1. Dhanu pa Yehova gibenyutho pidoic ma ber ma kani?

 BIBLIA ular uyero con nia i the telowic pa Yesu, dhanu pa Mungu ‘bimiiri gigi ku berocwiny’ pi nitimo ni Yehova. (Zab. 110:3) Lembila maeno ubepong’o tin eni. Ku bang’ oro, dhanu pa Yehova gibenyutho amora, ma gibetimo ko saa milion dupa i tic mi rweyo lembanyong’a. Gibetimo tije ku berocwinygi m’umbe cul. Gibekoyo bende saa pi nikonyo juyic wagi i thenge mi tipo, i thenge mi kum, man ginyutho igi mer. Judong cokiri ku jukony tic gibed gitimo saa ma lee pi niyiko coko man niliewo umego ku nyimego pi nitielo cwinygi. Ang’o m’ubecwalu dhanu pa Yehova nitimo lembuno? Tie mer ma gimaru ko Yehova man ma gimaru ko dhanu wagi.​—Mat. 22:37-39.

2. Calu ma jukoro i Jurumi 15:1-3, Yesu uweko iwa lapor ma kani?

² Yesu uweko iwa lapor ma ber, kum ebed eketho yeny mi jumange i wang’ yeny pare gire. Wan de wabetimo kero nilubo batiende. (Som Jurumi 15:1-3.) Ju ma gibelubo lapor pare gibinwang’u bero. Yesu uwacu kumae: “Nimiyo nyayu anyong’a lee ma sagu nigamu agama.”​—Tic. 20:35.

3. Wabineno lembang’o i thiwiwec maeni?

³ I thiwiwec maeni wabineno lembe moko ma Yesu utimo pi nikonyo jumange man kite ma wacopo lubo ko lapor pare. Wabineno bende ayi ma waromo medo ko ava mwa mi timo ni jumange.

4. Yesu uketho yeny mi jumange nenedi i wang’ pare?

⁴ Yesu ukonyo jumange kadok nwang’u eol. Kepar pi gin ma Yesu utimo kinde m’udul dhanu ubin unwang’e i kum got, ma cicopere ubino ceng’ini ku Kapernaum. Yesu urwo diewor traka. Ubenen nia nwang’u eol lee, re kinde m’eneno udul dhanu, kisa unege i kum jucan ku jurutwoyo m’i kindgi. Ekeyo ngo kumgi akeya kende, ento emiyo igi bende ponji ma pire tek ma julwong’o nia ponji pa Yesu iwi got.​—Luka 6:12-20.

5. Juwi ot gibelubo lapor pa Yesu nenedi kadok nwang’u gioli?

⁵ Kite ma juwi ot gibelubo ko lapor pa Yesu. Kepar pi lembe ma e: Reto dhug uthieno i ng’ei tic ma duu, wego moko udwogo m’eol yereyere i pacu. Kadok nwang’u emito erany thier mi juruot ma cing’ nica, re ekwayu Yehova umii ire tego kara etel wi thierne. Yehova udwoko wang’ rwo pare, e thier migi mi juruot ukadhu ma ber calu ma naka. Awiya ginwang’u ponji ma pire tek uthieno ma cing’ nica nia, gin ma pire tek nisagu zoo ni jurunyodo migi utie lembe mi tipo.

6. Kemii lapor m’unyutho nia Yesu utiyo ku saa pare ma nwang’u umito ebed ko kende pi nikonyo jumange.

⁶ Yesu utiyo ku saa pare mi yom pi nikonyo jumange. Iparu nia Yesu uwinjere nenedi kinde m’ewinjo juthumo wi jarimbe ma Yohana ma jababutisi? Copere nia can unege lee mandha. Biblia uwacu nia “kinde ma Yesu uwinjo [pi tho pa Yohana], emaku yei ecidho kaka ma dhanu mbe i iye kara ebed kende.” (Mat. 14:10-13) Wacopo nyang’ nia pirang’o emito ebed kende. Dhanu moko bemito gibed kendgi i saa mi can ma kumeno. Re egam ecopere ngo ni Yesu nia ebed kende, kum udul dhanu ma dit ular ucoro i wiye. Yesu utimo ang’o saa maeno? Eneno yeny mir udul dhanu man “kisa unege i kumgi.” Enyang’ nia gibino ku yeny mi kony man jukocwiny pa Mungu, e ndhundhu ecaku konyogi. Nenedi? “Ecaku ponjogi ku lembe dupa.”​—Mark. 6:31-34; Luka 9:10, 11.

7-8. Kemii lapor m’unyutho kite ma judong cokiri gibelubo ko lapor pa Yesu kinde ma ng’atu moko utie ku yeny mi kony i cokiri.

 ⁷ Kite ma judong cokiri gibelubo ko lapor pa Yesu. Watie ku foyofoc ma lee pi tic mi miyiri ma judong cokiri gibetimo pi nikonyowa! Dupa mi tic ma gibetimone nen ungo kamaleng’ i cokiri. Ku lapor, ka lembtwoyo moko uwok, ju ma timo i Komite ma diko kind umego ku odiyath gitimo pio pi nikonyo umego ku nyimego. Wang’ ma pol lembe ma pio pio maeno bewok diewor! Kisa ma judong cokiri mwa maeno ma jumer ku juruot migi gitie ko i kum umego, cwalugi niketho yeny mi juyic waggi utel yo i wang’ migi.

⁸ Judong cokiri gidikiri bende i tic mi giero udi Ker, ku udi mange man i tic mi miyo kony ni ju ma peko ma wok rek unwang’ugi. Gitimo bende saa ma lee pi niponjowa i cokiri, nitielo cwinywa man nikonyowa. Wabedwoko foyofoc ma lee dit ni umego maeno ku juruot migi bende. Wek Yehova ukonygi pi pidoic ma ber maeno ma gibenyutho! Re calu jumange i cokiri, judong cokiri de gitie ku yeny mi ketho rom rom i lembe ma gibetimo. Gicikiri ngo nitimo saa ma lee akeca i tic maeno mi theokrasi ma dong’ giwil ko nigwoko juruot migi.

9. Nimakere ku Jufilipi 2:4, 5, pidoic ma kani ma Jukristu ceke gicikiri nibedo ko?

⁹ Som Jufilipi 2:4, 5. Pi nilubo lapor pa Yesu, judong cokiri kendgi ngo re  m’ukwayu nia giketh yeny mi jumange i wang’ migi, ento wan ceke. Biblia uyero nia Yesu ‘udoko calu ng’eca.’ (Filip. 2:7) Kepar pi ponji ma wacopo nwang’u i lembe maeno. Ng’eca kunoke jaratic ma ber, sayu ninyayu anyong’a i rwoth pare. Calu itie ng’eca pa Yehova man jaratic ni umego peri, m’umbe jiji ibemito piri ubed tek ni Yehova man ni juyic wedwu bende. Lembe m’ulubo e copo konyi kara piri ubed tek.

10. Wacopo penjara ku penji ma kani?

¹⁰ Ng’ii i pidoic peri. Penjiri ku penji ma calu ve: ‘Nyo abed abedo ayika nitiyo ku saa para man tego para pi nikonyo jumange? Ku lapor, abed atimo ang’o tek jukwayu nia acidh amii kony ni umego moko ma tiyo ugonjo i pacu, kunoke nitero nyamego moko m’utii i coko? Nyo kuma bebedo mor niwodhara niciyiko kaka coko ma dit mir adhura, kunoke niyiko kum Ot Keri?’ Anyong’a nego Yehova kan ebeneno wabecerara ngo nitiyo ku saa mwa, man ku piny mwa mange ceke ma wang’olo nia wabitimo ko ire pi nikonyo jumange. Dong’ ka waneno nia ukwayu watim alokaloka moko, mito watim ang’o?

11. Rwo copo konyowa nenedi nibedo ayika nikonyo jumange?

¹¹ Rwo ni Yehova kud adundeni ceke. Wakemak nia ineno ya ukwayu itim alokaloka moko pi nikonyo jumange, re maru mi timo alokalokane umbe i ii. Saa maeno mito itim ang’o? Rwo i bang’ Yehova kud adundeni ceke. Kor ire kite m’ibewinjiri ko man kwaye emii iri “ava man kero mi timo” alokalokane.​—Filip. 2:13.

12. Umego m’aradu m’ulimo batizo copo konyo cokiri pare nenedi?

¹² Tek itie umego m’aradu m’ulimo batizo, kway Yehova ukonyi ibed kud ava lee mi konyo umego ku nyimego i cokiri. I ng’om moko, wend judong cokiri tie lee nisagu jukony tic, man dupa m’i kind jukony ticne ke gidaru tii. Calu ma mediri utie lee i dilo pa Yehova, watie ku yeny mir umego m’aradu lee pi nikonyo judong cokiri nigwoko umego ku nyimego i cokiri. Tek itie ayika nitimo ayi tic moko ci m’ubekwayere nia itim, ibibedo kud anyong’a. Pirang’o? Pilembe ibinyayu anyong’a i Yehova, umego gibineno nia itie ayika nikonyogi, man ibinwang’u anyong’a ma jubedo ko ka jubekonyo jumange.

13-14. Wacopo timo ang’o pi nikonyo umego ku nyimego mwa? (Nen cal m’i ng’eye.)

¹³ Bed ng’atu ma neno yeny mi jumange. Jakwenda Paulo uyero ni Juebrania kumae: “Wiwu kud uwil ku timo bero man nikonyo dhanu mange ku piny mwu, kum lam ma kumeno nyayu anyong’a lee i Mungu.” (Ebr. 13:16) Eno ubino juk ma ber mandha! Nyanok i ng’ei ma Jukristu maeno ginwang’u barua eno, ugam ukwayere nia giwek udi migi, kuloka migi, wedi migi ma juyic ungo, man “gicak ringo iwi got.” (Mat. 24:16) M’umbe jiji, saa maeno gibino ku yeny m’umito gikonyiri ko i kindgi. Tek i wang’e gibed gitiyo ku juk ma Paulo umiyo igi pi nikonyiri i kindgi, gicopo nwang’u nia etie yot ning’iyo ku kit kwo maeno ma nyen.

¹⁴ Saa moko umego ku nyimego mwa ginyutho ngo iwa pi gin ma gitie ku yenyne. Ku lapor, min ot p’umego moko  copo tho. Nyo mito jukony umego mwa eno ku cam, ku traspor, kunoke ku tic mange ma thindho thindho mi oti? Lworo copo nege nikwayu kony i bang’wa, kum nwang’u ebemito ngo nia ebed iwa ni ter. Re ecopo foyo lee tek wakonye ma fodi ekwayu ngo konyne akwaya. Wacikara ngo niparu nia ng’atu mange bikonye, kunoke nikuro nia saa ceke ebed ekwaywa akwaya. Kepenjiri kumae: ‘Ka nang’ eca tie an, acopo maru jumii ira kony ma nenedi?’

15. Ukwayu watim ang’o tek wabemito wakony jumange?

¹⁵ Bed ng’atu ma jukwayu kony i bang’e nya yot yot. M’umbe jiji, ing’eyo umego ku nyimego m’i cokiri peri ma saa ceke gitie ayika nikonyo jumange. Giketho ngo wanen nia wabebadhu cwinygi. Wang’eyo nia gitie ayika nikonyowa, man wan de wacopo maru wabed tap ve gin! Alan ma tie jadit cokiri ma oro pare 45, umito ebed ng’atu ma jukwayu kony i bang’e yot yot. Eyero pi lapor pa Yesu kumae: “Yesu ubino ku lembe lee i wang’e, re judongo kud awiya ceke gimare man gibino mbe ku lworo mi kwayu kony i bang’e. Gibed ginene ni ng’atu ma dieng’ cuu pigi. An de amito abed calu Yesu man abed ng’atu ma jukwayu kony i bang’e, m’umaru dhanu, man ma dieng’ pi jumange.”

16. Tiyo ku lembe m’i Zaburi 119:59, 60, copo konyowa nenedi nilubo lapor pa Yesu tap tapi?

¹⁶ Cwinywa kud utur tek wanwang’u nia lubo lapor pa Yesu tap tap ubevoyowa. (Yak. 3:2) Ng’atu m’ubeponjo tic mi bodho i bang’ jabodho moko, copo sagu ngo japonji pare. Ento tek ebenwang’u ponji i kum kosa m’ecukutimo man ebeii niporo bang’ japonji pare cuu mandha, ebimedere ning’eyo bodhone ma ber. Kumeno bende, tek wan de wabetiyo ku gin ma wanwang’u i ponji mwa ma segi mi Biblia, wabeii nikabu kosa moko ci ma watie ko, wabitundo nilubo lapor pa Yesu tap tap.​—Som Zaburi 119:59, 60.

17-18. Wabinwang’u bero ma kani tek watie ku pidoic mi timo ni jumange calu Yesu?

¹⁷ Ka wabetimo ni jumange, dhanu mange de bilubo lapor mwa. Jadit cokiri moko ma nyinge Tim uwacu kumae: “Watie kud umego m’aradu ma gidoko jukony tic ma fodi oro migi nok. Gin m’uketho gidoko jukony tic i oro maeno utie pilembe gibed gineno umego mange ma gibino ayika nikonyo jumange i cokiri, man gimito gin de gibed ve umegonegi. Aradu maeno gibekonyo cokiri mwa man gibemiyo kony bende lee ni judong cokiri.”

¹⁸ Tin wabekwo i ng’om ma ng’atuman dieng’ pire gire. Pidoic ma Yesu ubino ko mi timo ni jumange utelo nen mwa lee, uketho wan de wakeco nilubo lapor pare. Andha, wacopo lubo ngo ba tiende ma nia kosa moko kud uvuth iwa, re wacopo ‘kwanyu ba tiende tap tap.’ (1 Pet. 2:21) Ka wabetimo kero nibedo ku pidoic mi timo ni jumange calu Yesu, wabibedo kud anyong’a pilembe wabenyayu mutoro i Yehova.