1. Иегова Кудайдыҥ ишчилери кандый кӱӱн-санаалу иштегилеп јат?

 КАНЧА муҥ јыл кайра Агару Бичикте Кудайдыҥ албатызы «бойын берерге белен» болор деп судур бичилген. Бу судурла болзо, олор Иегова ла Иисустыҥ башкарузына багынып иштегилер (Сар. 110:3). Бӱгӱнги кӱнде бу судурдыҥ канайып бӱдӱп турганын бойыстыҥ кӧзисле кӧрӱп јадыс. Кажы ла јыл Кудайдыҥ ишчилери канча јӱс миллион саат јарлаар ишке берет. Олор бу иш учун акча албай, акту кӱӱнинеҥ иштенет. Онойдо ок ака-эјелер бой-бойына акча-манатла, эмоционально ло кӧгӱс јанынаҥ болужат. А акалардыҥ куучын-эрмектер белетеерине, кӱдӱчиниҥ ижине ле туштажуларга белетенерине берип турган ӧйи чотко до кирбей јат! Олор бу ишти Кудайды ла јуугын сӱӱп турганынаҥ улам эдет (Матф. 22:37—39).

2. Бис Иисустаҥ кандый тем аларыс? (Римдегилерге 15:1—3).

² Иисус улусты сананып, олорго болужары јанынаҥ сӱреен јакшы тем кӧргӱскен. Бис канча кире аргабыс бар Иисустаҥ тем аладыс. (Римдегилерге 15:1—3 кычырыгар.) Иисустый кӱӱн-санаалу јӱрзе, тузазы сӱреен кӧп. Нениҥ учун дезе Иисус бойы да айткан: «Алып турганы эмес, берип турганы оноҥ артык кежиктӱ» (Ап. ижи 20:35).

3. Бу јӧрмӧлдӧ нени кӧрӧрис?

³ Бис бу јӧрмӧлдӧҥ Иисус бойын сананбай, улуска канайып болушканын кӧрӧрис. Анайда ок бис оноҥ кандый тем аларысты билип аларыс, бого коштой улуска  болужар кӱӱн келзин деп нени эдерин кӧрӧрис.

4. Иисус арып-чылап та каларда нени эткен?

⁴ Иисус арып-чылап та каларда улуска болушкан. Бир катап кырдыҥ эдегинде коркышту кӧп улус јуулышкан. Бу учурал дезе Капернаумныҥ јанында болгон. Мынаҥ озо Иисус тӱниле мӱргӱген. Ол арып-чылап та калган, је андый да болзо, ал-камык јуулып келген улусты кӧрӧлӧ, ичи ачып, олордыҥ оору-јоболдузын јазып, јаан учурлу куучын-эрмек айткан (Лука 6:12—20). Агару Бичикте Иисустыҥ бу айткан куучын-эрмеги Кырдагы куучын деп адалып јат.

5. Билениҥ бажы арып-чылап та калган болзо, Иисустаҥ кандый тем алат?

⁵ Билениҥ бажы Иисустаҥ тем алат. Бу мындый учурал бистиҥ кажыбыска ла таныш болбой. Билениҥ бажы кере тӱжине иштенеле, арып-чылап калган айылына јанып келген. Је бу эҥирде ого билелик бажырыш ӧткӱрер керек. Је ол сананар болор: «Бӱгӱн бажырышты ӧткӱрбезе де кем јок, ӧскӧ кӱнге кӧчӱрип салза кайдар?» Кандый да болзо, ол Иеговага мӱргӱп, ийде-кӱч сураган. Анайып ол билелик бажырышты јакшы ӧткӱрип салат. Бу учурал балдарга да јаан ӱредӱ болгон, нениҥ учун дезе билениҥ бажы кӧгӱс керектерди баштапкы јерге тургускан.

6. Иисус бойыныҥ ӧйин кысканбаган деп, кандый учурал кӧргӱзет?

⁶ Иисус: «Менде бош јок» — деп, бир де айтпайтан. Крестеечи Иоаннды ӧлтӱрип салган деп уккан кийнинде, Иисус кемеге отурып, улус јок јерге барган (Матф. 14:10—13). Бис те ондый айалгада болуп калган болзоос, јаҥыскан болор кӱӱнис келер эди. Је ол ары једип барарда, кӧп улус оны сакып турды. Иисус олорды кӧрӧлӧ канайтты? Олорго кыртыштанып-эштебеди, карын олорго кӧгӱс јанынаҥ болуш керек деп оҥдогон. Оныҥ учун «кӧп улусты кӧрӧлӧ... ичи ачыды», олорды бир-эки чындыкка эмес, је «кӧпкӧ ӱредип баштады» (Марк 6:31—34; Лука 9:10, 11).

7, 8. Јуунда ака-эјелерге болуш керек болзо, аксагалдар Иисустаҥ кандый тем алат?

 ⁷ Аксагалдар Иисустаҥ тем алып јадылар. Кару бистиҥ аксагалдарыс, слердиҥ эдип турган јаан ижеер учун бис быйанысты айдып јадыс. Слердиҥ ижеердиҥ кезиги кӧскӧ кӧрӱнбей де јат. Темдектезе, ака-эјелерге медицинский болуш керек болзо, больницаларла колбожор комитеттиҥ аксагалдары болужарга белен болуп јат. Мындый учуралдар тӱнде де болордоҥ айабас. Оныҥ учун бистиҥ аксагалдарыс бойыныҥ да, билезиниҥ де керектерин туура јылдырала, ака-эјелерге болужарга белен болгылайт.

⁸ Анайда ок бу акалар теократиялык туралар тударында болужып јат, ар-бӱткенниҥ тӱбегине тӱшкен ака-эјелерге болужын јетирет, бого коштой ака-эјелерди ӱредет, олордыҥ кӱӱнин кӧдӱрет. Сананып ийзеер де, олор бойыныҥ ӧйин кысканбай, кандый кӧп иш эдип јат! Бис слерге јаан быйанысты айдып јадыс. Иегова слерди ле слердиҥ билегерди оноҥ ло ары алказын. Је кандый да болзо, аксагалдарга бойыныҥ билези туура јадып калбазын деп, ајарыҥкай ла ойгор болор керек.

9. Филиппыдагыларга 2:4, 5-ле болзо, бистиҥ кажыбыста ла кандый кӧрӱм болор керек?

⁹ Филиппыдагыларга 2:4, 5 кычырыгар. Иисустыҥ теми јӱк ле аксагалдарга эмес, је бистиҥ ончобыска тузалу болуп јат. Агару Бичикте Иисус керегинде  мынайып айдылган: «Кулдыҥ бӱткен бӱдӱмин алынган» (Флп. 2:7). Бу сӧстӧр бисти неге ӱредет? Канайып кул кижи бийине багынып јат, анайып ла бис Иегованыҥ кулдары болгоныста, Иисустаҥ тем алып, бой-бойыска болужып јӱредис. Је эмди бис ака-эјелериске канайып болужарысты шӱӱжип ийектер.

10. Бойыска кандый сурактар берер керек?

¹⁰ Бойоорды шиҥдеп кӧрӱгер. Биске бойыска мындый сурактар берер керек: «Мен ака-эјелеримге болужарга, бойымныҥ керектеримди јылдырып ийерге белен бе? Мени ака јажы јаан аканы кӧрӱп келзин, ол эмезе јажы јаанап калган эјени јуунга апарып келзин дезе, мен јӧпсинерим бе? Ол эмезе мени Каандыктыҥ Туразын ол эмезе курултай болотон јерди јунып ийзин деп, јӱс катап сураар керек пе?» Иегова бисти бойыстыҥ ийде-кӱчисти бир де кысканбай, ака-эјелерге болужар деп иженет. Нениҥ учун дезе бис Кудайга јӱрӱмисти учурлап салганыс. Бис ака-эјелеристеҥ нени де сакыбай, олорго акту јӱрегистеҥ болужып турзаас, Иегова Кудайыс сӱӱнер. Бу сурактарды кӧрӱп, сананып турала, бойыстыҥ уйан јанысты кӧрӱп ийген болзоос, нени эдерис?

11. Солынарга кӱӱнзебей турган болзоор, Иегованаҥ нени сураар эдеер?

¹¹ Мӱргӱгер. Темдектезе, слер бойоордыҥ уйан јанаарды кӧрӱп ийеле, јаан ла солынар кӱӱнеер келбей турган. Андый болзо, Иеговага мӱргӱп, нени де јажырбай, ӱзе куучындап береер. Анайда ок мӱргӱген тужыгарда, Иегованаҥ солынатан кӱӱн де, ийде-кӱч те сурагар (Флп. 2:13).

12. Чӧҥӱрилип калган јиит акалар јуунга канайып болужар аргалу?

¹² Слер јиит ака болзоор, Иегованаҥ јуундагы ака-эјелерге болужатан кӱӱн сурагар. Кезик ороондордо јуунда аксагалдар кӧп, а болушчы ишчилер бар да болзо, олордыҥ кӧп сабазы јажы јаанап калган болуп јат. Анайда ок Кудайдыҥ албатызына кӧп улус кожулат. Оныҥ учун јиит акалардыҥ болужы керек. Јуунда слер кандый ла ишти эдерге белен болзогор, Иегованы сӱӱндиререер, ака-эјелер слерди болужарга белен кижи деп кӧрӧр. Анайда ок бойоор до сӱӱнчи алараар.

13, 14. Бис ака-эјелерге канайып болужар аргалу? (Кадарындагы јурукты кӧрӱгер.)

¹³ Болужыгар. Б. э. 61 јылында апостол Павел ака-эјелерге мындый јӧп бичиген: «Јакшыны эдерге ле ӧскӧ улусла ӱлежерге ундыбагар. Андый тайылгалар Кудайга јарап јат» (Евр. 13:16). Бу сӧстӧр тоолу ла јылдаҥ сӱреен керектӱ болгон. Нениҥ учун дезе ака-эјелерге айылы-јуртын, Иеговага бӱтпей турган тӧрӧӧндӧрин, ижи-тожын артыргызып койоло, кырлардӧӧн качар керек болгон (Матф. 24:16). Ол кӱч ӧйдӧ олор бой-бойына болушпаган болзо, коркышту кӱч болор эди. Павелдиҥ бу јӧбин уккан ла кийнинеҥ тузаланып, ака-эјелерге болушкан улуска ол кӱч айалгада бир канча јеҥил болгон.

¹⁴ Кезикте ака-эјелерге кандый болуш керек болуп турганын билбей јадыс. Темдектезе, аканыҥ ӱйи божоп калган. Бу ака кандый бир курсак белетеерге, айылдыҥ ижин эдерге эмезе кайдӧӧн дӧ барып келерге турган болор. Је ол ака-эјелерге чаптык болбоско турган, оныҥ учун болуш  сурабастаҥ айабас. Оныҥ учун акага бис бойыстыҥ кӱӱнистеҥ болужып ийзеес, ол тыҥ сӱӱнер эди. Биске сананбас керек «ол ака удабас кем јок боло берер», ол эмезе «ого болуш керек болзо, ол бойы бистеҥ сурап ийер». Айдарда, бойыгардаҥ сурагар: «Мен мындый айалгада болуп калзам, меге кандый болуш керек болор эди?»

15. Кандый кижини болушту деп айдарга јараар?

¹⁵ Ака-эјелерге слердеҥ болуш сураарга јеҥил болзын. Слердиҥ јуунда болушту ака-эјелер бар ла болбой. Олордоҥ кандый ла ӧйдӧ болуш суразаҥ, олор болужып ийерге белен. Андый ака-эјелер болушты акту кӱӱнинеҥ эдет. Олор биске кӱчсинип болушкан деп санаалар да келбей јат. Бистиҥ кажыбыста ла мындый кӱӱн бар эмей. 40 јаштаҥ ажып калган Алан деп аксагал база болушту болорго албаданып јат. Ол Иисустыҥ улуска канайып болушканын сананып турала, мындый шӱӱлтеге келген: «Иисуска балдар да тартылып туратан, јаан да улуска оноҥ болуш сураарга јеҥил болгон. Оныла најылажарга да, куучындажарга да јеҥил болгон. Нениҥ учун дезе олор Иисустыҥ јобош болгонын, јалакай болгонын кӧрӱп туратан. Иисустыҥ темин кӧрӱп, мен де андый болорго албаданып јадым».

16. Сарын 119:59, 60-да бичилген принцип биске Иисустыҥ темиле јӱрерге канайып болужар?

¹⁶ Бис толо кеминде эмезис, оныҥ учун биске Иисустыҥ темиле јӱрерге кезикте келишпей јат (Иак. 3:2). Је бойыстаҥ чӧкӧбӧс керек. Кижиге јарлу јурукчы болуп каларга кӧп ӧй керек болот. Озо баштап ол бойыныҥ јастыраларынаҥ ӱренип јат. Анайда ок ол  кезик јарлу јурукчылардыҥ јуруктарын кӧрӱп ӱренет. Анайып ла бис Агару Бичиктеҥ билип алганысты тузаланып, тӱзединерге албаданып турзаас, Христостоҥ тем алып јӱрерге биске бир канча јеҥил болор. (Сарын 119:59, 60 кычырыгар.)

17, 18. Нениҥ учун улуска Иисус чылап болужар керек?

¹⁷ Кысканбас кижини кӧрӱп, кижи бойы да андый болорго кӱӱнзей берет. Тим деп бир аксагал куучындайт: «Бистиҥ јуунда јиит акалар кӧп. Калганчы ӧйлӧрдӧ олор кӧгӱс јанынаҥ сӱреен тӱрген ӧзӱп, эмди болушчы ишчилер болуп иштегилейт. Олордыҥ кезиги чек јиит. Олор кӧгӱс јанынаҥ нениҥ учун мындый тӱрген ӧскӧн? Нениҥ учун дезе бойын кысканбас ака-эјелердиҥ темин кӧргӧн. Эмди олор бойлоры да јуунныҥ ижин акту кӱӱнинеҥ бӱдӱрип, аксагалдарга јаан јӧмӧлтӧ болот».

¹⁸ Бу телекей јаҥыс бойын сӱӱп јат. Је Иегованыҥ Керечилериниҥ кӧрӱми чек башка. Бис Иисустыҥ улуска бойын кысканбай болушканын кӧрӱп, оноҥ тем аларга албаданадыс. Оныҥ изиле чип-чике барып болбой до турган болзоос, канча кире аргабыс бар тем алар аргалу (1 Пётр 2:21). Мыны кӧрӱп, Иегова сӱӱнип јат. Иегованы сӱӱндирип турганысты билгенистеҥ артык сӱӱнчи јок!