1. Cwiny maber ango ma jo pa Jehovah gitye kwede?

BAIBUL otito wacon ni jo pa Lubanga “gibimine kengi” i tic pa Jehovah kun gilubo tira pa Yecu. (Jab. 110:3) Labongo akalakala mo, lok pa lanebi man tye ka cobbe i kare-ni. Mwaka ki mwaka, lutic pa Jehovah gitye ka tic ki mit kom kun gitero cawa milion mapol i tic me tito kwena. Gitiyo tic man pien gimito, dok pe kiculogi cente mo iye. Gikwanyo kare bene me diyo cwiny omege ki lumege dok gikonyogi i yo me kom ki i yo me cwiny. Luelda ki lukony kor tic gitero cawa mapol adada ka yubo pwonygi ki limo omege ki lumege me cuko cwinygi. Gin ango ma tugo cwinygi me tiyo tic man? Obedo mar—mar pi Jehovah ki mar pi luwotgi.—Mat. 22:37-39.

2. Kit ma kitito kwede i Jo Roma 15:1-3, lanen ango ma Yecu oweko?

² Yecu oweko lanen maber loyo me keto pi miti pa jo mukene mukwongo me kaka mege. Watye ka tute matek me lubo lanenne. (Kwan Jo Roma 15:1-3.) Jo ma gilubo lanenne ginongo adwogi maber. Yecu owaco ni: “Miyo mot kelo gum [yomcwiny] makato gamo agama.”—Tic 20:35.

3. Gin ango ma wabinyamo i pwony man?

³ I pwony man, wabinyamo wiye wiye jami mogo ma Yecu otimo me konyo jo mukene dok wabinyamo kit ma watwero lubo kwede lanenne. Wabinyamo bene kit ma watwero dongo kwede mitiwa me tic pi jo mukene.

4. Yecu oketo miti pa jo mukene obedo mukwongo me kaka mege nining?

⁴Yecu okonyo jo mukene kadi bed en onongo ool. Tam kong i kom gin ma Yecu otimo i kare ma lwak dano mapol gubino bote i nget got mo ma nen calo cok ki Kapernaum. Yecu onongo obedo ka lega i dyewor lung. Nen calo en onongo ool adada, ento i kare ma en oneno lwak magi, kica omake i kom lucan kacel ki jo ma komgi lit ma tye i kingi. En pe ocangogi keken ento bene omiyo pwony ma tye me cuko cwiny loyo ducu, ma kilwongo ni Pwony me Wi Got.—Luka 6:12-20.

5. Luwi odi gitye ka lubo lanen pa Yecu me nyuto mar nining ka guol?

⁵Kit ma luwi odi gitye ka lubo kwede lanen pa Yecu. Tam kong i kom labol man: I nge tic matek i gang tic, lawi ot oo gange ma ool adada. Kadi bed ni en mito ngolo yubgi me Woro pi Jo me Ot i otyeno meno, en olego Jehovah wek omine kero me doro yub man. Jehovah ogamo legane, dok en okwano kacel ki jo me ode kit ma en timo kwede cabit ki cabit. Lutinone gunongo pwony mo ma pire tek adada i otyeno meno, gupwonyo ni jami me cwiny bedo mukwongo i kwo pa lunyodogi.

6. Mi labol ma nyuto kit ma Yecu otiyo ki cawane me konyo jo mukene.

⁶Yecu onongo kwanyo kare me bedo ki jo mukene kadi bed en onongo mito bedo kene. Tika itwero goyo i wi kit ma Yecu owinyo kwede i kare ma oniang ni kingolo ngut lareme Jon Labatija? Cwiny Yecu nen calo otur adada. Baibul waco ni: “Ka Yecu owinyo lok man, ci oa woko ki kunnu, owoto ki yeya ocito i kabedo ka ma dano pe iye kaikene.” (Mat. 14:10-13) Watwero niang pingo Yecu onongo mito bedo kakene. Jo mogo ginongo ni ber ka gikumo ka kengi. Ento pe otwere ki Yecu me bedo kakene. Lwak dano mapol gukwongo o i kabedo meno ma Yecu peya oo. Yecu odok iye nining? En otamo i kom miti pa lwak meno, dok “kica ocako make” i komgi. En onongo twero neno ni gitye ki miti madwong adada me nongo cuko cwiny ki bot Lubanga, pi meno Yecu ocako konyogi oyotoyot.  Ki lok ada, en “opwonyogi ki lok mapol.”—Mar. 6:31-34; Luka 9:10, 11.

7-8. Mi labol ma nyuto kit ma luelda ma lumar gilubo kwede lanen pa Yecu ka ngat mo mito kony i kacokke.

⁷Kit ma luelda ma lumar gilubo kwede lanen pa Yecu. Watye ki pwoc madit adada pi tic ma lueldawa gitimo piwa! Pol pa tic magi jo me kacokke pe gineno. Me labolle, ka ngat mo me kacokke ocako two atura, lumemba me Komitti ma Kubu kin Lucaden ki Ludaktari gikonyo omegigi ki lumegigi oyotoyot. Pol kare peko me two magi timme i dyewor! Ento pi cwiny me kica ma gitye kwede i kom omingi nyo lamingi ma kome lit-ti, luelda magi kacel ki jo me ganggi giketo miti pa utmegigi mukwongo me kaka meggi.

⁸ Luelda bene ginywako i yub me gero Odi me Ker ki gedo mogo ma watiyo kwedgi me worowa kacel ki miyo kony ka ma can ma poto atura otimme iye. Dok gitero cawa malac adada ka pwonyowa ki cuko cwinywa. Omege magi ducu kacel ki jo me gangigi gupore me nongo pwocwa. Walego ni Jehovah ogo laane i komgi pi cwiny me jalle ken ma ginyuto! Ngene kene ni, calo wan ducu, luelda omyero gupok cawagi marom rom ka tiyo tic magi. Pe omyero guter cawa mukato kare woko ka tiyo tic me kacokke ma weko pe gibedo ki kare me miyo jami ma mitte pi jo me gangigi.

9. Ma lubbe ki Jo Pilipi 2:4, 5, kodi cwiny ango ma myero Lukricitayo ducu gudong?

⁹ Kwan Jo Pilipi 2:4, 5. Pe luelda keken ento wan ducu omyero walub lanen  pa Yecu me nyuto cwiny me jalle ken. Baibul tito ni en “okwanyo kit me opii.” (Pil. 2:7) Tam kong gin ma watwero pwonyo ki i tyeng meno. Latic nyo opii ma kimaro, pol kare yenyo yo me yomo cwiny laditte. Macalo latic pa Jehovah ki pa utmegini, labongo akalakala mo imito ni ibed me kony bot Jehovah kacel ki luye luwoti. Itwero timo man ki lubo tam ma kimiyo kany.

10. Lapeny mapatpat ango ma omyero wapennye kwede kekenwa?

¹⁰Tam i kom cwiny ma itye kwede. Pennye kekeni ki lapeny magi: ‘An tika atye atera me miyo cawana ki kerona me konyo jo mukene? Me labolle, abitimo gin ango ka kilega ni alim omego mo ma oteggi i gange nyo ni abed ka tero lamego mo ma otii i cokke? Tika atye atera me miyo kony ka mitte ni dano gujalle me yubo lengo me ka gure madit nyo me roco ka ma oballe i Ot me Ker?’ Cwiny Jehovah bedo yom adada ka wamiyo cawawa ki jamiwa me kom, pien jami magi ducu nongo wadyerogi bote me konyo jo mukene. Ka waneno ni tye ka mo ma omyero wayubbi, ngo ma watwero timone?

11. Lega twero konyowa me dongo cwiny me jalle kenwa nining?

¹¹Leg ki cwinyi ducu bot Jehovah. Ket kong ni iniang ni omyero itim alokaloka ka mo i kwoni, ento ipe ki miti me timo alokaloka man. Ka tye kit meno, leg bot Jehovah ki cwinyi ducu. Tite lok ada ma i cwinyi. Tite kit ma iwinyo kwede kikome, dok ilege ni omini “miti ki teko me tic.”—Pil. 2:13.

12. Omege matino ma gunongo batija gitwero konyo dul pa Jehovah nining?

¹² Ka itye omego ma onongo batija dok mwakani pud tidi, leg Jehovah wek okonyi idong cwiny me konyo omege ki lumege ma i kacokke. I lobe mukene, wel luelda dwong kato lukony kor tic, dok pol pa lukony kor tic magi gubedo jo madito. Ka wel dano ma i dulwa woto ki medde, wamito omege matino mapol ma gitwero konyo luelda ki gwoko omege ki lumege ma i kacokke. Ka itye atera me tic ka mo keken ma kimiti iye, ibibedo ki yomcwiny madit adada. Pingo? Pien ibiyomo cwiny Jehovah matek, omege gibineno ni itye atera me konyo jo mukene, dok ibibedo ki yomcwiny ma bino pi konyo jo mukene.

13-14. Gin ango ma watwero timone me konyo omegiwa ki lumegiwa? (Nen cal ma tye i pok ngeye.)

¹³Bed ma wangi bit me neno ngat ma mito kony. Lakwena Paulo ocoyo waraga bot Lukricitayo ma Luibru kun cikogi ni: “Pe myero wiwu owil ka timo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubanga.” (Ibru 13:16) Meno onongo obedo tam maber adada! Ma pe orii i nge nongo waraga man, onongo mitte ni Lukricitayo magi gua woko ki i gangigi, guwek biacaragi, kacel ki wadigi ma pe gitye luye dok “guring woko i wi godi.” (Mat. 24:16) I kare meno, onongo pire tek adada ni gukonnye i kingi. Ka onongo gubedo ka keto i tic tira ma Paulo ominigi me nywako jamigi ki jo mukene ma peya guringo ki i Judaya, ci onongo gibinongo ni yot me ngiyo ki kwo manyen man.

¹⁴ Omegiwa ki lumegiwa pol kare pe gititiwa pekogi. Me labolle, ket kong ni dako pa omego mo oto woko. Tika ominwa-ni mito kony me nongo  ginacama, giwot, nyo tiyo tic mogo me gang? I kare mogo en pe twero penyo pi kony pien nongo pe mito yelowa. Ento en twero bedo ki pwoc madit adada ka wan wakwanyo kare me mine kony ma en mito. Pe omyero watam ni ngat mo mukene aye bimine kony nyo ni en bititiwa ni emito kony. Pennye kekeni ni, ‘Ka onongo obed an kono, kony mene ma onongo abibedo ki pwoc pire ka kimina?’

15. Gin ango ma omyero watim ka wamito ni wakony jo mukene?

¹⁵Wek obed yot ki jo mukene me penyi pi kony. Labongo akalakala mo, ingeyo omege ki lumege ma i kacokke ma kare ducu nongo gitye atera me konyo jo ma gimito kony. Pe giweko wawinyo calo watye ka yelogi. Wangeyo maber ni watwero jenge i komgi ka peko mo tye dok wan bene wamito ni wabed calo gin! Alan, ma tye laelda dok tye i kine ka mwaka 40, mito bedo ngat ma lok kwede yot. Alan oloko kit man i kom lanen pa Yecu: “Yecu onongo tye ki tic mapol, ento dano ducu ma mwakagi patpat onongo gimare dok gibedo agonya me penye pi kony. Gin onongo gingeyo maber ni Yecu paro pigi. An bene amito ni abed calo Yecu dok amito ni kinena macalo ngat ma lok kwede yot, dok larem ma paro pi jo mukene.”

16. Keto i tic pwony ma i Jabuli 119:59, 60 konyowa nining me lubo lanen pa Yecu macok?

¹⁶ Cwinywa pe myero otur tutwal ka pe walubo lanen pa Yecu kore ki kore. (Yak. 3:2) Latin kwan ma tye ka pwonyo goyo cal pe twero goyo cal calo lapwonye. Ento ka latin man woto ki nongo pwony ki i balle matinotino kun bene tute me lubo lanen pa lapwonye macok, ci en bidongo dirone me goyo cal. I yo acel-lu, ka waketo i tic pwony ma wanongo ki i kwano Baibul piwa kenwa, kun watute ki kerowa ducu me juko timo gin marac, ci wan bene wabilubo macok lanen ma Yecu owekiwa.—Kwan Jabuli 119:59, 60.

17-18. Ka wawoto ki lubo lanen pa Yecu me jalle ken, adwogi maber ango ma wabinongo?

¹⁷ Ka watye atera me miyo kony, man bene tugo cwiny jo mukene me miyo kony. Laelda mo ma nyinge Tim owaco ni: “Watye ki omege matino ma gudongo i yo me cwiny dok kicimogi me tic macalo lukony kor tic. Mogo kicimogi ma pud mwakagi tidi adada pien guneno cwiny me konyo jo mukene ma jo mogo gunyuto dok gin bene onongo gimito bedo calo jo magi. Omege magi matino gikonyo kacokke adada dok gikonyo luelda matek.”

¹⁸ Jo mapol i lobo i kare-ni giparo pigi kengi. Ento jo pa Jehovah pe gitye kit meno. Cwiny me jalle ken ma Yecu onyuto ogudowa adada dok wamoko tamwa me lubo lanenne. Pe watwero lubo lanenne kore ki kore, ento watwero ‘lubo lanenne macok.’ (1 Pet. 2:21) Ka watute ki kerowa ducu me lubo lanen pa Yecu, wabibedo ki yomcwiny pien nongo watye ka yomo cwiny Jehovah.