1, 2. Mor’abo rona e mong o ithutile’ng ka ho fana ka keletso?

 LILEMO tse ’maloa tse fetileng, baholo ba babeli ba ile ba etela morali oabo rona eo e neng e se e le nako a sa tle libokeng. E mong oa baholo o ile a bontša morali oabo rona mangolo a ’maloa a buang ka ho tla libokeng. O ile a nahana hore ba khonne ho mo thusa empa ha ba tsamaea morali oabo rona o ile a re: “Ha le tsebe letho ka mathata ao ke nang le ’ona.” Bara babo rona ba ile ba fa morali eo oabo rona keletso ba sa ka ba mo botsa hore na mathata a hae ke afe. Kahoo, morali oabo rona ha aa ka a utloa eka ba mo thusitse.

² Moholo ea neng a balla morali oabo rona Mangolo o re: “Ka nako eo, ke ne ke nahana hore morali oabo rona ha a re hlomphe. Empa ke ile ka hlokomela hore ke ne ke bala mangolo ’ohle a hlokahalang ho e-na le ho botsa lipotso tse kang, ‘Ho ntse ho ea joang?’ ‘Nka u thusa joang?’” Moholo eo o ile a ithuta thuto ea bohlokoa. Hona joale ke molisa ea nahanelang le ea thusang mohlape.

3. Ke bo-mang ba ka fanang ka keletso?

 ³ Kaha baholo ke balisa, ba na le boikarabelo ba ho fana ka keletso e hlokahalang. Leha ho le joalo, ho ka hlokahala hore ba bang le bona ka phuthehong ba fane ka keletso. Ka mohlala, mora kapa morali oabo rona a ka fa motsoalle oa hae keletso ea Bibele. (Pes. 141:5; Liprov. 25:12) Morali oabo rona ea holileng a ka eletsa “basali ba bacha” ka lintho tse kang tse hlahang lengolong la Tite 2:3-5. Batsoali le bona ba hloka ho fa bana ba bona keletso le ho ba khalemela. Le hoja sehlooho  sena se lebisitsoe ho baholo ka ho khetheha, le rona ka ho tšoanang se ka re thusa hore re fane ka keletso e khothatsang le e ‘thabisang pelo.’​—Liprov. 27:9.

4. Re tl’o bua kang sehloohong see?

⁴ Sehloohong sena, re tl’o bua ka lipotso tse ’nè tse mabapi le ho fana ka keletso: (1) Ke hobane’ng ha re lokela ho fana ka keletso? (2) Na keletso ea hlokahala? (3) Ke mang ea ka fanang ka keletso? (4) U ka fana ka keletso e ka thusang motho joang?

5. Haeba moholo a fana ka keletso ka tsela e lerato, seo se ka thusa Mokreste-’moho joang hore a e amohele? (1 Bakorinthe 13:4, 7)

⁵ Baholo ba rata bara le barali babo rona. Ka linako tse ling, ba bontša lerato lena ka ho eletsa Mokreste-’moho ea haufi le ho etsa phoso. (Bagal. 6:1) Leha ho le joalo, pele moholo a buisana le Mokreste-’moho, ho ka ba molemo hore a hopole lintho tseo moapostola Pauluse a buileng ka tsona mabapi le lerato. O ile a re: “Lerato lea tiisetsa ’me le mosa. . . . Le jara lintho tsohle, le lumela lintho tsohle, le tšepa lintho tsohle, le mamella lintho tsohle.” (Bala 1 Bakorinthe 13:4, 7.) Haeba moholo a nahanisisa ka litemana tsena, li tla mo thusa hore a khone ho fa bara le barali babo rona keletso ka tsela e lerato. Haeba motho ea fuoang keletso a bona hore moholo oa mo tsotella, ho ka ba bonolo hore a amohele keletso eo a mo fang eona.​—Bar. 12:10.

6. Moapostola Pauluse o re behetse mohlala ofe o motle?

⁶ Moapostola Pauluse e ne e le moholo ea behang mohlala o motle. Ka mohlala, ha Bakreste ba Thesalonika ba ne ba hloka ho eletsoa, Pauluse ha aa ka a qea-qea ho ba fa keletso. Leha ho le joalo, ha Pauluse a ne a ba ngolla lengolo, o ile a qala pele ka ho ba babatsa ka mosebetsi oa bona o tšepahalang, lerato la bona le mamello ea bona. O ile a boela a nahana ka maemo a bona le ho ba bolella hore oa tseba hore bophelo ba bona bo ne bo se bonolo le hore ba ne ba mamelletse mahloriso ka botšepehi. (1 Bathes. 1:3; 2 Bathes. 1:4) O ile a ba a ba bolella hore ke mehlala ho Bakreste ba bang. (1 Bathes. 1:8, 9) E tlameha ebe ba ne ba thabile haholo ha ba utloa kamoo Pauluse a neng a ba babatsa kateng. Ha ho pelaelo hore Pauluse o ne a ba rata haholo. Ke kahoo mangolong a hae a mabeli a eang ho Bathesalonika a ileng a khona ho ba fa keletso e ka ba thusang.​—1 Bathes. 4:1, 3-5, 11; 2 Bathes. 3:11, 12.

7. Ke hobane’ng ha ba bang ba ka ’na ba se amohele keletso?

⁷ Ke’ng e ka etsahalang haeba re sa ka ra fana ka keletso ka tsela e nepahetseng? Moholo e mong ea nang le boiphihlelo o re: “Batho ba bang ha ba amohele keletso, eseng hobane keletso eo e fosahetse empa hobane e sa fanoa ka tsela e lerato.” Re ka ithuta’ng tabeng ee? Ha u fa motho keletso hobane u mo rata eseng hobane u tenehile, ho tla ba bonolo hore a e amohele.

8. Moholo o lokela ho ipotsa lipotso life pele a ka fana ka keletso?

⁸ Baholo ha baa lokela ho potlakela ho fana ka keletso. Pele moholo a fana ka keletso o lokela ho ipotsa: ‘Na ke lokela ho fana ka eona? Na ke kholisehile hore motho eo o etsa ntho e fosahetseng? Na Bibele e re ntho eo a e etsang e fosahetse? Kapa na ebe ke hobane re sa bone lintho ka ho tšoana?’ Baholo ba lokela ho qoba ho ba “lepotlapotla mantsoeng” a bona. (Liprov. 29:20) Haeba moholo a sa kholiseha hore o lokela ho fa motho keletso,  a ka buisana le moholo e mong ho bona hore na ebe motho eo o entse ntho e khahlanong le Mangolo le hore na ebe o hloka keletso.​—2 Tim. 3:16, 17.

9. Re ithuta’ng ho Pauluse mabapi le ho fana ka keletso tseleng eo motho a aparang le ho itlhopha ka eona? (1 Timothea 2:9, 10)

⁹ A re bueng ka mohlala ona. A re re mohlomong moholo o tšoenyehile ka tsela eo Mokreste-’moho le eena a aparang kapa a itlhophang ka eona. A ka ’na a ipotsa: ‘Na ho na le lengolo la Bibele le mphang lebaka la hore ke fane ka keletso?’ Kaha moholo eo ha a batle hore ha a fana ka keletso a fane ka maikutlo a hae, a ka ’na a botsa moholo e mong hore na o nahana’ng ka taba eo kapa Mokreste-’moho le eena ea nang le boiphihlelo. Ka mor’a moo, ba ka ’na ba buisana ka keletso ea Pauluse e buang ka moaparo le ho itlhopha. (Bala 1 Timothea 2:9, 10.) Pauluse o ile a bua ka melao-motheo e meng e neng e hlalosa hore Mokreste o lokela ho apara ka tsela e hlomphehang le e tla tlisa thoriso ho Jehova. Empa Pauluse ha aa ka a etsa melao ea hore motho o lokela ho apara eng kapa a se ke a apara eng. O ne a tseba hore Bakreste-’moho le eena ha ba rate lintho tse tšoanang. Kahoo ba ka khetha hore na ba batla ho apara eng, hafeela e se khahlanong le Mangolo. Kahoo haeba baholo ba batla ho bona hore na ba lokela ho fana ka keletso kapa che, ba lokela ho sheba hore na motho eo o apara ka tsela e hlomphehileng.

10. Re lokela ho lula re hopola’ng ka liqeto tseo batho ba bang ba li etsang?

¹⁰ Ke ha bohlokoa ho hopola hore Bakreste ba babeli ba nang le boiphihlelo ba ka etsa liqeto tse sa tšoaneng empa e le tse nepahetseng ka bobeli. Ha rea lokela ho hatella Bakreste-’moho le rona ho etsa ntho eo rona re nahanang hore e nepahetse.​—Bar. 14:10.

11, 12. Moholo o lokela ho ipotsa’ng haeba ho hlokahala hore a fane ka keletso, hona hobane’ng?

¹¹ Haeba ho hlakile hore keletso ea hlokahala, potso ke hore na ke mang ea lokelang ho fana ka eona. Pele moholo a ka eletsa morali oabo rona ea nyetsoeng kapa ngoana, o lokela ho kopana le hlooho ea lelapa eo ho ka etsahalang hore e batle ho itharollela bothata. * Kapa hlooho ea lelapa e ka ’na ea kopa ho ba teng ha moholo eo a fana ka keletso. Hape joalokaha re bone  serapeng sa boraro, ho ka ’na ha e-ba le nako eo ho tla hlokahala hore morali oabo rona ea holileng a fane ka keletso ho morali oabo rona e mocha.

¹² Ho na le ntho e ’ngoe hape eo moholo a lokelang ho nahana ka eona. A ka ’na a ipotsa: ‘Na ke ’na ea tšoanelehang ho fana ka keletso  kapa ho molemo hore motho e mong a bue le motho eo ke batlang ho mo fa keletso?’ Ka mohlala, haeba motho a na le ho ikutloa e se oa bohlokoa, ho ka ba bonolo ho eena hore a mamele keletso eo a e fuoang ke moholo ea kileng a ba boemong ba hae. Moholo ea kileng a ba boemong ba motho eo, o tla khona ho mo nahanela a be a bue lintho tse tla mo thusa. Leha ho le joalo, baholo bohle ba na le boikarabelo ba ho khothatsa Bakreste-’moho le bona le ho ba thusa hore ba etse liphetoho tse hlokahalang ho ea ka Mangolo. Kahoo, ntho ea bohlokoa ke hore motho a fuoe keletso haeba a e hloka, ho sa tsotellehe hore na ho na le moholo ea kileng a ba boemong ba hae kapa che.

13, 14. Ke hobane’ng ha e le ha bohlokoa hore moholo a mamele pele a fana ka keletso?

¹³ Ikemisetse ho mamela. Ha moholo a lokisetsa ho fana ka keletso, o lokela ho ipotsa: ‘Ke’ng seo ke se tsebang ka maemo a mora kapa morali oabo rona? Ke’ng e etsahalang bophelong ba hae? Na o na le mathata ao ke sa a tsebeng? O hloka ho thusoa ka eng hona joale?’

¹⁴ Molao-motheo o hlahang lengolong la Jakobo 1:19 o ka thusa batho ba fanang ka keletso. Jakobo o ile a re: “Motho e mong le e mong a potlakele ho utloa, a liehe ho bua, a liehe ho halefa.” Moholo a ka ’na a nahana eka o tseba maemo ’ohle a Mokreste-’moho empa na kannete oa a tseba? Liproverbia 18:13 e re hopotsa hore “ha mang kapa mang a araba taba pele a e utloa, hoo ke booatla ho eena le tlotlollo.” Ho ka ba molemo ho kopa motho hore a hlalose mathata a hae. Ho ka ba hantle hore moholo a mamele pele a ka bua. Hopola seo re ithutileng sona ka moholo eo re buileng ka eena qalong. O ile a hlokomela hore ho e-na le hore ebe o ile a bua ka lintho tseo a neng a li lokiselitse qalong, a ka be a ile a botsa morali oabo rona lipotso tse kang: “Ho ntse ho ea joang?” “Nka u thusa joang?” Ha baholo ba ipha nako ea ho tseba ka maemo a bara le barali babo rona, ba ka ba boemong bo botle ba ho ba thusa le ho ba khothatsa.

15. Baholo ba ka sebelisa keletso e hlahang ho Liproverbia 27:23 joang?

¹⁵ Tseba mohlape. Joalokaha re buile qalong, ho fana ka keletso e ka thusang motho ha ho bolele feela ho bala mangolo a ’maloa kapa ho fana ka litlhahiso tse itseng. Bara le barali babo rona ba lokela ho hlokomela hore rea ba tsotella, rea ba utloisisa le hore re batla ho ba thusa. (Bala Liproverbia 27:23.) Baholo ba lokela ho etsa sohle seo ba ka se khonang hore e be metsoalle ea bara le barali babo rona.

16. Ke’ng e ka thusang baholo hore ba fane ka keletso e sebetsang?

¹⁶ Baholo ha baa lokela ho etsa hore bara le barali babo rona ba nahane hore ba bua le bona feela ha ba batla ho ba fa keletso kapa ha ba entse phoso. Ho e-na le hoo, ba lokela ho lula ba buisana le bara le barali babo rona le  ho bontša hore baa ba khathalla ha ba e-na le mathata. Moholo e mong ea nang le boiphihlelo o re: “Haeba u etsa joalo, u tla ba le setsoalle se setle le bona. Nakong eo u lokelang ho fana ka keletso ho tla ba bonolo ho etsa joalo.” Hape ho tla ba bonolo hore motho ea fuoang keletso a e amohele.

17. Ke maemong afe ao ka ho khetheha moholo a lokelang ho bontša mamello le mosa?

¹⁷ Bontša mamello le mosa. Ho hlokahala hore motho a be le mamello le mosa haholo-holo haeba qalong motho ea fuoang keletso ea Mangolo a sa e amohele. Moholo ha aa lokela ho teneha haeba mora kapa morali oabo rona a sa amohele keletso ea hae kapa a sa e sebelise ka eona nako eo. Bibele e re ka Jesu: “Ha ho lehlaka le tletleraneng leo a tla le silakanya, ’me ha ho khoele ea lebone ea folakse e kunkelang eo a tla e tima.” (Mat. 12:20) Nakong eo moholo a rapelang a le mong, o lokela ho kopa Jehova hore a thuse motho ea fuoang keletso hore a e amohele a be a e sebelise. Ho ka ’na ha nka nako hore motho ea fuoang keletso a nahane ka eona. Haeba moholo a bontša mamello le mosa, ho tla ba bonolo hore motho ea fuoang keletso a e amohele. Kahoo, ho hlokahala hore ka linako tsohle keletso e thehoe Lentsoeng la Molimo.

18. (a) Ke’ng seo re lokelang ho lula re se hopola ha re fana ka keletso? (b) Joalokaha re bona setšoantšong se lebokoseng, batsoali ba ntse ba buisana ka eng?

¹⁸ Ithute liphosong tsa hao. Kaha ha rea phethahala, ho ke ke ha e-ba bonolo hore re latele seo re ithutileng sona sehloohong sena ka tsela e phethahetseng. (Jak. 3:2) Ke ’nete hore re etsa liphoso, leha ho le joalo re lokela ho ithuta ho tsona. Ha bara le barali babo rona ba bona hore rea ba rata, ho tla ba bonolo hore ba re tšoarele haeba re ba utloisitse bohloko ka seo re se buileng kapa seo re se entseng.​—Sheba lebokose le reng, “ Molaetsa o Eang ho Batsoali.”

19. Re lokela ho etsa’ng e le hore bara le barali babo rona ba thabe?

¹⁹ Re hlokometse hore ha ho bonolo ho fana ka keletso e ka thusang motho e mong. Ha rea phethahala, le batho bao re ba fang  keletso ha baa phethahala. Kahoo, lula u hopola seo u ithutileng sona sehloohong sena. Etsa bonnete ba hore u na le mabaka a nepahetseng a ho fana ka keletso. Hape ipotse hore na ho hlokahala hore ho fanoe ka keletso le hore na u motho ea nepahetseng ho fana ka eona. Pele u fa motho keletso mo botse lipotso ’me u mo mamele ka hloko e le hore u ka utloisisa mathata a hae. Leka ho bona lintho ka tsela eo a li bonang ka eona. E-ba bonolo ’me u be motsoalle oa bara le barali babo rona. Hopola hore re batla hore keletso eo re fanang ka eona e be e thusang motho le e ‘thabisang pelo.’​—Liprov. 27:9.