1-2. Olakanyelo wɔkɔnge w’owisa wɔnanyɔ ɔmɔtshi lá kɛnɛ kelendana la mpɛyɛ dako?

 AMBOHETA ɛnɔnyi efula wɛ tokokolo tope yatshu ntowembola nkaana kɛmɔtshi kenanghisa ilá efula apingelaka nsanghanyɛ. Ikokolo y’ɔsisa otepela awalelaka nkaana kɛsɔ avɛrse efula walendana la wingelo wɔ nsanghanyɛ. Nde akanelaka ante mbembo kɛwɔ kembokeketshɛ nkaana, koko winá wɔ nde nya winande yakɔpɛ nkalɔ, nkaana kɛkɔ atepelaka ante: “Wananyɔ nyopasipisoyɛ ekakasano welekɔ la lemi.” Wananyɔ wapɛyɛka alako wawɔ ipa la ndjopola nkaana ekakasano wepomana lande. Eposelo weyalisa la nkambo djɛsɔnde, nde okaka etengo dako djɛwɔ djepalekɔ la ntshina.

² L’ɔkɔngɔ, ikokolo yɔsisa otepela atepelaka ante: “Lá winá ɔmɔtshi, nkanelaka ente nkaana kenyi atayala la dilɛmɛlɔ. Koko winá wɔ mokanaka yimba lá nkambo djɛsɔ ndjɛka ndɛna ente, nkanelaka efula lá avɛrse w’okokami nkamba la wakɔ l’edjena kɛ nkanela ntondo lá nkambo djɛ nkaana kɛmi, ntakoka ndowopola weepó wɛnɛ: ‘Ekakasano wɛkɔnge wepomana lawɛ?’ ‘Wopo wɔkɔnge w’okokami nkokotshɛ?’” Ikokolo yɛsɔ awaka olakanyelo wɔ djonyi efula má nkambo dj’okomelisa djɛsɔ. Lɔɔko kɛnɛ nde amboyala onami w’ɛnkɔkɔ woyawilá l’edjena k’anto ankina la wolekɔ entshupa djɛ ndaakotshɛ.

3. Wana wakoka mpɛyɛ anto alako l’otshumano?

 ³ Etengo oyɛwɔ enami w’ɛnkɔkɔ, tokokolo walekɔ l’odjito wɔ mpɛyɛ alako winá wɔ nkambo djɛsɔ oyɛwɔ djonyi. Koko lá winá ɛmɔtshi, anto ankina wal’otshumano nkoka mpɛyɛ anto alako. Ndjɔmbɔmba, wɔnanyɔ kana nkaana kɛmɔtshi nkoka mpɛyɛ ilongo yɛnde dako mɔtshi djemá Bible. (Yee. 141:5; Woo. 25:12) Kana nkaana k’ekokolo ‘nkoka mpɛyɛ eseka’ alako l’akambo amɔtshi wafɛna la wanɛ wotepelawɔ lá Tito 2:3-5. Edjinge lá nsɔsɔlɔ, ambotshi ladjɛ mpɛyɛka wana wawɔ alako edjinge  ndaasembolaka mbala la mbala. Djɛkondeke kaanga alako welá djamba djɛnɛ olendanawɔ pekapeka la tokokolo tel’otshumano, isankfumɔ nkoka mba wapɔ má nshishima topo t’okokaso mpɛyɛ alako wa kɔɔ, wa kembɛ, la ‘wangosasangɛ eloko.’—Woo. 27:9.

4. Kɛkɔnge k’ɔkɔpaso nshishima lá djamba djɛnɛ?

⁴ Lá djamba djɛnɛ, tongoshishima weepó ɛnɛyi welendana l’ɔpɛyɛlɔ w’alako: 1) Elonga kɛkɔnge kɛ kɔɔ ketotshinda djɛ mpɛyɛ anto alako? 2) Alekɔ nsɔsɔlɔ djonyi mpɛyɛ alako? 3) Anto wakɔna wakoka mpɛyɛ alako? 4) Wopo wɔkɔnge w’okokɛ mpɛyɛ alako wa wɔlɔ?

5. Lamo anto okokawɔ ndjala entshupa djɛ ndjawola alako w’ikokolo ntsha nde ndaapɛyɛ la ngandji? (1 Kɔrɛtɔ 13:4, 7)

⁵ Tokokolo nkɔpaka wananyɔ l’ankaana yɛwɔ. Lá mbamba imɔtshi, iwɔ nyɛnyɛka ngandji kɛwɔ kɛsɔ má ndaka onto ɔmɔtshi w’ɔkɔpa ndjingela lá mboka kɛ nyɛtshi. (Nga. 6:1) Koko lá ntondo kɛ nde nsawola l’onto, ikokolo ladjɛ ntɔnɔla l’akambo amɔtshi wa ɔpɔstɔlɔ Poolo ndatepela, walendana la ngandji. ‘Ngandji alekɔ balentshitshi edjinge wɔlɔ. . . . Ngandji ndjipaka akambo ankfumɔ, nkfukumɛka akambo ankfumɔ, nkongelaka akambo ankfumɔ, nkfulumeyɛka akambo ankfumɔ.’ (Wala 1 Kɔrɛtɔ 13:4, 7.) Ntɔnɔla lá avɛrse welá Bible wasɔ angokotshɛ ikokolo djɛ nshishima kɛnɛ k’otshinda djɛ mpɛyɛ nyanghɛmɔko kɛnde alako edjinge nsawola nyande l’ikanyi yɛ wɔlɔ. Ntsha kanga lɔpɛyɛwɔ alako ambɛna djɛ ikokolo ndakiyanyɛka lá nkambo djɛnde, nde angoyala entshupa djɛ ndjawola alako wakɔ.—Ɔrɔ. 12:10.

6. Ndjɔmbɔmba kɛkɔnge kɛ wɔlɔ ɔpɔstɔlɔ Poolo ndatotshikela?

⁶ Etengo ndayalaka ikokolo ɔpɔstɔlɔ Poolo atotshikelaka ndjɔmbɔmba kɛ wɔlɔ. Ndjɔmbɔmba, winá wɔ wananyɔ welá Tesalɔnikɛ yayale la djonyi dj’alako, Poolo atakakanda djɛ ndaapɛyɛ. Koko, l’onkanda wɔ ndaafunela, Poolo awangaka ndaawandola m’ɔtɛ wɔ elemo wɛwɔ wɛ la nkɔmano, ngandji, la okfulumeyelo wɔwɔ. Nde ilaka lonkina yimba l’akambo wakomela lá lowiko, nde asipisoyɛki wɔlɔ ante iwɔ wayalaki l’ekakasano edjinge wawɛnyɛki ndjolo la djɛmɔ. (1 Te. 1:3; 2 Te. 1:4) Nde akomaka tii lá nshimela wananyɔ wasɔ ante iwɔ walekɔ ndjɔmbɔmba yɛ wɔlɔ le Akristo ankina. (1 Te. 1:8, 9) Ɔsɔngo osasa woyalisa lawɔ má wopo wɔ Poolo ndaawandola l’osasalo onkfumɔ! Ipa l’ehamo Poolo akɔpaki wananyɔ wande wasɔ efula. Djɛkondeke ndakoke ndapɛyɛ alako wa wɔlɔ efula lá onkanda wɔnde w’ape te ase Tesalɔnikɛ.—1 Te. 4:1, 3-5, 11; 2 Te. 3:11, 12.

7. Lamo anto amɔtshi okokawɔ ntona alako?

⁷ Kɛkɔnge kekoka mposa ntsha topapɛyɛ alako lá yopo yɛ wɔlɔ? Ikokolo imɔtshi yɛ balo atepelaka ante: “Anto amɔtshi ntonaka alako ape ladjikɛnde alako walekɔ nyɛtshi, koko ladjikɛnde wapaapɛyisa la ngandji.” Olakanyelo wɔkɔnge w’okokaso mba má nkambo djɛsɔ? Angoyalake wɔdju djɛ ndjawola alako ntsha wambaapɛyɛka la ngandji, koko ape la nkɛlɛ.

8. Weepó wɛkɔnge ikokolo oyɛnde ladjɛ ndawopola, winá w’ɔsande nkano djɛ ndaka onto ɔmɔtshi?

⁸ Tokokolo wapakoke ndjala tshimbi ngo dako tshimbi ngo dako. Ntondo kɛ mpɛyɛ dako, ikokolo ladjɛ ndawopola ante: ‘Ndɔmbamaka ngo lemi ntepela nkambo mɔtshi? Ndekɔ l’eshikikelo ente kɛnɛ k’onanghande kelekɔ nyɛtshi? Nde ambopendola ɔlɛmbɛ ɔmɔtshi welá Bible? Ndokoko oyɛwɔngo kɛnɛ k’ɔkɔpande ntshikitana la kɛnɛ k’ɔkɔpami?’ La balo nkfumɔ tokokolo ndjewɔka djɛ ‘ntepela la lopopalopopa.’ (Woo. 29:20) Ntsha ikokolo  akakanda djɛ ndjewa kana nde nkokaka mpɛyɛ onto ɔmɔtshi dako, nde nkoka ndjopola ikokolo inkina ntsha edjinge nde ɛna djɛ wɔnanyɔ wɔkɔ anangha nkambo mɔtshi dj’epokana l’Afunelo djɛlɔmbama ngo ndoolaka.—2 Ti. 3:16, 17.

9. Olakanyelo wɔkɔnge w’owaso me Poolo lá kɛnɛ kelendana la wopo wɔ mpɛyɛ dako djelendana la ɔlɔtɔ kana ɔlɔngɔswɛlɔ wɔ nkfo? (1 Timɔte 2:9, 10)

⁹ Tokoshishima ndjɔmbɔmba kɛnɛ. Tɔkɔsa djɛ ikokolo imɔtshi ayakiyanyɛ lá nkambo djɛ ɛsɔnɛlɔ wenangha winande ondjawodji lá kɛnɛ kelendana l’ɔlɔtɔ kana la ɔlɔngɔswɛlɔ wɔnde wɔ nkfo. Ikokolo yɛsɔ nkoka ndawopola ante, ‘Elonga kɛmɔtshi kemá Afunelo kelekɔ kentshinda djɛ ntepela nkambo mɔtshi?’ Djɛ nyɛnyɛ ente nde alekɔ l’ekoma wɛ wɔlɔ, nde nkoka ndjopola winande ikokolo kana nsakodji kɛmɔtshi kembotshunda lá nyuma ikanyi yɛnde. Esanga iwɔ nkoka nshishima alako wa Poolo ndapɛyɛ lá kɛnɛ kelendana la ɔlɔtɔ edjinge l’ɔlɔngɔswɛlɔ wɔ nkfo. (Wala 1 Timɔte 2:9, 10.) Poolo apɛyɛka tɔkfɔ tolendana l’akambo ankfumɔ, má ntepela ante Okristo ladjɛ ndjala l’ɔlɔtɔ wɔ wɔlɔ, wɛlama, edjinge wopakoke ntakanyɛ anto. Koko Poolo atanangha listɛ lɔ wayi wakoka onto nangha la wa ndopakoke nangha. Nde ewaki ante Okristo alekɔ la lotshungɔ lɔ nangha ɛsɔnwɛlɔ wɛnde nyɔmɛlɛ lá nkilika kɛnɛ ketepela Afunelo. Djɛkondeke djɛ ndjewa ntsha alɔmbama mpɛyɛ dako, tokokolo ladjɛ ndenda ntsha ɛsɔnwɛlɔ w’onto wɔkɔ welekɔ lá lɛdji lɛlama edjinge wɔlɔ.

10. Kɛkɔnge k’oyɛso ladjɛ mvungɔka lá kɛnɛ kelendana la ɛsɔnwɛlɔ w’anto ankina?

¹⁰ Alekɔ djonyi mvungɔka ente Akristo ape wambotshunda lá nyuma nkoka ndɔsa akano ape watshikitanyi koko akano akɔ ape nkoka ndjala wɔlɔ. Topakoke ntshinda wananyɔ waso djɛ nangha ngo kɛnɛ k’okanelaso ente kelekɔ wɔlɔ.—Ɔrɔ. 14:10.

11-12. Ntsha alekɔ djonyi mpɛyɛ dako, weepó wɛkɔnge ikokolo oyɛnde ladjɛ ndawopola nyɔmɛlɛ, ko lamo?

¹¹ Ntsha ambɛnama papoo ente alekɔ djonyi mpɛyɛ alako amɔtshi, mbɔ koko woopó wɔnɛ wolekɔ djonyi: Onto wɔkɔna wokoka mpɛyɛ alako wakɔ? Lá ntondo kɛ mpɛyɛ nkaana kembotshukama kana ilɛngɛ dako, ikokolo ladjɛ ndjopola ntondo owandji wɔ nkfumbo ikanyi, ladjikɛnde nde nkoka nkombola nkandola nkambo djɛsɔ nyɔmɛlɛ. * Kana owandji wɔ nkfumbo nkoka ndɔmba djɛ ndjala l’eteyi winá wɔ ikokolo ɔpɛyɛnde onto wɔkɔ dako. Edjinge, etengo sɛnaki  l’intenyi 3, winá ɛmɔtshi welekɔ wekoka ndjala wɔlɔ djɛ nkaana kɛmɔtshi k’ekokolo mpɛyɛ nkaana k’oseka alako.

¹² Nkambo mɔtshi dekɔ djɛ tokokolo oyɛwɔ ladjɛ nkana la djɛkɔ yimba. Ikokolo nkoka ndawopola nyɔmɛlɛ ante, ‘Lemi ndekɔ nsɔsɔlɔ onto wɛlama djɛ mpɛyɛ onto wɔkɔ dako,  ko kana angoleka wɔlɔ onto onkina ndɔpɛyɛ dako djɛkɔ?’ Ndjɔmbɔmba, onto wonana l’ikanyi y’ente nde apalekɔ la ntshina nkoka ndjoka alako w’ime ikokolo yenanaki l’okakasano w’etengo wɔnde ndeka alako w’onto wotapomana l’okakasano wɔkɔ. Ikokolo yepomanisa l’okakasano w’etengo wɔnde nkoka ndeka ndowoka nkɛtshi edjinge ntepela lá yopo yekoka nkota oloko wɔnde. Koko, tokokolo tonkfumɔ walekɔ l’odjito wɔ nkeketshɛ la nkembɛ wananyɔ wawɔ la ankaana yɛwɔ djɛ nangha etshikitano enkfumɔ wɛlɔmbama lá Afunelo. Djɛkondeke, winá wɔ djonyi ɛnamawɔ, ekete keleka djonyinde, mpɛyɛ dako, kaanga ntsha ikokolo yɛpɛyɛ dako djɛkɔ atapomana l’okakasano wɔk’ɔmɔ.

13-14. Lamo oyɛwɔ djonyi le tokokolo djɛ ndjekameyɛ?

¹³ Yala entshupa djɛ ndjekameyɛ. Winá w’ikokolo oyalɔngɔsɔlande djɛ ntɔpɛyɛ dako, nde ladjɛ ndawopola ante: ‘Kɛkɔnge k’ewami lá kɛnɛ kelendana la kɛnɛ kembokomela wɔnanyɔ? Kɛkɔnge kembookomela lá lowiko? Nde apomana l’ekakasano ɛmɔtshi wɛ mopewe? Kɛkɔnge k’oyɛnde la djonyi efula winá wɔsɔ?’

¹⁴ Ikfɔ y’otanaso lá Djakɔbɔ 1:19 ndendanaka efula l’anto wapɛyɛ alako. Djakɔbɔ afunaka ante: ‘Onto onkfumɔ ladjɛ ndjala entshupa djɛ ndjoka, ɔkɔkɛ djɛ ntepela edjinge ipa nyomala la nkeke.’ Ikokolo nkoka ntepela ante lemi ndjewaka akambo ankfumɔ w’okomela, koo oyɛwɔ nsɔsɔlɔnde nghɔsɔ? Woongo 18:13 ntovungolaka ante: ‘Onto w’okadjimola nkambo lankekelankeke lá ntondo kɛ nde ndjoka wɔlɔ, djoyi djɛsɔ dekɔ enkesa edjinge nsɔnyi lende.’ Ndeka wɔlɔ ndjopola onto wɔkɔ nyɔmɛlɛ djɛ ntoshimela ekakasano welekɔ lande. Kɛsɔ nsakisolaka ndjekameyɛ lá ntondo kɛ ntepela. Tovungɔ olakanyelo wowisá ikokolo yɛ sotepelaki má wingelo wɔ djamba djɛnɛ. Nde asipisoyɛka ante lá ntondo kɛ mbanga mbembo la tokanyi tɔ ndalɔngɔsɔla, nde atakoka ndjopola nkaana weepó etengo wɛnɛ: “Ekakasano wɛkɔnge wepomana lawɛ lá lowiko?” “Wopo wɔkɔnge w’okokami nkokotshɛ?” Ntsha tokokolo ndɔsaka wina djɛ ntɔnɔla lá kɛnɛ kelendana l’akambo wasɔ, wangoyalaka l’akoka wa nkotshɛ la nkembɛ wananyɔ la ankaana yɛwɔ.

15. Wopo wɔkɔnge tokokolo okokawɔ nkamba la ikfɔ yelekɔ lá Woongo 27:23?

¹⁵ Nangha djɛ ndjewa ɛnkɔkɔ. Etengo sotepelaki má bango, mpɛyɛ alako wa wɔlɔ ndɔmbaka akambo efula koko apengo mbala avɛrse amɔtshi kana ndoshimela djoyi mɔ kana ape w’okokande nangha. Wananyɔ l’ankaana yɛso walekɔ la djonyi djɛ nyɛna ambɔ iso ndakiyanyɛka lá nkambo djɛwɔ, nsipisoyɛka ekakasano welekɔ lawɔ la nkɔpaka ndaakotshɛ. (Wala Woongo 27:23.) Tokokolo ladjɛ nangha la wolo djɛ ndjala ladjokanelo djɛ ma ma la wananyɔ l’ankaana yɛwɔ.

16. Kɛkɔnge kengokotshɛ tokokolo djɛ mpɛyɛka alako wa wɔlɔ?

¹⁶ Tokokolo ladjɛ ndjewɔ djɛ nyɛnyɛ etengo walekɔ l’akambo efula wa nangha winá enkfumɔ, la wangoyapɛyɛke te wananyɔ wawɔ ngo winá w’oposa nkambo mɔtshi. Koko, iwɔ  ladjɛ nsawolaka mbala la mbala la wananyɔ l’ankaana yɛwɔ, má ndawɛnyɛ ambɔ iwɔ ndakiyiyanyɛka lá nkambo djɛwɔ winá w’opomanawɔ l’ekakasano. Ikokolo imɔtshi yembopakisɔ atepelaka ante: “Ntsha wɛ nangha nghɔsɔ, ongoyala la djokanelo djɛ wɔlɔ efula nyawɔ. Masɔ winá w’ɛnɛ djonyi djɛ mpɛyɛ dako, angoyala wɔdju efula djɛ ndaalaka.” Edjinge kanga lɔpɛyɛwɔ dako apangoyala l’okakasano wɔ ndjawola.

17. Pekapeka lá winá wɔkɔnge ikokolo oyɛnde ladjɛ ndjala la balentshitshi edjinge la wɔlɔ?

¹⁷ Yala la balentshitshi edjinge la wɔlɔ. Balentshitshi edjinge wɔlɔ angoyalake djonyi pekapeka winá w’onto ɔmɔtshi otonande dako djemá Bible má bango. Ikokolo ladjɛ mbadjɛ dj’ipa nyomala ntsha onto wɔpɛyɛnde dako apawolisa kana apakambisa la dako djɛkɔ mbala kɛkɔ kɛmɔ. Bible ntepelaka lá nkambo djɛ Yeso ante: ‘Nde apangɔwɛngɛ ntshɔtshɔmbɔ dj’iyikamá, edjinge apangodjimɛ oshinga wɔ ntala wótádjime.’ (Mat. 12:20) Djɛkondeke lá ndɔmbɔ yonanghande nyɔmɛlɛ, ikokolo nkoka ndɔmba Yehova djɛ ntshɔkɔla onto wokɔpande mpɛyɛ alako la ndookotshɛ djɛ nde nsipisoyɛ elonga kɔɔpɛyɛwɔ alako wakɔ la djɛ nde nkamba lawɔ. Wɔnanyɔ w’ɔpɛyɛwɔ alako nkoka ndjala la djonyi djɛ ndambo kɛ winá djɛ ntɔnɔla lá kɛnɛ k’iyoshimelaki. Ntsha ikokolo alekɔ wɔlɔ edjinge la balentshitshi, onto wɔpɛyɛnde dakɔ apangila yimba lá wopo w’ɔpɛyɛwɔ dako, koko angoyala l’akoka wa ndjila yimba lá kɛnɛ k’ɔlɔmbawɔ djɛ nangha. Lá nsɔsɔlɔ, alako ladjɛ mposaka winá enkfumɔ m’Otepela wɔ Ndjambe.

18. a) Kɛkɔnge k’oyɛso ladjɛ mvungɔka winá w’ɔpɛyɛso dako? b) Etengo ɛnamawɔ lá ntshango la l’ipapango, nkambo djɛkɔnge ambotshi osawolawɔ

¹⁸ Waka olakanyelo má evunga wɛko. Ladjikɛnde tolekɔ anto wa ntshamba djɛ djɔ, topangoyala l’akoka wa nkamba l’alako wimá djamba djɛnɛ lá lɛdji lɔ djɔ. (Dja. 3:2) Tongonanghaka evunga, koko ntsha tombonangha evunga, tonanghe la wolo dj’iso mba elakanyelo m’evunga wɛkɔ. Ntsha wananyɔ l’ankaana yɛso nyɛnaka ambɔ iso ndaakɔpaka, angoyala wɔdju lewɔ dj’iwɔ ntimeyɛ winá wakiyanyɛso lá nkambo  mɔtshi dj’otepelaso kana dj’onanghaso.—Lenda lonkina ipapango: “ Mvungo te ambotshi.”

19. Wopo wɔkɔnge w’okokaso nsasangɛ eloko wɛ wananyɔ l’ankaana yɛso?

¹⁹ Etengo isɛnaki, apayalaka winá enkfumɔ wɔdju mpɛyɛ dako djɛ wɔlɔ. Iso la wanɛ wɔpɛyɛso alako, topalekɔ djɔ. Tovungɔke tɔkfɔ tɔ somboshishima lá djamba djɛnɛ. Yashikikɛ ente ngandji ndeke lokotshinda djɛ wɛ mpɛyɛ dako. Lonkina yashikikɛ ente alekɔ nsɔsɔlɔ djonyi mpɛyɛ dako. Ntondo kɛ wɛ mpɛyɛ dako yawopola weepó edjinge ekameyɛ la nkɔmɛ nkfumɔ djɛ nsipisoyɛ ekakasano wepomana l’onto. Hona djɛ nyɛna akambo wopo w’awɛnande. Yala wɔlɔ edjinge yala la djokanelo djɛ wɔlɔ nya wananyɔ l’ankaana yɛko. Vungɔka ente okoma wɔsonde: Dako djɛso djetayalake ngo wɔlɔ toko koko lonkina ‘djesasangɛ oloko.’—Woo. 27:9.