα κα σικαβέλ λατσσιπέ, ο τζενό κα ντελ σημασία κι συμβουλή ντα να κα ατσσόλ κο τρόπος σο ντιντιόλα. Μα μπιστρέν-τουμέν όμως ότι η συμβουλή πρέπει πάντα τι αβέλ αντράλ κατά Λάφι ι Ντεβλέσκο.

18. (α) Σο πρέπει τι τθεράς αμαρέ γκοντιάτε κάνα ντάσα συμβουλή; (β) Καλέ πραγμάσκε κερένα λάφι ο ντατ ντα η ντάι σαρ σικαβέλα η φωτογραφία ντα ο πλαίσιος;

¹⁸ Σικλιόν τουμαρέ λαθίνταρ. Επειδή ισινάμ ατελείς, να αβέλα-πες τι κεράς ντιπ λατσσές ανταλά σο βακέρντιβενα ανταλέ μαθημάστε. (Ιακ. 3:2) Κα κεράς λάθη, αλλά πρέπει τι σικλιάς λένταρ. Άμα σικαβάσα κο πφραλά ντα κο πφενιά ότι μανγκάσα-λεν, κα αβέλ λένγκε πο εύκολος τι συγχωρίνεν-αμέν κάνα πφανγκάσα λένγκο γκι οντουλέντζαρ σο βακεράσα ή κεράσα.​—Ντικχέν ο πλαίσιος-ντα « Χάνικ Λάφια ι Νταντένγκε ντα ι Νταΐνγκε».

19. Σαρ μπορίνασα τι ανάς χαρά κο γκι αμαρέ πφραλένγκο;

¹⁹ Σαρ ντικχλάμ, νανέ εύκολος τι ντας λατσσέ συμβουλές. Ισινάμ ατελείς, σαρ ισί ο τζενέ-ντα σο ντάσα-λεν συμβουλή. Τθερέν τουμαρέ γκοντιάτε οντουλά σο βακέρντιβενα ανταλέ μαθημάστε. Τι αβέν σίγουροι ότι ο μανγκιπέ τσσίντελα-τουμέν τι ντεν ι συμβουλή. Επίσης, τι αβέν σίγουροι ότι χρειαζίντιβελα μπαγιά τι ντεν ι συμβουλή ντα ότι κα αβέλ λατσσό τι ντεν-λα τουμέν. Πριν τι ντεν συμβουλή, κερέν ερωτήσεις ντα ασουνέν λατσσές για τι αγαβέν σο νακχέλα ο τζενό. Κερέν ο πο λατσσό για τι αγαβέν σαρ ντικχέλα βοβ ο πράγματα. Σικαβέν λατσσιπέ ντα αβέν λατσσέ αμαλά ι πφραλέντζαρ ντα ι πφενίντζαρ. Ντεν-τουμέν γκοντί ότι μανγκάσα ακαβά: Αμαρέ συμβουλές μα τι αβέν σάντε λατσσέ, αλλά τι “ανέν χαρά-ντα κο γκι”.​—Παρ. 27:9.