1, 2. Кыӵе учырен пумиськиз одӥг агай но малы со дышетскиз?

 ТРОС аръёс талэсь азьло кык тӧроос лыктӥзы сузэр доры, кудӥз пумиськонъёсы ветлэмысь дугдӥз. Одӥгез агай лыдӟиз кӧня ке кылбуръёс со сярысь, макем кулэ пумиськонъёсы ветлыны. Со малпаз, со туж умой визь-кенешъёс сётъяз шуыса. Нош кошкыкузы сузэр вераз: «Номыре но тӥ уд валаське». Тӧроос сузэрлы трос визь-кенешъёс сётъязы ке но, соос солэсь ӧз но юалэ, маин со пумиськоно луэ. Соин ик соослэн малпанъёссы сузэрлы нокыӵе пайда ӧз вае.

² Со учырез тодаз вайыса, агай вера: «Нырысь мон малпай, сузэр милемыз уг гажа шуыса. Но собере мон валай, тупась кылбуръёс лыдӟем интые, тупась юанъёс сётъяно вал шуыса. Кылсярысь: „Кызьы тон улӥськод? Кызьы тыныд юрттоно?“ Та учыр монэ тросэзлы дышетӥз». Туннэ та тӧро гажась-жалясь но котьку юрттыны дась.

3. Кинъёс визь-кенешъёс сётъяны быгато?

  ³ Тӧроос кенеш сярысь сюлмасько бере, соос вын-агайёслы но сузэр-апайёслы визь-кенешъёс сётъяны кулэ. Мукетъёсыз но эшъёссылы визь-кенешъёс сётъяны быгато, соослы тупатскыны юрттон понна (Пс. 140:5; Мад. 25:12). Титлы 2:3—5 гожтэмын, кызьы арлыдо сузэръёс егит сузэръёслы визь-кенешъёс сётъяны быгато. Анай-атайёс но пиналъёссылы визь-кенешъёс сётъяло. Та статья нырысь ик тӧроослы гожтэмын ке но, со ваньмылы милемлы пайдаё луоз. Ми вераськомы со сярысь, кызьы визь-кенеш сётоно, мукетъёсызлэн солэсь кылзӥськемзы мед потоз шуыса (Мад. 27:9).

4. Мае ми эскеромы та статьяын?

⁴ Визь-кенеш сётон азьын умой луысал малпаськыны ньыль юанъёс вылын: 1) мар милесьтым мылкыдмес ӝутэ? 2) Зэм ик-а визь-кенеш сётыны кулэ? 3) Кин визь-кенеш сётыны кулэ? 4) Мар юрттоз умой визь-кенеш сётыны? Ойдолэ эскеромы та юанъёсты.

5. Мар карыны кулэ тӧроослы визь-кенеш сётон азязы но малы? (1 Коринфъёслы 13:4, 7).

⁵ Тӧроос ярато вын-агайёссэс но сузэр-апайёссэс. Соин ик соос юрттыны тыршо соослы, кинъёс тани-тани кыӵе ке янгыш лэсьтозы (Гал. 6:1). Но сыӵе адямиен вераськон азязы тӧроослы умой луысал тодазы вайыны, кыӵе луыны кулэ яратон. Апостол Павел гожтӥз: «Яратон кема чида, гажа-жаля... ...Яратон ваньмызлы дурбасьтэ, юн оске, чылкыт сюлмын оскиське, ваньзэ чида». (Лыдӟе 1 Коринфъёслы 13:4, 7.) Та кылбуръёс вылын малпаськыса, тӧроослы валаны кулэ: зэм ик-а яратон соослэсь мылкыдзэс ӝутэ та визь-кенешез сётыны. Куке вын-агайёс но сузэр-апайёс шӧдо, тӧро соосты яратэ шуыса, соослы сётэм визь-кенешлэсь кылзӥськыны капчигес луоз (Рим. 12:10).

6. Кыӵе адӟем карон возьматӥз апостол Павел?

⁶ Апостол Павел тӧроослы умой адӟем карон возьматӥз. Кылсярысь, Фессалоника карысь христианъёслы со гожтӥз, мае соослы тупатоно вал. Фессалоника карын улӥсьёслы кык гожтэтсэ ик со кутскиз ушъян кылъёсын. Со вераз осконзы, яратонзы но юн сылэмзы сярысь. Адӟиське: Павел тодӥз, та христианъёс уйылон-уллянъёсын пумиськыло но юн сыло шуыса (1 Фес. 1:3; 2 Фес. 1:4). Озьы ик Фессалоника карын улӥсьёс сярысь Павел вераз, соос мукетъёсызлы умой адӟем карон возьмато шуыса (1 Фес. 1:8, 9). Соос туж шумпотӥзы, дыр, кылыны таӵе ушъян кылъёсты! Фессалоникаослы кык гожтэтсэ ик Павел соосты яратэменыз гожтӥз. Соин ик вын-агайёслы но сузэр-апайёслы сётэм визь-кенешъёсызлэсь кылзӥськыны капчигес вал (1 Фес. 4:1, 3—5, 11; 2 Фес. 3:11, 12).

7. Малы куддыръя визь-кенешлэсь кылзӥськыны секыт?

⁷ Мар луоз, ми ӧм малпалэ ке, кызьы визь-кенеш сётоно? Одӥг тӧро вера: «Визь-кенеш умой ке но, куддыръя солэсь кылзӥськем уг поты, малы ке шуоно сое яратытэк веразы». Малы ми дышетскыны быгатӥськомы? Аслэсьтыд юаны луоз: «Малы мынам та визь-кенешез  сётэме потэ: мыным та адями уг яра яке мон сое яратӥсько но мынам солы юрттэме потэ?» Яратытэк сётэм визь-кенеш, нокыӵе пайда уг вайы.

8. Кыӵе юанъёс вылын тӧроослы малпаськыны кулэ визь-кенеш сётон азязы?

⁸ Тӧроослы визь-кенеш сётъяны дыртоно ӧвӧл. Соослы умой луысал малпаськыны: «Кулэ-а мыным та сярысь мар ке но вераны? Зэм ик-а адями шонертэм лэсьтӥз? Вера-а Библия, та урод уж шуыса? Яке та учырын пӧртэм сямен лэсьтыны луэ?» Визьмо тӧроослэн уг поты, соосты «малпаськытэк вераськись муртэ» кадь мед тодозы шуыса (Мад. 29:20). Куке тӧролы секыт валаны, Библиысь кыӵе ке курон-косон тӥямын вал-а, ӧй вал-а шуыса, со мукет тӧроен кенешыны быгатэ (2 Тим. 3:16, 17).

9. Малы дышетыны быгатэ тӧроосты Павеллэн визь-кенешез? (1 Тимофейлы 2:9, 10).

⁹ Син азямы пуктомы таӵе учырез. Тӧролы ӧз кельшы, кызьы одӥгез ивортӥсь дӥсяське. Но тани со малпа: «Та адями Библиысь кыӵе ке возетэз тӥя-а?» Тае валан понна, со малпаз мукет тӧроен кенешыны. Ӵош соос тодазы ваё, мар вераське дӥськут но вылтус сярысь 1 Тимофейлы 2:9, 10 (лыдӟе). Татын Павел вера: «Йӧспӧртэм, гольтрес медаз дӥсяське, асьсэды зӥбыт-востэм мед возёзы». Со ӧз вера, кыӵе дӥськут нуллыны яра, нош кыӵе уг яра. Павел тодӥз, Библиысь возетъёсты лыдэ басьтыса, вын-агайёс но сузэр-апайёс асьсэос бырйыны быгато, кыӵе дӥськут нуллоно. Соин ик тӧроос визь-кенеш сёто соку гинэ, куке валало, Библиысь кыӵе ке возет тӥямын вал шуыса.

10. Мар юрттоз мукетъёсызлэсь малпанзэс гажаны?

¹⁰ Тодамы возёно: огез христиан мурт одӥг сямен лэсьтыны быгатэ, нош мукетыз — мукет сямен. Но кыксы ик шонер лэсьто. Соин ик малпано ӧвӧл, ми гинэ шонер малпаськомы шуыса (Рим. 14:10).

11, 12. Мар сярысь малпаськоно тӧролы, куке визь-кенеш сётыны кулэ, но малы?

¹¹ Визь-кенеш сётыны кулэ ке, юан кылдэ: кин визь-кенеш сётоз? Вераськыны кулэ ке бызем сузэрен яке пиналэн, тӧро юаны быгатэ семьялэн йырызлэсь, кин визь-кенеш сётоз: яке со ачиз семьяеныз вераськоз, яке тӧро b. Озьы ик, кызьы   3-тӥ абзацын вераськиз ини, куд-ог учыръёсы умой луысал, егит сузэрен арлыдо сузэр вераськысал ке.

¹² Со сяна, тӧролы малпаськоно: «Умойгес луоз, мон ачим визь-кенеш сётӥ ке яке кин ке мукетыз?» Кылсярысь, куке агай яке сузэр ассэ ултӥяса улэ, умойгес луоз, визь-кенеш сётӥз ке тӧро, кудӥзлэн таӵе ик шӧдонъёсыз вал. Сыӵе тӧро та адямилэсь шӧдонъёссэ валалоз но буйгатӥсь кылъёс шедьтыны быгатоз. Но Библия вылэ пыкиськыса, вын-агайёсты но сузэр-апайёсты буйгатыны кулэ вань тӧроос. Соин ик тӧролы агайлэн яке сузэрлэн шӧдонъёсыз тодмо ӧвӧл ке но, со визь-кенеш сётыны тыршоз.

13, 14. Малы тӧролы кылзыны дась луоно?

¹³ Кылзыны дась луэ. Куке тӧро малпа кинлы ке визь-кенеш сётыны, солы аслэсьтыз юаны кулэ: «Мае мон тодӥсько та адями сярысь? Кыӵе солэн югдурез? Вань-а солэн шуг-секытъёсыз, кудъёсыз сярысь мон уг тодӥськы? Кызьы солы юрттыны луоз?»

¹⁴ Иаковлэн 1:19 умой верамын: «Котькудӥз адями кылзӥськись мед луоз, кыл вераны дыртӥсьтэм, вожпоттӥсьтэм». Тӧро малпаны быгатэ, адямилэсь югдурзэ тодэ шуыса. Нош озьы-а со? Мадёнъёсын 18:14 верамын: «Йылозяз-пумозяз кылзӥськытэк ответ сётӥсь мурт — укылтэм мурт, солы возьыт луыны кулэ». Тӧролы, мукет адямиосты кылзэм интые, ассэ адямиез кылзоно. Собере гинэ тӧро визь-кенеш сётыны быгатэ. Тӧро, кудӥз сярысь статьялэн кутсконаз вераськиз ини, валаз, визь-кенеш сётон азяз солы сузэрлэсь юаны кулэ вал шуыса: «Кызьы улӥськод? Кызьы тыныд юрттоно?» Куке тӧро адямилэсь югдурзэ валаны тырше, соку со быгатоз агайёслы но сузэръёслы юрттыны но соослэсь мылкыдзэс ӝутыны.

15. Кызьы тӧроос уже кутыны быгато Мадёнъёсысь 27:23 возетэз?

¹⁵ Вын-агайёслы но сузэр-апайёслы эш луэ. Кызьы вераськиз ини статьялэн кутсконаз, умой визь-кенеш сётон понна, Библиысь кӧня ке кылбуръёсты лыдӟыны гинэ тырмыт ӧвӧл. Вын-агайёс но сузэр-апайёс мед шӧдозы, ми соос сярысь сюлмаськиськомы, соосты валаськомы но соослы юрттэммы потэ шуыса. (Лыдӟе Мадёнъёсты 27:23.) Тӧроослы туж тыршыны кулэ вын-агайёслы но сузэр-апайёслы эш луыны.

16. Мар юрттоз тӧролы умой визь-кенеш сётыны?

¹⁶ Тӧроослэн уг поты, мукетъёсыз тазьы мед малпалозы шуыса: тӧроос вын-агайёсын но сузэр-апайёсын верасько  соку гинэ, куке соос мае ке шонертэмзэ лэсьтӥзы. Зэмзэ вераса, со озьы ӧвӧл. Тӧроос котьку дась вын-агайёслы но сузэр-апайёслы дырзэс висъяны но соослы юрттыны. Агай, кудӥз кема дыр ӵоже ини тӧро луыса ужа-тырше, вераз: «Озьы ми матысь эшъёс луиськомы. Нош эшлы визь-кенеш сётыны капчигес». Озьы ик эшлэн визь-кенешезлэсь кылзӥськыны но капчигес луэ.

17. Ку тӧролы тужгес но кулэ чидась но лякыт луыны?

¹⁷ Чидась но лякыт луыны тырше. Со тужгес но кулэ, куке адямилэн нырысь визь-кенешлэсь кылзӥськемез уг поты. Сыӵе учыре тӧролэн вожез потыны быгатэ, нош со йыркуръяськыны кулэ ӧвӧл. Тани мар верамын вал Иисус сярысь: «Чигтэм камыш бодыез уз тӥялты, гыбдась етӥнэз уз кысы» (Матф. 12:20). Тӧроос тыршо Христослэсь гажан-жалянзэ адӟем карыны. Соин ик соос Иеговалэсь куро: Инмар мед юрттоз агайлы яке сузэрлы валаны, малы солы таӵе визь-кенеш сётӥзы но кызьы сое улоназ пыртоно. Тае валан понна, дыр кулэ. Визь-кенешлэсь кылзӥськыны капчигес мед луоз шуыса, тӧролы кулэ чидась но лякыт луыны, озьы ик визь-кенешсэ Инмарлэн Кылыз вылэ пыкиськыса вераны.

18. а) Мар сярысь тодазы возёно соослы, кинъёс визь-кенеш сётыны малпало? б) Мар сярысь верасько анай но атай, кудъёсыз рамкалы туспуктэмын возьматэмын?

¹⁸ Асьтэлэн янгышъёсты вылын дышетске. Ми тырбыдэстэмесь бере, куддыръя та статьяысь визь-кенешъёслэсь кылзӥськыны секыт луоз, дыр (Иак. 3:2). Но ойдолэ тыршомы янгышъёсмы вылын дышетскыны. Ми вын-агайёсмес но сузэр-апайёсмес яратӥмы ке, соослы капчигес луоз милемыз простить карыны. (Озьы ик учке « Мае тодазы возёно анай-атайёслы» рамкаез.)

19. Кыӵе визь-кенешлэсь кылзӥськыны капчигес?

¹⁹ Кызьы ми адӟимы та статьяысь, умой визь-кенеш сётыны котьку ик капчи ӧвӧл. Ми но тырбыдэстэм адямиос, соос но, кинъёслы ми визь-кенеш сётӥськомы, тырбыдэстэм адямиос луо. Соин ик та статьяысь визь-кенешъёс милемлы туж юрттозы. Визь-кенешез яратыса сётыны кулэ. Валаны тырше, зэм ик-а сое сётоно но кин сое вераны кулэ. Визь-кенеш сётон азьын тыршоно адямилэсь югдурзэ тодыны, сое кылзыны но валаны. Милям потэ вын-агайёслы но сузэр-апайёслы умой эшъёс луэммы. Ойдолэ тыршомы, визь-кенешмы пайда но мед ваёз, солэсь кылзӥськыны но капчи мед луоз шуыса (Мад. 27:9).