1. ¿Kunjam chuymanïpjjatapsa Diosan servirinakapajj uñachtʼayapjje?

 JEHOVÁ DIOSAN markapajj taqe chuymaw Jesusan pʼeqtʼatajj Jupar servini sasaw Bibliajj jaya tiempökipan säna (Sal. 110:3). Uka profeciajj jichha tiemponwa phoqasiski. Diosan servirinakapajja, sapa maraw jan khitin obligata walja millón horanaka taqe chuyma predicapjje, uk lurapjjatapat janiw khitis jupanakar pagkiti. Jupanakajja jilat kullakanakapar jañchi toqet yanaptʼañataki, chʼamañchtʼañataki, Diosar serviñan yanaptʼañatakiw tiempo apstʼasipjje. Janiw ukakïkiti, ancianonakasa siervo ministerialanakasa walja horanakaw asignacionanakap wakichtʼasiñatakisa, jilat kullakanakar chʼamañchtʼañatakis tiempo apstʼasipjje. Jupanakajj Jehová Diosaru, jaqe masipar munasipjjatap laykuw taqe ukanak lurapjje (Mat. 22:37-39).

2. Romanos 15:1-3 textorjamajja, ¿kunsa Jesusat yateqassna?

² Jesusajj jupa pachpat llakisiñat sipansa, mayninakatwa llakisïna, cristianonakajj jupat yateqasiñatakiw wal chʼamachasiñasaraki (Romanos 15:1-3 liytʼäta). Ukham lurañäni ukhajja, walja askinakwa jikjjatañäni. Jesusajj akham sänwa: “Katoqañat sipansa churañanwa jukʼamp kusisiñajj utji” sasa (Hech. 20:35).

3. ¿Kunanakatsa aka yatichäwin yatjjataskañäni?

³ Jesusajj kunanaksa mayninakar yanaptʼañatakejj luräna, kunsa jupat yateqassna, ukanakatwa aka yatichäwin mä qhawqhanak yatjjataskañäni. Ukatjja mayninakar yanaptʼañ munañatakejj kunsa lursna uksa yatjjataskarakiñäniwa.

4. ¿Kunjamsa Jesusajj jupa pachpat llakisiñat sipansa mayninakat llakisitap uñachtʼayäna?

⁴ Jesusajj qaritäkasas mayninakar yanaptʼänwa. Jesusajj mä qollu thiyankaskänwa, inas Capernaúm marka jakʼankaskchïna. ¿Jupan ukar walja jaqenak jutir uñjasajj kunsa lurpachäna uk amuytʼasmati? Jupajj arum paqaraw orasïna, ukhamajj wali qaritäpachänwa. Ukampis taqe uka jaqenakar uñjasajja, pobrenakatsa usutanakatsa wal khuyaptʼayasïna. Janiw usutanakaruk qollkänti, jan ukasti wali chʼamañchtʼkir discurswa Qollun arstʼarakïna (Luc. 6:12-20).

5. Familia pʼeqtʼirinakajj wali qaritäpki ukhajja, ¿kunjamsa Jesusat yateqasisa familiapar munasitap uñachtʼayapjje?

⁵ ¿Familia pʼeqtʼirinakajj kunjamsa Jesusat yateqasipjje? Akham amuytʼañäni: mä awkejj wali qaritaw trabajopat utapar puri. Uka arumajj Familjamaw Bibliat Yatjjatapjjañapa. Wali qaritäsajja, yaqhürutakiw jittʼayañ muni, ukampis Jehová Diosaruw chʼam churañapatak mayisi. Diosasti oracionaparojj istʼiwa, ukatjja kunjamtï sapa semana Familjam Bibliat Yatjjatapjjerïki ukhamwa yatjjatapjje. Uka arumajja, awk taykapatakejj Diosar serviña nayrankatapwa wawanakapajj yateqapjje.

6. Mayninakar yanaptʼañatakejj kunjamsa Jesusajj tiempo apstʼasïna uk qhanañchtʼam.

⁶ Jesusajj mayninakar yanaptʼañatakejj tiempo apstʼasirïnwa. Jesusajj Bautisir Juanar jiwayapjjatap yatisajja, ¿kunjamakis jikjjataspachäna uk amuysnati? Jupajj wali llakitäpachänwa. Bibliajj akham siwa: “Uk istʼasasti Jesusajj mä chʼusa cheqaruw botet sarjjäna, sapakïñ munasaw ukar saräna” sasa (Mat. 14:10-13). Kunatsa sapakïñ munäna uk amuysnawa. Cheqas maynin jiwatapatjja, yaqhepanakajj sapakïñwa munapjje, ukampis Jesusajj janiw sapakïñ puedkänti. Sapakïñataki jaya cheqar saräna ukanjja, walja jaqenakaw jupar suyjjapjjäna. Uk uñjasajj ¿kunsa lurpachäna? Uka jaqenakan yanaptʼatäñ munapjjatap amuyasajja, “jupanakat walpun sinttʼasïna”. Uka jaqenakajj Diosan chuymachtʼatäña yanaptʼatäñ munapjjatapwa amuyäna, ukatsti jankʼakiw jupanakar yanaptʼäna. ‘Kunayman toqenakat yatichañwa qalltäna’ (Mar. 6:31-34; Luc. 9:10, 11).

7, 8. Maynejj yanaptʼatäñ munki ukhajja, kunjamsa ancianonakajj Jesusat yateqasipjje uk qhanañchtʼam.

 ⁷ ¿Munasir ancianonakajj kunjamsa Jesusat yateqasipjje? Ancianonakajj jiwasar yanaptʼañatak kuntï lurapki uk wali valoranitwa uñjtanjja. Kunsa jupanakajj lurapjje uk janiw taqenejj yatktanti. Sañäni, Comités de Enlace con los Hospitales ukan yanaptʼiri jilatanakajja, mä emergencia utji ukhajj jankʼakiw jilat kullakanakarojj yanaptʼapjje, awisanakajj chika arumanakaw yanaptʼir sarapjje. Ukampis uka munat ancianonakasa familianakapas jupanak pachpat llakisiñat sipansa, jan walin uñjasipki uka jilat kullakanakat khuyaptʼayasisaw ukanak lurapjje.

⁸ Tantachasiñ Uta lurañanakansa ukat yaqha ukham lurañanakansa ancianonakajj yanaptʼapjjarakiwa, labores de socorro ukansa yanaptʼapjjarakiwa. Janiw ukakïkiti, congregacionanakapan jilat kullakanakar yatichañatakisa, yanaptʼañatakisa, chʼamañchtʼañatakis tiempo apsusipjjarakiwa. Taqe uka ancianonakarusa familianakaparus taqe chuymaw felicittʼañasa. Jehová Diosajj ukham chʼamachasipjjatapat bendisiñapwa munaraktanjja. Cheqas ancianonakasa taqe cristianonakasa, taqe kunatakiw tiempo apstʼasipjjañapa, janiw mayaruki chuym uchapjjañapäkiti. Janiw kuna lurañanakapatï congregacionapan utjki ukaruki chuym uchapjjañapäkiti, familiapar yanaptʼañatakis tiempo apstʼasipjjañaparakiwa.

9. Filipenses 2:4, 5 textorjamajja, ¿kunjam amuyunïñatakis taqe cristianonakajj chʼamachasiñasa?

⁹ (Filipenses 2:4, 5 liytʼäta). Cheqas janiw taqenis ancianöktanti, ukampis Jesusatwa  mayninakat llakisiñ yateqsna. Jupajj ‘mä esclavoruw tuküna’ sasaw Bibliajj qhanañchi (Filip. 2:7). ¿Kunsa uka arunakajj yatichistu? Mä suma esclavosa jan ukajj mä suma servirisa, uywiripar kusisiyañatakiw chʼamachasi. Jiwasanakajj Jehová Diosan esclavopätanwa, jilat kullakanakan serviriparakïtanwa, ukhamajj Diosatak valoranïñwa muntanjja, jilat kullakanakatakis mä suma yanaptʼäñwa munaraktanjja. ¿Kunjamsa ukanak lursna? Ukanakat mä qhawqha ewjjtʼanak uñjañäni.  

10. ¿Kunanaksa jisktʼasiñasa?

¹⁰ Kunjam chuymanïtansa ukwa amuytʼasiñasa. Akhamwa jisktʼassna: “¿Naya pachpat llakisiñat sipansa mayninakar yanaptʼañatakejj dispuestokïtti? Mä jilïr jilataru jan ukajj mä jilïr kullakar visittʼañataki jan ukajj tantachäwinakar apañataki mayipjjetu ukhajj ¿kunsa lurtjja? ¿Kawkjantï asambleajj apaskani uka lugar qʼomachañataki jan ukajj Tantachasiñ Uta askichañatakejj jankʼakit sartjja?” sasa. Jehová Diosar jakäwis katuyasktan ukhajja, taqe kunanakatï utjkitu ukampiw jumar servïma sasaw arsuwaytanjja. Ukhamajj mayninakar yanaptʼañataki tiempo apstʼassna, kunanakatï utjkistu ukanakampis mayninakar yanaptʼaraksna ukwa jupajj muni. Taqe ukanak jan kun katoqañ suyasa lurtan ukhajja, Jehová Diosajj wal kusisi. Ukanakan jukʼamp chʼamachasiñas wakisitap amuyasstan ukhajja, ¿kunsa lursna?

11. ¿Kunjamsa Diosar mayisiñajj mayninakar yanaptʼañ munañatak yanaptʼistaspa?

¹¹ Taqe chuymaw Jehová Diosar mayisiñasa. Mä kunan chʼamachasiñas wakisitap amuyasstan, ukampis uk lurañatak jan ganasajj utjkchistu ukhajja, Jehová Diosaruw taqe chuyma mayisiñasa. Kunjamas jikjjatastan uk qhanwa yatiyañasa. ‘Munañam lurañ munañatakisa phoqañatakis chʼam churita’ sasaw jupar mayiñasa (Filip. 2:13).

12. ¿Bautisata wayna jilatanakajj kunjamsa Diosan markapar yanaptʼapjjaspa?

¹² ¿Waynäsktati, bautisatarakïtati? Ukhamächi ukhajja, congregacionan jukʼamp luräwinak lurañ munañatakiw Jehová Diosar yanaptʼa mayiñama. Yaqhep lugaranakanjja ancianonakaw siervo ministerialanakat sipansa jukʼamp jila utjapjje, uka siervo ministerialanakat waljanejj jilïrëjjapjjewa. Niyakejjay Diosan markapajj jukʼamp jiljjattaskakchejja, ancianonakajj wayna jilatanakan yanaptʼapwa Diosan markap cuidañatakejj munapjje. Wayna jilata, kawkjantï yanaptʼajj munaski ukan serviñatak jankʼakïyäta ukhajja, Diosan chuymap kusisiyasajj kusisitarakïyätawa. Mayninakar yanaptʼañatakejj jankʼakïtam jilat kullakanakajj amuyapjjaniwa, mayninakar yanaptʼasajj jumas kusisitarakïyätawa.

13, 14. ¿Kunsa jilat kullakanakar yanaptʼañatakejj lursna? (Nayrïr paginankir dibujo uñjjattʼäta).

¹³ Kunansa maynejj yanaptʼatäñ muni uk amuyañasawa. Judean jakasiri cristianonakarojj akham sasaw apóstol Pablojj cartapan ewjjtʼäna: “Kunatï walïki uk lurañsa kunanakatï utjapktam ukanakamp mayninakar yanaptʼañsa jan armasipjjamti, Diosarojj ukham sacrificionakaw wal kusisiyi” sasa (Heb. 13:16). Uka arunakajj wali yanaptʼkirïnwa. Carta katoqapkäna uka qhepatjja, Judea markankir jilat kullakanakajj utanakapa, negocionakapa, jan cristianöpkäna uka familiaranakap jaytjjasajj ‘qollunakaruw escapjjapjjäna’ (Mat. 24:16). Uka tiemponjja, maynit maynikam yanaptʼasipjjañapajj wali wakiskirïnwa. Jupanakatï nayratpach Pablon ewjjtʼaparjam maynit maynikam yanaptʼasiñ yateqapjjchïna ukhajja, qollunakar escapjjapjjäna ukhajj kunanakapatï utjkäna ukanakampejj kusisitakiw jakasipjjpachäna.

 ¹⁴ Kunansa yanaptʼatäñ munapjje uk janiw jilat kullakanakajj sapkapunistaspati. Mä viudo jilatat amuytʼañäni. ¿Kunan yanaptʼatäñsa muni? ¿Manqʼat phaytʼarapiña, autot apañach wakisi, jan ukajj utan lurañanakampi yanaptʼañach wakisi? Jupajj jan mayninakar llakisiyañ munasajj janiw yanaptʼa maykaspati. Janis yanaptʼa maykchistanejja, jiwasatï jupar yanaptʼañäni ukhajj wal yuspäristani. Mayninakaw yanaptʼaskani jan ukajj yanaptʼa munani ukhajj mayitaniwa sasajj janiw amuyañasäkiti. Akhamwa jisktʼasiñasa: “Nayatï jupïrista ukhajja, ¿kunan yanaptʼatäñsa munirista?” sasa.

15. ¿Mayninakar yanaptʼañ munstan ukhajj kunsa lurañasa?

¹⁵ Jiwasar yanaptʼa mayiñ janiw ajjsarapjjañapäkiti. Congregacionasanjja, yaqhep jilat kullakanakajj mayninakar yanaptʼañatakejj jankʼakïpjjewa. Jupanakajj taqe chuymaw yanaptʼapjje. Yanaptʼa munsna ukhajja, jupanakar jakʼachasiñ janiw ajjsarksnati, uka jilat kullakanakatwa yateqasiñasa. 45 marani Alan sat mä anciano jilatajja, jupar yanaptʼa mayiñ jan ajjsarapjjañapatakiw chʼamachasi. Jesusajj kunjamänsa uka toqet amuytʼasajja, jupajj akham siwa: “Jesusajj janiw tiemponïkänti, ukhamäkchïnsa, wawanakasa jilïr jaqenakas taqeniw jupampïñ munapjjäna, jupar yanaptʼa mayiñ janiw ajjsarapkänti. Jesusajj jupanakat cheqapun llakisitapwa yatipjjäna. Nayajj Jesusjamäñwa munta, taqenin jakʼachaskaya, munasiri, yanaptʼañatakis jankʼaki ukhamäñwa munta” sasa.

16. Salmo 119:59, 60 qellqatajj ¿kunjamsa Jesusat sum yateqasiñatak yanaptʼistu?

¹⁶ Janis Jesusat taqe kunpun yateqasiñ puedkchiñänejja, janiw aynachtʼañasäkiti (Sant. 3:2). Sañäni, mä yateqerejja janiw kunjamtï yatichiripajj lurki ukhampun lurkaspati, ukampis pantjasitanakapat yateqani, yatichiripjamäñatak  chʼamachasiskakini ukhajja, jukʼat jukʼat jukʼamp sumwa lurjjani. Jiwasampejj niya ukhamarakiwa, Bibliat sapaki yatjjatasajj kunanaktï yateqktan ukarjam lurañäni, jan pantjasiñatak chʼamachasiskakiñäni ukhajja, Jesusat jukʼamp sumwa yateqasiñäni (Salmo 119:59, 60 liytʼäta).

17, 18. Jesusajj jupa pachpat llakisiñat sipansa mayninakatwa llakisïna, jupat yateqasiñäni ukhajj ¿kuna askinaksa jikjjatañäni?

¹⁷ Jiwasatï mayninakar yanaptʼañatak jankʼakiñäni ukhajja, yaqhanakajj jiwasjamarakiw lurapjjani. Tim sat mä anciano jilatajj akham siwa: “Congregacionajanjja, yaqhep waynitunakajj siervo ministerialatwa sirvjjapjje. Waljanakaw ukham amtapjjañapatakejj yanaptʼawayi. Ukanakat mayajja kunjamsa mayninakajj yaqhanakar yanaptʼañatakejj jankʼakïpjje uk uñjañaw uka waynitunakar yanaptʼawayi. Ukham yanaptʼasirïpjjatapajj congregacionar wal yanaptʼi, ancianonakatakis mä suma yanaptʼäpjjarakiwa” sasa.

¹⁸ Diosar jan uñtʼapki uka jaqenakajja, jupanak pachpatakwa llakisipjje, ukampis Jehová Diosan servirinakapajj janiw ukhamäktanti. Jesusajj janiw jupa pachpatak llakisirïkänti, ukaw jiwasarojj jupat yateqasiñatak chʼamañchistu. Cheqas janiw Jesusat taqe kunpun yateqasiñ puedksnati, ukampis ‘kayup wali amuyumpiw arksna’ (1 Ped. 2:21). Jesusajj jupa pachpat llakisiñat sipansa mayninakatwa llakisirïna. Jiwasatï ukham lurañatak chʼamachasiñäni ukhajja, Jehová Diosajj kusisiniwa, jiwasas kusisitarakïñäniwa.