1-2. San wan brada leri di a ben gi wan sisa rai?

 FURU yari pasa, tu owruman go luku wan sisa di ben e misi konmakandra wan pisi ten kaba. Wan fu den owruman sori en wan tu Bijbeltekst di ben e taki fu san ede a prenspari fu go na den konmakandra. A ben denki taki a ben gi a sisa deki-ati. Ma di en nanga a tra brada ben de fu gwe, dan a sisa taki: „Unu no e frustan srefisrefi san e miti mi.” Den brada ben gi en rai, sondro fu aksi en sortu problema a ben abi èn fa a ben e go nanga en. A sani disi meki taki a sisa disi no ben firi taki a rai fu den owruman ben yepi en.

² Na owruman di ben sori a sisa den Bijbeltekst taki: „Na a ten dati mi ben denki taki a sisa no ben abi lespeki gi mi. Ma di mi denki a tori, dan mi kon si taki mi ben go na en nanga ala den yoisti Bijbeltekst, ma mi no ben aksi en den yoisti sani. Mi ben musu aksi en sani soleki: ’Fa a e go nanga yu? Fa mi kan yepi yu?’ Na owruman leri wan moi les fu a sani disi di pasa nanga en. Now a de wan lobi-ati skapuman di de klariklari fu yepi trawan.

3. Suma na ini a gemeente kan gi sma rai?

 ³ Owruman abi a frantwortu fu gi sma rai te dati de fanowdu. Ma son leisi a de fanowdu tu taki trawan na ini a  gemeente musu gi wan sma rai. Fu eksempre, wan brada noso wan sisa kan gi wan mati Bijbel rai (Ps. 141:5; Odo 25:12). Kande wan owru sisa musu „leri den yongu uma” sani di abi fu du nanga den tori di skrifi na Titus 2:3-5. Èn a no de fu taki dati papa nanga mama musu gi den pikin fu den rai nanga piri-ai furu tron. Sobun, aladi na artikel disi na spesrutu gi gemeente owruman, toku a bun te wi alamala e luku fa wi kan gi sma rai di e gi den deki-ati èn di e meki den ati prisiri.​—Odo 27:9.

4. San wi o luku na ini na artikel disi?

⁴ Na ini na artikel disi wi o luku fo aksi: (1) Fu san ede wi musu gi rai? (2) A rai de fanowdu trutru? (3) Suma musu gi rai? (4) Fa wi kan gi rai na wan bun fasi?

5. San kan yepi wan owruman fu gi rai na so wan fasi taki sma o wani teki a rai fu en? (1 Korentesma 13:4, 7)

⁵ Owruman lobi den Kresten brada nanga sisa fu den. Dati meki son leisi den e gi wan sma rai te a de fu meki wan seryusu fowtu (Gal. 6:1). Ma fosi wan owruman e taki nanga a sma dati, a bun te a e prakseri wan tu fu den sani di na apostel Paulus ben taki fu lobi. „Lobi abi pasensi èn a abi switifasi. . . . A e frudrage ala sani, a e bribi ala sani, a e howpu ala sani, èn a e horidoro awansi san e pasa.” (Leisi 1 Korentesma 13:4, 7.) Te na owruman e denki dipi fu den Bijbeltekst dati, dan dati o yepi en fu kon sabi fu san ede a wani gi a sma rai èn a o taki nanga a brada noso a sisa na wan lobi-ati fasi. Efu a sma di e kisi a rai kan firi taki na owruman e broko en ede nanga en, dan a o moro makriki gi en fu teki a rai di a e kisi.​—Rom. 12:10.

6. Fu san ede na apostel Paulus na wan bun eksempre gi wi?

⁶ Na apostel Paulus ben de wan bun owruman. Fu eksempre, Paulus ben gi den brada nanga sisa na Tesalonika rai di den ben abi fanowdu. Ma di Paulus skrifi den brifi gi den, dan a ben taki fosi fu a bun wroko di den ben e du, fu a bribi nanga a lobi di den ben abi, èn fu a fasi fa den ben e horidoro. A ben prakseri tu fa a libi no ben makelek gi den èn fa den ben e horidoro aladi den ben e kisi frufolgu (1 Tes. 1:3; 2 Tes. 1:4). A ben taigi den brada nanga sisa dati taki den ben de wan eksempre gi tra Kresten srefi (1 Tes. 1:8, 9). A musu fu de so taki den brada nanga sisa dati ben breiti di Paulus ben e prèise den. A no de fu taki dati Paulus ben lobi den srefisrefi. Dati meki a ben man gi den bun rai na ini den tu brifi di a skrifi gi den Tesalonikasma.​—1 Tes. 4:1, 3-5, 11; 2 Tes. 3:11, 12.

7. Fu san ede sma no e teki rai son leisi?

⁷ San kan pasa efu wi no gi rai na a yoisti fasi? Wan owruman di abi ondrofeni taki: „Son sma no wani teki rai, ma a no fu di a rai no bun, na fu di a rai no gi na wan lobi-ati fasi.” San wi e leri fu disi? Wi no musu gi rai nanga atibron. Efu wan sma e gi rai fu di a lobi wan trawan, dan a o moro makriki gi a trawan fu teki a rai.

8. San wan owruman musu aksi ensrefi te a wani gi wan sma rai?

⁸ Owruman no musu de gaw fu gi sma rai. Fosi wan owruman gi wan sma rai a  musu aksi ensrefi: ’A de fanowdu fu taki wan sani? Mi de seiker taki a sani di a sma e du no bun? A pasa wan wet fu Bijbel, noso a de so nomo taki a e du sani tra fasi leki fa mi ben o du sani?’ A bun te owruman no „gaw tumusi fu taki san [den] e denki” (Odo 29:20). Efu na owruman no de seiker efu a musu gi wan sma rai, dan a kan taki nanga wan tra owruman fu luku efu en srefi feni taki a sma e du wan sani di Bijbel no feni bun èn efu den musu gi a sma rai.​—2 Tim. 3:16, 17.

9. San wi e leri fu Paulus te wi musu gi sma rai di abi fu du nanga a fasi fa den e meki modo? (1 Timoteyus 2:9, 10)

⁹ Luku wan eksempre. Kow taki dati wan brada e broko en ede nanga a fasi fa wan Kresten brada noso sisa e meki modo. Na owruman ben kan aksi ensrefi: ’Te mi e luku san Bijbel e taki, dan mi musu taki nanga en fu a tori disi?’ Fu di na owruman no wani dwengi sma fu si sani soleki fa en e si sani, meki a kan aksi wan tra owruman noso wan lepi preikiman fa a e denki fu a tori. Kande den kan luku makandra san Paulus e taki fu a tori disi. (Leisi 1 Timoteyus 2:9, 10.) Paulus ben gi wan tu gronprakseri di e sori taki wan Kresten musu luku bun taki den krosi di a e weri no e gi Yehovah porinen. Ma Paulus no ben taki san wi mag weri noso san wi no mag weri. A ben frustan taki Kresten abi a reti fu weri sani di den lobi, solanga den sani dati no de teige san Bijbel e taki. Sobun, te den owruman musu bosroiti efu den musu taki wan sani, dan den musu luku fosi efu a sma e weri krosi di fiti wan Kresten.

10. San o yepi wi fu lespeki den bosroiti fu trawan?

¹⁰ Wi musu hori na prakseri taki tu lepi Kresten kan teki tu difrenti bosroiti. Ma dati no wani taki dati a wan bun èn a trawan fowtu. Wi no musu dwengi den brada nanga sisa fu wi fu si sani soleki fa wi e si sani.​—Rom. 14:10.

11-12. Te wan sma musu kisi rai, dan san wan owruman musu aksi ensrefi èn fu san ede?

¹¹ Efu a de krin taki wan sma musu kisi rai, dan wi musu aksi wisrefi: ’Suma musu gi en rai?’ Fosi wan owruman gi wan sisa di trow noso wan pikin rai, dan a musu taki nanga na osofamiri-edeman fu di a kan taki en srefi wani taki nanga a sma fu a tori. * Noso kande na osofamiri-edeman wani de drape te na owruman e gi a sma rai. Èn soleki fa wi si na ini  paragraaf  3, a moro bun son leisi te wan owru sisa e gi wan yongu sisa rai.

¹² Ma wi musu hori ete wan sani na prakseri. Wan owruman ben kan aksi ensrefi: ’Na mi musu gi a sma rai, noso a moro bun te wan trawan e du dati?’ Fu eksempre, wan sma di e firi leki a no warti noti ben o feni en moro makriki fu teki rai fu wan owruman di ben abi a srefi problema. A no de fu taki dati wan owruman di ben abi a srefi problema ben o man frustan a sma disi moro bun èn a o taki na so wan fasi taki a sma o wani arki a rai di a gi en. Ma ala owruman abi a frantwortu fu gi den Kresten brada nanga sisa deki-ati fu tyari kenki kon te Bijbel e sori taki den musu du dati. Sobun, san moro prenspari, na taki wan sma e kisi rai te dati de fanowdu.

13-14. Fu san ede a prenspari gi wan owruman fu arki den brada nanga sisa fu en?

¹³ De klariklari fu arki. Te wan owruman e sreka ensrefi fu gi wan sma rai, a ben o bun te a e aksi ensrefi: ’San mi sabi fu a brada noso sisa disi? Fa a libi fu en de? A kan taki mi no sabi ala den problema fu en? San na a moro prenspari sani di a abi fanowdu now?’

¹⁴ Te sma wani gi trawan rai, dan a bun efu den poti prakseri na san skrifi na Yakobus 1:19. Yakobus ben skrifi: „Ibriwan sma musu de gaw fu yere. A no musu de gaw fu taki èn a no musu de gaw fu kisi atibron.” Kande wan owruman denki taki a sabi a situwâsi fu wan sma, ma dati no abi fu de so. Odo 18:13 e memre wi: „Te wan sma e gi piki fosi a yere wan tori, dan dati na wan don sani fu du. A o kisi syen.” Dati meki a bun fu aksi a sma meki en srefi fruteri fa a libi fu en de. Disi wani taki dati na owruman musu arki fosi a taki. Prakseri na owruman na a bigin fu a artikel. A ben kon si taki a no ben musu bigin wantewante nanga den sani di a ben wani taki. A ben musu aksi a sisa fosi: „Fa a e go nanga yu? Fa mi kan yepi yu?” Efu den owruman e teki ten fu kon sabi fa a libi fu den brada nanga sisa fu den de, dan nofo tron den o man yepi den moro bun èn den o man gi den deki-ati.

15. Fa owruman kan du san skrifi na Odo 27:23?

¹⁵ Leri sabi den skapu fu Gado. Na a bigin fu na artikel wi ben si kaba taki te wi wani gi sma bun rai, dan wi no musu leisi wan tu tekst nomo gi den, noso taigi den wan tu sani di den kan du. Wi brada nanga sisa musu man firi taki wi e broko wi ede nanga den, taki wi e frustan fa den e firi èn taki wi wani yepi den. (Leisi Odo 27:23.) Owruman musu du ala san den man fu tron bun mati fu den brada nanga sisa fu den.

16. San o yepi owruman fu gi rai na wan bun fasi?

 ¹⁶ A no de fu taki dati owruman no wani taki den brada nanga sisa fu den e denki taki den o kon taki nanga den soso te den wani gi den rai. Dati meki a bun te den abi a gwenti fu taki nanga den brada nanga sisa èn den e sori den taki den e broko den ede nanga den te problema e miti den. Wan owruman di abi ondrofeni e taki: „Te yu e du dati, dan yu o tron moro bun mati fu den. Dan te yu musu gi den rai, yu o si taki a o moro makelek fu du dati.” Èn a sma di e kisi a rai no o feni en muilek fu teki en.

17. O ten a prenspari srefisrefi taki wan owruman abi pasensi nanga switifasi?

¹⁷ Abi pasensi nanga switifasi. Te wan sma no wani du san Bijbel e taki, dan a prenspari srefisrefi taki wan owruman sori pasensi nanga switifasi. Wan owruman musu luku bun taki a no mandi te wan brada noso wan sisa no wani teki a rai di a gi en. Bijbel e taki fu Yesus: „A no o masi wan warimbo di broko èn a no o kiri wan faya di e suku fu dede” (Mat. 12:20). Sobun, te wan owruman de en wawan, dan a kan begi Yehovah fu yepi a sma di abi rai fanowdu fu kon frustan fu san ede a bun fu teki a rai. Kande a brada noso sisa di kisi rai abi ten fanowdu fu prakseri den sani di na owruman taigi en. Efu na owruman abi pasensi nanga switifasi, dan a o moro makelek gi a sma fu arki san a wani taigi en. A no de fu taki dati ala ten na owruman musu gebroiki Gado Wortu fu gi rai.

18. (a) San wi musu hori na prakseri te wi wani gi sma rai? (b) Luku a fowtow na ini a faki. Fu san a papa nanga mama e taki?

¹⁸ Leri fu den fowtu fu yu. Fu di wi abi sondu, meki wi no o man du ala sani precies leki fa a skrifi na ini na artikel disi (Yak. 3:2). Wi o meki fowtu, ma wi musu pruberi fu leri fu den. Efu wi brada nanga sisa man si taki wi lobi den, dan den no o feni en muilek fu gi wi pardon te wi  du noso taki wan sani di hati den.​—Luku sosrefi a faki „ Wan tu sani gi papa nanga mama”.

19. Fa wi kan prisiri na ati fu wi brada nanga sisa?

¹⁹ Soleki fa wi si, dan a no makelek ala ten fu gi sma rai na wan bun fasi. Wi na sondusma èn den sma di wi e gi rai na sondusma tu. No frigiti den gronprakseri di wi luku na ini na artikel disi. Gi sma rai fu di yu wani yepi den. Boiti dati, luku efu a de fanowdu fu gi a sma rai èn luku efu yu na a moro bun sma fu gi a sma a rai dati. Ma fosi yu gi wan sma rai, dan poti aksi gi en èn arki bun fu man frustan en bun. Pruberi fu si fu san ede a e denki so. Abi switifasi èn tron bun mati fu yu brada nanga sisa. No frigiti a sani disi: Boiti taki wi wani gi sma rai na wan bun fasi, wi wani „prisiri na ati” fu den tu.​—Odo 27:9.