1. Eeghe emạ eegharạ kụ edị awe phọ aZihova omhoọgh?

 SIẠ dị mebia epẹ omhạn, aBaibul phọ aḅẹm mọ awe phọ Enhaạn “komiteom ni siloor r’ophooph olhoghi” oḍighi oḍighi phọ aZihova eeḍiạn iiḅakiọm Oọny phọ odị. (Ps. 110:3) Imiịn phọ ipẹ phọ ekạr kụ remunughan rodon. Torobọ alhạ, awe phọ aZihova r’oophugh rosighẹ ghan ni rukuron irubal awạ koghaaphọm iiḅi iinhaghạn phọ. Ro/kpaariọm ghan bidị kụ ro/kpẹ ghan kẹn ikpoki. Bidị rolọgh ghan kẹn mem obakị abuḅaramạ omheeraam mọ abidị eten iphulhupul, r’eten aruwaloor, ḅilhẹ r’okparamhị abidị. Abumor dị ophạm iiḍighi rolọgh ghan ni muboom amem ookolhobian asaimẹnt dị ongọ bidị ḅilhẹ r’oghị okparamhị omheeraam abumor r’abumarani phọ. Eeghe kụ renyu ghan we phọ aZihova oḍighi oomo iphẹn phọ? Ephomhoghiạn—ephomhoghiạn aZihova r’awe.—Mat. 22:37-39.

2. Odaphạn iphẹn edi bọ Rom 15:1-3, eeghe emạ eḍeenhaan kụ edị aZizọs aphighi?

² AZizọs akạr apighi eḍeenhaan dị egbatanhaạn esi owạ ghan imạ ilọ abunhọn opuemhi ilọ odị. Yira rokparaghạ ghan ni oḍighi oomo ipẹ yira kotue bọ odaphạn igbaranuọm aruwol phọ odị. (Bạl Rom 15:1-3.) Asuọ odianhaan ghan ni buphẹ rotuughaạny bọ nyodị. AZizọs aḅẹm mọ: “Ibo k’Enaạn edianaan buphẹ rongọ bọ epu buphẹ roboọr bọ.”—Iiḍighi 20:35.

3. Yira kooḅeghiọn eeghe siẹn emhuoghaạph phọ ephẹn phọ?

³ Siẹn emhuoghaạph phọ ephẹn phọ, yira kootughianhạm siloor ilọ iniin arikiạ dị aZizọs aphinyọn okumu ongọ abunhọn,  kụ yira oḅilhẹ ooḅeghiọn idị yira kotue otuughaạny aani nyodị. Yira kooḅeghiọn kẹn ipẹ yira kotue bọ obughẹ eephuạ okumu ghan ongọ abunhọn.

4. Ika kụ idị aZizọs asighẹ imạ ilọ abunhọn apuemhi ilọ odị?

⁴ AZizọs alhoghonhaạn ghan ḍighaạgh bunhọn ghalhamọ r’amem dị aloor odị medugh. Tuutughiạn ipẹ aZizọs azọ bọ mem mọ aḍita awe phọ oghị bọ epẹ ogbạl eeḅarạph phọ oteẹny nyodị, esi dị eeni etuman Kapaniọm. Oomo adulhe phọ aZizọs arọl iiḅereghị. Kụ eeni aloor odị ikạr kụ edugh, kuolọ mem mọ odị amhiịn bọ ḍita phọ, odị aseenyạn ni rukulhom mọ r’abuẹn u/moon bọ. Odị oo/konhom bidị bịn, odị angoọm oghaạph ogbo dị ratir ghan ni we k’aḍio arodon—Oghaạph Anyụ Eeḅarạph phọ.—Luk 6:12-20.

5. Ika kụ idị abuḍiemhiom eghunotu rotuughaạny Zizọs osighẹ aloor ophighironhọm ekiạ mem dị asiloor medugh?

⁵ Idị abuḍiemhiom eghunotu rotuughaạny Zizọs. Gbiom olhoghi oḍiemhiom eghunotu dị purukụ arigheel rukumuan, kụ aloor medugh. Eeni odị rawạ ni oḅoton Iiseeny Eghunotu phọ moseere bọ dulhe phọ, kuolọ odị alhọm aZihova inyaạm ophamhạm ituughạ phọ. AZihova aphagharanhaạn ni iiḅereghị phọ, kụ ophạm ituughạ phọ. Ibạm anmụny phọ utuughạ ni ephigh iyaạr dulhe phọ aḍiphẹ phọ, mọ odẹ r’onhiin phọ abidị osighẹ raraạr aruwaloor oḍighi eḅẹl.

6. Ngọ eḍeenhaan idị aZizọs asighẹ mem odị alhoghonhaạn ḍighaạgh bunhọn.

⁶ AZizọs o/kaaghọm mem mọ odị. Gbiom olhoghi idị aZizọs alhoghoma mem mọ osoph bọ emhụ oyaghirị phọ odị Jọn Oḍiinyeom Muụm mọ. Odị akạr kụ akururu. ABaibul phọ aḅẹm mọ: “Mem dị aJizọs anaghạn bọ [ilọ aḍuugh phọ aJọn], ogina odị aḍigh oghuugh aḍuạ aghị ekpisi dị enamian.” (Mat. 14:10-13) Yira onaghanhạn ni iyaạr phọ eḍighi bọ kụ ogina odị awạ bọ oghị esi dị enamian. Ibadị ayira romoghi ghan esi ibooghiạn. Ipẹ kụ idị aZizọs awạ ni oḍighi, kuolọ i/ḅọph. Aḍiboom aḍita awe kụ uphụr osi nyodị epẹ dị rakị bọ. AZizọs azọ ika? Odị aatughiạn ghụn iiḅaghamhị awe phọ, “kụ odị amoọgh igbiririph abidị.” Odị arọph ni amhiịn mọ  awe phọ omoghi olhoghonhaạn aḍighaạgh eten aruwaloor, kụ aagborion aḍighi ipẹ phọ angọ. Okạr oghaạph, “odị amiigh otughemị abidị [ki/yạl ikpo araraạr, kuolọ] iminighạn araraạr.”—Mạk 6:31-34; Luk 9:10, 11.

7-8. Ngọ eḍeenhaan idị ikumor awe phọ uphomhoghiạn bọ iyira rotuughaạny ghan Zizọs mem lọ oye amhoghi olhoghonhaạn aḍighaạgh.

⁷ Idị ikumor awe dị omhoọgh ephomhoghiạn rotuughaạny Zizọs. Yira okạr kụ rosereghiạn rukumuan phọ ikumor awe phọ oghol bọ emhụ ayira rokumuan! Iniin iiḍighi phọ abidị abumor r’abumarani phọ ro/miịn aani ghan. Esi omaạm, e/moon esuom oye, abumor phọ odi bọ Hospital Liaison Committee phọ roogborion ghan ni kolhoghonhaạn ḍighaạgh umor obobọ umarani phọ. Ibadị amem aloor resuom ghan ni oye ogbo aḍughul! Kụ loor esi igbiririph abumor r’abumarani phọ odi bọ esi iiḅaghamhị phọ, ikumor awe phọ abuẹn phọ r’arughunotu phọ abidị rowạ ghan ni imạ ilọ abumor r’abumarani phọ kopuemhi ilọ abidị.

⁸ Ikumor awe phọ roḍighom ghan kẹn odoghoḍi aKindọm Họl r’inhọn aruutu ookpomhoghan phọ, oḅilhẹ kẹn rologhonhaạn ghan ḍighaạgh ekpisi dị ekperenhom iiḅaghamhị emite. Bidị rolọgh ghan kẹn muboom amem otughemhị, okparamhị ayira, ḅilhẹ r’obakị ayira. Ekpẹ ni dị yira kosẹph bumor phọ abuẹn phọ r’arughunotu phọ abidị. AZihova asẹph ni bidị esi uwaloor osighẹ aloor ophighironhọm ekiạ phọ abidị! Kuolọ, idiphọ abueriphọ awe phọ, ewạ ni mọ ikumor awe phọ oolemhi ghan raraạr. Bidị ku/lọgh ghan muboom amem oḍighi araraạr ookpomhoghan phọ, dị tutụ bidị u/moọgh mun mem ophoghom eghunotu abidị.

9. Odaphạn Filipai 2:4, 5, eghẹn odọ eegharạ kụ edị oomo aKristẹn kooneghị?

⁹ Bạl Filipai 2:4, 5. Etu ni inẹ mọ k/oomo ayira kụ ikumor awe, kuolọ yira kotue ni otuughaạny eegharạ osighẹ aloor ophighironhọm ekiạ phọ aZizọs. ABaibul phọ aḅẹm mọ odị “asoor dọl ebenẹ.” (Fil. 2:7) Yira otuughạ eeghe siẹn ikpo onhụ phọ iphẹn phọ? Oomo amem, ogey ebenhẹ rawạ ghan oḍighi idị keḅeraạn odẹ otu phọ odị. Idiphọ ebenhẹ aZihova r’abumor phọ, iikia i/lo, nạ rawạ ni mọ aZihova ḅilhẹ r’abumor phọ osighẹ nyinhạ oḍighinhom. Oḍighi idị ipẹ phọ kedugh, pọ nạ atue ni aḍighi iphẹn kogọ bọ siẹn.

10. Ighẹn asipuru kụ edị yira kopuruan siloor?

¹⁰ Ḅeeḅeghiọn eegharạ phọ anạ. Puruan loor mọ: ‘Mị aakolhobian asi k’iḍighen ophinyọn arikiạ pidị mị aloghonhaạn bunhọn ḍighaạgh? Esi omaạm, mị kamegheron ika eru maạr lọ uḅenhị imhị oghị ophogh onyọ umor dị asiạ meghị kụ odi esi dị ropogh ghan we lọ mokpọ, obobọ osaạny okumor anhịr oghimọm ituughạ? Mị raagborion ghan ni kamiteom loor oghị ogbuurogh esi dị kopạm ookpomhoghan eephugh obobọ oḅaalhamhị aKindọm Họl?’ Olhoghi aZihova raḅaạl ghan ni mem dị yira osighẹ mem r’araraạr emhoọgh ayira olhoghonhaạn ḍighaạgh bunhọn eten dị iyira u/kpaariọm, loor esi dị oḅọgh aloor ayira ongọ aZihova eḅarạm ni oḍighi iphẹn phọ. Eru maạr dị yira omhiịn mọ emoghi oḍighi obughẹ gạ phọ ophọn phọ, yira koḍighi ika?

11. Ika kụ idị iiḅereghị kilhoghonhaạn iyira ḍighaạgh ooneghị eegharạ osighẹ aloor ophighironhọm ekiạ?

¹¹ Zu ekpom anạ angọ aZihova. Kokaạph ika, eḍighi maạr dị nạ alhoghoma mọ eten phọ epẹ nạ raloghonhaạn ghan bọ ḍighaạgh bunhọn esughanham ni, kuolọ nyinhạ i/nyu oḍighi obughẹ? Eru idiphọ, pọ teẹny aZihova esi iiḅereghị. Kụ azu oomo ekpom anạ. Ḅenhị aZihova ipẹ nạ alhoghoma bọ, kụ alhọm nyodị olhoghonhaạn aḍighaạgh pidị nạ ‘awạ ḅilhẹ kẹn aḍighi’.—Fil. 2:13.

12. Iḍoọgh alhephiri anmụny dị moḍiiny muụm kologhonhaạn ḍighaạgh ika ookpomhoghan phọ?

¹² Eru maạr dị nạ aḍighi oḍoọgh olhephiri oọny dị maḍiiny muụm, pọ lọm aZihova alhoghonhaạn nyinhạ ḍighaạgh omhoọgh aḍiḅeraạn obughẹ arukumuan phọ anạ siẹn ookpomhoghan phọ. Ibadị arere, ikumor awe kupu budị rologhonhaạn ghan ḍighaạgh ikumor awe phọ, kụ ibadị abuẹn phọ asiạ meghị ni. Kụ iduọn arookpomhoghan phọ rebụgh bọ, ekạr emoghi lhephiri anmụny ophogh awe phọ aZihova. Eru maạr lọ nạ amhoọgh ni ḍiḅeraạn okumuan atorobọ eten, pọ nạ kamoọgh ni oḅaạl olhoghi. Eeghe kụ iḍighi? Loor esi dị eḅeraạn aZihova, kụ nạ kamoọgh kẹn ni ḍigey aḍien, ḅilhẹ r’ogbaanyạn iduọn nạ raloghonhaạn bọ ḍighaạgh bunhọn.

13-14. Ighẹn araraạr kụ edị yira kotue oḍighi olhoghonhaạn aḍighaạgh bumor r’abumarani phọ ayira? (Miịn afoto oḅẹl opoḍi phọ.)

¹³ Wạ ghan roopoogh olhoghonhaạn aḍighaạgh bunhọn. Otelhedom mọ Pọl aromha buọ aHibru phọ mọ: “Ke/bulamaam ghan oḍighi iiḅi, ḅilẹ Iọ oniin kaloghonaạn ghan nyoniin ḍighaạgh, idị eḍighi bọ iphẹn kụ arikiạ dị reḅaạl ghan ologhi Enaạn.” (Hib. 13:16) Oromha phọ akạr kụ akpeanhaạn! Bidị oteẹny bọ ḍinyạ phọ, i/bia bịn aKristẹn phọ orọl bọ Judia owilhẹ rutu, siḍighi, r’asiya abidị dị u/ḅọph omheeraam r’abidị “oghiil ogheel epẹ araaḅarạph phọ.” (Mat. 24:16) Mem mọ amuphẹ phọ ikạr kụ ekpaariọm mọ oniin alhoghonhaạn ḍighaạgh nyoniin. Eru maạr lọ bidị odạph ghan ni oromha phọ aPọl epẹ omhạn ilọ olhoghonhaạn ghan aḍighaạgh bunhọn, pọ ke/kparanhaạn bidị oḍighi iduọn phọ siẹn aḍimhoom adọl phọ bidị osoman bọ.

 ¹⁴ Eeni abumor r’abumarani phọ ayira ko/gbor ghan uḅenhị iyira raraạr dị reeḅaghamhị bidị. Esi omaạm, olom dị anhịr amhugh katue ni aatughiạn m’onọ kuleti iyira dool bịn akiilhaan oḅenhị ayira m’onọ amoghi ni eḍien, ikpoki okoọm eten, obobọ raraạr dị amhoọgh oḍighi olhoghotu. Kuolọ odị kakạr kụ asereghiạn eru maạr dị yira bịn kụ omiteom raraạr phọ ipẹ rawạ bọ bịn ongọ. Yira ku/sighenhọm ghan mọ araraạr kekị ni imạ obobọ mọ opọ amhoghi bọ olhoghonhaạn aḍighaạgh phọ kụ kuḅenhị ghan iyira esi lọ ewạ olhọgh aḍighaạgh. Puruan loor mọ, ‘Eḍighi maạr dị mị kụ odi dọl phọ aḍiẹn phọ, oghẹn olhoghonhaạn aḍighaạgh kụ edị mị kawạ?’

15. Orue olhoghonhaạn aḍighaạgh bunhọn ewạ mọ oḍighi ika?

¹⁵ Dugh oḅaanhaạn. Iikia i/lo, nạ alegheri ni bumor r’abumarani siphẹ ookpomhoghan phọ anyinha dị ookolhobian oomo amem olhoghonhaạn aḍighaạgh bunhọn. Bidị ro/ḍighi ghan idị yira kologhoma mọ yira oḍighi dool. Yira kotue ni oteẹny bidị torobọ amem dị yira omhoọgh iiḅaghamhị, kụ riḅeraạn ghan ni iyira otuughaạny abidị! Alan, okumor oye dị mamhạn 45 asiạ, awạ ni oḍighi oye dị adugh oḅaanhaạn. Alan aghaạph ilọ eḍeenhaan aZizọs mọ: “AZizọs phọ o/mhoọgh ghan eepoogh, kuolọ awe atorobọ oki ughị ghan ni oteẹny nyodị kụ u/moọgh ghan oghiilhaan opuru odị olhoghonhaạn aḍighaạgh. Bidị ulhegheriom nyodị idiphọ oye dị amhoọgh ḍiḅeraạn abunhọn. R’oomo ekpom mị rawạ ni oghịgh aani aZizọs pidị ulhegheriom imhị idiphọ oye dị adugh oḅaanhaạn, amhoọgh eenyuụm, ḅilhẹ amhoọgh ogbolhomaam.”

16. Ika kụ idị osighẹ oḍighinhom aPsalm 119:59, 60 kilhoghonhaạn iyira ḍighaạgh odạph eḍeenhaan phọ aZizọs?

¹⁶ Ku/ḅonyonhu uzuan eḍighi maạr dị yira  u/tue utuughaạny Zizọs eten dị emhunhughan. (Jems. 3:2) Oọny otu ka/tue aḍighi okạr ipẹ odẹ otu phọ raḍighi ghan bọ. Kuolọ eḍighi maạr dị oọny otu phọ apiọm kụ aalemhi ghan ni, aḅilhẹ akparaghạ otuughaạny odẹ otu phọ odị, pọ iiḍighi phọ odị kekuạ aani ni. Igina phọ kẹn, eḍighi maạr dị yira osighẹ oḍighinhom ilọ yira otuughạ mem ituughạ aBaibul ogina ayira, kụ oḍighi oomo ilọ yira kotue oolemhi ariisi dị yira odugh, pọ yira komoọgh ni ekol odạph eḍeenhaan phọ aZizọs.—Bạl Psalm 119:59, 60.

17-18. Eeghe asuọ kụ edị yira komoọgh iduọn yira rotuughaạny bọ eegharạ osighẹ aloor ophighironhọm ekiạ phọ aZizọs?

¹⁷ Yira osighẹ loor ophighironhọm ekiạ renyu aani ghan ni bunhọn oḍighi igina phọ. Okumor oye dị oghol mọ Tim aḅẹm mọ: “Yoor omoọgh iḍoọgh abumor dị osianhaan kụ momạ idiphọ abulọgh ḍighaạgh ikumor awe phọ, abuniin k’amem dị asiạ phọ eghom. Iphẹn phọ idugh loor esi dị bidị umhiịn ghan idị abunhọn olhoghonhaạn ghan ḍighaạgh bumor r’ophooph olhoghi, kụ owạ ghan otuughaạny abidị. Omiteom aloor phọ abidị reloghonhaạn ni ḍighaạgh ookpomhoghan phọ ayoor ḅilhẹ r’ikumor awe phọ.”

¹⁸ Yira odi aḅirinhi dị ibadị awe rowạ ghan imạ ilọ aloor. Kuolọ awe phọ aZihova okạr kụ ogbatanhaạn. Uwaloor osighẹ aloor ophighironhọm ekiạ phọ aZizọs amhoọgh bọ akạr kuḅeraạn iyira, pọ kụ iyaạr phọ yira osopha bọ otuughaạny odị. Ke/dugh odạph eḍeenhaan phọ odị eten dị emhunhughan, kuolọ yira kotue ni okparaghạ odạph “igbaranuọm aruwol phọ odị.” (1 Pit. 2:21) Iduọn yira rokparaghạ bọ otuughaạny eegharạ osighẹ aloor ophighironhọm ekiạ phọ aZizọs, olhoghi ayira kaḅaạl li loor esi dị yira roḍighi ni idị eḅeraạn aZihova.