1-2. Cossa che un fradel el ga imparà sora dar consili?

 TANTI ani indrio, due ansiani i ze ndati incoraiar una sorela che no la era drio ndar ale riunion. Un dei ansiani ghe ga ledesto arquanti testi dela Bìblia par spiegarghe che l’è tanto importante ndar ale riunion. Lu el pensea che el gavea incoraià la sorela, ma quando i era drio ndar via, la ghe ga dito: “Valtri gnanca no savé quel che son drio infrontar.” I consili che i ansiani i ga dato a questa sorela no la ga giutà parché lori gnanca i savea cossa la era drio infrontar.

² El ansiano che el ga ledesto i testi a quela sorela el ga pensà sora quel che gavea sucedesto. Varda cossa che el ga dito: “Nela ora che la ga parlà, go pensà che la gavea rispondesto de una maniera tanto bruta. Ma dopo go capio che saria stà meio se ghe gavesse fato domande invesse de leder tanti testi. Par esémpio: ‘Come che te te senti?’ ‘Come che mi posso giutarte?’” Lu el ga imparà tanto con quel che ga sucedesto, e ancoi, l’è un ansiano che el mostra amor e el capisse i fradei.

3. Chi che pol dar consili?

³ I ansiani i ga de tender dei fradei dela congregassion. Par quela che lori i ga de darghe consili quando ghe ocore. Ma dele volte, anca altri fradei i ga bisogno de dar consili. Par esémpio, fursi un fradel o una sorela el ga de dar  un consìlio de acordo cola Bìblia a un amigo. (Sal. 141:5; Pro. 25:12) Pol esser che una sorela pi vècia la dae consili a una pi gióvena, come quei che ghen’è in Tito 2:3-5. E anca i genitori sempre i dà consili ai so fioi. Par quela che questo stùdio el ndarà giutar ai ansiani, ma anca a tuti noantri. Ndaremo imparar a dar boni consili ai altri. Cossita, lori i gavarà voia de meterli in pràtica e i restarà contenti. — Pro. 27:9.

4. Cossa che ndaremo veder in questo stùdio?

⁴ In questo stùdio, vederemo le risposte de queste quatro domande: (1) Parché che volemo dar el consìlio? (2) Sarà che la persona la ga pròpio bisogno del consìlio? (3) Chi che ga de dar el consìlio? (4) Come dar un bon consìlio?

5. De acordo con 1 Corinti 13:4, 7, cossa che ndarà giutar un ansiano a dar boni consili?

⁵ I ansiani i dà consili ai so fradei parché li ama. Par quela che quando i vede che un fradel el va far qualcossa sbaliada, lori i ghe dà consili. (Gàl. 6:1) Vanti de farlo, lori i pol pensar sora le parole de 1 Corinti 13: 4, * 7. * (Ledi.) In questo testo, el apòstolo Paolo el ga dito: “El amor l’è passiente e bon. . . . El soporta tute le robe, el crede in tute le robe, el ga speransa in tute le robe, el persevera in tute le robe.” Quando el ansiano che el va dar un consìlio, el pensa sora quel che dise questo testo, el sarà bon de dar el consìlio con amor e mostrar ala persona che ghe vol ben. Cossita, sarà pi fàcile che la persona la scolte el consìlio. — Rom. 12:10.

6. Parché che el apòstolo Paolo l’è un bel esémpio par i ansiani?

⁶ El apòstolo Paolo l’è un bel esémpio par i ansiani. Par esémpio, vedemo nele carte che el ga scrito ai fradei de Tessalònica che el ghe dea consili quando i gavea de bisogno. Ma vanti de dar i consili, Paolo el lodea i fradei. Par esémpio, lu el ga dito che lori i gavea una forte fede, i laorea con amor, i era leai e i seitea a far quel che l’era giusto anca che fusse fadiga. (1 Tes. 1:3; 2 Tes. 1:4) Paolo el ga anca dito che lori i era esempi par i altri fradei. (1 Tes. 1:8, 9) Sicuro che quei fradei i ze restadi tanto contenti de scoltar quel che Paolo el ghe ga dito e i ga visto che lu li amea. Par quela che i consili de Paolo i era tanto boni. — 1 Tes. 4:1, 3-5, 11; 2 Tes. 3:11, 12.

7. Parché che fursi qualchedun el reste disgustà quando el riceve un consìlio?

⁷ Pol esser che qualchedun l’è restà disgustà par causa de un consìlio. Un ansiano el ga spiegà parché che questo pol suceder. Lu el ga dito: “Quasi sempre la persona la ze restada disgustada parché el consìlio l’è stà dato sensa amor, e nò parché el consìlio no l’era bon.” Questo el ne insegna che l’è pi fàcile scoltar un consìlio quando l’è dato con amor.

8. Che domande un ansiano el pol farse vanti de dar un consìlio?

⁸ Vanti che i ansiani i dae un consìlio a qualchedun, lori i pol domandarse: ‘Sarà che la persona la ga pròpio de bisogno del  consìlio? Quel che la ga fato l’è pròpio sbalià? La ga fato qualcossa che no l’è de acordo cola Bìblia? O sarà che la ze sol drio far una roba che mi no faria?’ Un ansiano el mostra sabedoria quando no’l parla qualcossa sensa prima pensar ben. (Pro. 29:20) Se el ansiano no l’è sicuro che la persona la ga pròpio de bisogno del consìlio, el pol parlar con nantro ansiano e domandarghe cossa el pensa. — 2 Tim. 3:16, 17.

9. Come che 1 Timòteo 2:9, 10 pol giutar i ansiani a dar un consìlio?

⁹ Metemo dir che un ansiano el pensa che le robe che un fradel l’è drio meter su e la so maniera de rangiarse no le ze de acordo cola Bìblia. Alora, lu el podaria domandarse: ‘Questo fradel l’è drio far qualcossa che la Bìblia la dise che l’è sbalià?’ Se el ansiano no l’è sicuro, el pol domandar a nantro ansiano, o a una brava sorela cossa che i pensa. Lori i pol anca pensar in quel che Paolo el ga dito sora questo. (Ledi 1 Timòteo 2:9, 10. *) Paolo no’l ga mia parlà tute le robe che podemo o no podemo far. Invesse, lu el ga parlà sora arquanti prinsipi che i giuta i servi de Dio a far la scólia giusta. Lu el ga dito che lori i ga de esser sicuri che le robe che i mete su e la maniera che i se rangia le ghe dae onor a Geovà. Alora, se qualchedun el vol meter su una roba che no la ze contra quel che la Bìblia la dise, lu el pol farlo. Cossita, i ansiani sol i darà un consìlio a una persona che no la ze drio far quel che Paolo el ga dito.

10. Cossa ghemo de ricordarse sora le scólie che i altri i fà?

¹⁰ Ghemo anca de ricordarse che due fradei i pol scòlier far le robe de maniere difarente, e tute due le pol esser giuste. No podemo voler che i fradei i ghe piase dele medèsime robe che noantri o che le fae come noantri. — Rom. 14:10.

11-12. Vanti de dar el consìlio a qualchedun, che nantra roba el ansiano el ga de pensar, e parché che el ga de far cossita?

¹¹ Se el ansiano l’è sicuro che el fradel el ga bisogno del consìlio, el ga de pensar chi che saria la meio persona par farlo. Par esémpio, se el consìlio l’è par una sorela maridada o par un gióveno, fursi saria meio che el ansiano el parlesse prima col paron dela fameia. O pol esser che el pense che l’è meio che lu stesso el parle cola persona dela so fameia o che el vae  insieme quando el ansiano el ndarà parlar. * E se el consìlio l’è par una sorela gióvena, dele volte saria meio che una sorela pi vècia la ghe desse.

¹² El ansiano el ga anca de pensar che saria meio che la persona la ricevesse el consìlio de qualchedun che la capisse. Par esémpio, pol esser che qualchedun che el pensa che no’l ga valor el gàpia bisogno de un consìlio. Alora, saria meio che un ansiano che el ga infrontà la medèsima roba el ghe desse un consìlio. Cossita, questo ansiano el sarà bon de capirlo e de giutarlo. Ma i ansiani i ga de ricordarse che tuti lori i ga de incoraiar e dar consili ai fradei, anca che no i gàpia infrontà le medèsime robe che lori. La roba pi importante la ze darghe el consìlio a quei che i ga de bisogno.

13-14. Parché che i ansiani i ga de scoltar vanti de dar un consìlio?

¹³ Scolta quel che el fradel el dise. Vanti che un ansiano el dae un consìlio, el ga de domandarse: ‘Mi cognosso pròpio ben el fradel? Mi sò quel che l’è drio suceder nela so vita e che dificoltà lu l’è drio infrontar? Cossa che el ga de bisogno?’

¹⁴ Ghemo de far quel che dise Tiago 1:19 quando ndemo dar un consìlio a qualchedun. Questo testo el dise: ‘Tuti i ga de esser pronti par scoltar, ma i ga de spetar par parlar.’ Alora, l’è meio che prima el ansiano lo scolte. Proverbi 18:13 dise che parlar qualcossa sensa prima saver de tuto, l’è una roba stùpida e una vergogna par lu. Te te ricordi de quel che ga sucedesto col ansiano del scomìnsio de questo stùdio? Lu el ga imparà che vanti de dar el consìlio, l’è meio far queste domande: ‘Come steto?’ ‘Cossa mi posso far par giutarte?’ Se i ansiani i se sforsa de saver quel che l’è drio suceder cola persona, lori i sarà boni de giutarla e incoraiarla.

15. Come i ansiani i pol meter in pràtica Proverbi 27:23?

¹⁵ Cognossi ben i to fradei. In questo stùdio, ghemo visto che, par dar boni consili a qualchedun, ne ocore far de pi che sol leder arquanti testi dela Bìblia o dirghe quel che lu el ga de far. Noantri ghemo anca de mostrar che se preocupemo con lu, che lo capimo e che volemo giutarlo. (Ledi Proverbi 27:23. *) Alora, i ansiani i ga de sforsarse par esser boni amighi de tuti i fradei dela congregassion.

16. Cossa ndarà giutar i ansiani a dar consili?

¹⁶ I ansiani i ga de ciacolar coi fradei e sorele e voler cognosserli pròpio ben. Lori no i ndarà parlar coi fradei sol quando i ga bisogno de darghe consili. Varda  cossa che un bravo ansiano el ga dito: “Quando sempre parlemo coi fradei, deventemo so amighi. Alora, quando ghemo bisogno de darghe un consìlio, l’è pi fàcile.” Se un ansiano l’è amigo dei fradei, l’è anca pi fàcile che i scolte el so consìlio.

17. Quando un ansiano el ga de mostrar passiensa e bontà?

¹⁷ Mostra passiensa e bontà. La Bìblia la dise sora Gesù: ‘Lu no’l ndarà schissar una cana che la ze belche macada, gnanca el ndarà smorsar un stupin che l’è ancora drio far fun.’ (Mat. 12:20) I ansiani i ga de far compagno a Gesù e mostrar passiensa e bontà anca quando un fradel no’l vol scoltar un consìlio dela Bìblia. Come lori i pol mostrar passiensa e bontà? Lori no i ga de restar disgustadi o inrabiadi col fradel che no ghe ga piasesto el consìlio. Lori i pol domandar che Geovà el giute questo fradel a capir el consìlio e meterlo in pràtica. I ansiani i ga de seitar a mostrar bontà e passiensa, parché fursi el ghe meterà tempo par pensar nel consìlio. Se lori i fà cossita, sarà pi fàcile che el fradel scolte el consìlio dela Bìblia.

18. (a) Cossa pol suceder quando demo consili, e cossa ghemo de sforsarse de far? (b) De acordo col ritrato del quadro, cossa i genitori i ga de ricordarse?

¹⁸ Impara coi to sbali. Sicuro che volemo far quel che ghemo imparà in questo stùdio, ma ndaremo sbaliar parché semo imperfeti. (Tiago 3:2) Par esémpio, pol esser che qualcossa che femo o parlemo asse qualchedun disgustà. Alora, ghemo de imparar dei nostri sbali e no farli pi e ricordarse che se lu el sa che lo amemo, sarà pi fàcile che el ne perdone. — Vedi anca el quadro “ Cossa i genitori i ga de ricordarse?”.

19. Come che podemo dar consili che i asse i nostri fradei contenti?

¹⁹ Come ghemo visto, no l’è fàcile dar  consili parché semo imperfeti e anca quei che ndemo dargheli i ze. Alora, l’è bon ricordarse de quel che ghemo imparà in questo stùdio. El ne ga insegnà che ghemo de dar consili parché amemo i nostri fradei. El ne ga anca insegnà che ghemo de pensar se lori i ga pròpio de bisogno de un consìlio e chi che saria meio che lo desse. Ghemo anca visto che vanti de darghelo, ghemo de far domande ai fradei e scoltarli con atension par saver cossa i ze drio infrontar. Ghemo anca de proar imaginar come lori i se sente, mostrarghe bontà e esser so amighi. Ghemo anca de ricordarse de darghe consili che li asse contenti. — Pro. 27:9.