1, 2. მუ დიგურუ ართ ჯიმაქ რჩევაშ მეჩამაშ გურშენ?

ბრელ წანაშ წოხოლე ჟირ უხუცესიქ ქიმიაკითხუ დას, ნამუთ ვეგლეშ კრებაშ შეხვალამეფშა. ართ უხუცესიქ თის არძა მუხლ გეშუკითხჷ, ნამუთ კრებაშ შეხვალამეფშა დასწრებას ოხუდ. თინა ფიქრენდჷ, ნამდა მონახულებაქ მიზანს ქიმიოჭირინუ. მარა ულაშ დროს თე დაქ თინეფს უწუ: „ჯიმალეფ, თქვა ვა გარჩქილენა, მა მუ მდგომარეობა მიღჷ“. უხუცესეფქ დას რჩევა თეშ ქიმეჩეს, ნამდა ვართ უკითხირნა, მუ მდგომარეობა უღუდ თის. შედეგო დას თე მონახულებაშე მუთუნ ჯგირობუა ვემუღებ.

² თე უხუცეს იშინანს: «დუდშე იფიფქრ, ნამდა თიქ ვა დაფას ჩქინ ხანდა. მარა გურ ქუგუჩინ, ქიმეფხვად, ნამდა შეხვალამეფიშ დასწრებას ოხუნ ფერ არძა მუხლიშ ეშაკითხირიშ მანგიორო, თიშა თიცალ მუდგარენ ოკო ქომკითხირუდკო, მუნერით რე: „მუჭო მეურს სქან საქმეეფ? მუთ შემლებ, მიგეხვარე?“». თე შემთხვევაშე უხუცესიქ მანგარ მნიშვნელოვან მუდგარენ დიგურუ. ამდღა თინა ჯგირ ჭყიშ რე, მუშენდა გურშა მეუღ შხვეფიშ გაჭირება დო ირნერო ელურე თინეფს.

3. მიქ შილებე კრებას რჩევა მეჩას შხვეფს?

 ³ მუჭოთ ჭყიშეფს, რჩევაშ მეჩამაშ პასუხიშმგებლობა უხუცესეფს უღნა. მარა მინშა რე სიტუაციეფ, მუჟამსით კრებას შხვეფ ხოლო ირზენა რჩევას. მაგალთო, ჯიმაქ ვარდა დაქ შილებე ბიბლიაშა გერსხილ რჩევა ქიმეჩას მეგობარს (ფსალმ. 141:5; იგავ. 25:12). ხანით უნჩაშ დაქ შილებე ქიგიოწურუას ახალგაზრდა დას, მუჭოთ ტიტეშ 2:3—5-ის რე მოშინაფილ; მშობლეფქ ხშირას ოკო მეჩან რჩევა მუნეფიშ სქუალეფს. თაშ ნამდა, მართალ  რე, თე სტატია კონკრეტულო უხუცესეფს ოხუ, მარა არძას შემლებნა თიშე სარგებელიშ მეღება, ნამდა ჩქინ რჩევეფქ იჸუას პრაქტიკულქ, ადვილ მიოღებელქ დო მუჰამუას გურს (იგავ. 27:9).

4. მუს გუვარჩიენთ თე სტატიას?

⁴ თე სტატიას ოთხ კითხვას გუვარჩიენთ, ნამუთ რჩევაშ მეჩამას ოხუ: 1) მუ რე რჩევაშ მეჩამაშ სწორ მოტივ? 2) ქორენო რჩევაშ მეჩამა დასურო აუცილებერ? 3) მიქ ოკო მეჩას რჩევა? 4) მუჭო შეილებნა ჯგირ რჩევაშ მეჩამა?

5. მუჭო მეხვარებ სწორ მოტივეფ უხუცესის, ნამდა თიშ რჩევაქ ადვილ მიოღებელქ იჸუას? (1 კორ. 13:4, 7)

⁵ უხუცესეფს უჸორა და დო ჯიმალეფ დო მინშა ჸოროფას თინეფშა რჩევაშ მეჩამათ გიმოხანტუნა, მით არასწორ შარას გიოდირთუ (გალ. 6:1). ჯგირ იჸუაფ უხუცესეფქ დეფიქრან ჸოროფაშ ნამთინე მხარეშე, ნამდგას მოციქულ პავლე მიშინუანს: „ჸოროფა ითვინენს დო ჯგირს აკეთენს . . . ირფელს ურზუ, ირფელ წანს, ირფელიშ იმენდ უღჷ დო ირფელს ითვინენს“ (წეკითხით 1 კორინთელეფიშ 13:4, 7). თე მუხლეფშე დაფიქრება უხუცესის მეხვარებ თიშ ძირაფას, ქირზენს დო ვარ რჩევას სწორ მოტივეფით დო ჸოროფათ. მუჟამსით თინა, მიდგას რჩევას არზენა, ქიგინანს უხუცესშე მზრუნველობას, შილებე უმოს ადვილქ აჸუას რჩევაშ მეჸუნაქ (რომ. 12:10).

6. მუ ჯგირ მაგალითის ირზენს მოციქულ პავლე?

⁶ მოციქულ პავლე ჯგირ მაგალითის არზენს უხუცესეფს. მაგალთო, თის დრო ვა უღალ დო რჩევა ქიმეჩ თესალონიკელ ქრისტიანეფს, მუჟამსით ქოძირ, ნამდა თენა ოსაჭირდეს. მარა პავლექ დიო თინეფიშ რწმენაშ საქმეეფ, ჸოროფათ ხანდა დო მოთვინება მიშინუ. თის ჯგირო უჩქუდ თესალონიკელეფიშ მდგომარეობა დო უწუ, ნამდა თინეფიშ ცხოვრება ვა რდჷ ადვილ, თეს გეძინელ, თხოზინშა ხოლო აფდეს გარზებელ (1 თეს. 1:3; 2 თეს. 1:4). პავლექ თინა ხოლო უწუ, ნამდა თინეფ ჯგირ მაგალითის არზენდეს შხვა ქრისტიანეფს (1 თეს. 1:8, 9). მუჭო ახიოლედეს თესალონიკელეფს პავლეშე თე ცქვაფაშ მორჩქილაფა. მუშო ოკო რაგად, პავლეს უჸორდჷ ჯიმალეფ დო ზუსტას ათეშენ შეიალებუ თესალონიკელეფშა ჯგირ რჩევეფიშ მეჩამაქ ჟირხოლო წერილს (1 თეს. 4:1, 3—5, 11; 2 თეს. 3:11, 12).

7. მუშენ შილებე ნამთინეს რჩევაშ მიმართ გლახა რეაქცია უღდას?

⁷ მუ მოხვადუ, მუჟამსით რჩევა საჭირო რენ თეშ ვემმაჩინენა? ართ გამოცდილ უხუცეს იჩიებ: „ნამთინეს გლახა რეაქცია უღჷ რჩევაშ მიმართ. მარა თიშენ ვარ, ნამდა რჩევა რე გლახა, უბრალოთ თინა ჸოროფათ ვა რე მეჩამილ“. მუშ გურაფა შემლებნა თავრეშე? რჩევა თიმწკუმა რე ადვილ მიოღებელ, მუჟამსით თიშ საფუძველ ჸოროფა რე დო ვართ ხოლო გაღიზიანება.

8. მუ ოკო კითხას უხუცესიქ მუშ დუდის, სოიშახ რჩევაშ მეჩამას გინოჭყვიდუნს?

⁸ უხუცესეფქ რჩევაშ მეჩამაშახ ოკო ვეჩქარან დო მუნეფიშ დუდის ქოკითხან: „დასურო საჭირო ქორენო მუთუნიშ რაგად? დარწმუნებულ ქუვორექო, ნამდა არასწორო მიქცუ? თიშ მოქმედება ბიბლიას ოწინააღმდეგუნო დოვარ უბრალოთ მა ვა მობწონს?“. უხუცესეფ ჭკვერულო იქციებნა, მუჟამსით „უდუფიქრებუო რაგადის“ ეუჩილითუანა დუდის (იგავ. 29:20). პიროვნებას რჩევა ოსაჭირუნ თიშა უხუცეს დარწმუნებულ  ვარენ-და, თიქ შხვა უხუცესის ოკო ქელაკითხუას აზრ (2 ტიმ. 3:16, 17).

9. მუს ბგურაფლენთ პავლეშ მაგალითშე მიკოქუნა დო გარეგნობაწკუმა დაკავშირებით რჩევაშ მეჩამაშ გურშენ? (1 ტიმ. 2:9, 10).

⁹ გუვარჩუათ ართ მაგალით. უხუცესის აფიქრენს თანაქრისტიანიშ მიკოქუნა დო გარეგნობა. თიქ მუშ დუდის ოკო ქოკითხას: „ბიბლიურ საფუძველ ქომღუნო რჩევაშ მიოჩამალო?“. უმოს გონივრულ გადაწყვეტილებაშ მიოღებელო, თიქ შილებე შხვა უხუცესის ვარდა სულიერო მოწიფულ ქრისტიანს ქელაკითხუას აზრ. თინეფს შეულებნა ართო ქიგნაჯინან პავლეშ რჩევას, ნამუთ მიკოქუნა დო გარეგნობას ოხუ (წეკითხით 1 ტიმოთეშ 2:9, 10). პავლექ მუსხირენ მთავარ პრინციპშა გეგნიღ ყურადღება დო თქუ, ნამდა ქრისტიანიშ მიკაქუნალ ოკო რდას მოკრძალებურ დო გონივრულო გიშაგორილ. მარა თის ვეგმუკოროცხჷ, მუნერ ბარგ ოკო მიკიქუნას ქრისტიანქ დო მუნერ — ვარ. თის არჩქილედ, ნამდა ქრისტიანს შეულებ მუნერ ოკონ თინერ ბარგ მიკიქუნას, მუჟამსით თენა ბიბლიურ ჩარჩოეფს ვეგნაჩირთუ. თაშ ნამდა, მუჟამსით უხუცესის გინაჭყვიდირალ აფჷ, ქიმეჩას დო ვარ პიროვნებას რჩევა, ოკო დეფიქრას: „ქიგნაჩირთუნო თიშ არჩევან მოკრძალებას დო გონიერებას?“.

10. მუჭო ოკო უჯინედათ შხვეფიშ მეღებულ გადაწყვეტილებეფს?

¹⁰ მნიშვნელოვან რე, ფშუდან, ნამდა ჟირ მოწიფულ ქრისტიანქ შილებე შხვადოშხვა გადაწყვეტილება მიღას დო ნამთინ ვა რდას არასწორ. ჩქი ოკო ვევეცადათ, თანამორწმუნეეფქ სწორ დო არასწორწკუმა დაკავშირებით თიცალ აზრ გავითარან, მუნერით ჩქი მიღნა (რომ. 14:10).

11, 12. მუჟამსით რჩევაშ მეჩამა აუცილებერ რე, მუ ოკო კითხას უხუცესიქ მუშ დუდის დო მუშენ?

¹¹ თიშ უკულ, მუთ დებრწმუნებუთ, ნამდა რჩევაშ მეჩამა საჭირო რე, ოკო დეფიფქრათ, მიქ აკეთას თენა. უხუცესიქ ოკო ქუდურაგადუას ოჯახიშ დუდის, სოიშახ გინოჭყვიდუნს დაქორწინებულ დას ვარდა ბაღანას ქიმეჩას რჩევა. ოჯახიშ დუდიქ შილებე გინოჭყვიდას, ნამდა მუქ ქიმკაჯინას თე საქმეს; * ვარდა შილებე ითხუას, რჩევაშ მეჩამაშ პროცესის მუქ ხოლო ქიდესწრას. მინშა შილებე უჯგუდას, ასაკით უნჩაშ დაქ ქიმეჩას რჩევა ახალგაზრდა დას, მუჭოთ თენა  მასმა აბზაცის რდჷ მოშინაფილ.

¹² საჭირო რე ხოლო ართ მხარეშა დაფიქრება. უხუცესიქ მუშ დუდის ოკო ქოკითხას: „მა ოკო მეფჩეო თე რჩევა  დოვარ შხვა უჯგუშო გაკეთენდჷ თეს?“. მაგალთო, მუჟამსით რჩევა რე მიოჩამალ პიროვნებაშა, მიდგას უღირსობაშ გრძნობა უღჷ, უჯგუშ იჸუაფ, თენა გაკეთას უხუცესიქ, მიდგას გიმუცადებ თე გრძნობა. თის ალბათ უჯგუშო შეიალებე თეცალ თანამორწმუნეშ მდგომარეობაშა მიშულა დო რჩევაშ ჯგირო მეჩამა. მარა, მუჟამსით კრებას ვა რე თიცალ უხუცეს, მიდგას თეცალ მდგომარეობა მიკნაულა აფჷ, რჩევაქ იშენით ოკო იჸუას მეჩამილქ. თენა მანგარ მნიშვნელოვან რე. ვაგმოჭყორდან, ნამდა რჩევაშ მეჩამა არძა უხუცესიშ ვალდებულება რე.

13, 14. მუშენ რე უხუცესშო მორჩქილაფა მნიშვნელოვან?

¹³მზათ რდათ მარჩქილაფარო. მუჟამსით უხუცეს ემზადებ თანამორწმუნეშა რჩევაშ მიოჩამალო, თიქ ოკო დეფიქრას: „მუ მიჩქ თიშ მდგომარეობაშ გურშენ? ხომ ვა უღჷ თიცალ პრობლემეფ, მუთ მა ვა მიჩქ? ასე ირფელიშ უმოსო მუ ოსაჭირ?“.

¹⁴ იაკობიშ 1:19-ს ინოჭარილ პრინციპ ოხუ თინეფს, მით რჩევას ირზენს. თექ ბკითხულენთ: „არძა კოჩ მზათ რდას მარჩქილაფარო დო ვეჩქარას მუთუნიშ რაგად დო გურიშ მოულა“. უხუცეს შილებე ფიქრენდას, ნამდა არძა ფაქტ უჩქჷ, მარა ქორენო თენა სინამდვილეს თაშ? იგავეფიშ 18:13 გუმოშინანა: „მორჩქილაფაშახ პასუხიშ მეჩამა უჭკუობა დო დუდიშ დამცირება რე“. უჯგუშ იჸუაფ, მიდგას რჩევას ვარზენთინ თიშე ქიმიფრჩქილუათ, მუ მდგომარეობა უღჷ. თენა ნიშნენს, ნამდა რაგადშახ ქურჩქილათ თის. ქიგიფშინათ, მუს ბგურაფლენთ თე სტატიაშ დაჭყაფუს მოშინაფილ უხუცესიშ მაგალითშე. თიქ ქუგოხვად, ნამდა თით ოკო ვა დუჭყაფუდკო რაგად, მუთ მუს აფუდ მომზადებულ, თეშ მანგიორო, უჯგუშ იჸუაფუდ თანაქრისტიანშა ქუკითხირუდკო: „მუჭო მეურს სქან საქმეეფ? მუთ შემლებ, მიგეხვარე?“. უხუცესეფ თანაქრისტიანიშ მდგომარეობაშ გურშენ მეტიშ გაგებას დროს გეგმურთუნან-და, უმოსო შეიალებენა, ქიმეხვარან დო გურშა ელუკინან თის.

15. მუჭო შეულებნა უხუცესეფს მიაჸუნან პრინციპის, ნამუთ იგავეფიშ 27:23-ს რე მოჩამილ?

¹⁵გეჩინებაფეთ თქვან ოჭყიშალ. მუჭოთ დაჭყაფუს მიფშინეთ, ჯგირ რჩევაშ მეჩამა ვა ნიშნენს უბრალოთ მუსხირენ ბიბლიურ მუხლიშ ეშაკითხირს ვარდა თიშ რაგადის, მუნერო მიქცუას. და დო ჯიმალეფს ოსაჭირნა თიშ ძირაფა, ნამდა ჩქი ბზრუნენთ თინეფშე, მარჩქილენა თინეფიშ დო მოკონა, მივეხვარათ (წეკითხით იგავეფიშ 27:23). უხუცესეფქ ირფელ ოკო გაკეთან, ნამდა ხოლოშიან ურთიერთობა გავითარან და დო ჯიმალეფწკუმა.

16. მუ მეხვარებ უხუცესეფს ჯგირ რჩევაშ მეჩამას?

 ¹⁶ უხუცესეფს ვაკონა მითინს თიცალ აზრიქ დასქიდას, ნამდა ხვალე თიმწკუმა გაშინენა, მუჟამსით რჩევა რე მიოჩამალ ვარდა მუდგარენ აფჷ დაშებულ. თეშ მანგიორო, რეგულარულო უღნა ურთიერთობა და დო ჯიმალეფწკუმა დო პირად ინტერესის გიმირჩქინანა, მუჟამსით თინეფ პრობლემეფს ხვადუნა. ართ გამოცდილ უხუცეს იჩიებ: „თაშ ქართუქ-და, თინეფიშ ჯგირ მეგობარო გინირთუქ დო მუჟამსით რჩევა იჸუაფ მიოჩამალ, უმოს ადვილ გაჸი თეშ კეთება“. მეგობარშე რჩევაშ მეღება ხოლო უმოს ადვილ რე.

17. განსაკუთრებულო მუჟამ ოსაჭირ უხუცესის მოთვინება დო სიკეთეშ გიმორჩქინა?

¹⁷რდათ მომთმენეფ დო კეთილეფ. მოთვინება დო სიკეთეშ გიმორჩქინა განსაკუთრებულო თიმწკუმა რე საჭირო, მუჟამსით ბიბლიაშა გერსხილ რჩევას ხეთეშე ვა ღებულენა. თე დროს უხუცესის გურქ ოკო ვა მოურთას. ბიბლია იესოშ გურშენ იჩიებ: „გინოტახილ ლერწამს ვა მოტახუნს დო მაჭვიტაია ფიტილს ვა შქირიტუნს“ (მათ. 12:20). უხუცესის შეულებ, პირად ლოცვაშ დროს ქოთხუას იეჰოვას, ნამდა აკურთხას თი პიროვნება, მიდგაშა რჩევა რე მიოჩამალ, ქიმეხვარას თის რჩევაშ ინონჭაფას დო გიმორნაფას. მოთვინებაშ დო სიკეთეშ გიმორჩქინათ უხუცეს ქიმეხვარებ თის, ყურადღება რჩევაშა გეგნიღას დო ვართ ხოლო თიშ მეჩამაშ ფორმაშა. მუშო ოკო რაგად, რჩევა ირო ღორონთიშ სიტყვაშა ოკო რდას გერსხილ.

18. ა) მუ ოკო ფშუდან რჩევაშ მეჩამაშ დროს? ბ) მუჭოთ ჩარჩოშე იძირე, მუ კითხვეფშე ოკო დეფიქრან მშობლეფქ?

¹⁸ქიდიგურეთ თქვან შეცდომეფშე. ჩქი სრულყოფილო ვემმაჸუნნენა თი რჩევეფშა, ნამუთ თე სტატიას რე მოჩამილ (იაკ. 3:2). მინშა რჩევაშ მეჩამაშ დროს მეფჩირთუთ დო მიდგაინს ქუვოწყინუანთ. მარა, მუჟამსით და დო ჯიმალეფ ჩქინ ჸოროფას ქიგინანა, უმოს ადვილო ქუმაპატიენა (ქოძირით ჩარჩო  „მშობლეფშო“).

19. მუჭო შემლებნა მუჰამუათ ჩქინ და დო ჯიმალეფიშ გურს?

¹⁹ მუჭოთ ბძირით, ადვილ ვა რე ჯგირ რჩევაშ მეჩამა. ჩქი არძა არასრულყოფილეფ ვორეთ დო თინეფ ხოლო არასრულყოფილეფ რენა, მიდგას რჩევას ვარზენთ. საჭირო რე, ვეგიჭყოლიდუათ პრინციპეფ, ნამუთ თე სტატიას გუვარჩით; დერწმუნით, ქარზენთ დო ვარ რჩევას სწორ მოტივით, ქორენო თინა დასურო საჭირო დო ქორეთ დო ვარ თქვა თი პიროვნება, მიდგაქ ოკო მეჩას თე რჩევა. რჩევაშ მეჩამაშახ თანამორწმუნეს კითხვეფ ქუდუსვით დო შურდოგურით ქუმურჩქილეთ, ნამდა ქიგეგათ, მუ უჭირს თის. ქეცადით, თიშ ადგილს წერმიდგინათ თქვან დუდ. რდათ მეგობრულ დო გავითარით ხოლოშიან ურთიერთობა და დო ჯიმალეფწკუმა. ვაგგოჭყორდან მიზანქ: რჩევა ხვალე ჯგირ ოკო ვა რდასინ, თიქ პიროვნებას ადვილ მიოღებელქ ოკო აჸუას დო მუჰამუას თიშ გურს (იგავ. 27:9).